|
جئت واحضرت لكم معى مشكلتي.. (أم وداد)
السلام عليكم ورحمة الله وبركاته ..
اليوم أول ايام عيد الأضحى .. والناس فرحانة .. وانا كنت فرحانه .. بس الحين انا اتعس مايكون .. ابي اتكلم ابي اطلع الي فخاطري.. بس مالي غيركم .. محد متابع مشكلتي ويعرفها .. ويعرف الي فيني اكثر منكم ... الحمدلله علاقتي بزوجي من احسن مايكون ... ويصرف علينا.. ويسال عنا .. وكل شي تمام .. واتصل في اخوي وكلمه.. واخوي الحمدلله كان متفهم .. بس على اساس ينتلاقون ويتفاهمون اكثر.. بس الظروف ماساعدت .. الحين انا جبانة .. وماعرف اتصرف.. المهم .. باول يوم عيد .. انا احرص اروح بيت اهل زوجي.. ولما اقول اهله اقصد .. بيت جده وهناك اخو جده .. وعمامه وزوجاتهم .. موجودين .. المهم .. جده .. توه متزوج من جديد .. ماشاء الله هو كبير بالسن .. لكن بصحته .. توفت زوجته من 9 اشهر.. وسميت بنتي عليها .. وتزوج من جديد .. بالنسبة لي هذي حرمة غريبة انا ماعرفها .. !! وفي بعد حريم من اهلنا بعاد جايات من السعودية .. !! كنت فرحانه .. وبنتي كاشخة .. وديتها عند بنت عم ابو زوجي.. وقلتلها خلي احد ينادي زوجي ابيه يشوف بنته ويشوفني من غير ما امي تدري لانها تكرهه وتبيني اتطلق منه اليوم قبل باكر.. شفته وشاف بنته .. وقال لي توني بس حسيت بالعيد كان سعيد ... وانا نفس الشي...!! بعدين رحت اتغدا بنت عم زوجي خذت ودودة وودتها عند الرجال.. عشان يشوفونها .. وهنا صارت المصيبة .. امي فقدت بنتي.. !! وقالت وينها .. وصارت مثل المجنونه .. اتدور عليها .. وانفضحنا قدام الحريم .. وقالت هو سوى كذا وكذا وكذا .. وقال روحو للمحاكم (كلمة قالها وهو معصب) وبعد .. امي طرشت له مسج .. فيه كلام بايخ .. ورد عليها بمسج ابيخ منه .. والحين هو ندمان كثير.. المهم عددت البلاوي الي سواها زوجي.. وهي معصبة وتشره على بنت عم ابو زوجي.. اتنكدت الحريم يطالعوني .. ويتكلمون .. ويطالعونها بعد !! راحت امي ركبت السيارة ... ووالله والله من الفشلة بغيت اروح اركض وراها من غير شيلتي وعباتي.. هلكت ... وشوي ويغمى علي... المهم امي راحت قلتلها بجيب اغراضي .. وتلاقيني وراك .. بهالوقت قالتلي بنت عم زوجي.. انا سويت الي لازم يصير الاب فرحان في بنته ولو اتشوفينه يطالع الرجال مستانسين على بنته .. ويشوف بنته وعيونه تدمع .. زوجي غلط كثير كثير في السابق .. بس الحين يعترف انه غلط .. وندمان حيل.. ومستعد يسوي اي شي عشاني... امي كارهه زوجي كره العمى .. ومرة قالتلي والله ماترجعين له الا على قبري.. ولا وانا متبريه منج ..! ! ماتتصورون اشكثر كارهته .. عصبت عليها وصرخت ماقدرت امسك نفسي .. مو عشان شي بس عشان الفضيحة الي صارت .. ناس غرب!! ماعرفهم... والله اني غلطت يمكن اكثر من زوجي.. بس اغلاطي بخليها لنفسي لاني مافتخر فيها ..وما راح تتكرر.. شو اسوي ؟! كيف اتعامل معها .. للعلم امي بتسافر مع اختي ان شاء الله الشهر الجاي عشان خالتي بتسوي عمليه .. فكرت اني اجهز شقتنا مع زوجي.. ولما امي ترجع اقول لها كل شي.. يا تقبل ولا ترفض.. بس انا بكل الاحوال برجع له .. ويمكن اذا جهزت قبل اروح .. قبل ماهي اتسافر عشان بعدها اتروح لاهلها اتغير جو ... شو رايكم ؟؟ بكل الي حصل.. وبقراري؟؟ اسمحولي على الاطاله وادري غثيتكم .. باول يوم عيد بس والله ماعرف شو اسوي ولا كيف اتصرف.. انقذوني!! الاشراف / عفوا تم تعديل العنوان ليكون بالفصحى |
الله بعين اختي عيد نكد هذا صار
لاحول ولا قوه الله يفرحنا بالعيد يارب ونحس بطعمه |
ايه والله انكد منه مافيه .. طلعت زعلانه
|
دامك متوافقه انتي وزوجك المفروض امك خلاص ما تتدخل
اللي سوته غلط صراحه حتى لو هو شين ما المفروض تشرشح فيه ابدااا ..لانه ممكن في يوم من الايام تجتمعون سوا مره ثانيه كزوج وزوجه (واضح من توقيعك انك لسا باقيه عليه ومن كلامك هو انبسط انكم اجتمعتم) وايش يعني طبيعة اخطائه اللي تخلي امك ممكن تتبرا منك لو ترجعين له؟ ابي اسأل انتي وين ساكنه الان وليش انتي في جهه وزوجك في جهه ؟ والى متى هالحال؟ |
انا الحين في بيت اهلي.. 26 هالشهر اكمل سنة ...
صارت مشاكل كثيرة .. بيني وبين زوجي.. انا كنت جاهله عن بعض الامور .. وهو بعد .. بس طبعا انا عند اهلي ملاك .. ووالله يمكن كبرنا عشرين سنة .. بسبب المشاكل.. |
ارجوكم طلعولي حلول .. ساعدوني.. !!
|
هلا بأختي الفاضلة الصابرة أم وداد كيف حالك وماهي أخبارك وعيدك مبارك ،،الى الآن لم تنحل المشكلة مع زوجك ، والله مشكلة مادام أنك تحبينه ويحبك فما المانع من عودة المياه الى مجاريها ،،أما أعتراض والدتك عليه إن كان أعتراضها وجيها وقويا فأطيعي والدتك وربي يعوضك خير منه ،،أما إذا كان أعتراضها عليه لحاجة في نفس يعقوب فحاولي بعض العقلاء لكي يحلوا سوء التفاهم بين أمك وزوجك السابق لأنه والله حرام تعيش وداد كاليتيمة أما بعيدة وأبا بعيد ، وزوجك الى الآن ماتزوج وهذا دليل أنه يريدك ترجعين له وعليك بالدعاء وكثر الأستغفار وإليك هذا الدعاء العظيم فمن دعا به فرجت همومه بحول الله (اللهم أنت ثقتي في كل كرب ورجائي في كل شدة وأنت لي في كل أمر ثقة وعدة فكم من هم يضعف فيه الفؤاد وتثقل فيه الحيلة ويخذل فيه الصديق ويشمت فيه العدو فأنزلته بك وشكوته اليك رغبة فيه إليك عمن سواك ففرجته وكشفته وكفيتنييه فأنت ولي كل نعمة وصاحب كل حسنة ومنتهى كل غاية يارب العالمين) هذا الدعاء سجلته بشريط للشيخ عمر عبد الكافي من قناة الشارقة وهو يقول أن هذا الدعاء مما يؤثر عن الحسين بن على رضي الله عنهما0
|
مشكور اخي الكريم .. والله ماراح انسى وقفتك معاي..
زوجي يحبني كثير... وانا بعد ... كثير... وهو غلط صحيح !! لكن تغير 180 درجة .. امي ماتصدق.. او ماتبي تصدق ... لانها كارهة امه .. ومرة قالت ماترجعين الا على قبري ولا اتبرى منك .. وقالت بعد .. اذا قاطع امه قطع نهائي!! صارت رجعتي له برضاها مستحيلة |
من الحلول الممكنة توسط أهل الخير بين أمك وزوجك ،،هناك دكتور متخصص في المشاكل الأسرية رأيته هذا اليوم صباحا في قناة الشارقة وهو سعودي أسمه( المحرج ) وهو دكتور ومستشار في القضايا الأسرية ويحل المشاكل ويتوسط بين الزوجين وبين الأسر وله موقع في النت ، وبأمكانك الأتصال على قناة الشارقة وسوف يعطونك رقمه ومن ثم تتركينه يتوسط بين أمك وزوجك وهو يعمل هذا الأمر محتسبا للأجر 0
|
مشكور اخوي الكسائي.. يعني ان شاء الله هالدكتور بيقدر يساعدني؟
ان شاء الله يارب .. بتصل في قناة الشارقة .. بالوقت المناسب وبكلمهم ... وباخذ رقم الدكتور... وبشرح له وضعي.. ويارب تتصلح كل اموري |
السلام عليكم ورحمة الله وبركاته ..
اختي ام وداد والله انك بقلبي وما أنساك ودوم اقول الله يفرج همك يارب .. الله يهدييها امك مب المفروض انها تسوي كذا .. يعني المفروض انها تستر على زوج بنتها يعني هي ماتدري يمكن في المستقبل تردون لبعض وهي بتنسى اللي صار لكن الناس ماراح تنسى وهاذي بنته ومن حقه انه يشوفها .. رايي من راي اخوي الكسائي .. اتصلي في الدكتور وان شاء الله يصلح الامور بين امك وزوجك .. واذا امك مب راضيه تقتنع .. لما تسافر توكلي على الله وروحي لزوجك يعني انتي تحبينه وهو يحبك يا اختي حرام كذا تسوون في بعض والحمدلله اللي هو صابر هالسنه وماراح تزوج غيرك .. لانه لو كان غيره ماظن صبر وهذا يدل على حبه لك .. يعني حتى في العيد محروم من اغلى الناس عنده.. !! حرام والله .. اتصلي فيه واستسمحي من اللي صار من امك وقولي له خلاص انا ماقدر اعبش من دونك .. واتصلي في اي شيخ دين واساليه لو عصيتي امك في هالموضوع هل عليك ذنب .. لو ماعليك ذنب توكلي على الله لكن لاتقطعين امك وحاولي توصلينها لو قطعنك و ان شاء الله مصيرها بتلين ويترضى عنك .. ولاتيأسين من رحمة الله .. بس أرد واؤيد كلام اخوي الكسائي اان شاء الله الدكتور بفضل الله بيقدر يصلح بين امك وزوجك .. وصج لا جيتوا بتروحون للدكتور لا تقولين لامك انكم رايحين له يمكن ماترضى . الله ييسر لك الحير يارب العالمين ... |
اختي الغالية ام فطومة .. والله مانسالك هالوقفة ..
الحمدلله رب العالمين .. زوجي بحزتها كان بالغرفه ماسمع .. مسكرين عليه الباب.. لكن امي هزأت الي ودت ودود عند ابوها .. وفشلتني انا قدام الناس.. !!!!!!!! هو ماسمع .. لاني كلمته وماطرالي شي.. أحبه كثير.. وهو بعد والله .. ومو مستعدة اخسره من بعد ماغير اشياء كثيرة فيه عشاني.. وانا بعد اتغيرت عشاننا .. احلى لحظة في العيد كانت الدقايق الي جمعتني فيه .. والله بدون مبالغه .. والحين احس دموعي بعيني ماحس حد عاش هالوضع هذا ..!! |
اذا انتي واااثقة من حبه لكي ياغاليه
وإنه ماراح يرميكي عند أهلك مرة ثانيه عشان أتفه سبب إذا انتي وااثقه من هذا كللله ثقة تاامه .. توكلي على الله وارجعي له .. بعد ما تحااااولي تقنعي أمك بتغيره بس مو انتي اللي تقنعيها خلي أخوك يقتنع بصلاح زوجك وخليه هو يتولى أمك لأنها مئه بالمئه تثق برأيه أكثر منك هي شايفتك صغيييره وماخذ عقلك حبه لكن نظرتها لكلام أخوك تختلف تمااااما .. الله يهدي سركم يااارب وابدئي من الآن بالتقريب بين أخوك وزوجك لأن باتفاقهم راح تتسهل عقبااات كثييرة بإذن الله .. تقبلي تحيااتي .. |
الغاليه
جربتوا حد من المشايخ يكامونها؟ ترى ممكن يكلمونها من جانب الحلال والحلاام وتتأثر |
مشكورين ماتقصرون ..
حنونه.. اخوي ان شاء الله بيتفاهم مع زوجي .. وبعدين مع امي.. وللعلم يالغلا هو مارماني.. انا الي رحت لعند اهلي.. بس الظروف الي مرينا فيها كبرتنا.. عذوب.. مرة مطوع كلمها يوم كانت هي عنده عشان يقرا عليها .. بس ماتاثرت ابدا .. واتصل بكذا شيخ ... وشرحت الوضع ..بالتفصيل كلنا غلطانين لكن طاعة الزوج اهم !! |
ادعولي..
|
أتمنى من الي يعرف مشكلتي يساعدني.. لاني بحاجة لكم بعد الله ..وبحاجة لدعواتكم ..
|
الاخت ام وداد تقبل الله منا ومنكم
وكل عام وانتم بخير وان شاء الله العيد القادم مع زوجك وبنتك فى بيتكم يا رب العالمين اولا لى عتاب عليك لصراخك على أمك يا اختى لا تنسى قول الله عز وجل "ولا تقل لهم آف ولا تنهرهما" ولكن اعتقد هذا بسبب ما انت فيه ولكن لا تخرجى عن الحدود مع أمك ، ربينا يبارك لك فيها ويرزقها طول العمر وحسن العمل ولكن حظارى ولا تنسى توصية الحبيب المصطفى صلى الله عليه وبسلم "أمك ثم أمك ثم أمك" لقد اوصلى صلى الله عليه وسلم ثلاث مرات بالأم يا اختى ربما الشوق والحب جعلك تنسى ما حدث من زوجك نعم عفى الله عما سلف ولكن الام لا تنسى وتخاف من تكرار ما حدث لذلك يجب ان لا ترجعى الى زوجك الا بعلم وطاعة أمك ولا تنسى وقفتها معك ومع زوجك وكم من مرة اعطته فرصة وهو كان ينسى ويبعد وهذا ما افقدها الثقة فيه وكما قال الاخوة وسطى احد المشايخ الثقات وتقى فى قدر الله وقدرة سبحانه والله اعلم شعورك ومدى حاجتك الى زوجك ومدى شوق زوجك لك ، ولكن عليه الا ينسى انه هو السبب فيما حدث ، وعليه ان يدفع الثمن ، ويصبر حتى ترضى امك عنه ويسعى الى اعادة ثقة امك فيه . وسبحان الله يا جماعة هى ام وتخاف على ابنتها وتخشى انه بعد الرجوع اليك وزوال اللهفة والشوق ان يغضبك او يعاملك معاملة غير طيبة وعليك ان توضحى لها مدى تغيرة وان تعطى له فرصة واحد واخيرة لكى تتأكد من مدى تغيرة الى الاحسن بأذن الله تعالى ليس من أجله ولكن من اجل بنته بارك الله فيها ومن اجلك ومن اجل اسعادك ولى بعض النصائح لو فعلتيها لن تصدقى النتيجة وسرعتها ان شاء الله اولا ان تدعوا الله قبل صلاة الفجر ان يالف بين قلب زوج وأمك ثم كثرة الاستغفار ثم كثرة قول سبحان الله والحمد لله ولا اله الا الله والله أكبر ولا حول ولا قوة الا بالله واخيرا كثرة الصلاة على سيدنا محمد صلى الله عليه وسلم وان شاء الله المرة القادمة تخبرينا بأجمل خبر وهو جمع الشمل ونسأل الله ان يهدى زوجك لك ويهديكى له ويبعد عنكم المشاكل وارجو منك يا اختى بعد ذلك عدم اخراج مشاكلك خارج بيتك واجعليها ما بينك وبين زوجك وفقك الله لما يحب ويرضى |
اسمحي لي بقولك شئ وماتزعلي
بدك الرجال ولا ما بدك إياه لانو هيك ما عاد يمشي الحال متزوج وعزوبي من سنة كوني شوية حازمة وبلا سلبية هلا صرت مسؤولة ليش عم تخلي النا س يدخلوا بامورك امك ع عيني وراسي بس انها تبهدلو و تشرشحو هذه منها بأي شريعة ولا إتيكيت ولا أخلاق خلي الرجال يشوف حياته اذا بدك تراعي مشاعر الجار وسابع جار قبل زوجك وماتزعلي مني والله من قهري ع ودادـ وكل سنة وانت طيبة |
إذا أخوك بيتأكد من صلاحه فعلا و راح يكون راضي على رجوعكم
فأمك أمرها سهل الأيام ترضيها ولا تنسين طاعة زوجك مقدمه على كل شيء إلا فيما يغضب الله فتوكلي على الله و جهزي أمورك وروحي بيتك وخلي أمك أمام الأمر الواقع الله ييسر أمرك يا أم وداد و يجمع شملكم |
انزين حاولتون تجتمعون او تقعدون مع بعض (قعدة صلح) ؟
انتي وزوجج وامج واخوج , كل واحد يطلع إلي بقلبه , وكل واحد يعتذر وإن شاء الله تتصافى القلوب. مع إن امج اكيد غلطانة 100% لأنها ما تبيج تردين لزوجج سبحان الله بعض الأمهات من حبهم لبناتهم يسوون لهم مشاكل وهم ما دارين بس بعد تظل امج وطولي بالج عليها .. وصدقيني هالسوالف ما تنحل الا بالتفاهم والنقاش , مستحيل تنحل بالهواش والغصب , |
تمسكي بزوجك نصيحه لوجه الله
وبالنسبه لوالدتك ان شاء الله راح تتغير اذا رائت انك سعيده مع زوجك المسئله تتطلب وقت حتى تستعيد امك الثقه في زوجك من جديد الله يصلح مابينكم الاشراف/ عفوا ان شاء الله تكتب على هذا النحو |
وجهة نظر ولك الخيار
امك مالها دخل في حياتكم اغلب المشاكل من ام الزوجه زوجك اهم من امك وجهة نظر مع تحيات متزوج معذبته عمتة |
أختي الله يكون بعونكم 26 شهر بعاد عن بعض والله كثير
انا برأيي ترجعيلو ولما امك تسافر بتحطوها تحت الأمر الواقع حرام هذا اللي بيصير فيكي وفيه .. وبتوقع انو انتي تعلمتي درس منيح وهو كمان .. هدول 26 شهر مش مسخرة ... انا شهرين قعدتهم عند اهلي وتربيت انا و هو منهم |
اختي الكريمة
نصيحة لا تستعجلي انتي صح صابرة لمدة سنة لكن لا تفسدي علاقتك بأمك وانتي تستطيعي تصلحي الامور بما انك قلتي ان اخوكي ماشي في الموضوع ويتكلم مع زوجك خليه يتفاهم معه ع التفاصيل واذا تفاهمو خلي اخوكي يقنع الوالدة وانتي بطريقتك ايضا تضغطو عليها ادري عن شوقك ورغبتك لزوجك ومقدرة والله هالشي لكن أيضا لا تقطعي حبل مودتم بأمك خصوصا انك قلتي ان اخوكي بيسعى في هالشي آراء الاخوة كلها جيدة وتصب في مصلحتك وهناك راي جيد وهو الذهاب لقسم الاستشارات العائلية في مدينتكم سواء كان تابع للمحاكم او غيرها والله يجعل ايامكم كلها سعادة وهنا |
مشكورين اخواني وخواتي.. على ردودكم ..
اخوي بومريم .. كلامك صحيح مليون بالمية .. ادري لازم مازعل الوالدة ..لكني تعبت .. وفجاة صرت احس ان الدرب مسدود ... احس ان زوجي صار حلم .. هو مشتاق لي حيل وانا نفس الشي.. ابديت احس ان مابي زوجي وامي يجتمعون .. مابي هالشي.. عشان مابي اي مشكله ثانية اتصير ابد!! |
الاخت ام وداد
لا حول ولا قوة الا بالله والله مش عارف اقول لك ايه ولكن سبحان الله قدرة الله عز وجل عظيمة والله ان شاء الله هتنحل المشكلة وربينا ان شاء الله هيجمع بينكم ولكن ده اختبار لك وله حتى يعلم كل طرف قيمة الآخر ويحافظ عليه ويعمل كل منكم قدر المستطاع على اسعاد الآخر وعلى ان تتعلمى عدم خروج مشاكلكم خارج بيتكم وتعرفى كيف تحل هذه المشاكل ما بينك وبين زوجك فقط وتأكدى ان اهم شىء عند امك هو اسعادك وعندما تتأكدى ان سعادتك هى مع زوجك فقط فلن تمانع ابدا بأذن الله ولكن عليك ان تقنعى زوجك ان يصبر على امك ويغير طريقة التعامل معها وكما قال المثل "من آجل الورد" ومن آجلك وآجل ابنته يفعل اى شىء ولكى تعودى اليه يجب ان يكسب أمك وانتى اثى وتعرفى ان الانثى سهل ان يكسبها زوجها او زوج ابنتها فقط مع الكلام طيب او هدية جميله يا سيتى يعتبرها امه واهم شىء يا اختى هو التالى واذا لم تفعليه فلا تلومى الا نفسك * كثرة الاستغفار * كثرة الصلاة على سيدنا محمد صلى الله عليه وسلم * كثرة قول سبحان الله والحمد لله ولا اله الا الله والله اكبر ولا حول ولا قوة الا بالله * ثم التضرع الى الله عز وجل فى الثلث الآخير من الليل ان يجمع الله عز وجل الشمل وان يآلف ما بين قلب أمك وقلب زوجك انظرى بقى يا اختى ان لم تفعلى هذه الاشياء فلا تلومى الا نفسك وطبعا لن تنتهى المشكلة بمجرد الدعاء يوم واحد ولكن كذا يوم بعون الله وطبعا الذكر ليس مرة باليوم ولكن على الاقل مائة مرة بعد كل صلاة يعنى يا ام وداد فى اسهل من كدة علشان ربينا يجمع شملك مع ابو وداد ومع الحلوة الجميله وداد . ان شاء الله خير وفى رعاية الله |
اقتباس:
عين العقل ارجعي لبيتك وادحري الشيطان.. وأمك بالأخير بترضى بالواقع وإذا رجعتي لزوجك حاولي أنه يكسبها لصفه.. واضح أنه شخصية امك قوية والدليل جلوسك عندها سنة كاملة!!! |
لاحول ولاقوة قوة إلا بالله
الله يهدي أمج ويسخر قلبها ويلينه عليكم يااااااارب ويجمعج بزوجج قادر كريم سبحااااااانه |
ابو مريم .. والله انا حاولت قد ماقدر اني ماطلع المشاكل برا .. لكن ام زوجي وامي... كل وحدة اتسولف للثانية .. وانا كنت عايشة عندهم ..
كل الغلا .. ردودك كانت تعجبني.. وكنت احتاج الجرأة عشان اتخذ الخطوة لكن الحين خلاص.. الصبر مل مني.. ابنة ادم .. مشكورة جزاك الله خير.. وامين .. مشكورين كلك وماقصرتو .. |
اللهم ياحال كل عقدة
وياميسر كل معسر ويا فرج الهم والغم ياكاشف الكربات أكتب لأختي أم وداد فرج قريبا منيرا ترضي به والدتها وتعيش مع زوجها تحت سقفا واحد آآآمين وصلى الله وسلم على محمد |
الله يفرج همك حبيبتي ويسر أمرك واستغلي فرصة سفر والدتك وارجعي لزوجك وادحري كيد الشيطان ..
وأمك مصيرها بإذن الله ترضى وتنسى بس خلي زوجك يحسن معاملتها ويكثر من الهدايا بعد ماترجعون لبعض.. ولا يجي في بالك انها راح تنسى في يوم أو يومين اصبري وادعي ربك ان يزيل الغل اللي في قلب أمك على زوجك وأن يؤلف بين قلوبهم .. الله يجمعكم ببعض يارب في القريب العاجل ..وتبشرينا بإذن الله عن قريب .. |
أختي أم وداد
والله أنا متابعة قصتك من الأول وكثير تجين على بالي ولما أشوف توقيعك أعرف إنك لسى مارجعتي اكثري من الدعاء والإستغفار وزي ماذكر لك الأخ الشيخ المحرج ماشاء الله عليه كلامه يدخل القلب ودامك من أهل الإمارات عندكم الأستاذة ناعمة الهاشمي الله لايضرها الناس تسافر لها سفر يمكن ربي يكتب الحل على إيدها والله يفرج همك يالغالية ويقر عينك بأبووداد |
اشكركم من كل قلبي..
ان شاء الله بحاول اتصل في ناعمة الهاشمي عشان اتفاهم معاها ... والله ييسر كل اموري |
يا اختى ارجعى لزوجك وامك مصيرها بترضى لمى تجدك متهنيه ببيت زوجك
|
ربي يكتب لي الي فيه الخير يالغالية مشكورة حبيبتي
|
طمنينا على وضعك أختي الغالية
|
أختي أم وداد : أنا أعرف وحده صديقتي كانت أمها تكره زوجها وحدثت بينهم مشاكل كثيرة وصعبة ...ولكن بسبب دهاء الابنه وفطنتها أستطاعت أن تجعل الام تلين وتحب زوجها ...أقصد زوج أبنتها .....قولي ...لي شلون ...
دائما تسولف قدام امها عن أخلاق زوجها وطيبته وكرمه ....وأشترت هدية قيمة وقدمتها الي أمها وقالت لها أنها من زوجها ....وكل مرة تخترع قصة جديدة تحبب فيها امها الي زوجها .... ومن ناحية أخري الزوج قدم بعض التنازلات كأن يدخل ويقبل رأس والدة الزوجة وغيرها من الامور ....حتي تسير السفينة ...ويعيشوا في هناء وأنتي عزيزتي فكري ماهي الامور التي تحبها والدتك وأذكريها امامها عن زوجك والتغيير الذي حدث وغيره وانشاء الله ربي يجمعكم مع بعض ....ويلم شملكم |
الالمعيه .. انا عقب الكلام الي قلته لامي في السيارة واحنا راجعين يوم العيد فهمت اني احب زوجي وبرجع له لكني والله ماتذكر شاللي قلته بالضبط لاني كنت معصبه على الاخر .. فكم مرة دخلت الغرفة وشفتها اتكلم اختي ولما سالت اختي.. قالت ماعليه لو تبي ترجعله .. خليها ترجع له بس بشروط .. انا عارفه الشروط .. مثل السكن وغيره وهذا كله سهل.. لان زوجي اصلا سوى هذا كله .. اعتقد اخر واصعب شرط بان زوجي .. يقطع علاقته بامه نهائي... وطبعا هالشي ماراح يصير لانها اولا واخيرا امه .. بس بنسايس امي بالموضوع ..
يعني ان شاء الله قلبها لان علي.. اختي الهنوف.. زوجي طيب ومستعد يسوي لها اي شي.. لكن والله المشكله مو فيه ..واقدر انا اقعد امدحه بس في ناس من اهل زوجي... يوصلون كلام مو زين لامي.. مو زين ابدا .. واتحط الحره فيني انا وهو .. زوجي فيه عيوب.. لكن عيوبه انا احبها .. وبسيطة ماتسوى هذا كله .. وفوق هذا كله بعد عمري عمره 22 سنة .. الي يسمع اهله واهلي يقول عمره 42 .. وماسوى لي شي.. انا احاول امدحه كنت والله .. واحلي بعينهم .. وامي كانت اتحبه كثير.. لكن حسبي الله عليهم الي يحبون يشوفون الغير مو متهنين .. ادعولي يالغالين |
| الساعة الآن 03:22 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©