خطيبي ومشكلة الارق والحبوب المنومة ؟؟ افيدوني !!
 

جدا محتاجة لمساعدتكم

أنا إنسانة متملكة، يعني مكتوب كتابي وزواجي بعد شهر. كان قبل الملكة فيه فترت خطوبة قصيرة جدا حسب التقاليد وطلبت من زوجي يكون صريح معاي ويبلغني بكل شئ يخصه. بعد ماحسينا بالراحة وإتفقنا على أمور حياتنا تمت الملكة من شهرين تقريبا.

قبل كم يوم وبالصدفة البحتة، قالي زوجي إنه عنده مشكلة أرق مزمن من كم سنة إستلزم زيارة كم طبيب ووصفت له منومات وإستخدمها لمدة بس الحين وقف المنومات هذي لكن مازال يعاني من أرق فضيع.

أحيانا يحكيلي إنه أيام ماينام ويتعب نفسيا وجسديا بسبب الشئ هذا وتركيزه يخف كثير.

طبعا تضايقت كثير وخفت منه كثير. حاولت ما أبين له الشئ هذا ولا أعاتبه وقلت له نطلع لدكتور ونشوف الوضع وأنا بوقف جنبك وإنت الحين زوجي والمفروض أكون جنبك.

أنا خايفة كثير كثير كثير. أعرف الأرق لازم له مسبب وأحد مسبباته قد تكون إضطرابات نفسيه مثل الإكتئاب وغيرها وغيرها. هو يقولي ماهو عارف السبب، بس أنا مو مقتنعة. أكيد فيه سبب بس مايبي يقوله، مو معقولة توصف له منومات والأطباء مايعرفون السبب. خايفة يكون فيه خلل نفسي.

زواجي قرب وأنا حاسة بخوف بعد ماعرفت عن الأرق المزمن اللي عنده واللي أجبره ياخذ حبوب. كيف بعيش معه؟ كيف بيكون وضعه النفسي لما ماينام أيام وكيف بيكون وضعه الجسدي؟ يمكن عنده إكتئاب؟؟ يمكن ياخذ أدوية نفسية؟؟ يمكن ويمكن ومليون ألف سؤال.


ساعدوني، مو عارفة كيف أتصرف، أرجوكم ساعدوني.

حبيبتي نصيحة من اختك الل سبقتك ب8 سنين زواج يعني خبرة (بس لسه بدون مرتبة شرف)
المهم نرجع للموضوع بما انك مقبلة على الزواج خلي قاعدتك الصراحة فهي اساس حل كثير من المشاكل الزوجية بمعنى صارحي زوجك بللي يدور براسك من استفسارات وناقشيه فيها حتى يطمأن قلبك وتتضح الصورة

اما بالنسبة لموضوع الارق وقلة النوم انا سمعت في محاضرة دينية انو سببهما جوع النفس التي غذؤها ذكر الله والقران يعني علاج زوجك حبيبتي سهل ومتوفر عليه بقراءة ورد من القران كل يوم قبل النوم وعليه باذكار النوم وسنن النوم اللي اولها الوضوء ثم نفض الفراش والنوم على الجنب الايمن واذكار النوم وغيرها من السنن وان شالله قدامه العافية


وبعدين ان شاالله سحابة صيف وتمر وبعدين ان شاالله تكون مشاكل عزاب لكن بكرة بعد الزواج بتكون في مشاريع قبل النوم بتخليه ينام وهو واقف وانت وشطارتك والله يجمع بينكما على خير ولازم تطمنينا عليك

انا برأيي انه هذا الموضوع رح يختفي بعد الزواج حتى لو بدأ بالخفيف والخفيف
يعني شوي شوي يسير طبيعي
بعدين ليش الاكتئاب حبيبتي انتي وشطارتك بهالاكتئاب حطي ببالك يا انا يا الاكتئاب بباله
علشان كذا انتي خلصيه منه
وفقك الله
ومبارك مقدما وترى ماهي مشكله تخليكي تخافي
في رعايه الله

تسلمييييين ياعمري على ردك وبما إنك متزوجة ولمدة طويلة بعتبرك أختي الكبيرة إذا سمحتيلي. هاجسي المخيف إنه يكون مريض نفسي. لإنه قالي إنه ياخذ نوعين من الأدوية المنومة. أنا أحس مافيه طبيب بيوصف نوعين منوم لشخص واحد. يعني حاسة فيه دواء له علاقة بالأعصاب والأشياء النفسية والثاني منوم. المشكلة هو الحين مخبي عني أسماء الأدوية ومايخليني أشوفها ويماطل لما أقوله هاتلي تقرير عن حالتك، طبعا أنا قايلة له أبغى تقرير علشان خايفة عليك وأبي أتطمن وأبغى أخذ التقرير لدكتور ثاني علشان نتطمن على العلاج اللي أخذه لكن ماقلت له خايفة منك. يقولي ما أعرف أسماء الأدوية لإنها بالإنجليزي ويقولي أصلا وقف العلاجات وأنا أحس إنه ماوقفها ولسى موجودة عنده ويستخدمها.

حبيبتي فيه شئ حاسته يخبيه، فيه شئ له علاقة بوضعه النفسي.

أنا حجزت موعد عند طبيب مختص بإضطرابات النوم بس ماقلت لزوجي. بحاول أقنعه نطلع سواء للدكتور لإني أبغى أشوف كل شئ بعيني. أبغى أشوف الفحوصات وكلام الدكتور. لأخر لحظة أبغى أصدقه إنه مجرد أرق عادي بدون أي سبب نفسي، بس مو قادرة. لسى حاطة إحتمال الإختلال النفسي وطبعا صعبة كثيررررر أرتبط بشخص مختل نفسيا لسببين. الأول إنه خبى عني لأخر لحظة وقالها في لحظة وبالغلط والسبب الثاني ماني مجبورة أرتبط بشخص كذب علي وفوق هذا مو طبيعي نفسيا.

نجي للناحية الدينية، ماشاء الله عليه ملتزم. راعي صلاة وطاعة وأذكار ودائما يوصيني بالأمور هذي. الحين بديت أتشكك، وين الدين اللي يخليك تخبي مسألة مهمة مثل هذي عني وأنا أيام الخطوبة محلفته أكثر من مرة يقولي كل أموره مثل ما أنا كنت صريحة وبينت كل عيوبي. تدرين أفكر أوقف تجهيز للزواج لحد مايبين لي الموضوع. ما أحد من أهلي يدري عن الموضوع هذا غير الوالدة، سئلتها شورها، قالت لا تتزوجينه لما تتأكدين إنه طبيعي نفسيا وماعنده خلل معين وطبعا الوالدة حريصة ما أحد يدري غيري وغيرها وأنا أثق فيها كثير.


وش رأيك، أطلب منه نروح للموعد؟ تحسين إنه شكلي بيكون غلط وأنا أقوله الكلام اللي قلته لك أو المفروض أبين له خوفي منه ومن وجود خلل نفسي؟؟؟

يابعد عمري الله يجزاك ألف ألف ألف خير ويجعلها في موازين حسانتك يارب

أهلا ياقمر

حبيبتي مو مشكلتي الأرق، عادي الأرق أزمة وتجي لكل الناس. مشكلتي إنه الأرق اللي مع زوجي مزمن ولسنوات ولما بديت أبحث في موضوع الأرق وأقرأ الأبحاث المختصة، الكل أجمع إنه لازم مسبب لهذا الأرق. سبب عضوي أو نفسي. أنا لو أعرف السبب برتاح وبتطمن بس المشكلة زوجي ينكر، يقول مافيه سبب ويقول إنه الأرق بدء من نفسه بدون أي مسببات.

مو معقولة بين يوم وليلة يجي أرق ويستمر لسنوات بدون سبب نفسي أو عضوي. من الناحية العضوية مو ملاحظة عليه شئ، بس النفسية، هي يمكن اللي فيها المشكلة واللي مخوفتني. أبغى أعرف سبب الأرق، أبغى أتطمن من الناحية النفسية. مو معقولة ببدء حياتي مع شخص وأنا حاسة إنه عنده مشكلة نفسيه لكن مو متأكدة.

فيه شئ مو واضح. أبيه يوضح. زوجي يمارس معي المماطلة حاليا، مايعطيني كلمة واضحة. يقولي الزواج مقلقني علشان كيذا ما أنام، علما بإنه قبل كيذا قالي إنه الأرق كان بادي معاه من سنين وحتى قبل مايعرفني. تخيلي موقفي، قبل كم يوم بس إكتشفت سالفة الأدوية والمراجعات الطبية المتعددة وباقي شهر على الزواج.

والله العظيم خايفة موت موت ولا أدري كيف أتصرف ولا أبغى أبدء حياتي بتدخل من الأهل وإلا أقدر أقول لوالدي إنه الشخص هذا عنده مشكلة مو واضحة لي والمطلوب يوضحها أو كل واحد يروح بحال سبيله.

الله يجزاك ألف خير

طبعا انت اختي الصغرى ولي كل الشرف من وجهة نظري ان اللي سويته للان عين العقل واحسن شئ لمن تجي تناقشيه بالموضوع احسن يكون وجه لوجه مو بالتلفون عشان المواجهة في كده امور احسن عشان تشوفي كيف بتكون ردة فعله من خلال ملامحه وتأتـأته وما الى ذلك واعرضي عليه الذهاب للطبيب من باب الخوف عليه وانو رأيين احسن من رأي وقولي له ايش احنا خسرانين واطلبي منه انو يجيب ادويته عشان يشوفها الطبيب وانت طبعا شوفيها وسجلي اسمها واستشيري فيها طبيب نفسي ولو بالهاتف وشوفي ايش يقولك يمكن خطيبك يسوي هذا كله موبقصد يخبي لكن من باب الخجل يمكن الموضوع هذا مسبب له احراج ولا تبيني له انك قلتي لامك الى ان تشوفي رده بالنسبة للذهاب للطبيب
ولا تجيبي سيرة الخلل النفسي امامه اقترحي عليه لمجرد الخوف عليه فقط ونشوف بعد كلامك معاه ايش بيصير ومنتظرة تردين علي لا تخليني قلقانة ولكل حدث حينها حديث
والله ياااااااااااااااااااااااااااارب تكون مجرد مشكلة بسيطة ونسمع الخبار الحلوة

ياحبيبة قلبي أنا لي كم يوم وأنا أقوله قلقانة عليك. هو من النوع البارد جداااااااااااااااااااااااااااا لأبعد الحدود. يعني مجرد بيقولي لا تقلقين والحين أنا مشغول في التجهيز وإنتي كمان وخليها لبعد الزواج نفضى للموضوع هذا. علشان ما أظلمه هو كثير تحمس إنه يروح لدكتور وسئلني عن أطباء وطلب أراسل واحد منهم، يعني هو مو معارض الروحة بس بيخليها لبعدين لما يفضى، يعني بعد ماتطيح الفاس في الراس وأكون في بيته. وهو لحد الحين مايدري إني أبغى أروح معاه. وكمان واعدني الأسبوع هذا يجيب لي تقرير عن حالته، بس أنا مو واثقة في الكلام هذا. مو واثقة إن التقرير بيوصلني إلا لما أكون صارمة أكثر من كيذا وواضحة. أنا بديت أعرف لشخصيته وبديت أعرف هو قد إيش بارد ومطول البال فوق اللازم. أنا الحين موضحة له إنه إهتمامي على صحته وبس علشان كيذا هو يطمني بالكلام لكن لما أكون واضحة وأقوله برضو خايفة من مستقبلنا سواء، يمكن يتحرك ويمكن يزعل وتكون ردة فعل.

أنا أفكر أقوله كل اللي في راسي بصراحة. بقوله شوف بصراحة من أهم مسببات الأرق ضغوطات نفسية أو غيرها ويمكن الأطباء اللي فاتو ماعرفو يشخصونك كويس علشان كيذا وعلشان أنا زوجتك من حقي قبل ما أنتقل لبيتك أتطمن من الناحية هذي علشان أعرف كيف أتعامل معك لإنه الشخص اللي عنده ضغوطات نفسيه يبغى له طولة بال واللي عنده أرق مزمن برضو يبغى له طولة بال وأنا أبغى أعرف وضعك. أبغى أعرف سبب الأرق هذا. يهمني السبب أكثر من الأرق.

يعني أفكر أعطيه الحقيقة على بلاطة لو زعل وعصب أو حتى لامني وقتها أنا بلومه لإنه ماقالي الموضوع هذا في البداية ولو مازال مطنش ومبرد أعصابه، لازم أتأخذ خطوة أقوى من كيذا وأشد أكثر وأقول نأجل الزواج لما أتطمن.

برضو علشان ما أكون طلعت الجوانب السيئة وبس، هو إنسان إجتماعي وملتزم دينيا ورزين قدام الكل إلا قدامي، يفقد كل إتزانه وتفكيره. تخيلي من أول يوم شافني فيه وهو مو رزين معاي ولما يجي أحد معنا، تنقلب شخصيته ويتحول لثقل. أنا أقول يمكن كيذا الرجال مع زوجاتهم لما يختلون فيهم.

رأيك ياعمري يهمني، بجد يهمني.

أهلا طبيبنا المحترم

المشكلة زوجي يرفض تمام تدخل الأهل في أبسط أمور حياتنا فمابالك بسالفة مثل هذي. حتى لما قالي الموضوع، أول نقطة قالها لي أنا واثق إنه أهلك ماراح يعرفون وأمورنا تبقى بينا.

هو مايحبذ أبد يكون بيني وبينه أي شخص ثاني وبالنسبة للطبيب اللي أنا حجزت معاه موعد، زوجي هو اللي كان يسولف لي عنه ويقولي يثق برأيه لكن مايعرف وين موقع عيادته. وأنا بحثت وجبت الموقع وحجزت الموعد. قلت له إني حصلت عيادة الدكتور وقالي لما يفضى يشوف الموضوع. لسى مايدري إني حاجزة موعد.

لسى متفاجأة كيف خبأ عني الأمر هذا خصوصا إنه من الأساسيات وكان متعبة لسنين وراجع كم طبيب وأخذ أدوية ومنومات مختلفة. بجد صدمة، قبل الزواج بشهر بس أعرف كيذا. الله يسامحه ويارب تكون شكوكي غلط بس هو اللي أجبرني أشك فيه لإنه خبأ عني.

الله يجزاك ألف خير على ردك أخوي

برضه حبيبتي اللي بتسويه عين العقل الحزم في العلاقة لازم منه في مثل هذه الحالة وخاصة عندما يكون الشخص لا مبالي الخطوة اللي جاية لازم تصارحيه بحقيقة مشاعرك وهو خوفك من الوضع بعد الزواج موقبل وقولي له انو راح تروحي معاه للطبيب عشان تعرفي اكثر عن حالته وكيف ممكن تتأقلمي معاها بعد الزواج ومن هذا الكلام اللي ممكن تدخلي فيها خوفك اذا كان الموضوع معدي كبعض الحالات مثل الضحك والتثاؤب او ان يكون وراثي واقنعيه انو من حقي اطمن على اولادي وخلي اهلك واهلك اخر شئ بعد ما تستنفذي كل الطرق وتلاقي مافي نتيجة
والللللللللللللللللللللللللللللللللللله يكون بعونك ويقويك ويصبرك ويلهمك التعابير الصحيحة وانت تكلميه

تسلمييييييييين ياعمري وبإذن الله مافيه إلا العافية. بإذن الله ربي ماراح يخيب إستخارتي وبإذن الله شكوكي تطلع غلط والله يكتب اللي فيه الخير.

حبيبتي فراولة طمنيني على اخر اخبارك وان شاالله اخبار حلوة دايما لا تقطي وتخليني اقلق

أنا أرى والله أعلم أن الكلام المقتبس أعلاه هو الصحيح ، وتوكلي على الله

وخليكِ حازمة ، ترى الموضوع موضوع عمر مش يوم أو يومين.

ولعلمك بعد الدخلة راح تتغير المعاملة منكم أنتم الأثنين (أنتِ ستزيدين رومانسية وهو سيزيد روتينية وسيظهر أسوأ المستخبي (وهذا كلام عام) )


أختي هذا الموضوع أهم موضوع في حياتك كلها

ومابني على باطل فهو باطل (أقصد المماطلة وخاصة أنك حلفتيه بالله ) وصدقيني لو كانت أدواركم بالعكس (لو كنتِ أنتِ المماطلة شوف أيش كان راح ياخذ عنك فكرة سيئة جداً وسيصبح شكاك )

وأنتِ ماشاء الله عليكِ عاقلة ورزينة جداً بالنسبة لواحدة مقبلة على الزواج

فالله يوفقك لما يحب ويرضى .

إن شاء الله حبيبتي بطمنك. حاليا مهدية الموضوع لغاية ماتهدء أعصابي شوي وأكون قادرة على مواجهة الموقف لإني ما أبغى أتعامل مع الموقف بعصابية وقلق ظاهري قدامه والهدوء هو أحسن في حل المشاكل.

تسلمين حبيبتي

طبيبنا المحترم.

قبل إتمام الخطوبة وقبل عرض الموضوع من قبل والدي علي، ذهب والدي لمكان عمل زوجي وسئل عنه وقابل مديره وقابل زملائه وسئل عنه والكل مدح في أخلاقه. بالإضافة لهذا، أرسل والدي شخص يسئل عن زوجي وعائلته في بلد إقامة عائلة زوجي والنتيجة كانت مرضية. وقبل أن تتم الخطوبة، جلس والدي مع زوجي أكثر من مرة وتحدث معه وقيمه حتى تأكد والدي حفظه الله إن الشخص مناسب لي وأخبرني والدي بالحرف الواحد بإنه أخذ مدة طويلة للسؤال والتأكد من أخلاقيات زوجي وإنه إطمئن بأجوبة الناس المختلطين فيه.

حتى ظاهريا، في حضور زوجي للزيارة لا يبدو عليه أي خلل نفسي غير اللهفة المبالغ فيها جدا جدا علي.

بإذن الله هذا ماسوف أفعله خلال هذه الأيام. مواجهة وطلب الذهاب سويا للطبيب لإني بصراحة بديت ما أثق في كلامه. صدقني لو كان مصارحني من البداية، يمكن الموضوع بيكون أهون علي شوي، يمكن مستوى خوفي بيكون أقل. ما أبغى أدخل بيته إلا والأمور واضحة لي ولا أبغى أتطلق علشان سبب مو واضح. مازلت أقول ورغم كل اللي حصل، هو شخص كويس كثير وفيه مميزات حلوة.

ألف شكر لك وبإذن الله ربي بيكتب كل خير.

اختي :

انا اريد الوالد يسال عن نفسيته مع زملاه ومع مديره وذلك عن طريق المدير

لان المدير اكيد يكون عنده خبر في هذا الامر لان النفسية تكون ظاهره ولا يستطيع اخفائها .

أخي المبجل

أولا الوالد لا يعلم أي شئ عن الموضوع. ثانيا وهو الأهم لو كان المدير شايف مشاكل أو إضطرابات نفسية في زوجي، كان تكلم لما سئله الوالد من أول مرة. يعني لو كان المدير يخاف الله، كان قال للوالد بصراحة الرجال مو مضبوط نفسيا. لكن اللي حصل إنه المدير مدح فيه كثير وقال هو كويس جدا وماعنده مشاكل غير في الإلتزام بالمواعيد وهذي أنا شخصيا لاحظتها فيه. وزوجي نفسه يمدح في المدير حقه ويقول حقاني كثير ويقول الحق.

ألف شكر أخوي بس ما أحس إني أبغى أدخل الوالد في المرحلة هذي ولا أحس إن سؤال المدير بيفيد لإنه سبق أن حصل السؤال هذا.

شكرا روز

حبيبتي فراولة من بعد اذنك ردا على كلام اخونا الفاضل الطبيب الذي والله اعلم لا يعيش في الدنيا اللي احنا عايشين فيها او انت طيب وتخاف عل بنات الناس ولو جا احد سألك عن واحد يريد الزواج من معارفك بتقول الحقيقة والله يجعل الرجال كلهم زيك لكن للاسف احنا بزمن الكل بيقول نفسي نفسي يعني اذا راح الوالد 100 مرة وسأل راح ينقاله نفس الكلام انو طيب وانو مصلي وانو وانو 00000000000000000000 الخ وكثير من الحيان ما يكون بالمتقدم للزواج نصف المواصفات واذا كان فيه مرض وكان اللي حوله يعرفوا ما راح يتكلموا والله اقول الكلام هذا من واقع تجربة زوج وحدة من زميلاتي المقربات جداااااااااااااااااا مريض بالسكري وتقدم لها وما تركو مكان ما سألو عنو حتى مديرو اللي كان عندو علم بالمرض ولا احد اتكلم ولا قال ولا اكتشفت الا بعد الزواج وللعلم ما اتكلم ولا قال لا هو ولا اخواته حتى بعد الزواج وهي اكتشفت عن طريق الصدفة
حبيبتي فراولة الله يشفي لك خطيبك وتكون المسألة مجرد ارق والسلام

لا والله ابدا انا اسفة اخي الفاضل بس لو قريت ما كتبت قلت يا ليت كل الرجال مثلك طيبين لاني انا بعد كل اللي سمعته ومر علي صرت احس ان السؤال عن العريس اصبح تحصيل حاصل

كلمتة وصارحته بمخاوفي وطلبت الذهاب للطبيب المعالج علشان أتطمن عليه وعلى وضعنا. حاول يغير رأيي لكني أصريت. وافق ولكنه سوف كعادته وقالي لما أفضى. وأنا سكتت.

إستغليت معارفي وعلاقاتي وقدرت أوصل لطبيبه وكلمته. للأسف فيه خلفيات نفسية للموضوع. للأسف كذب علي ماكان ياخذ حبوب منومة، كانت مهدئات نفسية. للأسف الطبيب اللي كان قايلي إنه طبيب أعصاب ماكان طبيب أعصاب، كان إستشاري أمراض نفسية.

طمني الدكتور وقال وضعه بسيط جدا ومجرد قلق وتوتر مسببه له الأرق لكن اللي خلاني أستغرب هو إنه أحد الأدوية الموصوفة كانت مضادة للإكتئاب والثاني مضاد للقلق. خليط دوائي نفسي كان يستخدمه زوجي اللي المفروض أحس بالأمان معاه وقبل الزواج بشهر بس أكتشف كل هذا. الدكتور قالي الوضع أسهل مما تتصورين لكن أنا مشكلتي بالكذب اللي حصل، المراوغة، والأهم مو سهل التعامل مع شخص عنده إكتئاب وقلق.

للأسف أحبه وللأسف مازلت أشوف فيه مميزات حلوة لكن لا يمكن أنسى الكذب والخداع اللي حصل ومازلت أسئل نفسي ياترى لو قلبنا الأدوار كان غفر لي؟؟

مجروحة أنا وحاسة بعدم الأمان وحاسة بقوة الصدمة ومو عارفة كيف أتصرف. قبل قلت بتطلق منه بس بعد كلام الدكتور ولما قالي مشكلة بسيطة وماتحتاج أخاف منها بديت أتراجع عن قراري.

أدعولي.

اخيتي خذي وقتك بالتفكير

اولا استخيري الله سبحانه

ثانيا اجلي الزواج .. و شوفيه و اختبريه
و من الاحسن انك تكلمي ابوكي بما عرفتيه عشان تعرفي رأيه

الله يوفقك للي فيه الخير ان شاء الله

أنا بديت أكلمه من أربع أشهر بالتمام والكمال ومالاحظت شئ. يعني لو أجلت الزواج شهرين، ثلاثة أو حتى أربعة، ممكن أعرف شئ ثاني؟؟ أنا ماعرفت غير منه لما هو قالي لكن شخصيته معاي مرحة.

المشكلة الكل يعرف بوقت زواجي وحجزنا القاعة. حاليا مكنسلة كل التجهيزات لإني ما أدري كيف أتصرف. متخوفة أقول لأبوي لإنه أبوي يقلق كثير وحتى أمي ماشجعتني أقول لأبوي. والقهر مازلت أبغى أكون بنت أصول معاه ولا أبغى أدخل الرجال في السالفة وإلا كان قفلت جهازي وقفلت أي وسيلة إتصال معه وخليت أبوي يكلمه ويتفاهم معه ويقوله ليش كيذا ويقوله تعال معي لأكثر من طبيب ونتأكد سوى إذا كنت تبي نكمل الزواج؟ بس للأسف أقولها للأسف أنا بنت متربية ومايهون علي أدخل الرجال في سر كشفه لي زوجي لإني وقتها بحتقر نفسي لإني خنت الأمانة اللي أعطانيها زوجي وخنت ثقته وفضحت سره.

الله يعينك ..

حبيبتي طالما الدكتور طمنك ماراح يكذب ماله مصلحة وانت سوي نفسك ما سألتي من وراه يعني اصري انك تاخذي راي طبيب تاني عشان لا يشك من سكوتك عن الموضوع
بعدين بالنسبة لتجهيزات الزواج لا توقفي شئ طالما انها جات بسيطة ومن جهة الكدب والله ما احد على وجه الارض ما سواها وفي اشياء اكبر للاسف الامن رحم ربي واحنا بشر غير معصومين عن الخطأ