|
محتاره ومحتاجه مشورتكم
size5]السلام عليكم ورحمة الله وبركاته
أعود للكتابه إليكم من جديد لكن هالمره محتاجه رايكم وإستشارتكم في موضوع محتاره فيه سبق وذكرت لكم لمن قرا موضوعي إني سافرت السنه اللي فاتت لعلاج ولدي بألمانيا لكن كان تشخيص لحالته لكن الموضوع هالمره إن طليقي كلم أمي وقالها إن لازم يودي الولد علاج بالخارج عشان العلاج الطبيعي أهو بالبدايه قال على أساس اهو بياخذه معاه لكن مدة 3 أشهر طبعا آنه قلتلها قوليله لا لأن ماأقدر أفارق ولدي طول هالمده لأن آنه عمري ما فارقته حتى يوم والحل الثاني إن أمي تروح معاي لكن راح نكون مضطرين لو بنروح نروح وياه لأن ماعندنا أحد يروح معانا صعب واهو رايح معاي من قبل وعارف طريقة العلاج بالخارج ومن ناحية اللغه عنده وايد زينه يقدر يتفاهم مع الدكاتره ويدبر الأمور لكن المشكله ألحين في كلا الحالتين صعبه وايد علي لأن بالنسبه حق الحل الأول سبق وقلت إن ماقدر افارق ولدي طول هالمده والله غصبا علي ولا بأي شكل وبالنسبه حق الحل الثاني لو بنروح معاه آنه وأمي صعبه بعد مااقدر أستوعب إن راح أشوفه معانا بالمطار والطياره ولو بنوصل الديره اللي بنروح لها معانا بالسياره صعبه حيل وراح أحس بقهر ومذله لان احس لما مابغاني قال بطلق والحين لما حس الموضوع موضابط إلا فيني توهق وقال تعالوا وياي لاوازيدكم من الشعر بيت قايل حق أهله عادي ليش ماأروح آنه مع إخته معاه ويقول عادي هذي بنت خالتي تخيلوا في أحد عاقل يقول هالكلام والله مو مستوعبه لا وبعد أمه وإخته يقولون عادي مومشكله شالسالفه إصاير بالدنيا مادري الواحد يضحك من سوالفه ولا يبكي والله إني محتاره مره أقول عشان مصلحة ولدي ومره اقول راح أنذل وايد وودي إني أرفض عشان يحس بنتيجة طلاقه إن ضيع كل شي حتى علاج الولد وأخليه يعالج الولد بالديره وعلى الله وأخيرا مابي أطول عليكم لكن أتمنى أسمع رايكم بالموضوع وأتمنى خاصه من كل أم قبل لا ترد علي تحط نفسها مكاني شسوي والله ماني عارفه والله أحس لحد ألحين وصدمة طلاقي مو قادره أطلع نفسي منها وبعد قاعد يزيد همي بأمور ثانيه واهو مو حاس فيني أصلا والله أحس مثل الحلم العام علاج معاه وآنه زوجته وهالمره معاه وغريبه عنه والله قلبي يعتصر من الألم . وسامحوني على الإطاله ومنتظره ردودكم والسلام عليكم ورحمة الله وبركاته[/size] |
مايعتبر محرم لك ... اسألي شيخ عن السفر بدون محرم
يعني لازم يكون معاك محرم وإذا وصلتوا هناك مو مشكله لو يكون طليقك موجود بكذا راح يحس فعلا بالفرق الله ييسر أمورك |
الله يشفي ولدك ويرجعه لك بالسلامه
|
om omar^^
اختي بما انك مطلقه منه ولا ترغبين في رؤيته ولا تستطيعين ان تتركي ولدك لابد ان تضغطي على قلبك وتختار احد الامرين اما تتحملين عشان ولدك وتروحين معه ويمكن هو اصلا ماقال بروح الا لعل قلبك يحن عليه وترجع الامور لمجاريها او انك تضغطين على نفسك وتخلين ولدك يروح مع ابوه وممكن تتواصلين معهم بالتلفون او مع المرافقه معه وقبل هذا كله استخيري الله وعليك بسهام الليل (الدعاء في الثلث الاخير) الله يفرج همك ويلم شملك على طاعته ون شاء الله ربي بيسر امرك ويفرج همك |
أختي ذكريات لاتغيب
آنه أكيد راح أسأل شيخ بالموضوع لأن أهو طبعا مو محرم لي مثل ما قلتي لان أهو بالنسبه حق أمي يصير محرم لأن أصلا أهو ولد خالتي بس بالنسبه لي بسأل لو كنت في حالة ضروره ومافي أحد يروح معانا ولو مايصير أكيد بشوف أحد معاي وجزاك الله خير واسعدني مرورك |
اختي رهينة الماضي
المشكله مو ان مابي اشوفه العكس لو علي ودي لأن اساسا آنه مااخترت الطلاق اهو اللي اختار وبالنسبه لي فالموضوع العكس آنه اللي ودي ارجع له لكن اهو مومفكر انه يرجع بالمره وطليقي بعد مو من النوع اللي يحن قلبه بالعكس اهو يبدي العقل على كل شي والمشاعر مالها مكان بقلبه بس المشكله مثل ماذكرت لو رحت الوضع بيصير مو طبيعي وراح يحس ان بالطلاق ماخسر ولا ضيع شي وجزاك الله خير على دعواتك ونصايحك الطيبه والله يسمع منك يارب |
وعليكم السلام ورحمة الله وبركاته...
من كلامك في موضوعك الأول إن سبب الطلاق ليس لك فيه أي علاقة ولكن قد يكون هو لا يريد انجاب أطفال ربما يكونوا معوقين -بما ان الفحوصات اثبتت انه حامل للمرض- وبالتالي لا يريد ظلمك وحرمانك من أطفال أصحاء ولهذا قرر الانفصال...ولا اتوقع اطلاقا ولو لادنى نسبة انه يكرهك لذاتك بل بالعكس فأنتي كنتي خير زوجة له ... عليه -ونعود لهذا الموضوع - ربما هو يريد ارجاعك اليه ولكن بطريقة غير مباشرة فاقترح ان يجلس معه واحد من خوالكم بحكم انكم اقارب ويفهمه ان هذا الامر قضاء وقدر ويذكره بالله وهو حسب ماذكرتي اتوقع وده يرجعك لكن مايدري وشلون الطريقة خصوصا انه انتي حسب قولك قبل الانفصال انه عندك وولدك بالدنيا .. الله يوفقك ويكتب لك الخيره يااختي ويشفي ولدكم ويكتب لكم الاجر وترجعون لبعض وتسافرون سوا ويسخره لك وما ذلك على الله بعزيز .. |
أخي الكريم #khalid#
بالنسبه لموضوعي الأول لما قرر الإنفصال والله إني قلتله إني مستعده إني اكمل وياه حياتي حتى لو عندي بس هالولد بس من كلامه معاي كان امبين اهو خايف اييب اطفال نفس الشي مع ان اعتقد في علاج وكان يبي اطفال بدون سالفة علاجات وقصه طويله وبالنسبه لموضوعي الحالي آنه كتبت إنه توهق ويبينا نروح وياه ماكنت أقصد من هالجمله انه يبي يرجعني كنت اقصد انه شاف ان آنه مستحيل اقتنع ان ولدي يسافر بدوني فقال حق امي خلاص ماكو الا ان احد منكم اييي معاها وبالنسبه ان احد يقنعه ويذكره ان هذا الامر قضاء وقدر فالكل اول ماطلق من اهله كلموه وقالوا له ممكن اي شخص يصير مع اطفاله هالشي حتى لو كانوا اساسا طبيعيين ممكن يصير لهم سبحان الله حادث وتحدث اعاقه تخيل كان يرد يقولهم مادام جذي ليش مازلتوا تييبون اطفال يعني الكل حاول معاه بس نهائيا ماكو فايده فبالنسبه حق موضوع السفر مستحيل هدفه هالشي لأن شايف الحياة بينا مستحيله كل هدفه إن ولده يتعالج وسامحني على الإطاله وجزاك الله خير على كلامك ودعواتك الطيبه |
عليك أختي بالإستخارة والله يكتب اللي فيه الخير الله يشفي ولدك ويبارك فيه ويحفظه أختي زوجك ما أعتقد إنه يفكر يرجعك لإنه يبغي أولاد أصحاء من زوجة أخرى وأنتي أختي نصيحة حتى لو فكر يرجعك لا ترجعين وشوفي حياتك الله يرزقك بالذرية الصالحة المعافاة والزوج الصالح الحياة ما تنتهي عند رجل واحد الله يوفقك وييسر أمورك كلها ويسعدك في الدارين |
أختي نور الأوطان
أكيد إنشاالله راح أستخير وكلامج كله صح أهو مومفكر يرجع بالمره وإحتمال فعلا لأن يبي ينجب أطفال أصحاء من زوجه ثانيه لأن كان كلامه قبل الإنفصال يبين هالشي وأسعدني مرورك وجزاك الله خير على دعواتك الطيبه |
..
وعليكم السلام ورحمة الله وبركاته بداية اختي اتمنى ما يزعلك ردي.. انا حابه اقولك احمدي الله ان طليقك مهتم بابنه ومانساه ومفكر يتفرغ له 3 اشهر ماشاء الله وهذا دليل على انه انسان مسؤول اما ماحدث بينكم فهذا شيء يرجع لحسب طريقة تفكير كل انسان وانتي اهم ما عليك مصلحة ابنك ..يعني مهما كان لابد ما تكون مصلحة ابنك مقدمة على كل شيء حتى وان تضايقتي وان تالمتي ولو ان طليقك شري كان من الممكن انه ما يشاورك وكان اخذ ولده ولا اهتم فيك رحتي معاه او لا لكن الحمدلله انه مراعي هالنقطة ومو معقولة ان كل من تطلقت بتقطع علاقتها بطليقها وبالذات اللي بينهم ابناء عيل لو كنتي بمثل حالتي.. من سنتين مطلقة وبعدي مضطرة اتواصل مع طليقي بشكل شبه يومي بخصوص شؤون ابنائي ولا يعرف احد بامر طلاقي الا اختي وكم انسانة قريبة مني اما اهلي فوالله مايدرون لا امي ولا ابوي وكل هذا عشان مصلحة ابنائي يا اختي الام تضطر تتحمل كثير عشان ضناها ولو ضاع العمر عشانهم مو خسارة الله لا يضيع لنا عمل وهالكلام مو تشكي الحمدلله على كل حال لكن حبيت ابين لك ان الدنيا كلها مشاكل وانتي ماتدرين بشنو الخيرة وماتدرين لو كانت هالسفرة سبب لانه يعيد حساباته ويفكر بطريقة ثانية وانه من مصلحة الولد انكم تكونوا مع بعض ولو ان الافضل انك ما دام شفتيه خلاص بدا حياته بعيد عنك انه يكون تفكيرك بنفس الطريقة لكن واضح شكثر انتي باقية عليه وبعدك تحبينه بس باقولك وعسى ان تكرهوا شيئا وهو خيرا لكم اهتمي الحين بابنك ومصلحته وتوكلي على الله وطبعا لاتنسين الاستخارة قبل كل شي الله يفرح قلبك بشفاء ابنك ويفرج همك عاجلا لا اجلا |
يا أختي الكريمة أم عمر
أنا رأيي إن مصلحة إبنك فوق أي شئ ... كرامتك على العين و الراس بس ما تضيعيش ابنك و مصلحته و صحته أهم من أي شئ في الدنيا و إذا ضيعتيها ممكن تندمي بعد كده مش تخلي غضبك من زوجك يدفع تمنه ابنك و صحته ربنا ينور بصرك و بصيرتك و يرزقك بالخير |
الأخت أم عمر
طمنينا عنك عسى أمورك زينه إن شاء الله |
الأخت هشيم روح
فعلا أهو مهتم فيه وايد والحمدالله على هالشي ومثل ماقلتي أكيد إن مصلحة ولدي مقدمه على كل شي وآنه مستعده أضحي بكل شي عشانه وآنه كنت مقرره خلاص أبي أروح لكن الشي اللي نسيت أذكره لكم إن المشكله إن السفره صعبه على أهلي وخاصه أمي محتاره صعبه تترك البيت مدة 3 أشهر عشان جذي آنه ناطره بعد أحد يقدر يروح معاي وأسعدني مرورك والله يفرجها علي وعليج وعلى جميع المسلمين |
الاخت sun_of_me
فعلا مثل ماقلتي اكيد مصلحة ولدي فوق أي شي وآنه ودي إن الموضوع يتسهل لان آنه مابي مثل ماقلتي اندم بعدين والوم نفسي وماودي أضيع الفرصه عليه لأن ممكن يتحسن وايد بإذن الله وأشكرك على مرورك ونصايحك ودعواتك الطيبه |
الأخ د.سطام
اموري الحمدلله إنشاء الله زينه لكن ياأخي الكريم ماعرفت رايك بالموضوع مع إضافتي على كلامي إن آنه مستعده أجبر نفسي على السفره عشان مصلحة ولدي لكن المشكله في أهلي إنهم مايقدرون يروحون معاي طول هالمده وخاصة أمي وشاكره لك مرورك وسؤالك |
الله العالم يا ام عمر أنكم لازلتم متمسكين ببعض ولكن الخواطر لازالت متكدره فيها غمامه بسيطه وربما تنجلي حال سفرك مع أبو ولدك وربما تعود المياه لمجاريه فكل البشر خطائين
وليس هناك مانع من سفرك في حال موافقة ولي أمرك |
نسيت اقولك اختي ام عمر
عندي احساس 99.9 أنك راح تعودين لكنف زوجك ابو ولدك قريباً وأحساسي عمره ماخاب يسموني ربعي أبو الحاسه العاشره ( المخ ) الله يعجل بعودتك |
الله يفرج همك ويشفي ولدك
طيب اختي ماعندك اخوان؟؟؟ واحد منهم يروح معك ويعتبر محرم لك |
الأخ الكريم د.سطام
والله ماتصدق إشكثر فرحتني بكلامك وآنه أقراه إستانست وايدأحس كأن صج راح يصير الله يسمع منك يارب ويصدق إحساسك إنشاء الله يارب ومايخيب ولو إن لحد اللحظه اللي طرح فيها أهو موضوع العلاج قالتله أمي الصراحه تعبتونا معاكم ومادام إنت تقول إي وإهي تقول لأ وإنت مصر على علاج الولد كل سنه ليش ما ضحيت وتميت معاها عشان تعالج الولد وبعدين سويت اللي تبي قالها تبين أستمر معاها عشان نييب أطفال معاقين آنه كتبت هالشي لأني بغيت أبين وجهة نظره إنها لحد الآن مثل ماإهي وماتحس إن ندمان على شي يعني كل من يسمعه يقول مستحيل مستحيل إنه يرجع لكن آنه مازلت أدعي رب العالمين إن المستحيل يصير ممكن بين يوم وليله والله كريم إنشاء الله وأشكرك على مرورك وعلى الكلام الطيب |
الأخت الكريمه منتظره فرج ربها
ممكن أحد من إخواني يروح معاي بس المشكله أهو كان قايل عن شهر 5 بهالوقت عندهم دوامات بنشوف لو ممكن يخليها شهر 6 ممكن وشاكره لك مرورك وجزاك الله خير على دعواتك |
| الساعة الآن 01:41 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©