|
تعبت من زوجي واخوي
السلام عليكم ورحمة الله
يا اخواني واخواتي ارجوكم ساعدوني انا تعبت من اخوي وزوجي مايطيقون بعض وانا الضحيه وهم عيال خاله في نفس السن تقريبا اخوي زعلان علي من اول شهر من زواجي والسبب يقول صرتي تحبين زوجك اكثر مني والله العظيم ما اكذب عليكم اخوي يغار من زوجي !!! ومره راح لامي وقالها تصدقين فلانه عاشت معنا السنين هذي كلها ومع زوجها شهر واحد بس وصارت تحبه اكثر تعبت منهم وزوجي بالمقابل يكره اخوي لانه يعامله معامله سيئه مايستقبله اذا زار اهلي ومايطلع له في المجلس ودايما يجرحه بالفاظه يعايره بوظيفته لان راتبه قليل واخر مره تهاوشت مع زوجي بسبة اخوي لان اخوي الله يهديه يتعمد يقهر زوجي دخلنا عليهم البيت استقبلنا اخوي ومسكني بايدي وحط ايده على كتفي ودخلني البيت وقال البيت مشتاقلك يالغاليه وما عبر زوجي ولا قاله اتفضل انا نبهت اخوي قلت فلان عند الباب روح دخله طالعني اخوي بنظرات وراح داخل وماعبر زوجي اضطريت اقول لامي تدخله بس بعد ايش طلعت مالقته عند الباب زوجي راح وهو زعلان من تصرف اخوي ياربي انا وش ذنبي ؟!! اتصلت عليه يقول انتي عاجبك تصرف اخوك قلت والله مو راضيه باللي يسويه بس مافي فايده خلاني عند اهلي من امس ماجا ياخذني والله حالتي حاله ومنقهره من تصرف اخوي وردة فعل زوجي اثنينهم ظلموني |
ياحبيبتي عيال خالة ويصلحون مع بعض ماعليك منهم وسوي نفسك ماشفت ولاسمعت شي ..!
والله أريح لك مليون مرة ،، ترى زعل الرجال مع بعضهم أقشر لاتحسبنيهم مثلنا تقدرين تصلحين بينهم بكلمتين ..! |
العبي على الاثنين,
عند زوجك بيني له ان اخوك غلطان ولا عنده سالفه,ولا تتكلمين عن اخوك وتجيبين سيرته, وعند اخوك نفس الشئ, ويله زوجوا اخوكم علشان ينشغل بنفسه.. |
انت المفروض تدخلي زوجك في المجلس وماتتركينه وتروحي مع اخوك لان وقفة زوجك عند الباب لوحده وانتم تروحو داخل محرجه جداااااا ولاتخلي فرصه للاثنين يزعلو منك ولاتتدخلي بينهم قولي لكهم مالي شغل فيكم
|
أما أخوك شغله شغل بزران صراحة من حقه زوجك يزعل .... خير إن شاء لله أنا أعرف الغيرة من هذا النوع عند الحريم بس عند الرجال شي جديد صراحة ..... عموما زي ماقالت أختي جنة الدنيا حطي نفسك في موقف حيادي ولا كلمك زوجك قوليله مالي شغل في مشاكلكم انتوا رجال وحلوها بينك أنا إيش دخلني ..... واطلبي منه يجي ياخذك ويترك عنه شغل العيال هذا انت مالك شغل في السالفة كلها ..... الله يهديهم بس
|
اقتباس:
انا حاولت اطنش بس ماخلوني دايما زوجي يجيب سيرة اخوي ويحش فيه مليت منه احس زوجي يكره اهلي كلهم بسبة اخوي الله يستر بعد لايكرهني انا |
اقتباس:
اخوي على فكره خاطب بس مايبي يتزوج الا بعد مايخلص دراسته ودوراته انا اتبعت معهم نفس الاسلوب اللي قلتيه بس لازم يحطوني في مواقف محرجه |
اقتباس:
المفروض اخوي دخله لله يهديه لان انا ضيفه مثله كيف ادخله ؟!! وانا عمري ماتدخلت بينهم ولا قلت افضل احد على احد |
اقتباس:
ارسلته مسج بعد مطنش |
الله يصلح حالهم ...
الواضح ان اخوك يغليك ... فتعالي له من هالباب ... وقولي له يا أخوي يانظر عيني ترضى اني اتهاوش مع زوجي ؟؟ ترضى انه ينكد علي والسبب انت ؟؟ هل تشك في غلاتك ؟؟ هل يداخلك شك في اني ما ابي رضاك ؟؟ قولي له ان هالكلام ماتقدرين تقولينه لزوجك بس تقدرين تقولينه له لانه اخوك ودمكم واحد وواكيد مايرضى لك الا بالسعاده ... اطلبيه وققولي لو علشان خاطري جامله ...وبيني له انه مايصير على الأخوان انهم يتخاصمون اكثر من 3 ايام ... ونفس الشيئ سويه مع زوجك ... انه دنيتك ... وانه الوحيد اللي فاهمك ... و... و.... ومن الكلام اللي يحنن القلب ... واطلبيه انه يتحمله ويجامله لو علشان خاطرك .. لو شفتي ان هالطريقه مانفعت ... جربي تقدمين هديه لكل واحد منهم بإسم الثاني ( تهادوا تحابوا) ... وشوفي وش النتيجه ... ولو بعد هذا كله ما تغير الوضع ... يبقى مالك دخل بينهم اثنينهم ... ووضحي لهم هذا الشيء ويقوة واصرار وزعل بعد !.... الله يوفقك ... |
اقتباس:
ولكن المشكله اخوي مايقبل اني اكلمه عن زوجي نهائيا مافي امل لو اكلمه علطول راح وخلاني وزوجي نفس الشي |
الله يهدي اخوك و زوجك..
|
انا اقول راضي زوجك ولا تخربين بيتك واخوك مصيره بيرضى وهو الغلطان مثل ما انا شايف اصلا الواحد المفروض يعامل زوج اخته احسن معاملة لانه صاين اخته والمقترض انك تزعلين على اخوك لأنه ما استقبل زوجك عند الباب وانتي بتصرفك هذا ما صرتي حيادية والله الي سواه زوجك شويه و انتبهي اذا زادت المشاكل بينهم يمكن توصل بينك وبين زوجك للطلاق
اخوك تعبت اعطي |
السلام عليكم
اولآ اخوكى غلطان وزوجك هو ابقى لكى من اهلك فأحق الناس بصحبة المرأة هو زوجها وهو جنتك ونارك والمفروض ان تطيبى خاطره ولاتسمعى كلام العضوات الاتى يشيرون عليكى بعدم التدخل بينهم لأن هدا سيغضب زوجك منكى وعنده حق زوجك هو كل اهلك الان افرضى مثلا ادا تهاوشتى انتى واهلك وقال لكى زوجك"" انا مالى دعوة دول اهلك"" الن تزعلى من موقفه موقفك هدا لن ينساه لكى زوجك فبادرى بتطييب خاطره واخبرى اخاكى ان من اكرامك اكرام زوجك وترى مادا سيكون حال اخاكى معك بعد ان يتزوج وينجب وتصبح اسرته هى كل ماله فى الدنيا قال رسول الله صلى الله عليه وسلم: ((حق الزوج على زوجته لو كانت به قرحة فلحستها أو انتثر منخراه صديدا أو دما ثم ابتلعته ما أدت حقه)) ((فإني لو أمرت شيئا أن يسجد لشيء لأمرت المرأة أن تسجد لزوجها والذي نفسي بيده لا تؤدي المرأة حق ربها حتى تؤدي حق زوجها)) -((المرأة لا تؤدي حق الله عليها حتى تؤدي حق زوجها كل)) -(( لا ينظر الله تبارك وتعالى إلى امرأة لا تشكر لزوجها وهي لا تستغني عنه)) -((اثنان لا تجاوز صلاتهما رؤوسهما عبد أبق من مواليه حتى يرجع وامرأة عصت زوجها حتى ترجع)) - |
ام عاليه كلامها صح
كل مانفردتي بواحد سبي الثاني انفشي ريشهم وحاولي مايتلاقون زوري اهلك بوقت مايكون اخوك فيه وترا مانافعك الا زوجك اخوك بكرا اذا جت حبيبة القلب بينسي امه اللي جابته الله الله بزوجك |
اقتباس:
اكتبي لكل منهما رسالة (ورقية وليست رسالة جوال) واشرحي فيها بإسهاب ومن غير انتقاص لأي أحد منهما . والله يعينك على المشكلة اللي مالك يد فيها . |
كونى حياديه فلا تكونى بصف اى حد
وان وددت زياره اخوكى قومى بذلك وحدك تجنبا للمشاكل |
اقتباس:
سبحان الله هدا نفااااااااق وليس حلآ لو كان لكى غلاوة حقيقية عند اخاكى فسيحسن معاملة زوجك من اجلك ولكنه لا يهمه زعلك على زوجك وبصراحة لو كنت مكان زوجك لفعلت اكثر مما يفعله |
اخيتي . .
في البداية لابد لك بالدعاء في ان يؤلف الله بين قلوبهم . . ولاتطنشي الوضع حاولي الاصلاح قدر الامكان فيما بينهم . . لان الارتباط العائلي موجود وغدا سيتزوج اخوك ولابد ان يكون بينهم سلام وسوالف على الاقل . . وشكراً . . |
طريقة اخوك طريقة غبية مع الإحترام مفروض خلافة مع زوجك يكون بينهم وش دخلك انتي
لكن علمي أبوك او امك وخليهم يوقفونة عند حده قبل لليطلقك زوجك (( كل شيء يهون الا كرامة الرجل )) وكلمي زوجك وقولي له انا ما لي ذنب باللي صار من اخي وانا مو راضية عنه |
اقتباس:
فانتي كتبي رساله لأخوج الكلام اللي قالته العضوه أم الطاحوس تراه عيبني وعن زوجج مالازم اطرشيله شي لأني أحس الغلط من اخوي وان زوجج محترم اخوج بس مضايق شوي من تصرفاته والله أعلم.. فأنا أقول ألحين لو تسيرين بيت ريلج وتسويله مفاجأه .. تقبلي مروري |
انا ضد راي ام عالية مع احترامي الشديد لها
المفروض في هذي الحالة تكوني ضد الاثنين يعني عند زوجك تخلينه هو الغلطان وان هذا اخوك مهما كان وان زوجك ولد الناس وعند اخوك تجعلينه هو الغلطان وان هذا شريك حياتك وابو عيالك ونصفك الثاني وبهذي الطريقة كل واحد يقدر يعترف بغلطته ويكون اقرب طريق للصلح هذه وجهة نظر فقط وللجميع تحيااااااااااااااااتي |
أتفق مع الأخ الباسل تماما
أنا ما أسمح لأخوي يغلط على زوجي و مع إنه أخوي يحترمني و يعزني و يستنى فرصة علشان يتدخل :d لكن ما أسمح له و أبين له إنه كرامتي من كرامة زوجي و نفس الوقت ما أرضى إنه زوجي يغلط على أخوي و أحط أعذار لأخوي لكن لو فرضا أخوي بيوم من الأيام غلط على زوجي لا سمح الله فما راح أعطي وجه لأخوي لحد ما يحس و علشان يحترم زوجي لكن ما أبين لزوجي المفروض إذا أهلك خايفين عليك و يحرصوا على سعادتك ما يحاولوا يضايقوا زوجك و لازم تكلمي أمك علشان تفهم أخوك |
اختي فهمي زوجك ان المشكله بينهم وان انتي مالك دخل
وبعدين بصراحه اخوك هذا مو صاحي ليش يسوي كذا مع زوجك وبعدين وش يغار هذا زوجك واكيد راح تحبيه ويحبك بس اهو خليه يتزوج بعدين يعرف تصرفاته |
تراك بتتعبين والله !!
اقطعي عليهم الطريق واطلعي من السالفة وإذا حاولوا يدخلونك أو يحطونك في مواقف محرجة سوي نفسك ماسمعتِ شي ولاقولي اصلحوا مع بعض وبس !! بزارين هم ؟؟! اكتبي لهذا رسالة ولاازعلي على هذا ؟؟!!!! الرجال قشراااااااااان في هالمواضيع وبتتعبين معهم وياليته على سنع بعد !! |
كم عمر اخوك؟
لازم ابوك والا اخوك اللي اكبر منه يوقفه عند حده .. ويعلمه انه من شيم الرجال حتى لو عدوه زاره يستقبله ويقوم بكرم الضيافه يتركه عند الباب ويروح؟؟؟ ياسبحان الله .. يا اختي هذا شي ينغرس في الانسان من هو صغير لازم الام والاب يربون الابن على هذه الخصال في النهايه اقول لك لازم واحد عاقل يفهم اخوك ان اللي يسويه يدل على صغر عقليته باسلوب مقنع .. لانه مافيه اي سبب من زعل اخوك على زوجك سوى انه يغار عليك كما كتبتي اتمنى ان تحل مشكلتك يا اختي والله يوفقك يارب ويهدي اخوك وزوجك |
|
بجد تصرفات اطفال هذه مو تصرفات رجال ابداً ابدا
وش هالعقول ياربي مااقول غير كان الله في عونك اذا هذا تفكير الرجال وتصرفاتهم في مشاكلهم مانلوم النساء على كذا في هذا الزمن احسن حل لكي ياعزيزتي تشيلي يدك من الموضوع بتاتاً ولاتعطين ولا واحد وجهه اذا تكلم او تصرف شيء ضد الاخر وقوليلي لهم بالحرف الواحد انتم تفكيركم تفكير اطفال وبزارين لعل وعسى يستحوا على نفسهم ويحسوا شوي بقيمة الشنبات اللي في وجهوهم وكمان افضل لكي من وجع الراس والله يكون في عونك على ماابتلاكي |
سعيده جدا بهذه الردود
انتم فعلا اخواني الحمدلله زوجي اليوم اخذني من بيت اهلي اهو فاهم اني مالي دخل في اخوي بس كان مرتفع ضغطه |
| الساعة الآن 11:18 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©