|
مشورتكم ارجوكم اريد الانفصال
اخواني واخواتي السلام عليكم ارجو منكم مساعدتي كماعهدتكم دوما انا الان اطلب قرار مصيري وطالبة مشورتكم تكفــــــــــــــــــــــــــــــــــــــــون القصة ومافيها اني احب زوجي ويمكن احبه فوق المعدل الطبيعي وهالحب كلن من قبل الزواج والان لي 3اشهر من الزواج وهو شخص طيب طيب جدا بس المشكله انه شخص لا مبالي بمسوليته كزوج وهالموضوع تعبني نفسيا تكلمت معاه اكثر من مرة باسلوب حلو وصبرت عليه بس مافيه فايدة تخيلو فترة الملكة قتله لاتاثث البيت خله بعد الزواج اجي ناثث سوى لاني بمنطقة بعيدة عن منطقته ماقدرت اجي ايام الملكة وحتى الان ماحطينا قطعة بالبيت بسبب برودة وعدم المبالاة ناقشته ويقول طيب ومو فاضي وانا عارفة ان كلها اعذار اقل شي موضوع الثلاجة مايتسوق الابعد الزن وطلعة الروح والله اني مليت مااسميه بخل لاني اذا طلبت منه فلوس عطاني ولايردلي طلب لكن مسؤليته كزوج تجاه بيته معدومه صفر من 100 واليوم اتخذت قرار باني اناقشه من خلال راساله انه هالموضوع اتعبني جدا واريد الانفصال والعودة لمنزل اهلي بتقولون الموضوع مايستاهل انفصال بقولكم انه اثر على صحتي كل فترة ادخل المستشفى اول مرة كانت بسبب حموضة بلمعدة لاني اترك معدتي فاضية لوقت طويل وقتها قالي ليش ماتاكلين قتله وش اكل ((كنا وقتها راجعين من السفر والثلاجة فاضيه مرت علي 3 ايام بدون اكل وهو يكون بالدوام فترة الغدا وطبيعته مايتعشى)) وثاني مرة دخلت المستشفى بسبب الام ظهري لان ماعندي كنبه اسند ظهري عليها اتفرج على التلفزيون وانا جالسة على الارض وانا اللي كنت مااعرف اجلس على الارض اجلس على اللاب توب بالارض لاطاوله ولاشي وتقوس الظهر تعبني وصرفولي ادويه بحياتي ماشفتها وقالو لازم علاج طبيعي واخر مرة انسدت نفسيتي عن الاكل من سوء حالتي النفسيه وماحسيت الا ونفسي بالمستشفى والمغذي بيدي يعني صحتي بدت تنعدم وخايفة من الجاي طولت عليكم لكن ارجوكم ساعدوني ارجع لاهلي دامني باول المشوار ولاعندكم حل مع اني تعبت من كثر الطرق اللي جربتها حتى اهله يقولون لي انه هو من اول طبعة كذا لامبالي ومايتحمل مسؤليه؟؟؟؟؟؟؟؟ ارجوكم |
شوفي حبيبتي ما تنتظري من الرجاجيل شي ابدااااااااااااااا عن تجربه مادام انه يعطيكي فلوس
قومي انتي خذي احد من اخواته او امه قولي لهم ابي رأيكم بالعفش وقومي جيبي كل الي نفسك فيه وبما انهم عارفين ابنهم لامبالي فقومي جيبي كل شي وهذا رأيي بصراحه بالنسبه للعفش مع انه الوحده تحب يكون زوجها معها بس صدقيني اذا ما تحركتي مارح يتحرك هو وكلهم كذا انصحك شيلي نهائيا فكره الطلاق في رعايه الله |
انتظريني لي عودة
|
صحيح كلام فوفو يا اختي
دام انه الموضوع مو موضوع بخل ويعطيك فلوس يعني لو تقولين له عطني فلوس حق اثاث و انا بشتري بيرضى ..؟؟ اعتمدي على نفسك ولا تتعبين صحتك لانه بالصراحه شيء مو طبيعي تجلسين في شقه مو مأثثه طول هالفتره حتى كنب تجلسين عليه مافيه ..........!! اخذي احد من اخواته اذا علاقتك بهم زينه و روحي و اختاري و دبري نفسك و طبعاً هم راح يوصلون كل شيء و يركبونه بس يكون موجود بالبيت ..!! حتى اغراض الجمعيه انتي روحي اشتريها ولا تموتين نفسك من الجوع اهم ما عليك صحتك كلميه بهذا الموضوع بشكل جدي قولي له بغض النظر عن صحتي تخيل اهلي جاوا لي هنا و ش بيقولون..؟ هذا معيش بنتنا في عذاب لا اثاث لا اكل ..!! ترضى على نفسك يقولون هالكلام ..؟؟ الله يعينك |
اختي صمت
واضح انك شخصيتك تماما عكس زوجك ..وهذا يدل على التكامل ..فلديك صفات حسنة لاتوجد في زوجك وكذلك لديه صفات لاتوجد فيم .. وبالعكس اعرف مجموعة لاباس بها من الاقارب ان زوجاتهم يقمن في امور البيت وحتى تسجيل اولادهم..وامورهم زي العسل ..فياختي قومي في الشغل ..وانتي ماجورة .. اختي بما انك متوافقه مع زوجك ..وبايضا ينكم مودة وحب ..فلماذ االطلاق!!؟ الم تعلمي ان : الحب يذوب كل شئ و حتى الاخطاء التي يرتكبها.. الحب رسالة ليس لها حدود ..ولا قوانبين ... الحب رسالة سامية ...لايمكن وصفها بكلمات ولا بأفعال بل بالمشاعر.. فياصمت الهوى الله الله بزوجك...تذكري انه يقدرك ..تذكري انه يجبك ..تذكري تلك الصفات التي تكرهينها هي عادة عنده لا يستطيع فراقها ..فساعديه ..بارك الله فيك ونحن اخوة لك نساعدك ..بما نستطيع |
وعليكم السلام ورحمة الله وبركاته تعوذي بالله من الشيطان وكبري عقلك والحياة مانشوفها بهذا المنظار ...ولاتخلي أمور مثل هذه تدمر نفسيتك وصحتك وحياتك وهذا ليس سبب مقنع لطلب شيء عظيم مثل الطلاق قال النبي صلى الله عليه وسلم: (أيما امرأة سألت زوجها طلاقها من غير بأس فحرام عليها رائحة الجنة). رواه أبو داود أحمدي الله وتتعالي معي نكتب مزايا زوجك محب جدااااا...(وهذه أهمها) كريم جداااا طيب جداااا يبحث عن راحتك بإرسال خدم أهله وإحضار الطعام وفي المقابل ماهي عيوبه : لايتحمل مسئولية....فقط أنظري إلى مواضيع غيرك أزواجهم مفرشين البيت بأفخك الأثاث الثلاجات متخمة بالطعام ....ولكن جياع جدااااااااا للحب للطيبة لمساندة الأخر له وجلب من يساعده جياع للكلمة الحلوة وللعشرة الجميلة وللحنان والإهتمام اتقي الله وابعدي عنك وساوس الشيطان مازلتي في بداية زواجكم ولم يتعود على المسئولية كما أخبرك أهله وهذا طبعه لذا لا تأكلي في نفسك وتتدمري بل بذكاء المرأة وفطنتها وبدلالها بإذن الله ستستطيعي تغييره وتعويده على تحمل المسئولية اذهبي مع أحد من أخواتك واملئي البيت بمالذ وطاب وتفنني في تقديم الطبخات من يديك ليشعر بأهمية الطبخ في البيت وطبقي له من طبخاتي:22: .وطبخات فنانات المنتدى..علشان ينبسط منك ويعرف قيمة الأكل من البيت وبعدها سيذهب معك ويختار أما الأثاث فأقترح أن تبدأي بشراء البسيط منها وعندها أخبريه بأنك لم تعرفي تختاري لإنك تحتاجي لذوقه لإن ذوقه جميل ويعجبك وحاولي إلزامه في الذهاب بدلال وهكذا عوديه كل مرة وألزميه بالذهاب معك حتى يتعود ولكن لاتستعجلي النتائج فمن الصعب أن يتغير في يوم أو يومين أو شهر أو شهرين....بل اصبري واحبيه ودلليه فكلما أحبك وتعلق بك كلما زاد طاعة لكِ....و لاتنسي أن تشكريه وتمدحيه كلما ساعدك وترفعي من شأنه فالتشجيع والمدح يدفع الزوج لبذل المزيد. |
حبيبتي صمت الهوى اجعلي فكرة الطلاق بعيدة عن بالك نهائي
خليها اخر الحلول انا الى اقولك تكفين :29: :29: لاتحملين لقب مطلقه وتعانين عشان شي بسيط والله يمكن هو عندك كبير لكن بنسبه انك تطلقين عشانه والله حاجه بسيطه :18: لو بس تصبرين شوي وتلاقين حل من الاخوان ان شاء الله ان شاء الله لي عودة يالغاليه :29: الله يهديك ويسعدك ويسخرلك زوجك مع اني اقول فكري بحل الاخوات الى قالوها وكلام ام جومانه صحيح والله يالغاليه :d لانها صادقه |
أختي الكريمة..تصرفات زوجكِ وعدم الامبالاه هي سمه من سمات تكوينه الشخصي ..ولهذا يجب عليك التسلاح يسلاح الصبر معه حتى يتغير حاله ..فيجب عليكِ ات تدرسي نمط شخصيته جيدا حتى تعرفي كيف تتعاملين معها تحديدا لان كل نمط وسمه بشريه طريقه للتعامل معها.. http://www.21za.com/pic/salam_kalam007_files/80.gif .. |
يا اختي تسمحيلي اتشارك مهكم??
انا كمان صايرلي متلك لكن الصير حلو و افرحي انك تقدري تخرجي و تشتري بنفسك اتا لا ده ولا ده اصبري لان لطلاق صعب كتير وماتعرفيش مساوه وبشويش كل شي يصير |
حبيبتي أنا حاسة فيج والله يعينج بس الطلاق بالسرعة ولهذي الأسباب صعبة ........ يعني صبري شوي حتى لو بتتعبين ونصيحتي حاولي تتقبلين الوضع وتعتبرينه عادي فترة وبتعدي وإن زوجك بيتعدل وقولي ما عليه بتحمل شوي والوضع بيتغير ومن ها الكلام يعني صبري نفسج شوي ولا تضغطين على نفسج عشان نفسيتج ما تتعب وإذا هو كسول حركيه شوي يعني من يرجع من الشغل خليه ياخذج للسوق واشتري كل اللي تبغينه للبيت مره وحده و وكل ما أحتجتي شي خليه يطلعج وإشتري أغراضج وهو أكيد ما بيقول لا بس لا تقولين له يروح هو يشتري لان طبعه كسول و يشوف الطلعة ومشترا شي كبير ...... جربي كل الطرق بس وأنتي مرتاحة ولا تضغطين نفسج ......... الله يوفقج ويسر أمورج ........... |
السلام عليكم ورحمة الله وبركاته
انا مررت بمرحلة قريبة لما تمرّين به الحل الوحيد الذي أفادني كان تنظيم الوقت مثلاً انا اتفقت معه ان يوم الأربعاء هو يوم الذهاب للجمعية الإستهلاكية لشراء حاجيات المنزل لا اتنازل عن هذا اليوم ابداً، خلال النهار اضع القائمة التي تكفيني للأسبوع القادم. بهذه الطريقة لا يحس هو بالضغط فالرجال عادة ما يكرهون الذهاب للجمعية ولكن عند تحديد يوم واحد من الأسبوع سينظر للأمر على انه أمر سهل وان شاء الله يلتزم به. بالنسبة لأثاث المنزل، بعد ان تري التزامه لمدة اسبوعين بقضاء حاجيات المنزل إتفقي معه على شراء غرض واحد بالأسبوع للمنزل مثلاً تتفقين معه ان الأسبوع القادم سنشتري الكنب بعد شراء الكنب تتفقي معه على غرض آخر وهكذا دواليك. لا تذكري قائمة الأغراض دفعة واحدة فهذا سيسبب له إحباط ويدفعه الى الهروب من مسؤولياته. بالتوفيق ان شاء الله. تحيتي. |
الشي الوحيد المشترك بيني وبينك حبنا لازواجنا بجنون
رجاءا لاتغلطي غلطتي ماينفع الطلاق وانت تحبينه بصراحه لايستاهل الموضوع الطلاق لكن حاولي واصبري وازعلي وتكلمي معاه دايم قولي عشان اهلي اذا شافو البيت مايعيبون عليك وانا ما بغى شي كثير بس الاشياء الاساسيه ولاتتركين بيتك وربي يصلح ازواجنا ويهديهم يارب |
اقتباس:
والله مش عارفه أيش ممكن أكتب لك وكنت بكتفي بالدعاء لك :25: بس بعد رد الأخت لقيت كلامها جميل ومنطقي نفذي ماذكرته مع حبتين صبر:) وماتشوفين شر يالغاليه وإن شاء الله أزمه وتعدي:22: |
حبيبتي انا احس فيج لان زوجي انا بعد ما يحس بالمسئولية بالمره تخيلي ولا يسوي شي ابد وكله نفس الشي ما عندي وقت بس الحمد لله اني اسوق هذا وانا في بلد غربه يعني دليت الاماكن المهمه اللي احتاج لها مثل جمعيه ، مستشفى .. مول لقضاء اهم الحاجات .. وصرت اقضي حاجاتي بروحي مدام يعطيك فلوس خلاص سوي اللي تبينه بروحك ولا تعورين قلبك لان هو متربي على عدم المسئوليه يعني يبيله فتره على ما يحس .. حاولي تغيرينه بس لا تتسرعين وتنفصلين لان حرام توكم في بدايه المشوار والله لو تصبري ان شاء الله يتغير انا ما تغير زوجي بس متحمله تخيلي ان ساعات ليتات شقتنا تحترق واحد ورا الثاني والله ما يركب ليتات ونعيش بالظلمه يقول نطري لم يحترقون كلهم علشان مره وحده اغيرهم .. انقهر ولا يقول نادي السواق يغيرهم لج كل شي ماخذه عادي ومو مهم واذا قلت له انت ما تحس بالمسئوليه يزعل ويقول انا اشتغل علشان مين هذا الرد اللي اسمعه .. طولي بالك يا حبيبتي .. انا اقولك معاناتي علشان اصبرك وابين لك ان في ناس زيك وناي حاسه فيك .. بس قرار الانفصال غلط وشيليه من بالك وان شاء الله بتتحسن الامور
|
يا اختي ممكن تاخذين بنصيحه الاخت نور الاوطان في الويك اند انت وزوجك تسوقون سوى وكميه كبيره تكفي اسبوع وهكذا كل نهايه اسبوع
وحاولي تذهبيين الى الاثاث واشتري كل اسبوع قطعه وهكذا... يعني الظاهر انه طبيعه زوجك لا ابالي الله المعين |
حبيبتي لا تتسوقين لمده اسبوع اتسوقي لمده شهر علشان لا تمللينه كل اسبوع جمعيه انا اسوي كذا اخذ كل حاجاتي اللي تكفيني لمده شهر .. والحمد لله مشيت حياتي لا تسدين الابواب والله ان امرك يهمني .. الله يشفيك ويقومك بالسلامه ويصبرك على ما ابتلاك
|
أختي
إذا تبحثي عن زوج خالي من العيوب فأنسي الأمر هذا أختي بيدك تغيير زوجك للأفضل بإذن الله و أنتبهي لا ترددي على زوجك دايم بأروح عند أهلي بيتعود بعدين :( و بيتك هو بيت زوجك و لا تدخلي أهلك في المشاكل اللي بينكم أختي استخدمي سلاح أنوثتك في تلبية طلباتك ترى الرجل طفل كبير :) أختي انظري لنصف الكأس المملوء و ليس النصف الفارغ قولي الحمد لله عندي منزل و غيري ماعنده منزل و جالس في شقق مفروشة و اللي ساكن عند أهله وووو إلخ قولي الحمد لله عندي كمبيوتر قولي الحمد لله عندي زوج يحبني و ترى الدنيا قصيرة و ماتستاهل ، خلينا نعيشها بحب و حنان :) و زوجك أكيد مو متعود يتحمل المسئولية ، شئ جديد عليه مثل مانحن أول ماتزوجنا ما كنا نعرف كيف نطبخ و نكنس و نغسل الملابس ، صح و لا غلط ؟ :) كل شئ حبة حبة لا تطفشي الرجال و أنسي إنك كنت في بيت أهلك مدللة وووووو إلخ كلنا كنا في بيت أهالينا مدللين :d و الحياة كذة لازم يوم حلو و يوم مر ، بس إنت قولي أبغى أخلي حياتي كلها عسل ;) |
لا يا اختي صحيح مشكلتك صعبه لاكن في نفس الوقت سهله
اذا احسنتي التصرف وبعدين حبيبتي الحين كل شي صلر فيه توصيل كل ما عليك تلخذين اقرب سوبر ماركت وتكلمين عليهم وتشتركين معاهم اذا نقصك شي دقي عليهم وخلهم يوصلولك اغراضك ايضا المطاعم اغلبها فبها خدمه توصيل يعني اذا كنتي جوعانه اطلبي من اللي تشتهين بالنسبه للاثاث يقولون كثر الزن يفل الحدي يعني مثلا ركزي في البدايه على مكان الجلوس ثم شوي شوي لحد ما تكملين يعني لازم تعتمدين على نفسك لانه زوجك يبغ له وقت طويل لحد ما يتاقلم مع المسؤليه وانا شخصيا مريت بالي مريتي فيه لدرجه انه كان ينساني في المدرسه وكثير مثلك زمثلي يعني اعتمدي على نفسك وابدي حمليه مسوليه بسيطه شوي شوي لحد ما يتعود |
تحبينه مره ولا انت قادرة تستحملينه ثلاثة شهور !!!!!!!!! عجب عجب
|
خلاص مادام انه يعطيك فلوس دبري لك احد تروحين معه وقضي كل اشغالك
الله يخلف علينا بس الحين الرجال ماعاد صارويتحملون المسؤلية والسبب تربية البلاي ستيشن والسواقين والشغالات |
ما أهون كلمة الطلاق لديكم معشر النساء معقوله لهذا السبب تريدين الانفصال عنه طيب ايش رايك اختي عندها من المشاكل مالله به عليم ولكن عمرها ما طلبت هذا الطلب ابدا.
فالامر هين وسهل ما دام الرجل ليس بالبخيل فاعملي مثل ما تفضلت احدى السيدات في هذا الموضوع لا تعتمدي عليه واذهبي واشتري حاجيات البيت واستعيني باحدا من اهله او من اهلك ومشي الامور ولا تعقديها . |
فوفو شكرا لنصيحتك
جناين ورد2008 انا بانتظارك ام المهدي الحمدالله علاقتي باهله جيدة ولله الحمد ويحبوني مثل بنتهم واكثر بس المشكله اخواته متزوجات في منطقه اخرى يعني ماعندي احد يطلع معي وامه تتعب من هالمشاوير المتعلم2007 كلامك جميل وهذا اللي مصبرني ام جمانه كلامك صحيح لكن والله المشكله اكبر مماتتصوري هل جربتي عدم الامبالاة من الزوج؟؟؟ ولا استطيع الخروج لوحدي علما بان اهلي بعيدين واخواته ايضا غموض السنين انا ايضا لااريد ان اخسر هالحب ولا ارغب بالطلاق لكن تعبت من كثر التفكير العازم انشاء الله بحاول nanahani انا مثلك لااستطيع الخروج لوحدي الله يسهل امورنا يارب نور الاوطان صدقيني اتبعت كل الاساليب وماابغى احد يفكر اني متسرعة بالعكس انا شخصية اتميز بسعة الصدر والصبر ولكن ماحصلت نتايج |
marjanah جربت هالطريقة يالغاليه وعجبته ولكنه ماوفى صار يتحجج انه الويك اند وقت راحته ويبغى يشوف اصحابه
اموله حبيبي جربت ازعل ماقدرت ماادري شلون بعيش بعيد عنه ؟؟ بحاول ازعل دلوعة 24 تسلمين يالغاليه ولاتحرميني من الدعاء nweerh مثل زوجي تماما الله يصبرنا وسالفة المسواق كل شهر هذا الل اتبعه لكنه شكله يكره السوبر ماركت white-moon77 حاولت ومانفع ادعيلي يالغاليه روح الطير انا ولا مرة قتله بروح لاهلي ابدا وكل الكلام اللي قلتيه صح وانا حامده ربي لكن صحتي تدهور دروب الخير افكر دايم اطلب من مطعم لكن من يفتح الباب اخاف افتحه وانا بالبيت لحالي فهد هاشم : ايه احبه ومن قالك مقدر اتحمل 3 شهور بالعكس انا تحملت 3 شهور دقق بكلامك لو سمحت وانتم الرجال هكذا مايبين بعينكم التضحية ابو ربيعة صدقت وجزاك الله خير miraj2005 كلمة طلاق ليست هينه ابدا ولكن اذا شعرت المرأة ان حياتها وصحتها بخطر فلماذا الصبر |
صمت الهوى مدام زوجي نفس زوجك تماما تقدرين تحطيني جدامك وتمشين امورك انا ما ازكي نفسي ولا اني قدوه لا سمح الله بس في شارك مشترك بينا الا وهو زوج غير مبالي فتصرفي بحكمه معاه .. وفكره الانفصال اطرديها بالمره ومابي اسمعها منك مره ثانيه وصحتك يا حبيبتي تتحسن لو اعتنيتي فيها انت من حزنك على زوجك مهمله بنفسك غيري جوك وصدقيني بتتغير حياتك .. لا تشوفيني اقول هالكلام وحالي احسن من حالك لا بالعكس بس يمكن انصحك وتستفيدين من شي او انا ارجع واخذ منك شي واستفيد منه الله يسهل امورنا يا رب
|
يالغاليه كل الرجااااال هكذا .. مافي احد منهم ينولد وهو عنده حس المسؤليه بالفطره .. انما هذا هو امر يتعلمه ويصقله وينميه في نفسه .. فلابد انكي تصبري عليه وتتحلي بالحكمه .. ولازززززززززم ماتستسلمي بالسهوله هذه وتفكري بالانفصال .. الحين لو جاكي ولد وبديتي تعلمينه كيف يمشي .. وشفتيه يسقط ويتعثر .. مو راااح تصبرين عليه وتنتظرين وتظلين تعلمي فيه اليييييييين مايتعلم ??? ولا راح تقولين لااااا مايعرف .. خلاااااااص اذن ما ابغاااااااه ??? |
و الله قد ما اضحكني موضوعك قدر ما صعبتي علي،يا احتي لا تاكلي هم و لا تمرضي نفسك ،لانه الامر بجد ما يستاهل معظم الرجال هكذا و حاصة انك حديثة الزواج يعني توك عرسان بايام العسل الان زوجك حايف من المسؤولية و حايف يواجه هذه الحياة الجديدة الغريبة،و حاصة لو كان في بيت اهله ما يهتم بامور البيت، مصيره حيتعود عيشي حياتك و الله يبارك لكم.
|
لازم تعرفين السبب علشان يسهل الحل
هل هو عدم قدره ماديه؟؟؟ ولا برود؟؟؟؟ |
لو بدك تضلي تجيبي غرضك بنفسك فهذه مش عيشه ومن الان اقولك الانفصال احسن لانه مدام مش سائل في بيته كيف حيسأل في اهل بيته ؟؟
|
يا أختي روحي مع سواق اهله او اهلك وخذي معك اي احد لو شغالة اهلك او اهله
روحي لهالمحلات اللي يبيعون الاثاث واشتري اللي يريحك منها للجلسه العائليه على الاقل وطاولات ولو مالقيتي سواق اذا رحتي لاهلك اطلبي منهم يودوكي لهالمحلات وقضينا وبالنسبه للمقاضي الحين كل البقالات يوصلون طلبات للبيوت ومحلات الخضار بعد لو بننتضر رجالنا كان ماسوينا شي معليه يا اختي بس لا تقارنين ابوك بزوجك لان الجيل هذا يختلف تمامآ (حتى احنا نختلف) بعدين تقدرين تتفاهمين مع زوجك بهالموضوع يعني لو يجيك سواق اجره موثوق يصير يوديك ويجيبك تنخلصين امورك ولا تفكرين بها التفكير الله يصخرلك زوجك ويصخرك له يارب |
فعلا هذه مشكلة في زوجك , لكن الأكير من ذلك , أنك لا تعي الحياة الزوجية بأكملها
والدليل طلبك للطلاق لمثل هذه المشكلة التي لا تقدح في الشرف , وجعليتها من أكبر الكبائر وفي فترة وجيزة , والأدهى أنكن تحبين زوجك , تناقض ما لنا الا السكوت له .. ولعلمك لو كنت تحسنين التبعل لزوجك وسيطرتي على قلبه , لما انتظر منك طلب بل سيتتبع نفسيتك ويلبيها لك |
اقتباس:
يعني يا اختي انت شايفة انه ثلاثة شهور (( تضحية )) !!! الناس قاعدة تقضي العمر كله مع شركاء حياتهم وانت مليتي من اول ثلاث شهور وتبين الطلاق !!! صحيح ان زوجك من شباب هاليومين إلي ما يتحمل المسؤولية بسرعة ولكن اسمحيلي اقولك انت بعد من بنات هالليومين وما تتحملي المسؤولية ولو انك قدرتي تتحمليها كان ما طلبتي النصح من الناس وكان صبرتي وما اهملتي نفسك وصحتك وفي الاخير طلبتي الانفصال. انا اقول الحمد الله انكم تحبون بعض اما الباقي فانا شخصيا اعتقد انها مشاكل سطحية والوقت كفيل بحلها .. تمنياتي لك بالتوفيق :) |
| الساعة الآن 12:14 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©