|
حسبي الله ونعم الوكيل صبر جميل..(طليقي وابني)
السلام عليكم ورحمة الله وبركاته
إذا تذكرون موضوعي اللي طرحته آخر مره بالنسبه حق طليقي وتصرفه معانا وتهديدنا إنه بيرفع علينا قضيه عشان كان يبي أودي ولدي 3 مرات بالإسبوع جلسات علاج طبيعي وأهو مرتين بس عشان قلتله ماأقدر سوى السالفه اللي كنت ذاكرتها المهم قال حق وحده من خالاتي قوليلهم إن آنه فعلا هذاك اليوم رحت المحكمه ورفعت عليهم قضيه وإن الورقه عنده وإذا رضت توديه جلسات العلاج راح أتنازل عن القضيه هالإسبوع المهم آنه قلت حق خالتي قوليله ماعندي مشكله أروح أوديه لكن بشرط إن فلوس ولده اللي قاعد ينزلهم بحسابي لاينزلهم بعد قوليله أهو ياخذهم يشتري له كل اللي يحتاجه وبعد معاهم فلوس الخدامه أهو ياخذهم يعطيها فلوسها لأن قاعد يقول عني إني ألبسه هدوم قديمه حسبي الله ونعم الوكيل فيه وقاعد يتهمنا إن آنه وأمي إن ناخذ فلوس الولد والخدامه وقلت لها الشغله الثانيه قوليله إن يطلع أمي وأهلي بره الموضوع ماله شغل فيهم إذا يبي أي شي عنده الخدامه يقولها أي شي وتيي تقولي عقبها إقتنع بالكلام . وقلت خلاص إفتكيت منه ومن شره وخلصت الموضوع رد ألحين طلعلي أمس بسالفه يديده قايل حق خالتي خليها توقع لي على ورقه رايح كاتبها عند مكتب محامي أو ماني عارفه والله وين المهم هالورقه إموضح فيها إن أهو ينزل بحسابي كل شهر فلوس حق ولده والخدامه وإن مادامت الحضانه عندها لازم إهي توديه علاج طبيعي والطبيب في حال إنه تعبان ولو يبي يوديه علاج بالخارج لازم ماأعارض ولو صار بالولد شي إن راح يلومني آنه وأمي وإنه آنه مو أمينه على الولد تخيلوا والله ذبحني حسبي الله ونعم الوكيل فيه وقايل لها إذا ماتبي توقع على الورقه خلاص هذي ورقة القضيه عندي والجلسه الإسبوع الياي وقايل لها إذا مايبون يهتمون فيه ويعالجونه ويخلوني أعالجه آنه باخذ حضانته وتصوروا قايل لها أهما شنو قاعدين يسوون له آنه قاعد أسويله كل شي الله ينتقم منه إن شاء الله المشكله أول معاي شايف التعب اللي قاعده أتعبه والإهتمام بالولد بالبيت والله النوم ماأنام نفس الناس بالليل وأهو نايم ومرتاح والله لو يخليه ليله وحده عنده يطق على راسه آنه ماكان ودي أتكلم لأن الواحد يبي الأجر من رب العالمين ماودي أخرب على نفسي بالكلام والتعب مادام حق ولدي أحلى شي على قلبي بس والله أتكلم من حرتي آنه ألحين قلت حق خالتي على أساس تقوله إني ماراح أوقع على شي وإني مستعده أروح المحكمه لأن هذا إنسان ماينفع معاه حل الأمور بود ماينفع معاه إلا المحاكم ومادام أهو اللي بدا راح أواجهه لكن ألحين الموضوع اللي معور قلبي حيل وعفس نفسيتي فوق وتحت إن أهلي يقولون لي عطيه حضانته لأن صدقيني راح يتوهق فيه لأن المشكله إن ولدي عندي لكن تعرفون لما تحسون إن طول الوقت عايشه بتوتر خايفه يصير شي حق الولد بالغلط والله يبلشني أهو من ألحين قاعد يقول كلام مشابه حق هالكلام وبعدين آنه أروح الدوام والصبح الولد عند أمي وأفكر لو الولد بيصير سبحان الله في شي عندها ماراح يقول قضاء وقدر لأ راح يقول إذبحت ولدي من الأساس أهو عقب الموضوع كاره أمي ويبي ينتقم منها مشكلته هذا إنسان تفكيره موطبيعي والله عادي لو صار بالولد شي لا قدر الله يسويها يدخلني السجن والله ضرني وايد وايد بعد هم أهو اللي طلقني وبعد قاعد يأذيني على الولد يبي ياخذه مني والله إني بموت من القهر حسبي الله ونعم الوكيل شسوي إذا عطيته الولد آنه أدري راح أموت وحالتي النفسيه راح تتدهور وراح أعيش مثل الميته وقت طويل على ماأتعود عدم وجوده وأدري حياتي راح تصير كلها بجي وجحيم وإذا خليت حضانته عندي ورضيت يسافر فيه ويرجعه أكون سويتله اللي يبي ورضخت حق شروطه وتسلطه والولد لو بيصير فيه أي شي بيتهمنا آنه وأمي وراح يأذيني طول عمري مع الولد شسوي قولولي والله مادري أتخذ أي قرار تعبني وايد وايد الله ياخذ حقي منه ساعدوني بآراءكم شالحل مليت من تصرفاته ونفسيتي وايد تعبانه أدعولي الله يفكني من شره . وسامحوني على الإطاله والسلام عليكم ورحمة الله وبركاته |
أقول لك عطيه الولد وافتكي منه ومن مشاكله شكل طليقك شري وريحي نفسك صدقيني راح يتورط ويرجعه لك
|
لو مكانك اربط على قلبي ... واتحمل ...واعطيه الولد ...
أولا : بيعور قلبك فيه اكثر لو تم معك ... على قولتك بكره يدزك السجن ... لا انتي اللي تميتي مع ولدك ولا انتي مع اهلك يعني لا طلتي بلح الشام ولا عنب اليمن .. وواضح انه هدفه حاليا انه يأذيك بأي طريقة . ثانيا : هو متأكد انك ماراح تتنازلين عن الولد وهذي ورقته الرابحة اللي يلعب فبها وضامنك في جيبه ...يلعب بك .. فأنتي احرقي له هذي الورقة وفاجئيه بأنك تخلين له الولد ... وشوفي وشلون بيصير .. وهو فعلا بيتفاجأ ... لكن مو مفاجأة حلوة .. ويمكن تنقلب الأمور لصالحك ...اذا انتي قويتي قلبك .. معليش اختي .. بعض حالات الطلاق لا تستطيع المرأة ان تتجاوزها بسلام الا اذا ربطت على قلبها من ناحية اولادها وتحملت واستعانت بربها يفرج لها .. يمكن في الأول يبين لك انه ما اهتم وانه عااادي باخذ الولد ... ويمكن يحرمك تشوفينه فترة من باب انه يضغط عليك ... بس انتي لا تضعفين مهما طال الحرمان ...بيني له انه مااااا يهممممك ...بالعكس فرصة لك علشان تشوفين نفسك وحياتك ... وكذا تحرقين له الورقة الثانية ....اللي هي حرتك على ولدك تبين تشوفينه . الله يعينك ويثبتك ويربط على قلبك .. والله مهيب سهلة .. بس استعيني بربك .. واستخيري ... اللهم لا سهل الا ما جعلته سهلا وانت تجعل الحزن اذا شئت سهلا . دعواتي معك بالنصرة والأثرة |
اللي اشوفه يا أخيتي انك تشوفي وين مصلحة الطفل الصحية
يعني اذا هو قادر يسافر فيه ويعالجه خلاص خليه ياخذه وبعد العلاج يرجعه وأنسي سالفة بيقول اني رضخت وسويت اللي يبيه لان ولدك وصحته هي الاهم من كل شر وإنتقام بداخل زوجك وبيني لطليقك انك رافضه ان يجعل الولد وسيلة الحرب بينكم عزيزتي حاولي تهدئي وابعدي عنك التفكير بطليقك واللي يسويه من أمور تدل على عصبيته وهمجيته وخلي اهم نقطة الطفل وصحته أكرر الهدوء يا أخيتي أنتي محتاجه الهدوء وعدم العصبية ربي يعينك ويصبرك . |
اقتباس:
|
الأخ الكريم شغموم الشغاميم
أسعدني مرورك كثيرا وفعلا كل اللي يقولي عطيه إياه يقولي صدقيني راح يتوهق فيه عدل وجزاك الله خير |
الأخت الكريمه رسيل
جزاك الله خير وفعلا إستانست على كلامج لأن بالضبط حللتي تفكير هالإنسان لأن بالضبط مثل ماقلتي مستخدم ولدي وسيلة ضغط علي قال هذي كل ماهددتها باخذ الولد خافت وسوت اللي أبيه آنه فعلا إحتمال أضغط على نفسي وأتخذ هالخطوه الجريئه وأسعدتني مشاركتج |
الأخت الكريمه فاتن
آنه فعلا تهمني صحته ويهمني شفاءه لكن المشكله لوقلتله إخذه عالجه ورجعه حتى لما يرجعه ماراح يخليني بحالي لو صار في شي تخيلي توني أسمع من خالتي يقول لويصير بولدي شي أحرقهم حراق مادري شلون يفكر هالإنسان جزاك الله خير وأسعدني مرورك كثيرا |
أختي الكريمه كل الغلا
فعلا هذا المفروض اللي يصير مضطره أضغط على نفسي لو بموت وأسعدتني مشاركتج كثيرا |
بس 4 ردود
والله محتاجه آراءكم ومساندتكم لي بكلامكم الطيب اللي يريح |
اختي الله يسهل امرك..و يعقل طليقك..
صحة ابنك فوق كل اعتبار..و الله يشفيه..و يرفع عنه.. صدقيني طليقك مارح يتحمل وجود ابنه معه..لان اغلب الرجال..صعب عليهم يتحملون مسئولية كامله لطفل .. وشكل طليقك من هذا النوع اللي يحب يحكي و يهدد ....و اذا صار الموضوع جد ابتلش.. |
أختى الكريمه
أسعدك الله دنيا وآخره وفرج همك قرأت مشكلتك بتمعن وآلمتنى حيرتك وقرأت رد الأعضاء عليكى وأعرف تماما انك لن تنفذيه لأنك لن تستطيعى التخلى عن ولدك بارادتك أبدا ...... أعرف مشاعرك وأقدرها ولكن لماذا تتساءلين فأنتى على الطريق الصحيح .. هو طلب المحكمه تحكم بينكم وانتى وافقتى وهذا هو الحل بوجهة نظرى لماذا؟ أولا انتى لن تتنازلى عن ولدك له بمنتهى السهوله حتى لا تلةمى نفسك فيما بعد وتندمى فان تنازلتى فسيكون تنازل بشرف فهذا قرار القاضى وليس بيدك ثانيا لن تكونى قد خضعتى لابتزازه لكى كل ساعه لو ما فعلتى كذا راح اخد الولد ولو ما سويتى ما أعرفش ايه هاخد الولد ثالثا لو القاضى حكم فى صفك انتى راح يتعلم درس ما راح ينساه ابدا فى حياته ويعرف انك مش ضعيفه بل بالعكس قويه وتتحملى وتعرفى تواجهى وتبقى حققتى ربح من كل النواحى رابعا هو مش هيستحمل الولد كتير واكيد اكيد ابنك فى النهايه وفى البدايه مسيره لكى رأيي استمرى فى موضوع المحكمه ولن تخسرى اى شيئ فأنتى الرابحه باذن الله فى كل الأحوال تحياتى لكى ولصبرك وطمنينا عنك باستمرار. |
الأخت الكريمه cutiepie
جزاك الله خير على رأيك ومرورك |
أخي الكريم sa33
وهذا فعلا اللي راح أسويه هالإسبوع راح أروح بس خلاص إحتمال وايد راح أضغط على نفسي وأسلمه إياه لأن جد جديد بالموضوع هاليومين عقب ماكتبت هالموضوع إني قلتله خلاص إخذه وديا وماله داعي محاكم وبس حدد لي أيام عشان أشوفه آنه فكرت عشان لما يكون ودي ممكن يفكر أي وقت يرده على عكس المحكمه بس قال إذا تبي تسلمني إياه بالمحكمه لأني أبي الشي يكون قانوني فإحتمال هالإسبوع خلاص يتم كل شي بموت بس شسوي الله كريم إن شاء الله |
طيب ليه المحكمة وأنت راضية ياخذه ؟؟
الله يعينك |
اياني واياك تعطينه الولد لاتغلطي غلطه العمر صدقيني العناد اللي طلقيك فيه لو اخذ الولد ماراح يرجعه وبيهمله هو ماخذ الشغله عناد وجكاره فيك مااعتقد انه كفو مسؤليه.. الولد مريض الله يشفيه محتاج عنايه ورعايه واهتمام خاص وهذه روح انت يوم القيامه مسائله منها فلا ترمين ولدك للتهلكه..
كوني شجاعه وقويه واوقفي له ند ولدك هو راس مالك اذا راح راس المال وش بتستفيدين غير الهم والحزن.. |
حبيبتي ام عمر قبل ما تسلمينه الولد استخيري وربج بيكتبلج اللي في صالحج
|
بسم الله الرحمن الرحيم هو ماخذ المسألة عناد فيكي واذا تنازلتي بالمحكمة لن تسترجعي حضانته ابدا و اذا اتزوج راح يخلي الولد عنده وبعدين انتي من شنو خايفة خليه يقول الي يقوله طالما انتي مهتمة في ولدك ويلبس ويتعالج بشكل جيد !!!!!!! صديقتي سوت نفس الشي اتنازلت عن حضانة بنتها بضغط من الطليق و أهلها وبعدين ندمت هو بس أخذ المسألة عناد وبعدين ما قدر يهتم في البنت ويوم زيارة الأم الى هي صديقتي الله يذكرها بالخير , تبكي البنت عشان لا تترك أمها عند انتهاء الزيارة والعمة تسحبها سحب للسيارة و تصارخ عليها و الأم واقفة ما تقدر تسوي شي ,أهم شي مصلحة الولد و مصلحته و شرع الله يكون عندك انتي أمه ولا تشغلي بالك بكلامه وذا هو شايف انك غير مهتمة بالولد خليه يثبت للمحكمة |
| الساعة الآن 06:00 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©