|
مشكلة بين أبي وأمي قد تصل إلى الطلاق !! أنتم أملي بعد الله .. ساعدوني
بسم الله الرحمن الرحيم
كيفكم ان شاء الله كلكم بخير والله العظيم عندي مشكله وماني عارفه لها حل . . وافتكرت المنتدى قلت يمكن يساعدوني انا مره تعبت وانا افكر.. المشكله بين امي وابويه .. وهيا على زاوية الطلاق .. المشكله بدت قبل شهر وتلاته اسابيع امي خرجت من البيت من غير ماحد يدري جلسنا ندق عليها مليون مره وماردت على اي احد فينا .. في الليل دقت عليا وكلمتني من غير اي نفس اقلها انتي فين وليش خرجتي تقلي ما ابغى اعيش معاكم قلتلها طيب انتي فين ماردت عليا وقفلت بوجهي.. وبعد كدى قفلت الجوال لمدت اسبوعين واحنا ما ندري عنها اي شي مره قلقنا عليها .. يوم الجمعه بعد مرور اسبوعين في الليل ارسلتلي تطمن من رقم تاني طلعت شريحة تانيه .. فدقيت عليها اقلها ليش خرجتي وليش وليش تقلي طفشت من حياتكم اقلها طيب ليش سويتي كدى مو احنا بناتك وعندك بيت وزوج ومايسير تطلعي من غير مايدري .. سكتت قلتلها طيب انتي فين نجي ناخدك وزي كدى قالت ما ابغى ارجع فجلست اقنع فيها قالتلي طيب حفكر وحرد خبر .. المهم رجعناها البيت وماشي الوضع وماحد سوالها شي .. لاكن انها حتتطلق ... المشكله في دا كلو.. انو اهلها مو في السعوديه فلو اطلقت لازم تسافر عند اهلها .. بس في الجواز حقها في مشكله وبابا يحاول من هنا ومن هنا عشان يصلحها .. وهيا كل يوم تصرخ تقول ابغى اسافر طفشت ابغى اسافر طفشت وبابا كل يوم يقلي حاولي تحنني قلبها عليكم واتكلمي معاها انا كل ما اتكلم معاها تطنشني او تصرخ فيا وتقول مالي دخل فيكم واليوم سارت مشكله بينهم وصراخ ومشاكل ..وبابا برضو يقلي حاولي تتكلمي معاها ... ابغى حل ايش اسوي وايش اقلها واصلح بينهم ولا اخليها تروح .. ترى وربي انها دايمن تجلس تتكلم عننا في اشياء ماسويناها وتطلع فضايح ومشاكل حتى عند صحباتي في المدرسه وتطلب من الناس وابويه موفر لها كل شي.. الله يخليكم قولولي ايش اسوي وربي راسي يعورني من كتر ما افكر اسفه ع الاطاله تم تعديل العنوان ليتناسب والمحتوى . المراقب / النور والحنان |
الله يصلحها
|
الله يكون بعونك حبيبتي حاولي تتكلمي معها وتساليها ليش تبغى تسافر او اكتبي لها رساله تحنن قلبها عليكم وشوفي وش بيكون ردها ....... والله يكتب لكم اللي فيه الخير يااااااااااااااااارب
|
بيل الفجر صلي واطلبي ان يصلح الله بينهم
|
الله يفرج همك
|
عفوا هل هي مريضه نفسيا
خليها تسافر تقعد كم شهر وفي الاخير بترجع بيتها مافي احد يتحمل احد الايام هذي يعني حتى اهلها ممكن ان الكلام كله تهديد قولي بابا قال خلاص اوراقك قربت تخلص وبتسافري وهو خطب وحده وحزنيها على سوته فيكم وكيف بتعيشوا مع مرت ابو ووو يمكن تحزن عليكم بس الله يستر لا تروح تعند اكتر عاد استشيري ابوك هو ادري بطبعها وكان الله في عونكم لاتنسي الاستغفار |
ان شاء الله الله بيهديها بس انتم خلوها مع نفسها تفكر هي مشغل فكرها موضوع السفر وانا مع الاخ sweet2244بفكرته وبعدها بتندم وبتحاول ترجع بقرارها
|
امك لديها سر تخفيه عن الجميع
وبارك الله فيك ورد امك اليكم رداً جميلا |
انا مع اخوي سطام اكيد في سر
وبعدين حرام امك جوازها فيه مشكله يعني ولا مره راحت لاهلها صعبه اكيد مشتاقه لاهلها والله الغربه صعبه حتى لو كانت بين زوجها وعيالها مافي مثل الاهل وخاصه الام والاب خلوها تروح يمكن ترتاح نفسيتها وتغير رايها |
شوفي امك لازم هية تاخذ القرار يمكن تعرف اشياء وما تعرفوها انتو
اختي العزيزة الله يكون في عونك بس اقوللك انه امك ادرى بمصلحتها ومصلحتكم وهي قادرة تتخذ القرار المناسب لها حاولي تقنعيها واذا ما اقتنعت توكلي على الله واللي الله كاتبه راح يصير ودوخة راسك لا راح تقدم ولا تاخر..
|
باختصار شديد ... أمك طرأ عليها تغير مفاجئ ... سببه شي لم يكن موجودا في السابق أو أنه كان مستورا وبدا يظهر ... أختي ... والدك رجل طيب حكيم ... وإلا لكان له معها موقف آخر ... أما والدتك ...:: :: فيبدو أن هناك من يحاول أن ينبر وينقب عن جروحها .. ويهولها في نظرها حتى بدات تطفش وتظهر تذمرها الذي كان مكبوتا داخلها ... حتى أتى أحدهم فأظهر الخافي والمستور ... أستغرب جدا جدا :::: أين كانت فترة الأسبوعين التي قضتها خارج المنزل ...؟!؟! من خلال كلامك ... يبدو أن أمك مصابة بداء العصر وهو (( الإكتئاب )) .. أسرعوا بإنجاز معاملة جوازها .. وأرسلوها إلى أهلها دون طلاق .. حتى يطيح اللي براسها ... ومن ثم تعود لكم كما كانت من قبل .. ولا أعتقد أن أمرأة تصبر على فراق زوجها وبناتها ... أصلح الله أحوالكم وأحوال المسلمين ... اللهــــــــــــــــم آمـــــــــــــــين .. دمت بحفظ الرحمن ... |
الله يفرج همك ويهدي أمك وتتراجع عن رأيها
|
السلام عليكم ورحمة الله وبركاته
اشكر كل من مر على الموضوع ودعا لي واسئل الله انا يفجر همومي وهمومكم اول حاجه .. انا مع اخوي سطام اكيد في سر وبعدين حرام امك جوازها فيه مشكله يعني ولا مره راحت لاهلها صعبه اكيد مشتاقه لاهلها والله الغربه صعبه حتى لو كانت بين زوجها وعيالها مافي مثل الاهل وخاصه الام والاب خلوها تروح يمكن ترتاح نفسيتها وتغير رايها اختي العروس .. اول حاجه ام امي ياما جات السعوديه ولا فكرت تسأل عن بنتها ماغير انها زوجتها ولا عاد كلمتها وامي هيا الي بتسئل عليها .. امها كل ماكلمتها تطلب منها فلوس وشغلات والمشكله هي مو محتاجه.. وامي اصلا ماتحب امها يعني راحت ولا ماراحت مايهمها بس هيا كدى ماتبغى تجلس معانا.. وهيا تبغى تروح من غير رجعه .. وشاكره جدا مرورك والله يوفقك ويرزقك الذريه الصالحه .. امين يارب ____________________ الله يكون بعونك حبيبتي حاولي تتكلمي معها وتساليها ليش تبغى تسافر او اكتبي لها رساله تحنن قلبها عليكم وشوفي وش بيكون ردها ....... والله يكتب لكم اللي فيه الخير يااااااااااااااااارب اختي ميااااااا.... والله اني جلست ياما معاها وياما اتكلمت لاكن كل ما اتكلم تجلس تصرخ فيا .. وياما جبتلها هدايا ورسايل مالقيت منها ولا كلمة شكر .. وعلى تحنن قلبها ولا عمرها حنت علينا كلنا بنعاني من حالات نفسيه بسببها وانا سارت عندي حالت اكتئاب والسبب هيا .. ياما فضحتني بدون اي سبب وتبغيها تحن مافي فقلبها حنيه ... اشكر لك مرورك والله يوفقك لما يحب ويرضى .. امين يارب _____________ عفوا هل هي مريضه نفسيا خليها تسافر تقعد كم شهر وفي الاخير بترجع بيتها مافي احد يتحمل احد الايام هذي يعني حتى اهلها ممكن ان الكلام كله تهديد قولي بابا قال خلاص اوراقك قربت تخلص وبتسافري وهو خطب وحده وحزنيها على سوته فيكم وكيف بتعيشوا مع مرت ابو ووو يمكن تحزن عليكم بس الله يستر لا تروح تعند اكتر عاد استشيري ابوك هو ادري بطبعها وكان الله في عونكم لاتنسي الاستغفار اختي سويتي...والله ما ادري مين الي مريض نفسيا احنا ولا هيا .. هيا تبغى تسافر نهائيا وقلتلها انو بابا قال اوراقك بتخلص وراح تسافري وماترجعي و و و و .. تقلي عادي انا ابغى افتك اصلا ما ابغى اعيش هنا.. اقلها ايش السبب تقلي كدى طفشت..المشكله هيا ماتشكر النعمه الي هيا فيها يعني بابا عاملها ومسويلها ويشتريلها ويوديها ويجيبها لاكن عيا ماتشكر.. وكل خير نسوي لها تردو لنا شر .. جزاكي الله خير وادخلك من اوسع ابواب جنانه .. امين يارب _________ الاخ ابو وضحة ... شاكره لك مرورك أمك طرأ عليها تغير مفاجئ ... سببه شي لم يكن موجودا في السابق أو أنه كان مستورا وبدا يظهر ... من ناحية طرى عليها شي مفاجئ هوا طرى تغير في تصرفاتها. وتصرفاتها بدون اي شبب تغيرت .. فيبدو أن هناك من يحاول أن ينبر وينقب عن جروحها .. ويهولها في نظرها حتى بدات تطفش وتظهر تذمرها الذي كان مكبوتا داخلها ... حتى أتى أحدهم فأظهر الخافي والمستور ... هيا من يومها وهيا متذمره مافي يوم يعدي الا والبيت صراخ بسببها بسبب ولا بدون سبب المهم تجلس تصرخ يعني ماخلتنا نرتاح مره لا نعرف نزاكر ولا نسوي اي شي ولما اقلها خلاص مافي شي يستاهل بترفع صوتها اكتر وبالزات لو في بابا ولما يقول ايش في تحط السبب فيا دايمن حتى لو ماكنت انا السبب... أسرعوا بإنجاز معاملة جوازها .. وأرسلوها إلى أهلها دون طلاق .. هيا الي تبغى تتطلق.. وماتبغى ترجع .. حتى يطيح اللي براسها ... ومن ثم تعود لكم كما كانت من قبل ..ماشفت منها شي كويس غير يمكن انها ربتني وانا صغيره وما ادري ايش من تربيه الله يصلحها بس ولا أعتقد أن أمرأة تصبر على فراق زوجها وبناتها ... هادا هوا الشي الي بيجنني لاكن ما اقدر اقول الا الله يعين وبعدين انا اصلا ما ابغاها تجلس بس ماحبيت ابين لها.. جزاك الله خير.. وادخلك من اوسع ابواب جنانه.. امين يارب اشكركم كلكم على مروركم.. وجزاكم الله خير |
اتوقع والله اعلم امك كانت تعاني من طفولة قاسية
علشان كذا هي مو عارفة كيف تعطيكم الامان والحنان الي هي حتى تبحث عنها وما اتوقع فيه ام ما تحن على اولادها ولا تحبهم لاكن الظروف الي مرت فيها وهي صغيرة وهي كبيرة كانت صعبة عليها يمكن لما تزوجت كانت تتوقع تلقا نفسها لكن حست انها غريبه بين وجها واولادها علشان هي كذا تعبانه وماله الرسول اللهم صلي عليه قال امك ثم امك ثم امك و قال تعالى : ( و اخفض لهما جناح الذل من الرحمة وقل ربي ارحمهما كما ربياني صغيرا ) حرام لما تعلمتي وكبرتي تجحدين امك انتي تعليمك احسن من تعليمها واحنا في زمن الانترنت امك تحتاج توقفين جنبها وتعيدين تربيتها وتهذيب سلوكها في حدود الادب تحتاج الى من ينور دربها ويمكن هي مريضه والمرض مؤثر على نفسيتها ترى احنا تعليمنا غير تعليم امهاتنا انتي تقرين بالانترنت عبن المشاكل وحلولها وعن الحالات النفسية وغيره هم لاقروا ولاتعلموا هذي الاشياء ولا عمر عيونهم تفتحت على طريقة حل هذي المشاكل ولا يعرفوا يطوروا انفسهم هذا والله اعلم والله يحنن قلوبكم على بعض ويرزق امك الرضى |
الله يهديها و يحننها عليكم
|
اقتباس:
مع رأي أختي العروس |
في اعتقادي هناك مشكلة بين امك وابوك لأن مهما كان أبوك انسان طيب لكن ما أظن راح يسكت على غياب زوجته من البيت اسبوعين بحالهم....
قد تكون هناك امور كثيرة مخفية بين الابوين....غربة امك وتحملها البعد علشان خاطركم يجب ان يأخذ بعين الاعتبار.....فهي زوجة وأم ومتغربة كم من سنه حتى لو لم تنجح في دورها كأم وما في انسان كامل.....وصريخها ناتج عن الكتم اللي في قلبها.....ضعي نفسك في مكانها قد تكون لديك حلول لتوسع أفكارك ودرايتك لكن فكري في التطبيق وليس التفكير فقط.... أمي الله يطول في عمرها دايما تقول ما راح تحسون إلا لما اتكونون في مكانها انسانه مسؤولة عن اسرة كاملة من صغيرها لكبيرها.....يجب ان تكون امك فخرا أولا....وان تذهبي إلى والدك وتستفسري منه ماالأمر وأمر سكوته... كان الله في عونكم جميعا...وفقكي ربي |
فيه سر
مافيه ام ماتبغي زوجها واولادها إلا إذا كان فيه شي حتى لو جلستي تكلميها مليون سنه ماراح تفتنع لان فى بالها شي معين وقرار مستحيل تتراجع عنه ايش هوه القرار الله أعلم لكن خليها تسافر وانتى الله يصبرك حاولوا تسايروا حياتكم وتعيشوها زي ماربناا كاتبها لان كل شي مكتوب خلوها تسافر وادعوا انه ربي يهديها |
أختي الكريمة ..
حاولي أن تقابلي والدتك وأخبريها أنك تودين رؤيتها قبل أن ترحل وحاوريها بهدوء حتى تعرفي دوافعها لهذا التصرف وإذا عرف السبب بطل العجب !! أنا متأكدة أن هناك سبب قوي جدا لهذا التصرف وإذا تم معرفته بالتالي سوف تحل هذه المشكلة .فقد يكون السبب اضطراب نفسي أو مشكلة زوجية أو ربما ...سحر تفريق ..لاتسبعدي أي شيء ولكن احرصي على أمك فقد يكون حل مشكلتها على يديك وبه تنالين عظيم الأجر من الله . أمك وحيدة وغريبة وليس لها إلا الله ثم أنتم فلا تتركوها هكذا ..اقتربوا منها وارحموا ضعفها .. وختاما أسأل الله بأسمائه الحسنى وصفاته العلى أن يجعل لك من كل هم فرجا ومن كل ضيق مخرجا ومن كل بلاء عافيه ..وأرجو ان تطمنينا على أخبارك.. |
أختي الكريمة ...
بداية ندعوا الله عز وجل بأسمائه الحسنى وصفاته العلى بأن يحنن قلب أمكم عليكم وعلى أبيكم .. وأن يحنن قلب أبيكم عليها كذلك .. وأن يلم شملكم جميعاً على خير ... لدي بعض الاستفسارات أطرحها عليكِ لعل الموضوع يتوضح أكثر .. فالواضح ( والله أعلم ) أن المشكلة فيها شيئاً من الغموض أولاً : هل هذه المشكلة جديدة أم قديمة ؟ يعني هل من يوم أن وعيتم على الدنيا كانت أمكم هكذا ؟ ثانياً : كم عددكم ( الإخوة ) وهل أنتِ الكبيرة ؟ ثالثاً : هل حدث أن جلستِ إلى والدك ( أو أحد إخوتك ) ليسمع منه رأيه في تصرف أمكم ؟ ولي مغزى معين من هذا السؤال ... وهو هام جداً ... فلا بد في مشكلة كهذه ومع تصرف والدتكم أن تضعوا كل الاحتمالات رابعاً : هل فكرتم أو حصل أن تذهبوا بأمكم إلى طبيب نفسي ؟ خامساً : هل أمكم لديها إخوة وأخوات ؟ وإن وجدوا فكيف علاقتها بهم ؟ سادساً : كيف علاقة والدتك مع الله عز وجل ؟؟ وكذلك كيف هو والدكِ في هذا الأمر ؟ وكيف أنتم ؟ أتمنى أن تكون إجابتك على هذه الاستفسارات تكون سبباً في مزيد من التوضيح لنا .. وتسهم في المساعدة على حل بإذن الله تعالى .. وأعتذر أختي أشد الاعتذار لو كان شيء في طرح الأسئلة غير مناسب .. فما النية إلا المساعدة إن شاء الله .. كان الله في عونكم ... وفرج همكم .. ونفس كربكم .. |
السلام عليكم
اختي لاتتركين امك ابداا قرربي منها بكل الطرق واحتسبي الاجر وتستاهل امك انك تتحملينها وتضحين لاجلها لانها ببساطة امك استمري بالاتصال بها ولو قدرتي قابليها وضميها وحسسيها انها مالها الابيتها وعيالها حتى ابوك بايين انه شخص طيب مادري لية رجعتينيلى سنين كثيرة للماضي واتذكرت الحالة الي جت امي وهبلت فينا وكانت تغلط على ابوي قدام الناس وقدامنا وطلبت الطلاق وكان ابوي اكثر من طيب معاها ومتحملها وفي الاخير حصلت على الطلاق وضلت تتصل من بيت اهلها اتوصينا على ابونا وماكانت مرتاحة ابد في بيت اهلها الله يرحمها ويسامحها بس نصيحه سوي كل الي تقدرين علية عشان مايجي يوم وتندمين على تقصيرك ومالي الا ادعي لكم بالتوفيق |
اولا اختى الفاضله ابوك يقدر ان يحاول معاها فان علاقة الرجل بالمرأة قويه بحكم العشره فخليه هوه يحاول معاها .
2- اكيد فى شى حصل خلها تتخذ قرارها . 3- فهميها لما تكلمك انه مصلحتها انها تعيش معكم لانها ربتكم وودها تشوفكم متزوجين والحين هي قطعت نصف الدرب معكم ومع ابوك فقولى لها اماه يا ترى لا تريدين ان تشوفينا متزوجات هذا حلم كل ام فكيف بك ؟؟؟ 4-بعدين اذا كانت هذه اول مشكله غريب تتخذ قرار بالذهاب ..اين المشكله ؟؟يبدو انها خفيه قد تكون بينها وبين ابوكى وكلا منهما لا يريد ان يخبر احد بها . 5 - لماذا لا تلجأين الى احد من اهلها وتكلميه بالهاتف . 6- المرأة لما تتزوج خلاص يرتبط مصيرها بمصير زوجها ..يعنى ما فى عوده الى بيت اهلها الا للزيارات السريعه . .................... 8 - لتعرفى المشكله التى حدثت بين اى طرف ..خليها تتصل بابوك وقولى لها اتصلى بابى يريدك هنا من خلال ردها سس\تتاكدى هلى هناك مشكله خفيه بينهم ام لا . 9- الغريب ايضا ان ابوك ما اشتط كثير وهذا يؤكد انه فيه مشكله بينهم . 10 قولى حق ابوك لا تطلقها ابى ارجوك حتى لو راحت عندهلها ..خليه يتزوج ثانيه اذا رغب ذلك بس لا يطلقها لانها قد ترجع الى رشدها .فمهم ان ابوك يكون عاقل ولا يطلقها ابدا يخليها تسير . قولى لامك وتحديها وبانها تضعف امام اول مشكله تحدث ولا تستطيع حلها فانك ذات اراده ضعيه لتثيريها لعلها تقبل التحدى وترجع . 12- هل يوجد من اخواتك من هم ذو مكانه لدى امك خليها تكلمها وتستعطفها لعلها تؤثر فيها . 13 وقبل ذلك عليك بالدعاء والصدقه والاستغفار والتضرع بين يدى الله وصلاة الليل . والله يكون فى عونك . عذراً منك أخي الكريم . فذكر البلدان و تسميتها غير مسموح به في نظام المنتدى . شكرا المراقب / النور والحنان |
امك محتاجه طبيب نفسي والعلم عند الله
اذا انتو من المقتدرين ممكن تجيبي طبيبه نفسيه على اساس انها وحده من ام صديقاتك تبي تشوفها تتعرف عليها وتبدأ معها المشوار شوي شوي وكذا بتعرف الطبيبه النفسيه وش تعمل معها وتقول لكم كيف تتعاملون مع امكم واذا مش مقتدرين حاولي فيها تروح الطبيبه النفسيه بس ما تقولي لها انها طبيبه نفسيه لانها اكيد بتقول لكم انا ماني مجنونه وما ابي اروح حل اخير اعتقد تروح هي وابوكي سفره على بلد يمكن فعلا هي بحاجه الى راحه من الاسره وكلنا نمر بهذه الحاله لكن لا لدرجه طلب الطلاق انا لي فتره حابه اجلس بروحي وماني قادره دخلت على غرفتي واقفلت الباب وجلست بروحي وحسيت براحه فكل امرأه على ما اعتقد لازم توخذ اجازه اسريه لترجع وتعطي من اول وجديد وفقكم الله لكل خير وطمنينا في رعايه الله |
حبيبتي امك لو ماكانت تحبك ماكانت كلمتكم تتطمن عليكم... يعني مهما قالت وسوت يظل بقلبها حنية حتى لو حاولت تخفيها
المشكله اللي بينها وبين ابوك الله اعلم ايش سببها.. صحيح ابوك مدللها ومدلعها بس انتي ماتدرين ايش اللي بينهم يا قلبو والازواج بينهم اسرار انتي حاولي تطلعي من الموضوع وتركزي على دروسك وتجتهدي واذا ربي كاتب ينصلح حالها بينصلح .. بس لاتنسيها من الدعاء والابتسامه والمعامله الحسنة |
هاذي مشكلة الزواج من الأجنبيات الأولاد هم الضحيه,,الله يحنن قلب امك عليكم يارب
|
حبيبتي احسن حل خلوها تسافر وتعيش مع اهلها شي شهر زمن
رح تحس انها فقدت كتيررررر شغلات ورح تشوف نسوان اهلها كيف عايشين مع ازواجهم وولادهم ورح تشوف انه حياتها جنة مقارنة مع الناس خلوها تسافر ورح تشوفوا كيف رح ترجعلكم مشتاقة ملهوفة لبيتها وتحس بالنعيم الي هي فيه واصبروا عليها واهم شي تعوذوا من الشيطان هاي من وسوستة الله يلعنة وبيحكوا الي بيسافر كتير بيشوف كتير وبيضل يحكي ما في احلى من بيتنا اتركوها تسافر |
هلا اختي والله يعينك يمكن هي تبي بيت جديد او العفش يمكن تشوف اشياء عند صاحباتها بيت فخم سفر لبره انا ماادري بس انا زوجه واعرف كيف الزوجات يفكروا وممكن تكون عين حاولي تخلي شيخ يقرا عليها الواضح انه ابوك مره كويس معاها ماشاالله عليه حسيسيها انك محتاجالها انت واخواتك ترى الام قلبها ضعيف مره حاولوا تسوا فيزا زياره لامها او اي احد من اهلها اعرضي على الوالد ياخذها ويسافروا لحالهم على اي بلد مارحتله وانشاالله تنحل المشكلة
|
إرحمو من فالأرض يرحمكم من فالسماء ياحبيبتي حاولي تقنعين أبوج يساعدها ويخلص جوازها
وواذا هي بهالإسلوب معاكم ماالومها ابدا حرمتوها اهلها اكيد بتحقد عالكل ساعدوها واقفوا معاها مهما كان هذي أمكم... وبالتوفيق |
| الساعة الآن 12:31 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©