|
صدمت بزوجي يرسل رسايل لبنات!
السلام عليكم ..
انا متابعه عن بعد .. .بس اول ما حصلت لي مشكله لم يخطر في بالي غيركم ممكن يسمعني ويساعدني.. مشكلتي هي مع الانترنت.. انا متزوجه من 12 سنه ولي ولد وبنتان وحامل في الشهر الخامس.. المهم.... انا ما ادخل النت كثير..بس سافر زوجي قبل كم يوم وقلت فرصه ادور افكار جديده لرجعه زوجي لكني ..... صدمت بزوجي يرسل رسايل لبنات في نفس الدوله اللي مسافر لهاا...ويطلب منهم اشياء ما كنت متوقعه انها يطلبهامن غيري..1!!!!!!!! الحين كيف اتصرف...هل اتصل فيه .اش اعمل بليـــــــــــــــــــــــــــــــز ما اقدر اخبر احد غيركم ناطرتكم ....لا تخذلوني الاشراف/تم تعديل العنوان |
سأنصحك نصيحة ولا اعلم ستنجح ام لا...
تتصلي لزوجك فوراً وتخبريه انك حلمت به حلم سيء جداً جداً ..وان احساسك يقول ان سيحدث له مكروه لا قدر الله اذا لم يرجع في الحال وانك خائفة عليه وان الأعمار بيد الله ..وخوفيه كثيرًا من الأمراض والموت ..هي فبالفعل كذبة لكنك به ستحمينه من كبيرة تغضب الله قد يقع فيها (والله من وراء القصد)... ادعي له كثيراً ان يحميه الله من وسوسة الشيطان ومن وسوسة نفسه الأمارة بالسوء.. زالله يهديه ويرجعه بالسلامة.. |
لاتفتحي الموضوع معاه يعني اقري وشوفي شنو كاتب شنو الي ناقصة بالبيت وهذا الشي استخدمي لصالحك يعني تكدرين تستخدمين معاه كلمات يحبها واشياء كاتبها ويريدها ذكري خلي يرجعلك بلا ميحس انتي عرفتي شي حاولي تسحري بكلامك بالتلفون يعني ما اعرف فهمتي عليا ما اقدر اوضح اكثر اتصلي بي علطول ابعثيلة رسائل تخلي يكول شلون مرة عندي وهو راح يحس بنفسا
|
اقتباس:
اقتباس:
|
اقتباس:
هل تقصدين انه زوجك قد يوصل الي الخيانه الجسديه ؟؟ بعدين اختي انت ادرى بزوجك .. هل هو من النوع اللي لو واجهتيه راح يعترف على طووول و راح يعتذر و راح يوعدك بانه ما يكرر هذا الشي مره اخرى .. اما هو من النوع العصبي اللي قد ينكر و يقلب على راسك الطاوله و يتهمك بانك تتجسسي عليه و يطلعك انت الغلطانه .. او انه راح يعترف لك و بعدين راح يعمل اللي في راسه من غير ما يحسب لك حساب .. من اي نوعيه زوجك ؟؟ اركدي اختي و لا تستعجلي بالمواجهه .. وربي يربط على قلبك .. |
الله يهدي زوجك .. ويصبرج
ونصيحتي هي انج تتريثين ... وتفكرين ... وهم تفكرين.. هل انتي مستعدة انج تنفصلي؟؟ لان هذي خيانه ومب أي خيانه ولو فرضنا انج فكرتي تتحملين و تتظاهرين بأن شي ما صار او تسامحيه هالشي بأثر وااايد على علاقتج معه في المستقبل راح اتصير المشاحنات .. والشك .. الدائم وراح تنحبطين كلما تتذكرين فعلته وهالشي راح يأثر عليج وعلى ثقتج بنفسج.. وعلى علاقتكم كل وقت .. شوفي انتي من اي نوع واذا كنتي قادرة انج تواجهين..او تتحملين او تنفصلين ....الله لا يقوول استخيري ... الله يصلح ما بينكم |
نوران بارك الله فيك
|
مساء الخير..
الاخت سحر انثى مشكوره على النصيحه بس ما اعتقد تنفع ..شاكره لك مشاركتك. اختيrooz_roro..اسعدني مرورك وصدقيني ان زوجي مو ناقصه اي شئ بالبيت وربي مو مقصره من اي ناحيه ... وهو ما كان من هالنوع وبيننا ثقه لا محدوده اختي -نوران-بارك الله فيج .. شاااكره اهتمامكم |
اختي أميرات
هذا هو طلب زوجي منهم لكن صدقيني اني مو مقصره معاه بشهادته هوو.. قبل فتره كان يدور في قوقل لمن اشوف البحث يطلع معاي عنوان ,ارقام بنات في ؟؟؟الدوله اللي مسافر لها ...فسالته قالي مجرد لعب ما عندي شغل فكتبت هذا ..لان مافي احد يستخدم الكمبيوتر غيرنا علما ان اكبر اطفالي بنتي عمرها 7سنوات وما معانا احد في البيت ..فلازم يعترف .. صدقيني انا اعرفه مو من هالنوع ...بس وانا اشيك ايميله قرات رسايل والله العظيم كانت كالصاعقه على راسي وكل شوي ارجع والله واتوقع ان عيوني تخوني وما اشوف بس زوجي لا..دزيت الرسايل على ايميلي عشان ما ينكر..وما ودي اقوله عشان اشوف الردود ويمكن يراسل مره ثانيه ..الف شكر ليكي اختي الحبيبه |
اختي خيال البحرين
اشكر مرورك صدقيني اختي كلامك هو اللي يدور في بالي..ومحتاره شسوي واحس ان شئ كبير انكسر داخلي وما اتوقع انه ممكن يتصلح..لكن صعبه اني انفصل خصوصا انا في دوله واهلي في دوله .. والله يساعدني على الحل بمساعدتكم ان شاء الله |
دقي عليه وقولي له كل شي
احسن شي المصارحة ولاتخلينه يحاول يبرر تكلمي وذكريه بعذاب الاخرة وابكي وانهاري وسكري التلفون وشوفي موقفه صراحة شي ماهو سهل الله يهديه طبعا لاتاخذين بنصيحتي الا في حال انك عارفة ردة فعل زوجك لاني كتبت لك ردي من ناحية وجهة نظري ورايي الخاص لو صار لي زي كذا ماراح اسكت ابدااااااااااااا |
شوفى اول حاجه لازم تعمليها وفورا انك تقطعى عليه متعته واستئناسه بانك تخلى حد من أهله أو أهلك يتصل عليه ويقوله ارجع حالا مهما كان وراك من مشاغل لأن الحمل تعب زوجتك حدا وهى هتموت ومش قادره حتى تكلمك ولما يرجع لك يكون لكل حادث حديث ولا بد من المصارحه لأنه ممكن يتورط ويتعدى بأى مرض جنسى لا سمح الله ويعديكى انتى وجنينك وانتم مالكوش اى ذنب
|
بنات الله يهديكم اركدوا شوي .. ردودكم تخلي النت تتهور و تتسرع و تواجه زوجها .. خاصه انها ما عندها دليل على خيانة زوجها الجسديه .. اختي لازم تتأكدي بشكل قطعي ان الخيانه جسديه قبل ان تتهميه .. في مثل هذه الامور التريث مطلووووب .. اختي (حظي واعرفه) اقرأي مداخلتي الاولى جيدا و اجيبي على الاسئله اللي سألتك اياها .. زوجك من اي نوع .. هل يقبل المواجهه او لا .. ما تتوقعين ردة فعله لو واجهتيه ..؟؟ اذا رجع بالسلامه من السفر خلي استقبالك له عادي جدا .. يعني لا تبيني له انك ملهوفه عليه .. الشي الثاني فتشي حقيبته جيدا بحثا عن اي شي يدل على خيانه جسديه مثل واقي ذكري او قطعة ملابس نسائيه داخليه .. او ريحة عطر نسائي او من هذه الاشياء .. لكن حذاري يا اختي انه يحس فيك .. خليلك حذره جدا .. اذا امكن ان تفتشي سيارته بدون ما يحس فيك .. اختي ارجع و اقول قد يكون زوجك فقط علاقته على النت فقط فقط فقط .. انما ذكرت لك هذه الامور لكي تطمئني انه لم يخنك جسديا . اختي .. لا تتسرعي في المواجهه قبل ما يكون عندك اكثر من دليل ملموس على الخيانه .. الرسايل على الايميل اللي حصلتي عليها دليل غير كافي .. تحتاجي الي ادله اخرى .. اتهام الزوج بالخيانه امر صعب جدا و يحتاج الي تريث و هدوء .. وربي يطمنك اختي .. |
اقتباس:
فكيف تريديها ان تصبر حتى يقع زوجها فى الحرام ويتنقل له مرض مش ممكن الشفاء منه ويمكن ينقله لها !!! انا أعمل بالمجال الطبى وتورد على حالات لا تتخيليها المهم انا شايفه انها ترجعه عن اللى ناويه وتحافظ عليه قبل كل حاجه وبعدين تبقى تتأكد زى ما قلتى لها كلامك صح يمكن ان كل ده سوء ظن بس هيبقى ايه العمل لو ما طلعش سوء ظن وطلع شكها فى محله |
اقتباس:
اختي الغاليه sa33.. اقدر حرصك و خوفك على صاحبة المشكله .. وهذا كله من واقع ما ترينه في مجال عملك .. لكن ليس هكذا تورد الابل .. ليه تكذب على زوجها و تفضحه امام اهله و اهلها و هي مو متأكده من خيانته .. كيف راح يكون موقفها امام الجميع اذا طلع زوجها مو خاين او ما قدرت تثبت عليه بالدليل القاطع انه خاين ؟ اختي sa33 اللي يريد ان يخون زوجته يخون حتى في البلد اللي عايش فيها .. مو شرط يسافر عشان يخون .. ولا من شاف و لا من درى .. لكن التريث مطلوووب .. لانه لو اتهمته بالخيانه و طلع هو بريئ قد تدمر حياتها باستعجالها باتهمامه و فضحه امام الجميع .. ارجو اني قد اوضحت لك وجهة نظري .. طبعا الرأي الاول والاخير لصاحبة المشكله .. نحن بانتظارها لتطلعنا على اخر الاخبار .. |
حبيبتي حظي واعرفه
قلبي معاك والله الخيانه مؤلمة بكل أنواعها مو بس الجسدية لو مجرد يفكر بغيرك بالخيال تعتبر خيانة ـــ وجهة نظري ــ بما إنها أول مرة فاغفري وسامحي مع إبداء صدمتك له وتخييبه لظنك فيه رسول الله صلى الله عليه وسلم كان يغفر لخادمه سبعين غلطة في اليوم فما باللك بالزوج وزوجته ! ! اعرف أنك موجوعة مصدومة وستبقين فتره تشكين فيه لكن انتي فهميه بأن ثقتك فيه اهتزت وأنها ممكن تعود بمجهود بسيط منه وهو ألا يرجع لتلك الأفعال اؤيد الأخت التي تقول إقطعي عليه متعته الآن وهو مسافر فلربما مواجهتك له بالتليفون < تسد نفسه > عن معصية كان ينوي القيام بها وموشرط زنا أنا أستبعد هذه الكبيرة إستبعاد نهائي لكن الرجال يظنون أن مجرد الإلتقاء بنساء ولمسهن وتقبيلهن والرقص معهن وربما الإستمتاع بهن بدون تعمق يظنون أنه أمر بسيط ولا يدرون أنه من أعظم الفواحش واشدها إيلاماً على نفس الزوجة المخلصة واجهيه بالتليفون بدون ماتغلطين عليه فقط أذكري له وشكثر كنتِ تشوفينه فوق كل الشبهات دعيه يتحسر على المكانة التي خسرها عندك الله يثبتك |
اولا عليك باللجوء الى الله والدعاء والاستغفار
ثانياعندما تكلميه وهو مسافر قولي له انك قلقة وضائق صدرك وانك تحسين ان فيه امر غريب صاير بدون تصريح ثالثا المواجهة عندما يرجع وتوضيح حرمة ذالك وان كما تدين تدان في بناتك ومثل ذالك اعانك الله وجمع بينكما على خير |
هل تقصدين انه زوجك قد يوصل الي الخيانه الجسديه ؟؟
نعم اختي اميرات وهذا مطلبه من الرسايل اللي قراتها.. بعدين اختي انت ادرى بزوجك .. هل هو من النوع اللي لو واجهتيه راح يعترف على طووول و راح يعتذر و راح يوعدك بانه ما يكرر هذا الشي مره اخرى .. هو من هالنوع..بس وعد مؤقت.. اما هو من النوع العصبي اللي قد ينكر و يقلب على راسك الطاوله و يتهمك بانك تتجسسي عليه و يطلعك انت الغلطانه .. لا ما ينكر يعصب ويتنفز بس ماتوصل للطاوله يتفاجئ مني كيف عرفت.. او انه راح يعترف لك و بعدين راح يعمل اللي في راسه من غير ما يحسب لك حساب .. من اي نوعيه زوجك..؟ يحس بالذنب ويعترف..خصوصا اختي انه كل ما سوي شئ غلط ..احس فيه ..حتى هو يستغرب اشلون عرفتي ....؟ اركدي اختي و لا تستعجلي بالمواجهه .. مشكوره على اهتمامج ..وناطره نصيحتج... وربي يربط على قلبك .. |
اشكر كل اللي اهتمووو بالموضوع ........وامانه تساعدوني لاني ما سويت اي شئ
واليوم اتصل 3 مرات وما قدرت ارد ... واكيد ما اسوي شئ الا بعد مشورتكم .. وناطرتكم .... |
اختي مصدومه بالزواج ..
انا اول شئ كنت بيسوي نفس اللي قلتيه ..بس هو مسافر مع مجموعه شباب فما حبيت اني اصغره او احرجه عند احد ...وما اتوقع اني اقدر اكلمه بدون وجود احد معاه ...قلت ماله داعي الفضايح |
اختي سحابه الصحراء
كلامج يريح القلب بارك الله فيج وهذا اللي قاعده اسويه ولا تنسيني من دعائج |
اختي هل تتوقعي ان زوجك كان يخونك من قبل ان تكتشفي هذه الرسائل ؟؟ يعني هل انت واثقه ان زوجك يخونك جسديا ؟؟ هل هذه اول مره يسافر مع هؤلاء الرجال ؟؟ وهل تعرفين هؤلاء الرجال يعني هل هم ممن يرتادون الاماكن المشبوهه ؟؟ متى تتوقعي عودة زوجك من السفر ؟؟ اذا اتصل عليك كلميه بشوية برود يعني بدون لهفه ... الله يعينك اختي .. |
اقتباس:
اهلا اختي اميرات انا في اول زواجي كان له يكلم بنات بس ما له علاقات جسديه لانه يخاف الله .. هذي اول مره يسافر معاهم ..كل مره لما يسافر يكون مع اخوانه او اخواني وازواج خواته .. انا اللي اعرفه حسب كلامه ان سمعتهم طيبه ..بس هم اعمارهم فوق 35 وللحين مو متزوجين .وكل صيقيه بديره هو حجزه يوم 24 \6 والله يا اختي ما اقدر اكلمه احس باحساس غريب...لمن اشوف رقمه .... الف شكر |
والله يا اختي اذا كان الزوج يسافر بسبب ابتعاث من مقر عمله ويكون لحاله .. لا حول ولا قوه ما تقدر الوحده تعمل شي .. لكن الخوفه اذا كان يسافر لحاله او مع مجموعه من الرجال الغير معروفين لدي الزوجه و بدون سبب .. يعني ليست سفرة عمل .. و بالذات اذا كانت البلد اللي يسافرون لها مشبوهه .. هذي مصيبه .. الخوفه يا اختي انه يتعود على السفر معهم .. عشان كذا اذا اتصل يا اختي جاوبي على اتصاله لكن ببرود و اذا سألك وش فيك بارده حسسيه انك مو مرتاحه من سفرته مع هؤلاء المجموعه وان سفرته طووويله .. الحين اختي انت ما بيدك شي تعمليه الا انك تنتظري عودته و تفتشي في اغراضه .. واحتفظي باي شي ترينه يثير الشك و يؤكد خيانته حتى اذا حانت الفرصه تواجهيه بها .. حاولي في هذه الاثناء انك تبحثي في النت عن الامراض الجنسيه مثل الايدز و الهربس و السيلان و ليت يكون فيها صور و اجمعيها و طبعيها واعملي منها مثل المجله واذا عاد من السفر و انت جالسه معه خليه يتفرج عليها على اساس انك عامله بحث لابنة صديقتك او اختك او اي وحده من اقاربك مطلوب عليها في المدرسه و انت تريدين اخذ رأيه في هذا البحث .. وراقبي ردة فعله .. واحتفظي بهذه الصور .. واذا اراد السفر مره اخرى دسي هذه الصور في حقيبة سفره بين ملابسه .. ولا تنسي الدعاء لزوجك بالهدايه .. |
لا الكذب ينفع
صارحيه وقولي له الصراحة |
تسلمين اختي اميرات على التواصل ..وعساج على القوه .
|
تسلم اخوي مخاوي العز
واكيد الكذب ما ينفع...واكيد ما بكون مرتاحه اذا ما صارحته .. |
اقتباس:
العفو اختي نحن بالخدمه .. فكره المجله اللي في مداخلتي الاخيره انا قاريتها لاستشاريه في العلاقات الزوجيه معروفه على مستوى الخليج العربي ..تنصح بها الزوجات اللي ازواجهم يخونوهم و مو عارفين كيف يواجهونهم .. طمنينا اختي عن اخر اخبارك .. |
اسمحي لي انو اخبرك انو امر عادي
مو المهم زوجك يبعت رسائل ولا ما يبعت المهم انك تعرفي تحفظي عليه يعني المهم انو اما يروح على البين كل يوم يشوفك بالصورة اللي يحبها ودوما حاولي تمارسي معه حى مايفكر ببره ابدا |
الصبر والحكمه وان شالله تحل المشكله ولا تنسين انك حامل وكثرة التفكير والزعل يأثرعلى الجنين الله يقومك بسلامه
|
الله يعينك عزيزتي فعلا مشكله
والله من كثر ما اقرا المشاكل قمت اشك |
تعرفي , ممكن يكتب الرسائل دي و ييجي لحظة التنفيذ ربنا يحفظه و يندم و لا حتى ينفذ عشر ما كتبه
|
اختي كان الله في عونك
بس من رايي اذا رجع لاتخلينه ينام معك لين يسوي تحاليل اهم شي يكون سليم من الامراض |
اميرات
اشكرك وصدقيني فكرتك قاعده اشتغل فيهاااا..وما ننحرم منج ..وبالتوفيق ultimatedman صدقني يا اخوي مو مقصره بشهادته اهواا...ومشكور على حرصك على نصيحتي وربي يوفقك بساتين الحياه شاكره مرورك والله يوفقج يا رب |
ناآاني
شكرا على مرورك ...والله يبعد عنك هالمشاكل يا رب -نوران- تسلمي نوران والله يحفظ الجميع من كل شر شادن44 شكرا على اهتمامك...والله يكافينا و اياكم شر الامراض |
احبتي اليكم اخر اخباري
اليوم كلمت زوجي طبعاا ..انا ما كلمته من اربع ايام ..واحنا عاده لمن يسافر واحد منا نكلم بعض ..اربع الي ست مرات باليوم .. امس قال لازم اعرف السبب..قلتله لمن ترد قالي لا اليوم قلت له وانا منهاره ..ان هذا اللي صاير وحلف لي انه مو له هالسوالف ..وان واحد من اصدقائه اللي مسافرين معاه هو اللي طلب منه هالشئ.. وقالي انا قبل لا افكر فيج افكر بالله سبحانه وتعالي..اذا ما دريتي الله يدري ..وانا مو مستعد تروح صلاتي وحياتي عشان الحرام وانا عندي الحلال... واليووم غيـــــر جـــحزه ويــــرجع غدا ان شاء الله ... |
اقتباس:
اختي حظي واعرفه .. ان شاء الله يرجع زوجك بالسلامه .. لكن اختي زوجك زرع الشك في نفسك .. والان هو راح يحاول انك ما تشكين فيه .. واتمنى من كل قلبي ان يكون زوجك صادق بكل كلمه قالها لك .... لكن هذا ما يمنع اختي انك تفتشي جيدا في حقيبته بدون ما يشعر بذلك و كذلك فتشي سيارته جيدا .. واتمنى انك ما تري شي يضايقك .. واذا اراد ان يتكلم معك في الموضوع لا تنحرجي او تخافي بل العكس اختي .. تكلمي مع زوجك بكل هدوء و جد و قولي له كل ما يدور في نفسك حتى ترتاحي و تطمئني بانه لم يخنك .. طمنينا عن اخر اخبارك اختي .. وربي يسعدك .. |
هلا اختي الله يصبرررك ويفرج لك والله ضاق صدري عليك بس لا تفكرين اكثرررررري استغفار ودعي له
الله يخليه لك ولعيالك ويقومك بسلامه المشكله اننا ما نستغني عنهم. " الله يصبرك ويعينك ويقويك " |
امين ..اجمعين يا رب
تسلمين اختي فجووره وما ننحرم من طلتج |
يارب يفرج لك ..
بس لاتتسارعين اتخذي القرار بـ أسلوب .. بالتوفيق .. |
| الساعة الآن 09:15 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©