|
فضول (اهل زوجي) يرفع ضغطي !!
مساااااء الخير في مشكلة بسيطة بيني وبين اهل زوجي , ولكن هالمشكلة البسيطة ساعات تقهرني , وترفع ضغطي ووقتها اكون خلاص اعصابي تلفاانة وخصوصاً إني من النوع العصبي :29: بإختصار ,, ساعات أحس إن فضوول أهل زوجي مو طبيعي !! بتسألووني منو بالضبط من اهله ؟ وشلون ؟ كلللللللللهم هالصفة فيهم سبحان الله , من اكبيرهم لي اصغيرهم ابو زوجي وامه وخواته واخوه الوحيد . راح اذكر لكم امثله بسيطة , يعني مثلاً تخيلوا إن قاعدين معاهم نسوولف ولمن زوجي يطلب مني آلبس عشان نقوم نطلع لازم يسألنا بو زوجي وين بتروحون !! <<--- ياربي اشهالسؤال ؟ اهم اشعليهم وين بنروح والله بنطلع وين ما نبي وكيفنا .!!! شنو تحقيق اهو ! :( وطبعاً لازم يسألنا (من وين جايين) , إذا شافونا رادين من برى !! وفوق هذا كلللله , قبل يومين بس كنت طالعة من زوجي السوق ولمن ردينا لقينا (بو زوجي) عند الباب إحنا داخلين واهو طالع , تدرون إنه سألنا ,, شنو شريتو ؟؟؟؟ مادري مادري ,, هذا شي طبيعي مثلاً ؟؟؟ والا آنه حساسة وضيقة عين مثل ما يقول زوجي ! وهذا غير اسألة خوات زوجي الطويلة العريضة , إلي خلاص تخلي اعصابي تلفانه ! :29: لازم من اشتري لي شي والا اشتري حق شقتي شي , اييون يجوفونه ,, ويسألون بجم ومن وين !! لو كانو ناس عاديين وسألوني بجم ومن وين وآنه حاسه إنهم سآئليني لأن الشي عاجبهم ماعليه بالعكس بستانس وبقولهم عن طيب خاطر , ولكن طريقتهم في الاسئلة والبحث , حق فضوووليين وآنه اكره ما علي الفضووليين <<-- وعاد اهل زوجي ضربو التوب في الفضول ! يمكن بتسألوني كلمتي زوجج اولا ,, الصراحة لمحت له كذاا مرة ,, مرتين او ثلاث مرة وحدة منهم كلمته بشكل صريح بدون تلميح ,, عن استيائي من فضول اخته قلت له اسأله وين راييحين ومن راديين اهم مالهم شغل فيها وفينا اصلا .. وآنه مستغربة من من هذا كلله طبعاً كانت ردة فعله , دفاع عن اخته وعن بيتهم , قال لي إنهم متعودين يسألوني وين رايح وين راد من قبل لا ارتبط فيج . مو بس من الحين ! .. وآنه اجوف اسألتهم عادية (اهي اصلا صدقووني مو عادية بس اهو يمكن متعود على فضولهم) مع كلامي واصراري على رأيي وعصبيتي هذاك اليوم , اعترف زوجي أخيراً إن بيتهم فضووليين بدرجة اولى . وقال لي إذا هذا الشي يضايقج من حقج ما تنزلين لهم ولا تسلمين عليهم ولا حتى تمرين عليهم !!! آنه استأت من كلامه , آنه مابي الموضوع يوصل لهدرجة وبينت له حبي لهم وإني مابي تصير قطيعة بيني وبينهم ولكن لكل شي حدود , كل السالفة إني اتضايق من الاسئلة الفضوولية حبيت اقولكم إن يوم نطلع قبل يومين وصادفنا ابوي زوجي , بعد ما سألنا شنو شريتو نطرت على ما يروح ابوه ,, وقلت حق زوجي بطريقة وآنه مستغربة ((والله انتو غريبين !!!)) رد علي زوجي بكل برود (( انتي الغريبة والله !!)) عصبني زيادة , وقلت موووب غريبة ولاشي انتو الغريبين عيل هذا سؤال ! ورد علي بطريقة عادية ..:: ماتبين حتى ابوي يتطمن على ولده !! <<-- يتطمن ؟؟!! :( آنه آنه خزيت بليس مثل ما يقولون , وسكت عنه ,, لأن ما كان لي مزاجي نتهاوش :d هذي المشكلة , ولكن حبيت اوضح شي عشان لا اكون ظالمة لـ اهل زوجي ,, صحيح اهم فضوليين .. ولكن يحبوووني جداً جداً , وخصوصاً ابو زوجي الي يدلعني ويعتبرني مثل بنته واكثر صج يعتبرني اكثر من بنته ما ابالغ بهالشي , واهو بنفسه اعترف لي ! ومعاملته معاي تثبت لي هالشي. وحتى ام زوجي تحبني مثلي مثل بناتها , وتشتري لي هدايا , ولمن ادخل عليها لازم تقوم بطولها وتضمني وتبوسني وتسألني عن اخباري واخبار امي وبيتنا كلهم , وخوات زوجي بعد ما يقصرون يحبوووني وايد .. إلي ابي اعرفه الحين , إن اهل زوجي فضولين ؟ والا يتهيأ لي (على قوله زوجي) ..؟؟؟ فضولهم جاي من حبهم لي ؟ والا مجرد فضووول وبس !! وشنوو برايكم حل هالفضول الي فيهم ؟ والله ساعات احس روحي ماقدر اتحمل يعني (في اكثر من مرة) اخت زوجي تسألني من وين جايين , من قهري اسوي روحي مااسمع وامشي عنها ..!!!! اشرااااايكم ؟؟؟ ومسامحة على الإطالة مع إني قلت لكم بقول مشكلتي بإختصاار !! :23: |
باين من كلامك هذا طبعهم وصعب تغيرينه
بكل بساطه طنننننننننننننننننننشي ولا تسوين مشكله |
انت شنو خسرانه اذا عطيتيهم على قد عقولهم وجاوبتيهم؟؟
مو خسرانه شي غيرج حاله اردى |
اقتباس:
اهليين حبووبة والله آنه بعد قلت بيني وبين نفسي هالشي , ولكن ساعات من كثر قهري أحس هالشي بأثر بعلاقتي فيهم وإذا اليوم تحملت , ما اضمن روحي اتحملهم باجر :29: تشكراااااااتي لج عسل على مرورك , |
والله أعلم
هم مافعلوا هذا الفعل إلا من منطلق حبهم لكي ويودون يتشاركون معك المعلومات وعلى فكرة معك حقك تتضايقين لأني أنا نفس الشيء متضايق من أسئلة والدي (بشكل اقل مما ذكرتيه في امثلتك ) مع اني مقتنع منطقياً بأسألته لأنه نابعة من حبه لنا . عليكِ بالصبر وبالتوفيق |
اقتباس:
ذكرتيني بزوجي في مرة قال لي (خذيهم على قد عقولهم) !! آنه فكرت في كلامه , وقمت صج آخذهم على قد عقولهم وآخذ واعطي معاهم , ولكن آنه مالي أمان !!! لأني مزاجية يعني اليوم اكون رايقة اسايرهم , لكن يوم ثاني ما اضمن هالشي وخايفة يمكن يزل لساني وتصير مشكلة :30: الحمد لله رب العالمين , آدري في ناس حالهم اردى والله يساعدهم ولكن القصد من طرح مشكلتي , اهو خوفي من المستقبل سواء كان القريب او البعيد لأني مابي تصير اي حزازيات بيني وبينهم , لأن مو سهل اخذهم على قد عقلهم مثل ما تقولين ؟! وجزيييل الشكر لك اختي , |
اختي اذا تقولين انهم يعتبرونك نفس اختك فهالاسئلة طبيعيه جداً جداً جداً .. يعني اذا امك سالتك وين رايحه ومن وين راده بتزعلين ؟؟
تعوذي من ابليس اختي .. لا فضول ولا شي .. كل مافيها انهم يحبونك ويبون بسالون عنك وعن اخبارك .. الله يعينك يارب .. ويبعد عن العصبيه يارب :) |
اقتباس:
والله اتمنى يكون كلامك صحيح وإن اسألتهم حباً فيني مثل ما تقول الحمد لله انك قلت معاي حق اتضايق , لأني كنت خايفة إني ظالمتهم لا سمح الله شكراً لـ دعائك لي بالصبر ,, إن شااء الله يعطيني الصبر (لأني للأسف افتقدهـ كثيراً ) يوفقك الجميع إن شاااء الله , وشكراً على مرورك , |
اقتباس:
مو المشكلة إني اذا اقارنهم في اهلي , الاقي فرق السما والأرض ! اهلي اصلاً تكون اسألتهم عادية , يعني ما يسألوني حتى وين بتروحين والا معقولة امي بتسألني وين بتروحين !!!! اكيد ما بتسأل لأني طالعة مع زوجي , إن شاااء الله حبيبتي مثل ما تقولين مو فضوول آنه والله اتمنى هالشي ومشكوورة عـ الدعااء يا قمر , وعلى مرورك |
يا قلبي ع الطعامة حتى وهي مقهورة ومعصبة:d :d
ليكو خيتو شئ الي تحكي عنه عادي اتخيلي معي تمروا ولا حدا حكى معكن كأنكم ولا شئ هيك كيف بتحسين كني الله يرضى عليك |
اقتباس:
فديتج بعد جبدي والله انتي :o اممممممممم اكيد شي صعب , حتى مو حابة اتخيل الشي الي قلتيه ولكن في خير الأمور الوسط , يعني لا يطنشونا , ولا يذبحوني من الأسئلة :d تشكراااااااتي لج عسووولة عـ المروور =) |
والله يا الغاليه احس انك مكبره الموضوع :)
السالفه وما فيها انهم يحبونكم ويمونون عليكم ولو غير كذا والعلاقه رسميه وزوجك مو ولدهم ما سالوا ولا حتى اهتموا طلعتوا والا رجعتوا وبالنسبه لي ماهي سالفه كبيره ولا فضول مبالغ لما يقولون وين بتروحون ؟؟ على كلامك انا واهلي واهل زوجي كلنا فضوليين ونرفع الضغط :) يعني انا مثلا لمااكون عند اهلي او اهل زوجي وبنطلع بدري مو زي العاده لازم اذا قمت وودعتهم اقول لهم بنروح نتعشى بمطعم مثلا او ندور سجاده او لوحه او او او ... يعني ما استناهم يسالون لان ما بين الاهل هالشي ابد ابد انت تعوذي من ابليس و خذي الموضوع ببساطه وزي ما قلت لك جاوبي على قد السؤال وان كنت افضل انك تقولين وين بتروحين او وين رحتي قبل ما يسالونك ولا تنسين انك ما رحتي لمكان محرم والعياذ بالله .وانت بنتهم . وبدل ما يقول زوجك قومي البسي بنروح يقول قومي نطلع نتعشى مثلا ومو ملازم تحديد المكان او الموقع وفيه حركه بايخه طايحين فيها الناس مره ما تعجبني تلاقين الناس مجتمعين ومبسوطين وتقوم وحده تمونين عليها (لاحظي تمونين ) وتقول عن اذنكم وانتي بكل عفويه تقولين لها وين بدري تقول لك لا والله بطلع مع اختي مشوار ؟؟؟ افهم وش معنى مشوار ؟؟ يعني لو قالت مرتبطه ارحم :) وهالزمن ما عاد فيه احد يمون على احد ويعامله بحب وكاخ اذا حتى الاخوان يتضايقون من بعض للاسف :( تحياتي دلوعه زوجي |
اقتباس:
اهليين دلوووعة اي آنه ما انكر حبهم لي , والله انهم يخجلوني من كثر ترحبيهم لي إذا ازورهم ودايماً يصرون علي اقعد معاهم , وآكل وجباتي معاهم , وهذي المحبة جاية طبعاً من حبهم لـ ولدهم الحمد لله على هالنعمة , ولكن شسوي اسألتهم احسها تستفزني عدل , وتعصبني لأن احس فيها تدخل بيني وبين زوجي ,, بس الله يصبرني , مالي الا الصبر تشكراااااااتي لـ مرورك .. |
عاااااااااادي جدا اختي
بس يمكن انت حساسة شوي وانا بعد مثلك ...ابو زوجي لازم يسأل اذا شافني بطلع او راجعة من مكان حتى اذا زوجي كان طالع ....انا ما اسأله وين رايح او من وين راجع يجي عمي يسالني وين كان رايح فلان ...اقول له عمي والله ما ادري ما سألته ..احس علامات التعجب على وجهه كيف يعني ما اسأل زوجي وين بتروح ...هههه لا تصيرين حساسة ... راح تتعبين |
كل إللي ذكرتيه يالغلا شئ عادي أغلب المتزوجات يمرون فيه :25: بس حنا عندنا نقطه ستوب:30: لما الموضوع يكون من أهل الزوج :25: باين من كلامك أنك لسه عروسه إذا ما خاب ظني صدقيني فتره وتعدي بس أهم شئ لا تتضايقي وحاولي تتقبلي سؤالهم بروح مرحه :d وبعدين أتوقع ماله داعي يأخذون منك موقف ع موضوع بسيط مثل هذا صحيح يضايق بس يلاه كبريها بتكبر صغريها بتصغر:11: وإن شاء الله راح تكون فتره وتعدي :) اهم شئ بالموضوع إنهم يحبونك وهذا عندي يهون عشانه كل شئ :22: الله يسعدك ويوفقك مع زوجك ومعاهم اختك دلوو24ووعه |
وضعي يشبه وضعك..:d
مااحب احد يسألني وين رايحه ومن وين راجعه بس في النهاية اطنش الموضوع لأن مثل ماذكرتي ان اهل زوجي مرررررره حبوبين وطيبين بس الزين مايكمل :27: حتى ان زوجي كلمهم في الموضوع بس مافي فايده بصريح العبارة هذا طبع وصعب يتغير..:( اهم شي حياتك مع زوجك مستقرة.. والله يوفقك..:30: |
اقتباس:
اي والله مثل ما قلتي يمكن آنه حساسة ززيادة تصدقين آنه مثلج , ما اسأل زوجي عن اشياء وايد (طبعي ماحب اتسأل في الناس - احس روحي فضوليه) !! من جذي مستغربة حدي من طبع اهل زوجي , وكثر اسألتهم الي اذا تجاهلتها بطريقة او اخرى يصرون على اعادة السؤال , والإلحاح عشان يحصلون إجابة ! وحتى مع زوجي طبعي هذا مو راضي يروح , بس يوم شفت اهله جذي عودت روحي شوي شوي اسأله وين بتروح واسأله ثانية طبيعي اي زوجة تسألها اياه ,, (عشان لا يحسب إن عدم سؤالي له هو عدم اهتمام له وتطنيش) تشكراااااااتي لج حبووبة ع المرور |
اقتباس:
الحمد لله عيل في احد وضعه يشبه وضعي :d والله زوجي اقترح علي يكلمهم , بس آنه خفت وقلت له ماله داعي خفت من الي بصير يمكن يزعلون والا يفهموني غلط , الحمد لله حياتي مستقرة , ويوفقك حبووبة , تشكراااااااااتي لـمرورك |
يا اختي أنتي قلتي إنهم يحبوك:22:
ويعتبرونك مثل بنتهم:17: هل تتوقعين إذا سألو بنتهم بتتضايق:19: طبعا لا لأنها بنتهم:d لكن إنتي ما أعتبرتيهم مثل أهلك أتوقع :18: بس أنتي للأسف معطيه الموضوع أكبر من حجمه:11: يا اختي معتبرينك وحده منهم :confused: باين انهم على نياتهم وانتي اول وحده من زوجات الابناء عشان كذا لسا ما انتبهوا لبعض النقاط ولو اني متيقنه انهم طيبين وحبوبين:22: وما يقصدون اي شي لا تصيرين يا اختي مثل حريم العيال اللي كل العيوب يحطونها في اهل الزوج :16: 0000000000000 |
اقتباس:
اي بعدي عروسة فديتني :o اممممم اي صج مثل ما قلتي , يمكن لأنه من جهة أهل الزوج فإني اكون اكثر حساسية يصير ليش لا =S إن شاااااء الله تكون فترة وتعدي مثل ما تقولين , وإلا آنه بالعكس احمد ربي إنه عطاني اهل زوج يحبوني يمكن الغلط فيني عيل !! :29: مشكوووورة حبووبة ع المرور , وعلى دعائك لي =) |
اقتباس:
طبيعتي او (طبيعة بيتنا) كامل , مختلفة عن طبيعتهم , آنه مو إجتماعية وما اخالط الناس وايد , وصعب اتعود على اي احد بوقت قصير لكن اهم ما شاء الله عليهم اجتماعيين درجة أولى ويحبون الناس ويرحبون فيهم عشان جذي اهم تعودو علي في فترة قصير وحبوني وخلوني وحدة من بناتهم وآنه للحين مو متعودة عليهم واحس وبنيت حاجز بيني وبينهم , شكراً حبيبتي على مروك , والله نبهتيني لـ نقطة آنه غافلة عنها اممم لالا آنه مو اول زوجة لـ ولدهم , عندهم ولد ثاني اكبر من زوجي متزوج من عشر سنين ولكن زوجته هذي ما يشوفونها , عادي يمر شهر واكثر ما يشوفونها مع إنها عايشة بنفس البيت في شقة منفصلة !! اهي طيبة وحبووبة , وتحب اهل زوجي , ولكن مادري شنو سبب غيابها ! والحين اتوقع يوم ولدهم لصغير تزوج (زوجي) , ما صدقو على الله عشان يحسون إن عندهم زوجة ولد يشوفونها على طول وتقعد معاهم حتى إن ام زوجي على طول تبي تطلعني معاها عشان تعرّف صديقاتها فيني , وآنه بحكم طبيعتي ماحب هذي طلعات النسوان خصوصاً إني عمري صغير (20 سنة) وما اقدر اندمج مع كبيرات السن. |
يا اختي لا تخلي من الحبة قبه
ليه مسويه قضية من لا شيء؟؟؟ عادي يسألوكم اذا انتو طالعين يعني لما ولدهم يقول يلا نطلع ما تبغي امه وابوه يسألوه؟؟ انتي ليش متحسسه من هالناحية ؟؟ احمدي ربك انهم معتبرينك وحدة من بناتهم بعض الناس ما كأنهم يشوفو حريم عيالهم ولو الود ودهم يحرقوهم حرق احمدي ربك على النعمة اللي انتي فيها وعامليهم مثل ما يعاملوكِ والمفروض ناس مثل كذا طيبين معاكِ ما تتكلمي عليهم بهالطريقة |
انتي مثلي احب خصوصيتي في كل شي .. ورزوجي العكس عنده عاادي هالشي ..
بس احاول اتكيف لان هم بعد يحبوني واايد ويعاملوني مثل اختهم .. يعني الخوات يتعاملون مع بعض بنفس الطريقه .. فعادي يسألوني هالاسئله لانهم يعتبروني مثل اختهم بس ام زوجي ماتسألني الا نااادر .. وانا اوقات بحكم اني معاهم في نفس البيت احس انها لهاا الحق تعرف بعض الاشيا عني .. عشان العلاقه تزيد .. تحملي وحاولي تقوين علاقتج فيهم .. صدقيني اذا زوجج فيه خير لهم بيكون فيه خيير لج .. |
دام انهم يحبونج حمدي ربج والفضول (مومشكلة ) ...
في كثير في مجتمعنا يعانون من ظلم اهل الزوج وكراهيتهم وتسببهم في المشاكل وتدخلهم بين امور الزوج وزوجته ... |
اذا يحبوك على حد قولك فلا تسيىء بهم الظن وحاولي تفهميهم بادب انك ماتحبي حد يدخل في امورك الخاصة وصدق من قال الصراحة راحة ولكن موتبالغين في عصبيتك يمكن هم موحاسين انه اسالتهم فيها ازعاج لك ودمتي بوووود
|
اسمحي لي اختي الكريمه أن ابدي رأي.....
*اذا كان فضول لمجرد الفضول طنشي مثل ماقالوا الاخوات مانتي خسرانه شي *اذا كان هذا طبعهم (الطبع يغلب التطبع) لا تحاولي تغيريهم *اذا هم يحبونك مثل وبناتهم ويدللونك والله ان خالتك قومتها وحضنها لك شي كبير عادي اعتبريها تسألك مثل ماتسأل بناتها وولدها اللي هو زوجك *انتي شكلك تعصبين من هذا الموضوع بشكل كبير,,,,,,,,, في شي بخاطرك عليهم يعني اذا قلتي لهم الشغله الفلانيه سعرها كذا ,,,, هل تحسين تعليقاتهم على السعر مثلا لو قالوا غالي او مايستاهل السعر هذا ,,,, تعليق عادي ومن باب تبادل الآراء,,, او تعليق مبطن يقصدون فيه التبذير؟؟؟ *اختي الكريمه لاتلحي على زوجك بهذا الموضوع حتى لاتخسري مودته فهو ليس بذلك الموضوع الكبير لكي يقف معك او ضدك *تذكري انه اعترف لك بفضولهم وهو بين نارين لا يستطيع ان يبلغهم استيائك ولا يستيع غير (تصريفك) فلا تضغطي عليه **نصيحتي أديري مركب حياتك بذكاء ولاتتوقفي عند هذه الأمور ...لاتخسري مودتهم بسبب هذا الشئ فالواضح باءعتراف زوجك أنه طبع وباءعترافك أنهم يحبونك خلي روحك رياضيه.... ** انتي اذا اشتريتي شي ماتسولفين مع أمك وخواتك وتقولين لهم من وين أو بكم؟؟؟ ** اعتبريهم أهلك وستلاحظين ان السؤال لن يضايقك مجددا.. اتمنى لك التوفيق يا اختي الكريمه واعذريني اذا كلامي مخربط(الله يعلم بحالي)-(مريض جدا) |
شوفي حبيبتي اذا تبين انه علاقتك تستمر حلوه معهم لا تزعلين ولا شي وحاولي تقنعين نفسك انه عادي واسئلتهم عاديه وانتي الغريبه
واما اذا ما تقدرين حاولي تلفين وتدورين لا تعطينهم اجابه على اي شي مثلا لو كنتي جايه من برى وسالوا قولي كان عندي مشوار قالوا وش مشواره قولي قريب قالوا وين قريب قولي على الشارع الفلاني او الحي الفلاني واتوقع بيفهمونها بس بتجي في خواطرهم ويمكن يشيلون عليك وبرضو لو قالوا وش شارين معكم قولي غرض واذا قالوا قولي للبيت لا تعطينهم اجابه واضحه وبيبطلون وبيعرفون انك ما تبين تجاوبين |
صحيح اهم فضوليين ..
ولكن يحبوووني جداً جداً , وخصوصاً ابو زوجي الي يدلعني ويعتبرني مثل بنته واكثر صج يعتبرني اكثر من بنته ما ابالغ بهالشي , واهو بنفسه اعترف لي ! ومعاملته معاي تثبت لي هالشي. وحتى ام زوجي تحبني مثلي مثل بناتها , وتشتري لي هدايا , ولمن ادخل عليها لازم تقوم بطولها وتضمني وتبوسني وتسألني عن اخباري واخبار امي وبيتنا كلهم , وخوات زوجي بعد ما يقصرون يحبوووني وايد .. هذا دليل أنهم يحبونك ويعتبروك وحده منهم علشان كذا يتعاملون معك مثل تعاملهم مع بعض وبعدين حبيبتي أحس أن الزوج ينجرح من زوجته أذا قالتله أهلك غريبين لأنه بيحس أن فيهم نقص أو أنك تستنقصيهم أنا أشوف أن تصرف أبوه عادي جدا بعد أبو زوجي يسوي نفس الشى وأكثر لكن تصرف الأخوات بصراحه مزعج جدا حاولي أذا تدخلو بشي تطنشي أو تغيرين الموضوع يعني لاتجاوبي عليهم وصدقيني شوي شوي رح يبطلوا وانتي حاولي لاتكلمي زوجك حلي الموضوع بطريقتك أول خصوصا أنهم ماأذوك بشى والله يوفقك أن شاء الله |
| الساعة الآن 06:19 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©