|
النقاش بين الخطبين بمساعدتكم طلب مفيد للمخطوبين
انا ولله الحمد خاطب حاليا
وانا حاليا بدأت اكلم خطيبتي ونور عيني في الهاتف ولاكن احيانا من الخجل الي موجود يتبخر كل الكلام احاول اطلع اي موضوع ولاكن للأسف اجد صعوبة في التفكير لاني من اسمع صوتها تتوقف كل حواسي عن العمل وحتى من خطيبتي نفس الشئ يعني اتمنى انكم تساعدوني في حاجة بسيطة وانا منحرج منكم بصراحة الحاجة اني انا ودي اسئل خطيبتي عدة اسئلة علشان اتعرف عليها اكثر وأبغا اتناقش معها في عدة امور ولاكن للأسف لا أجد شئ او موضوع اتناقش معها فية يعني أبدأ بالتصبب عرق بسبب هذا الشئ يعني اتحدث معها مدة ربع ساعة ويكون كل الكلام الي بيني وبينها ينتهي بين اشتقت لك وأخبار عمتي واخبار عمي واخبار الأهل يعني انا احتاج مساعدتكم انة كل عضو يعطيني بعض الأسئلة أسئلها خطيبتي علشان اتناقش معها لان خطيبتي مو من الأقارب ولا تعرف عني شئ ولا انا اعرف عنها الا ماوصفوها جميع الاهل لي يعني ابغا أفكار أبغا اسئلة أبغا مواضيع اتناقش معها وأبغا تجاربكم كيف علشان استفيد لان انا وربي متعلق في خطيبتي اكثر من ماتتصورون وهي متعلقة فيني مررررررررررررررررررررررررة الرجاء مساعدتي لاني في نهاية الأسبوع سأقوم بزيارتها والمشكلة صفاتنا مشتركة من ناحية الخجل عدم التداخل أنعزاليين عدم الألفة مع اي شخص قلة الكلام حتى اهلي ماأعرفهم كلهم :d بس انا في النت الحمدلله لي علاقات كثيرة يالله ماأبغى اطول عليكم اتمنى من كل شخص يساعدني ابغا تطول المكالمة الواحدة الى عشر ساعات من خلال الأسئلة الي تنصحوني اطرحها وأيضا النقاشات بيني وبينها إعذروني على طرح هذة المشكلة حيث اني التمست روح الأخوة والتعاون فيما بينكم وشكررااااااااااااااااااا |
السلام عليكم
باجاوب على سؤالك انا حاليا مخطوبه باذن الله تستفيد من افكاري اسئلها عن ايش تحب وايش تكره وكيف تبغى حياتكم مع بعض بعد الزواج او كيف تحب بيتها يكون نوع الاثاث الوان الاثاث كبدايه لان توكم مخطوبين باين من كلامك واذا اخذت عليها واخذت عليك الكلام بيطلع لوحده بتلاقي خجلك وخجلها قل تقريبا بكون راح تجربه شخصيه انا خجوله لابعد درجه ومن كل شي بس مع خطيبي لنا فتره مخطوبين دحين خجلي طبيعي جدا الحمد الله يعني لما يكثر الكلام بينكم بيقل الخجل لين يصير طبيعي وهذا الشي فى يدك لان المراه اكثر خجل من الرجل ابدا باسئله عااااااااااااديه مثل ماقلت لك اسئلها ايش تحب تسمع ايش تحب تاكل كيف تحب تلبس اسئله صح بسيطه بس لان دوبكم تتعرفو على بعض ومن كلامها انت بتعرف شخصيتها وطباعها اتمنى اكون افدتك وفقكم الله امين |
اهلين اختي asm اولا اشكرك على الرد الجميل والرائع
وبصراحة تكلمنا في هذي الأمور وخلصنا وعدتها مرة ثانية ناقشتها فيهم بس قلت لك حتى انا فيني خجل لاأبعد الحدود وهي مبسوطة بهذا الشئ ولاكن يضيع الكلام يعني اختي ياليت تقولين لي مثلا بعض الأسئلة الي تتناقشون فيها انتي وخطيبك اذا مافيها احراج لاني انا عقدتي ابغا فكها يعني ابغا افكها وانشاء الله بمساعدتكم والمشكلة لو ماأتصل يوم واحد وربي انها تبكي مرررررررررة وانا بصراحة يتقطع قلبي اذا سمعت من امها هذا الكلام بس انا احيانا ماأتصل والسبب انة ماعندي اسئلة اقولها او اي استفسارات اتمنى انكم فهمتوا قصدي وشكرااااااا لكي اختي asm مرة ثانية |
السلام عليكم و رحمة الله و بركاته .... اخي العزيز ...< new man > ....سوف ادلك على رابط ...بإذن الله تعالى ...تجد به كل ....ما يجب ان يدور بين الخطيبين ... و اتمنى منك ان تستفيد منه ..استافادة ...كبيرة ...لانه غايتنا ...افادة الجميع ...بقدرة الله تعالى ... وهذا هو الرابط ..... http://vb.66n.com/showthread.php?t=13097 اتمنى ان اكون ...افدتك ولو بجزء .... وشكراً ... Game Over |
السلام عليكم ورحمة الله وبركاته..
الأمر بسيط.. بس عليك أنك انت ألي تجرها في الكلام...والبنت طبيعتها تحب من يبدا قبلها ...راح تتغير لو تغيرت أنت.. أسألها أكلتي زين اليوم .. أوكي شنو أكلتي.. وقوللها أنتي ما تاكلين كويس ... وأبيك تهتمين لصحتك عشاني .. أسالها وين طلعت مثلا اليوم .. أسالها عن صاحباتها ومنو أغلى إنسانه عندها... وأيش تحب .. وانت دخل المزح بين الكلام ,, مثلا عن أيام الطفوله في مواضيع كثيرة بس أنت ارفع التكلف بينك وبنها وتخيلها أنها أنت.. في ناس يوصلون للتداخل الروحي ..يعني يفهمون بعض من غير كلام اتمنى لك التوفيق لايسمح بوضع مثل هذه التواقيع |
بصراحه الاعضاء ماقصرو ردو على سؤالك بالاذت الاخ
Game Over لان اللى فى الرابط هو اللى فعلا تناقشنا فيه انا وخطيبي وكمان كلام الاخ ezil3ah وفقكم الله وقرب بينكم وصح الخجل حلو بس لما يكون عائق بينكم بتملو منه حاول تقلل من خجلك وتطلب منها تحاول شوي بس تقلل من خجلها لان السبب الاساسي اللى خلانى اقلل من خجلى بصراحه كان طلب خطيبي منى صح حلو بس لما يكون طبيعي احلى تحياتي |
اخى new man
انت ممكن كل يوم تتصل فيها تحكيلها عن يومك فى الشغل مثلا......ايش حصل.....نوادر اليوم......اصدقائك ايش حكيت معاهم.....رئيسك .....اليم كان فاضى ومافى شغل....او كان زحمة ماعرفت التفت...وتسألها كان يومها كيف ايش فطرت....قابلت مين....حتى اخى ممكن تسالها ايش كانت لابسة اليوم....بس خلى بالك من الروتين وتكرار الأحداث يعنى مو كل يوم تحكيلها نفس الشئ.....يعنى فى يوم صحيت متأخر....حصلت على ترقية.....لو كنت بتفكر تعمل شئ تأخذ رأيها مثلا نازل تشترى لبس تتصل عليها تأخذ رأيها....حبيبتى قدامى بنطال حلو بس محتار اخذ لون ايش من الأوان....وفى حاجات كثير..... او رايح تشترى هدية لصاحبك قولها تقترح عليك قرب المسافة بينكم.. اتكلمو فى شقتكم فى الأثاث فى طريقة تربية الأطفال الأشياء اللى تعصبك....ولما تفتح اى موضوع حاول تتفرع منه عشان تحكى اكثر فى البداية بتكون خجول مش لازم تقول ارسلها مسج اشتقت اليك....اتصل عليها فى نصف اليوم....ترا ظبتك ايش بتسوى.....ترانى خابر كل شئ..... بضحك طبعا كلنا فى البداية بنكون خجولين لا تقلق الله يوفقك |
لقد كفو ووفو الاخوة بمشاركاتهم..بس ما ادري احس ان الرابط الذي وضعه الاخ game over
يخلينا رسميين اكثر من اللازم...انا احيانا اعاني من هذة المشكلة ايضا مع خطيبي...لكن بحكم خبرتر(((سنة ونصف))) :D :D يا اخي السائل لا والف لا لخجلك ..صدقني هذا اكثر شيء يقهر البنت هي تتمنى ان تغرقها بالكلام الحلو دائما تكون انت الجريء لانة يستحيل ان تبدأ الفتاه هي بكسر هذا الحاجز خصوصل في فترة الخطبة.......صدقني لا استطيع ان اصف لك مدى التعاسة والحزن التي امر بها عندما يمون هناك موضوع يجب ان نتناقش فيه..وتقف مسأله الخجل في طريقنا...الحياء حلو بس مو دائما :) :rolleyes: |
الموضوع هذا حلوو وسهل وانت يلى مخليه صعب
اسئلها عن ايش تحب تاكل؟ وين تحب تخرج بالااجازات؟ وين تحبون تقضون شهر العسل؟ وانت رايح تزورها جيب لها هديه حلوه مثل عطر 00ساعه00 او خلي دمك خفيف واشترى لها لعبه اطفال امزح معها كثير ترى البنت تحب المزح وخفه الدم ومن خلاال المزح قولها انك تحبها000الخ حط مع الهديه رساله فيها ابيات شعر والله يوفقك |
اولا اشكركم جميعااااا على الردود وماقصرتوا
وبصراحة فية اشياء انفعتني من جد ولاكن انا ابغا تجاربكم ياأعضاء ابغا استفيد من التجارب العملية وماأبغى الرسميات |
هلا أخوي..
المشكله اللي انت فيها بسيطه جدا ماله لازم تعقدها لهالدرجه!! الخجل اللي فيك شي طبيعي و مع الوقت بيروح و يتلاشى بس حط في بالك شي واحد (البنت و صدقني كل البنات يعجبهم الريال الجريء بس بالحدود اللي نعرفها) و دامك ريال زمام الامور في ايدك انت... يعني.. ابدا انت في الكلام و طرح المواضيع... كلمها عن نفسك...احلامك...طموحاتك...كيف تبغي حياتك تكون معاها شو اللي يعجبك فيها...كلمها عن حبك لها و لهفتك... اسألها أسئله تقدر تسحب منها الكلام الحلو مثل: (حبيبتي مشتاقه لي مثل ما انا مشتاقلج؟.......تفكرين فيني مثل ما انا افكر فيج؟ تحبيني كثر ما انا احبج او اكثر......؟) و تشطر و زيييييييييييييييييد من هالاسئله سمعها نكته و امزح معاها مثل ما قالت الاخت فجر... دلعها ترى الدلع حلووووووووووووو و البنات يموتون في اللي يدلعهم و دامك بتزورها خذ معاك هديه بسيطه او حتى ورده حمرا...... و اول ما تشوفها اغمزلها... و صدقني بتحبك اكثر... و اعطيك ضمان بعد و تذكر دايما انك الريال و انت المفروض اللي تبدا بطرح المواضيع لان البنت خجوله بالفطره و الخجل ما يناسب الريال و الله يوفقكم و يخليكم لبعض |
اسالها ايش سمعني عني قبل العقد و قلها انت كمان
و يوم النظرة الشرعية .... كلمها طموحك و افسح لها المجال لتعبر عما في نفسها ارسلها رساايل كتير تتكلم عن شعورك لان الرسايل توول كلام يمكن صعب عليكم في البداية و لا تكتفي بيها حسسها بمرحك بحبك... يوم قلها لما حتنامي قوولييلي و نامو في نفس الوفت كلمها و هيه على السرير و قلها تصبحي على خير حبيبتي و في الصباح ارسلها صباح الخير كلمهاا عن اهلك عن اصحااابك قلهاعن المواصفات اللي كنت تتمناها في زوجتك و اسئلها ايش المواصفات اللي كانت تتمناها في شريك حياتها وقلها انك دايما تفكر فيها بسسسسس الهم من كددددده لو كانت فترة الخطوبة طويلة لا تقل رسايلك و اتصالاتك ...... عشان ما تحس ان اهتمامك بيها قل عن اول و اتمنااالكم حياة سعيدة |
الف مليووووووووووووون شكر لردوكم الرائعة
انا بقولكم الحين وش اخر التطورات الي صارت معي طبعا انا مسألة الخجل موجودة بس اذا كانت موجودة والدتها او والدها اكون مرتبك وأعرق اما اذا كنت معها الحمدلله لساني ينطلق والأن اتكلم معها بالثلاث ساعات بس المشكلة تكمن في خجلها ماقدرت اتغلب علية لدرجة اني قلت لها اذا شفتك هذي المرة اتمنى اني احظنك وهي قالت لي اتمنى هذا الشئ وانا بصراحة حظنتها وحسيت بدنيا ثانية حتى هي في التلفون قالت لي حسيت انك تحبني حب كبيرررررر المهم حاليا المشكلة فيها اني اذا طلعت معها او جلست معها بالساعات حدها عشر الى عشرين كلمة تكون خجلانة مني اما بالتلفون نتكلم ولا نوقف بس لما اقابلها للأسف حتى اني كنت بقبلها قبلة الحياة رفضت قالت خليها اليما الزواااج ههههههههههه بعدين لما مشيت من عندها وكلمتها في التلفون حسيت انها ندمانة وقالت لما ترجع مرة ثانية اوكي طبعا انا ابعد عنها حوالي 300 كيلو يعني محتاج اكثر من ساعتين اليما اوصل لها يعني بين كل فترة اروح لها بس وش تنصحوني اني الغي هذا الخجل منهااااا بس من جد انصح الخطاب بحظن خطيبتة والله انة يشعر بشئ غرررررررررريب بدااااااااخلة وهي تشعر بحاجات غريبة انتظر ردودكم |
كلنا او معظمنا عانى من هذا الشيئ فترة الخطوبة ..او الملكة بالاصح... انا عن نفسي لقيت ان
طريقة المزاح اقرب طريقة تزيل الحواجز بيننا ... قلها انك طيب وما تعض ولا تخربش....انك تتمنى تقطع ال300كيلو عشان تلعب بجوالها ....لو قدمو لك عشاء محترم قلها احلى ما في الاكل شكل الملعقة...لاتكون رسمي مرة حتى في طريقة الغزل ... وبشرنا بآخر التطورات0 |
السلام عليكم ورحمة الله وبركاته ،،،
أنت نفس حالتي بالضبط ،، انا خطبت من شهرين من فتاه خارج بلدي من السعودية والصراحة أول مكالمة أكلمها بالتلفون كانت حوالي 10 دقايق بس ،،، المشكلة اني الكلام كله نسيته يوم سمعت صوتها ،، والصراحة تحسفت كثير على هذه المكالمة لاني ما خذيت راحتي ،،، المهم بعد فترة صرت اسوي طريقة عشان ما انسى الكلام ،،، استخدمت الورقة والقلم عشان ما أنسى ولا كلمة ،،، وبعد اسبوعين كلمتها ثاني مرة بس طولت شوي 20 دقيقة المهم تكلم معها عن الدراسة ( اذا كانت تدرس ) عن المدرسة والمواد والمدرسات عن الواجبات والاختبارات وشوي شوي بتحس انها تطول الكلام اسالها عن الطبيخ ايش الاكلات تفضل وايش تطبخ والاكلات الغير مفضلة اسالها عن الهويات الي تحبها وعن الاطفال وعن ترتيب المنزل وصدقني لو تميت على هذه الطريقة بيزيل الخجل نهائيا على فكرة انا اخر مكالمة تحدثت معها كانت مدتها 50 دقيقة ومن بعدها قطعوا جوالي الاتصالات علي فاتورة تكسر الظهر بس تهون للغالية ،،، وتحياتي لكم والله يوفقكم ويرزقكم الذرية الصالحة ودعواتكم لي ،،،،، |
أنا لست أعلم ماذا أقول لك يا أخي الكريم ... ولكن عندي أمر خطر على بالي أود أن أذكره . ولم أحبب أن أتركه يدور داخل نفسي دون أن أخرجه لك ولجميع الأخوة الأعضاء الكرام ...
أخي الغالي .. أولا أبارك لك هذه الخطبة .. واسال اللهالعلي القدير أن يديم هذا الحب بينكما .. وأن يجعله حبا عامرا بطاعة الله وأن يجعلكم أسعد عروسين على وجه هذه الأرض .. قول آمين .. سيدي الفاضل الغالي ... كلامي ليس إلا مجرد استفتسار ... ذكرت الله يحفظك إنه أنتم مخطوبين .. وإنت وبقية الاخوة تعلمون أن الخطبة لا تبيح لك الكلام مع البنت ولا حتى الجلوس معها ... فهل تقصد بالخطبة أنكم قد ملكتم ( وتم كتب الكتاب أو عقد القران ) أنا أحسست ذلك من خلال كلام الاخوة وردودهم بأنك رجل مملك ولست خاطبا ... الحالة الأولى : إن كنت مملكا : فقد وفى الاخوة بما ذكروه لك والحمد لله كما تفضلت انحلت المشكلة الأولى وهي موضوع الخجل ونقاش المواضيع .. وأصبح لقاءكم هاتفيا بالساعات .. وأما ما يتعلق بالمشكلة الثانية فسوف تحل كما الأولى بإذن الله .. وعموما هذا أمر طبيعي ومن فطرة البنت الخجل لا تضغط عليها لتخرجها عن أجمل ما فيها .. هي شوي شوي رح تتعود .. خليك إنت الحكم وإنت اللاعب في هذي الفترة هي بس الجمهور وكل فترة والثانية تصفق صفقة بسيطة ,, يعني تدلي بدلوها .. وزي ما تجرأت في التلفون رح تتجرأ بإذن الله في اللقاء الحي المباشر عبر الأقمار الصناعية الفورية ... إنت بس إنت اصبر عليها شوي .. واتبع كلام أهل الخبرة اللي عندنا ماشاء الله عليهم .. ما يقصروا معاك .. الحالة الثانية : إنت خاطبا مجرد خطبة : فأرجوك يا أخي الكريم .. أحب أن أهمس في أذنك ـ إن سمحت لي وأعتذر عن هذه الهمسة من قبل أن أقولها ـ إنك على خطا .. وخطأ كبير .. فما تفعل لا يصح ولا يجوز لك شرعا .. لن أطيل .. ولكن أقول لا تبدأ حياتك بمعصية ... وسامحني مرة أخرى وليسامحني جميع الاخوة الأعضاء إن كنت أخطأت الفهم ,واعتذر بحرارة للأخ الكريم على التدخل في الخصوصيات الخاصة به .. فنك كل السماح والاعتذار ... وفقك الله وأدام بينكما ما تتمنونه .. وحقق لكما كل ما تحلمون به .. |
الف شكررررررررررررررررررررررررررر لكم شباب على ردودكم المشجعة
وأنا بصراحة ياأخوان ماأدري وش اقولكم بصراحة أخر التطورات هههههههههههه ان خطيبتي رحت لها هذا الأسبوع وجلست معها في بيتهم وللأسف الخجل زايد فيها عشرين حبة يعني ثلاث كلمات طلعتها وبس لما سئلتها كيف حالك قالت الحمدلله وكلمتين او ثلاث وبس وأنا بصراحة كثرت المزح مع عمتي وأخوانها ومعها ولاكن تكتفي بالأبتسامات الساحرة فقط <<<<<<<<<, راح قلبة من هذي الأبتسامات وبعدها لما مشيت بدأت تبكي لية انها ماتكلمت وبالرغم من انها متشجعة معنويا ومستعدة من قبل قدومي بسبع ساعات تقريبا ولما طلعت من البيت بكت مررررررررة حتى نامت وهي تبكي لانها لاحظت اني تضايقت انها ماتكلمت معي وبعدين انا هونت عليها قلت لها ان الأيام جاية كثير لانها اتصلت علي ندمانة انها ماتكلمت بالرغم من اني حاولت اكثر بس للأسف اخر زيارة حالة الخجل زايدة حبتين بس الله يكون بالعون وطبعا قبل ثلاث ايام جلست اسولف معها في التلفون مدة ثلاث ساعات ونصف اخوي yah2003 طبعا احنا ملكنا من ثلاثة أشهر يعني هي زوجتي على سنة الله ورسولة وأشكرك على هذة المداخلة الرائعة وأتمنى ان يكون هذا الموضوع ذا فائدة للجميع |
| الساعة الآن 09:13 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©