|
مشكلتي مع زوجتي ؟لأصحاب الرأي السديد
السلام عليكم ورحمة الله وبركاته
اخش في الموضوع دغري الموضوع انه انا واخوي عايشين مع بعض في بيت واحد انا وزوجتي وبنتي وهوه وزجته وولده وبنته البيت هذا اللي احنا فيه طلع ورث من والدنا رحمة الله عليه لي انا واخي وعلاقتي انا واخي ولله الحمد قويه جداً طريقتنا في البيت المطبخ واحد ووجبتنا وحده الا في حالة اني رغبت اكله معينه زوجتها تحضرها لي البيت فيه الكثير من الخصوصيه حيث يوجد لي جناح خاص فيني فيه غرفة نوم وصالة ومجلس ومطبخ صغير وحمام اكرمكم الله ومؤثث ولله الحمد بأتقان . المشكله في التالي : زوجتي لها فتره طالعه لي بموال ان حنا نطلع من البيت وذلك لعدم راحتها وانها تحس بالكئابه فيه وانها ما تطيق زوجة اخوي وان اطفال اخوي دائما يضايقونها ردي كان لها انه من المستحيل اني اطلع من البيت الذي يعد ورث لي وان الفكره هذي لا زم تشيلها من رأسها ولن اطلع من فله وانتقل الى شقه والسبب انه يجيلك اكتئاب من البيت . دائما ما تبكي وتنهار عند النقاش في الموضوع وردي عليها يكون اني اطبطب عليها واقولها تقراأ المعوذات واحياناً تبكي لدرجه اني احس انها مريضه نفسياً . احياناً تكون مبسوطه وتذكر زوجة اخوي بالخير وتراسله لما نكون برى وتقول انهم وحشوها وبعد كم يوم تقلب تكرهم ويصير فيه تناقض في الموضوع . حقيقه انا طفشت من الموضوع هذا كل ما صار شي من بزران اخوي قامت تبكي وتكون نفسيتها تعبانه وانا دائما اقولها هذولا اطفال ولا تحطين عقلك بعقلهم الموضوع هذا انعكس على البيت وعلى زوجتي حيث انها صارت لا تهتم فيني مثل باقي الزوجات ولا احس تجاها بش لدرجة انني كرهت الجلسه في البيت لأنها كلها نكد في نكد ما الحل في نظركم وهل افاتح ابوها في الموضوع ؟ اعتذر للأطاله |
اخوي الزوجة ماتنلام تبي تحس بحريتها
بس انت اذا ماتبي تطلع من البيت عطها خصوصيتها حاول انك تبعد عيال اخوك عن جناحكم خلوا الصغار يلعبون برى يعني كل ماجاءوا حاول تصرفهم بأي شي انا خالتي كذا .... وكانت زوجة الاخو دايم تضايقها وتتحرش فيها ووووو اخر شيء ماخذين بيت فله آجار ...طبعا خالتي تدفع من راتبهاااا اصلا تحس فيه منافسه بينهم انت لو تمشيها علطووول مثلا 2 يوم بالاسبوع او مره دلعها وجيبلها هديه حتى لو وردة صدقني بتفرح فيهاااااا بس اهم شيء انك تهتم فيها ولاتنشغل عنها كثييير ولاتقعد مع اخوك اكثر منهاااااا...... عشان ماتقول لو اني ببيت مستقل كان قعد معي علطول ولا يطلع من البيت كثيييير لانه بيحاتينا وتبعد الصغار قد ماتقدر عن جناحكم .... واذا زعلت راضهااا وقلها كلام حلووو لاتطنشهاااااا |
اخوي زوجتك لها الحق تطلب هالطلب يعني مافيه وحده ترضى تعيش في بيت مشترك خصوصا انك تقول ان المطبخ مشترك يعني حتى لو حست بالجوع ماتقدر تروح المطبخ الين ماتاخذ اذن من اخوك وغير كذه حتى ماتاكل معاها والله صعبه يعني حاول تحط اختك في نفس الموقف وتخيل اش راح يكون موقف اهلها
|
اخي الكريم ..
لو كنتو عايشين مع والدتك ووالدك كان اغلبية الاعضاء بيقولوا لك لا تطلع وامك و ابوك اولى بخدمتك و رعايتك لهم لكنك تعيش مع عائلة اخوك .. وهذا صعب .. حتى لو لكم جناح خاص تظل الزوجة تحس انه مش بيتها و لا تقدر تحس باستقلاليتها فيه كل وحدة فينا تحب تكون ملكة بيتها ولو كان شقة من غرفة افضل من العيشة مع حد بفيلا لذا اذا عندك القدرة المادية على الطلوع من البيت و الاستئجار يكون منالاحسن عشان تبعد عن المشاكلل و تستقر حياتكم .. |
لا مالها حق زوجتك بصراحة...
طالما انه بيت كبير فيلا وانتم وارثيه عن الوالد ولها فيه جناح خاص ويوجد مطبخ صغير في جناحكم يبقى خلاص ماعدها حجة زوجتك الله يهديها بس... انت خصص وقت تقعد فيه مع زوجتك وبنتك وتسولف معاهم وحسس زوجتك انك بتحبها وجيب الها هدايا بس خليك حازم في موضوع البيت يعني موضوع الطلعة هذا تشيله من بالها احسن الها... |
,
, لا يا اخي الكريم إحذر أن تفاتح والدها بالموضوع .. هذه مشكلة بسيطة إن لم تستطع أنت حلها فلا أعتقد أن هناك من سيحلها من خارج بيتكم .. أخي إجلس معها وإطلب منها إجابة على أسئلة : 1- ليش ماتحبين زوجة أخوي ,, الأسباب !! 2- إنظر هل فعلا الأطفال يؤذونها أو يحرمونها من بعض الخصوصيات ..!! 3- ثم أخبرها أن تضايقها من الجلوس في البيت لايبرر تقصيرها بحقك ..!! باختصار إبحث عن الأسباب وأوجد لها الحلول .. وفقك الله لما يحب ويرض .. , , |
بصراحة زوجتك معاها حق وصدقني لو طلعتوا في بيت لحالكم انت راح تنبسط وبتحس بالراحة والاستقلاليه يا اخي ابتعدوا عن الاشياء اللي ممكن تسبب لكم مشاكل واسكنوا لحالكم أحسن صدقني وأسأل مجررررب ...
تحياتي |
اخوي اما عن قولتك مستحيل اطلع من فله واسكن شقه انا اتمنى اسكن غرفه وحمام ومطبخ ومرتاحه على اني اسكن فله
الفله اذا ماارتاحت زوجتك فيها وش فايدتها اسال مجرب ولاتسال خبير انا ساكنه مع اهل زوجي زوجت اخو زوجي موريتي نجوم النهار لسانها طويل ومسببتلي مشاكل مالها اول ولا اخر وزوجي يدري اني مااحبها بس شنو السب مايدري وانا مااحب ابين له الاسباب حتى مايحس اني ضعيفه وثقتي بنفسي مهزوزه فزوجتك يمكن حاطه اولاد اخوك سبب تخبي وراه السبب الحقيقي فاخوي الرحمه في زوجتك والله تمر ايام ماذوق طعم النوم بسببها اذا انك تقدر تطلعها فاكيد ماراح تنسى لك هذا المعروف رفقا بالقوارير |
متابعة
|
زوجتك لراضيه ومبسوطه كما هو واضح لكن اعتقد ان كلام الناس ياثر فيها حريتك حياتك الخاصه وشلون متحمله فتكون مشحونه منهم اجلس معها جلسة مصارحه ووضح لها ان السعاده بالتفاهم والحب وراحة البال واننا ان صرنا عائله كبيره سننتقل باذالله الله ييسر اموركم |
اخي في حل بسيط جدا
اعزلوا الفلة نصين ..يعني حتى المطبخ يكون بالنص . كل واحده تكون في قسم معزوووووووول تمام عن الاخرى ... ويكون المدخل ايضا معزول ..كانهم فلتين منفصلين عن بعض اما اذا لاحظت ان زوجتك عندها حالة اكتئاب ...فالافضل انك تعرضها على طبيب نفسي لان فعلا ا حتما تكون تعاني من الاكتئاب ...وهذا شي مو عيب ...لان المرض النفسي مثل المرض العضوي ..اي انسان معرض انه يصاب به انت في البداية حاول انك تفصل تماما عن اخوك ..يعني مثلا يكون مجلسكم الرئيسي للضيوف مشترك ..لكن باقي البيت معزول وان شاء الله تعتدل نفسيتها وما تحتاج لطبيب وربي يسعدكم |
من حقها ان تسكن في المكان اللي يريحها لانها اذا كانت ليست مرتاحة بينعكس هالشي على معاملتها لك وعلى نفسيتها حتى مع عيالها
البيت ما فيه لا امك ولا ابوك علشان تقول ما اقدر اخليهم انت واخوك بتستمرون بهالبيت ما عندكم مقدرة مالية على النزلة اشترو ارض وبيعو البيت اللي انتو فيه الان وابنو فلتين دبلكس كل واحد له فلة مستقلة وجنب بعض اعرض الفكرة على اخوك وانت تخاف تنزل وتفقد ساعة الصدر والجمعة ففي هذي زوجتك معاها حق لان سعادتك الان مع اخوك وشكلك ناسي زوجتك لكن الحقيقة انه ما راح يتغير الوضع لو نزلت الا اذا كنت متحسف ان البيت كله يصير لاخوك فهذا شي ثاني والمفروض ان اهم ما عليك راحة زوجتك وعيالك وش حادها تتحمل عيال اخوك وصجتهم ليش تجبرها على وضع مو عاجبها الحين او بعدين فيكم فيكم بتتفرقون عيالكم بيكبرون وبيتغطون عن بعض وبيصير الوضع خطير فلازم تجلس مع اخوك جلسة مصارحة وتفكرون بمستقبل عيالكم وانا اتوقع ان اخوك وده ينفصل في بيت مستقل بس مستحي منك وكل واحد فيكم خجلان يفتح الموضوع وزملين من بعض وساكتين لكن لازم تبداها انت وتفتح الموضوع بطريقة زينة وش رايك يا اخوي نشتري ارض في حي جديد نبي دبلكسين ومن هالكلام صدقني بيفرح وزوجته بتفرح وحتى عيالكم بيفرحون ولا تسوون زي خالتي قماشة وتضنون ان العيشه في بيت واحد تولف بين قلوبكم وقلوب عيالكم بالعكس القرب الزايد يسبب المشاكل مثل ما انت شايف وانت واخوك اذا استقليتو ببيوتكم اجتمعو ان شاء الله كل يوم لكن لا تجبرون الحريم على الجمعه مره بالاسبوع تكفي |
لما قريت موضوعك تذكر طفولتي
شوف اللي يسلمك انا عشت ببيت فيه 3 عوايل...كنا حنا واخوان ابوي 2 واولادهم كان كل واحد له 3 غرف بس المطبخ واحد بس مافيه راحه تحس انك مخنوق وان احد مراقبك واحيان يصير فيه شد بالكلام و البزران يزيدون المشاكل ماااافي راحه ابد والحمد لله لما طلعوا من عندنا راحه عجيبه فقدر موقف زوجتك والحاله اللي تعيشها ومن حقها تسكن ببيت لوحدها او في نفس البيت ابني لها مطبخ صغيرون وصدقنيحتى لو كانت العلاقه طيبه بين زوجتك وزوجة اخوك..مااراح تكون فيه راح |
الله يعينها زوجتك
يا اخي الوحده اذا مااخذت راحتها ببيتها وين بتاخذها؟!!!!!!!!!!!!!!!! واهم شي عند المراه المطبخ تبي تجرب اكله تبي تسوي حلى تبي تسوي لها سلطه نفسها بكيكه حتى لو باللليل تسوي اكله جت ببالها ولا اذا كانت حامل وش بتسوي... الله يعينها |
| الساعة الآن 01:46 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©