|
ساعدوني.. أتطلق عشانها يعني؟!
السلام عليكم ورحمة الله وبركاته
جيت مرة ثانية للهم .. بس مالي غيركم بعد الله .. امس .. زوجي الحبيب واخوي اتلاقو.. ودارت نقاشات بينهم .. والحمدلله تفاهموا.. كنت انا برا البيت بس بعدين .. اخوي رجع البيت.. وكلم امي .. ومادري شو الي قالها .. قال كلام كثير ماعرف تفاصيله .. وقال لها .. شرط زوجي الوحيد الي هو .. لا امي ولا امه يدخلون بيتنا(انا وزوجي) عشان ماتزيد المشاكل.. والصراحة انا حبيت هالشرط لان امي بعد لها تاثير وتحب تتدخل.. بعدها رجعت البيت .. سلمت على امي.. ردت السلام وهي امبوزة.. المهم .. وبعديت صارت تتكلم .. على اي اساس انا مثل امه ومادخل بيتكم احنا الي زعلانين وهو يتشرط .. واتقول قوليله بعدين في المحاكم انا ماسويت نفس امه .. وتبيني اقوله امك وامك وامك ... يعني ردينا لنقطة الصفر.. انا ماكنت ارد .. رحت بعدين للحمام عشان انوم بنتي... طرشت اختي الصغيرة اتقول لي: ان امي يمكن اتموت وماتوصل لحد بكره .. امي طرشت اختي اتقول لي هالكلام!!!!!!!!!!!!!!!!!!!!!!!!!!!!!!!! حقيقة ترا هالكلام مو كذب.. تبيني اتنازل واقول خلاص سوي الي تبينه في حياتي.. وقالت بعد بكره لا تنادوني انا بقعد في غرفتي لا تطلعون منها .. اليوم ماشفت امي ولا كلمتها لكن خليت اختي تتصل عليها وقالت خلوني بمكاني مابي اشوف احد .. حابسة نفسها بغرفتها .. وبعدين .. شاورت زوجي وسمحلي اطلع .. عشان اخلص كم شغله .. مع اختي كان هو في الحلاق يوم خلص قال بجي عندكم في المكان الي انتو فيه عشان اشوفك انتي ووداد .. قلتله اوكي.. وصلنا المكان وهناك امي ارسلت مسجات ارجعو ومادري كيف .. رايحين اتشوفون بو وداد ياللي ماعندكم اخلاق .. ومن هالكلام الي يخوف. اتصلت فيها اختي .. لكن سكرت بوجهها (تبي تتفاهم بس بالمسجات) كلام مخيف!!!!!!!!!! وسوالف غريبة .. شو اسوي ... ؟!؟؟!! |
حبيبتى نصيحة ارجعى لزوجك و الله ما ينفعك أحد إلا هو و حق الزوج أعظم من حق والديك وهو الأحق بالطاعة منهم لذلك عودى له و صدقينى بكرة لما تشوفك مرتاحة ومتهنية بيطيب خاطرها المهم فى المستقبل ابقى فى بيتك مع زوجك وابنتك و لا تكثري زيارات لهم خليك بس رسمية
|
صحيح كلامك اختي نرجس... الزوج اهم .. بس ماتوقعت من امي تصرفات مثل هذي...
والحين اخاف صدق يصيبها شي.. شو اسوي؟ رددت على مسامعي امس اكثر من مرة .. انها انهانت وعمرها مانهانت هالكثر في حياتها .. |
يا أختي الكريمة ام وداد
إذا انتي تبين زوجك وزوجك يبيك روحي له بدون تردد حتى لو امك زعلانه كلها كم يوم ويروح الزعل وتهدا وترضى وهي تعرف في قرارة نفسها انك تحبينها لكن ما ودك تهدمين حياتك عشان مشاكل تافهة خلك عند زوجك وارسلي لأمك رسايل انك تحبينها وانها تاج راسك بعد وقولي لها رضاك يالغالية وحاولي ترضينها بعدين بس لا تضعفين وتخلينها تزيد النار حطب اغلب الامهات زي كذا بس بعدين ما حد راح ياكلها الا الزوجة والعيال خلك عند زوجك والله يهدي امك ويحنن قلبها عليك |
غاليتي دلعته وطلقني..
سبحان الله انتي اتردين على موضوعي.. وانا اقرا موضوعك .. قصة طلاقي المؤلمة .. يالغالية عسى الله يحنن قلب والدتي.. ويرجعني لزوجي .. واصير له نفس ماكنت لطليقك ماشاء الله عليك والله يعوضك يالغالية بالزوج الي يحبك .. ويحطك تاج على راسه .. |
الأخت الفاضلة ..
ليس من حق الأم شرعاً ان تتدخل في حياة ابنتها الزوجية على هذا النحو .. كل ما عليك هو الالتزام بالعهد الذي بينك وبين زوجك, وبالعكس قد يكون هذا الكلام أكثر قبولا لو صدر من أم الزوج, ولكن مع ذلك عليك بالإحسان إلى والدتك وزيارتها والتودد لها, وعدم الخوض في أي نقاش معها حول حياتك الزوجية, وكل ما تعرضت للأمر قولي لها كلاما يطيب خاطرها دون خوض في التفاصيل, من مثل: الله يعين, أنتِ الغالية ... وهناك أمر مهم, من المفيد برأيي ان تهدي لوالدتك هدية وحبذا لو تكون مشتركة منك ومن زوجك بحيث تستأذنيه في جلب هدية لها باسمكما معا .. وفقك الله ... |
الله يسلمك يا ام وداد ويحنن قلب زوجك عليك وقلب امك بعد بس امك تتدلع وتحاول تستعطفك بس روحي لزوجك واطلبي رضاء امك بعدين لو هدت الأمور الله يوفقك وييسر امرك ويريح بالك ياااااااااارب |
خلي زوجك يكلمها أو يرسل لها رسائل تطيب خاطرها...
|
اخي الكريم ... الوليد ..
صحيح كلامك طاعة الزوج اهم من طاعة الوالدة .. ناويه ارجع لزوجي.. وان شاء الله مايصيب امي شي.. وبخلي زوجي يبوس راسها ويعتذر لها .. دلعته وطلقني مشكورة يالغالية .. |
كل الغلا.. صدق انك غالية .. هذا الي بطلبه من زوجي.. وان شاءالله يحن قلبها .. ولو اني ماتوقع انها بترضى بسهولة
|
الله يهديها امك
خديها مني ارجعي لزوجك وبيتك هما الدايمين الك ومع الايام امك بترضى لانو انت ماخاصمتيها ولا عملتي شي ارجعي لبيتك واقفلي الصفحة هاي وبعدين راضي امك يعني اقعدي معها جلسة تصالح واحكيلها يا ماما ببسطك اضل معلقة مبهدلة هيك وحاولي تستعطفيها بترضى إن شاء الله اما زوجك انت روحيلو واستقري في حياتك معاه واهدووو بعدين صاحلحيه مع امك |
الصراحة انا فكرت اني انتظرها اتسافر عشان ارجع لزوجي والحين قالت انا مابسافر ابد واخلي الجو يفضالك كنت اتمنى تروح واتفرغ لزوجي وشقتي...
|
توكلي على الله وعودي لزوجك جنتك ونارك ولاطاعة لوالدتك في هذا الامر ولايمنع من ان تتلطفي معها وتهدي لها باننتظار موضوع تبشرينا بعودتك الى مملكتك الله ييسر امرك |
اقتباس:
غاليتي أم وداد بصراحة أستغرب من أمك شكلها ماخذة الأمر بعناد وماتبيك ترجعين عشان كرامتها صح هي أمك وحقها على عينك وراسك بس قولي لو ماتبيني أرجع ليش زوجتيني بالأول أنتم زوجتوني ومراح احمل لقب مطلقة بروحي وأرجعي لبيتك وحاولي تراضيها قد ماتقدرين والله يهديها أمك |
اختي ام وداد ليس للمرآة غير بيت زوجها وانت لو حاولتي استرضاء امك بعد ان تتفقي مع زوجك على ان يطيب خاطرها
وبعد ذلك داري على امور بيتك وزوجك ولا يدخل فيها الاهل فمشاكل الازواج تروح وما للاهل يبقى |
حاولي قد ما تقدري توفقي بين رضا زوجك ورضا امك
|
الله يوفقك يالغاليه يام وداد ويسر امرك ويفرج همك ويحط المحبه والمودة بينك وبين بو وداد
ويهدي امك ويصلح حالها توكلي على الله وارجعي لزوجك وبعدين الوالدة باذن الله تهدى من نفسهاااااااااا وترضى من نفسها وتفرح لكم بعد وش رايك |
لن تشفع لك أمك أمام الله عزوجل اذا سألك عن حق زوجك
|
اختي ام وداد
ارى من الاجدى ان تجلسي مع امك وان تتحدثي معها وان تحاولي معها بشتى الطرق لاقناعها اكيد بنتك وداد غاليه عندها مثل مايقولون ما اغلى من الولد الا ولد الولد قوليلها ودي تتربى بين امها وابوها وما ودي اتحسف بعدين اذا صار شي على بنتي والسبب انها ميب عند ابوها ومن هالكلام بس نصيحه لاتطلعين من عند امك وهي مو راضيه عليك وبعدين من قال ان طاعة الزوج اهم من طاعة الوالدين اذا ربنا عز وجل ما قرن بين طاعة الوالدين وطاعة الزوج نقارن حنا البشر وبعد تعبها عليك كل السنين الي راحت من حمل وولاده وتربيه والي انتي جربتي البعض منها تقولين الزوج اهم وفي القرآن الكريم وفي عدة مواضع قرن الله طاعته بطاعة الوالدين وبكلامي هذا ما أقلل من حق الزوج فحقه عظيم بس مو اهم من الام وما اقولك خليك عند امك ولا تروحين عند غاليك ومغليك بس حاولي انك تجمعين بين الاثنين (( رضا الوالدين ورضا الزوج )) والله يكتب لك الي فيه الخير ويسعدك دنيا وآخره |
لا اله الا الله ... والله يا ام وداد صج صج الله يعينج ويصبرج ويعوضج بعد هالصبر خير يارب ...
صج الله يهديها امك وفعلا شكلها تسوي كذا بس عشان كرامتها ... يسالج حبيبتي لو رحتي وقلتي لها ترى انا بروح لزوجي وكاهم اغراضي جهزتهم وهذا راسج ابوسه بتمنعج وفهمهيها انك على راسها .. المشكله ودي اقول لك صبري لين ماتهدا بس هذا انتي صار لك سنه صابره .. ومافي فايدة والريال ينطر يعني لو راح تزوج لو لعب من وراج راح تتحسفين طول عمرك .. امك الله يهديها يارب روحي لها وطيحي على رجلها وخلي اخوك واخنك معاك يقنعوها ... بس ف هالوقت انتي تكونين خلاص مستعدة للروحه يعني شناطك في السياره وتوكلي على الله .. وتمي ارسلي لها مسجات انه هي ماترضى انه الله يلعنك والعياذ بالله لانه زوجك يريدك وانتي تعصينه .. وانه رضاه واجب اهم من رضاها بس انتي كنتي تحاولين تراضينها حبا فيها وانك سالتي اكثر من شيخ وقال لك لازم تروحين لزوجك ... وفهمهيما انه ان شاء الله هالطاعه بتوصلكم انتو ال2 للجنة ان شاء الله .. حقيقة وايد مستعربه من تصرفات امك يعني حتى لو غلط بس هو قاعد يحلف انه تغير واظن بقاءه سنه كامله بدون زواج او لف ودوران اكبر دليل على انه شاريك فليش الخوف منه ... الله يهديييها يارب ويقذف حب زوجك في قلبها وماتقومين بكرة الصبح الا وهي تقول لك يا بنتي توكلي على الله ... ومافي شي بعيد على رب العالمين ... دعواتي الحارة بالتوفيق لك يالغاليه .. |
اختي ام وداد بقولك مشكلتي لانها تقريباً نفس مشكلتك انا يا غالية مثلك تزوجت وبدأت المشاحنات بين اهل زوجي واهلي وكنت انا وزوجي في الوسط والعناد كان بين امي وام زوجي هذا تحرض ولدها انه يطلقني وامي تسوي نفس الشيء الله يسامحهم وكان عندي ولدي عمره اقل من السنتين كان هو المظلوم بننا وفي الاخير ابوي قالي خلي جدته تربيه << شوفي القسوة راح الولد عن جدته وانا عشت في عذاب جلس اكثر من 4 شهور بعيد عني واسمعه يناديني وانا قلبي يتقطع حسرة عليه في الاصل ما بيني وبين زوجي اي شيء المشكلة بين الكبار اخر شيء امي وامه كل وحده تبغى هي تنتصر على الثانية <<< خلوها حرب وانا وزوجي وولدي هم الضحية في الاخير قررت اني اكلم ابوي وقلت له اني برجع لزوجي وانا وياه نحب بعض وما بيننا شي قامت الدنيا عند امي وما قعدت وقالت لا انا بنتها ولا اعرفها المهم حزمت امري ورجعت لزوجي وسافرت له من بلد لبلد انا وولدي واستقبلني زوجي استقبال ما اقدر اوصفه لك وكان لنا من بعض اكثر من سنه المهم كنت افكر في الاخير في امي وكيف اغضبتها سألت شيخ قالي ما اغضبتيها ولا شي طاعة زوجك اهم المهم انتهت الازمة وامي نسيت وصارت تحب زوجي كانه واحد من عيالها الحين ولدي اللي كان معاي عمره اقل من السنتين الحين 13 سنه وعندي غيره الله يحفظهم لي عارفه اني طولت بس حبيت اقولك امك تعنادك بس ومسويه رجعوك لزوجك راح يقلل من احترامها اعزمي النية وارجعي لزوجك حتى لو امك موجوده مو لازم تكون مسافرة وخليها امام الامر الواقع راح تزعل فترة وبعدين تهدأ وخاصة لما تشوفك مبسوطه مع زوجك راح تنسى كل شيء موفقة يا ام وداد أختكــ/ الهدى10 |
الله يعينك يا أم وداد
ارجعي لزوجك صدقيني قلب الام مايكره ابد ولا يحقد مصيرها تتعدل الامور |
أختي ام وداد حفظكي الله من كل مكروة وابعد عنكي ما اهمكي ,,
هذا ما يحتاج له تردد ,, زوجك ويحبك وشاريكي ,, فلا تخسريه وأمك بتظل أمك وهذي فترة وبتروح ,, مثل ما قال الكثيرين قبلي ,, بوسي راسها وقولي لها انتي الاصل والبركة ,, بس ما ترضي لبنتك تتعذب ,, حدثي زوجك عن الامر بعقلانية ودون ان تجعلي ذلك سبب لزعله من امك ,, ارسلي مع أختك كلمات طيبة عن أمك وكان زوجك من قالها . إخيراًَ اسال الله ان يجمع بينكما على خير بود ورحمه ويحنن قلب أمكي عليكما . ويبارك لكما بوداد |
السلام عليكم ورحمة الله وبركاته
اختي الهدى.. انا امر الحين بالي انتي مريتي فيه بالضبط ... اليوم صارلي سنة وثلاث ايام بعيد عن زوجي.. احبه ويحبني .. واتغير عشاني وانا تغيرت عشانه بعد .. وصدقيني ماراح اتحمل بعد بنتي عني ابدا بسوي الي قلتي لي عليه وصارت حرب بين امي وام زوجي واحنا الضحايا.. مثل ماقلتي... الله يعين بس مشكورين كلكم وصدقت الي قالت ان المسالة مساله عناد وكرامة.. وسمعتها اتقول عمري مانهنت هالكثر يالغالين انا اليوم عزمت اكلم امي بعد شوي لما يرجع اخوي عشان نحسم الموضوع .. لاني تعبت وزوجي تعب.. بغيت ارد على كل واحد فيكم .. بس سامحوني.. |
الله يوفقك اختي ام وداد وان شاء الله ردك علينا يكون من بيتك ومع زوجك قلبي ودعواتي معاكِ الله يخلي لك وداد وتشوفيها عروس بأذن الله |
الله يحنن قلب امك عليكي وارحعي
لزوجك لانه مابينفعك غيرو واللي بيزعل اخرته يرضى |
السلام عليكم...
اشكركم كلكم على ردودكم... امس في الليل كلمتني امي.. وسالتني انتي تحبينه ؟ قلتلها شيفرق الجواب اذا انتي بالنهاية ناويه اتمشين الموضوع على كيفج .. قالتلي ردي.. قلتلها طبعا احبه وانا من البدايه مؤمنة بان زوجي طيب ويستحق اني احبه .. لكن في بعض الامور صارت فشلتني قدامكم وانا متاكده انه ندم الحين .. قالتلي انا عندي شروط.. ولازم يسويها 1 يطلعلك رخصة سواقه 2 يفتح لك حساب مايتسكر الا اذا لا سمح الله صار طلاق ويحط فيه مايقل عن 5 الاف درهم امااراتي.. وللعلم زوجي راتبه 9 الاف اكثر شوي او اقل..!!!!!!!!! 3 يطلعلي سيارة جديدة وعلى قولها لازم امه ماتكون راكبتها .. 4 شقة فخمة على قولتها تناسب عيشتي في بيت اهلي 5 هو الي يوديني ويجيبني وليسن السواقه بس للكلية .. 6 ماحمل مرة ثانية لحد ماخلص الماجستير والدكتوراه 7 الحين بما ان جواز بنتي جاهز اسافر اول مرة مع اهلي من غيره.. وبعدين معاه .. لان على كلامها اترد لها كرامتها وخصوصا انه زوجي قال ماعليه اتروح لاهلها بالكويت بس معاي!! امي اتقول كيف هو معانا وانا اصلا ماطيقه وبعد اتقول لازم هالشروط اتم في المحكمة .. وهو طلبه الوحيد .. بان لا امي ولا امه يدخلون بيتنا .. عشان نتجنب المشاكل.. مو كرها فيهم بس كلن يحب يتدخل ويدقق.. بغض النظر عن النوايا .. قال لي لو تبين بانخليهم يدخلون .. بس مانبي في يوم من الايام يتلاقون واتصير مشكله .. ولا مثلا نضطر نكذب .. وانعيش بعذابات نفسيه عشان نرضي الكل.. وانا الصراحة عجبني هالشرط .. امي اتقول لازم هي تدخل بيتنا .. لان البنت تحتاج لامها ... المهم.. بالنسبة لي.. انا شروطي عادية 1-شقة وهذا شي مفروغ منه .. وباي مكان مو بالضرورة فخمة .. اراعي زوجي يعني 2-سيارة .. لكن مو شرط جديدة لان للعلم زوجي عنده سيارتين .. يعني وحدة يستخدمها هو وبعدين انا استخدم الثانية 3- رخصة سواقه 4- دراسة .. وزوجي الحمدلله ماعنده اي اعتراض 4- وحساب خاص لي.. بس طبعا على حسب مقدرته .. ( للعلم كان عندي حساب... يعني زوجي ماعنده اعتراض) شو رايكم .. شو الحل..؟ انا مابي محاكم ولا ابي شروط امي المبالغ فيها .. ساعدوني.. |
وللعلم .. امي اتقول بعد ..
اذا زوجي ماوافق على هالشيئين الي هم .. - مايسافر معانا هالمرة احنا نسافر بروحنا.. - بان امي لازم تدخل بيتنا .. وامه لا.. فهو .. شـــــــــــــــــــــــــــــــــــــــــــــــــ ـــــــــــــــــري!! ومافيه خير.. !! |
من امس وانا انتظر ردك والله امك شروطها قووووويه شوفي اختي انتي اللي بتعيشي مع زوجك لا امك ولا احد من اهلك مالهم دخل اذا يعطيكِ او لا يعني انتي الظاهر مالك رأي في الموضوع!!! امك شروطها تعجيزية عشان تبغى زوجك يمل قولي لها يا امي ابغى اعيش وانا مرتاحة وبنتي بين احضانا انا والدها وخليها تدخل معاكِ في قسم المطلقات وأقرأي لها اذا ما تعرف تقرأ يعني راتبه 9 الف ويعطيكِ 5 كل شهر وبعدين البيت من يصرف عليه ؟؟؟ انتي فكري واحسبيها وشوفي الشروط تناسب زوجك ولا لا موفقه |
مشكورة يالغالية هدى على تجاوبك معاي..
انا اشوف شروطها نفس ماقلتي تعجيزية وقلتلها كم مرة انا الي لي القرار.. قالتلي نحنا ماشرطنا في بداية الزواج .. وداسونا .. الحين بتشرط . وبغيت اسالك شو رايك .. بكلامها .. بانه شري لو ماسوى الشيئين الي مطلوبين من قبلها .. ؟! واتظنين الاحسن انروح للمحاكم ؟ |
لا يا اختي لا توصلي للمحاكم ابداً شيليها من راسك وبعدين امك ليه مصرة انها تسافر وياج ؟؟ طيب وين الوالد وين اخوانك ما عندك اخوان كبار يفهمو الوالدة؟ والله ما اكذب عليكِ اني افكر فيكِ من امس واقول يا ترى اش سوت ام وداود مع امها؟ وزوجك لو سمع شروط امك راح يعاند وبعدين تثبت لك ان زوجك شري على قولها لا توصلي له الكلام لما تتفقي مع الوالده على كل شي |
الغالية الهدى.. انا مابيها توصل للمحاكم ..
امي مادري ليش اتفكر بهالطريقة .. اتفكر بكرامتها اكثر شي.. ونستني.. صارلي سنة عندها بلا مبالغة اليوم ... صارلي سنة واربع ايام .. ولا عيد عيدته معاه .. احبه موت وهو بعد ... فكرت يالغالية .. اقنعه اروح على الاقل ثلاث ايام للكويت .. وبكره يجي زوجي بنفسه يكلم امي ..يمكن اتغير فكرتها .. |
الله يوفقك لما يحب ويرضا يا أم وداد
|
مرحبا بك يالغالية .. الله يسهل اموري ان شاء الله
وان شاء الله نرجع لبعض بدون مغثه ووجع راسِ |
اقتباس:
لأن قبل الزواج كانت الزوجه واهلها في الطرف الاول والزوج في الطرف الثاني .. لكن بعد الزواج تصبح الزوجة والزوج في طرف واحد واهل الزوجه او اهله في الطرف الثاني . اما بخصوص المحاكم .. كيف سيحترمك زوجك في المستقبل او يحبك ويقدرك وانتي تجرجريه في المحاكم !! ولماذا اللجوء للمحاكم من الاساس ؟! .. انتي وزوجك تحبان بعضكما ومتفاهمان .. واساس المشكلة هي التصادم بين اهلك واهله وهو قد وضع لك حل منطقي جدا وهو عدم دخول اي من اهاليكما لبيتكما تـفاديا للصدام . اما شروط امك .. فهي شروط عجيـبة وكأنها هي من ستعود لزوجها وتتشرط وليس انتي .. احسمي امرك واتخذي قرارك دون تأثير من أحد وتذكري ان زوجك هو الاقرب لك من إي انسان آخـر .. والعوده له هي الاساس . |
والله شاقولك يا اختاه
نصيحه اخويه امك بتهدم بيتك وامك عصبيه وشاغله هالموضوع اذا انتي تحبي زوجك وبيتك تبين تحافضي عليه لا تخلين حد يتدخل في ما بين الزوجين اي بينك وبين زوجك صدقيني اختي ترا بتخسرين زوجك وهالشي يأثر عليكم مستقبلا امك مكبره الموضوع وهالموضوع بياثر على زوجك وعليك وعلى بيتك وتركي عنك الشروط وخلك ويا عيالك ربي يهديكم يارب ويرجعكم اختي في الله شروط امك تعجيزيه وتخلق مشاكل لا لها بدايه ولا نهايه تجنبي ادخال امك وام زوجك اجعلو حياتكم مبنيه عليكم انتم الاثنان بالتفاهم والموده بارك الله فيكم وارجعكم الى الطريق السوي والى بيتكم يارب بووركتم |
لكم مني جزيل الشكر..
انا مابي اتشرط اصلا .. ادعووووووووووووولي دخليكم,... |
السلام عليكم ورحمة الله وبركاته
قبل ثلاث ساعات اخوي وانا كلمنا امي.. وقلتالها كذا وكذا وكذا .. عصبت وهاجت .. وصرخت .. وقامت تلطم وتسوي حركات مجنونه .. والله خفت .. وصوتها عالي بشكل فظيع .. تبيني الا اروح معها الكويت اول مرة .. وبعدين الا تبي تدخل الشقه .. وتبي بعد .. انروح للتوجيه الاسري انحط شروطها التعجيزية .. رضا زين مارضا كيفه يروح ولا يرجع على قولتها .. وقالت والله لو رجعتي له والله ماعرفك .. ابد .. بصراخ طبعا .. وسبتني سب.. والحين نفسيتي تعبانة غلقت تلقوني.. وهددتني ان كلمت زوجي ماعرف شاللي بيصير.. وراحت بعدين بكل هدوء كلمت خالتي في الكويت ... ولا كانها هاجت وسرخت بهالطريقة .. ولما فتحت تلفوني لقيت مسج منها .. يالهبله محد راح ينفعك غير امك .. وزوجك مامنه فايدة والدليل تصرفاته الي فاتت . ومن هالكلام .. والله والله راسي بينفجر.. ومحتارة بامري مو عارفه شسوي.. ماقدرحتى ابكي.. |
الله يعينك ويكتب لك اللي فيه خييير
|
مشكورة ياقلبي.. دعواتج ..
|
| الساعة الآن 12:58 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©