|
بنتي .. حرمتنا من السفر .. بصيييييييح ..
بسم الله الرحمن الرحيم ..
السلام عليكم ورحمة الله وبركاته . قدر الله وماشاء فعل .. بكيت لين قلت بس .. صار لي أشهر مازرت أهلي .. أشتقت لهم كثيييييييييييير والحنين متعبني .. وصار لي فترة نفسيتي تعبانة .. أبي أمي .. أبي أبوي ..:23: أخذت إجازة من العمل والإجازات عندنا صعب يتوافق عليها .. جهزت أغراضي .. متحمسة وفرحانة .. وأعد الدقايق ..:22: وتجهزت لحضور حفل زفاف صديقتي غدا بإذن الله .. وزوجي أخذ إجازة يوم واحد عشان يوصلنا ويقعد معانا يومين .. اليوم .. بعد رجعت البيت من الدوام نمت شوي .. استيقظت وقلت أرتب باقي الأغراض .. وشفت المصيبة .. لقيت الشيخة بنتي الصغيرة ..(سنتين ونص ):15: مقطعة جوازها وجواز أختها ..:29: وكان أبوهم حاطها فوق مكتبة التلفزيون .. بعيد عنها .. لكنها شقيييييييييييييية لآخر درجة .. ما أدري كيف تسلقت وتطاولتها وانا نايمة وقطعتها .. آآآآآآآآآآآآآآآآه .. والله بكيت لحد ماتورمت عيوني .. زوجي عصب وعاتبني ..:16: يقول وش بيفيد بكاك ..:29: قلت له منعتني من كل شي .. بتمنعني حتى من البكا .. تبيني أخليها في قلبي مثل ماخليت أمور كثيرة شايلتها بقلبي وساكتة .. وطللللللللللعت اللي بقلبي عليه ..:14: ماعرفت وين احط الموضوع .. قلت أخليه في صالح راعية المصايب .. الجازي .. الله يحفظها ويهديها .. تكبر وتعقل وتريحنا .. واللي سوته اليوم ماهو إلا قطرة في بحر .. |
غريبة
مع ان جواز السفر أوراقه تخينة و صعب تتقطع واضح بنتك عفريتة جدا معلش خيرها بغيرها |
حبيبتي بحرينيه فكري شوي بعقل
انتي ماتدري وين الخيره يمكن ربي اراد لكم الخير في بقائكم وعدم السفر يمكن ان سافرتوا صار لكم شئ لاقدر الله تأملي في قول الله تعالى " "وعسى أن تكرهوا شيئاُ وهو خير لكم وعسى أن تحبوا شيئاً وهو شر لكم والله يعلم وأنتم لا تعلمون " |
عندي فكرة
حطيها مرافق على جوازك مش لازم جواز مستقل للأطفال تحت ال16 سنة |
ياقلبي عليك
تأكدي اختي ان الخيره فيما اختاره الله والله يعوضك بسفره لاهلك احسن منها ويهدي ابنائك ويرزقكم برهم ويسخرك لزوجك ويسخره لك |
إلك وحشة يا أم الدانة عليم الله
كل شي مقدر ومكتوب وربنا ما اراد الك السفرة لحكمة ما لا تبكي يا قلبي وهونيها بتهون سلامة قلبك من كل هم وحزن الله يخلي لك الشيخة دانة واختها الله يصلحهن ويكبرهن في طاعة الرحمن أم وليد |
الله يهديها 000طلعي غيره وابدي في اعداد الاجازة من جديد
|
سبحان الله قدر الله وماشاء فعل الله ماكاتب لج حبوبة وان شاء الله تروحين حق هلج قريب
|
الله يكتب لك الخير و الصالح..
صحيح موقف صعب و يضيق الصدر.. لك الله ناهيك عن شر.. |
زي ما قلتلك مسموح لك إضافة ستة من أبنائك كمرافق على جواز سفرك
لذا ضيفي بناتك و روحي استمتعي بالعطلة و لما ترجعي طلعليهم جواز جديد لو حابة |
ههههههههه
ماتدرين وين الخيرة فيه عساها خيرة ان شاء الله والمفروض جواز السفر يحفظ بدرج بعيد عن الاطفال بحرينية والله اشتقت لك اخبارك؟ |
هلا حبيبتي والله قطعتي قلبي لاتبكين وأنا ما ألومك ياعمري
بس اسمعي / الخيره فيما أختاره الله لك وخيرها بغيرها وإن شاء الله تسافري وتنبسطي ويمكن يكون معك وقت إجازه أطول و يمكن يكون انسب ويوافق مناسبة حلوه عند أهلك ماتدرين وين الخيرة فيه والله يخلي لك بنوتك الجـــــــــــــــــــــــازي وحلوا إنك طلعتي إلي في قلبك واستغليتي هالموقف واختلطت الدموع والحابل بالنابل لأن الكبت والكتمان متعب نفسيا جدا الله يوفقك ويسعدك وإن شاءالله تبشرينا بسفره غيرها وعقبال ماتجتمعي مع اهلك & لاتنسين /صوري الجواز المقطع ولما تكبر بنوتك ذكريها بهالموقف عشان تشوف وش قد تعبت ماما & |
السلام عليكم ...
اكيد ربي راد عنك وعن عيالك شر .... لا تبكي عى نجاتكم بل احمدي الله ...فامر المؤمن كله خير |
الله يكون بعونك ... صراحه قهههههر !!!
حاولوا تشوفون حل ... تطلعون جوازات جديده... تضيفونهم .... أي شيء ... بس المهم استعجلوا قبل ماتخلص الأجازة.. موفقين ان شاء الله ... |
[ فكري شوي بعقل
انتي ماتدري وين الخيره يمكن ربي اراد لكم الخير في بقائكم وعدم السفر يمكن ان سافرتوا صار لكم شئ لاقدر الله تأملي في قول الله تعالى " "وعسى أن تكرهوا شيئاُ وهو خير لكم وعسى أن تحبوا شيئاً وهو شر لكم والله يعلم وأنتم لا تعلمون "[/quote] |
ههههههههههههه
على قد ما الموقف قهرك على قد ماهو ضحكني الله يجعل ما حصل خيره لكم هههههههههه شكلها بنتك دمها خفيف الله يحميها لكم ويفرحكم بيها.. |
خيره يابنت الحلال الله اراد ما تسافري ..
احمد الله على كل حال .. والله يعوضك رحلة احسن منها .. لا تنكدي على عمرك والله ييسر لك الخير وين ما كان ... |
جزاكم الله خير على مروركم وكلامكم الطيب ..
ما أحب أخلي بناتي مرافقين في جوازي لأنهم أحيانا يسافرون مع جدهم وجدتهم بدوني .. ومكتب الجوازات مسكر ماراح يفتح إلا يوم الأحد عشان نعمل لهم جوازات جديدة .. يالله الحمد لله على كل حال .. |
ياحيي انتي موقف عصييييييييييييب وين اهلك بدوله عربيه والا وين بس امانه لاتطقينها لانها قليبي ماتدري انها انحرمت من اجدادها وخوالها كان ماسوتها ووين ووين علبال ماتجهزون جوازاتكم ارجعي للعمل وقولي ابااجل اجازتي قليبي واياك |
قدر الله وماشاء فعل ماتدرين وين الخير صبري نفسك وصدقيني ربنا بيعوضك
|
عدنا ..
أعذروني مساعة مريت على عجل .. نوران .. لا أوراق الجواز مش ثخينة كثير .. ومثل ما قلت ما أقدر أخليهم مرافقين في جوازي لأنهم يسافرون أحيانا بدوني .. ماودي ولكن للاسف تحكمني ظروف حياتي .. ولو بغيت أخليهم مرافقين لي لازم أنتظر يوم الأحد .. فأطلع لهم جوازات جديدة منفصلة لأنها تطلع في نفس الوقت أفضل .. أشكر لك مرورك العطر .. عطر المدينة .. جزاك الله خير .. بالفعل الكل قال لي نفس الكلام .. أم وليد .. حتى إنتي وحشتيني وكل عضوات المنتدى .. الله يخلي لك أولادك ويحميهم من كل شر .. شوبارد فديتك وانا بعد أشتقت لك ومتابعة أخبارك .. يارب تبشرينا بحمل قريب يارب .. أبوها كان حاط الجوازات بعيد فوق مكتبة التلفزيون .. بس مادرينا إن البنت عفررررريتة لهالدرجة .. الله يحفظها .. همس الأصيل .. بالفعل بعد ماطلعت اللي بقلبي أرتحت على الأقل زوجي عرف وين أخطاءه .. ولو إني أدري إنه لو تعدل يومين بيرجع كم السابق .. جزاك الله خير على كلامك الطيب .. رسيل .. الحمد لله على قضائه وقدره .. جزاك الله كل خير .. ام طاحوس .. خلاص الإجازة راحت .. ما أقدر أمددها .. ولا أقدر ألغيها .. ولا أقدر آخذ غيرها .. والحمد لله على كل حال .. أضغر أخواني .. الله يجزاك خير على مرورك العطر .. كريستالة .. يارب دوم الضحكة .. والله لا يحطك في مكاني .. أشكرك على مرورك .. gawlp .. جزاك الله خير على الدعوة والمرور الكريم .. سعودية نشمية .. تبين الصراحة .. طقيتها حبة قلبي .. وهي ماتدري ليش .. بس من هول الصدمة ماحسيت إلا بيدي تنمد عليها .. أهلي في ديرتي .. أنا في ديرة زوجي بدولة ثانية .. الحمد لله على كل حال .. م روكي .. قدر الله وماشاء فعل .. جزاك الله خير أخيتي على مرورك العطر .. |
http://www.raff3.com/uploads/picture/8a4fd89cd3.gif
خيرها بغيرها إن شاء الله وربما ما حدث به حكمة كبيرة من رب العالمين لا يعلمها إلا هو مع تحياتي |
اقتباس:
|
عزيزتي..
هناك مثل يقول (من رأي مصائب الناس هانت عليه مصيبته) في الصيف الماضي كنا قد أعددنا العدة للسفر .. والكل متحمس ومبسوط .. وكل شيء جاهز. قبل السفر بأسبوع .. سقط زوجي الحبيب من على السلم وكُسرَت رجله .. وظلت مجبسة لمدة ثلاثة شهور!!!!!! وطبعاً ألغي السفر. ;) مصيبتك يا عزيزتي أهون دون شك .. فالخسائر ليست جسيمة والله الحمد والفضل .. حفظكِ الله وحفظ زوجكِ وأبناءك من كل عين وسوء. |
هلا يا ام الدانه
اخبارااااك ياقلبي,, لاتزعلين نفسك بالعكس افرحي سبحان الله ماتدرين وين الخيره بالامر الله يعوضك بشوفت اهلك عن قريب |
اختي الغاليه
عسى ان تكرهو شيئا وهو خيرا لكم اشعر بالضيق اللي تشعرين به خاصه انكي مرتبه امورك بس ما تدرين يمكن الله منع هالسفر عشان يحفظك وانتي زوجك وبناتك من الشر الله يعوضك بسفره احلى وتستانسي فيها يارب |
تصير في احسن العائلات انا قبل سنه كنت حامل ببنتي الثانيه وكنت رايحه اولد عند امي وحجزت انا وبنتي الكبيره وجهزت اغراضي ولبسنا ورحنا للمطار وهناك الصدمه الكبرى ؟؟؟؟؟؟؟
ما يرضون يعطوني فيزة للبلد اللي انا مسافرته لانه اقامتي باقيلها ثلاث اشهر وتنتهي واقل شي لازم تكون 6 اشهر .........زوجي طبعا فرح لاني ما باسافر واولد عنده شوفي كيف منظري وانا رايحه ارتاح واريح نفسي من همومي وهمو الحمل وتعبه عند امي تخيلي ولدت وحدي وولادتي كانت قيصريه تعبت كثييييييييييييييييييييييييييييييييييييير نفسيا وجسديا على فكره يا بحرينيه ولكن......ز البلد اللي كنت مسافرتله هو .............................البحرين....... !! الله يسامحهم <<<<<امزح معك ......هما وش دخلهم هذه قوانين يلا حبيبتي قدر الله وما شاء الفعل وخيرها بغيرها |
انا لو مكانك موبس أصيييييح يمكن يغمى علي
يا شيخه الخيره فيما أختاره الله |
اختي ام الدانه والله اسمحيلي بس من جد شر البليه مايضحك يااختي ان شاء الله تكون خيره مااحد يلومك لو زعلتي وتضايقتي ولكن وش راح يفيد توكلي على الله وسبحانه راح يعوضك باحسن من هالرحله ان شاء الله الله يكون بعونكم دمتم بحفظ الله اخوك هلال العالم |
مهره ..
ايه والله الحمد لله على الاقل إحنا بصحة وعافية .. أشكرك على مرورك العطر .. جينز .. آمين يارب .. جزاك الله خير .. نايتي .. الحمد لله على كل حال .. أشكرك على المرور العطر .. toota2 .. عورتي قلبي .. قيصرية .. وبعيدة عن أمك .. الله يكون في عيونك .. جزاك الله خير على مرورك .. الاوزون .. هههههههههه .. أنا كنت قريب ويغمى علي بي الحمد لله طلعت قوية .. ههههههه .. مشكورة بعد قلبي على المرور .. هلال العالم .. أيه والله .. شر البلية مايضحك .. الله لايحطك في مكاني .. أشكرك على مرورك الكريم .. |
أم الدانه طولي بالك أختي.. عالأقل الجازي الله يحفظها عرفت تختار التخصص المصيبه في فهد تخصص ريموت كنترول مو شئ هالتخصص..
كلهم أطفال ومراحلهم العمريه من أجمل الأيام اللي نعيشها معهم.. وهذا درس لأبو دانه لازم مره ثانيه يرفع الأوراق المهمه في مكان بعيد عن البنات الله يحفظهم لكم.. الله يعوضك بسفره أجمل عن قريب..ويجمعك بالأهل على خير.. |
عسى المانع خير ....
|
اقتباس:
ام حمودي يسعدك يارب والله انا اشوفه درس لام الدانه لانها لازم تنتبه ايش قاعد يصير حولها انا وقت ما احس البيت هادي ما اطمن اشغل راداراتي :30: والاقي مخططات على وشك التنفيذ الله يصلح ذريتنا وذرية جميع المسلمين |
saapna81 ..
جزاك الله خيرا على مرورك العطر .. والله يحمي لك أولادك ويحفظهم .. ركاد .. أشكرك على مرورك الكريم .. مشرفتنا الفاضلة ليتني أسلى .. كنت جاية من الشغل ونايمة .. هب قامت من نومها وماحصلت أحد الكل نايم .. فاستغلت الفرصة .. ترى حتى أنا إذا ماسمعت لبنتي حس أعرف إنها منخشة في زاوية وعندها مصيبة تسويها .. نورتي صفحتي .. |
آخر التطورات ..
أمس الاحد أول أيام العمل .. زوجي من الصبح قبل الساعة 6 طلع من البيت وراح للجوازات عشان يطلع بدل تالف .. هناك .. عملوا معاه تحقيق .. ووقعوه على تعهد بعد تكرار ماحصل .. وطلعوا له الجوازات بغرامه 400 ريال لكل جواز .. وقالوا له إذا تكررت السالفة راح يبقون سنة بدون جوازات .. وبعدها على طول أخذنا أغراضنا ورحنا المطار وعلى أقرب رحلة .. وأنا الآن في ديييييييييييييييييييرتي الغالية .. ووسط أهلي .. بكرة تخلص إجازتي وراجعة ديرة زوجي بس بناتي بيبقون مع أهلي .. أشكر الجميع على مرورهم ومشاركنهم .. دمتم في حفظ الرحمن .. |
من دون زعل حبيبتي
اسمحلي اضحك الموضوع يموت من الضحك من جد شقااااااااوة |
ترجعين لنا بالسلامه..لاأشوفك معنا من غير شر الآن..انبسطي مع الأهل..احنا هنا مو طايرين..
|
| الساعة الآن 04:55 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©