|
خيانه غير متوقعه من زوج محب كيف ولماذا ؟؟؟؟
بسم الله الرحمن الحيم أحب أكتب قصتي بكل اختصار وللعلم هذي أول مشاركه لي في المنتدى. أنا متزوجه من ست سنوات ولي ثلاث أولاد اتزوجت بالطريقه التقليديه يعني أمه شافتني وبعدين خطبتني لولدها بعد الزواج ومن أول يوم فهمني بالأشياء اللي يحبها ويكرها وأنا نفس الشي ويم على يوم بديت أعرف شخصيته واكتشفت انه من النوع العصبي جدا ومع مرور السنوات اكتشفت انه شخص مقهور بسبب ماضيه المرير مع والده الذي كان يضربه وحرمه من أمه لمدة سنه المهم صار بيني وبينه حب شديد لدرجة اني أفهم اللي يريده من نظرة عينه وهو يحبني وايد ويغار لدرجة الجنون وهذا الكلام صدقوني انه لين اليوم أدري بتسأولوني وين المشكله؟ بالصدفه اكتشفت انه على علاقه بوحده عن طريق الانترنت شفت الايميل المكتوب لأنه كان منزل الصفحه بالنسبه للطرف الثاني اسلوبها عادي في الكتابه أما زوجي الله يسامحه شوي تمادى المهم صارحته وبرر الموقف بأنه كان يبحث في موضوع الدكتوراه اللي يحضره وهي ساعدته في الحصول على بعض المعلومات لأنها حاليا وفي شهر واحد بالتحديد بتسافر للدراسه وهذا الشي هي كتبته في الايميل. قلتله انزين ليش كلامك فيه ليونه لا تحاول أنا مب غبيه الشي واضح على العموم قلتله أنا مضايقه وايد منك سو اللي بتسويه استمر واستمر وفي النهايه خبرني شو اكتشفت وأنا بروح عند الاهل لمدة يومين لأني ماريد أشوفك لأن هذا الكلام عند طلعته من الدوام وبعدها طرشلي مسج كاتب فيه أرجوج اذا بترحين روحي وغيري جو وباليل ارجعي ماأتحمل البيت بدونج وانتي اتعرفين هذا الشي واعترف اني غلطان وبعد يوم واحد رجعت البيت وعاملته طبيعي وفي داخلي نيران تشتعل وحيره هل زوجي فعلا يحب والله العظيم ماأقدر أوصفلكم اللي بيني وبينه من حب حتى الناس ملاحظين ويو يسافر للدراسه يتصل لأمه وهو يبكي من الخنقه ويقولها اتولهت للعيال وأمهم وأباهم وتقنعه انه الدراسه أهم وفعلا جهز لي كل شي وسافرت وكان عندي الطفل الثاني وعمره ثلاث شهور وحتى يوم أمرض ياخذ اجازه من الدوام ويتم عندي الفاجعه الكبرى انه من يومين طلع من الدوام وقال لي انا رايح دبي وهو في العده يروح بين فتره وفتره لمقابلة الدكاتره للدراسه ومثل ما قلت في البدايه اني أعرف شو يريد زوجي من قبل لا يتكلم وحسيت انه بيروح دبي علشان يشوفها وتكون مناسبه قبل لا تسافر واللي يخلي احساسي يتأكد اني شفت فاتوره من محل الورود بقيمة 1800درهم بشو تفسرون هذا الشي وللعلم من بعد ما رجع يعاملني بحب ودايما يردد الله لا يحرمني منج معاملتي له كلها حب وحنان لكن خايفه ساعدوني وللقصه بقيه وأحداث وتجارب. الاشراف / تم تعديل العنوان ليكون بالفصحى |
الله يعينك
مابغيت اطلع كذا حبيت ادعيلك الله يسخره لكم ولايشوف غيرك يارب |
معقوله محد ساعدني ولو باقتراح بسيط حطوا نفسكم مكاني ست سنوات مده مب بسيطه كيف اتصرف أريد اللي اتعرضوا لنفس الموقف يعطوني تجاربهم القصه طويله مثل ماقلت حتى اني لجأت لدكتوره متخصصه في الاستشارات الزوجيه والله يجزاها خير استفدت منها وايد ولكن في موضوع اخر ولسبب ظروف خاصه عندها ماقدرت أتواصل معاها.
|
كوني حازمه ياحبيبتي هذي حياتج وهو حبيبج..خطوه بخطوه اول شي لازم تتاكدين لاي درجه العلاقه بينهم
وبعدين على حسب اللي بتعرفينه لنا حديث اخر بس اختي لاتنسين الدعاااااااااااااااااااااااااااااااااااااااااااااا ء |
اختي عندكم الدكتورة ناعمة الهاشمي ياريت تسالي عنها وراح تساعدك كثير وهذا اختصاصها حل الخلافات الزوجية والخيانه قرات لها قصة اصعب من حالتك وحلتها بكل سهولة والله يوفقك ويصلح شانك كله ويهدي زوجك
|
مشكورين على تفاعلكم وأنا فعلا قصدت الدكتوره الرائعه ناعمه الهاشمي واستفدت منها وايد ولوما الله ثم الدكتوره يمكن ما اكون مثل هذا الصمود والثقه بالنفس.
|
الله يخليكم لبعض ويحميه زوجك من كل شر .. وياريت تطمنينا شو بيصير معك
*****بالتوفـــــــــــــــيق ***** |
أسال الله العظيم رب العرش الكريم ان يرد لش زوجش ردا جميلا وان يجمع بينكم على خير وان يبعد عنه الحرام انه ولي ذلك والقادر عليه.
|
ألف شكر لكم جميعا وعلى دعواتكم الطيبه اللي أثلجت صدري ولكن أريد نصايح هل التطنيش ينفع ؟هل التفسير أن الرجل يحب الزوجه وفي نفس الوقت يحب يغير ؟ هل بيستمرون؟هل وهل ؟كيف أستعيد حبيبي؟
|
والله يا عزيزتي انا مادري كيف ممكن افيدك بس فعلا الرجال محيرين اذا صاروا زي زوجك
يعني مو مقصره ولاشي ومع ذلك التفت لغيرك انتي خليكي يا الغاليه مثل ما انتي ولا تحسسينه انك حاسه بالنقص وتعوضين هذا اهم شي لكن لا تخففين حبك واهتمامك له وبيني انك متضايقه (بعقل) من السالفه اللي صارت وانك من حقك تبينه لوحدك ومحد يشاركك فيه ولو بشكل عابر ولو سطحي وانك لو ما تحبينه ما كان زعلتي وقولي له المفروض تخاف لو ما انا زعلت ...لان معناتها ما فرقت معاي انت لي والا لغيري وحط نفسك مكاني !!!! ( من جد موقف صعب صعب..ياليت تفيدينا من المعلومات اللي استفدتيها من الدكتوره ..والله احنا بحاجه لمثل هذي المعلومات) شخصيا ما مريت في نفس موقفك ولكن انسانه عزيزه جدا مرت في اللي مريتي فيه وسوت مثلك واستشارت اخصائي علاقات زوجيه قال لها خليكي مثل ما انتي وبالعكس حبيه ولا تقصرين ابد عليه وهي فتره وتعدي ويرجع لك صدقيني كان يطلع من البيت ما يرجع الا ينام ويتحمم بس ومع الوقت رجع لها وصار ما يطلع من بيته سبحان الله طبعا مع الدعاااااااء هي فتره وتعدي (يمكن اذا مرت علي مع زوجي انهبل الله يستر بس) اتمنى من كل قلبي والله تلقين حل وتجين تطمنينا على اللي يصير معاك اهم شي ما تنسين لا تتغيرين ابدا على زوجك ابدا كان الله في عونك |
شوفي هي شغله جديده على زوجك
جربي انك تجددين فترة الخطوبه او بداية الزواج بينكم فيه افكار زي كذا بين الزوجين مثلا يعني اذا تقدرين تحطين العيال عند اهلك وتحجزين لنفسك انتي وزوجك في فندق وتغيرون جو او مثلا تقولين لزوجك نبي اسبوع خطوبه جديده وشغلي مخك في اللي يحبه زوجك وتحبينه او مثلا سفريه ترويحيه لأي منطقه قريبه منكم الفكره مما سبق(انك تكونين وكأنك لأول مره تتعرفين على زوجك) يمكن هذا اللي شده في ست الهانم انها جديده عليه وحب يتعرف عليها خصوصا انك قلتي انها عاديه بس هو لين معها هو يبي شي جديد اتوقع او يبي يحس ان فيه شعور جديد تجددي بمعنى اخر (جالسه احاول افهم هو ليش يسوي كذا) واجهتيه بالفاتوره؟ |
صدقيني نزوعة أو مراهقة متأخرة وسوف تذهب
لاتهدمي بيتك .. واضح أنكما حبيبين لدرجة الجنون زيدي من مشاعر الحب .. وكوني عاشقة أكثر من زوجة .. وإن شاء الله يرد لك .. وأكثري من الدعاء .. وإياك والملاسنة فإنه تذهب كل مابنيتيه من حب وتأكدي أنها نزوة ثم تذهب .. وهذه يمر بها كثير من الرجاااااال الاشراف /عفوا : ان شاء الله تكتب على هذا النحو |
الاخ الغالب كلامه صحيح لا تقولين 6 سنوات زواج في ناس يحبون بعض وايد واكثر من هالمدة متزوجين وكلشي اوكي مرة وححدة تطلع له وحدة ويعجب فيها ووو وممكن حتى يتزوجها مع انه يحب زوجته وايد وهذا آخر شي توقعته منه انه يتزوج عليها وخصوصا بعد كل هالعمر وانه ما بينهم الا الحب والتفاهم ووو
وبهالزمن تعرفين دور النت بالبداية كلام عادي بس لا تصدقين اي واحد يكلم الجنس الآخر جذي بس يمكن ما يحبه ممكن يمكن يلعب يمكن تسلية بس اخوة وبس جذي لو كان يوم يومين بس هاليومين تزيد التعلق بالطرف الآخر وتخليه يكلمه ليلة نهار وصعب يستغنى عنه بس لانه تعود على وجوده حتى لو ما حبه تعود انه يلجأ له وقال له مثلا اشياء صعب يقولها لشخص يعرفه عدل ويشوفه وخصوصا زوجته مثلا والمشكلة لمن يتعلق بهالشخص الي يكلمه من النت او غيره بشكل كبير لدرجة انه يحس ما يقدر يستغنى عنه او يعيش بدونه وبجذي راح تتطور العلاقة الى ابعد من نت تلفون يشوفه تتعدد اللقاءات ممكن يحبه ممكن اشياء ثانية فمن رايي الحقي على زوجج ما اخوفج واقول انه يحب هالبنت يمكن جذي بس بس خلي عيونج مفتحة لكن لا تأذينه بطريقة اسئلتج وتضغطين عليه لانه ممكن يهرب اكثر ويتعلق فيها اكثر بحجة ان زوجته تضغط عليه صارحيه بهدوء واختاري الوقت المناسب قولي له مثلا واني انظف شفت فاتورة ورود ها حق منو ماخذها....انزين وشخبار دبي اوكي....انزين شسويت....شوي شوي دخلي له بالسالفة مالت البنية....ها البنت الي كنت تكلمها خلاص حذفتها كلشي راح....حتى لو انت تكلمها جذي بس ما بينكم شي انا زوجتك اغار بعد مهما كان اهي بنت...انت ترضى اني اكلم رجال حتى لو بس جذي علشان يساعدني بشغلة او اعتبره اخوي.....هالامور مو موجودة بالواقع الاخ بس الي من الام او الاب الي في بينا رابط دم بيني له انج تحبينه وما تقبلين ان احد يشاركج فيه وهالشي بالنهاية راح ياثر على علاقتكم وعلى الاولاد بعد ودام انه يحبهم اثري عليه باولاده قولي له تخيل لو يعرفون ان ابوهم يكلم غير امهم شنو راح يكون موقفهم..... مع تمنياتي لك بحياة سعيدة وان شاء الله يرجع لج زوجج وتكون الامور غير الي حسيتي فيها راح ندعي لج وطمنينا |
السلام عليكم ومسائكم ورد وأتمنالكم اجازه سعيده وعيدكم مبارك مقدما.
أشكر كل من تفاعل معاي ولا أخص حد بالذكر من جديد أحب أعطيكم نبذه صغيره عني أولا عمري 29 سنه شخصيه مسالمه هاديه حنونه أعشق الحياه الزوجيه واحب اعيالي وااااايد وحبهم نابع من حب أبوهم أقسم بالله ياجماعه ان من كثر الحب أحس ان رب العالمين يمتحني وهذا الامتحان صعب وايد ولازم أنجح فيه لأن حياتي ما تستحق الخساره وللمعلوميه صادفتني مشكله في أول سنتين والحمدلله اتغلبت عليها بالرغم من وجودها لليوم وهي وبدون توضيح من المحرمات أكيد بتعرفون بس أرجوكم لا تسألوني هذي المشكله أول ما اكتشفتها خلاص قررت الطلاق ولكن يوم زرت الدكتوره قالت لي أشياء خلتني أتمسك فيه أكثر لأن ومن أهم الأسبابانه مب مقصر معاي لا ماديا ولا معنويا ولا يضرب بل بالعكس حنون وايد ونصحتني اني أحتوي زوجي وأعوضه الحنان والحب اللي افتقدهم في الطفوله ولازم نؤمن جميعا ان للرجل حريه شخصيه والله ياجماعه اني ساكنه مع أهله وعمرهم ما سمعوا مني كلمه هب زينه وان اليوم اللي طلعت فيه ثاني يوم جاتني والدته وضمتني بشده وهي تبكي واتقولي شو فيج يابنتي طنشي وخليه يولي أنا أدري انه عصبي قلتلها ياعمتيه الله يهديج ما بيني وبينه الا كل خير والسالفه ان كانت عندي اشويت أشغال حبيت أخلصها مع أمي لاني من النوع اللي ماأطلع اسراري لأحد ويمكن هذا أحد الأسباب اللي خلتني أكتبلكم وللعلم اخوه الأكبر معانا في نفس البيت ولكنه غير موفق في الزواج مطلق ثلاث مرات ودايما يقول لزوجي احمد ربك انك وفقت في الاختيار المهم مرت السنوات وأنا أطبق ما تعلمته أو قرأته ,أنصح الجميع بقراءة كتاب ادم من المريخ وحواء من الزهره أعتفد جذيه اسمه لأني استفدت منه وايد لدرجة اني صرت الصديقه المقربه له ويشاركني في كل شي وياخذ برأي واذا كان مهموم فضفضلي وصدقوني انا من النوع المبتكر والمتجدد ومحافضه على عمري لأني فعلا أحبه ودايما أسعى ان يكون الجو هادي لأنه مايحب الازعاج أنا أعرف شخصية زوجي مب خوان لكن بنات الحرام في كل وادي والمصيبه الكبرى مب البنات للأسف ربعه في الدوام يشجعونه مثلا واحد يقوله أنا بعد الدوام مواعد وهو متزوج يرد زوجي وينتقد فيقول الطرف الاخر ياريال عادي أم العيال على العين والراس بس الواحد يغير؟؟؟؟؟أنا زوجي مايحب السهرات والغياب عن البيت ودايما يقول أنا مقصر معاكم لكن في اقرب وقت بطلعكم وخذ اجازه من العمل وسافرنا النمساصدقوني أحس انه زوجي شخصيه نادره بالرغم من عيوبه وأنا دايما في أي مشكله أفكر في اللي حولي قبل نفسي أولهم اعيالي ومن ثم والدته اللي تحبني وتحب لعيال ولا أريد أحرمهم من بعض على حساب راحة نفسي أرجوكم لا تترددون بكتابة نصايحكم لأنها بتساعدني وايد على الصمود لأني اريد أنتشل زوجي وأرجعه لي بقوه. والشي الثاني صار يضيق صدري وايد يوم أشوفه يالس على الكمبيوتر شو تنصحوني؟ |
اسفه على الاطاله بس نسيت أوضح شغله ألا وهي الفاتوره ماأقدر أفاتحه بالموضوع لأني ماأريد مشاكل وأنا في الفتره هذي أعامله معامله طيبه لأن الطيب مستحيل يعامل بالخبث ومثل ماتقول والدته دايما (لي من قالك لبيه لا تقوله والخيبه).
|
يبغالك تكوني حازمة معاه شوي بدون مشاكل صارحيه باللي بخاطرك ولازم يبعد عن الحرام
شعووووووووووووور صعب لما يتغير الزوج بسرعة وتتغير الحياة الزوجية اسأل الله أن يسخره لك ويبعده عن الحراااااام |
حسيتي اجل كيف لو تاكتي احمدي ربك علي هذه السعادة وحافظي علي زوجك وصارحية و حذريه من
عدم الوقوع في الخيانة وقولي له انك واثقة فيك بس اخاف عليك من الحرام او وحده تضحك عليك والله يوفقكي |
مرحبا من جديد من ضمن الأشياء اللي أحبكم تعرفونها ان البنت تعرف ان اللي تكلمه متزوج لأته من ضمن الأشياء اللي قريتها انها كاتبه حلو ان عندك مزرعه تطلع فيها انت والأهل للاستجمام بس أنا ماوضحت لزوجي كل اللي قريته هو قال لي ان مافي شي بينهم وقاللها انه متزوج أنا ماأدري ليش البنات يلعبون على المتزوج ويخلون العزابي مايدرون ان في هذا الشي خراب بيوت وتشتت عائله كامله هل اهي تشوف في هذا الشي سعاده؟
|
عزيزتي لا أملك الا الدعاء لك ....ربي يرد لك زوجك ويسخر قلبه لقلبك ...ويهديه ويرده الي الصواب
عزيزتي راي أن تحتويه أكثر ولا تفكري أن تبتعدي عنه أبدا حتي لايجد المجال للانفتاح علي الاخري أكثر ويزيد تقاربهم ....بينما أنت بعيده عنه ..... وفقك الله واسعد ايامك |
أنا أشوف إنك تصبرين , هذي زوبعة فنجان وتعدي إن شاء الله , بعض الرجال تجيهم حالة مثل كذا ويتعرفون على بنات .., بس إن شاء الله ماتطول هالفترة ويرجع لك مثل قبل وزيادة .. وهذا ماهو معناه تخلين الحبل على الغارب , أنتِ جددي في حياتك الزوجية قد ماتقدرين , اطلعي معاه طلعات لحالكم وخلي العيال عند أهلك , حسسيه كأنك عروس وهكذا , مع الدعاء له في جوف الليل وإن شاء الله يرده الله لك رداً جميلاً
|
خليكي ثابته على طريقتك الطيبه معه بالعكس زودي اهتمامك وحبك له لاتجعلي اي خطاء منك وهو اكيد حيراجع نفسه وحيخجل انه بيخون زوجته اللي متفانيه في اسعاده يعني لا تخليه يهرب منك لها ونصيحه لاتكثري النقاش في الموضوع معه عشان ما يزهق من كلامك
|
لا حول ولا قوة الا بالله، حبيبتي اناحاسه فيكي والله حبيبتي
يا رب يعينك ويهدي سرك ، انا بقول تقعدي معاه جلسه صراحه وبهدوء ومن غير انفعال وانتم بالسرير وفي الليل حاكيه شوي شوي واساليه اذا انت مقصره او مشغوله عنه وايش الاسباب وهل شكوك صحيحه؟ لانو ما بتقدري تضلي عايشه بنار والله حااااااااسه فيكي صعب كثير |
ربنا يعينك ويكون معك
طيب هو زوجك يطول لما يروح دبي لية ما تروحوا كلكم معاه اهم شي انتي تناقشيه بالموضوع وبحزم حتا يعرف انو هادا الموضوع يهدد استقراركم ولازم تعطيه حنان كتير كتير عشان يمكن الحرمان اللي عاش فيه هو السبب |
لا حول ولا قوة الا بالله، حبيبتي اناحاسه فيكي والله حاسة فيك
انا أشوف يا اختي الكريمة مهما سويتي له من حنان وتضحية واهتمام وحب ماراح تنطفي النار اللي بصدرك وبتشتعل اكثر اذا جلس على النت وبتظلين بحيرة وشك من رأي انك تواجهينه بصورة غير مباشرة يعني مثلا كل ماشوفك على النت اتذكر البنية اللي كنت تكلمها الحمد الله اللي ارتحت منها لاني ماأتخيل انك تكون كذا انت غير عن كل الرجاجيل يمكن ساعتها يحس بالذنب ناحيتك وأنصحك انك تكوني دائما قريبة منه ولاتتركين لها فرصة عليه واذا ماجاب هالاسلوب نتيجة خليك حازمة وصارمة قبل مايطير منك لها وشوفي اذا تقدرين ترجعين لإستشارات الدكتورة ناعمة مع تمنياتي لك بالتوفيق والسعادة الدائمة 000000000000 |
اللهم لا تكلها إلى نفسها طرفة عين و أصلح لها شائنها كلة
وأبعد عنهم الحرام, |
الله يكون في عونك ولا يحرمكم من بعض
|
السلام عليكم اسفه على التأخير وأشكر كل من رد لأن ردودكم أدخلت الاطمئنان في قلبي والعزيمه وأكتفي بهذا القدر لكن هذا الموضوع جعل عندي روح الكتابه وحابه أدخل بمواضيع وبعناوين مختلفه من خلال تجارب وقصص واقعيه مرت علي في الحياه(انتظروني).
|
قطعتي قلبي حبيبتي.. بهالزمن الازواج مالهم امان ..
الله يرجعه لج مثل الاول واحسن |
انا ارى ان الموضوع اعطيتيه اكبر من حجمه اذا كان كل هذا الحب بينكم فلا تفسديه بهذهي الحساسيه
زوجك اخطاء 100% لكن هل تستمر هذهي الشكوك اعطيه من الحب اكثر وسيلقي الغريبه خلف ضهره حاولي الجلوس معه امام الانتر نت بدون شك اسأليه فيه مواضيع جديده ماذا يتصفح وهكذا بدون ان تشعريه بالشك فيه يجب ان يعلم انك تعرفين قصة الورد لكن الان وبعد زمن انسيها اتمنى لكي حياة سعيده واحمدي ربك على هذا الزوج ومشاء الله عليكم على هذا الحب ووفقكم لكل خير لا يذهب الى دبي او اي مكان اخر تستطيعين الذهاب معه الا انت معه بدون الاحساس بالمراقبه |
الرجال مو مثل بعض......في رجال ممكن تكون فترة وتروح .....وفي رجال ممكن يعجبهم الحال ومايتركوه...
فلا تستهيني بالموضوع او تتركيه للزمن..........حاولي ان تسترجعي زوجك ...... الحل الافضل هو....................المصـــارحـــــــــــــــة وصدقيني لك دعوة في ظهر الغيب............. |
عاشقة دورياليت تكتبين ايش قالتلج الدكتورهفي المكالمه الي دارت بينكم
|
السلام عليكم بالنسبه لكلام الدكتوره فهو كثير لأن كان في جلستين ولكن باختصار ان المرأه لازم تركز على نفسها واذا عندها هوايه لازم تنميها وتقلل من تدليل الرجل وكل شي تحكيه لي تدعمه بقصه وان الحياه فيها الكثير لكي تعطي ولا تركزي على الرجل بالاضافه أنها تعلمك فنون الاغراء خصوصا أن زوجي لايحب القمصان الحديثه لأنها تشعره بالالتزام وتعلمك فنون اللمس والبسمه ولغة العيون واعذروني في التقصير في الاجابه وأي سؤال أنا حاضره.
|
| الساعة الآن 10:26 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©