|
كيف أقنع زوجي بإحضار خادمة ..؟
السلام عليكم كيف حالكم
اشتقت لكم كثيييير اضطريت للغياب بعض الأسابيع جيتكم وبخاطري شيء ودي تساعدوني فيه وهذا الأمل فيكم بعد الله أنا موظفة وفي منطقة نائية بعيد عن أهلي وعندي ولدين في البداية كنت أحطهم عند حاضنة ولو تدرون وش ذي الحاضنة مجمعه شوية عيال وحاطتهم عندها في البيت والله أعلم وش يصير المهم الحين وبعد أربع سنين من المعاناة أودي الصبح وأجيب الظهر وشغل البيت والعيال والتحضير الحاضنة رفضت تاخذ العيال وأنا أحس إني تعبت والحين أبغى أجيب شغالة وزوجي متضايق بالمرة وزعلان والليلة جلس يتكلم معايه ويقول إنه أبدا مو راضي ولو جابها ماراح يكون مرتاح ومن هذا الكلام أنا حاولت أجيبه باللين وأقنعه بس ما فيه فايدة ولا ودي أسوي شي مو راضي عنه ممكن تشيرون عليه بآرائكم لا عدمتكم تم تعديل العنوان ليتضح المضمون .. |
هو مو راضي لمبدا الشغالة او خايف من المصروف
اذا همه المصروف انتي موظفه قولي له الفيزه والتكاليف والراتب نقسمها بيني وبينك يمكن يوافك اما اذا كان رافض الشغالة انها تدخل البيت حاولي معاه واستعطفيه وخليه يحس بتعبك وعلمينا بالنتائج والله انهن شر لابد منه الله يكفينا شرهن |
قولي له إذا تبي اتدور على راحتي فأنت لازم تشتريها بالخدامة وإلا فلا
لان الخدامة صارت ألحين من ضروريات الحياة مو مثل قبل وترى ما يسوى الواحد يتعب لأنها تجلب الراحة النفسية لي كل ما أشوف الضغوطات علي تزيد فليش ممانع انك تريحني ما أستاهل تشتري راحتي ؟؟؟ |
بالتفاهم معه وضرب الأمثلة من البيئة المحيطة
|
قدمي استقالتك افضل لك واستخيري قبل ذلك
وعليكم السلام
المرأة وظيفتها في بيتها افضل لها .. وظروفك ماتساعدك باحضار خادمه لمساعدتك إلخ واكيد يطلع منك تقصير كبير في حق نفسك وفي حق زوجك وحق ابنائك ويتعرضون للأهمال ويمكن ماعندي اصلا وقت حتى للطبخ ! اقتباس:
اقتباس:
الله معك |
تبين الحق وش حادك على الشغل بيتك وزوجك وعيالك محتاجينك اكثر (وجهه نظر لا أكثر )
خصوصا اذا زوجك ماوده بالشغاله الله يصلح باله ويهديه ويوافق يجيب لك شغاله وتنحل امورك يااارب اختك بالله جينز |
آنا مع الإخت مبتسمه وكلي جروح ويسلم تمك وأناملك الذهبيه لأن هذا الكلام عين الصواب
|
مشكورين أحبتي
المسألة مو مسألة مصاريف إحنا راح نقتسمها المسألة إنه يقول راح يكون زي الغريب في بيته ولا راح ياخذ راحته وبيفقد الخصوصية ولما أقوله راحتي وزي كذا يقول تريحك أنت وتتعبني أنا أو قلت له تنازل يقول موكفاية تنازلات - والحقيقة إنه فعلا متنازل عن أشياء كثيرة - ( طبعا مقابل تنازلات مني ) عموما إحنا قررنا إنه بكرة راح يتوجه لأحد المكاتب والله ييسر اللي فيه الخير تدرون أنا خايفة من حاجة وحدة بس ياجماعة أنا من يوم تزوجت هذا الرجال - من أربع سنوات وهذي الخامسة - ما عمري دخلت في حاجة وهو موراضي عنها إلا ربي ما يوفقني فيها يعني مثلا لقيت بأحد المكاتب شغالة نقل كفالة وصممت إني آخذها فقال خلاص نتصل عليهم بكرة والله ما أمدانا نكلهم إلا واحد غيرنا ماخذها أما بالنسبة لترك الوظيفة فهو شي صعب مع إيماني ويقيني إن بيتي أفضل لي وحاجة أطفالي أكثر لكن ما أقدر لأسباب يطول شرحها أحدها الأسباب المادية دعواتكم لي أن الله يختار لي اللي فيه الخير |
السلام عليكم
اختي الكريمة اول و تالي مالك الا بيك انتي ما استخسرتي روحتك للعمل لان علية اجر كيف تستخسري جلستك مع عيالك و الاجر راح يكون من عند الله انا ما اجبرك على وجهة نظري بس كلامي خلية حلقة باذانك لو صار شي للعيال مثل ربما يتعلمو اشياء مو زينة اثر الاختلاط او يسبب ذالك انحرافهم انتي المسؤلة امام الله لان الطفل و العيال يبون تصرفون عليهم حنان قبل المال و الشغل شغلة الرجال و من ترك شيء لله عوضة الله بافضل منة لو في مجال اشتغلي بس تدخلين وحدة غريبة بدون حاجة ملحة انتي سمعتي بقصة الطفل الي الخادمة تضعة على المنطقة خاصتها حتى تمشي اوضاعها انتم فاهمين قصدي مدري كيف الوضع هذا نموذج اختي اخذي الامور اكثر جدية لان الحياة دار بلاء و اختبار لاتهملي بيتك و تاخذي آثامهم على شان تشتغلي الدنيا ماتسوى و الله يعلم متى يتوفانا و نسال الله الرحمة انة الرحمن الرحيم اقول كلامي وانا مستاء من الي يصير الرجال بالعمل و المرأة بالعمل و بعض البيوت تقولو حق عابر سبيل كل من جا ودخلها هو في احد فاضي للعيال انا اقول الكلام هذا لان في نموذج قدام عيني في نفس المنطقة الي كنت عايش فيها السموحة هذي وجه نظري بالتوفيق للجميع |
حتى الخادمه لاتأمنيها على أطفالك
فهم أمانة لديك |
جيبي خدامه بالنهار فقط يعني الوقت الي تحتاجيها فيه
ما تنسي انهم شر وزوجك يبقى رجال وهذيك حرمه (ليش الشرع حلل اربعه علشان الرجاجيل يجبون النساء ) لذا انصحك بالخدامه في الصباح فقط |
عزيزتي ....أقول لك عن خبرة ...الخدامة عدددددوتك ...وعدوة أطفالك ...وتنظر الي حلالك بدأ من بيتك الي زوجك الي نعمتك ....كل شيء حتي ملابسك ...تجربها في غيابك وتحسدك ...وتراقبك بعلاقتك مع زوجك ...
بصراحة زوجك عنده كل الحق ...فكيف يكون مرتاح وهو في بيته وأين يكون مرتاح الا في بيته أختي ...لاأخوفك بل أريد مصلحتك ...لاترجعين وتندمين وتقولين **يامن شري له بحلاله عله ** |
اهم شي استخييييييييييييري قبل التقديم
وادعي الله انها تكون وجه خير على بيتك وعلى عيالك انا سبق وقدمت على خادمه بدون ان ادعي او استخير فجاتني وحده عللللللله 24 ساعه تبكي وتصرخ على اطفالي قدامي وكل يوم تجهز اغراضها بتمشي لديرتها وما كملت شهر عندي الا ونقلت كفالتها ودعييييييييييت الله واستخرت ماتصدقين اذا قلت لك اني دعيت وانا اعتمر وخليت عيالي وزوجي يامنون معي والحمد لله فرجها الله علي وجاتني وحده ماتقارن بالاولى ابداا ماشاء الله تبارك الله |
حطيتي يدك على الجرح الله يعينك اختي
والخادمه شر لابد منه والله كنا مستانسين بدوون خادمه لكن عشان انا اكبر وحده بالبيت وكل شي على راسي حنيت فووق راس ابوي لحد ماجابها وهي تساعد ماقلنا شي لكن لابد من وجود المشاكل كل ماجبنا خدامه تصير مشكله مع سواقنا ( مع السواق تمام ومسلم وهو احيان يجي يشتكي يقوول تتصل علي من تليفون البيت ) حسبي الله عليها لان مسجلين رقم السواق للوالده بالتليفون وهي حافظه الهرجه وتقووم الصباح تبي ادق حنك معاه بس الله يصبر الوالده بس ويعينك اختي وماراح ازيد شي على كلام الاخوات اهم شي استـــــــــــــخـــــــــيري والله يكتبلك الخير ويكفيك شرهم تحيتي |
الله يكون بعونك...
انتي استخيري... والله يوفقك |
اختي وش اتسمى
استخيري ومن راييي انك تدخليهم حضانه لان توحدهم مع الشغاله فالبيت خطا كبير لما نسمع من القصص الي تقطع القلب وان جبتي الخادمه فضعي كملرات المراقبه فالبيت لكي تطماني عليهم واستودعيهم الله والله يكتب الي فيه الخير |
جيبي بس انتبهي منها مرة مرة
لاتخلين الحبل على الغارب >>>> صح هدا المثل؟؟؟ او ادا فيه في المدينه الي انتي فيها يجون باليوم جيبي كدا ترتاحين يعني ماتنام في البيت بس برضو انتبهي منها بالتوفيق عزيزتي |
مافيه سبب منطقي لوجود خادمة في البيت ، اذا كان زوجك رافض الفكرة ،
نصيحة مني ابعدي عن الخدم الاندنوسيات اذا وافق زوجك طبعاً |
مافي سبب قوي لاحضار شغالة
وخاصة وان زوجك رافض للفكرة من اساسها حولي تتحملي وتعتمدي على نفسك الشغالات مصايبهم كثيرة وبلاويهم متلتلة ووجودها في البيت يضايق زوجك .... اتحملي علشان بيتك ما ينهار من تحت راسها |
اقتباس:
انا مع كلام اختي شيخة الحور فعلا مادام زوجج غير موافق فلا تجيبينها وتندمين حاولي تنظمين وقتج وقولي لزوجج اذا ما تبي الخدامه لازم تساعدني في بعض الامور..والله يسهل عليج ويوفقج اختج ---- لمني بشوق |
اختي العزيزة
والله لو اقعد بالبيت وآكل خبز حاف ما اجيب خادمة تقعد مع اولادي طوال النهار بدون رقيب ولا حسيب والله قريت وسمعت وشفت قصص... يشيب لها الرأس حبيبتي الخادمات شر ... لا داعي له الا اذا كنتي بالبيت وحبيتي تجيبي حد يساعدك عشان تتفرغي لاطفالك وزوجك اما انك تحطي اطفالك مع امرأة لا تعرفي لا اصلها ولا فصلها ولا دينها... فوالله حرام عليكي لا شئ سيعوض لكي نفسية اولادك اذا لا سمح الله حصل لهم مكروه... تقبلي كلامي والله يوفقك |
انا زوجي كان يقول مثل كلام زوجك ماآخذ راحتي ومدري ايش المهم اقنعته ودعيت ربي أنها تكون من النواصي المباركه علي وان الله يعطيني من خيرها ويكفيني شرها ويسخرها لعيالي والحمدلله ربي يسر أموري وزوجي الحين مبسوط والحين بتسافر اجازه وزوجي شايل هم انه بيساعدني في غيابها,,يوم شاف راحتي وحتى والله نفسيتي تغيرت صرت رايق أكثر مو مثل قبل دافنه نفسي بالحياء..وتصدقي بنية صلاح خدامتك صدقيني ان شاء الله بترتاحين,,وبعدين في عهد الرسول صلى الله عليه وسلم كان فيه جاريات ووقت جداتنا كان فيه حريم يجون ويساعدون وياخذون أكل اذا جو بيطلعون والدنيا كانت بسيطه شلون الحين البيوت تغيرت وعيالك بيكونون نايمين تقريبآ اغلب الصباح بدل ماتسحبين في ذا البرد عشان تودينهم الحمدلله يجلسون في البيت مرتاحين..واستودعيهم الله الذي لاتضيع ودائعه كل يوم قبل لاتطلعين وتوكلي على ربي وأحسني لها وعامليها بالمعروف وبتحبك ان شاء الله وبتحب عيالك بعد
|
والله يا أختي أنتي انسانه راقية و حريصة على حياتك الزوجية
تصدقين إن زوجتي لها شهر عند أهلها الآن ورفضت العودة معي إلا بخادمة ماراعتني ولا راعت ظروفي الله لا يوفقها ولايبارك فيها ولا يردها سالمة |
من كل قلبي أشكر جميع من تفاعل معي من الأعضاء
بس أنا حاسة إن فيه بعضكم ما فهمني يعني اللي تقول وديهم حضانة أنا في منطقة نائية ومافيها حضانات ولا نظام الصباح والمشكلة ترى والله ماهي في شغل البيت بالعكس أنا انبسط على الشغل المشكلة في عيالي ما لقيت أحد أوديهم عنده والحين حاطتهم عندجارتي وتعرفون لو تحملتني كم أسبوع ما راح تتحملني بقية السنة ما لي إلا الدعاء والاستخارة واللي فيه الخير ربي ييسره ... أخوي الجنرال الله يصلح أمورك وترى المرأة تجيبها الكلمة الطيبة وفقك الله ... ومشكورين مرة أخرى وهذا كان العشم فيكم يا أروع أعضاء في أرورع منتدى |
| الساعة الآن 05:06 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©