|
أخت زوجي مطلقه وجاءها عريس ؟ وأبغى مشورتكم في كلامه
أخواني الكرام
أبغى مشورتكم في شئ محيرني ..أخت زوجي كبيره عمرها45 سنه مطلقه من 4 سنوات جاها عريس عمره 48 سنه وهي عندها بنات وأولاد أكبروحده عمرها 24 سنه متزوجه وعندها طفلين ..وعندها بنت وولدين بالجامعه وبنت بالإبتدائي العريس المتقدم متزوج من زوجه أولى شرط ..شرط غريب قال إنه في بداية زواجه من أخت زوجي إنه مايستطيع يبات عندها علين يمهد لزوجته الأولى هودكتوربالجامعه ..وخايف على مشاعرزوجته وعلين يمهد للصدمه اللى راح تجيها بيخلي زواجه بالسرعلين تتحسن الظروف عكس زوجي الله يهديه يوم ملك على زوجته وأنا عرفت من الناس جيت واجهته قلت له يافلان إنت أتزوجت قال إيوه عندك شئ قلت طيب ليش ماقلت لي على الأقل ولاأعرف من الناس قال شئ مايخصك وإذا عجبك أهلاً وسهلاً ماعجبك أنقلعي الباب يفوت جمل ومن ديك اللحظه وأنا في حاله يرثى لها .. أمس تناقشت معه على موضوع خطيب أخته قلت له ليش فلان قال إنه ماراح يبات عند أختك بداية زواجه منها ..لأنه بيراعي مشاعرزوجته وذكرته مافعل بي عندما بكيت وقلت له ليش أتزوجت علي من باب إن دمي محروق قال أنا حروبالعكس راح جاب صك الزواج وقالي شوفي أتزوجت عليك غصب عنك قمت من القهرقلت هات أشوفه قام مسكني وحط رأسي بالأرض وحط رجله على رقبتي وقال أتزوجت عليكي ورجلي فوق رقبتك وحط الله يكرمكم الشبشب في فمي وخلاني أموت قهروأحزن بشده ..ومع ذلك أكرمت زوجته وعاملتها كأخت لي ولكنها خبيثه زيه ماتمرفيها معروف..وزوجي عمره ماراعى مشاعري ولايحسب حساب لزعلي ..ومتى يحتاج لي لمن يضارب معها وبس إخواني هل ماقاله العريس صحيح إنه ماراح يبات عندزوجته الجديده منعاً للمشاكل وللمعلوميه أخت زوجي دي بالذات من ساعدت زوجي أن يتزوج علي وكمان كانت عندما تسمع أي شئ عني وعن مشاكلي مع زوجي بعد زواجه تتشمت في وتقول أحسن تستاهل روعه اللى يجيها والله مكذب عليكم أتمنى ربنا يسمعني فيها لأنها حقوده وحسوده علي وتفرح لأي شئ يحصل ..وكلكم عارفين إني صابره وأكله الذل والإهانه بس عشان خاطرعيالي يكبروا وأشوفهم بأحسن حال أتمنى مشورتكم |
حسبي الله ونعم الوكيل
ماعاد فيه رجال فى هالزمن والله يا أختى من قهرى مانى عارف وش ارد عليك الله يفرج همك ياشيخه قولى امين |
والله حبيبتي ماادري وش اقولك صراحة انصدمت بقسوته ومعاملته لك وعلى كذا مارحتي لاهلك ولا زعلتي؟؟؟؟؟؟؟؟؟؟؟؟
حبيبتي بكيفه وبالف طقاق يتزوج اما انه يحط الشبشب بفمي ورجله على راسي لا والله يخسى بس ماشاءالله عليك بنت اصل ومحترمة وصدقيني المعروف اذا ماشفتيه في الدنيا ماراح يضيع في الاخرة ولاتندمين انك عاملتي زوجته معامله حلوة ولا اخت زوجك اهم شي انك مااذيتيهم وفي النهاية كلنا راح نموت وماتبقى الا اعمالنا بكره اذا ماتت بيقولون الحمدلله راحت وريحت اما اذا كانوا ماشافوا منها الاكل خير بيقولون الله يذكرها بالخير وراح يدعون لها ويابخت من نام مظلوم ولا نام ظالم حبيت اخفف عنك شوي الله يعوضك بعيالك ويسخر لك زوجك ويسعدك في الدنيا والاخرة |
تفاجئت كثيرا بالموضوع
لم اشا الخروج بلا ترك دعوة بان يهدي الله زوجك الى سواء السبيل وان يصبرك وكل مظلومة خالص تقديري هذا ما لدي حقيقة |
هلاوغلافيكم أخواني الكرام
جرح الصراحه ترف صاحب الظل الطويل أشكركم عميق الشكرعلى دعواتكم بس أبغى أسألكم هل ماقاله خطيب أخت زوجي صحيح لأنه طلب عدم البيات عندها في أول الأمر ..أول الزواج علين يمهد لزوجته الأولى أليس فعله هذا عين العقل حين يراعي الرجل مشاعرزوجته خاصة وقت صدمته لها بالزواج من أخرى ... وهل فيها شئ لوحسب حساب لزوجته وأم أولاده أنا عن نفسي أشوف تصرفه صحيح بس والله مكذب عليكم خايفه عليه وعلى بيته من أخت زوجي لأن فيها خبث عجيب ماتحب الخيرلأحد وتحسد كل واحد في نعمه |
والله اعجز اعبرلك من الصدمه
بس اذا انتي صغيره وما عندك اولاد كثير وش الي مصبرك عليه؟ بس ماشاء الله عليك نادر حريم في هذا الزمان بصبرك |
الله يعينك روعه
انا ملاحظه اهتمامك بمشاعر اخته اكثر من اهتمامك بإهانة زوجك كيف تخليه يحط رجله برقبتك وشبشبه بفمك لاحول ولاقوة الا بالله احنا وين احنا ولا اليهود .... الله يعينك كله ولا الاهانه ... وتصرف زوج اخته انه ماقال لزوجته الاولى مافيها شي انا رغم طليقي لما تزوج علي بالعكس راع مشاعري وجاب لي هديه وفرش لي البيت سيراميك ... ويارب لك الحمد |
اتوقع والله اعلم بان الخطيب ما قال هالكلام الا ليجرب نفسه وهل تصلح له هالزوجة (قصدي الزواج الثاني)
اذا مستقر ومرتاح بيعلن بنفسه وقلبه مرتاح واذا زعلت زوجته الاولي وهي اهم مليون مرة من زوجته الثانية بيطلق بسكات ولا كأن صار شيء وبالنسبة لزوجك اتمني منك تقومين بالليل وتصلين ركعتين وتختمين القرآن بنية محبة الزوج والاستقرار العاطفي وربي ما يردك ابداااااااااااااا كوني واثقة وحاولي قدر ما تقدرين تبتعدين عن المشاكل وعن زوجته الثانية وكل ما راح زوجك عندها غيري في ترتيب بيتك واشتري ملابس جديدة تغير من شخصيتك وكأنك انسانة ثانية وبما انك احتكيتي بزوجته الاولي شنو شفتي فيها من طبايع احلي منك حاولي تغيرين من نفسك اولا علشان نفسك وثانيا علشان يستقر بيتك |
الله يصبرك ويفرج همك
وربي اكتب وانا في قمة قهري ياقلبي ليش تقبلي على نفسك الاهانه ليش تربي اولادك في جو اهانه وذل والله بكره نفسيتهم حتتحطم حتى لو وصلو لاعلى المراكز مااعرف ايش اقولك غير حسبي الله على زوجك اللي انعدم من الانسانيه والرجوله |
اقتباس:
أخي بدوه هودا الكلام الصحيح أنا قلت كدا لوإني بالأول رأيت إن كلام الخطيب عين العقل إنه يخبي على زوجته الأولى ويراعي مشاعرها ولكن لوزعلت وطلبت الطلاق أوحتى لو رمت أولادها له راح يفكربعقل ويشتري راسه وممكن يطلق أخت زوجي وهادا الشئ إللى أنا حاسه فيه ومتوقعته والله أعلم والله أنا ماأحب الشروالسوء لأحد بس أخت زوجي دي كتيرأذتني وهي ماساعدت في زواجه وهي من خطبت له هذه الإنسانه انا الأن مشتريه دماغي ومابأحتك مع زوجة زوجي التانيه للمعلوميه أخي أنا زوجه أولى والله يصبرني إخواني الكرام اللى ردوا بارك الله فيكم وفي ردودكم ودعواتكم إخواني حاولت أترك البيت وأطلق بس حسيت إني متمسكه بعيالي وهم كمان متمسكين بي ويقولوا ماما عيشي عشانا الله يرزقني الصبريارب |
اختي بصراحه اول ما قرات الموضوع مقهووة على اللي سواه زوجك فيك وليه خليتيه يسوي فيك كذا
والله اني شابه نار من كلامك ابغى اعرف ليه يعاملك كذا و ليه اخته تكرهك مع انك تفكرين فيها اختي الله يصبرك على زوجك ويحنن قلبه عليك وعلى عيالك اللهم ضع في قلبه المودة و المحبه لاختي روعه و صبرها هذا ما لدي و لكن اعذريني اختي على كلامي لاني منفعله من اللي قراته تحياتي لكي |
أختي الفاضلة روعة
الحمد لله على كل حال أحببت أن أدع لك راجياً رب العزة أن يجعل لك من كل ضيق مخرجا وأن يحنن قلب زوجك عليكي عليك بالصبر أختي وأرجو الله أن يرزقك من حيث لا تحتسبي |
وبشر الصابرين الذين إذا أصابتهم مصيبة قالوا إنا لله وإنا إليه راجعون . أولئك عليهم صلوات من ربهم ورحمة وأولئك هم المهتدون ) .
وجعل الفوز بالجنة والنجاة من النار لا يحظى به إلا الصابرون ، فقال تعالى : ( إني جزيتهم اليوم بما صبروا أنهم هم الفائزون ) وأخبر تعالى أن دفع السيئة بالتي هي أحسن تجعل المسيء كأنه ولي حميم ، فقال تعالي : ( ولا تستوي الحسنة ولا السيئة ادفع بالتي هي أحسن فإذا الذي بينك وبينه عداوة كأنه ولي حميم ( لا يلقاها إلا الذين صبروا . وما يلقاها إلا ذو حظ عظيم ) . اختى فى الله توجهى الى الله بالدعاء والاستغفار وحسن المعاملة لزوجك ولكل من حولك واحتسبى الاجر عند الله |
ماشاء الله عليك ترستال
|
ما شاء الله عليكِ يا اختي وعلى صبرك والله يعوض صبرك بخير ان شاء الله حرام المعاملة اللي تتلقينها من زوجك نسي انه احنا مسلمين وان الرحمة من اخلاق المسلمين الله يعوض صبرك وانك لميتي عيالك حولك بخير ان شاء الله صدقيني دوام الحال من المحال ما احد يظل على حاله والله يمهل ولا يهمل مصيرهم زوجك واخته راح يندموا على افعالهم الله يحنن قلب زوجك عليك ان شاء الله تبين نصيحتي اختي لا تتدخلين في موضوع اخت زوجك او تتابعينه خلك بعيده ولا تبينين لهم اهتمامك بالموضوع اهتمي بنفسك وباطفالك ولا تهتمين بزوجك خليه يحس انه فقدك اذا كل مرة رجع لك وخدمتيه واهتميتي فيه ما راح يحس بقيمتك لكن لازم تهمليه فترة عشان يراجع نفسه ويحس بغلطاته معك خليك قريبة من ربك واكثري من الدعاء وقراءة القران وان شاء الله ينفرج همك باذنه تعالى |
أهلاًوسهلاً فيكم أخواني
شاكره لكم دعواتكم الطيبه إخواني مشكلتي ماهي من دحين هي مشكله قديمه أم زوجي مطلقه من أبوه ..وهو أتربى عند زوجة أبيه وكانت زوجة ابيه إنسانه مجرده من الإنسانيه وبسبب قسوتها زوجي صايرقاسي وقال إيه يكره الحريم المهم لمن بغي يتزوج أمه الله يهديها أشارت عليه إنه يتزوجني لأن أهلي كانوا جيران لأمه فهوأعترف لي إنه ماكان مقتنع في بس مايبغى يفشل أمه رضي بالزواج مني رغم إني عجبته والحمدلله أنا جميله ومايعيبني شئ وأهلي ناس طيبين بس عندي أبويا شويه قاسي .. وأخته دي هي حاقده علي ليش أمه هي اللى زوجته لي وأصرت من سنين وقالت لي ياروعه لازم أسوي فيكي شئ وأقهرك إما أن أزوج زوجك أو تطلقي منه ..وحاولت محاولات كتيره إنها تطلقني منه بس كان زوجي يقول ماأبغى أطلقها عشان الأولاد وكانت تزن على رأسه وتقولوا أتزوج مافيهاشئ ..وفي نفس الوقت تجي عندي تقولي شوفي زوجك بيدورعلى زوجه ثانيه وكنا نوقع مع بعض أنا زوجي وتصيرمشكله بس تسمع بها تفرح ...نفسها دنيئه لأنها عدوه عيب زوجي الوحيد إنه يحب يعطي إذن للناس ..كان أول يعطي أذن لأخته دحين لزوجته يالطيف هادي أخته أطلقت بفضيحه ..ليلة فرح بنتها زوجها طلقها بالميكرفون قدام الناس .. كانت تقولي يارب ياروعه تطلقي بفضيحه بجلاجل وكنت أسكت فربنا ردكيدها في نحرها صدقوني ياإخوان أنا ماني ساذجه أوماعندي أهل أوغبيه راضيه بالذل بس والله صابره عشان نورعيوني أولادي ومستعده أموت بس أشوفهم طيبين أحياناً يجيني الشيطان ويقولي يابنت طيب يمكن العيال يكبروا ومايتمرفيهم معروف أرجع أقول أستغفرالله إن الله لايضيع أجرمن أحسن عملاً ..لوهم نكروا لي ربنا ماينساني وأنا ماأبغى غيرسعادتهم وراحتهم لأن عندي رساله وهدف واحد إني ماأشتت عيالي وأكون سبب شقاهم وماأبغى مرت أبوهم تربيهم وكل ماأتذكرالحبيب محمد صلى الله عليه وسلم كثرماشاف من أصناف العذاب رموه بالزباله ..وضعوا عليه وسخ الجزور وضعوا في طريقه الأشواك ..رموه بالحجاره حتى أدميت قدمه ..سحروه ..ضربوه في وجهه يوم أحد أقول أنا ولاشئ عند إبتلاءه هو ربنا بلاه بالكفارأما أنا بلاني ربي بزوجي وزوجته ..وبلاني في نفسي وعواطفي لأني بالحيل عاطفيه وأنسى لزوجي كل أساءته وصدقوني مافي شئ يضيع عند الله ..وربنا راح يحاسب كل واحد فينا ولكن الصبر ..والصبر والصبر والجنه تبغى الصبرقال تعالى ((إنما يوفى الصابرون أجرهم بغيرحساب )) والحمدلله رب العالمين |
الله يثبتك ياروعه
|
حسبنا الله ونعم الوكيل
|
الله يا رووووعه اسم على مسمى نحسبك كذلك بصراحة قليل مثلك يصبرو انا اكلمك عن نفسي امكن من المستحيل يجيلي صبر مثلك امكن لو يصير لي مثل كذا اكيد راح انجلط لكن ما دامك علقتي آمالك بالخالق ما راح تضيعي ابداً الله يوفقك يا روعه ويحفظ لك عيالك وتشوفيهم وهم في أعلى المراتب وتفرحي فيهم يارب |
اقتباس:
بس نصيحة لوجه الله لا تتدخلين في موضوعها أبدا لا الآن ولا بعدين وزوجك له رب يحاسبه ويعاقبه على اللي يسويه فيك (الله ما يرضى الظلم) الله ورسوله وصى بإكرام المرأة وليس بإذلالها ... ولا تنسي حبيبتي الإستغفار والدعاء |
اقتباس:
ولا يشمت فيك أحد يا رب ...والله أحزني كلامك وكل ظالم وله يوم |
الى الاخت روعه ..اسال الله ان يجازيك خير ...ويفرغ عليك من الصبر الجزيل والله انه زوجك قلبه قاسى ....واين هو من استوصوا بالنساء خير ..يا اخى يكفى انه الحرمه يوم تتزوج عليها يصبح حالها على العليم به ..فكيف ترد عليها هذه الردود التى تحطم الجبال وتفتتها فما بالكم بالقلوب والافئده التى هى من اللحم والده ..,بعدين يا اخى شو هذا التصرف تحط راسها فى الارض وتحط رجلك على رقبتها هلى يرضى هذا التصرف الله ورسوله طبعا لا ..ثم تجعل الشبشب فى فمها ..والله كرم بنى اده ..ما هذا التصرف الهمجى ..يا اخى كان بك الاولى ان تعلمها اننى ساتزوج ..او انك تلمح لها وتانى يوم من زواجك تخبرها على الاقل ....والشى العجيب ردوده قاسية ..عموما اختى النبى عليه السلام توعد من لا يعد بين زوجاته ..والتصرف هذا والله انه يالم القلب والله يجازيك خيرا على الصبر عليه وذكريه بالله ..وما اعرف والله شو اقول ..يا اختى تصور ان ابنتك التى هى من لحمك ودمك وهى فلذة كبدك تعامل هكذا من زوجها هل ترضا ه لها ..بالطبع لا ..فكيف تعامل بنات الناس هكذا ...اسال الله العافيه من رجال بهذه الشاكله وعسى الله ياجر النساء اللواتى ابتولين بمثل هذا الصنف من الرجال ....يطلع قوته على الحرمه المسكينه ...التى رزقه الله ايها للمتعه بها ..اهكذا شكران النعم ...الله المستعان
|
مشكورين إخواني على دعواتكم الطيبه ..أقسم بالله إني كل
ماأدخل للموضوع وأقرأ ردودكم أبكي ..نعم أبكي وبشده وأحس بسعاده إن ربي سخرلي أخوان في الله يدعوا لي بظهرالغيب ..الله يوفقكم ويجبرخاطركم والأم مهما بلغ بها التعب والآلم والحزن كل همها عيالي حتى لوتعاني من هم لهم ولازم تضحي بس كل اللى أبغاه هو إن الله يوفق عيالي ويحقق أمآلهم وأشوفهم في القمه وأشوفهم أحسن العيال في الدنيا عن نفسي أحاول أعطيهم الحنان والحب لأنهم ساكنين قلبي والله لايحرمني منهم ولايحرمهم مني واشوفهم متزوجين وأشوف عيالهم يارب دعواتكم حبايب قلبي |
الله يسخر لك زوجك :29:
ويصلح لك اولادك :15: ماشاءالله انتي روعه ياروعه الله يوفقك ويفتح لك ابواب رحمته ويرد كيد الحاقدين في نحورهم:16: اللهم امين.... |
ما اعرف اشعر من كثر ما اسمع ها المشاكل الواحد صار يكره الرجال و بس حسبي الله فيهم اختي الغاليه انا موضوعي حاطاه باسم صديقتي في ورطه البنت صديقتي دي اتزوجت من رجل متزوج و علنا امام الله وخلقه و اما زوجته و بوجود شروط من والدها وكل شيء وما احترمها الرجل هدا فا مابالك بهدا الشخص الي يبغى كل شيء بالسر اساس الزواج الاعلان و ما عمله زوجك بانه تزوج من غير علمك حق له و انا انصحك ان تهملي الموضوع حق زواجه وتهتمي لاولادك الرجال من دا النوع ما فيهم خير و اصبري و احتسبي عسى الله يهديه انا انصح قريبتك دي انها لا توافق الا ان علمت زوجته بالامر و كان الزواج علناااااااااااااااااااا و اعمل مليون خط تحت كلمه علنا
|
السر وماادراك مالزواج السر
هم وألم وعدم راحه ولا استقرار وهو الذل بعينه يااختي روعه زواج السر لـ : اما انه يريد معرفة الزوجه الثانيه مناسبه له وييعلن زواجه بعده لأنه مو مستعد يخسر زوجته الأولى وهو لا يعلم وضعه مع الثانيه او الأمر الثاني ولأمر انه رجل متلاعب كاذب يريد زوجه ليقضي معها بعض الوقت ويسلي نفسه وراح يمشي وعوده ويسوف لها ويوهمها بالأعلان ولن يعلن يكفيك ان تقولي حسبي الله ونعم الوكيل اذا اذتك وتشمتت فيك فهذا كله راجع عليها لا تشمت بأخيك يعافيه الله ويبتليك الله كفيل بها اما من ناحية زوجك الله يسخره لك ويرده لك ردا جميلا الله يرفع قدرك ويشهر بعزك ويكبر حظك اللهم آمين |
يا عمري عليك من جد إنقهرت
ما شاء الله على صبر مثل هذا،،،،،،،،،،،، الله يصلح لك أولادك ويجعلهم قرة عين لك يارب ويعوضك فيهم بس والله للبيووووووووت أسراااااااااااااار أنا لو يسوي فيني زي هذا راح أرد الصاع صاااااااااااااااعيـــــــــــن أهنيــــــــــــــــــــــــك أختي على كبر قلبك |
اقتباس:
|
أشكرجميع أخواني وأخواتي الكرام الذين شاركوا وأدلوا بأرآئهم
والله مكذب عليكم إني أفكرفي زواج أخت زوجي وكلام عريسها إنه يبغى يخبي زواجه على زوجته الأولى علين يتحسن الوضع وفي نفس الوقت مالي دخل فيهم ...بالعكس قد يكون عقاب لها من الله عزوجل وأنا إنسانه ماأحب الشماته لأنو إللى يتشمت ممكن ربنا يبلاه ..والله عزوجل وكيل كل إنسان وهو اللى يعاقب ويحاسب كيفما يشاء وعن زوجي أحاول أعمل واجباتي معاه اللى يرضي ربنا عزوجل لأني حطيت برأسي إني أتعامل مع الله فيه صحيح بأنقهر ..وابكي من تصرفاته ...واحيانا أدعي على زوجته وأرجع أستغفرالله تاني وصدقوني بعد كل اللى يسويه أطلبه يجيب بنته عندي وهي دحين عمرها سنه وأحبها موت وتحبني وتناديني ماما زي أولادي أضمها على صدري وأقول دي بنتي مو بنت زوجي ولعلمكم أنا من سميتها أول ماأتولدت ودائماً لمن أروح السوق أشتري لها ملابس حلوه بنوته وألعاب واقول حبيبتي مالها ذنب لوإنو أبوها وأمها يقهروني الله يسامحهم ويهديهم ..وكل همي ربي يشغلهم عني وعن عيالي عشان أربي أولادي في جو إيماني وجوكله حب لله وحب لأبيهم وحب حتى لزوجة أبيهم لأني ماأحب يتعلموا الحقد والكراهيه ..ماأحب يطلعوا قلوبهم سوده والله يوفق الجميع والله يسعدكم إخواني ويريح بالكم كما أسعدتموني وريحتم بالي بكلامكم وردودكم |
بغض النظر عن موضوع اخت زوجك
استوقفني حالك مع زوجك وزوجة زوجك بصراحه اختي روووعه اهنييييييييييييييييييييييييك من قلبي على هذا الصبر وصدقيني مايضيع عند ربي شئ الله يسخر زوجك لك ويرده ردا جميلا وينصرك على من ظلمك اللهم آمين |
اقتباس:
لو بس زعلانة وتاركتيه شوية يحس بقيمتك واهلك شلون رضو اخوانك كان لازم يجو يسوون بي نفس الي سواه بيك حسبنا الله ونعم الوكيل |
[ يُغلق الموضوع ]
|
| الساعة الآن 07:41 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©