|
أمي لا تريد حضور زواجي!! (( المشكلة حلت ))
السلام عليكم
يا ناس ادري تعبتو مني و من سوالفي بس ما عندي احد اشكي له امي الله يخليها من امس تصيح بدون سبب و ما تكلمني اقولها يمه انا ضيفه عندج و كلها جم يوم و بروح بيت زوجي ان شاء الله تققوم عندي ... حابسه روحه فى غرفتها ابوي و اخواني خواتي خالاتي و كلهم معاي بس امي غير ابيها تكلمني تحضني ...و لا تقط على كلام يجرح والله اتمنى الموت قبل لا اسمع هل كلام تقول اذا رحتي و سمعتي اني مت لا تين و لا تسئلين عني روحي حق زوجج لحقي مكان ما يوديج قلت لها يمه حمدي ربج الله رزقني بواحد دين و اخلاق و يبرد القلب تقول اذا كملتي من شهر العسل و اتصلتي فيني تبجين بذكرج!! بدال ما تنصحني و تقولي راضي زوجج و طيعيه تحبطني احس بكأبه و ابي اصيح الناس اللى حولي طيبين بس امي مكانها غير قالت لي انا ما بحضر عرسج !!!!!!!!!!!!!!! لانج ما سمعتي كلامي جني عشقته و تعرفت عليه و حاربت اهلي عشانه و هو المسكين كل كلمه و الثانيه عمتي فلانه عمتي عمتي و عمتي ما يدري عمته تكرها اكثر من اي شى المصيبه اهله كلهم امه خالاته عماته و و و و كلاهم بيون من باجر اللى بيقعد فى بيتنا و اللى فى الفندق اخاف امي تقط كلام و تندم عليه اخوي فهمها بس اهي الله هداها مب راضيه تفهم اكلام زوجي من غير نفس حتى هو حس بس قلت له من التعب و السوق اذا شافتنى اكلامه تبي تسمعه و تنكد عليه عيشته و الله ما احب النكد و لا الكأبه ليش امي ما تفهم انا سعيده رحت غرفتها و كلمته تقول لا تقهرين زود روحي له يااااااااا الله ساعدني لا تنسوني فى دعاكم جززاكم الله خير تم تعديل العنوان .. كما يرجى الابتعاد عن اللهجات المحلية قدر الإمكان المشرف / شاطئ المحبة |
الله يعينك إختي
ويوفقك ياااااااااااااااااااارب بس آسفه إذا ممكن تقولين وش سبب رفض الوالده وكم عمرك |
عمري 20 سنه بعد الزواج باروح معا زوجي الاردن بعدها على بلدة زوجي
|
يمكن أمك زعلانة على فراقك ... ولأنك حتبعدي عنها وفي دولة ثانية
معاها حق .. خايفة عليكي أنا ما أعرف فين بلد زوجك .. وهل إنتي بعيدة عنها كثييير لكن حاولي لو كنتي قريبة تزوريها كل إسبوعين مرة مثلا إلى أن تتعود الله يوفك يارب |
الله يسعدك ويتمم فرحتك
امك خايفه من سرعه الزواج لان الشباب يستغلون السرعه في اخفاء عيوبهم |
صديق اخوي روح بروح الريال مطوع و انا بتم فى مكه مو امريكا!!
|
20 سنه لسه صغيره والوالده أدرى بمصلحتك ولابد
لها سبب رفض هل سألتيها عن السبب ؟؟؟؟؟؟؟؟ |
بس لاني باعيش فى مكه يعنى مو نفس البلد
|
ما اعتقد اختي امج جد، بس لأنها راح توحشينها
الله يسخرها ويوفقج بزواجج، الحين وين تلقى البنت الستر، اختي امج شنهو سبب خوفها عليج لازم تسالينها وما وصيج عليها تحملي تغلطين عليها مهما كان اهي امج |
ما في سبب بس لاني باكون برع البحرين و اهي كانت تبي ولد خالي و انا رفضت و الحين انا مستحيل اقول
شى يجرحها اهي كل شى فى حياتي |
اختي امك خايفة عليك بس صدقيني اذا شافت معاملتة لك و انه حاطك تاج على راسة..و شافت معاملته لها..رح تحبه اكثر من عيالها..و بعد ما تجون من شهر العسل ان شاء الله..جيبي امك عندك ..ووديها عمرة و وديها المدينه المنورة..و قولي لها ان زوجك يدور رضاها..
و الله يتمم لك على خير... |
اختي ادعي الله ان يسخر قلبها لج
ووصيتج بالرقيه وممكن تقولين لها ان رايحه لبيت الله، ناس ما تقدر تروحه بسبب الظروف بنات يبون رجل متدين مو لاقييين ، يعني ذكريها بالأشياء الحلوه في الموضوع ، وقولي لها انا باتصل فيج وبازورج ، اهي من خوفها لبعدج عنها نست الأشياء الحلوه لا تلومييينها ادعي الله واستغفري واقري الرقيه لا تنسين ولا تنسيني من دعائج |
اهي تعرف معزتها فى قلب زوجي و لولاه بعد الله سبحانه كان اخوي صايع مو ملتزم و حتى قبل لا يخطبني
كانت تمدح فيه بس بعد الخطوبه امي تغيرت 180 درجه |
اخوي تعب و هو يفهم فيها و عطاها امثله بعد قال لو تاخذ واحد ما يخاف الله و لسانه وصخ و هي بتكون
جدامج و مو سعيده بس اهي حتى الاكل ما تاكله معاي |
ان شاءالله راح يتغير موقفها منه بعد الزواج من خلال تصرفاته ومعاملته معها والله الموفق .........
|
تصورو تقول اذا يه بحط شرط انج تعيشين بروحج و بقوله يزيد المهر عشان يحس احنا طمعانين فيه و حزت
اختي امي ما خذت مهر بس مصحف تبي تسوي جي عشان يطلاقني!! ابوي حلف اذا سوت اي شى بينسه العشره يقول احنا ما عندنا شى فى الدنا غير السمعه الطيبه و الشرف و امي تبي تخرب على الله يحنن قلبها على |
و ما تدري اهو عنده شقه ملك يعنى باكون بروحي بس ليش تحسس الناس احنا طماعين و هذا الشى مو فينا
|
يعني الوالده مو شايفه أي عيب في الرجال ؟
أنا أقول إختي هذي أم وقلبها أحن عليك من نفسك روحيلها مية مره وحاكيها وحاولي تقنعينها بأسلوبك وبكلام حلو وبإذن الله كل شي يكون تمام والله يوفقك يااااااااااااااااااارب ويستر عليك ويسعدك ياااااااااااااااارب بس لازم تحاولين كل شي مع الوالده |
الله يفرجها من عنده
هي بس متضايقه وحاسه انك بتبعدين عنها الظاهر امك متعلقه فيك مره علشان كذا غارت من زوجك لانه كل شئ صار بسرعه المسأله مسأله وقت صدقيني مو من قلبها الي تسويه |
تصورو تقول انتي ما تعرفين اطبخين و انتي مو قد المسئوليه عادي يطلاقج بس بعدها لا تين عندي!!
روحي بوسي ريوله عشان يرجعج قلت لها يمه انتي ليش تبين تكرهين فيه و هو الكل يشهد انه انسان طيب و حبوب تقول الا هو عمره 27 ليش ما تزوج طيب اخوها عمره 38 للحين ما تزوج يعنى نست!! اهو كان يدرس و ما كان حاط فى باله الزواج بس كل شى نصيب الحين انا قافله على روحي ما كلفت على نفسها و نادتني حطت الاكل يم الباب و مشت! خواتي الكبار عندي من بعد الملجه يساعدوني و مستانسات تقول لهم رحو حق ازواجكم لا تطلقون بسبها و اهي بتمشي و ما تحس فى احد |
اختي ،اسفه بس امج خايفه علييييج
شوفيها حطت لج الأكل روحي اخذيه ولا تكسرين قلبها ونصيحتها في محلها اختي، انتي لازم تعرفين تطبخين، شي طبيعي كل زوجه مفروض تتعلم الأساسيات تعاملي معاها بحنيه ادعي الله يسخرها اختي الزوج يروح وايي بس الأم ما تعوض اعرف صعب الموقف بس امج خايفه عليج لازم تفهمين هالشي |
الله يكون في عونك أختي
الله يحنن قلبها عليكي أختي شوي بطلع من الموضوع أنتي قلتي في واحد من الموضوعات أنك كنتي مسحورة وتعالجتي إذا ممكن تقولين لي طريقة العلاج أو القصة وجزاك الله ألف خير |
والله ياإختي لو أمك زعلانه منك ماكان حطتلك الأكل عند الباب
أقلها ترسل غيرها يحطه لك وباين إنها حنونه أرجوك حاكيها لا تيأسي قوليلها أنا تعبانه ماأبي إلا رضاك وإبكي في حظنها بس تكونين لحالك مامعك إخوانك أو خواتك عشان ماتعصب زياده من مهاجمة الكل لها وإن شاء الله بتقدرين تقنعينها أنا قلبي مره حاس وطمنينا عليك ... الله يتمملك على خير ياربي وهدي سر الوالده ويسخرلها لك ياااااااااااااارب |
للأخت اللي سالت عن السحر ،الأخت العزيزه ا م الحسين كان ردها كالآتي
اما السحر هذا شيخ يقرا عليج و السحر يبي له صبر تاخذين زيت زيتون مقري + عسل و تشربينه و قبل النوم ادهنين جسمج و ما تنسين الاذكار و سورة البقره و يكون افضل اذا تعرفين مكان السحر (اختي سالي شيخ دين ثقه) الأخت العزيزه ام الحسين والعمر، روحي اقري سورة البقره وادعي الله وتقربي من امج ارجوووج باذن الله الواحدالأحد راح تحضر ،الأمهات كل يههدون صدقيني |
أنا شايفة الموضوع من نقطة أخرى
الكل قال خايفة عليج و ما أدري شنو صحيح قلب الم حنون بس احيانا الموضوع ينقلب و تصير الحنية قسوة لا يوجد لها مبرر تقريبا باقي 11 أو 10 أيام لزواجك إن شاء الله ( أنا متابعة مواضيعك ) شوفي مسألة أمك معقدة و لا تفسير لها , لا خوف و لا حنية , الموضوع نفسي بحت و من الأول هي ما كان عاجبها , و بعدين 27 سنة مو كبير , أنا عندي 19 اتقدملي ناس بالثلاثينات و أهلي ما علقوا على السن و بالنسبة لأخلاقه فهو صديق أخوك يعني إن شاء الله رجال طيب و زين أما القصة الأساسية أمك مصابة بشيء من هذه الأشياء أحد ضربك عين ( حسدك ) و العين هذي طلعت على أمك إنها تقرفك في حياتك و تنكد عليج أو أمج نفسيتها تعبانة بسبب الشيطان يلعب في راسها , بنتك كذا و زوجها كذا و ما أدري شنو اللحين أمك شكلها ناوية على حرب تهديد ( عدم الحضور للعرس ) انسيــــــــــــــــــــــــــــــــــــه تماما , مافي أم ما تحضر عرس بنتها تهديد ( زيادة المهر و شرط سكنك لوحدك ) هذا ممكن تنفذه و عيلتكم ممكن يتشوه صورتها لهذا السبب هذا غير إن زوجك راح ياخذ فكرة مو زينة عندك إذا ما الحل ؟؟ الحل تدخل الوالد عشان ينهرها و يخليها تتوقف عن أفعالها تهديد ( إنت ما تعرفي تطبخي ) هذا يبشر بإنها ممكن تفضح عيوبك , لذا انتبهي , و ممكن إنتي بدلع تقولي لزوجك لما نتزوج راح أجرب الطبخ فيك لازم تتحملني هههههههه , و تضحكي ببراءة , بهذي الطريقة تكوني عطيتيه خبر عن مسألة الطبخ و ما رح يهتم إذا أحد قاله ترا زوجتك ما تعرف تطبخ , راح يرد يقول : أنا عارف هي قالتلي يعني ليش تبيكِ تتطلقي ؟؟!! إما أمك محسودة أو خوفها انقلب بعقدة نفسية --- الآن زوجك المسكين حاولي تكوني طبيعية معاه حرام الرجال يتصل عشان يسمع ضحكة و يشعر بسعادتك إنتِ لو عرف الموضوع أو حس بحزنك راح تكون خطة أمك اتحققت و ممكن يوصل الموضوع للطلاق ---- أحسن شيء اتجنبي النقاش مع أمك في سوالف الزواج أو النقاش في الموضوع كلميها عادي في مواضيع أخرى اخرجي من غرفتك و عيشي حياتك شغلي سورة البقرة في البيت كله و ارقي نفسك و لو قدرتي ارقي أمك و إخوتك |
اقعدي معها فالغرفه اذا كانت على السرير انسدحي جنبها واذا كانت قاعده على الكرسي اقعدي تحت رجولها وابكي ولاتفارقينها
قولي لها امي خلاص انا مستحيل اروح عنك وانتي مانتي براضيه عني وش يرضيك ووش تبين انا راح اسويه حتى لو ماتبيني اتزوج خلاص ماراح اتزوج وشوفي وش بترد |
الأخت الكريمة قطره حياه، فعلا قد يكون خوف وانقلب لعقده او عين اصيب بها ام الحسين وعمر
طبعا مستحيل امها تكون حاسدتها اهو خوف او عين نوصيج اختي بالرقيه وسورة البقره الله يسهل لج وانا اتوقع امج بتحضر ان شا ءالله لأن في المره الأولى بكت صح، بس بعدين رضت انتي ادعي الله كثييييير وصلي الليله واقري سورة البقره |
حبيبتي ربي يسعدك و يلين قلب أمك , أكيد هي من داخل غير الي مبينته لك
فرحت لك كثير لما قريت مواضيع خطوبتك يمكن أمك مضايقة لأنو كل شي صار سريع سريع اقعدي معاها و افهمي منها ايش الي ماهي راضية عنه و عطيها وحهة نظرك ربي ييسر لك أمورك |
عزيزتي
انتبهي لأمك...وحني عليها أمك يمكن عندها احساس بفقدك...من غير شر أعرف شخص ..سافر يدرس برا وأمه كانت راضيه عن روحته بس لما قرب السفر ماقدرت كل يوم تبكي وجتها حاله... ولمى سافر قالت إني ماراح اشوفه مره ثانيه وفعلا توفت الله يرحمها ولا شافته فالله اعلم مايدور بقلبها...وتفكيرها حتى الأكل توصله لبابك...عظم الله أجر الأمهات والاباء... روحي لامك بوسي راسها ورجولها بعد...وحاولي تطمنينها أو زوجك يطمنها بأنك بتجين زيارات كثير..حتى تتعود على بعدك |
أنا رح أقولك إيش نظرتي للموضوع..
نظرتي إنك جافه مع أمك.. وإنك إنت اللي خليتيها تزود الموضوع.. لا تزعلي مني.. بس أنا هذا تصوري.. بصراحــه.. أمك قلبها عليك وخايفه عليك.. ومشتاقه لك من قبل لا تروحي.. وإنت لسا ما جربتي إحساس الأمومه عشان تعرفي معزتك عندها.. وبعد هذا كله تقوليلها أنا ضيفه عندك عامليني زين!!!!! خلاص.. اعتبرتي نفسك ضيفه.. ليش إن شاء الله؟؟ ما عشتي عندها 20 سنه ترعاك وتخاف عليك وتحط لك الأكل قبل لاتاكل؟؟ والحين اعتبرتي بيتك الثاني اللي لسا ما سكنتي فيه هو بيتك الأول وإنك ضيفه عندها؟ أنا أعلم جيدا إن الوحده فينا بيت زوجها غـــيــــر... بس بيت أهلها غير غير.. وهالشي لازم تحسسيه لأمك.. عامليها بلطف.. خليك وراها ولا تتركيها وإذا ما حبت تقعد معاك على الأكل إحملي صحنك وأكلك وروحي إجلسي عندها.. مو تعاقبيها على حبها لك بإنك تحبسي نفسك في غرفتك.. وتشغلي بالها عليك وهي من الأول متضايقه.. دوري رضاها.. دلليها وكلميها كلام حلــــــــو وجيبيلها أغراضك اللي اشتريتيها وخليها تشوفها حتى لو قالت لك ما أبي أشوف شي.. حطيهم قدامها وإمزحي معاها.. خلي الحده والزعل اللي في قلبها عليك يروحوا.. لأن صدقيني حتى لو زوجك ماشاء الله عليه ممتاز من جميع النواحي ويحبك.. بس رضى الأم غير يا غاليه... رضى الأم ممكن لا سمح الله يتسبب بصعوبات ما كانت لك على البال ولا على الخاطر.. غيري أسلوبك معها.. وراجعي نفسك.. وكوني مرحه أمامها وخليها تتكلم وقوليلها معك حق.. ولا تعاقبيها بجفاء.. بل كوني ودوووووودة معها .. كأنها طفل صغير .. الله يوفقك وييسر لك أمرك.. ويحنن قلوبكم على بعض:) |
اسمعيني يا حبيبتي
امك يصعب عليها فراقك و ما يحدث منها الان رايته من كل امهات صديقاتي حين زواجهن تصير عصبية و ما تتحمل شئ و تقول لست مرتاحة و تعيب في الزوج و و و بس كل ده من حبها فيك و غيرتها عليكي ما بالك أنا أعمل إييييييييييه؟؟؟ باقي علىزواجي 8 شهوووووووووووووووور و أمي من الآن كل شئ تقول خلاص ما عدت أهمك خلاص هتنسينا أنا أربي و هو ياخدك على الجاهز و انت تستهلي أحسن منه رغم انها تحبه و لكن بالطبع تحب ابنتها ايضا لا تزعلي منها و عليكي هذه الايام ان تقربي منها جدا قبلي يدها و راسها كثييييييير ضحكي معاها نامي بجوارها و في حضنها قولي لها سوف اتصل بك كل دقيقة لحد ما تزهأي وتقوليلي لا تتصلي و هكذا حتى تهدأ قليلا اسعدك الله يا غالية و اتم عرسك عاى خير |
الله يوفقج...
ياقلبي والله اقرأ ويتقطع قلبي على امك.. الله يصبرها بصبره.. انتي الحين مستحيل تحسين في امك.. لكن اذا تزوجت بنتك راح تحسين في اللي تحس فيه امك.. الله يعينها على الصدمة.. ربت وكبرت.. وفجأة انوخذت.. وانتي كلامك قاسي على امك.. امك مجروحة من فراقك.. وانتي تقولين لها حمدي الله.. يعني كانك فرحانه بفراقها.. ترى مو سهل الام تفارق بنتها.. يحتاج على الاقل شهر شهرين.. تتأقلم.. وتتعرف منهو اللي بيتزوج بنتها.. وتتعرف اكثر على شخصيته.. مو فجأة باسبوعين تملك وتتزوج.. هي خايفة عليك.. مكة الله يشرفها مو مقايس.. يعني مو شرط في مكة يصير انسان طيب.. ولا شرط مطوع يكون فعلا طيب.. الاسماء ما تدل على الاشخاص... انا بالشرقية بالسعودية.. لكن لو ايش ما سكنت خارج منطقتي والله لايجيب هذا اليوم..... واذا زوجك من مكة وفي مكة بيعيش على ايش سرعة الزوواج هذي؟؟؟؟!!!! أنتي هادي امك.. وربي يعينها ويربط على قلبها..واذا اضرت الامور اجلي زواجك... شنو الزواج.. اهم شئ الام.. خليه للصيف .. باقي على الصيف شهرين..ونعطل بالسعودية.. انا اقرأ قصتك واتخليها على امي.. بسمله على امي..الله لايجيب اللي ينزل دموعها علي والا على اخواتي.. ولا يفرقنا عن بعض.. لا تكررين على مسامع امك زوجي زوجي.. وكانك تحطينه شئ اساسي وهي ثانوي.. هاديها.. وبوسي راسها.. وقولي لها يمه انا بسكن عند بيت الله.. وهناك بدعي الله انه يسهل اموري... وبدعي ربي ننقل للشرقية ونسكن بالخبر 25 كليو عن البحرين.. عطيها امل انك راح ترجعين لها... والله يعينك انتي على الغربة... ما راح تحسين لين تبعدين... |
قطرة حياة...
مو معقولة هذي الاجابة.. ابش يدخل ابوها وينهره امها.. ايش تبكير القلب البنت على امها.. انتي ما جربتي اكيد احساس الامومة.. و ولو عرفتي احساس الام دقيقة كان متسحيل تقولين هذا الكلام عن اغلى انسان بالكون.. عن الانسان اللي يحبك فوق ذاته.. |
اختي دلوعة ومنحوسة ...
صراحة أعجبني جداً ردك الأول والثاني ، ولكن حزّ في نفسي بعض الكلمات التي افسدت رونق ردك فياريت لو أستبدلتي الجملة التالية : اقتباس:
"انا بالشرقية بالسعودية.. لكن لو ايش ما اسكن خارج منطقتي.. والله لايجيب هذا اليوم..... والله يعينك انتي على رجل من غير ديرتك... ما راح تحسين لين تبعدين..." ماكان في داعي أبداً التجريح بالكلام ، لأنه مافي احد أحسن من أحد. وعندي تعليق بسيط على النقطة التالية : اقتباس:
وخصوصاً " يحبك فوق ذاته " أنا ماذا أستفيد لو يحبني او تحبني فوق ذاته وهي تنكد علي ليل نهار وتخرب علي زواجي ! متى سنفهم أنه يجب على الإنسان عدم اتباع هواه ! نعم الله جعل العاطفة كبيرة في الأم (وذلك لأسباب كثيرة منه مانعلمه ومنه مالانعلمه) لكن لكل شيء حدود ، ماذا نستفيد من عاطفة الأمومة إذا كانت تخرب عيالها : تقوم تكنس وتطبخ وبها من الآلام ماالله به عليم وعندها بنت في العشرين جالسة وحاطة رجل على رجل ! وعندما تسأليها عن السبب تقول لك : هاذي بنتي الوحيدة ! تقولين لها مايصلح كذا انتي تساهمين في خراب البنت . فترد عليكِ : ومن قال لك انها كسولة ، هي تغسل ملابسها وتنظف طاولة الطعام بعد مانأكل ، ومسكينة عندها اختبار بكرة خلها ترتاح ! ونفس الشيء ينطبق على الأب ، الله معطيه عقلية و شدة بأس . بس ماينفع يمشي على هواه ويكون قاسي على الأسرة . لازم يفعل العاطفة عنده . وكذلك الأم يجب أن تفعّل الجانب العقلي . ونفس الشيء في كل شيء ، فما ينفع يمشي الشيء على هواه . ومن هنا أتى فائدة التغلب على الهوى حيث يكسب الواحد الحسنات والأجر من جراء مقاومة الهوى والتغلب عليه . فالمرأة من هواها هو حب سماع المدح من الآخرين ، لذا نجد نساء الغرب يخرجون بأحلى زينة ، بينما نساءنا مطالبين بلبس العباءة والاحتشام ( يعني : عكس الهوى ) ومن هنا ياتي الأجر والله أعلم . فياليت نفهم الدنيا مظبوط ولانبهذل الناس بحجة اننا نحبهم ! هذا ماأحببت توضيحه . وأما بخصوص أختي أم الحسين وعمر ، فمهما عملت أمك او أخطأت فيجب عليك وجوباً شديداً عدم تزعيلها ومراضاتها بشتى الطرق ، وقد زدتي الطينة بله بإظهار مظاهر الفرح بأنك ستغادرين من منزل أهلك ووصفه بأنك ضيفة فيه ! ونصيحتي لك بان تعاملي أمك بالعاطفة لا أن تعامليها بالحقائق والإقناع ، لأنها هي مقتنعة من داخلها بل صدقيني هي تدعي لك في سجودها وانتِ ماتدري ، لذا المشكلة هنا ليست مشكلة حقائق وإنما مشكلة عواطف . فأظغطي على نفسك وأريها انك شبه حزينة على مفارقتهم وبانك ستعملي المستحيل لزيارتها بين حين وحين ومايدريها لعلك تنقلون إلى المنطقة الشرقية بجانبهم وتقر عينها بكِ . والله الموفق . شكرا لتنبيهك ولتعاونك أخي الكريم المشرف / شاطئ المحبة |
يا الله بعض الردود صيحتني و زاد الحرزن فى قلبي انا باقولكم شنو صار لى قبل فتره و انتو عطوني حل
من سنه كنت مخطوبه حق ولد عمي.. برضاي التام و هم كانو يبوني من يوم ما طلعت من بطن امي لانه اهل ابوي مستحيل يوافقون على واحد من بر العيله.. بعد الخطوبه صارت كم مكالمه بيني و بين ولد عمي و عرفته بعدين صارت سالفه عوده انا فصخت الخطبه من صوبي بس ابوي و اهل ابوي ما مانو راضين ... شهر 2 بعد الامتحانات تعبت وايد كنت اتكلم و اخربط بكلام مو مفهوم رحت حق دكتور نفسي قال ما فيها شى!! بعد كم يوم ردت لى الحاله ودوني حق شيخ قرا على و اغمى على و بعدها بان كان سحر و الجن اللى كان متلبسني قال من ارسله و الله يستر عليهم شفنا السحر مكان ما قال الجني و كان اكثر من مكان بعدها صرت زينه و رديت تعب تجدد السحر و تحول مس عاشق و تخلصنا بفضل الله منه و بعدها كنت اصيح بدون سبب اسكت و ما كلم احد ايام نفس الشيخ قال فيها عين خفيفه من زمان بعدها الله شفاني و رحنا اعتمرنا قبلها تقدم لى اكثر من واحد بس رفضت منهم ولد خالي.. هاي القصه كلها امي وايد حنونه و تحبنا اكثر من اي شى اشتري اي شى حق العرس اراويها و اسئئلها حلو او لا قبل كم يوم كانت هاديه يات معي السوق و خذنا الذهب كانت ساكته بس فى يوم و ليله تنقلب على بدون سبب و اللى يقول الزواج صار سبرعه الصبي فيه شى اخوي شلون يرضا يزوجني واحد ما يخاف الله فيني و صداقتهم مو مالت يوم و لا يومين!! عشرت عمر و فوق هذا كله المسكين امطرش لها هديه كانت تبي تاخذه يوم رحنا نعتمر بس اغراضنا وايد ما صار مكان و هو طرش لها مع اهله انا ما اكلمها جدام احد لانها تصيح اكثر اذا اكلمها و اليوم ناويه اكلامها و اقولها ابي رضاها و بطلق منه كل شى يتعوض الا الام لاني ما اقدر اعيش و ابدء حياه بدايته عضب امي على مشكورين على المساعده جزاكم الله خير |
اقتباس:
ردك فرحني يا ابو لجين والله انا قلت اني ضيفه عشان تحن على شوي و تحس اني بامشي بس ما فيه فايده اهل زوجي عندنا و اهي للحين تمام ما قالت شى بس يخفون شوي باكلمها دعواتكم الأخت الفاضلة نرجو الابتعاد عن اللهجة المحلية حتى يتسنى للجميع فهمك ومساعدتك المشرف / شاطئ المحبة |
اختي العزيزه ربما انتي محسوده
شغلي البقره في البيت وادعي الله يحنن امك |
الله يهديها عليكي ويحنن قلبها .........اكسبي رضاها .....وبشرينا لانه متابعه لموضوعك وبشغف
ومع كثر التفسيرات لحالة امك بس لحد الان حايرة انا في حالتها خوف عليكي .....ولا زعلانه علشانك بتبعدين عنها ......ولا شي خارجي (توابع السحر) .........ولا مو مطمئنه للعريس ؟؟؟؟؟؟؟ بصراحه شي غريب الله يعينك ويصبرك ........وقولي في دعائك .........يااااااارب قدملي الخير وين ما كان |
والله يا حبيبتي أنا حاسه فيك..
وإن هالأيام المفروووض تكون أحلى الأيام لأنها أيام الخطبه ولازم فيها تستمتعي بوجودك عند أهلك وبنفس الوقت في شخص يحبك وبإنتظارك لتكملي معه مشوار الحياة.. أنا بس حبيت ألفت نظرك لحساسية الموقف بالنسبه لأمك.. وهي مستحيل تخرب عليك وإنها تقول لأهل زوجك كلام مو زين أو تلميح.. بس هي من ضيقها لسرعة إتمام الأمور كانت تقول هالكلام.. عموما أنا وصل لك فكرتي.. وأنا متأكده إني لن أكون أحن على أمك منك إنت نفسك.. الله يوفقك ويسعدك دايما حبيبتي .. وإستمتعي بهالأيام الجاي.. وبكرا بتصير ذكريات والله وبتضحكي عليها إنت وأمك.. في هالأثناء بإنتظارك تقوليلنا عن ترتيبات الزواج وعن أهل زوجك وكيف فرحانين فيك يا عرووووس:) |
حبيبيتي.. اوجه لك هذي الرسالة الخاصة من القلب للقلب.. رسالة بقولك فيها تجارب صديقاتي.. ونصائح.. تهمك بكرا..
الحين انتي استغلي هذي الايام لين يوم زواجك.. بالدعاء والصلاة والاستخارة.. وقراءة القران.. احرصي كثير انك تنامين بحضن امك.. وكثري من الاستغفار .. بعد الزواج.. خليك متواصلة يوميا مع امك..خصوصا باول شهرين من الزواج..انتي اذا تكلمين امك لا تقولين لها ابدا على اي مشكلة بينك وبين زوجك...مهما كامنت صغيرة او كبيرة.. ولا تلمحين حتى بالتلميح... لانه امك في هذي الفترة تكون حساسة جدا لو تقولين لها شئ.. بتظل الليل تبكي.. ويمكن انتي تنامين وتنسين.. بقولك اشياء مروا فيها صديقاتي.. اللي انتقلوا عن اهلهم.. بعد الزواج يبدأ احساس الشوق للاهل.. شوق كبير جدا..ويصاحبة ارق.. وعدم تعود على الوضع الجديد.. هذا بيصير عادي.. لا تخافين من هذي الاشياء وتقولين انها ممكن سحر او عين.. ممكن يجيك احساس بالخوف.. من ايش ما تدرين.. ارجع واقولك مو سحر ولا عين.. هذي طبيعي.. للفراق يصير... كثير من الاحاسيس تمر فيها البنت.. لا تخليها انها سحر او عين او حسد.. وتدخلين بدوامة من الشك...تجي ايام بتكين فيها..وممكن يصاحبة غثيان ... هذي مو شئ غريب.. مرحلة الانفصال باي شئ بالحياة.. ودخول بوضع جديد يكون فيه نوع من الصعوبة... ي الطفل او ما ينولد.. يبكي .. لانه انفصل من موضع لوضع.. يجي احساس بالغربي.. انه كل شئ محيط فيك غريب عليك.. وانك وحيدة.. وانه اللي معك مو فاهمينك.. اصبري عليها.. ولا تدخلين مع زوجك في مشاكل بسبب احاسيسك..لانه بعضهم تنشأ مشكلة مع زوجها بسبب احساسها بالغربة.. وانه امك كذا واختك كذا.. بعضهم تحس انه زوجها مو حاس فيها..لا تلومين زوجك.. لانه عايش في منطقته..مو حاس بشئ.. اذا حسيتي بضيق كثري من الاستغفار.. الحين التي تجهزين حق عرسك.. اشتري اشياء مهمة.. اهم من اطنان الارواج.. اشتري ياقلبي.. مسجل.. واشتري اشرطة فيها سورة البقرة.. واشتري اشرطة فيها قصص الانبياء وتفاسير للقران الكريم.. واشرطة تتعلق بالحياة الزوجية.. مثل اشرطة نبيبل العوضي.. وسليمان الجبيلان.. قلوب بيضاء.. طارق السويدان..لاتقولين بعد الزواج.. بعد الزواج راح تستحين تقولين... بيجي ابليس ويصعب المسألة.. تدرين ليش قلت لك.. لانه من تتزوجين من يروح زوجك للعمل.. تبقين وحدك.. خلي سورة البقرة في البيت شغاله.. ومن تجين تطبخين.. وتنظفين البيت.. حطي قصص الانبياء.. وقصص من حياة الصالحين.. عشان تعطيك خبره .. عشان من تواجهين مشاكل.. تتذكرين بعض القصص كيف قربت منها هذي المشكلة وكيف انحلت.. هذي القصص يمكن الحين تشوفين المسألة تافهه.. بس لما يكون عندك رصيد ديني قوي.. ما تخلين الشيطان يتغلب.. الرصيد الديني مو بس قرأت قران.. ولكن فهم ايش انتي تقرأين.. وليش؟؟؟ اسمعي شريط قلوب بيضاء.. عشان يصير قلبك ابيض .. لانه راح تتواجهين مع مشاكلة.. وكيف تخلين قلبك ابيض وما يحمل اي زعل .. عشان تكون حياتك مرتاحه بدون هموم.. حاولي قد ما تقدرين.. انه ما تبكين وانتي تكلمين امك.. قد ما تقدرين.. ختي انا اقولك هذي الاشياء مو تخويف لك.. بس والله من حبي لك ولو اني ما اعرفك.. لكن لاني كنت اشوف بعض صديقاتي يتخوفون من الوضع.. ويعتقدون انه عين صابتهم... وفي وقت الاحظ الكل يمر في هذا الشئ.. وانا نفسي مريت تجربة.. وجاتني قريبة لي وكانت تقولي شنو ممكن احس فيه.. وكانت تقولي لا تخافين من الوضع.. وهذا عادي وانها مرت فيه.. وكانت متواصلة معي لغاية ما تغلبت عليها.. وكنت فعلا ابكي.. واحس بالغربى... واحس اني بدوامة.. وصداع ورغبة بالبكاء من غير سبب.. ولكن بفضل الله ونصائها تصبرت وصبرت.. الله يوفقك.. |
| الساعة الآن 09:12 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©