|
زوجي قال لي: أرجوك لا تتخلين عني!!(المشكلة حلت و لله الحمد)
السلام عليكم ورحمة الله وبركاته
كيف حالكم .. ؟ كثير الي يعرفون "أم وداد" (أنا) ومشاكلها مع زوجها واهلها واهل زوجها .. الي ماتخلص.. ومادري متى اتخلص.. مثل ما انتو عارفين انا وزوجي صارلنا اشهر كثيرة بعاد عن بعض.. واسمع كلام من الناس واصل البلاد المجاورة .. بإني تطلقت وزوجي مايبيني.. والطلاق ماحصل بعد .. وان شاء الله مايحصل الا اذا كان فيه خير لي.. من فترة بعيدة كان زوجي يتصل فيني ويكثر من اتصالاته وانا ماكنت ارد عليه .. لان هو بطبعه يعصب ويتنرفز وبعدين يقلب كل المشاكل علي.. وانا مادري كيف انتهي اتاسف... وبعدها راح لأبوي مه ابوه.. وقال لها انا ابي زوجتي وبنتي عندي.. بالبدايه استانست قلت الحمدلله زوجي يبيني.. لكن حسيت من كلام ابوي ان زوجي قال كلام مو زين عن امي.. وبانها واقفه بدربنا.. ومخربه علاقتي فيه .. وبان انا وهو مابينا مشاكل بس الاهل خربو علينا.. اهلي واهله .. وقال انه مستعد يوفر لي كل الي ابيه .. وانا مانكر ان امي واخواني كلهم يكرهونه بلا استثناء.. وبانهم يبوني اشوف المعطيات .. يعني لما اتذكر السنة الي عشتها فيها وباه بغض النظر عن الحب الي يكنه لي.. مافيها طعم .. يعني لا امان ولا استقرار ولا كرامه ... بنقول امه ماعليه لكن هو سمح لها تتدخل في كل كبيرة وصغيرة في حياتي لحد ماخلتها جحيم لا يطاق.. وبعدها امي صارت لها ردات فعل.. وكملتها!!!!!!!!!!!!!! روحته لابوي خربت علاقتي في ابوي.. وابوي قال لي يا ترجعين ولا انا مالي دخل بك ابدا ابدا... انصدمت .. واتحطمت .. وقررت اشتغل وادرس عشان اأمن حق بنتي حياة مريحة ... وللعلم ابوي .. ماشاء الله عليه عنده املاك كثيرة وغني.. ماشاء الله ... بعدها زوجي اتصل في بنت عمه وقال لها ان انه يببيني.. اتصلت فيني وانا كنت بفترة الصيف كلها اقلب بمخي.. وحسيت واتذكرت مواقف من زوجي كدرت خاطري.. فقلتلها انا مابيه قوليله يعتقني.. ويسرحني.. هو رفض هالشي.. وطلب منها انه يكلمني وانروح نتلاقى في مكان .. جلسة اخيرة بيني وبينه نتفق على كل شي .. ويا يحصل الطلاق او نستمر مع بعض.. المهم كلمني وكلمته .. ومن حبي الشديد له .. سامحته بسرعة في خاطري لكن بينت له اني للحين زعلانة ومترددة لاني قلتله اني مو واثقه كثير منه خصوصا اني صورته عن اهلي ملاك وبعدين خيب ظني بأفعاله وبروده .. وقعد يحلف لي انه يحبني كثير ... وانه مستعد يسوي اي شي وندمان .. مشكلتي هي باني لما اكلم زوجي مادري ليش كل كلامي يطير.. كل الي بخاطري يروح .. ابي اعبر ماقدر.. ليش ؟ ضعفا مني؟ وبعدين قال لي يا ام وداد .. انا بسوي اي شي .. بس لا تتخليــــــــــــــــــــــــــــــــــــن عني!! ارجوك.. قلتله ان شاء الله .. بس اهم شي انت ماتفشلني.. وقال ان شاء الله .. اليوم اتصل فيني قال يبينا نطلع انا ووداد عشان يشوفنا لانه على حسب قوله مشتاق.. اطلع معاه واشوفه ولا أأجلها ليوم ثاني؟ امي مسافرة .. لكن خواتي واخوي موجودين وكلهم يكرهونه لا يمكن يتقبلون الفكرة .. ويمكن يزعلون مني.. اطلع من غير مايدرون عادي... ؟! وبعدين اخليه يتفاهم مع اهلي يوم ثاني؟ ولا كيف؟ ارجوكم ردو علي.. ادري ان السالفه مصخت .. بس شو اسوي... واسمحولي على الاطاله |
ياحبيبتي لاتكررين أغلاطك ..!
قولي مالي كلام معك لين تتنفذ كل شروطي وبس .. لاتتعبين نفسك معه، وخليلك كلمة واضحة ... |
ياهلا ...
بصراحه اختي ام وداد انا ما اعرف بالضبط وش مشكلتك .. بس ما حبيت اطلع من الصفحه من غير ما ادعي لك ان ربي ييسر كل امورك و يجمعك مع زوجك و بنتك ..وربي يسعدك .. أميرات .. |
يا أختي الكريمة برك بوالدتك لا يكون على حساب خراب بيتك .
يعني والدتك"حفظها الله" أو إخوانك لا يستسيغون زوجك ولا يحبونه ,هذا شأنهم وأمر يعود إليهم ولا لك خلاص فيه , إلا إذا كانوا يكرهونه لسبب لم يتم ذكره ويكون سبباً مقنعاً . ومن الملاحظ من كلامك انك رضيتي على زوجك وهو راضٍ عنكِ ويريد ألا تتخلي عنه فلماذا تقحمين أهلك في أمركم الزوجية الخاصة؟؟؟!!! نصيحة لكِ إذهبي مع زوجك بلا تردد ولا تنسي أن بينكما إبنة تحتاج إليكما . |
شكرا لك جنة الدنيا على مرورك .. انا ماودي اكرر اغلاطي.. وادعيلي اني اكون اقوى بقراراتي
أميرات .. ياهلا بك .. مشكلتي او مشاكلي تلقينها لو سويتي بحث باسمي... ومشكورة على الدعاء يالغالية الدمعه .. مشكور اخوي على مرورك .. صحيح كلامك .. التراكمات وبروده وسكوته على اهله يوم تطالوا علي .. هالامور هذي كلها خلت اهلي يكرهونه |
انتبهي تروحين قبل لاتتنفذ شروطك !!
ترى بتنعاد كل مشاكلكم مرة ثانية ! وساعتها ماراح يوقفون أهلك معك مرة ثانية .... |
حبيتي أم وداد حلي مشاكلك معاه بعيد عن أهلك لأنه الأهل دايم ما يحبون يشفون بنتهم ينغلط عليها وهم ساكتين عشان كذا ما يبونك ترجعين لكن أنتي الزوجة شفتي منه الخير والشر فمن الممكن تصفحين عنه وتسامحينه من أجل بنتك ودائمه هو طيب بس العيب في أهله فأكسبيه وأترك أهله ترى أنا عيش حيات شبيه بحياتك كثير لكن فرقي عنك أنه عمري ما رحت لأهلي ودخلتهم في الموضوع وأنا أعيش مع أهل زوجي في البيت ومورني الظلم بأنواعه الله يسامحهم لكن بعد ما أستشرت أختي في الله وفي المنتدي صائمة لله بالموضوع حلت لي مشاكل كثيره أنا أعيشه
الله يرجعك لبيتك سالمة أنتي وبنتك وزوجك ويعم عليكم السعادة يارب...آمين حبيتي بالنسبة أنك تطلعين معاه من وراء أهلك ما أنصحك مفضروض في شخص واحد كبير يعلم بالموضوع ويعطيك رأيه وآسفه على الأطاله ويارب تنحلى مشكلتك |
مافيها مشكلة هو للحين زوجك
أطلعي معه اليوم لعل الله يكتب الصلح بينكم في هذه الطلعه حاولوا تصفون حساباتكم و فهميه أنت وش تبين منه بالضبط و حددوا يوم ترجعين فيه له بعد ماينفذ وعده لك لكن يا أختي لا تكثرين الشروط و المماطلة لأنه مصيرة يبي يمل و يتركك لا يغرك أنه متمسك فيك حاليا يمكن بكرة ماتدرين ألا ورقة طلاقك واصله بيتكم وكله من عنادك ولا تدخلين أهلك في بيتك مالهم شغل ألا في أمور كبيرة و مشكلتك مو منها الله يصلحك ويخلي لك زوجك |
صحيح كلامك جنة الدنيا بس انا ماقصد ارجع له .. انا اقصد اطلع معاه وارجع بيتنا ...
عبير الرياض: انا ماتشرط لكن ياخوفي يكلم اهلي ويحطون له شروط تعجيزية عشان يطلقني... ادعيلي يالغلا اختي saud fahad انا مادخلت اهلي .. اهله تدخلو وبعدين امي اكتشفت ان كلام ام زوجي لها كذب صارت الحرب من بينهم .. انا كنت احاول اطلعهم بصورة حسنة والله |
الله يوفقك وييسر أمرك يأم وداد
ألي أشوفه أن زوجك قاعد يترجاك تعطينه فرصة على أساس يصحح غلطه بعدين فكري بوداد و بعدين أعتبريها آخر فرصة له للأسف أنت وزوجك صرتو ضحية لتصفية حسابات بين أهلك وأهله والخسر الوحيد (( وداد)) |
بصراحة ما ادري اختي ام وداد ويش اقلك
بس بقلك لو كنت محلك اكيد ما باروح الا بعد ما اقنع اهلي اني لازم اعطية فرصة يعني لو بتطلعو طلعة عادي تفاهم بدون انفراد ممكن اروح لكن لو انفراد فية واظنك فهمتي قصدي لا ومستحيل بعدين يرجع ويطلع كل الكلام ذا بس حق شوق ينتهي بمجرد لقاء زوجي صدقيني اهلك لازم تقنعيهم انهم يعطوك فرصة ثانية لكن لو كسرتي كلام اهلك ورحتي لة وبعدين عمل فيك زي زمان اكيد بتندمي لان مرجعك لاهلك وفي ديك الساعة اهلك بيقولو لك انتي الي خدعتينا ورحتي لة لذا انصحك انك تقنعي اهلك بانهم يعطوك فرصة تشوفين فيها لوين بتوصولو الله يوفقك يالغالية |
يا اختي
لا تخسرين سندج واهلج خاصه انج في حاله مو مستقره مع زوجج لو طلعتي عن شورهم وانتي في بيتهم تاكلين من اكلهم بيتخلون عنج في المستقبل!!!!!!! |
السلام عليكم ...
أختي أم وداد ... والله اين داايما أفكر فيك وفي مشكلتك ... أختي استخيري وادعي ان الله ييسر أمرك ... وجربي تاخذين من زوجك(ميثاق)على انكم تتفقون على االي يرجع الحياة بينكم وتاخذين منه عهد أمام رب العالمين انه ما يخلف وعده هو قالك لا تتخلين عني ،، قوليله انا ما ابي اتخلى عنك لكن انت مو واقف بصفي وأهلك هم اللي يسيرون حياتنا.. لازم أحس ان انا وانت يد واحدة وقلب واحد وأسرة واحدة مترابطة علشان نعرف نطلع من المشاكل ونبدأ صفحة جديدة هي عنوان لحياة مستقرة نأمن فيها مستقبلنا ومستقبل عيالنا ... يعني مو كل مرة تتفقون ويتراجع بأي سبب كان .... أتمنى ما أكون قاعدة أتفلسف ... أختي كلمي الحكيم من أخوتك وأخواتك باللي انت ناوية عليه ... واطلبي المساعدة حفاظا على بيتكم واستمرار الحياة بيبنكم .. ترى بنتكم بتتمرمط ... والله يعينك ويوفقك ... أم حمزة |
أنا هذا الي اتمناه .. مابي اطلع من شور اهلي ابدا ..
ونفس الوقت ابي زوجي.. |
سوي كل شي تقدرين عليه من اجل اسرتك بنتك وزوجك هذي نعمه فيه نساء يصبرون على ازواج ما يبونهم والحمد لله انت زوجك شاريك
|
حبيبتي خليك صارمه وخليها بيد الكبار
احسن لك خلي اهلك يتفاهمون معه ترا اذا رجعتي له بترجعين مره ثانيه بيت اهلك وثالثه ورابعه اختي لا تكررين غلطت اختك كل مره اختلف انا وياه على شي اجلس في بيت اهلي شهرين وارجع له كان شي لم يكن من نفسي اتصل فيه مره مرتين وينتهي كل شي وبعدين اختي ارجع بعد كم شهر لنفس السبب والمشكله اختي خلي الموضوع في يد ابوك واخوانك احسن لك |
مشكورة يالغلا ريشة فنان.. اتمنى من كل قلبي.. بس مادري ليش مو عارفه اتخذ قرار ...
|
أبوي مايتصرف عدل.. يعني بيشيل يده ... مابي يتدخل..
واخوي .. مايبيه عافه وخواتي وامي بعد .. يعني ماعندي حد .. |
اقتباس:
|
ام وداد
هم نصيحتين ضعي شرطين اولاا...: ان يكون لك سكن خاص بعيد عن اهله كل البعد .......<<هذا اذا كنتي ساكنه عندهم مااعطيك هذا الشرط كرهاا فيهم او لتبعدي ابنهم عنهم لاااا بل من اجل ان يستمر زواجكم ومن اجل وداد الله يسلم قلبهاااا ثانيااا...: يتعهد امام شهود ..او يحلف عالقران ...انه ابدا لايسمح لوالدته او اي احد من اهله بالتدخل باي شكل من الاشكال .... حذاااااااااااااااري من افتعال اي فعل من غير علم اهلك ..... لان هذا الشي يجعل زوجك لايحسب لهم اي حساب لانك استغفلتيهم من اجله...... واحذري من الخروج معه .... اعتذري منه ... واطلبي منه التفكير بشروطك لان الحياه الزوجيه مع كثر المشاكل تقلب الحب الى كره والله يوفقج .... ع فكره .... لج وحشه |
حبيبتي اطلعي معاها من غير تردد هو زوجك وله حق انج تطلعين معاه ...
|
اقتباس:
اييييييييية بس ليت زوجتي ترحمني وترجع لاكن الله يعلم السر واخفى اختي يحق لك تطلعين معه باي وقت ليش لانه زوجك ثاني شي اتركي اهلك على جنب وناظري مستقبلك واذا الرجال شاريك اتوكلي على الله وارجعي واشرطي علية الاشياء اللي انتي كرهتيها فية علشان يظبط معك اهلك لو تدخلوا عكس بتندمر حياتك وبقول لك حاجة اذا تطلقتي وبعد فترة والله ثم والله ان تمنين التراب اللي يمشي علية من شوققك له ولاكن انتبهي وبالله التوفيق |
حبيبتي انا من رايي انك ما تستغفلين اهلك و تطلعين معاه من غير ما يدرون
اهو صحيح انه زوجك و تقدرين تطلعين معاه و بكيفك بس تخيلي وش بيكون موقف اهلك اللي ما يبون شيء غير سعادتك هم يكرهونه لانهم يحبونك و ما يبونش ترجعين الا و انتي مرتاحه و ضامنه حياتك المستقبليه يعـــني الحين سالفتك صار لها كم شهـر ...؟؟ جهز لك سكن خاص ؟؟؟؟؟؟؟؟؟ والا بس كلاااام اتوقع لو انه تحرك من نفسه و جهز لك سكن خااص و حلف ع القرآن انه يصونك و مايتدخل احد من اهله بحياتكم المستقبليه ان شاء الله اهلك مارح يردونه و هم ما يبون الا يشوفونك سعيده و ما تكررين نفس الغلط و تروحين له من غير اي تغيير تحبين زوجك ايييييه بس انك ما تستفيدين شيء من الفتره هذي كلها و بس كلاام في كلااام لالالالا لا تقبلين بهالشيء و يااااااااااليت و ادري انك منى عينك انك تتخلصين من هالمشكله و تعيش وداد بينك و بين ابوها لإن هالفتره من حياة الطفل كثير مهمه تكون بين الابوين امنياتي القلبيه لك بالراحه النفسيه |
أحبكم والله ...
العيون .. يا هلا والله انتي الي وحشتيني.. من فترة ماكان لك شوفة ... يالغالية انا ماودي استغفلهم ابدا.. لكن الي لاحظته انهم يكرهونه بشدة .. وامي اتسمعني كلام يوميا ان الحين ماصارت مساله سكن وبس.. الحين الموضوع اكبر من جذي.. ولو الموت ماترجعيله وانتي رجعتي مالي شغل بك ولا بوداد .. وصرت عايشة بجحيم ... ادري انه زوجي وهو الي له الحق علي.. وبنفس الوقت .. اهلي معذبيني هالعذاب النفسي.. واخاف اضرب بكلامهم عرض الحائط وارجع لزوجي.. ويرد يفشلني زوجي مرة ثانية .. وين اودي وجهي بعدين .. محمد هبا .. ودي اطلع معاه .. بس ياخوفي الكلام يوصل لاهلي باي طريقة .. بيحسون بالاهانه .. خصوصا اني في البدايه كنت ابي الطلاق من بروده وتصرفاته وكلامه البايخ الي يقوله وهو معصب... أمير الشوق: انا شارطة على زوجي وهو موافق على الشروط .. وبحسب علمي كل شي جاهز .. ماشفت شي بعيني بس هذا الي اسمعه .. واول مرة بحياتي اسمع زوجي يقول انا ندمان اني خليت الامور هدد وكل من يتدخل.. وقال بعد .. ياريت الحين امي تتدخل بيننا عشان اوريها شي ماشافته (يعني بيوقفها عند حدها) وانا ان رجعت له ان شاء الله .. خلاص خلاص... اهلي ماراح يعرفون شي عني ابد ... ابد .. مابقول غير الحمدلله انا مرتاحة .. وبس!! الي خلى الكل يتدخل وجودي في بيت اهله .. بغرفه .. اصغر من غرفتي في بيت اهلي.. وكل مازعلنا انا وزوجي ولا لو صار خلاف حتى لو بسيط كلن عرف وكلن يحاول يتدخل.. لدرحة ان مرة من المرات انا وهو زعلنا واخته عرفت .. وصارت ماتكلمني وتعاملني كاني حشرة ... انا الصراحة عقب الي شفته عندهم ماتمنى اي وحدة اتعيش في بيت اهل زوجها .. الا اذا كانت الام وحيدة مثلا ولا الاب.. ولا مالهم غير هالولد ... وماكانت بس غيره .. كان حقد مادري ليش... فانت ياخوي شوف راجع نفسك تذكر شو الاشياء الي اتضايقت منها زوجتك .. انا متاكدة ان ودها ترجع لان قلب المراة بسرعة يتعلق... انا مادري شو المشكله الي بينك وبين زوجتك .. بس والله حتى انا اتمنى انها ترجع لك لان باين عليك اتحبها كثير.. وهي بتخسر.. ولا تفقد الامل... انا بيصير لي قريب السنة في بيت اهلي... كنت بنص حملي وولدت والحين ودودة عمرها 6 شهور.. وفي بالي ارجع ان شاء الله .. ماتدري شو الايام الي مخبية لك .. وماتدري عن الكلام الي زوجتك تسمعه والله يعين ويسهل امرك .. |
مياس الحلوة .. ان شاء الله خير.. بخليه يتفاهم مع اهلي هالمرة بعد .. وبعدين خلاص بنبتعد عن الاهل قد مانقدر..
الوردة السوداء .. الله يعيني ويعنك .. أم المهدي.. الله يسهل.. ان شاء الله مايصير الا الخير.. اتوقع انهم مايبونه ابدا لو شو ماسوى .. من كلامهم احس جذي.. :( |
شوفي حبيبتي صلي الاستخارة قبل ماتخطي اي خطوة وبعدين لاتتهاوني معاه مرة لازم يحس بقيمتك ولازم يحس وراكي ظهر ولاتخربي بيتك بنفس الوقت يعني لازم تصارحيه باللي بقلبك وانه مايدخل احد بحياتكم سواء امه او غيرها لانه هو اللي بالنهاية حيخرب بيته
|
اهلا اختي ام وداد
فرحت قوي لما قريت عنوان مشاركتك وان زوجك متمسك بيكي بعيد عن شر الطلاق بس بعدين زعلت شوية لما لقيت ان الموضوع لسة مش قادرة اقلك رأي تخرجي معاه ولا لأ حلوة قوي الكلمةاللي قالهالك ان شاء الله تكوني في بيتك قريب بس انتي موضوعك طول قوي كدة مفيش حد واسطة خير من اهلك او اهله يتدخل ويصلح ربنا يعينك ان شاء الله |
سارة .. انا بس اتمنى ان اهلي يسندوني بأي قرار انا اتخذه.. لكن هم يشوفون الطلاق هو الحل الوحيد.. وخوفي الكبير من ان زوجي يفشلني بعد .. وشسوي بروحي بعدين ؟
جويرية 22: انا وزوجي لو نتقاطع سنين سواء هو غلطان ولا انا.. بس نتكلم كلن يسامح الثاني لكن تظل الامور معلقه .. انا وهو بالذات لازم محد يتدخل بينا.. اتعرفين ليش؟ لان لو زعلنا وعصبنا.. والكل تدخل على اساس احنا زعلانين هم يتدخلون ويزعلون واتصير الحرب... وبعدين اهم اثنين بالمسالة يعني انا وزوجي نتراضى .. وهم يظلون على ماهم .. فتتراكم الامور.. هذا دايما الي يصير.. صحيح هو غلطان وبنفس الوقت انا غلطت .. يعني كان المفروض يحكم الامور بطريقة افضل ونبتعد عن المشاكل من اساسها .. انا شرطت بعض الامور.. واصلا شروط من صالحنا.. يعني محد يتدخل وسكن مستقل لنا.. هو قال لي اتشرطي قولي الي تبينه .. بس انا مالي غير شرط واحد .. لا تتخلين عني... !! ادعولي يالغالين بصلواتكم .. ربي اجمع بيني وبين زوجي على خير عاجلا غير اجل.. |
أختي الكريمة أم وداد ... بداية أسأل المولى عز وجل في هذه الأيام العظيمة الفضل .. أن يجعل لكِ ولزوجكِ من كل هم فرجاً ومخرجا وأن يعيدكما إلى بعضكما قبل حلول العيد سالمين غانمين سعيدين .. بمنه وفضله وكرمه ... أعتقد أن ثمة أمور حالت بينكِ وبين رؤية الحقيقة ... ولعل كثرة المشاكل هي السبب الريس في هذا الأمر الموضوع بسيط إن شاء الله .. وسبب اعتقادي ذلك هو العلاقة الجميلة الخاصة التي بينكِ وبينه ( احتياجهُ لكِ ... وحبكِ له ) هي أجمل مافي هذه المشكلة ... وأتمنى أن تكون حقيقة كما شعرت بيها بين السطور ... وحينما تنعقد المشاكل ما بين أهلكِ وأهله ... ليس في ذلك أيُّ استغراب ... ليس لسوءٍ لا سمح الله أو عيب في أهلكِ أو أهله .... وإنما لأن الله عز وجل حينما قال : ( خلق لكم من أنفسكم أزواجاً لتسكنوا إليها وجعل بينكم مودة ورحمة ) فكلمة ( مودة ورحمة ) كانت ( بينكم ) أي بين الزوجين فقط .. ولم تكن بين الأهل بعضهم البعض ولا حتى بين طرف منكم وبين أهل الطرف الآخر ... لذا وبناءً على هذا .. يجب أن تعود الأمور لكما أنتما الاثنين لتتفاهكما فيهما وحدكما دون سواكما وجود مشاكل وأخطاء سابقة .. أمر طبيعي .. وليس من الحكمة أبداً أن تتصرفي في ظل الظروف الحالية وحدك دون الرجوع لأهلك ... فبعد أن دخلوا في خضم المشكلة .. فليس من السهولة أن تخرجيهم منها ... وأقرب شخص حكيم من خلال كلامك ( والله أعلم ) هو والدكِ ... وضحي له موقفكِ .. واطلبي منه أن يعطيكِ فرصة أخيرة بوقوفه إلى جانبك .. وأنكِ تريدين أن تذهبي للتفاهم مع زوجك ... لا تنسي أن تقومي بالاستخارة قبل كل هذا ... وأن تكثري من الالتجاء إلى الله عز وجل ولعلها فرصة كبيرة أن يكون الدعاء في هذه الأيام والليالي المباركة من الشهر الكريم ... تحيني وترقبي فرص الإجابة ... وأظهري ذلكِ وضغفكِ لله عز وجل .. مستشعرةً ذلك فعلاً وكيفَ أنكِ بحاجةٍِ إلى عونه وتوفيقه .. فهو من بيده قلوب العباد يقلبها سبحانه كيف يشاء .... أعتذر لو كان كلامي غير واضح ... ولكن لعلي ألخص الخطوات التي قد تكون مناسبة لحل المشكلة بإذن الله 1 - دعاء الله عز وجل والإلحاح عليه في الدعاء لحل هذه المشكلة . 2 - صلاة الاستخارة لكل ما تنوين فعله .. 3 - الاتصال على زوجكِ ، والتفاهم معه هاتفياً وأخذ وعد أولي منه ( بطريقة غير مباشرة ) أن لا يخذلك مع أهلك 4 - فتح الحوار بينكِ وبين والدكِ .. واختيار الوقت المناسب لذلك طالبةً منه الوقوف إلى جوارك ولو لمرة أخيرة والله يوفقكِ ويفتح عليكِ .. ويعيد كلاً منكما إلى الآخر .. وأن يعيد وداد المباركة إلى حضنيكما إنه ولي ذلك والقادر عليه ... |
اقتباس:
إذا أنت ودك ترجعين لزوجك فهذا شيء طيب و أهلك لا تخلين لهم مجال يتدخلون في أمورك ماراح يندم غيرك لو أضطررت أنك ترجعين لزوجك من غير رضاهم إذا أنت تبين الله يصلح أمرك |
اقتباس:
|
اقتباس:
|
اقتباس:
وحطي أهلج بالصورة لا تروحين من غير أذنهم بعدين ما يسويلهم سالفة لما يشوفج إنتي جذي الله يسعدج |
صحيح كلامك ادعيلي يالغلا
|
الله يسعدك يا أم وداد ونسمع الأخبار الطيبه عنك
|
السلام عليكم ورحمة الله وبركاته ...
اليوم زوجي طلب يشوف بنته .. وشافها .. من بعد مدة طويلة .. بس استغربت من شي.. بنتي ماتبكي عند حد ابدا .. عادي عندها اي احد يشيلها ويلعب معها ... لكن مع ابوها اليوم بكت .. ليش؟! بديت اوسوس ... |
أم سعود يالغالية لا تنسيني من دعاءك .. ولك جزيل الشكر
|
عزيزتي سوف اقول لك ما اقوله عن تجربه مررت بها
تحملي عزيزتي في سبيل أن ترتاحي معه العمر كله أنا كنت في مشاكل كثيرة مع زوجي فقررت الذهاب لبيت أهلي والحرد عندهم وقلت له أني لا أريدك وكان كل من يأتي ليصلح اقول له لأ أريد الاستمرار معه " طبعا هذا الكلام كان ظاهريا لكني من داخلي اريده واحبه " كان يحاول ان يبعت لي مسجات على الهاتف الخلوي ولكن لا أرد عليه وحاول كثيرا ان يتصل بي لكن لم أرد عليه حتى أنه بالآخر طلب من اخي ان أتكلم معه من هاتف اخي الخاص بدون علم أهلي لكن انا لم أرض ولا أخي ايضا سبحان الله بعد هذا كله تحقق لي ولوالدي ما نريد وحصل ما شرطه عليه والدي والحمد لله لي الآن راجعة شهر وشوي والحمد لله الوضع تحسن جيدا اصبري عزيزتي فصبرك سيأتي بعده فرج ان شاء الله واعملي بنصيحة اهلك .. لأنهم هم من سيقفون معك اذا حدث لا سمح الله مكروه اذا عصيتهم هذه المرة .. لن تجدي من تلتجأي إليه في المستقبل مع تمنياتي بأن لا يحدث لك إلا كل ما تحبيه وكل ما تتمنيه وكل ما يسعدك |
حبيبتي أم وداد الغاليه
لا تستغربين من بكي بنتك هي صغيره وأستغربت شكل أبواه تخيلي أنا أعيش مع أهل زوجي في البيت وبنتي إذا شافت أبو زوجي تنهار بكي مع أنه يوميا تشوفه فما بالك بطفلة ما شافت أبوها من فترة لا توسيسين ولا حاجة وخلي أملك بالي خلقك كبير والله يكون في عونك ..................... حبيبتي ترى أنا قاعده أدخل المنتدي يوميا عشان بس أتطمئن على أحوالك لأنه حاسه باللي أنتي فيه ياعمري يفرج همك ربي وهمي إنشاء الله |
اختي ام وداد
اعرف انك مجروحه ..ولكن يااختي احتسب الاجر ..اغيظي الشيطان بمصالحه زوجك..والله اني لك ناصح ..الطلاق لا يعرفه الا من جربه ..الطلاق نستهله ولكن نتايجة وخيبة جدا جدا .......... |
| الساعة الآن 06:24 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©