|
بعد تعب نفسي شديد لاني معلقه بقول مشكلتي
بعد تعب نفسي شديد وصلت له قررت اكتب مشكلتي
يمكن القى لها حل مع اني يأست انا كنت متزوجه واقول كنت لاني معلقه قريب السنتين باختصار كنت ساكنه مع زوجي وامه واخوانه في بيت زوجي والي لازم تعرفونه ان مستوى اخوانه المادي فوق الممتاز ووظايفهم مرموقه بعكس زوجي كان على قده والي جمعه من فلوسه حطه بهالبيت المهم كانت لي مواقف مع زوجي لان كان بيته مرهون وانا سددت رهنيت بيته رغم ان اخوانه معاه بالبيت ولاحد منهم حط ريال المهم عندي منه 3 عيال كنت عايشه بمشاكل مع امه بالرغم انها سيده متعلمه ومتخرجه ومثقفه اخوانه كانوا يبنون عقارات وفلل ويبيعونها ولحد كلف نفسه منهم يسكن في فله من الفلل لي يبنيها عشت بضيق والي لازم تعرفونه ان يوم ملج علي زوجي قالي ان اهله بيسكنون معانا سنه بعدين بيطلعون في بيت المهم طبعا مرت السنين ولا تزحزحوا منه وكل تفكيرهم شلون يزيدون فلوسهم زوجي طيب وخجول ورغم انه دايما في صفهم رغم اني الوحيده الي وقفت وياه ودايما يقولي صبري صبري وانا اصبر رغم اني كنت مدلعه عند اهلي حتى سفره وحده ماسافرت وياه انا احيانا تجيني حالات عصبيه من موقف زوجي السلبي يعني عمره مادافع عني وفي حالات الغضب كنت اسبه وغلط عليه لانه كان بارد يعني يشوفني معصبه حدي مايهديني لا بالعكس كأني انا ولاشي علشان كذيه كنت اطلع عن طوري يعني مهما غلطو علي واشكيله يقوم يصرخ علي انا والمشكله اني كنت غبيه اي لانهم هم عرفوا يجيونه بلحيله ويطلعون مساكين جدامه وانا الشريره اما انا الي في قلبي على اللساني المهم صارت سالفه كبيره وزعلت انا لاول مره ورحت عند اهلي لانه ضربني ولكم ن تتخيلون معاي ولله ان سبع شهور ماسأل عني ولا حتى بمسج تحطمت نفسيتي لهدرجه انا رخيصة عنده بعد سبع شهور جا بيت اهلي وقالي اسف لكني لاحظت من عيونه انه مايبي يرجعني البيت المهم وهو طالع من بيتنا قالي متى بترجعين ؟ قلت له يمكن عقب اسبوع استغربت انه ماقالي تعالي بسرعه وعلى فكره انا احلل وجهي زوجي عدل وافهم ايش في باله وعرفت على طول انه مايبيني ارجع البيت شوي وبكمل لاني تعبت من الكتابه |
الله يعينك يا اختي بس رأي اخزي الشيطان ولا تتركي لهم فرصه يمسكوا عليكي الغلط
ويخربوا بينك وبين زوجك اصبر ي يا اختي واحتسبي الاجر والثواب وتأكدي ان مع العسر يسرا والله مطلع عليكي وعلى تضحيتك مع زوجك توكلي على الله وارجعي بيتك لو مو عشانه عشان اولادك الله يصلح لكم الحال |
الله يحنن قلب زوجك عليك ويسخره لك ويهدي اهله
الله يحنن قلب زوجك عليك ويسخره لك ويهدي اهله الله يحنن قلب زوجك عليك ويسخره لك ويهدي اهله |
الله يكون في عونك حبيبتي
انا اقول ارجعي لزوجك علشان عيالك المساكين وش ذنبهم يصير فيهم كذا ويتشتتوا بينك وبين ابوهم وان شاء الله زوجك راح يتعدل مع مرور الايام والكلام الحلو واحكي لزوجك عن اللي يضايقك في البيت واللي يصير بينك وبين اهله او حاولي انك تقنعيه وتسكنوا في بيت مستقل وراح ترتاحين ويرتاح هو بعد واما عن اهله يصير يزورهم بين فتره واخرى واهم من هذا كله اصبري واحتسبي واكثري من الدعاء وتذكري ان ما بعد الشده الا الفرج ان شاء الله والله يوفقك ان شاء الله وييسر لك امورك ويصلح مابينك وبين زوجك اللهم آمييييييييييييييييين |
المهم في اليوم الي زارنا البيت كنت انا بسافر بعدها بيوم مع اهلي
يوم سافرت ووصلت كلمني بالتليفون وكان يحاول ينكد علي بخصوص اهله قمت قلت له شوف يافلان انا مابي مشاكل وتعبت من المشاكل ترى اذا استمريت كذيه ماراح ارجع قام قالي افضل لاترجعين!!!!!!!! قمت قلت له ليش ان شاء الله قالي بس امي ماتبيج في البيت انتظري علي لين ماجمع شوي فلوس واجر بيت صبرت وانتظرت ومريت بمشاكل وياه لاني في بيت اهلي وهو مايزورني الا كل اسبوع مره او كل اسبوعين علشان يشوف عياله وانتظرت على هالوضع 8 شهور زياده وعلى فكره امه تكرهني بشده وتغار مني تخيلوا حتى بنات خالته كانت تخليهم ينامون عندها في البيت عناد فيني لانها تعرف اني اغار على زوجي بشده رغم ان ماعند زوجي اخت في البيت يوم دريت بالسالفه تهاوشت مع زوجي وقلت له طلقني خير ان شاء لله بنات خالته ينامون بالاسبوع في بيته وانا وعيالي ممنوعين من دخول البيت على فكره طول هالمده ماعاشرني الا مره وحده بس لان مافي مكان التقي فيه بعد الهوشه انقطع عني وانا بعد انقطعت عنه يعني 6 شهور ماتصل لي وانا ماكلمته بعد مامليت وضعي طرشت له مسجات وقلت له ياولد الناس دامك ماتبيني طلقني زهقت من وضعي ولا رد علي قمت اتصل له مايرد اتصلت له من تليفون ثاني رد ويوم سمع صوتي قال انا مشغول قلت له زين بتكلمني قال لي اي وللاسف طلع كذاب لاكلمني ولاشي اتصلت له ولا مئه مره مايرد علي ابدا وانا مش عارفه شسوي لاتقولون لي قولي حق اخوانج او حد من اهلج لان ماعندي حد وانا زهقت من وضعي اتمنى لو اني اقدر اكرهه كان ارتحت ساعدوني |
وانتي صابره على ايش انتي ماغلطتي هو الي غلط عليك
لازم تخلين احد يكلمه يا تنفصلون او يشوف له حل ويحط لك بيت والله حلوه مسكن اخوانه الي عندهم فلوس ويقدرون يطلعون وبنات خالته ينامون عندكم وانتي وعياله برا اليت والله هذا مو رجال اسمحي لي |
هذا الي قاهرني اختي العروس
يعني تخيلي كل واحد من اخوانه له بدل سكن ولخ من الامتيازات من الدوله وراتب كبير لانهم في مناصب وزوجي مديون وحالته حاله ومايقدر يأجر بيت يعني امه معطته شرط تعجيزي قالت له تبغيها اجر لها بيت وهي تعرف انه مايقدر لا بعد البيت بيت زوجي وهو مايقدر يقول لا يخاف انه عقوق بالوالدين |
يا غاليتي
تديني من اهلك و اجري البيت انتي بس اهم لا تطلقين واضح ان زوجك بين نااااااااااااارين و واضح انه يحبك حتى لو ما قدر يتواصل معك بس من الضغط اللي عليه يعني اكيد مو سهل عليه انه يطلقك و يبعد عن عياله وما راح يقدر يتزوج مره ثانيه لانه بيواجه نفس المشكله توجهي لرب العالمين و ادعي ادعي ادعي وان شاء الله ربك ييسرها الله يهدي بالكم وتبشرينا بالاخبار الحلوه يارب |
يابنات افهموني الحين مافي طريقه اقدر اتواصل فيها مع زوجي
يعني شلون احل المشكله ومافي تواصل مايبي يكلمني |
الله يفرج همك اختي والله حزنت عليك كثير بس صدقيني والله مايقدر احد يساعدك مثل نفسك بتقولين كيف اقولك كيف ادعي من كل قلب وفي كل وقت ان الله يفرج همك ويرد لك زوجك انا مريت بمشكلة كبيرة مع زوجي واستمريت بالدعاء والصدقة وقراءة سورة البقرة يوميا لمدة اربعين يوم الى ان فرجت وكنت اظنها لاتفرج والله يعينك
|
اقتباس:
انا قاعده ادعي وصابره لكن الي قاهرني ليش مايتخذ موقف اذا مايبيني يقول وخلاص |
الله يعينك اختي
شوفي ..لو يبغي يطلقك كان طلقك من زمان ...لكن صدقيني في شي مو مخليه يطلق زوجك انسان طيب ...لكن الظروف مو مساعدته على اظهار هذا الحب لك اختي ..مو معقول ما عندك احد يقدر يكلمة ...وين اهلك ؟؟؟ ما في احد من اعمامة او خواله او ابناء عمومته يقدرين تتواصلين معهم عشان يكلمونه اذا انتوا الاثنين تحبون بعض ...اكيد راح تلاقي حلقة للتواصل انت ما قلتي الا انت حاولتي تكلمينه ...هذا لا يكفي اختي .. تحركي في دائرة اكبر ..دائرة اهلك او اهله او حتى شيخ دين يكلمة وينصحة اما على الفلوس ....تتدبر وربي يجمع شملكم |
اختي و اللهـ رجل مثل ذا ما اتوقع احد بيتحملهـ .!
ضعيف شخصية و امهـ تتحكم فيهـ و هو سآكت .! اختبريهـ قولي لهـ : بسآعدكـ في إجآر البيت و شوفي ردة فعلهـ ,, |
الله يعينك انتي اللي تنازلتي عن حقك بالحصول على بيت مستقل من البداية بس مافي فايدة من التحسر على مافات انسي موضوع امه شوي وكلمي زوجك بهدوء وحاولوا تشوفوا لكم حل وادعي دي الدعوة يارب حنن قلب زوجي عليا وحاولي تحتوي زوجك بهاالفترة وتذكري سلاح المراة دموعها ابكي وبيني حاجتك له وبيني له اش اللي مضايقك وانك متحملة لانك تحبيه وشوفي ردة فعل زوجك والله يعينك ويساعدك
|
اقتباس:
زوجي وماقدر اتواصل معاه تفكرين ماحاولت عن طريق زوج بنت عمي لانه صديقه المقرب لكن ماعطانا جواب ابد بتقولين وين اخواني ...ابد مافي علاقه عمامي ماشفتهم بحياتي كلها لاتستغربين ترى عائلتنا غريبه صدقيني ماعندي حد ايش اسوي حاولت معاه طرشت مسجات اذكره ان حرام لكن مافي فايده شفتي قلت لك الظاهر هالمشكله مالها حل لان الطرف الثاني ماعندي وياه تواصل |
اقتباس:
انا حاولت اتواصل وياه واكلمه وهو رافض |
صدقوني لو يحبني ماظن انه يستحمل هالبعد كله
ياناس علموني طريقه اكرهه فيها اتمنى لو اكرهه من زود اليأس منه ادعي اني انساه واكرهه يمكن ارتاح الي مضايقني عصبيتي على كل الناس الي حولي لاني متزوجه ومش متزوجه اصعب شي ان الانسان مايعرف ايش وضعه ويتم معلق |
و الله يا إختي أنا أجوف لو توقفين شوي اتصالات و تهدين هالفترة ، الرجال ما يرد مب لأنه مشغول و إنتِ عارفة يا الغالية هالشي لكنه مب حاط في نيته هالأمر فلا تثبتين الفكرة في راسه ، انتظرت فترة طويلة إلى حدٍ ما ما في أي مشكلة لو تنتظرين بعد مدة منها تعطينه وقت عساس ما يحسم قراره بضغط منك! و منها تاخذين إنتِ نفسج فترة من هالشد في الأعصاب! بعد فترة (قدريها إنتِ) اتصلي عليه من هاتف آخـــــــر خلي العيال يكلمونه ويطلبون منه يجوفونه لما يجي قعدي معاه و كلميه!يا أختي هالمسائل ما تنحل بالتلفون أبداً فما بالج بمسج!! لازم تقعدين معاه وتتناقشين بهدوء حاولي قدر الإمكان تضبطين انفعالاتج وتحضرين لقعدتك معاه لا سب ، لا نقد ، ولا صوت عالي..!! إنتِ تبين تتفاهمين معاه و ما تبين تنهين الموقف عسب ترتاحين و خلاص!! يا إختي،، هدي شوية ترى عندكم 3 أطفال! و بصراحة لو مكانك أصبر إلين يوفر البيت لكن بشرط يتم هالأمر على وعد و اتفاق ما بينكم في فترة محددة ، و بصراحة أكثر لو كنت مكانج و أعرف زوجي عدل و إن المشاكل هذي مب بسببه أمسك فيه بإيديني و اظروسي "ع قولتهم" !يعني الله يسلمج هذا للي يبونه هم تقومين الله يهداج تحققين رغباتهم..!! |
الله يفرج كربتك و ضيقتك و يبدلها بسعة و راحة و سعادة آمين
ادعي ربك إنه يسخر زوجك و أهله لك و يسخرك لهم خلي هالدعوة على لسانك دائما و أبشري |
ربي يحنن قلبك عليك و يبعد عنكم الشياطين
حبيبتي انا ما احبذ فكرة الطلاق و الله الاحسن انه يؤجر لك بيت تعيشي فيه لوحدك انت و اولادك و هو أحسن لك من مائة مرة من العيش في قصر مع اهله خصوصا انهم ما في تفاهم بينك و بينهم حبيبتي اختاري يوم يكون فيه اجازة و اتصلي فيه و قولي له انك تريدين التكلم معه لكن بره البيت و اذا وافق كلميه بكل حب و هدوء و حاولوا تلاقوا حل لمشاكلكم ربي يجمع بينك و بينه يا رب |
ربنا يرجعكم لبعض ويارب يصلح زوجك
|
اقتباس:
هالرجال وبعدين هو اصلا يكلم عياله عن طريق تليفون الخدامه واذا يبغيهم يروحون له البيت او يمر عليهم في بيت هلي لكنه ماينزل ابد وصحيح اكتشفت اني غبيه صج لما عصب اصرخ ومامسك اعصابي والي احس فيه اقوله على طول لكن في المقابل شاف مني حب ماعتقد حد حبه له وشاف مني مواقف وصبر شفتو ا كيف الامور صعبه |
اقتباس:
|
اقتباس:
اختي قلت انه مايرد علي ابد اقتباس:
|
ادعي
ادعي اكثري من الاستغفار والله ان فوائده عجيبه حاولي تهدين وتنسين نفسك شوي اشغلي نفسك باي شي الله يردكم لبعض ويحنن قلبه عليك وما يشوف في الدنيا غيرك آآآآآآآآآآآآآآآآآآآمين كل شي يبدا صغير بعدين يكبر الا المصيبه تبدا كبيره وتصغر ومافي ضيق الا وبعده فرج شده وتزول انشالله |
خروجك من البيت كان خطا يا اختي. اسو الامور خلاص لا تحملي ادخلي ولي امرك ولكن لا للخروج لان الان الامور تسوء ومن ثم تتعودي علي الانفصال. المهم ادخلي الحكم من كلا الطرفين للاصلاح وربنا يصلح الامر. لا تطيلي بالفراق اكثر. وتحدثي بسب المشكله بنقاط 1,2.3
اللهم فرج همها واصلح ذات بينها امين مين |
مرحبا اختى اتمنى ان تعرفين ان كل كلمه اكتبها لها معنى واحد فقط ولا تحتاج الى توضيح وهذا الكلام
خارج من شخص يشبه زوجك ويعيش بظروف مشابهه لزوجك تقريبا انا سوف اجيب على كل الاسئله التى تدور فى راسك ولكن اتمنى ان يكون هناك تقبل لما سوف اقوله ان شاء الله اولا/زوجك يحبك ولكن لايستطيع التعبير لكى زوجك كان يشاهدك انك سوف تعينينه على تحمل هذا المشكله وسوف تكونين اخر الاشخاص الذين سوف يفقدهم ولكن حدث العكس وكنتى اول المبتعدين عنه . ثانيا /انتى تقولين ان امه تكرهكى ماذا بيده يفعل هل تتوقعين انه راضى لا والله انه يتعذب بسب هذا الشى ولكن الحل صعب جدا فى نظره ثالثا/ انتى تعرفين ان الاخوان متطفلين وتعرفين كل شى عنهم وهذا ماكان يهم زوجك انك تقدرين موقفه وانه صابر عليهم ماذا تريدينه يفعل يطردهم من البيت الله يعينه زوجك رابعا/ ماذا تتوقعين من اشخاص لايحبونك سوف يفعلون كل شى لكى يتخلصون منك لانهم عارفين حب زوجك لك ويحاولون ابعاده عنك بكل الطرق وهو يحاول توضيح الامر لك وكان يريد ان تساعدينه فى عودتك الى البيت ولكن حدث العكس زادت المشاكل معليش للاطلاله واتمنى ان تفهمين ماكتبت واسف اذا كان هناك نقص ولم اوضحه ولكن انا اقول لك فى النهايه زوجك يحبك ولا يستطيع تلبيت كل المتطلبات ولذلك هو جالس يصبر على نفسه من اجل الاخرين زوجك طيب جدا وقليل منه هذه الايام فلا تكون انتى والزمان عليه فعلا صبرا جميل اتمنى ان تقدريرى افعاله ولا تنظرين الى انها امور عناد او عدم حب ولكن بعض الازواج يضحى بنفسه وسعادته من اجل الاخرين الله يوفقكم ويرجعكم الى بعض اختى اتمنى ان تفكرين جيدا ماهو الحل فى نظرك الامر صعب فكونى عون لزوجك فى هذه الدنيا ونظرى الى فوائد عودتكم الى بعض وتنازلى عن اشياء لكى مقابل زوجك انظرى الى الحياه المستقبليه وكم راح من العمرى وانتم فى تباعد وفراق اما حان ان تعود العائله الى بعضها فكرى جيدا ادعوا لك بالتوفيق المتفضى |
شوفي اختي مادام مافي وسيلة اتصال بينك وبينه اكتبي رسالة وارسليها مع زوج بنت عمك وقولي فيها شوف يا ابن الناس انا امراة ومن حقي اعيش زي اي زوجة في العالم ابي ارتاح نفسيا وجسديا وجنسيا كمان (ركزي عليها عشان يحس ويفهم) اذا انت شايفلك شوفة وعايش حياتك وتاركني تعال شيل عيالك وطلقني انا كمان با شوف حياتي واعيش واتزوج اللي يسعدني ويريحني ويسكني في مملكة خاصة فيني زي اي زوجة عايشة مملكتها الخاصة وبس
هذا اللي عندي اتمنى افيدك انا هذا النوع من الرجال يقهرني |
السلام عليكم ورحممة الله وبركاته ..
انا صارلي سنة معلقه في بيت اهلي.. وزوجي في البدايه لا حس ولا خبر ... والحين بيننا اتصال لكن مانرجع لبعض بسبب الظروف.. الفرق بان زوجي اتصل فيني... ياختي كبدايه طرشيله مسج بالتلفون يخليه يتاثر... يمكن هو يرد يتصل عليك .. بس اول شي لازم تتأكدين من شي .. هو يحبك او لا؟ هو يبي يرجعك ويعيشك بعز بعيد عن اهله طبعا او لا؟ |
ليش ما تطرشيله مسج وتقوليله انا اباك ضروري فالمكان الفلاني وشوفي اذا بيي ولا لا ؟؟ واذا ياا فاتحيه بهالمواضيع مع شويه من الهدوء ودون هالعصبيه وبينيله انج اتعزين اهله كثير وحاولي انج ترجعين لبيتج .. واذا رجعتي بيتج لا تكلمين امه ولا تعطينها ويه ..
والله يفرج همج ويوفقج |
يا أختي تقولين انج تبغين تكرهينه يعني شفتي اشياء حلوه فيه خلتج بعدج تحبينه! اعتقد ان هو بعد بين نارين امه وانتي! بس شوفي اي طريقة للتواصل عشان تجلسون تناقشون هالحال الغير طبيعي الي عايشته والله يعينج ويزرع فيج الصبر أكثر وأكثر ان شاء الله
|
اقتباس:
انا احاول اشغل نفسي الحين لكن غصب عني الا ما اتذكر وانقهر |
اقتباس:
اقتباس:
وهم اصلا مالهم نيه يطلعون ومضيقين علينا ليش والدليل انهم يبنون فلل ويبيعونها لو لهم نيه كان سكنوا في فله من هالفلل الي يبنونها وصبرت بدال لسنه سبع يعني زوجي هو الي يأجر بيت ويطلع والبيت بيته وغير هذا يوم كان بيته مرهون محد حط ريال واحد وانا الي سددته وليش انا وعيالي نكون الضحيه ليش مايعرف اني لي احتياجات وهذا حقي وهو اصلا يقولي صبري وانا من صبر لين صبر اخرتها يمنعوني من دخول البيت ويقولي مايقدر يقول شي واصبري فاي قانون هذا واي منطق كان بأمكاني اشتكي عليه لكن من زود صبري ساكنه ومابي احطه في موقف صعب اقتباس:
وانا افكر جديا اني ارفع عليه قضيه لكني متردده |
اقتباس:
لكن اتمنى اكرهه ولله من كل قلبي وادعي يوميا |
لا تدعي بإنك تكرهيه.. بالعكس.. إدعي الله يصبرك ويرزقك اللي فيه خير ومصلحه لك.. وخلي عنك دعاء الكره هذا ماله داعي..
ثاني شي والأهم: إنت عندك ورقه رابحه واستخدامك لها سيء جدا.. مادام إنه ما قاعد يرد عليك.. وتاركك معلقه في بيت أهلك كل هالمده الطووووووووووويله بصراحه.. إنت إيش منتظره؟ استخدمي الورقه اللي في إيدك اللي هي (( الأولاد )) يعني بيني وبينك الرجل كل اشتياقه لناحيتك هو تجاه الأولاد.. وإذا إنت خليتي شوقه من ناحية أولاده يبرد وينطفي عن طريق شوفته لهم بالوقت اللي يبيه.. فاسمحيلي الغلط منك.. وأنا شايفه إنك حنونه زياده عليه وقاعده تسببيله الأسباب لأفعاله.. الحب شي يا عزيزتي وتعامله معك وهجره لك شي ثاني مو مسموح له بأي طريقه.. الحل لازم تنفذيه بحزم وشده وبنفس الوقت بهدوووء ورواق: أول شي: الخدامه مو من حقها يكون معها موبايل.. وماله داعي حتى لو كان هو اللي جايبه لها.. خذي الموبايل منها.. ثاني شي: كل ما يطلب الأولاد تحججي.. مره نايمين مره طالعين مره قاعدين ياكلون.. حتى يشتاق فعلاً للأولاد.. وهو مهما صبر عنك ما رح يقدر يصبر عن أولاده.. ولو جا على البيت يطلبهم لا تطلعينهم له أبدا أبدا مهما صار حتى لو عصب.. وبعد فتره من عدم رؤيته لأولاده.. أكـــــــيـــد رح يكلمك ويشوف سبب هالتغيير.. قوليله أنا مو مستعده أخلي الأولاد نفسيتهم بهالشكل ساعه عندي ساعه عندك أنا لازم يكون عندي حل واستقرار.. وإذا بغيت تشوف الأولاد أهلا وسهلا تعال بيت أهلي بنقعد كلنا سوا وبتشوفهم ما عندي مشكله.. وإذا جا عندك.. لا تطلعين الأولاد, واطلعيله إنتي وكلميه بهدووء وحزم إنك تبين حل وإعرضي عليه كم حل تكوني مرتبتهم من قبل.. وطبعا لا تدخلي ضمن الحلول إنك تعطينه فلوس.. وإذا طلب الأولاد قبل لا تطلعون بحل سويلك حجه ولا تطلعيهم.. وأنا بإعتقادي هذا هو الحل لأن هالشخص له شخصيه باردة نوعاً ما بالتالي إنتي لازم تشوفي أكثر شي يهزه.. وهذا الحل مافيه اجحاف أو سوء من ناحيتك... بس إنتي لازم تتصرفي ولا هو رح يبقى براحته ومافي شي رح يحركه طالما هو عايش مع أمه ومرتاح وبيته موجود وأكله جاهز وفي حد يكلمه (أمه) ويشوف أولاده في الوقت اللي يشاء.. الله يصبرك.. طمنينا عنك يا غاليه:) |
اقتباس:
واصلا الموبايل انا مطلعته حق الخدامه علشان اذا كنت مش موجوده اسأل عنهم لكن خفت انفذ هالطريقه علشان بنتي في المدرسه واخاف يروح ياخذها والله فكرت فيها لكن ماعرف ترددت وكلامج صحيح وعارفه هالشي ان دام بيته موجوده ويشوف عياله على شنو بيتحرك لكن معقوله مافي تأنيب ضمير |
اقتباس:
|
عزيزتي لا تفهميني غلط لكن بخصوص اهله واخوانه هم اهله اخوانه امه يعني مو منطقي تقولي لزوجك ما ابيهم معانا بالبيت حتى ولو كان بيته خصوصا ان معاكم امه يعني امه لامة ابنائها
وانتي اختي ارتكبتي غلط كبير او بالاحرى ما كنتي ذكية كان المفروض تكسبي امه واخوانه خصوصا ان امه ما عندها بنات على الاقل لما الواحد يجبر يعيش مع ناس بينو وبينهم ود ماهو مثل لو تعيشي مجبرة مع ناس (اهل زوجك يعني منكم وفيكم) فوضع كله توتر انتي بكذا خليتيهم ما يذكرون لك شئ حلو يعني ما فهمنا من كلامك ان اي واحد من اخوانه او امه سال عنك او حاول يدخل بالصلح بينكم او يساعد زوجك ماديا تقبلي رايي اختي انه حل غير منطقي انه يطلب من اهله يخرجو من بيته (عيب) حتى لو كانو مقتدرين وانتي اختي الكريمة عندك 3 اولاد يعني حتى الطلاق ماهو فصالحك فحاولي تتواصلي مع زوجك خلي بينكم وسيط يا اما من اهلك او شخص مقرب او اقاربه او اصحابه يكون اهل للثقة في شئ ما فهمته لما قلتي مالك احد يتكلم معه وين اهلك ؟؟؟؟؟؟؟؟؟؟؟ واذا في مجال يعيش معاكي زوجك فبيت اهلك انتي والاولاد ليه لا اسكنوا فبيت اهلك لين تتيسر امور زوجك بس لا تعدم لك حيلة حاولي تجدي وسيط بينك انتي وزوجك لين تتوصلي لحل مع زوجك حتى لو نسيتي ان لك كرامة وشخصية وووووو...... واذكري شئ واحد ان لك 3 اولاد وزوج مغلوب على امره ماديا (ضروفه المادية) ومعنويا ( مع اهله) فاقول لك حتى لو اضطريتي انك تاخذي عيالك وترجعي من نفسك لبيت زوجك وتبوسي على راس امه وتقولي لها انك بتتغيرين فمعاملتك وكل شئ لسبب حبك لزوجك ( وهذا شئ واضح جدا فكل كلامك ) ولسبب ان ماعندك مكان تعيشي فيه اولادك وحاولي عزيزتي تكوني بنت لها وليس فقط زوجة ابن وبنات خالته اتلحلحي وبطلي غيرة وحاولي تصاحبيهم وخليهم لصفك ادري انك يمكن تقولين اني وحدة مجنونة وبخرف لكن ان نويتي تقدري تسويها الله ييسر امورك اختي الكريمة ويرد لك زوجك وييسر علاقتك باهله |
عزيزتي انا اشوف انج اتخذتي الاسباب وكلمتي زوجك وسويتي اللي عليج
وصدقيني دام هذي شخصية زوجك الضعيفه ودام امه شخصيتها قويه ودام اخوانه محد يفكر الا بنفسه وزوجك مايرد عليج صدقيني ماراح تنفع معاه ولا اي حركه من الحركات اللي تسوينها لا انتي ولا عيالج ولا الاهل ماراح ينفع معاه الا شي واحد وراح يهزه ويهز اهله كلهم وهي المحكمه روحي المحكمه وارفعي عليه قضية وطالبي ببيت مستقل ونفقه لج ولعيالج وكل طلباتج واذكري مشكلتج لهم وبتكون قضيتج معاه في المحكمه وخله يجرب شلون يطنش المحكمه والا مايرد عليهم غصب عنه بينفذون طلبج يابيت يا طلاق وتعويض اما معلقه لا على الاقل ولو طالت القضيه بينكم حقوقج ماراح تضيع مو مثل وانتي معلقه وبدون اثبات على ضياع حقوقج اما وش اللي بتخسرينه ماراح تخسرين شي لان زوجك سلبي وامج تكرهج ولو غصبته المحكمه يوفر لج بيت وسكنتي معاه بروحكم راح تقديرين تكسبينه مع الوقت وبتقولين له انا صبرت وانت اللي تجاهلتني وماسويت جذي الا لمصلحتنا ومصلحة عيالينا ومع الوقت هو بيعرف وبيرتاح لكن محد بينقهر صج الا امه الله يهديها ويصلح حالها مع ان اللي تسويه هي ظلم بتتحاسب عليه وممكن تدخلين لزوجك من هالباب بانها سبب لفراقكم وطلوعج ببيت مستقل خلاج تسامحينها ومهما صدر منها فانتي ماراح تزعلين منها لانج بعيد عنها ولانها ام زوجك وبس هذا اللي اشوفه والمفروض تسوينه خاصه وانتي تقولين ماعندج اهل ينشد الظهر فيهم والمحاكم مانحطت الا لحل مشاكل الناس اللي يستعصى حلها وديا وكان الله في عونج ويسر امورج ووفقك في الدنيا والاخره اختك / صريحه جداً |
المشكله ماراح تنحل عن طريقك انتي لوحدك وهو مستقوي عليك لان مالك ظهر وسند وناس توقفه عند حده
اذا ماعندك اهل او رجال كبار بالعايله يوقفونه عند حده كلمي محامي ارفعي عليه قضية مايصير يعلقك كذا طبعا لاتفكرين يرجعك وتنحل المشكله .. اصحي حبيبتي انتي معيشه حالك بوهم ومتعلقه بامل انه يرجع لك ولعياله وهو عايش حياته ولا سئل فيكم بالشهوووووووووووووور ياقلبي الرجال مايصبر بدون زوجته ايام فكيف بالشهور ؟؟؟؟؟ لاازم تتصرفين انتي سكوتك عن الوضع خلاه يتمادى من بكرا كلمي محامي واستشيريه بالقضية .. لاتقولين انا حرمه ومااقدر ومابي فضايح حقك وحق عيالك ما بتاخذينه الا بهالطريقه حسبي الله على اشباه الرجال اللي ماخذين الحياة مسخره |
| الساعة الآن 12:40 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©