|
مشكلة أنا وأخي وبنات عمي !
السلام عليكم أنا مابي أطيل عليكم قبل لاقول موضوعي ... لاحد يحب وحده الا بعد مايخطبها لايروح فيها مثلي أنا حبيتلي وحده وليتني ماحبيتها....العواقب جات مش عالكيف وعدتها وياكثر الخطاب رفضتهم وأمنت وتطمنت اني جايها لكن أخوي اللي أكبر مني اللي مفروض يتزوج قبلي خطب وملك على أختها !!! عندي 4 عمام وأخوي خطب من عم وأنا أبي أختها ويوم صارت وعرف الجميع اني ابي اخت زوجتة اخوي زعل ابوي وعمي الاول والثاني والثالث وللأسف العم الرابع أبو البنتين هو الكبير لكن الله يرحمه مو فيه يسكتهم انا ماكل هوا ومتعذب ومحتار فعملت حركه ادري انها بايخه ولاني قد عواقبها ارسلتلها رساله قلت انا كنت العب عليك لا اكثر ولا اقل بس ابيها تكرهني وتشوف دربها لانها ماراح تكون من نصيبي واقولها انتي مو البنت الوحيده اللي اعرفها ومن كثرهن ماعرف عددهن لين صدقت والله اعلم الزبده بنهار رمضان دعت علي وتقول يارب تنتقم من ظالمني وربي لايوفقك ودعت علي لين شبعت وادعيه قويه واخرها تقول آميييين انا مادري هل انا الظالم ولا عمامي ؟؟؟ وربي خايف من دعوة المظلوم....والزواج قلت لأمي ماراح أتزوج لين ربك يفرجها وداخل قلبي ونيتي ماراح اتزوج. شكرا لكم....احمد |
ارسلتلها رساله قلت انا كنت العب عليك لا اكثر ولا اقل
ياأخي الحبيب أخطأت بتصرفك هذا وأشعرت الفتاة بأنها مخدوعة وشوهت صورتك وسمعتك حاول تدارك خطأك بدون إعادة أي علاقة مع الفتاة |
غلطان
وضح لها الامر ولا تجرح البنت وتدمي قلبها لو تخبرها الحقيقه احسن قد تتضايق هي من الصراحه ولاكن لن تتضايق منك وقد تستطيع ان تحل الموضوع من ناحيتها والله يوفقكما للذي فيه الخير |
تفكيرك سليم وانت بالحقيقة ما خدعتها ولا ظلمتها ...
انت بالعكس بينت لها شي من صالحها بعدين ... اذا كنت شخص حاولت بشتى الطرق للوصول اليها ولم تستطع فهذا اظنة الحل المناسب حتى تكرهك وتشوف غيرك وتشوف مصلحتها حتى لو ظنت انك واحد كذاب فأنت عند ربك شخص غير كل هذا وهذا هو الاهم .. الله يوفقك ببنت الحلال اللي تنسيك همك وانا اخوك وخل حبك بعد الزواج مو قبلة ... ؟؟ |
اقتباس:
ليش يزعلون ؟ وش السبب ؟ |
وش فيها إذا أخذت أخت زوجة أخوك؟!! عمامك ليه معارضين؟
|
الصدق كااان اهووون من ها الكذبه الي مكان لها داعي ابدا
وبعدين لزم اتحاااول تصلح .. وتفهمهم انه هذا زواج ومب لزم يزعلوون الأهل عشان خذت من عم واحد ... حاااول تجلس معاهم وتصارحهم او خل حد من الي كلمته مسموعه عندكم يتفاهم و يوضح الأمر لهم ... والله يكون في عونك اخوي وماوصيك الدعاء في ها الشهر الفضيل كثر منه ومن قيام اليل الله يصلح ان شاء الله وتكوون من نصيبك ... والله ولي التوفيق |
المسكينه الله يكون في عونها ،لاكن الله يهديك كيف تواعدها في الزواج مو الافظل انك تاخذ راي اهلك لاكن عليك انك توظح لاهلك موقفك مسكينه ظحت لك وانت لازم ما تتركها
|
? ليه يزعلون ؟ شسالفه!!؟
|
مو قادره افهم وين الغلط انت واخوك تاخذون بنت واختها؟
والا عيب عندكم تتزوجون من نفس العايله مافيه سبب مفهوم عشان نتكلم |
يعطيكم العافيه عالمرور بس للحين احس اني ضايع واحد يمدح والثاني يذم ؟؟؟
المشكله للي سألوا كل عم عنده بنت ومايبون انا واخوي ناخذ من عم ونترك الباقي اتمتنى وضحت الصوره وشكرا لكم |
الحركه جداً جداً مو حلوه
حرام عليك انت ما تدري قد ايش البنات حساسات تلاقيها الحين تبكي لليل نهار و تدعي عليك و مو قادره تنسى اللي خدعها و لعب عليها اخوي ارسل لها رساله ثانيييييييييه الحييييييييييييين و قول لها الحقيقه و هي ان شاء الله بتتفهم لإنها تعرف اعمامها و اشرح لها سبب رسالتك الاوليه و انك كنت تبي مصلحتها و احلف لها ان كله كذب في كذب يا اخوي الحق على نفسك قبل لا يفوت الفوت و اعمامك بالصراحه ما عندهم سالفه يعني بنت اخوهم و يتيمه مفروض يفرحون لها مو يزعلون و انت كذا و الا كذا ما طلعت من العائله كــلم ابوك خليه يوقف معاك و قول له انك مابترتاح والا بتحب غيرها واذا اخذت وحده من بنات اعمامك الثانين يمكن تصير مشاكل للعائله لإن انت منت مرتاح الا لها عن جد حركة اعمامك تقهر بس اللي يحرق القلب اكثر رسالتك بالصراحه رساله مالها داعي ابد الله يعلم قد ايش تتعذب مسكينه البنت وانت بكل سهوله تقول علشان تكرهني انت بس اشرح لها السالفه و هي اذا بغت بتبتعد عنك بس و هي محترمتك مو محتقرتك و انت وش دراك انها ما تقول لأحد و تصير سمعتك مو حلوه ..؟؟ و ثانياً انا للحين ما احس ان هالشيء سبب مقنع او خلينا نقول مستحيل تلاقي له حل في ناس ضحوا اكثر علشان اللي يحبونهم و انت اللي صاير لك مو ذيك المشكله الكبيره خلي عندك كلمه قدامهم انت اللي بتخطب و هذي حياتك و انت تبي هذي البنت و انتــــــــــــــهى قلبي معاها |
وعليكم السلام ورحمة الله وبركاته
طبعا مع التحفظ على العلاقات قبل الزواج لكن ياأخي الفاضل أنت وعدت البنت والبنت رفضت خطاب كثر لأنها تنتظرك يعني ضحت وأكيد أنها كل ما جاها خطيب انحرجت مع أهلها في الرفض وكل هذ عشانك الله يهديك وانت من أول عقبة استسلمت يعني اذا كنت مقتنع بالبنت وتحبها صحيح ما هي معقولة تنسحب من الموضوع عشان عماني زعلوا خير إن شاء الله يزعلون وبعدين يرضون من اللي بيتزوج أنت وإلا عمانك والله يا فيه شباب تركوا بنات عمانهم واخذوا بنات هم يبونهم ومقتنعين فيهم وزعلوا اهلهم شوي ورضوا وبعدين هذا نصيب يعني لازم ابوك يناسب كل أخوانه هذي ارزاق واللي يقسمها رب العباد ترى ما أنتم هدايا يوزعكم ابوك على اخوانه الله يرزق الجميع ويصبر البنت |
اللي انا مستغربتها انك ما اصريت على الرفض ولا قاومة رغبتهم علطول وافقت وكأنك في قرارة نفسك ودك بغيرها وحبك لها عادي مو كبير لان اللي يحب مستحيل يفرط بسهولة
فهي وحدة من الثنتين اذا كانت البنت بالنسبة لك تحبها بس مو كثير يعني ما تشتاقلها بزيادة فاتركها احسن لك ولها ومنها ترضي اعمامك وترضي نفسك وتنهي العلاقة اللي يمكن داخليا ودك تنهيها وفي نفس الوقت ما تبي تنهيها شكلك كنت محتار اما اذا كنت تحبها حب حقيقي ومعجب فيها وما تتخيل ابدا ان غيرك ياخذها فلازم تصر على رايك وبطريقة زينة مو بعناد وانا متأكدة ما راح يوقفون بطريقك لانها بنت عمك مو غريبة حاول تكون صادق مع نفسك ومع مشاعرك علشان تقدر تقرر القرار الصح لانه قرار مصيري ما فيه مجاملات وعواقبه وخيمة الله يوفقك |
هههههههههههههههههههههههههههههه
وليش تستسلم علي طول اسال نفسك هل انت انهزامي ؟؟ الجواب لا اجل خلك جبل وليش يزعلون ودي افهم بعدين انت رايك بيدك والالا انت رجل انت البنت صارت اطيب منك وانتظرتك ورفضت اللي تقدموا لها واكيد يجيها ظغوط ليش وش فية وصبرت وتحملت عشانك والحين زعلوا لو عمي يسكتهم انت رجال سكتهم انت تزوجها وهم بيرضون خلهم يزعلون شهر سنة في قريح هذي حياتي يا اخي حرام تنتظرك وتجرحها برسالة كيف طاوعك قلبك وارسلت الرسالة ارجع اعتذر وبين السبب وخذ رغبتك وغايتك ولا تحتري راي احد في زواجك اقول اترك عنك الطيبة البنت تحبك وانت تحبها خذها ومشى كلامك لا تصير صغير بعيون الناس وبعدين هاذي حياة عمر بتعيش بسعادة مع من تحب خذها خذها خذها وابشر بالعانية |
انصحك تضرب بكلام اعمامك عرض الحائط وتزوجها
واذا احد قالك شي قوله هذي اولى لانها يتيمه |
أخوي أحمد .. اسمح لي الله يعافيك .. نكبت نفسك بالرسالة .. ولوكان عندي تحفظ شديد على الرسالة !!!!!!!!!! لأن أنا متزوج بنت عمي لكن والله ما أعرفها قبل الزواج إلا في سن الطفولة .. وكذلك بنات أعمامي حتى لو أشوفهن بالسوق لا أعرفهن .. مثلهن مثل بنات الجيران وشلون أرسل لوحده منهن رساله !! لإن علاقتنا في مجالس الرجال والخيمه ..يعني رجال في رجال .. بأي صفة ترسل لها رسالة ؟؟؟؟؟ أنا عارف مشكلتك الله يسهل أمرك .. إن أخذتها زعلوا أعمامك وصارت الأسرة إلى أحزاب .. وقالوا خليتوا بنات أعمامك الباقيات الخ.... وأن خليتها تحسرت وتخاف تندم مستقبلاً في وقت ما ينفع فيه الندم .. الحل من وجهة نظري المتواضعة .. شف الكبير في العائلة سواء كان أحد أعمامك أو أبناء عمك الكبار .. شف الكبير اللي كلمته مسموعة ويحل النزاع دائماً بين أفراد العائلة .. شف الكبير اللي له تأثير واحترام .. حلك عنده .. وأشرح له الوضع بالتفصيل الممل .. وشف وش ينصحك فيه .. وش يقدر يسوي .. لن يتركك وبإذن الله وبيحل الموضوع الحل الصحيح اللي يرضيك ولا يفرق بينك وبين أعمامك .. لعلي ساعدتك .. وفقك الله .. احترامي |
بهذه السهولة تتنازل عنها؟؟؟؟ كيف طاوعك قلبك لو كنت فعلا تحبها؟؟؟؟
هي ستكون شريكة حياتك..فلن يفيدونك اعمامك...هل فادوك الأن بعدما تركتها؟؟ المفروض انك ما اهتميت بكلامهم وخاصة انهم ليس لهم الحق بمنعك من زواج تريده يجب ان تصلح غلطتك..فأنت شوهت سمعتك وغلطت بحق نفسك قبل ان تغلط بحقها..لإانت بيدك قد حرمت نفسك من السعادة ومن السمعة الطيبة ومن قلب احبتك بصدق أرجو ان توضح لها سبب فعلك هذا وانك اسات التصرف ولم تقصد أي كلمة قلتها فقط اردتها ان تنساك ولكن النتيجة طلعت العكس |
اليتيمات اولى انكم تتزوجونهم قبل الباقين بغض النظر فيه حب ولالا قلهم هالكلام وبين لهم انك مصر تتزوجها لانها يتيمه وتبي تريح عمك في قبره..
|
حبيبي ... مع التحفظات اللي ذكروها الإخوة والأخوات.. أقول لك إذا أنت جازم تا خذها أقنع أمك علشان تقنع أبوك بالموضوع.. وفعلا خلك صادق... أو دخل واحد في الموضوع من خارج العائلة ... كان الله في عونك.. |
انت مخطىء بالحالتين
اولاً تتواصل معها وهي مش حلالك ثانياً تتخلى عنها بكل سهولة وين(( الحب)) الي تقول انك حبيتها من رأيي انك تخلي احد اخواتك تحكي لها السالفة وتعتذر منها وتقول لها لو كان في نصيب بتكونيين لة وتحاول بطريقة او اخرى مع اهلك وش لهم من شغل اعمامك هم الي بيتزوجون والا انت!! اخي اسمحلي وين شخصيتك؟؟ انت رجل وهذا قرارك في الزواج ماحد لة دخل الا اذا كانت البنت يعيبها شيء لكن تقول انك تريدها وبس عشان اعمامك الصدق مبين عليك ماتحبها بالمعنى وبعدين حرام عليك صدمتها برسالتك اكثر من صدمتها لسبب الرفض الحقيقي واعتقد انك ظلمتها وظلمت نفسك قبلها تقبل رأيي ومروري برحابة صدر |
ياخي الفلط في تفكيرنا العقيم وش فيها اذا اخذت بنت عمك الي انت تهواها
يعني لازم كل واحد من اخوانك يأخذ من كل واحد من اعمامك والله مبدأ خطا الله يعين بين لها اخوي وجهت نظرك مو عشان ترجع تحبك بس عشان ما تقعد طول عمرها وهي تدعي عليك |
السلام عليكم ورحمة الله
الله يسامحكم .... والله اني قمت ابكي من ورى كلامكم دموع القهر والندامه وكل شي صارلي وجرحني صارت بلاوي وبلاوي بعد ماحطيت الموضوع وانا اسف اني مارديت اول بأول لاني بين فكين تمساح مو قادر اتحرك حركه وحده على مزاجي. السالفه ياناس ماصدتوها زين....ياليت بس عمامي اللي زعلانين..الا ابوي (كبير العائله) هو اللي رافض ومنكد علي بقولكم واحد من المواقف اللي صارت برمضان....من بدأ رمضان مازرت لا عمامي ولا جدتي ومر اسبوع وانتشر الخبر اني مابي البنت....فهمت جدتي وعمامي انهم اذنبوا بحقي وحسوا بالغلط دقوا علي واجتمعنا ... انا وابوي وعمامي وجدتي وقالوا احمد انت قرر اللي تبي وهنا نبيلك الخير واللي تسعدك ومدامك تبيها وهي تبيك خلاص نبيكم لبعض... انا استانست لدرجه ماتوصف وكان هذا 7 رمضان قلت عطوني اسبوع افكر واردلكم قالوا طيب....استخرت كثير وسألت ربي الخير بأي طريق ودرست الوضع من جميع جهاته وقلتهم ابي اشوفكم مره ثانيه يوم 14 بعد اسبوع مثل ما اتفقنا قلتلهم اللي بقلبي واني ابيها واستخرت وان شاء الله مايصيرلنا الا ماكتب الله لنا...قالوا على بركت الله...قلت خلني اكشخ قدامهم شوي...قلت انا اهم شي عندي رضاكم لو مب راضين انا تحت امركم >>مأمن ماخذ كلمه منهم...قالوا والله مب راضين وامها كانت كذا كذا كذا وسوت كثير لعمك الله يرحمه و و و و و و ولو تبي نصيحتنا لا تاخذها>>>تمنيت الارض تنفتح وتبلعني ومن 14 الين اليوم ماشفت احد منهم.......ولا ابي اشوف احد منهم ...... انا انعدمت من المشاعر ماتوقعت اقرب الناس بهالحقاره ذي الله يصلح بني ادم كلهم....قولوا امين |
يا اخوي
انت تنازلت عن حبك بكل سهوله كان ممكن تعطي الموضوع وقت |
تبي الصدق
انت ماتحبها والا لو كنت تحبها صحيح ماتنازلت عنها بهذي السهولة ولا هان عليك زعلها. |
الحمد لله من المفروض انك قلت لها الموضوع الحقيقي وقلت لها انه مافيه امل عشان اعمامي وافتكيت من الكذب وعواقبه عالعموم لاز تصلح غلطتك وتعترف بكل شي لها
|
| الساعة الآن 11:50 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©