|
أقوله ابغى تصريح للسفر .... يقول استغفر الله العظيم
اولا اعرفكم بنفسي انا هند
اكيد فقدتوني في عالم الحياة الزوجيه ابشركم لي فتره وانا مع زوجي في صلاح ومعاهده سلام كلها هالفتره اسبوع ونصف بس الحمد لله افضل من كل يوم هذا الي بقوله مو مشكله بس حابه اعرف رايكم فيه يعني بصراحه انانيه الزوج احيانا كنا متفقين الخميس هذا نسوي عشاء بس اخوي قال لا تحسبوني ماراح اكون موجود سألته على جنب وين ان شاء الله قال مسافر قلت وين قال .... مكان خارج السعوديه قريب بس انا ما .... (( منكرات في كل مكان ما اعني احد ))) المهم قلت من معه بتروح قال مع ربعي قلت ليه ماتروح مع زوجتك احسن والا اقولك ليه مانروح حنا معك الاخ الفاضل ماصدق خبر وقال روحو انتو معي يعني حنا الاخوات المتزوجات طبعا الكل من الاخوات فرحت وسرت بالخبر وكل وحده صارت تطلب التصريح من زوجها طبعا اتفقنا وين بنروح ومتى وعلى كل شيئ وانا معهم كأني ... المهم كنت مو واثقه من خواتي يوافقو ازواجهم لأنهم مو بالسهوله يستغنو عنهم اما انا فزوجي اصلا توه مسافر مع ربعه واكيد بيفتك وبيوافق .....!!! بس تدرون وش صار ........!! والله شيئ ابدا ما توقعته صار العكس كلهم سوو لهم ازواجهم تصريح الا انا طيب ليه توك رايح انت مع ربعك زوجي العزيز سو لي تصريح ... تدرون وش قال بالضبط قال استغفر الله العظيم عقلك ضارب في عقلك شيئ هو على كيفك قومي بس خلصي الغداء شلي عن بالك هالفكره جنون هو بالاخير بوجهه عبوس لا ولا تفتحين معي الموضوع مره ثانيه عاد انا فعلا ابغى اروح ومتحمسه اكثر من خواتي بس قلت في خاطري ابشر والله حتى ما ازعل واضحك واسوي اشياء ماتجي على باله ..(( وحده تبغى تصبر نفسها .... بس فعلا هذا الي صار)) بيرحون خواتي وامي رحله عزابيه وانا ....!!! |
(وعسى ان تكرهوا شيئا وهو خير لكم. وعسى ان تحبوا شيئا وهو شر لكم. والله يعلم وانتم لا تعلمون). صدق الله العظيم
ماتدرين سبحان الله وين الخير بس انتي حاولي مره ثانيه وان شاء الله بيوافق |
قوليله انك مع اخوك وخواتك كلهم بيسافرون الا انا ليش ؟؟ زين انت سافرت ونست نفسك ماقلت شىء لما طلبت منك اسافر واول مره اسافر تردني ليش زين بفهم اعتبرها اخر مره لو تغليني وتحبني مثل ماحبك
|
حياك الله اختي هند ... والله لك وحشة
ولا يهمك اختي وعسى ان تكرهوا شي وهو خير لكم اهم شي حااااااااااولي انك ما تزعلي ...او على الاقل سوي مثل ما سوى زوجك ...فاجأك بردة فعله اتجاه سفرك انت بعد فاجئية بردة فعلك اتجاة قرارة عشان تصير وحده بوحده وربي يفرج همك |
هلا فيك هند
فيه محاوله يمكن تسويها ويمكن ماتزبط معاك بس حاولي وهي وسطي لك احد عزيز عنده مثل ابوه او امه او اخواته والا ممكن تخلي اخوك يكلمه ممكن يستحي منه ويوافق او الوالده حاولي يااهند والله الموفق حلو انك تروحي مع اهلك وبدون مسئوليه موفقه بأذن الله |
عسى مانشر تسافرين برا وزوجك موجود حنا وين عايشين صراحه استغرب على الجراه كيف فتحتي الموضوع مع زوجك
|
لاتضايقك حالك مايستاهل الموضوع يمكن من حبه لك مايقدر يستغنى عنك
انا كثير يقولي اخوي سافري معي لكن حتى مااتعب نفسي واقوله لاني اعرف رده والله انعرضت علي دورة لدولة قريبه 3 ايام وقلتله اروح مع اخوي كلها ثلاث ايام ورفض قلي بلا دورة بلا خرابيط هونيها حبيبتي وتهون لاتحطي ببالك حاولي معه وهو رايق واذا رفض قولي الحمد لله على كل حال |
حبيبتي حاولي اتكلمينه مرة ثانية .. يمكن الوقت كان مو مناسب ولاشي..
|
غاليتي أنت زعلتي علشان خواتك بيروحوا وأنتي لا أو لأن زوجك يروح ويسافر وماخلاك أنتي تسافري وتروح تتمشين
(يعني أش معنى هو) طيب حبيبتي ماأشوف أنه غلطان أبد يمكن يخاف عليك واجد ومايبي تروحي مكان بعيد ألى أذا كان معاك بالعكس هذا من حرصه على زوجته مو لأنه مايبيك تستانسي |
اقتباس:
كلمتيه وهو (يتضور جوعاً) ألم يبلغك نبأ المثل القائل قلب الرجل معدته :) اتوقع لو كلمتيه بعد فلل (قلبه) كان وافق |
اختى لا تقارنى حالك فيه
هو رجل وانتى المرأه ان ارد السفر فهو غير مطالب بأخذ الاذن منكى لكنك حين تودين السفر يستوجب ان تأخذى أذنه وبنظرى لا يجب ان تسافر المرأه للسياحه بعيدا عن زوجها وان رضى ازواج اخواتك لهن بالسفر فهذا شىء يرجع لازواجهن فلا تقارنى حالك بحال احد فزوجك لا دخل له بموافقه ازواج اخواتك بالسفر كل رجل وله طريقته مع اهل بيته واحترمى هذا واود ان اقدم نصيحه حين طلبك اى شىء من زوجك فليكن فيه نوع من التودد وليس كأنه امر مقضى فيه وتقبلى امر زوجك كحكم نافذ فلا تعاودين الطلب كى تستقر حياتك معه ولا تصلين معه لنتائج لن تحمدى عقباها والسفر ليس نهايه الدنيا فالحياة امامك وسوف تسافرين معه بأذن الله |
بصراحه يااختي هند ام احمد انا احترمك كثير واقدرك
لكن بنفس الوقت متفاجئ من طرح موضوعك وراح اقولك ليش؟؟؟؟ يعني كيف زوجه تترك زوجها وتقوله بسافر!!؟؟ يعني باي فكر واي منطق!!! بصراحه استغربت كثير اختي لربما الى يومك هذا لم تستطيعين التفريق بين الاب والزوج والاخ زوجك هو سكنك اختي الكريمه ..يعني انتي نصفه الثاني ..مهما بلغت العلاقه مع اهلك لن تبلغ علاقتك مع زوجك. انتي قلبه وعينه وروحه وسكنه!! تذهبين الى الخارج حتى لو كانت دوله قريبه وتتركين زوجك تلفحه نار التفكير بك...!! لاتنسين اختي الكريمه هو ليس قطعة خشبه هو انسان بمشاعر واحاسيس!! ثم انتي امراه وهو رجل لاتقارنين نفسك بنفسه باي حال من الاحوال.. لست متزوج لكن اقسم لو زوجتي طلبت مني هذا الطلب ..قبل ان ارد عليها ساسرح كثيررررررررا قبل ان اجاوبها وسرحاني سيكون كيف سمحت لنفسها مجرد التفكير بهكذا امررررررر..مع احترامي الكامل لك الا اذا كانت طريقة حياتكم الاجتماعيه تختلف عننا فهذا بحث ثاني وعندها لن يستطيع احد ان يلومك. |
لعل في الامر خيرآ لكي وانتي لا تعلمين
|
كيف حالك ياأختي هند والله افتقدناك في المنتدى .
من رأيي إنك تقنعي يجي معك ومع أهللك إذا كانت الفترة بسيطه ومنها بتغيروا جو . |
هند مااحد موجع قلبي في هالمنتدى الا انت ... حبوبه هونيها تهون صغريها تصغر وأحلى حاجه تعمليها تنسي الموضوع وكأن شئ لم يكن ومارسي حياتك طبيعي.. صدقيني كل مافكرتي زياده كل مازدت لنفسك الهم الله يبعدك عن الهم والغم..
|
انا مع saapna 81
لا تحطيها في بالك |
الله يجزاكم خير على الردود
انا لما طرحت الموضوع ما طرحت على انه مشكله طرحت لأخذ رأي واستفيد منه وفعلا حسيت اني استفدت كثير خاصه من رد المتهالك رزقك الله الزوجه الصالحه بينت ردت الفعل للرجل وجلست افكر في رد زوجي فعلا حست من رد زوجي وهو طبعا رافض ان كان المفروض اني ما اتجرأ واطلب طلب مثل هذا يعني وده ان انا الا قلت لا ما اروح من غيرك مو هو الي يرفض بس هذا من التعلق الشديد بالاهل الله يخليهم لنا ويخلي لي زوجي بس اذا تزوجت ان شاء الله ماراح تسافر من غير زوجتك هذا السؤال ... او لايمكننا ان نقارن ..؟؟ عطر المدينه مشكوره يالغاليه TALALA قلت له بكذا طريقه وما وافق ... والحمد لله عدا هاليوم الي هو امس الخميس .... مشكوره فافي انا والله اشتاق لكم بعد وحياك ربي وفعلا هالمره بالذات فاجات زوجي برده فعلي بس تطلع اشوي مني كلمات احيانا واقول خلاص انتهى الموضوع ... على امل اللقاء جات في بالي فكره اخلي اخوي يكلمه بس بعدين قلت ان الامر مايستحمل واقتنعت من كلام اختي يوم تقول لوله يحبك كان ما اهتم فيك وقال الفكه ... نشميه نجد ... عادي في مجتمعنا ... لكن غير عادي بالنسبه لزوجي ... كرستال هلا فيك ياعمري زين نفس الحال وتصدقين انا بعد لما اقول لنفسي هالكلام افرح بس تصدقين زوجي يدقق كثير على الرغم لنا خمس سنوات الي هالحين حتى لما اطلع مع اهلي وانا عندهم لازم اكلم تراني بروح هالمكان وهو على كيفه يوافق والا.... ام وداد وفايق الوقت اخترته بوقت مناسب وغير مناسب هي نفس ردة الفعل واحس زوجي ينقلب علي لما افتحله هالموضوع بالذات والله حتى تعابير وجهه تقول سكتي وسكري الموضوع يعني مره بالليل ومره بالنهار لما جاء من العمل وزفني روحي خلصي الغذاء ومره بعد .... وكل المرات لا هو على كيفك بعقلك شيئ ندى انا عصبت من الاثنين والله قلت له يوم سافر اخر مره لاتلوميني لما اروح مع اهلي بعد اذا صرت تستانس مع ربعك انا استانس مع اهلي وما في فايده لا اصلا يوم قلت له اخر مره كذا صار يشدد علي زياده يعني لا تستانسين الا معي ويمكن بعد لانها خارج السعوديه على الرغم زوجي مايسافر كثير مع ربعه ولله الحمد ... |
منى فعلا لايقارن الرجل بالمراه
لكن انا كثير المقارنه بأاخواتي يعني اقوله ازواجهم وافقو يروح معهم يقول وماعلي من احد منهم لو كلهم يرحون ماهمني انا مو موافق في المقابل هم الي روحتهم صعبه عيال ومسؤوليه اكثر مني اما انا ماعندي عيال بس عندي زوج عن العيال كلهم الله يخليه لي ... ((حين طلبك اى شىء من زوجك فليكن فيه نوع من التودد وليس كأنه امر مقضى فيه )) انا فعلا هالمره بالذات كان بتودد بس ماصلح الامر .... عموما عدت وعدا الخميس ومارحت وياليته يعوضني بروحه ثانيه رغم ان الجمعه حلوه وماتتفوت .... فتى نجد شكرا لك سرور العمر وانا اشتقت لكم لكن ان اقوله يروح معنا هذا المستحيل زوجي ما يجتمع كثير مع اهلي ولا يشوفهم الا في الاعياد وهالشيئ مأثر كثير فيني بس الحمد لله على كل حال اصلا لو نسافر في وقت بيسافرو اهلي فيه زوجي اجل سفرتنا الين يرجعو اهلي ويوديني بعد ما يرجعون هذا طبع زوجي ما ادري يخاف لو انهم هناك اقوله ودني اروح معهم اشوي او اشوفهم الله يهديه ... saapna 81 يارب ما يوجعك قلبك علي غالي ياعمري مشينا الموضوع عادي والحمد لله ... حلا الايام مشكوره ..... |
كلمني زوجي قبل شوي
يقول يبغى يروح مكه مع اخوه يعني عدا يوم رحله خواتي مع اخوي وبعدين يكلمني انه يبغى يروح مكه مع اخوه قلت لكم الرجال انانين ما ادري جاد ولا يمزح ويشوف ردة فعلي يعني هي وحده بوحده ... هذا وانا ما رحت معهم رجلي على رجله انا بعد نفسي اروح مكه لي سنتين ما رحت ياخذ اخوه معه ليه ....؟؟ اتوقع مو جاد في الموضوع ولو جاد راح اتخانق معه والا اروح مو حلال يروح وحرام علي ... |
ياقلبي يا هند ..
ما أدري ليش يقولون إن الزوج عادي يترك زوجته ويسافر .. والزوجة إذا تركت زوجها وسافرت كأنها فعلت أمر عظيييييييييييييم .. ومنافي للأخلاق .. ومرفوض بتاتا .. أنا بالنسبة لي .. زوجي لا يحب السفر كثيرا .. لذلك بينت له إنه إذا أهلي بيسافرون باروح معاهم .. لأني لو أنتظرتك عزة الله ماسافرت .. هنودة .. جبت لك أقتباس تعالي أقريه .. بس أرجوك خلي أنطباعك بعد قراءته ذكريات حلوة وليس تحسر على ما مضى .. طيب ؟؟ أنزلي شوي .. بعد شوي .. اقتباس:
|
ماشاء الله تبارك الرحمن هذه هنودة والا غيرها...!!!؟؟؟
ياسلام على هذا التغيير الكبير والإنجاز الضخم .....(الظاهر ربي استجاب دعائي لكِ في الحج...أجل أبشري بيرزقك الله الذرية بإذن الله قريب) يعلم الله اني سعدت جدااااااااااا بموضوعك بس بالله ماارتحتي في حياتك حالياً بعد ماغيرتي أسلوبك؟؟؟ مع اني كنت بحاول أعطيكِ حلول علشان يوافق بإذن الله يمكن تنفع معاه بس بما إن الموضوع انتهى الله يسهل على أهلك ويرجعوا بالسلامة بس بصراحة استغربت ممن يقولون ليش تسافرين بدون اهلك وين نحن؟؟ نحن في السعودية ولله الحمد وربي ماحرم ان الزوجة تسافر مع أهلها إذا وافق زوجها ....فليش أنتوا شايفينها كبيرة من الكبائر..!!! ليش الرجل حلال يسافر مع أصحابه ....وتحرمون الزوجة تسافر مع أهلها ومحارمها ووالدتها...!!!؟؟؟ المهم نعود لكلامنا بالنسبة لسفره لمكة طبعاً كلنا نتشوق للحرم وأقترح تقولين له بحزم وبدون زعل أنا طعتك وماسافرت مع أهلي مع ان كان نفسي أروح معاهم لكني حرمت نفسي علشان خاطرك وعلشان حبي لك.......فماأعتقد من العدل تروح مكة وتتركني.. ونسأل الله أن يهديه ويسخره لكِ ويسعدكم دنيا ودين ويقر عينكم بذرية صالحة عاااااااجلاً |
الله يسعدك ياهند يارب ويرزقك الذريه الصالحه عاجلا غير اجلا :d
ويرد اهلك سالمين ان شاء الله وان شاء الله ياخذك معاة لمكه :22::22: بس عاد لاتنسين تدعين لنا يالغااااااااليه :o الله يسر امرك ويفرح قلبك ويرزقك يارب |
بحرينيه ولكن
كيف اضحك على عمري ........!!!!!!!!!!!!!!!!!!!!!!!!! بقولك شيئ بتموتين من الضحك علي كنت اقرأ الكلام الي كاتبته او منزلته واقول ياربي كل هالصفات فيني كأنها تتكلم عني مو عن وحده منزله كلامها في موضوعي اثاري في الاخير .... اختكم الثرثاره هنوده طلعت انا .... والله ضحكت من داخلي ومن برا ومن كل شيئ اقول ياربي كأن الي تتكلم انا واشوف اسمي بالاخير يحليلي والله كلام حلو ونصيحه حلوه بس والله والله ابد ماظنيت ان انا ابدا .... جعلني ما انحسد وتذكرت متى كتبت هذا الكلام ايام حلوه والله السفر قبل مع الزوج احلى حتى هالحين حلو بس اول كان له طعم خاص ياعمري وقلبي انتي ذكرتني بالذي مضى جعل ايامك فرح وسعاده وحب ... آمين ... |
هلا والله بأم جمانه
الأخت الغاليه والطيبه والحنونه اخت الازمات هذا ما اطلقه عليك احتاجك لما اكون محتاجه لأم جمانه الله يجزاك الجنه لدعائك لي ويارب يحقق كل امانيك ما اسعدني وانتي تطلين علي موضوعي تصرفي هذه المره سليم لكن اشكو اليك من زوجي (( اكيد بتقولين رجعت هند لعادتها القديمه )) لا والله مو شكوى بالحيل بس زوجي صار يدقق علي كثير والله بكاني بالامس بس لاني بغيت اطلع مع خواتي مجمع يمكن بتقولين ما يستحمل ياهند بس والله مليت هذاهم سافرو وانا مارحت معهم طيب حتى طلعات داخل البلد ما يرضى اروح معهم يا يروح هو معي والا مستحيل تروحين معهم حتى يوم رحت بالامس رحت بعد مانكد علي هذا وانا جيته باللين والكلمه الطيبه ينكد علي ويقول انتي تروحين معي يكفى خلاص معليك قصور طيب مو تحبين تطلعين مع خواتك ...؟ والله خايفه يتعود اني ما اطلع الا معه كيف الحل معه ...؟؟ |
غموض السنين مشكوره ياعمري
بس يبدو انه غير جاد في الموضوع بس زوجي من النوع الا يحب اقوله مستحيل تروح بدوني يعني ميته عليه ومتعلقه فيه ... وصار الي يبغيه وانتهى الموضوع عنده ... |
السلام عليك ورحمة الله وبركاته
كيفك وكيف الاحوال انتظرك هناك على احر من الجمر ارحميني وردي عليا يا شيخه:eek: نجي لموضوعنا :22: هنوده والله اطلعت على موضوعك بعد مانزلت حبيبتنا بحرينيه ولكن رد قلت خليني اصبر اشوف رد الثرثاره هنوده ان شاء الله طاح الحطب مع ان والله اسلوبك مع زوجك فى طلب التصريح كان رائع بس لا تقولي الاسلوب ماجاب نتيجه مع الوقت ان شاء الله يتنازل عزيزتي اذا رفض زوجك تروحين مع اهلك ترى ما قصده مايبغاك تنبسطين او عناد قصده الاول والاخير ان ما يستغني عنك والبيت من دوك ولا شئ ماشاء الله تبارك الله والدليل في ردك على غموض وهذا اللي يبسط ال00000 الله يديم عليكم نعمه ويزيدكم من فضله ويمن عليكم بذريه صالحه |
اقتباس:
ويجعل حياتك هناء مع زوجك وتنبهى الى عدم مقارنه حياتك بحياة غيرك حتى لو اخواتك فكل زوج من بيئه مختلفه وكل زوج له قناعات خاصه به |
قناعات خاصه به
صحيح يامنى وهذا الي ذابحنا نتعود عيها والله يعينا والمقارنه احيانا تكون لا شعوريه ... هذا و انا اخف كثير من اول مشكوره ياعمري ... |
الله يهديك
شكلك زي متعوده على اهلي ومااستغني عنهم ابد الله يحفظهم ايام الاجازه الطويله اسافر معاه اسبوع واسبوعين وبعدين اسافر مع اهلي 3 اسابيع شهر لأنه هو مايبغى يسافر معاهم فاضطر اسافر معاهم من جد فكرت بنفسي وبس وواحده من القرايب قالتلي ترى شمت ريحة اهله بيزوجوه وفعلا اتزوج ..........وحاليا اسافر بس مااطول عليه بالكثير اسبوع وارجع جري مو محبة فيه الا عشان نمبر2 ماتتهنى فيه ........ بس لاتزوديها عزيزتي لو سافرتي مع اهلك لاتطوليها خصوصا اذا هو مو راضي .... وروحته لمكه حاولي تقنعيه انك تسافري معاه .... والله معاك ويحفظك |
| الساعة الآن 04:28 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©