|
ودي اتزوج .. لكــن !!!
الســلام عليكم تكفوون اخواني طالب مساعدتكم عمري 23 وابي اتزوج لكن كل الناس يقولون اني صغير على الزواج والمسؤليه والمفروض اني اعيش حيــاتي موظف من ثلاث سنوات تقريباً وراتبي 6 الاف وباخذ قرض عشان الزواج وبيصير راتبي 4500 على العلم اني بسكن في عمارة الوالد .. هل المبلغ كـافي انا خايف كثير من المصاريف لاني ما احب الضغوطات الماديه ولا استطيع اني اتحملها وابي منكم الإفاده يا المتزوجين في وضـعي الماادي .. تنصحوني اتزوج ولا اصبــر وخصوصاً اني عايش ثلاث سنوات عزوبي بعيد عن اهلي هم في منطقه وانا موظف في منطقه ثانيه وحتى دراستي كانت خارج السعوديه وعشت متغرب ومليت من العزوبيــه .... ولاتنسوووني من الدعــاء لكل من يزور موضوعــي :) اخوكم في اللــه |
يااخي اذا كنت مستطيع ماديا لازم تتزوج
الله ييسرلك ويسترك |
وعليكم السلام ورحمه الله وبركاته
اخوي انصحك نصيحه لله أعقلها وتوكل ابحث عن البنت الصالحه ودامك عازم صدقني الله بيفرجها عليك واغلب الي يتزوجون الحين على القرووض والله ان شاءالله بيفتحها عليك ....أنا خطيبي عمره 24وله سنتين موظف تقريبا او اقل و مــأخذ قرض وايجار بيت ويصفى لنا من الراتب 2000 والحمدالله وزواجنا قريب والحين وانا ف بيت اهلي مو مقصر معاي ماشاءالله تبارك الرحمن و الحمدالله ويصرف علي .. وصدقني دام الواحد مرتاح نفسيــاً ف بيته ومين يشاركه حياته ماراح يفكر ف الامور الاخرى وأترك عنك الناس وصدقني الناس ماتخلي احد بحالها ان تزوج وان ماتزوج وان طلق الله المستعان لكن دور راحتك وماعليك من أحد .. والله يكتب لك الخير اخوي ويوفقك ويرزقك بالبنت الصالحه التقيه والذريه الصالحه تحيتي |
توكل على ربك يبوي وتزوج وما شا الله الراتب زوييين ودام انك بتسكن عند باباك يعني نص امووور الزواج تيسرت
الله يوفقك وصدقني ابوااب الرزق بتنفتحلك ... |
( من استطاع منكم الباءة فليتزوج)
مادمت ترغب بالزواج فما المانع ؟ تزوج الله يوفقك .. |
الله يجززززززززززاكــم خيــر ويوفقــكم ,, والله ردودكم ريحتــني وخصوصاً ام البراء الله يجزاهـا خير ويبارك لها ويسهل لها امور زواجهــا
والله يكتب اللي فيه الخيـر |
راتبك حلو ... مع شويه ترتيب لمصارفيكم صدقني يكفي ...
توكل على الله وتزوج ... الله يسعدك يارب هموووم |
الله يجبر بخاطرك يا همووومـ
والله يبعد عنك همومك ويفرج كربــك ويحقق لك كل امانيــك يــارب يـــاارب |
توكل على الله ألف مبرووك:14: :14: :14:
|
شف00 بذكرك بالمصاريف وانت قرر:
مقاظي للبيت،فواتير متنوعه((جوالات0 كهرباء0مياه0 تلفون))،لبس للمدام ونثريات،سفريات،، اطفال ومستلزماتهم ماتنتهي، كذلك اصبحت الخادمه ضروره مع الطفل!،،مطاعم،،هدايا للمقربين في المناسبات00الخ غيض من فيض 00 لكن مع هالمصاريف يضل الزواج سكن وراحه للعزوبي00 |
الله يوفقك ويسهل أمورك يارب
أعقلها وتوكل بس نصيحه لك اذا تبي تنبسط بحياتك دور لك وحده ملتزمه و واعية والله يوفقنا وياك يارب |
توكل على الله واحسن الاختيار
ولا تنسى الودود الولود :) وأظفر بذات الدين تربت يداك وبالتوفيق |
اتوكل على الله ان كنت قد المسؤلية والله يوفقك
|
أنا نفس حالك ..
عمري 23 سنة .. موظف .. راتبي مقارب لك .. سأسكن في بيت الوالد (في شقة مستقلة) .. حاول أن تجعل أهلك يساعدونك في زواجك .. وأختصر بعض الأمور قدر الإمكان .. فالفرح هو أن تضع رأسك على وسادتك وأنت غير مدين لأحد إن استطعت .. أعانك الله .. وتذكر انك من الثلاثة الذين جاء في الحديث أنه حق على الله عولهم .. ولك التحية |
سنك مناسب جدا للزواج ..
والرسول صلى الله عليه وسل يقول : (( يا معشر الشباب من استطاع منكم الباءة فليتزوج ..)) وضعك المادي أكثر من رائع .. ماشاء الله أنصحك أخي الكريم بالمبادرة للزواج وإعفاف نفسك ولا تقلق من شأن المادة .. فإن الله تعالى يقول : (( إن يكونوا فقراء يغنهم الله من فضله )) .. هذا في حق الفقراء .. فكيف بالميسورين ؟.. ويقول تعالى : (( وفي السماء رزقكم وما توعدون )) .. وفي الحديث : ثلاث حق على الله أن يعينهم .. وذكر منهم : (( الناكح الذي يريد العفاف )) .. وأنصحك أخي الكريم أن تتجنب الدين قدر المستطاع وفقك الله لكل خير |
ياهلا ..
تزوج وربي ييسر لك امورك .. ولا تنسى تدعونا في فرحك .. أميرات .. |
تزوج أخوي لا تنتظر ... الله يوفقك
|
السلام عليكم ورحمة الله وبركاته : أتيت لإضافة حسبه بسيطة لحياتك يا أخي الفاضل الآن عمرك 23 سنه إذا تزوجت وكتب الله لك الولد بعد سنة فسيكون عمرك 24 سنة ، ستكبرون جميعاً إذا وصل عمرك 40 سنة ستكون عاجزاً بعض الشيء وسيصيبك الكسل بعض الأحيان ، سيكون لك ولد يكون لك عضيداً وستترك عليه أعمال البيت وتأخذ راحتك وإذا وصل عمر ابنك 18 سنة تقوم بإخراج سيارة له ورخصة قيادة وستتمتع بالحريّة..... أما إذا كان مولودك بنت ، فأنت قد تكون تعودت على حياة الخدمة حينما تقوم زوجتك بتجهيزك جهازاً كاملا من ملابس وطعام (فطور، غداء،عشاء) ، ولكنك لا تعلم عن الظروف ، فقد تلد زوجتك وابنتك عمرها 16 سنة!! وتكون قد استغنيت عن أمها (من ناحية الخدمة) فتريحك وتريح أعصابك من التعزب والتغرب.. ومن الناحية الدينية فقد أمر الشرع بذلك وشدد عليه وهذا لدرء المفاسد التي قد تحدث لمن لم يتزوج وتأججت نار الشهوة فيه. بناءً على ما سبق .. ، توكل على الله وتزوج واعلم علم اليقين أنه حقٌ على الله رزقك إذا أردت الزواج من أجل العفاف أعتذر عن المداخلة ولكن أحببت أن أدلي بدلوي ولك خالص تحياتي ،،،، |
توكل على الله وتزوج
لا تتردد وابحث عن الزوجه الصالحه يسر الله لك من تسرك اذا نظرت وتطيعك اذا أمرت |
اولا عندي تعليق على رد الاخ كوب كابتشيو
اذا بنقعد الامور بتتعقد واذا بنحسب ايامنا بالريال ما تكفينا فلوس العالم عشان نعيش يوم من توكل على الله فهو حسبه ويا اخ دروب الشوق لا تنسى قول الله تعالى ((( والله خير الرازقين ))) ونصيحتي لك قول رسولنا وحبيبنا ((((اظفر بذات الدين تربت يداك)))) وتوكل على الله والله يوفقك دنيا واخره ويسهل لك بنت الحلال قل امين :14: :14: :14: :14: وشكرا |
واللــه ماني عارف كيف اشكركم على ردودكـم والله اعلــم كيف ردودكــم ريحتــني
وإن شــاء الله بتوكـل على اللــه ,, مانبي غير دعواتكم واشكرك اخوي شاطئ المحبه على استدلالك با القرآن الكــريم والله يعطيكم العــافيه ويوفقكـم يا اخواني ويا اخواتي :) |
الله يتمم لك على خير أخوي ..
ويوفقك للزوجة الصالحة .. وألف مبروك مقدما .. |
الله يعطيك العافيه اخووي
الله يبارك فيك بس إصبر ماصار شي على الموضوع :) دعواتك بس |
اعتقد ردوا عليك كثيير وردود مقنعه الله يجزاهم خير وللعلم يعني بوضح لك حاجة علشان تصير في الصورة
واا ما ادري عن عاداتكم وتقاليدكم الزوجة تحتاج التالي : مهر ويقدر بحوالي 40,000 تقريبا اذا ما وصل لـ 50,000 الزوجة تحتاج : شبكة (( يعني طقم ذهب " ابيض او اصفر " واللي متعارف علية في الشبكة ابيض ولا تسال ليش كذلك تحتاج دبله وقت الملكة علشان تلبسها ياعيني كذلك تحتاج الى هدية صغير ممكن ساعه فخمه او جوال+رقم حلو ام الزوجة : تحتاج الى طقم ذهب اقل من السابق + ساعه اب الزوجة : صندوق حلو فية بخور وعطور مخلطات التكلفه غير المهر ممكن تقريباً 12,000 ريال عاد بقية اهلك يهدون زوجتك وهم احرى بختيار هداياهم الغرفة تجهيزها يكلف 6500 ريال وكلن على ذوقة طبعا يبقى تجهيز مطبخ اذا عندك مطبخ بيكلفك 4000 ريال شهر العسل اذا بتقضية خارج السعودية بيكلفك وسط السعر من تذاكر وفنادق ومعيشة 18000 ريال بعد ذلك ارجع لدوامك وفقنا الله واياك تذا هاذي الاسعار مناسبة من ناحية انها تواجه بشكل ممتاز |
أنت توكل على الله بس وإن شاء الله ربي يوفقك.
|
يا اخى توكل على الله
واعلم ان للزوج رزق وفير بأذن الله بس يجب ان تختار ذات الدين والخلق وبأذن الله سيوسع الله عليك ويا اخى الزوج حصن وكما قال الصادق الآمين صلى الله عليه وسلم "يا معشر الشاب من استطاع منك البائة فاليتزوج" يا اخى الزوج حفظ من الفتن وخصوصا انك تجلس لحالك وفقك الله ولا تنس الاستشارة والاستخارة كما علمنا سيدنا محمد صلى الله عليه وسلم |
إعقلها وتوكل. |
زوجي كله يقول انه الزواج مثل القفص
الي داخله يبون يطلعون منه والي بره يبون يدخلون بس نصيحتي لك تزوج لانه مبين عليك انك متحمس الله يوفقك |
وعليكم السلام ربي يحفظك ويسر لك الزواج السعيد والزوجه الصالحه الطيبه الحلوة الي تسعدك وتصونك اقتباس:
فيه شباب بالعائله عندنا تزوج وهو يدرس والبعض مملك وهو يدرس بالجامعه وماشاء الله مرتاحين ومبسوطين ومع عليك من كلام الناس مايخلون احد بحاله !! اجعل الوالده والاهل يبحثون لك عن العروس ومبروك مقدما و احسن اختيار شريكة ورفيقه حياتك واذا اهلك اقتنعو بها وشافوها اطلب ايضا انت الرؤية الشرعيه عشان تشوف مدى راحتك لها . الله معك |
توكل على الله
ترى الدنيا فتن ومصائب أكبر من مصائب الصرفة وفتح بيت يعني اطلب الحلال دامك تستطيع وان لم يكن بالكثير وربك بيكون معك تقبل مروري |
وعليكم السلام ورحمة الله وبركاته أخي الكريم أسأل الله أن يرزقنا وإياك الزوجة الصالحة أخي الكريم وضعك المادي ممتاز بالنسبة لعمرك - ما أنت صغير وأنا أخوك- فراتبك 6 آلاف ريال - الله يزيده لك ويبارك لك فيه - ولك ثلاث سنوات في مجالك الوظيفي مستمر - ماشاء الله بارك الله - وبتسكن في عمارة الوالد يعني بيطيح عنك الإيجار صح؟ فأمـورك الحمد لله تمام ، باقي بس تبحثوا عن بنت الحلال فإعزم وتوكل ولاتقعد تفكر كثير، والزواج باب من أبواب زيادة الرزق إذا صلحت النية لله عز وجل الله ييسر أمرك ويرزقك الزوجة الصالحة التي تسعدك وتعينك على الخير ******************** لحسة مخة>>:23: أحد أحبتي في الله مدرس في مدرسة أهلية لم يتعين إلى الآن ولم يمض على تخرجه أكثر من 8 أشهر وراتبه 2800 فقط وسيارته له معه أكثر من 8 سنوات وموديل قديم ومع ذلك فاجئني بخبر ملكته قبل شهر ..... وآخر أخي لي في الله، طالب جامعي ( مكافأة + راتب المسجد الذي يؤمه = الراتب والذي لا يقرب نصف راتبك والحمدلله متزوج له أكثر من 9 أشهر وأصغر مني و منك سناً وساكن مع أبوه ومرتاح على حسب قوله :22: وآخر والده وأهله يسكون في بيت إيجار وقديم ومع ذلك تزوج من 7 أشهر و يدرس في مدرسة أهلية والترم اللي طاف تخرج من الكلية وينتظر تعيينه كمعلم السنة القادمة - الله يرزقه ويخلي تعيينه عند أهله - و أربعة من زملائي تزوجوا بعد مضي سنة واحدة من التعيين في الوظيفة وكلهم يقولون لي بلسان واحد والله ما ندري كيف تيسرت أمور زواجنا وتكاليفه سبحان الله وش رأيك <<< لحسة مخ :23: صح :22: المشكلة من يلحس مخي أنا:( أخوك عزوبي بس رجل عزوبي :21: بس رجل :30: دمتم في حفظ الرحمن |
| الساعة الآن 12:43 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©