ما هو الحل مع هذا الرجل
 

بسم الله الرحمن الرحيم

اخواني واخواتي

الشهر عليكم مبارك

عندي مشكله وخايف اتهور وسوي شي غلط

فيه واحد مقلقني في عيشتي كل ما شافني اعرس اعرس

في المجالس وقدام الناس اعرس ليش ماتعرس استح على وجهك كل الناس تزوجت

انت فيك عاهه طبيه انت مو رجال حتى قدام الناس يحطني في مواقف محرجه

بعض الأيام ارد عليه وبعض الأيام اقول خلك في حالك مالك شغل في احد

يعني كل الشباب ساكتين إلا هو

وانا امسك اعصابي ما ابي اقاطعه الأن لو قاطعته راح اقطع ناس ثانين بسببه

اهو ساكن مع اهل مصاريف الزواج كلها من ابوه ماطلع قرض لزواجه

بس انا عكس شوي السكن راح اسكن لوحدي وهذا قراري وقرار الوالد لكي ارتاح وهو يرتاح

ثاني شي انا اعرف ظروف الوالد الله يحفظه

ثالث شي علي بعض الإلتزامات ماليه وبإذن الله نهاية السنه هذي راح تنتهي او قبل منها

وانا مخطط للزواج السنه القادمه بإذن الله

طبعاً الحمدلله والشكر وهذا من فضل الله انا انخطبت اكثر من مره (طبعاً انا رجل ممكن احد ما يميز الأسم)

سواء إلي بنته ربت بيت او موظفه حتى الي بنته موظيفه يقول وانت وياها تشيلون بعض و المدرسه احسن لك

طبعاً غير الي وصى علي بعض الناس لكي يكلموني وغير إلي يلمح لي

بس انا ما ابي ارتبط ولا اخطب حتى اخلص اموري واعرف وش انا عليه

طبعاً ما اقول هذا فخر لا والله

واخرتها ممكن قبل ثلاثه اسابيع احد الشباب قال فلان متصل علي يبي يزوجك

دعواتكم لي بإن الله ييسر علي قضاء هذا الدين قبل نهاية هذه السنه وان يرزقني بالزوجه الصالحة

اسف على الكلام الغير مرتب

ولكم خالص إحترامي

اهم معاه بجلسة خاصة بحزم وجرأة ولكن بدون انفعال واخبره ان هذا الامر مايخصك واخبره انك تحترمه والا احرجتك امام الناس لو استمريت

كيف شخصيتك ؟

إذا كنت إنسان جريء وإجتماعي مع الكل ربما يكون يمزح معك أو يحب يثيرك وتتكلم معه أكثر !

وإذا كنت إنسان هادىء مسالم أتوقع جالس يستعرض عضلاته عليك ، لازم تكون أكثر حزم معه

إما تكلمه على حده وبهدوء حتى ماتخسر أصحابك عن طريقه

أو تحاول تطنشه ولا كأن أحد يتكلم وإستغبي معه وكما قالوا : سيد قومه المتغابي

وإن شاءالله يفهمها

ويـــارب ييسر أمرك ويفرجها عليك ويوفقك ويرزقك بالزوجة الصالحة اللي تعيينك

وتسعدها وتسعدك .

الحل انك تدخل الكلام من اذن وتطلعه من اذن
ولو انا منك اقول له تحسبني زي بعض الشباب ابوهم يساعدهم
لا انا رجال واشيل نفسي وبنفسي
خله يبلع كلامه قبل لا يكلمك ويضرب لك الف حساب ويحرم يتفلسف على احد

ارسله رسالة على جواله وضح فيها ان كلامه يضايقك وان مزحه زاد عن اللزوم

مو كلها سنه يا خوي
اصبر على دفاشة بعض الناس
والله ييسر امورك

تجد من بعض الناس يريد لك الخيـــر

ولكنهم يجهلون كيف يثحدثون ولا يعرفون التعبير

ولا يفكرون بمصاريف الزواج وتحمل المسؤليات

ومثل ما قلت أن والده تحمل مصاريفه هذا يحسب الناس مثله

ولا تشره عليه خذه على قد عقله وقله ما يصير ألا كل خيــر

والله يسعدك ويسهل أمرك ويرزقك بالعروس اللي تسعدك وتر عينك

والله ييسر أمر ويرزقنا وأياك والمســلميــن من حيث لا نحتسب

ما اقول الا ياشين اللقافه اوووووووووووووووووووف متى بس متى بنتطور ونخلي كل انسان في حاله ويشغلنا اشياء اهم من احوال الناس


والله يعينك ومالك الا التطنيش