|
خـيــانــه زوجي دمرتني
بسم الله الرحمن الرحيم
صراحه ماكنت احب ان تكون هذى اول مشاركاتي بس من الضيق اللي فيني احس روحي بختنق وماعندي حد الجأ له في مشكلتي هذى بعد رب العالمين الا انتوا آنا صار لي متزوجة سنتين في بداية زواجي يعني جذى خذ لي كم شهر بس وزوجي خااااااااني !!! كلم بنت كانت اهيا اول حب في حياته يعني كان يعرفها قبل لا يتزوجي بس اهو تركها وانتهى موضوعه معاها قبل لا يتزوجي يمكن بسنتين يعني الموضوع منتهى بس اهيا بنت ابليس رجعت اتصلت فيه والقهر انه كلمها وصارت بينهم اتصالات ومسجات بس آنا اكتشفت الموضوع بدري كنت اقراء مسجاته وشفت مسجاتها قليلة الحياء وواجهته واعترف لي بكل شي وقال لي انه ندمان وقعد يبببجييي عقب ما بجيي جدااااااام عيني وقعد يتوسل لي اني اواصل حياتي معاه من هباااااااالتي وخبااااااالي صدقته (نسيت ان اللي يخون مره يخون الف مره) ورجعت حياتنا طبيعيه ومن جد جد جددد بديت اثق فيه شوي بس بعد فتررررررره طبيت عليه واهو يتكلم ع المسنجر ودايركت نزل المحادثه شفتها والا اهيا مع بنتتتتتتتت واعترف لي انها فلانه من المنتدى الفلاني وهيك وهيك الحلو فيه انه يعترف رحت المنتدى اللي قال عنه ودخلت بنك نيم زوجي ورحت ع الرسائل الخاصه وهاتك يا رسايل سوالف ومواعيد وحاله لما قلت له عن الراسيل قال لي اهيا تبي تشوفني بس آنا مارحت لها مادري شنو اللي خلاني استمر معاه آنا احبه واموووت في لتراب اللي يمشي عليه ويمكن هذى نقطه ضعفي الوحيده بس الحين وعقب عملته السوده فقدت ثقتي فيه انعدمت الثقه صارت حياتنا جحيم كلها مشاكل نتزاعل على اتفه الاسباب صرت ما اتقبل منه اي شي دايما سوالف خياناته في بالي ابغي اعرف سبب مقنع حق خيانته مو لاقيه قلت له اذا فيني شي مو عاجبك قول لي ولا انك تخوني! قال لي مافيج عيب انا العيب اللي راكبني من راسي لي ريلي! وآنا واعوذ بالله من كلمة انا مو مقصرررررره معاه في شي بيته على طول مبخرته ومبخره حااااااالي وعلى طول اكشخ له وكل ليلة صايره له عروس جديده اهو احس فيه شي فيه خلل احس الخيانه تسرى في دمه عطوني حل ابغي اعيش حياة سعيده مع زوجي ونرجع مثل قبل ابغي حل حق خيانته لي مابغي اتركه لاني احبه وفي نفس الوقت مو قادره اتقبله مادري شسوي والله اني اكتب لكم ودمعتي على خدي |
الله يعينك أختي و الله الخيانة صعبة
هل زوجك ملتزم ؟؟ هل يصلي جميع صلواته بأوقاتها ؟؟ كم عمرك و كم عمره ؟؟ هل أهلك بعيدين عنك و لا بنفس البلد ؟ |
مشكورة أختي ماريا على الاهتمام والرد
اممم يعني التزامه مب ذاك الزود بس يصلي كل صلواته عمري 20 وعمره 22 لا اهلى بنفس بلدي ولله الحمد ;) |
اختي بالفعل هناك بعض الرجال (بدون تعميم)
تكون الخيانه تجري في دمهم .. والبعض الخيانه تكون بسبب نقص فيه هو .. البعض يخون بسبب الظرف اللي هو فيه مثلا يكون مسافر وزوجته ليست معه .. البعض يخون بسبب ظروف نفسيه .. اختي اعتقد انه آن الاوان انك تبلغي احد كبير من اهله تكوني واثقه فيه وانه يمكن يأثر على زوجك .. وابتعدي عن الفضايح اهم شي اختي انه ما وصلت ان تكون خيانته جسديه .. وربي يهديه .. |
هداه الله لكي واعانكي عليه
حاولي ان تربيه على يديكي لانه باين انه يحبكي ولا يريد التخلي عنكي ولكن عنده طبع يجب ان يتخلى عنه وهو الخيانه الله يهديه |
أميرات
آنا ماابغي افضحه جدام اهله مو عارفه شاسوي حيرانه ادعوا له بالهدايه ****** جاليسا هذا اللي مصبرني عليه اني اعرف انه يحبني بس ليش يخوني هذا اللي ماعرفه ****** الله كريم |
الله يعينك يا اختاه على ما ابتلاك
بصراحه توة صغير ومتعود على العزوبية يعني ما نضج 100% زي ما قالت الاخت الى قبلى ما لك الى تربية على ايدينك والدعاء له با الصلاح والهدايه ان شاء الله الله يهديه ان شاء الله لما يحب ويرضى انتظري اخونا السيف المهند ما شاء الله عليه ابداع في حلوله انا من الناس الى احب ردود وحلول هذا الشخص المبدع تحيتي لك |
اقتباس:
الله الي لقاءات و قد يتبعها اشياء اخرى .. هو الحين كل ما مسكتيه متلبس بالخيانه يعترف لك عادي لانه متعود انك راح تسامحيه و يرجع مره ثانيه يخون لان مطمئن انك ما راح تتصرفي بشكل ثاني .. صار لك تقريبا سنتين وما قدرتي تغيريه او تربيه اذا اخبري احد من اهله .. لكن اذا قلتي له انك راح تخبري واحد من اهله مثل ابوه و بالفعل اعمليها عشان يوقف عند حده ويعمل لك حساب .. وانك تخبري ابوه او اخوه الكبير بشكل سري هذا مو فضحيه اختي بل بالعكس هذا من صالح حياتكم لكي تستمر .. انا اقصد انك تحافظي على اسرار بيتك ولا تخبري احد من اهلك او مثلا اخوات زوجك او تفضفضي عند صديقاتك .. حطي يدك في يد احد من اهله عشان ينتبه على حالها ويبطل هالحركات الخطيره.. |
مشكور اخوي القناص على ردك واهتمامك
هذا اللي خلاني اسامحه اول مره انه توه صغير بس الحين خلاص مو قادره اصبر عليه آنا بعد صغيرة مو بس اهوو ليش علينا احنا البنات نتحمل كل اغلاطهم ونزواتهم تعبانه وربي تعبانه مشكور على دعائك ربي يوفقك يارب انتظر رد الاخ السيف المهند |
أختي أميرات اشكرج على تفاعلج
الله يوفقج ياربي اهله كلهم فضيحه ماقدر أأمنهم على سر تلاقينه يوم ثاني انتشر بالديره كلها اعظم من الجزيرة ما يهمهم ولدهم او لا اهما يحبون يتكلمون وبس وآنا مجربتهم بس في اشياء ثانيه يعني وآنا ما ابغي حد يتكلم عليه بشي حتى لو اهو غلطان في حقي أحبه شاسوي بقلبي اللي متعبني مافي حل ثاني غير اني اخبر حد من اهله !! |
اختي قوي قلبك اختي .. كل ما شافك زوجك هينه لينه تمادى اكثر في اللعب ..
اختي زوجك ملتزم بالعبادات ؟؟ خذيه من طرييق الدين وان ما يفعله لا يرضي الله ولا رسوله .. خوفيه من عقاب رب العالمين .. وقول لي عف تعف نساؤكم .. حاولي اذا اكتشفتي خيانته انك توقفي له موقف صارم .. هدديه بالفضيحه ... فقط تهديد .. ازعلي عليه ولكن ابد لا تتوقفي عن القيام بواجباته .. وربي يهديه .. |
انا من راي ان السن له دور باين عليه صغير يعني ماتجاوز سن المراهقه او لو تجاوز باقي له اثار
حاولي تغرقينه بحبك له وخلك بجنبه على النت واشغليه بامورك وامور بيته وكثري زيارت على اهلك واهله يعني وكذا راح ينضج على ايديك وبعيد عن اجواء النت والمسجات الي صدقيني هو بعدين راح يتذكرها ويستتفه نفسه على هالحركات |
قلبي معك والله يهديه
والله يوفقكم مع بعض |
اختي اميرة المعذبين
الله يعينك على حالك ولكن لدي حلول واتمنى أن أفيدك بها اولاً : بعض الرجال يا اختي فيهم دم الخيانه والخيانه تجري في دمهم ولكنهم قابلين للتغيير مثل زوجك وما دام انه يعترف لك دايم فهذا يدل أنه يبي يتغير بس يبي شي يغيره أهو ما أتوقع أنه اللي يتصل على البنت ،، حتى لو كان يتصل ،، مو أهو أللي يبدأ ،، البنت اللي بتدأ وتتصل عليه وهو يتجاوب معها وهذا شي حلو يعني أهو ما يبيها ويبيك انتي والحمدلله طيب أنتي ما عليك الا أنك تنصحيه ولكن انا سوف أعطيك الطريقه واتمنى أنا تفيدك أول شي أجلسي معه جلسه صراحه وأسأليه طبعا أهو بيعترف لك بكل شي أنتي خليك قويه وتحملي كلامه رغم أنه بيجرحك بكلامه عن البنت لأنك بتحسين بغيره وقتها لكن خليه يحكي لك عن كل شي من البدايه لنهاية حلوووووووو طيب وبعدين أبدأي وأسأليه 1- وش اللي خلاك تسوي كذا وتكلمهم يعني ،، طبعا بيقول لك تسليه قولي له والتسليه الحين انتهت لأنه دخلت عليك بنت تحبها وتحبك وصارت زوجتك 2- وش استفدت منهم وأنك تكلمهم طبعا بيقول لك ولا شي ،، وكذا بيحس أنه ما استفاد جد فعلا ،، وبيبدأ يفكر بجد انه ما يرجع يكلمها 3- وش الفرق بيني وبينها ،، مين أحسن من الثاني طبعا بيقول لك أنتي وبعدها أنزلي عليه كلام أنت وش دراك أنها ما تكلم غيرك اكيد تكلم غيرك ورضيت بنفسها تكلم غيرك ،، أنت ترضى أني أكلم غيرك ترضى أني أخونك وش بيكون موقفك لو دري أحد من اهلك أو أهلي وش موقفك لو خيرتك بيني وبينها وبعدها انزلي عليه كلام وقولي له عارفه انك تحبني وتموت فيني عشان كذا تزوجتني عشان كذا انت معي عشان كذا عايش معي عشان كذا أعترفت لي وانا احبك عشان كذا أغير عليك عشان كذا أخاف عليك عشان كذا ما أبي أتخلى عنك عشان كذا أسامحك وعاد بطريقتك وبعدها خليه يوعدك أنه ما يرجع لها طبعا اهو بيقول لك أوعدك أني ما أرجع لك وخليه يغير أيميله ويغير رقمه وخليه يتصل على البنت ويكلمها وهو عندك ويقولها أنه ما يبيها ويخاصم فيها ويقولها كلام يجرحها عشان تضمنين أنه ما يرجع يتصل فيها وعاد خليك معه دايم حاولي انك تشغليه يعني خليك دااااااااااااااااااااااااايم معه وأقضو وقتكم سوا وحاولي انه يكون اكثر وقته معك لأنه يمكن أصحابه لهم سبب في انه معها لو أصحابه لهم سبب خليه يغير أصحابه أتمنى اكون أفدتك وأتمنى لك التوفيق اخوك بائع الورد |
عليك بالدعاء له آخر الليل وذكريه بالله وان مايفعله يدان به في بناته وبيته وعليك بمواجهته عند كل زله حتى يعي ما يفعله --هداه الله واصلحه والمسلمين
|
السلام عليكم ...
اولا : اخوي القناص شكرا لك اخي الغالي على اطرائك ويسعدني متابعتك لردودي.. واخي الغالي..... ماعليك زود ..ايضا هنا اعضاء و عضوات لهم اراء سديده افضل مني ... ...... شكرا لك وقد احرجني كلامك كثيرا ....بارك الله فيك .. ............ بالنسبه لا ختي السائله ابحثي هنا عن نفس موضوعك ولي اكثر من مشاركه بهذا الخصوص ...فابحثي عن تلك المشاركات وانظري بالحلول المطروحه ني ومن غيري.. ................ نعود لموضوعك وبصراحه لا اجيد التعليق الجيد بل اجيد ان اتكلم بالمنطق والعقل والفلسفه من وجهة نظري.. هنا ساتكلم بكل صراحه فلا تغضبي من صراحتي.. ايضا هذا الرأي لستي ملزمه به ابدا انما اذا اردتي خوذيه واذا لم تريدي لا تاخذيه .. ................................... اخيتي الفاضله .... عمرك 20 سنه وعمر زوجك 22 .. تزوجتي بعمر 18 سنه ...وعمره 20 سنه .. ........ بصراحه زواج مبكر...جدا... وهذا الزواج المبكر..له ايجابيت وايضا له سلبيات وهذا ما حدث هنا.. لن اقول ايجابيات الزواج المبكر لانها معروفه .. ولكن ساقول لك سلبيات الزواج المبكر هنا بحالتك هذه .. 1 - زوجك غير ناضج فكريا .. 2 - زوجك للاسف مازال مراهقا .. 3 - زوجك المفترض ان يحس بالاستقرار العاطفي والتشبع ولكن للاسف ذهب لطريق اخر و اظن هذا نقطه لم يهتم بها هو ولا انتي. 4 - زوجك تقولي يبكي اذا هذا مازال صغيرا - سامحيني - على تحمل المسؤليه كزوج وابو اطفال ومربي فاضل.. .............................................. الان نعود لموضوعك .. تقولي احبه ؟؟؟؟؟؟!!!!!!!!!!!!!!!!!!!!!!!!!!!! ولا استطيع تركه !!!!!!!!!!! ولا استطيع اخبار اهله !!!!!!!!11 اذا ماهي الحلول ؟؟؟؟؟؟؟؟؟؟؟ :::::::::::::::::::::::::::::::::::::::::::::::::: :::::: الحلول ياختي هي الحلول العامه التي اكتبها في كل مشاركه بل اكاد عرفت من كثر تكرارها ولي هدف من تكرارها لكي يفهم معنى الحل !!!!1 :: الحلول العامه .. 1 - المحافظه على الصلوات و السنن الرواتب.. 2 - الاستغفار.. 3 - الذكر... 4 - القيام ثلث الليل الاخير.. 5 - الدعاء.. 6 - قراءاه القراءن .. .................................................. الحلو الخااااااااصه ... اولا : لا تتجسسي على زوجك واعلمي حكم التجسس شرعا ؟؟ ايضا لا يحق لك البحث بجوال زوجك او الانترنت .. حتى ترتاحي ببالك وقلبك ويسلم عقلك من التفكير.. اذا اول طرق النجاح لحياتك الزوجيه الابتعاد عن التجسس والتلصص لزوجك ... ................................... ثانيا .. اعلمي ان الخيانه شرخ في العلاقه الزوجيه .. ومتى مادخلت بيت اعلنت عدم الثقه ..ونهايه الثقه..وبدايه الشك..ونهايه الحياه الزوجيه لا تتساهلي هذا النوع من الخيانه احمدي ربك .. انه لم يخرج معهن ... ولكن ماذا تفعلي انتي لكي تمسكي زوجك قبل الوقوع بالمحظور ؟؟ 1 - عدم التجسس نهائيا.. 2 - التزام بالحلول العااامه .. 3 - الاهتمام بزوجك كثيرا .... 4 - التجديد في حياتك الزوجيه وكسر الروتين.. 5 - البسي احسن مالديك واطبخي جيدا لزوجك و جددي حياتك الزوجيه.. 6 - زوجك ناصحيه مره بالمباشره ومره بالكتاب ومره بالشريط الاسلامي.. 7 - اعلمي ان زوجك لن يرتدع الا اذا خاف من الله واتقاه ..لذا خوفيه بالله واخبريه انه دين .. 8 - عند مناقشته بهذا الموضوع قولي ما رأيك ؟؟؟؟؟ لو كنت انا افعل كذا مارايك ؟؟؟ اين غيرتك ؟؟ 9 - حاولي طاعه زوجك بشكل عام .. 10 - قومي زوجك للصلوات وركزي على ان يصلي قبل النوم ويوتر ويذكر الله .. 11 - كوني ذكيه في تعاملك مع زوجك بيني له ثقتك احيان وقولي اتمنى ان اثق بك على طول غير من حالتك ؟ 12 - ركزي على عيوب زوجك وحاولي معالجتها ونمي عنده حس الخوف من الله .. 13 - استثيري غيرته عليكي بشتى الطرق لانه اذا ارتقت غيرته خاف على محارم الناس.. ................................. استخدمي مبدأ ( اشغل زوجي عن الحرام حتى ينشغل بي فلا يفكر بغيري ) كيف .. 1 - تزيني دائما له و غيري من رومنسيات زواجك.. 2 - اغرقي زوجك بحنانك.... 3 - اذا كان على النت فكري بانه لا يطول اكثر من ساعه او اقل واطلبي منه مثلا بذكاءخروج من المنزل لشراء غرض معين او تناول القهوه معك او او ... المهم لا يطول حتى لا يضعف بالوقت الحالي.. 4 - جواله كوني قريبه منه وحنونه عليه واذا انشغل بجواله بعد بذكاء لا تعيه يطول بالمكالمه والرسايل وهذا بذكاء شديدي حتى لا يحس بعدم ثقتك عليه .. 5 - غيري من كلامك معه ونقاشك معه ... 6 - تابعي برامج عن الخيانه الزوجيه ودعيه يشاهد معك وناقشي معه.. بصراحه الاتكال على الله .. الصبر مع الدعاء مع اشغاله بحبك هو الحل .. وقفه الخيانه مرض عضال ومتى مابتلي بها شخص افتقد لثقه من حوله واصبح ضعيفا جدا لذا لا تستغلي ضعفه الا بالخير ... لا تضغطي عليه .. لا تذكريه بالموضوع كثيرا الا بالخير والنصح وليس بغرض التشفي حتى لا يعاندك.. همسه اعلمي ياختي الفاضله ان صبرك عليه حاليا ..وقفه منك في جانبه لانه مريض لكن احذري الخيانه لا تتعدى الاتصالات لا بد ان تتوقف وتموت في هذه اللحظه اذا تطورت فانكي في خطر عظيم .. لا تقولي احبه بعدها لا تقولي ساصبر اذا تجاوزت مشكلتك وكبرت واصبحت لا تطاق ولم ينتبه زوجك لك ويحترمك ويقدر معنى الخيانه اذا هنا اليك حل منطقي وهو ابلاغ من تثقين به من اهلك ومن تثقين به من اهله رجلين رشيدين كبيرين في السن يعرفون كيف يوقفونه عند حده ويأدبانه اذا لم ينتصح ابدا عندها عليكي انتي بالاستخاره واتخاذ طريق مناسب لك بالحياه لانك مهما صبرتي على خائن لن ترتاحي يوما معه.. لذا ايضا الدين اوصيك فيه لك وله .. اجعلي منه انسان متابع للمحاضرات والندوات والمشائخ .. غيري من مفاهيمه .. أسال الله ان يهدي زوجك ويستر عليك ويقر عينك بتوبته .. اخيرا لا بد ان يترك الذنب خوفا من الله ...وليس خوفا منك او البشر او الفضيحه ذكريه بالله دوما.. والسلام عليكم |
الله يعنك وييعين كل زوجه يخونها الرجل...
اختي ادعي الله انو يهديه لك |
يعلم الله اختي الكريمه ان حالتك آلمتني في الصميم وترددت كثيرا في الرد عليكي
فالصراحه خشيت ان يصدر عني مايزيد قلقك ومخاوفك لكن آثرت الرد للامانة .علني افيدك بخلاصة تجربتي تقولين احبه ..وهذا هو الحب الذي يذل صاحبه ..فاحذري اختي ان تجعلي حبك له اقوى من حرصك على مرضاة الله وتجنب الوقوع في الحرام الامر الثاني اقول لك ان من شب على شيء شاب عليه .. فاعملي جهدك ان توقفي تلك الخصلة المدمرة في بداياتها بالخطوات التي ذكرها الاخ السيف المهند اياكي والتسامح في هذه الامور خذيها عن تجربة .. فالزوج يتمادى في ذلك وكل مره تكون اجرأ من التي سبقتها معتمدا بذلك على تسامح زوجته. انتبهي فانتي مازلت تحبينه الان لكن تكرار الخيانه سيفقدك الثقة بنفسك لاحقا . عندما تبحثين له عن مبرر ولاتجدي .وعندها يبدأ الدمار الحقيقي أسأل الله تعالى ان يهدي زوجك ويرده الى صوابه ويقوي ايمانه وخوفه من الله تعالى ويعطر حياتكما بالامان والمحبة والاستقرار |
تبين الصراحه
شوفي بالنسبه للخيانه هذي مااتوقع ان اذا قلتي لاحد من اهله بيفيدوكي ابدا لان هذا ولدهم وبعض الناس ماتدخل نفسها بهالامور افضل لك خليه يوضي وخليه يحلف بالمصحف انه مايعيد يكررها وخليه يغير رقم جواله للامان وحاولي تحلفيه انه بالمنتديات مايكون في رسايل خاصه بينه وبين البنات بس عالعام قوليله يحافظ على بيته ولا تدخلي احد بينكم بس حاولي تغيريه انتي بحنانك وتوسلك اليه وترى الخيانه زي المرض الله لا يبلانا مو بالساهل انه مايتكرر الخيانه مره الله المستعان |
بعض الرجال مايملا عينة الا التراب قابلي البنت هدديهابا لفضيحة قدام اهلها والناس لو باقي تكلم زوجك خليك قاسية ع هذة الحقيرة عيشيها في رعب حسبي اللة عليها حرام تخرب بيت واحدة
|
اختي والله مشكلتك صعبة صراحة
والله يعينك .... وتقربين انتي ما بيدك شي كثيير ... يعني حلها مو بيدك ... لكن انا بقترح عليك الآتي :- تروحين مع زوجك مكان هادئ .... كوفي شوب مثلا وتقولين له بفتح معاك موضوع جدي ... وهام بحيث انه يهتم للموضوع وتصارحينه بكل الي بخاطرك... وتقولين له ان اذا استمر على وضعه ممكن يهدم بيته وحياته الزوجية وان شاء الله ممكن هذه الجلسة الجادة تثمر خير :) :) |
اقتباس:
|
أختي تبين نصيحتي لاتتساهلين وتسكتين عليه
أختي زوجي في البدايه كان بس مكالمات وفي كل مره أكشفه يقول سامحيني وماعاد أكررها ويرجع وتطور الأمر صار يواعد ويخرج معهن وينام خارج البيت و000و000الباقي أكيد مفهوم والسبب اني في كل مره أتسامح معاه وأتساهل والان أنا ببيت أهلي وطالبه الطلاق لان حياتنا خلاص تدمرت أختي خذي بكلام السيف المهند كلام رائع كفى ووفى 00 ================================================== ================ |
...
الله يكون بعونك ويهدي زوجك انت الاصغر والاعقل الله يصبرك وينور على قلبك ويفرج همك |
عشان تريحي نفسك انظري امر الخيانه بانه مرض وانت تساعيدنه على الشفاء وخصوصا زوجك يعتبرفي فتره ماقبل النضوج وان شاء الله الحال يتغير
حاول ماتسوي مشاكل معاه وتعطيه زياده في الحب والحنان حتى لا يحتاج حبيته الاولى التي يعلم انها سوف تسامحه وتغدق عليه من الحب والكلمات المعسوله حتى لو كان مخطأ وانه في نظرها الحبيب الي ماله عيوب ادري صعب ان تحبيه في هذا الوقت وانتي حاسه بجرح وعدم محبه له في الوقت الحالي بس لازم تجي على نفسك شوي خصوصا انتوا في بداية حياتكم وماسوف تسنينه الان سوف ترينه بعدين ربي يصلح حالكم ويهديه لك ويوفقك ويسعدكم يارب |
| الساعة الآن 02:35 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©