|
زوجي يسافر كل سنة
السلام عليكم
هذا اول مره اكتب فيها واتمنى المساعده والرد بسرعه مشكلتي هى ان زوجي كل سنه بيسافر خارج المملكه مع اصدقائه بهدف المتعه والتغير والحريه المطلقه صار لنا 11سنه متزوجين وعندي ولدين ومومقصره معه في شيء وهو يقسم بالله على اني اروع واجمل واطيب امراة في حياته بس انا مو صدقته وهومومقصر معي بشيء سفر يسفرنا ومصروف وبيت وخرجات وتمشيات وكلام حلو ومعامله حسنه بس حكاية السفر هذا يسوي لنا مشكله لاني حاسه انه يخوني لانه مره صادف شوفة صور ومقاطع فديو في الجوال هو كان ناسي مايمسحه مع بنات وهو كان يقول لي علىالاشياء كان يسويه قبل ازواج وانا تعبانه حيل ويصير بينا نقاش حاد وزعل بس نطلع بدون نتيجه وهو لي في راسه بسويه رضيت ولا زعلت وش الحل في رايكم تم تعديل العنوان ليتناسب مع القسم |
,
, أسأل الله العلي العظيم أن يهديه .. هل أنت متأكدة من خيانته ..؟؟ إذا كنتِ متأكدة فعليك بــ : بأن تخوفيه بالله .. قوليله أنت وراك عيال وبنات والله أن الله يبتليك فيهم .. حاولي تصارحينه أكثر قوليله أنت تخوني ولا لأ ؟؟ ثم إبدئي معه بالوعظ والتخويف بالله .. أسأل الله العلي العظيم أن يهديه ويزيده بالإيمان .. , , |
مشكور يابوفلان على الرد
والله اني حاولت معه المستحيل وكوني متاكده هو يقول لي تصدقين كل الشباب كل واحد معه صاحبته انا لا بس ماقدرت اصدقه لانه رضي على نفسه اشرب وهوحرام بيهون عنده كل منكر وخبيث |
اختي الله يعينك ..
ما لك الا الصبر والدعاء له بالهدايه والصلاح و تخويفه بالله .. هي الخوفه انه تكون خيانته جسديه .. يعني الخوف من الامراض والعياذ بالله .. لكن هل انت عندك دليل قاطع على هذه الخيانه ..؟؟ دام انه قايم بكل واجباته و معطيك كل حقوقك الحل ان اذا حان وقت سفر لا ترتبين له الشنطه و اذا سافر لا تتصلي و تطمني عليه واذا رجع من السفر اتستبقبله عااادي جدا كأن رايح العمل الصبح وراجع الظهر .. وربي يهدي زوجك .. |
وعليكم السلام ورحمة الله وبركاته طبعاً صعب جدا ماتمرين به ولكن عندي إقتراح اسأل الله أن يكون صائب طبعاً أنتِ على مدار 11 سنة لم تستطيعي منع زوجك من السفر ويحدث بذلك مشاكل وزعل بينكم ثم بإتصال منه وبكلام معسول ينسيكِ الزعل وبعد عودته تسامحيه وتعود الحياة تسير حتى يحين موعد سفره العام الثاني وتتكرر نفس المعاناة....أليس كذلك؟؟ ولكن لاحظي بما إنك لم تستطيعي منعه أبدا فسأقترح عليك إقتراح صعب ولكن لابد أن تطبقيه فهو سيسافر سيسافر إذا أراد الله لذا دعيه هذه المرة يسافر بكرامتك وانتِ سعيدة إذا أراد السفر كالعادة هذه المرة فردي عليه بإبتسامة وموافقة وقولي له بما إنك تسعدنا فأنا أتمنى لك السعادة وان تفعل ماتحب وسأظل أدعوا الله أن تسعد في سفرك لأني احبك ولأني واثقة أنك إنسان تخاف الله عند سفره استودعيه الله أمامه وقولي اسأل الله أن يحفظك من كل شر ويبعد عنك كل سوء ضعي في وسط ملابسه رسائل حب يجد في كل مرة رسالة وفي نهاية الرسالة تذكير ونصيحة بأسلوب رائع وضعي كتيبات خفيفة بها قصص وعظية تابعيه بالمسجات الرومانسية وفي نهاية كل مسج عبارة تذكيرية مثلاً (اسأل الله الذي يراك الأن ولاأراك أن يحفظك وتعود إلى أحضاني) وأولاً وأخيراً لاتنسي الدعاء له في أخر الليل بأن يهديه الله ويكفيه شر أصدقاء السوء وأرسلي لزوجك في حينها مسج وقولي ( أنا الأن على سجادتي اصلي الوتر ومن حبي لك أخصك بالدعاء وانا ابكي و أدعوا الله أن يجعلك ممن يدخلون الجنة بغير حساب) هكذا يااختي راسليه بنصيحة مبطنة وليست مباشرة وشوقيه للعودة وقولي أنا أنتظرك بمفاجأة وأعملي له حفلة رومانسية خاصة تستقبليه بها وحاولوا ان تكون لكم سفرة خاصة بدون الأولاد تكونوا فيها كالعرسان وتفاجئيه بإبداعاتك فيها اسأل الله العظيم رب العرش العظيم أن يهدي زوجك وأزواج المسلمين لما يحب ويرضى ويغنيهم بالحلال عن الحرام وأن يبرد قلبك بصلاحه |
ام جمانه الله يسعدك كل اللي بغيت اقوله قلتيه جزاك الله خير
اختي gmas اكثري صلاة الليل والدعاء صدقيني مالك الا ربك عشان يهديه ويبعد عنه الصحبه السيئه |
انا مع كلام الاخت ( ام جمانه ) 100 %100
لان النصح المباشر احياناً ينفر الزوج وفي هذه الطريقه تستطيعين ان تنصحيه واهم شي الدعاااااااء والله يصلحه ويهديه ويوفقك معاه يارب |
اكره شي في الزواج الخيانة
هو يقولك كذا علشان يكسب ثقتك فيه بس الله اعلم شيصير لم يسافر ليش يصر على السفر قولي له انك ماترضين يصاحب ناس غلط لأن اكيد بيتأثر فيهم وبعدين اذا كان يسوي شي غلط هذا يسبب امراض مثل الايدز وهو منتشر هالفترة وممكن ينقل لك العدوى بعيد الشر عنك هذا فيه خطر على حياتكم |
طيب ليش ماتسافرين معه أفضل
المشـــــــكلة إنك عودتيه على السفر لوحده وهذا شيئ مو بطيب |
أسأل الله العلي العظيم أن يهديه ..
ويسخره لك امين يااااااااااااارب ويبعد عنه بنااااااااات الحرام امين يااااااااارب |
الله يكون في عونك حاولي انتي تغيرينه
|
يا اختي ..
خليه يسافر وش المانع اذا سافر؟؟ دامه مو مقصر عليكم ودامه يسافر معكم .. ما اشوف اي مشكله لان الرجل مو زي المرأة لكن المشكله في الخوف من خيانته.. زي ماقالو الاخوات مالك الا الدعاء .. وانا عندي حركه يمكن تنفع معك خليه يتوضا وحلفيه على المصحف ان سفراته شريفه من اجل الترويح عن لنفس مو عشان شي ثاني.. والله يخليه لكم |
اشكر كل من رد على قضيتي وحاوال مساعدتي وصدقوني كل شيء يخطر في بالكم من حلول سويته مره سافر سويت له حركه في كل جيب من الملابس حطيت بطاقه رومنسيه وهو مسافر نبهت عليه يفتش ملابسه زين وكان كل مالقي بطاقه يكلمني وكل مايرجع اكون مغيره في شكلي ولبسي وصبغة شعري ومجهزه له جلسه رومنسيه ومجهزه له الحمام
بس صدقوني اكون مجاملة من غير نفس ماتقبل منه شيء رغم اني احاول ماابين له شيء بس هالمره الشيء الوحيد اني مادقيت عليه ولا كلمته بس ارسل له رسائل شوق وغرام وماارد على مكالمته واحس اني مليت صار لي 5ايام من يوم راح وانا اتعذب من الانتظار ومن الدعاء وصدقوني اسافر معه في الاماكن الي يحبه انا والاولاد بس حكاية السفر لوحده لبدء منه وماادري وشلون اقابله هالمره |
اختي الكريمة :
بحكم اني رجل فارجوا ان ترعي لي سمعك انتي وجميع الاخوات اللاتي يشكين من نفس المشكلة وانا سأتكلم من منطق رجل ومجرب فارجو ان افيدكم ان شاء الله . قبل ان اذكر الاقسام اقول ان كل امراه تعرف زوجها جيدا هل هو رجل مضبوط ام لا . # - اقسام الرجال في السفر : انا اقسم الرجال الى ثلاث اقسام : الاول : رجل يحب السفر للسفر اي يحب الاكتشاف والتعرف على المناطق والمدن والناس وهذا يعرف من عدة اشياء منها كل سنه يسافر الى دولة جديدة . يحب برامج السفر والسياحة التي تاتي في الفضائيات .ويحب قرائة الكتب السياحية هذا النوع في الغالب يكون باذن الله بعيد عن الشر والمحرمات . اقول في الغالب ثانيا : رجل يسافر الى دول محدده ثلاث اربع دول (من غير قصد تجاري)ولولا انني اخشى ان اجرح احد من الاخوة والاخوات من تلك البلاد لذكرتها دولة دولة ولكن الاغلب منكم يعرف هذه الدول . هنا اقول ضعي علامات استفهام ويجب ان تكون المرأه حازمه معه وبشده خاصتا اذا علمت ان اصحابه اصحاب سوء وتحاول منع زوجها بشتى الطرق . وبعض الاخوات تقول وجدت في جواله صورته مع هؤلاء الساقطات . وقد شاهدت اشياء مما يدمي والله القلب اما ان اواجههم في السوق سكارى يترنحون او اجد سياره سعوديه فيها شباب سعودييين او خليجيين ومعهم من الساقطات وغيرها من المناظر المخجلة ان تذكر , وما اسمعه اكثر . القسم الثالث : رجال يسافرون الى دولتين او ثلاث ويذهب يتمشى ويتزوج من تلك الدولة . وهذا وان كان تصرفه خاطئ الا انه اقل من القسم الذي قبله .(وفي نظري انهما سواء لانه قد ينقل مرض لزوجته ) . هذا باختصار شديد جدا . هذا ينطبق على الاغلب وليس الكل واولا واخير كل امرأه تعرف زوجها جيد واذا كان غير منضيط سوف يفضحه الله بمقطع في الجوال او رساله او اتصال والله الحافظ . واسال الله ان يحفظ شباب وبنات المسلمين آمين |
اشكرك يالطيب على المشاركه معي
وصدقني اني اعرف زوجي زين والدول الي يسافر لها وهي دول معينه يمكن فهمت على بس وش الحل وشلون اقابله هالمره رغم اني هالمره غير من يوم راح ماكلمته ولارديت على مكالمته اتمنى كل من يقرا الموضوع يشاركني وينور على والله يعطيكم العافيه |
ما فيها شي ما دام واثقه فيه
اهم الشي الثقه بين الزوجين يعني لو بيسافر من وراك بتدرين اكيد لامنتي داريه اهو قاعد بقولك ويبيك تثقين فيه ترا الشخص المتزوج ويحب زوجته تراه فيه اشياء كثيره تمنعه وانتي الحمدلله منتي مقصره معاه |
| الساعة الآن 11:43 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©