|
لا أتوافق مع خطيبي .. وأود فسخ الملكة !!
السلام عليكم ورحمة الله..
أنا ملكت صار لي تقريبا شهرين وبصراحة خطيبي غريب عجيب مالقيت له حل..هو كبري بالضبط أنا وهو نفس العمر 23 وجد من مكالماته حسيته للحين صغير.. طبعا اول مكالمه كلمني وعلى طول دخل بموضوع تاريخ العرس وبعدها قلت له انا مااقدر اتصلك اذا انت تبي تتصل براحتك لان جوالي باسم ابوي ومااقدر فواتير طبعا انا اقصد انه هو الحين المسئول عني وكنت حابه اشوف تحمله للمسئولية فقالي خلاص انا بدفع فواتيرك قلت لا اسمح لي ابوي ماراح يرضى كنت ابيه يتلحلح ويجيب لي رقم باسمه قام قالي خلاص اشرايك اطلع لك رقم؟؟<<مبروك حس على دمه قلت اوكي اللي صدمني انه جاب لي رقم تعبئه!!مو مسألة أنا بنت فاتورة هلي مطلعين لي وهو كان راضي يدفع فواتيري ليش لما جاء عليه راح عطاني رقم تعبئة المهم سكت وامري لله الا راح سالني عندك جهاز؟؟قلت لا قالي خلاص بجيب لك اصلا ذوقيا محد يقدم شريحة بدون جهاز بس قلت يمكن مايعرف ماعنده خلفية اللي ثدمني عطاني جهاز من اجهزته مستخدمه لين شاف له ربي..سكت وقلت مسكين بريء وعلى نياته..بعدها قلت له الرقم اللي جبته لي عليه ازعاجات كل شوي هنود يتصلون<<<طلع الرقم لهندي يشتغل عندهم ومستعمل قالي عادي الا هنود يعني اهم شيء مب خليجي<<اش هالمبدأ قلت له اشرايك تغيره لي قالي خلاص بنتظر لين اخر الشهر بينزل عرض من الاتصالات الكرت ب50 ومشحون بعد أنا هنا صدمني يعني راتبه فوق ال13 الف وبعد يتحرى عروض ليش؟؟!! ومره قالي لايكون انتي من البنات اللي يفصلون فستانهم ب30 او 40 الف؟؟ قلت لا اشدعوه واللي تفصل بهالقيمة هي حره دامها تقدر <<<صح انا مستواي عالي وهلي ماشاءالله بس عندي عقل اعرف وين اصرف فلوسي الا قالي المهم فصلي بقيمة معقولة والا اشرايك تاخذين اجار.!! انا هني انصدمت اش له خص بهالتفاصيل وليش مهتم سكت وماناقشته لان تونا ماصار لنا نكلم بعض.. المره اللي بعدها قالي شوفي تحملي تلعبين بمهرك حاولي تشترين الاهم والباقي خليه لك يمكن تحتاجينه عقب او يحتاجه شريك حياتك..!! أنا هنا حاولت اسوي نفسي ماسمعت جد صدمني ....قلت يمكن مايعرف يسولف وخانه التعبير...لين صرت اعطيه اختبارات بالمادية وجد انصدمت الاخ مصر اني اتوظف على اني ابين له اني مابي قالي ليش توظفي وحتى لو جانا عيال اش كثر حريم كبروا عيالهم وهم للحين يشتغلون...!! ويوم عرف اني طلعت من المدرسة عصب قالي ليش تروحين لوظيفة ثانية راتبهم قليل والمدرسة راتبها اعلى قلت له بس دوامي صعب ترى انا برجع بعدك غير ورش العمل والخرابيط قالي عادي عندي وايش فيها لو رجعتي بعدي..!!<<<لاتعليق ومره اهديت له هدية من محل راقي واليوم اللي بعده راح للمحل عشان يضيق الساعه اللي جبتها له الا قالي تدرين لقيتهم مسوين تنزيلات توهم ياليتك صبرتي كان خذتيها بالتنزيلات احسن.....!!<<<لاتعليق ومره قالي شوفي انا ابي زواجنا معقول انا ماابي اضطر اخذ قرض ..!!<<<طيب لا ياخذ قرض بس تخيلوا كل يوم والثاني هله او خواته يقولون لي تدرين مسكين الله يعينه طلع مايجمع مع انه متوظف صار له 3 سنين ومامعه شيء بس انتي ابوك ماراح يقصر معك طيب ادري ابوي ماراح يقصر بس دام الاخ يبي يتزوج ليش ماجمع؟؟ يكفي امه اللي دافعه الشبكه اللي انصدمت انها عادية محد يقدم شبكه قيمتها قيمة طقم عادي بس سكت وقلت على الاقل قدم اللي يقدر عليه غير الدبله اللي ماافتكر يقدمها ويوم قلت له انا بروح اخذ لي دبله بس ابيها على ذوقك يعني راعيت انه مايعرف بهالامور فقلت خلاص باخذ لي بس ابيها بذوقه عشان يكون لها قيمة قام قالي لا خلاص انا بجيبها لك مع اني اشوف مالها داعي بس لان خاطرك فيها بس حطي في بالك اني مارضخت لرايك بس عشان خاطرك فيها يجيبها.. غير مكالماته اللي بالتقطير ومايهتم ولا يسأل حتى لو وصيته يقعدني من النوم يتصل اذا مارديت عادي مايرجع يهتم ويشيل همي لا مستحيل يسأل .. أحس أنا اهتم أسأل وغصب طيب خليت نفسي احبه لاني اقول هو زوجي ولازم احبه على انه ماسوى لي شيء خلاني احبه من نفسه.. كل شيء عنده بعدين بعد الزوج...واي موضوع مايعجبه لين نتناقش يقولي خلاص خلاص يصير خير..!!<<<طيب ليش تنهي الحوار بهالاسلوب صح انه جامعي ومتعلم لكن ربعه حيل يأثرون عليه دوم يكلمني ويقولي شوفي لازم تتعلمين الطباخ وطيخ الذبايح ..........الخ اللي قهرني انه عارف طبيعتي وبيئتي قبل لايتقدم وعارف اسلوب حياتي عادي بتعلم بس مو بهالطريقة وكله يقولي انتي دلوعه ترى اكره ماعندي البنت الدلوعه..!!<<<مع اني مااسوي شيء واكلمه كاني اكلم اخوي واللي قهرني الاخ معترض على كلامي انا فيني عرق سعودي فكلامي بالكاف والاخ يقولي لازم تغيرين كلامك وتتكلمين نفس هلي والمصيبه مصر ويعصب... تخيلوا مره اتصل فيني على 12 ونص الليل والمصيبه انه يسهر بالمجلس مع ربعه لين 2 الفجر حتى لو وراه دوام المهم اتصل بعد ماشاف اتصالي وقعد يسألني شخبارك؟؟ وانا ارد عادي اختصر وارجع اساله ابيه هو يتكلم المهم قام يقولي بعد شخبارك؟؟ قلت لا شكله يبي يسولف قمت اسولف له شوي الا شوي يقولي زين يقولون بكره وراي دوام..تخيلوا ماخلصت سالفتي طيب دامك تبي تنام ليش تتصل؟؟ ومب اول مره دوم يكلمني ويروح يسكر بطريقه يحسسني كأني بموت عشان يكلمني حتى لما اتضايق او ابينه اني متضايقه مايهتم يعرف اش فيني...طبعا الويك ايند الاخ مايعترف فيني لان ربعه معاه ولو اتصل مايرد على اتصالي الا يوم الاحد ولما يكون بالدوام.. امور كثيرة هذا اللي حضرني بس انا قررت انفصل وصار لي 3 اسابيع ماارد عليه ولا اتصل على انه مطنش ومو مهتم بس انتوا اشرايكم اشلون فهمتوا هالشخص؟؟؟!! اسمحوا لي كاتبه الموضوع من غير نفس كل مااتذكر طريقته تنسد نفسي من كذا اختصرت بالسوالف تم تعديل العنوان بما يشير إلى المضمون المشرف / شاطئ المحبة |
اختي اعتقد ان قبل الملكة كان فيه خطوبة .......... وينكك هالفترة ليش ما سألتوا عنه ؟؟
اختي اعتقد ان ابوج قبل الملكة كان جالس مع الولد ومتحاور معاه وما وافق عليه الا على اساس شغلات كثيرة حاطها في باله ومنها قضية ( مستواج المادي العالي ) وكذلك اعتقد ان ابوج مبين للولد انج بنت عز ودلال وما تدخلين المطبخ ........ اللي ابي اوصل له ان الظاهر استعجلتوا بالموافقة ......... ولو ان من وجهة نظري الشخصية ان اغلب اسباب انفصالج عنه 80% منها لا تدعوا للانفصال |
اخوي ماعندنا خطوبة ملكه وتعال اعرفه وتوهق وبس....انا قلت شيء قليل عن اللي صار لي في شهرين
اخوي شوف الاخ يبي يغير كل شيء حتى كلامي يعني مو متقبلني مثل ماأنا فاهم الحياة اني لازم اتغير عشانه زوجي اوكي ممكن نتنازل عن امور في حياتنا بس مو اساسيات ... يعني سالفة كلامي حتى لبسي في البيت لاتفكر اني على مستواي مب فاهمه او ملتزمه الحمدلله ابوي ربنا احسن تربية و بيئتنا دينة ومحافظين وبعد الاخ مب عاجبه يتشرط في لبسي يعني انت شايف انه اغير كلامي موضوع مهم يخليه يناقشه ويزعل ويعصب ويقعد الاخ يتطنز على كلامي؟؟ هذا مؤشر على عقليته وتفكيره اللي اصر انه بزر.. غير نظرته للمادية انا الحمدلله شايفه خير واللي بتمناه يعرسي بسويه من غير مااخليه يدفع والله اني دورت اقل سعر طاولات عشان مراعيه انه توه متوظف وحطيت في بالي بزيد انا عليهم واخذ اللي بخاطري لكن الاخ تحلطم ع السعر وقالي بقلل عدد المعازيم عشان السعر يكون اقل اصلا خذنا 300 شخص على انه معازيمنا بالراحه450 يعني يبيهم 200 شخص صار عيد ميلاد مب عرس.. وبخصوص المطبخ من قال م اعرف انا ا ادش واعرف اطبخ ومره عزمته بيتنا وانا مسويه العشاء كامل لدرجة العصير سويته فرش ماحطيت معلب ومب صنف واحد سويت له اصناف وسلطات وسويت ومن كل شيء نوعين عشان ابين له اني مب الدلوعه اللي كل شيء ياي لا الحمدلله عندي مخ اعرف اني لازم اطبخ واهتم بالبيت هذا شيء ابوي زرعه فينا مهما كنا عمره ماراح ينقص منا شيء..ويكفي انه طاعة الزوج عباده واجر... اسباب انفصالي كلها امور اساسية يعني اش اكثر من شخص يهمه ربعه وحتى الزواج بنظره شيء لازم يسويه لان الكل يتزوج انا سألته ليش فكرت تتزوج قالي عادي نصف ديني واعف نفسي من الحرام ويكون عندي عيال.. يعني وين الزوجة ومكانها حتى ماجاب طاري اهمية الزوجة بحياته اللي شفتها بنظره وسيله تجيب له عيال وتخدمه لا أكثر...يعني لاتفكر اني سطحية ترى انا وااااااااااااجد تغاضيت بأمور كانت مبينه لي سالفة القرض والمهر اللي يبيني احتفظ بنصه كانت من ثالث مكالمه غيري بيغسل يده انا لاخر لحظه كنت افترض له حسن النية ... ويكون بعلمك اهديت له كتب شعر يحبها ومن بينها كتاب الرجال من المريخ والمرأة من الزهرة ابيه يتعلم ويقرأ وبالاخير اش قالي؟؟؟ قالي اش سالفة هالكتاب قلت حلووو تقدر تفهم شريك حياتك اقراه وبتعرف وااايد حلووو واللي عاجبني انه الكاتب اجنبي ومهتم بالاسره على انه الاجانب مهملين هالجانب راح قالي يخسي مابقى الا هالانجليزي يعلمنا اش نسوي.!! يعني هذا كلام؟؟؟او حتى رد؟؟ بالنهاية هذا علم مانوقفه على اساس من كتبه حتى لو الكاتب علماني او هندوسي بس مقدم لي علم انا اقدر استفيد منه بحيث مايأثر على ديني ومايعارضه ليش لأ...!! أنا اكلمه احس باسلوبه وبطريقته يمكن مااقدر اوصلها لكم بكلام مكتوب..بالنهاية هذا رايك وكل انسان له قناعات انا قناعتي كذا...شخص مايبي يشيل مسئولية ومايقدر المرأة ومب فاهم الحياة انسان مااقدر اكمل معاه.. |
وعليكم السلام ورحمة الله وبركاته
أختي الكريمة من الخطأ أن تطلبي الانفصال دون أن تصارحي زوجك بالطباع التي لا تعجبك فيه .. طيلة الموضوع وأنت تتحدثين عن عيوبه .. دون أن تذكري جهودك في محاولة إصلاح هذه العيوب .. إن لم ترشدي زوجك إلى أخطائه سيعتقد أنه على صواب ولن يشعر أبدا بأنه مخطئ .. لذا عليك أن تصارحي زوجك .. وتخبريه بأن بينكما تضاربا كبيرا في الميول وفي طريقة التفكير .. وأنكما لن تستطيعا الاستمرار إن بقي الوضع على ما هو عليه .. فالحل هو في جلسة صفاء بينكما تضعان فيها النقاط على الحروف .. ومن ثم تحددان مصيركما .. وبالتوفيق .. |
اختي عليك بمصارحته وقولي له اللي عندك حتى يبين لك اذا هو شاريك او لا اذا هو شاريك بيحسن من اسلوبه واذا والله شفتيه ماتعدل او قلل من قيمتك انصحك بالانفصال قبل ان يقع الراس بالفاس لان اهم حاجه ان الزوج يشري زوجته ويحبها ومن كلامك حسيت ان زوجك غير مهتم يمكن فيه من يعارضني لكن اخذيها نصيحه لك من اخت مجربه ... / اختك احاسيس المحبه |
اختي العزيزه ...
بعد عمري انا مريت بظروف مشابهه و اسفه على اللي بقوله .. اختي حبيبتي انتي الظاهر بنت عز .. وهو داخل على طمع .. ما يبي زوجه يبي وحده تخدم عليه و على ربعه و ما يبيج تتركين الوظيفه لانه مفكر يلعب بفلوسج و حلالج .. و يبي ياخذ منج المهر و تصرفين على نفسج و عليه .. هذي النوعيه من الرجال فقدو الحياء يا عمري يبون مراه تصرف عليهم .. انا من رايي تتكلمين مع الوالد و تقولين له رايج بالموضوع و الي صار معاج .. لانه هذا مو بس بخيل هذا حاط عينه على فلوسج و اذا ما صارحتي اهلج من الحين راح تشوفين نفسج تصرفين على البيت و على عيالج .. المصيبه اهله يدرون و متفقين وياه على كل شيء .. يدرون ولدهم اشلون قايل .. هذا مو شايف خير و رايح يأذيج وايد ناس ما تفهم هذا الشيء .. و على بالهم موضوع سخيف و كلن الي يمر بشيء جذي يدري ان الموضوع مو هين .. حتى امه شاريه شبكه تفشل .. و انتي تقولين معاشه قوي .. يعني مو معقوله ما عنده يشتري شيء عدل و لكن اعتقد من خلال كلامج ان اهله يبون ابوج يسوي الحفله و كل شيء على بنه انتو عندكم خير حبيبتي من الحين يبون يكوشون ... فسارعي بالمصارحه مع اهلج .. لانه هذا راح يحاسبج بكره على اللقمه و فلوسه و فلوسج يصيرون له .. ما يبي قرض و لكن يبي معاشج .. الله يكون بعونج حبيبتي .. انا سبب من اسباب فسخ عقد القران كانت وحده منهم فسارعي بفتح الموضوع مع ابوج قبل لا يحددون موعد العرس حبيبتي لانه شكله مستعجل على شان ما تقدرين تطلعين من ايده بعدين و على طاري العرس دايما على الرجال فمادري شقول اختج بني الأخت الكريمة يرجى الابتعاد عن اللهجات المحلية قدر الإمكان المشرف / شاطئ المحبة |
اختي استشيري ابوك واخوانك ما فيها شئ لو ابوك عزم الرجال عشان يتأكد من اطباعة..
و اذا كان كل شئ قلتيه تأكدوا منه اهلك..استخيري لانه زواج...و ما فيه بعد ما تتزوجين ترجعين كل شئ زي ما كان و الله يبكتب لك الخير والصالح |
ياقلبي مني عارفه ايش أقولك
انتِ أدرى بحالتك وبخطيبك مننا اذا ماقدرتي تكملي معاه لاتظلمي نفسك هو باين ان لسى مو متحمل مسؤلية وأهله يبغو يدفو على اي احد وصغير وكمان بخل وطمعانين في أهلك يعني ماألومك لو طلبت الانفصال حبيبتي أنتِ الأهم ولا تفكري في كلام الناس هذا زواج ومستقبل واطفال وكثير اشياء اذا حاسه انك مو سعيده ومو هذا الانسان اللي مقتنعه فيه وتبغي تكملي معاه حياتك لاتجازفي علشان يوم حلو فكري مليون مره واستخيري الله وربي ماحيخذلك الله يكتبلك الخير ويسعدك |
تناقشي معه
حاولي واستخيري الله قبل أي قرار وآخر نصيحه اصبري وادعي الله بان يسهل امرك |
في نقطه مهمه خطيبك يكلمك عن المصروف على حسب قدرته الماديه فلا تزعلين من كلامه
|
أختي نايت
الأخت تقول راتبه مادري كم ألف ؟ و جالس يدقق في أشياء هبلة و غير إنه حاط عينه عالمهر أختي الغالية صاحبة المشكلة من كلامك واضح إنك انسانة عاقلة ماشاء الله و تستاهلي واحد يقدرك و أشوف إنك إذا اتبعتي كل الأساليب و الطرق لإيجاد الحل و لو ما نفعت أي وحدة و كان الخيار الأخير هو الإنفصال فلاااااااااااااااااااااااااااااااااازم تصارحيه عشان لا تندمي لا سمح الله بيوم من الأيام |
اقتباس:
يضايقني منه شيء في طبعه أو فكرة معينة لا هو انسان أحسه حريص لدرجة البخل وغير كذا أنا متعوده في بيتنا وأبوي علمنا أن الرجال اللي يرضى ياخذ فلوس من مره مب رجال فيه أساسيات هو يوفرها لها واذا صار واحتاج لكل حادث حديث أما من اولها الاخ نفسه مب عزيزه جد اشوفها صعبه انا اخوي الصغير بو 9 سنين لين اطلع معاه وانزله يجيب لي شغله ويدفع مايرضى ياخذ مني هذا وهو ولد صغير ماأدري يمكن البيئة لها دور بس أنا أشوف كذا حتى ابوي انصدم من الكلام اللي وصله عن الاخ...المصارحه هنا اشوفها ماتصلح يعني اقص على نفسي الولد مب حاط في باله انه مستحيل يجي في بالي الانفصال بدليل ماخذ راحته بالتصريح بأوامره وامور يدري محد بيقبلها من كذا يتكلم وكأن الموضوع تعالي اسمعي واعرفي واقتنعي ومن الحين تعلمي هالامور...اش استفيد اصارحه وبيسوي كل حرف بعدها أطلبه منه ليش؟؟لأن بعد الزواج أنا اللي بضطر اتقبل وارضى بالواقع لأن موقفي حزتها بيكون صعب مااقدر انفصل بقعد احسب الف حساب قبل قراري وبضطر اكيف نفسي وأنا الطرف الضعيف..فالمصارحه هني اشوفها مب مكانها يمكن لو اكتشفت هالامور بعد الزواج أكيد المصارحه هي الحل..تسلمين خيتوو |
خواتي مشكورين على ردودكم بس اصارحه نفس ماذكرت صعب..احسه بيمثل علي ويقنعني انه بيتغير وبيسوي اللي
بيرضيني...احسه مايستاهلني كلش.. |
اقتباس:
كل خير وتستاهل احسن مني والله يوفقك..حتى ابوي بيقولهم مالله كتب نصيب ليش اعطيه مبررات عشان بكره ياخذها ذريعه ويقعد يحور عشان يبرر للناس ولاهله واطلع انا مادية وماعندي سالفه ودلوعه نفس ماراح يقول..لا يبه بقول مالله كتب نصيب وكيفه الباقي بذمته لو تكلم حتى لو حد سألني بقول مالله كتب والله يوفقه مهما كان مااقدر اقطع رزقه يمكن غيري يرضى فيه ومايصدق وكلن له قناعات.. |
الله يكتب لك الخير و الصالح من أمرك
|
هو زوجك هل صارحتيه بعيوبه لربما اعطاك ردود تقنعك؟ من الاجحاف في حقة ان لاتنصتي له قبل
اتهامه اليك هذه الخطوات 1-مواجهه صريحة عن كل مايضايقك فيه وله الحق ايضا ان يبدي مايضايقه فيك لذا توقعي كل شي.. اذا حل الامر كان بها واذا لم يحل انتقلي للخطوة الثانية 2- ادخال ابيك في الموضوع وطلب رأيه بدون ان تخبري زوجك ان اباك يعلم واباك سيتصرف او سيخبرك مالحل الامثل.. وبعدها ربي ييسر لك كل امورك ملاحظة هامة: عند حديثك ومصارحتك لزوجك راعي اسلوب انتقاء الكلمات وعدم جرحه ولاتغضبي..ربي يسعدك أختك حائزة |
أختي
رأيك عين العقل و نطقي جدا لكن قلت لك رأيي من باب لو إنها ( خربانة خربانة )!!!!!!!!!!!!!!!! و الله يصلح الأحوال أختي :) و ماشاء الله من كلامك حسيت كأن تربيتكم هي نفس طريقة تربيتنا و للأسف هناك ناس كذا تربوا ، عيونهم جوعانة و ما يعبيها شئ !!!!! و الله يوفقك و استخيري :) |
صراحه الله يعينك .. من اكره الصفات اللي ممكن تصير بالزوج صفة البخل ! بس بعد انا اقول اعطيه فرصه وتأكدي من قرارك بس اولاً واخيراً .. لا تستهينين بالوضع .. يعني لو حسيتي انك مو مرتاحه له او تحسين من داخلك تبين الانفصال .. امشي على هذا الشي .. لأن اولاً واخيرا ً انتي اللي المتضرره والمستفيده .. وانتي بتتحملين النتائج يعني لا تجاملين على حساب حياتك |
يعني قد يكون بخيل حسب ما وصفته
|
اختي نصيحه لله
يجب ان تقولي لخطيبك سبب رفضك له يجب ان تخطي الله في اعتبارك لان الشاب يحبك وشاريك ولو فيه بعض الصفات التي لاتعجبك قد يصطدم تخيلي اختي خطيبك يتركك دون اسباب واضحه بما ستشعرين؟؟؟؟ قولي له الأسباب والله راح يكون معاك بس لو ما خبرتيه اؤكد لج هالشي موطيب لك |
الطلاق ليس بالامر السهل
وحتى لو كان قبل الدخله لانك سوف تعتبرين مطلقه بكل الاحوال اما مشاكلك معه فهى امور مقدور عليها وناقشيه فيها |
يا اختي منى تكون مطلقه الحين ولا تكون مطلقه بعد ما يتم الدخول و الاطفال .. اذا من اوله جذي ينعاف تاليه يا عمري
الطلاق حلال اذا ما كان في اتفاق اختج بني |
ما يصلح لك..
واضحى إنه بخيل... وإنت ما تحبين الرجل البخيل ولا تقدرين تتحملينه.. ما دامك في بر الأمان ...إنفصلي ...والنصايح إلي جتك تقول لك صارحيه ..هل من الممكن إنسان بخيل يصير كريم بالمصارحة ؟؟؟ يمكن يكون كريم الآن عشان يكسبك وبعدين كل شي بيرجع مثل أول... لكن أقول لك صارحيه عشان تبرين ذمتك (..الدين النصيحة ).... يمكن رايي ما يعجب الكثير لكن هذا ما يمليه علي عقلي,... وزيادة على كذا واضح إنك ما تكنين له أي مشاعر عاطفية أو حب فلماذا تضغطين على نفسك...مهما قالوا تفرق المنفصلة بعد الدخول وغيرها...أتوقهع إن المجتمع قطع شوط في هذا المفهوم ... حفظك المولى ورعاك... وأسعدك.. |
اختى حاولى ان تصاريحيه لان مافي شيء احسن من المصارحة في هذه الامور ويمكن هو متعود علي هذا الطبع وللحين مو متاقلم على انه اصبح مسؤل عن زوجة ويمكن بالمصارحة يتغير مجرى حياتكم للاحسن ماتدرين سبحان مغير الاحوال من حال الى حال
وعليك بالدعاء وقراءة القران والصدقة حاولى التقرب الى الله عزو جل على فكرة لي بنت خالة تقريبا مثلكي وبعدما قالت المشكلة الى اهلها وتدخلوا اخوانها في حلها اصبح زوجها الان بعكس الملكة الان يصرف عليها ويعطيها مصروف وهي الان حياتها مستقرة وعندها ولدين الله يخليهم لبعض |
الشيطان حضر اليك
فلذا تعوذي منه اول شي ثاني شي وش فيها ان كانت البنت بنت عز ما تطبخ لزوجها وتغسل ملابسه ما اعتقد فيها شي الشي الثالث الحريم بجميع اشكالهم يعشقون السوالف الواجد وهذا ما اعانيه من زوجتي لذا لاتحاولين تسولفين واجد وخليه يشتاق لسواليفك احترامي وتقديري انسان ولهان |
والله يا أختى إنى أهنئك على رجاحة عقلك وتفكيرك المنطقى ويسعدنى أنا شخصيا أن آخذ برأيك فى أى مشكلة لما لمسته منك من ذكاء ورجاحة عقل ومنطق. لا تأخذى برأى أحد قررى من نفسك فأنتى على صواب 100%
|
انا اعتقد اختلاف البيئه التي عاشاها كل منكما هي السبب لاختلاف النظرة الماديه
هو ولو كان المستوى الدادي نفس مستواك الا ان البيئه لها دور في ناس يحبون المال كي يصرفونه وفي ناس يحبون المال كي يدخرونه ومن هنا المشكله هو تربى على كذا وصدقيني انك لو تصارحينه راح يستغرب لانه يظن ان تفكيرة ونظرته الماديه صحيحة ويرى ان نظرتك الماديه خطأ في ناس يعتبرون الحريم مسرفات ومايمكسون مال لذلك هو الحين مايدري انت من اي نوعيه لذلك يحرصك ويحرصك |
سؤال
1. الرجل يحاول يبين مستواه المادي ويحاول يدخر فليش الغضب من هالاسلوب مع العلم ان اسعار الاعراس مكلفه حتى لو كان معاشه كبير ؟ 2. ممكن انتي فيج جوانب سلبيه وهو ماتكلم فيها فليش التسرع في حكم الامور استغرب ياجماعه الطلاق ماهو بلعبه فاستغرب من التساهل في موضوع الطلاق والله يعين والله |
اقتباس:
أنا مع الاخت شيهانة في مانصحتك به , وأقول لك ياأختي الغاليه والعاقله . أنتي على صواب مئه بالمئة وتحليلاتك كلها صحيحة ماشاء الله . فافعلي مايمليه عليك قلبك وعقلك وكلاهما يرفض هذا الارتباط والطلاق الان اهون بكثير من بعد الزواج وفقك الله وبارك لك في عقلك وحفظ لك اهلك ..نعم التربية |
هلا والله ببنت بلادي
صارحيه وحسسيه بقيمة الموضوع خاطبي عقله اذا اتصلج او طرشلج مسج وانتي مارديتي .. عقبها طرشي له مسج وقولي له ابي اتكلم وياك بموضوع مهم اذا فضيت اتصل عشان يحس الله يوفقج وطمنينا عليج |
بصراحه كلن له راية وقناعته..وبقولكم آخر التطورات..
بصراحه أنا قعدت أفكر بيني وبين نفسي بكل اللي صار لي ومع كل موقف صار لي معاه.. قلت بهالوقت هل ممكن الاقي انسان مثل ماأبيه؟؟!! مستحيل لابد فيه عيوب ومستحيل يكون نفس ماأبي...قلت ياربي شالشيء اللي في خطيبي تخليني اتقبل اني اكمل معاه؟؟ بصراحه ماأقدر أنكر برائته وعفويته ووضوحه غير أنه انسان رغم صغر سنه 23 الا انه ملتزم في صلاته يعني جد مهما سهر يقوم يصلي الفجر مع الجماعه طبعا البركه في بيئته لأن أبوه مفتي وشيخ دين غير كذا انسان مايكذب ويكره الكذب هالأمور عرفتها من أخواني بما أنه رفيقهم ايام الدراسه..وغير كذا انسان حده بر ومجلس وبيت يعني مايعرف مجمعات وجد جد نظييييييييييييف ماله بالسوالف الخربانه الله يثبته مع أني قلت في نفسي بالرغم من أنه كذا شالفايده اذا هالامور ماأثرت على عقليته وتفكيره مهما كان الوحده تتمنى شخص يفهم هي ايش تبي يحتويها يصير جد نصفها الثاني الزواج مو اسم زوج حذاي وبس..لا..أكثر من كذا .. فقلت أنا زعلت عشان أمور حكمت عليها من خلال كلامه...فقلت هل بضمن الله يرزقني بواحد كريم بس نظيف مايعرف بنات مايدخن؟؟مايشرب؟؟يحافظ على صلاته؟؟ شاللي يهون عندي يكون زوجي حريص أو راعي بنات؟؟يكون حريص أو يدخن؟؟قلت مصيبه عن مصيبه تفرق..وقلت يمكن أكون ظلمته ويكون هو مايقصد لأني أقول هو يقول أمور المفروض اذا كان يفكر فيها لايقولها اش هالغباء.. وقلت في نفسي أنا حكمت بدون مااعطيه فرصه يبرر أو يقول اش عنده...هل أصارحه؟؟!! غير كذا انا لما قلت لأبوي وأمي وأخواني عصبوا وكلهم أيدوني..ومع كذا مر على الموضوع 3 أسابيع وأمي كل يوم بتتصل على أمه تنهي الموضوع ومع كذا ألاقي تصير أمور تأخر هالاتصال..قلت لايكون الله مو كاتب وعندي يقين انه اللي الله بيكتبه بيكون خير حتى لو حسيت انه يزعل.. سبحان الله من يومين كنت قبلها مسكره تليفوني وتوني فاتحته الا هو يتصل..مارديت الا ارسلت له مسج وقلت معليش انا هالفترة ابي اكون مع نفسي محتاجه اعيد حساباتي...ارسل لي مسج وقالي طيب ابي منك بس 5 دقايق ممكن؟؟ مع اني صار لي شهر ماارد عليه كلش..وكان هو يتصل ويرسل مسجات فترتها وأنا مطنشه.. قلت اوكي بس انا ماعندي شيء اقوله.. وأتصل.. تدرون مع أني ماكنت ناويه ارد بس ماادري كيف الله كاتب.. كلمني وكان جد متضايق لدرجة انه ماينام وصار يروح الدوام متأخر ونفسيته حيييييييييل تعبانه>>>عذبته وهي ماتدري خخ المهم أصر الا يعرف اشفيني...وبصراحه قلت بصارحه وقلت كل شيء في خاطري الولد انصدم حده وفعلا مانكر كلامه وبرر لي مقصده بصراحه كانت أسبابه مقنعه بس أكثر شيء خلاني اقتنع صدقه وعفويته اللي التمستها بكلامه.. وقالي أنا فيه أمور كنت امزح معاك فيها بس أنا غلطان ماعطيتك فرصه تعرفيني عشان أقعد امزح معك بهالامور.. قالي بس جد الله يسامحك على كل ظنك فيني بس انا مسامحك لأني ماالومك كل شيء قلته يخليك تفهمينه بنفس الطريقة اللي فهمتيها...وقالي تأكدي أنا أزيدك ماآخذ منك وعشان يثبت لي قالي ادري مهرك ماراح يكفيك وحط لي في حسابي 50 ألف <<<عاد مو تروحون تسوون نفسي خخخخ يمكن خطيبكم غير تصدقون قلت الحمدلله وخيره ان امي تأخرت بالاتصال وزين اني صارحته كنت بضيعه من يدي خصوصا انه شاريني والله صابر على تطنيشي وملتمس لي العذر وبعد سامحني فوق ظنوني اللي تجرح.. وأنا والله مافكرت اكمل الا لاني قلت فيه امور طيبة ماراح القاها في هالوقت بغيره غير لما اسمع ربعي يشتكون من خيانة ازواجهم وعيونهم الزايغه اقول والله اني في نعمه..وبس حبيت ابشركم:).. واقول مهما كان عندنا قناعات مو لازم نصر براينا ممكن نتنازل لأن مهما صار ماراح يجينا اللي في بالنا.. |
الحمدلله انك ماستعجلتي في حكمك علي الرجال وخربتيها على نفسك الحين اتبهي زين على زوجك وافهميه قبل ماتقررين الانفصال عنه والله يوفقك انشاء الله ويسهل امرك
|
الحمد الله [blink]اختي الكريمه
اول شي الاخوه ولااخوات هداااااااااااااااااااااااكم الله اسعو الى الصلح في جميع المشكلات وليسة على هذه المشكله انظرو بام عينكم الاخت تفاهمت مع الرجل وارتاحت نفسيتها لو الاخت سمعت بنصيحه احد وانفصلت هل ترتاح؟؟؟ القصد من النصيحه اي هي الانفصال؟؟؟؟؟ وليسة باقي النصائح العقلانيه.. بالله عليكم يا اخوه حاولو جاهدين بان تسعون الى حل ارقى ومن جانب الطرفين لكي يتم الاتفاق بين الطرفين والمشكله..[/blink]-------------------------------------- اخيتي هذه هي عين الصواب ما فعلتي والحمد الله على نعمه الكثيره فهو فيه باذره خير ومصلي ويخاف الله وهذه وحدها صفه جميله واهم الصفات في الرجل.. وانا اقول لك من باب ما ذكرتي انا احسست من طريقة كلامه انه يحب يبين لك اشياء ويختبرك فيها.. اما بخصوص جفافه فان ابصم لك اخيتي ان مرتادي البر وانا واحد منهم صدقيني يأتيك فيه مواصفات رجوليه ولكن لشده اهل البر ترينه انتي شديد ولكنه هو يراها عاديه.. اخيرا وليس اخرااا.. اسأل الله رب العرش العظيم ان ييسر امورك اخيتي وان يعينك اصلحي ما بينك وبين زوجك بالكلام وانتقاء الكلام الذي يتي بحلول لحل الخلافات وبعدكم في سن الورود بارك الله فيكم بوووركتم |
الحمدلله خبر سعيد اختي الكريمه
وهذا هو المطلوب لابد من الصبر وعدم الاستعجال في القرارات ولانريد زيادة هذه النسبه المخيفه والله يسعدكم امين |
الف مبروك اختي والله يتمم لكي بخير ، دائما لما تصيدك مشكله فكري بمحاسن زوجك واستعيني بالله
|
الله يكتب الي فيه الخير
وبعدين حبيبتي استخيري وقوليله وش الاشاء الي ماتعجبك فيه يمكن هو كذا طبعه وكلامه |
الله يكملك بعقلك والله اني اعجبت بشخصيتك ورجاحة عقلك والحمد لله رزقك الله على قد نيتك الله يوفقكم دوم
|
أختي الكريمة
راجعي نفسك أنتي عبارة عن مجموعات تناقضات ومن خلال إطلاعي على موضوعك السابق وجدت مايلي : قلتي أنه لم يحضر لي خط وأراد أن يسدد فاتورة الخط المسجل بأسم والدي فرفضت, وهل من المنطق أن البنت لايوجد لديها خط بأسمها وتنتظر الزواج حتى يتم إظهار خط بأسمها, وهل الجهاز المستعمل عيباً , وهل على الكريم تشرط, وقلتي أن راتبه 13 ألف ومنذ متى تسأل المرأة وأهلها عن راتب زوجها , ألا تعلمين أن زوجتي لم تفكر يوماً بسؤالي عن راتبي جعلها الله قرة عين لي ورزقني ورزقها جنان الخلد قلتي أنه لايهتم ولايتصل حتى أنني طلبت منه أن يوقضني فأتصل مررره ولم يبالي ويكرر الإتصال وهل تريدينه أن يعمل سنترال لدى حضرة جنابك قلتي أنه لايتصل كثيراً وعندما أتصل في أحدى المرات طلبت منه الإختصار ثم قال لدي دوام وقفل الخط وماذا تريديه أن يفعل قلتي أنك أهديته ساعة ولم تذكري ماركتها بدليل قلة قيمتها وعندما رد عليك وقال ذهبت للمحل ولوصبرتي يومين لكان أوفر لك حيث تم عمل أوكازيون ولم تفهمي مقصده من ذلك وكان يرمي إلى أن الساعة رخيصة وقد عرفت قيمتها ولم يكن له داعي أن تكلفي على نفسك قلتي أنه يريد عمل حفل زفاف وحسب حساب 250 ضيف من قبل أهلك وعائلتكم فقط تتجاوز 450 وهل الزوج مكلف بعمل الزواج أم أن من يريد عمل الزواج فمن جيبه الخاص قلتي أخاف أخبره بعيوبه ويخرج عني كلام أنني مادية والحقيقة أنك أصبت كبد الحقيقة وكاد المريب أن يقول خذوني, وبدليل ماديتك البحتة أنقلب ذمك له مدحاً وبقدرة قادر بعد أن رأيتي 50 ألف ريال رضاوة منه ويبدو أن صورة الورقة الزرقاء ومطبوع عليها صورة الملك عبدالعزيز قلبت كيانك ويؤسفني أن أقول وبكل ألم وحسرة بل وبكل يقين أن زواجك لن يدوم أكثر من سنة على أقصى حد وكله بقضاء الله وقدرة وهذا الحكم مرهون بإستمرارك على طباعك وماديتك البحتة ونقلك لأبيك وأمك كل شئ يحدث بل وحتى مرهون بعدم تغيير أبيك من سلبية تجاوبه بالشكل المطلوب مع شكواك وعدم وجود شخصية حقيقة له أو أي دور مميز في مشكلتك أعلم جيداً أن كلامي لن يروق لك ولكن يكفيني أن أبات أنا وزوجتي قريري العين حيث أنها ألحت علي بالرد عليك ورفضت منذ مشكلتك السابقة ونزولاً عند رغبتها رديت عليك وكنت سأقول لك في مشكلتك السابقة أنتي يا أختي الكريمة مادية ومفشية لأسرار زوجك عند أبيك وأهلك وأنه لايوجد في الأساس مشكلة تستدعي فتح موضوع فما بالك بطلب أبغض الحلال ألا وهو الطلاق, وأتمنى من جميع الأخوة الذين أيدوك أن يتقوا الله في أنفسهم ويعيدوا حساباتهم ويستغفروا ربهم فلا يكلف الله نفساً إلا وسعها |
أؤيد الدكتور سطام في رده
أنا أيضا لاحظت تغير انفاعلاتك بعد ما عطاك ال 50 ألف اتوقع إن زواجك كان سينتهي إذا لم يكن أعطاكي هذا المال رأيت كلامك و لم أعلق خوفا من أن يكون رأيي لوحدي لكن وجدت من يفكر مثلي يا أختي عيدي نظرتك للأمور و ابعدي عن المادية لأنها تدمر البيوت |
ماشاءالله لاقوة الا بالله
ألف مبروك والله يجعلك سبب سعادة له ويجعله سبب سعادة لك دنيا وآخره ويرزقكم بالأبناء البارين أختي أتمنى ان بعض التفاصيل اللي بينك وبين خطيبك ما تطلع لأي أحد وياليت ما تتضايقين من كلامي ادري المنتدى رائع والأعضاء رائعين بس ما تضمنين ان كل من قرا موضوعك يتمنى لك الخير وما يكون في نفسه شي والكلام مو بس لك لكل عضو في هالمنتدى ولكل قارئ وحصني نفسك أختي والله يبعد عنكم شر من فيه شر |
| الساعة الآن 05:28 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©