|
هل زوجي يعتبر بخيل أم ماذا ؟؟؟
السلام عليكم ورحمة الله وبركاته .. صراحة ودي اعرف اذا زوجي يعتبر بخيل ولا ماسك ولا ماعنده فلوس ابي اعرف عشان لاأظلمه واصبر عليه ... فايليت ترشدوني .... بقولكم عن حياتنا : هو راتبه يعتبر جيد يعني حالتنا المادية وسط شقتنا إجار عليه اقساط سيارة عليه تسديد فواتير موبايلين حقي وحقه كل شهرين عليه تسديد فواتير الكهرباء كل 6 شهور تسديد الهاتف الثابت كل 6 شهور ايضا يعطني مصروف شهري 500 ريال >>>> مع اني اشوفها ماتكفي يعطني فلوس حق ملابس لي وللأطفال(طفلين) 500 ريال كل 4 شهور غير عن كسوة العيد يعطني 1500 ريال بتقولون وين المشكله طيب بقولكم ان الحياة غلت وهو مايزيدني فلوس واذا صار ظرف طارئ واحتجت فلوس يقول ماعندي فلوس ماأقدر اعطيك مثلا حفله زواج هدية لأحد او شي اضطراري او حتى لنفسي مااقدر اشتري الي نفسي فيه كل اخاف مصروفي يخلص ولا يبقى معي شي وتعرفون ان الاسعار في ازدياد وهالـ 500 ريال ماتسوي شي يعني مثلا لو بشتري عطر ماركة طاااارت الفلوس وانا لاتحسبوني مبذرة لا لا والله اني قنوعه بس المجتمع الي يحيطني يحتم علي اطالع واتمنى اصير مثلهم بس اعرف انا زوجي بيقولي مااقدر مع العلم ان عنده اسهم بالسوق كثيرة وماحد ضيعنا الا هالأسهم كل يبي يوفر عشان يشتري اسهم وماشفنا من وراها اي فائدة او ربح إلا خسارة ومضيعة للفلوس وبقولكم شي ثاني اني اذا دخلت معاه السوبر ماركت نقضي اغراض للبيت مو كل شي يرضى لي أخذه يقول مولازمنا ومانحتاجه مع اني اشوف انه مهم واذا بناخذ شي يقولي اخذي بكميات قليله لاتكثرين مع ان نحتاجه طول الشهر فأقوله ليش ماتفك نفسك وتشتريه مرة وحدة بدل الروحة والجية يقول ماعليك اذا خلص هالشي انا ارجع اشتريه مره ثانية وبعض المرات يشتريه ومرات لا ويحدد لي مبلغ معين يقول لاتزيدين الفاتورة عليه واذ زاد عن المبلغ يقولي وقفي لاتاخذين شي وانا اكون محتاجته يقول خلاص مرة ثانية اشتريه لك واذا وصلنا لآخر الشهر واحتجنا شي يقولي اصبري لمن ينزل الراتب اول الشهر وساعات يكون باقي على نزول الراتب 10 ايام فأتضايق يا الله شيصبرني.... وبالنسبة للطلعات والمطاعم مرتين بالشهر وساعات مرة وحده بس والله اني احبه واموت عليه بس الحياة ماتكمل نفسي تتحسن حالتنا ونعيش مرتاحين اعذورني اني ثرثرت واجد بس شسوي حبيت افضفض شوي لاني هالشهر بالذات متضايقة من قلة المادة دعواتكم لي ولزوجي بالفرج يالله همتكم كلن يدلو بدلوه تحياتي لكم الإشراف / تم التعديل على العنوان . |
الله يوسع رزقكم
أنصحك بالصدقة فإنها تزيد البركة |
الله يفرج همك حبيبتي بس ممكن تستغلي فلوس الملابس وتشتري بها اشياء ثانيه
|
الله يفرجها عليكم و يرزقكم من حيث لا تحتسبون..
|
الله يفرج همك وهم كل امة محمدصلى الله عليه وسلم
ونصيحتي عليكم بالصدقة وبإذن الله تفرج عليكم بالتوفيق للجميع |
حياكي الله أختي .. والله الأسهم ضيعتنا .. كلنا .. بس على الله الفرج .. والحمد لله إني صرت أكره شيئ عندي الآن الأسهم .. المهم .. أختي لو قلتي له في بعض الأشهر مثلاً يعطيكي مصروف شهرين مع بعض مثل احتجتي هذا الشهر فلوس أكثر من 500 ريال قلتي له عطني 1000 ريال يكون مصروف الشهر الجاي .. إلين ماتضبط الأمور بإذن الله .. والله الدنيا اليوم الـ 5000 ريال ولاشيئ ولا تكفي مصروف عائلة من طفلين .. بس لو حاولنا قدر الإمكان الإقتصاد وتعويد النفس شراء الحاجات الضرورية .. أمر آخر شراء الأغراض المستهلكة بالجملة مثل زيت الطعام وغيره ... |
حبيبتي جدااا عادي وهذا أبدا مو بخل هذا يعتبر مخطط للمستقبل
عزيزتي بسألك عدة أسئله وجاوبيني من فضلك تحسين زوجك يحب يخطط للمستقبل ؟؟ دقيق بكل شئ؟ يحب الترتيب والتنظيم ؟؟ عنيد؟؟ متحفظ ؟؟ جاد؟ حافظ سجلات؟ تفصيلي ؟ إذا أغلبه نعم شخصية زوجك شرقية هذا من أنماط الشخصيات حبيبتي زوجي مثل زوجك والله من قبل أن أعرف هذه الانماط توقعت إنه بخيللللل لكن عرفت إن الشرقين يحبون التخطيط ومحافظين يعني بعيد تماما عن البخل في قسم التنمية وتطوير الذات راح تلاقي موضوعي عن أنماط الشخصيات تمعني فيه وأنصح كل واحده وكل واحد :) بهذه الانماط والله راح تخليك تعذرين الي تتعاملين معهم يعني ممكن تعتبرين صفة معينه بشخص إنها صفة قبيحة وهي سبحان الله عادية ومن ضمن شخصيته أنصحك فييييييييييييييه ألقاك هناك وراح أساعدك إن شاء الله حتى تعرفين زوجك ونفسك صح |
اقتباس:
ويرزقنا من اوسع ابوابه واكيد الصدقه ماراح ننساها مشكور/ة على المرور |
اقتباس:
ان شاء الله وانا احاول بقدر الامكان مااصرف الفلوس الا للشي الضروري بس تعرفين مرات الواحد يكون في نفسه اشياء ولايقدر يمسك نفسه الله المعييين تشكرين على المرور |
اقتباس:
ان شاء الله الله يسمع منك والحمد الله مشكورة على المرور |
اقتباس:
الله يفرج على الجميع واكيد الصدقة ماراح انساها مشكور على المرور |
بعضهم ياخذ راتب زوجته ... بوسي يدك بطن وظهر ... وأحمدي ربك انه في شخص ينفق عليك ... ولو كان في نظرك قليل ... ولو كان بخل ... كان ماشفني ولا فلس حمر ... دمت بحفظ الرحمن ... |
الله يفرج همك ياقلبي
مشكلتي مثل مشكلتك والشكوى لله وانتي ادرى بزوجك براتبه ومصاريف البيت حاولي تمسكي معاه ميزانيه البيت لحتي تقتنعي وتحسي بالمسؤوليه شوي يعني قسموا المبلغ من كل النواحي اجلسي معاه جلسه صراحه وتفاهم لاتحسسيه ان همي من هالجلسه لاجل الفلوس قوليله انا عارفه الحمل الثقيل عليك واحنا زوجين ولازم نتشارك بكل شي واساعدك بالميزانيه حتى كل واحد يعمل حسابه بصرفيه الشهر وصدقيني انتي بترتاحي وتقنعي نفسك وين الفلوس بتروح وهو بيحس بالراحه ان الحمل الثقيل صار بيتشاركها معاك وربي يسعدكم يارب |
اقتباس:
وان شاء الله زوجي يكرهه نفسك عن جد كرررررهت شي اسمه اسهم وهذا انا احاول بقدر الامكان الاقتصاد في كل شي بالنسبه اني اخذ مصروف شهرين في شهر احسها صعبه لان يادوب راتب شهر واحد يكفينا فمااعتقد انه يوافق يعطيني مصروف شهرين وصدقت 5000 ريال ماتسوي شي لمصروف عايله بس شنسوي الله كريم مشكور على المرور |
اقتباس:
نعم سبحان الله قلتي كل مواصفاته وانا قارية عن انماط الشخصيات من قبل وطلعت شخصية زوجي جنوبي شرقي وقريت اغلب صفات الجنوبي بس ماقريت صفات الشرقي لانه نمطه الغالب جنوبي والحمد الله انك عرفتيني ببعض من صفات الشرقي ريحتيني الله يريحك دنياوآخرة وان شاء الله اعذره من يوم ورايح اذا هذي من ضمن شخصيته وراح اذهب لموضوعك واستفيد اكثر جزاك الله خير ومشكورة على المرور |
اقتباس:
حامدة ربي وشاكرته ليل ونهار وعارفة ان في نساء مابيلاقوا مصروف او اقل من كذا وانا مااشتكيت من بخل زوجي انا قلت ارشدوني ودلوني وادعوا لي تعرف الحياة صعبة والمصاريف تزيد ماتقل فكنت محتاجه نصيحة تصبرني وتقويني علعموم مشكور على المرور |
اقتباس:
الله يجزاك خير على الدعوة والله يتقبل منا ومنك حبيبتي المفروض تنتبهين لغالب ودون الغالب أيضا وأزيدك من الشعر بيت الشرقي يرى إن الهدايا ليس لها أي اهميه لكن الجنوبي يحب إنه يهدي فأعذريه بارك الله فيك والحمدلله إنه يعطيك مصروف شهري حتى لو إنه مية ولا يسدد جوالك ماشاء الله تبارك الله هذا بنظري ونظره كرم فانتي أمتدحيه وقولي أنك ماتقصر يازوجي الغالي ممكن انا ماعرف أتصرف بحكمه بالمال لكن من اليوم ورايح راح أخطط زين صدقيني هذا الكلام بيسعده منك تصدقين ظروفنا هذي الايام صعبة شوي وربك يسهلها فانا أحب أصرف كثير وهو عارف هذا الشئ عطاي مصروفي لما رحت لاهلي وفأجاته إني ماصرفت الا شئ بسيط بس ماتتصورين كيف أنبسط لاني عرفت أخطط واوفر وهذا ابدا مو بخل البخل االي مسكر بيته وحاجر عياله وحارمهم من كل شئ الله يوفقك |
حبيبتي واختي في الله
دعيني اكون معك صريحه زوجي شخص مقتدر ولله الحمد...لكن ما يعطيني مصروف كل شهر ليس بخلا ماادري لكن اذا نزلت السوق يمد لي تقريبا كل الي بجيبه ولا يبخل علي بشيء (مع اني ما اطلب منه )... مع اني ما اشتري كثير ونزلاتي للسوق فقط للتمشيه لا ادري ويمكن لان ما عندي اطفال ومع ذلك كله مجتمعي زي مجتمعك.... وغلطناا في البدايه اننا ما اتفقنا ع المصروف يمكن لاهيه بدراستي عن سالفه الدراهم :30: بس صراحه بقولها لك احمدي ربك والله انتي بنعمه ... اولا مصروف ثابت كل شهر فكري فيها بمنطق وش تسوين فيها بس كلها مشتريات من السوق :11: يعني معقوله كل شهر لازم تشرين شيء جديد ... حبيبتي بعدين احمدري ربك اعرف وحده يعطيها 500 ويخليها تسدد فاتوره جوالها ... بصراحه وبالفم المليان زوجك رجل حكيم وكريم :22: وتقبلي تحياتي |
اقتباس:
اوكي بطبق الي قلتيه وبجلس معاه جلسة مصارحة وبحاول امسك ميزانية البيت عشان اقدر واعرف الفلوس كيف تنصرف واحس بمعاناته لاني حاسه فيه وان المسؤولية صعبة بس بني آدم طماع الله يفرجها من عنده وتتحسن احوالنا مشكورة حبيبتي على النصيحة والمرور |
لو تشتغلين عشان ترتاحين من الطلب وتستقلّين عنه وحتى تساعديه على أمور الحياة
حتى لو شغلة في البيت .. |
اقتباس:
مشكورة حبيبتي على العودة والدعوة >>>> طباق :d وراح اقرا صفات النمط دون الغالب واشوف واستفيد وزين ان الجنوبي يحب يهدي صفه حلوة هو يهديني مايقصر بس قليل في المناسبات وانا والله احاول اعذره على طول بس تمر علي ايام احتاج ولايقدر يعطيني فأتضايق كثير واحزن بس احاول امسك نفسي ولا ابين له وانا والله الحمد على طول امدحه واشكره وابين له امتناني اذا عطاني وينبسط كثييييييير والحمد الله ان مادخل تسديد فاتورة الجوال ضمن المصروف والا كان جنيت ^_^ ماشاء الله تبارك الله حسستوني ان 500 ريال كثيرة وانا كنت اشوفها قليلة فلكم جزيل الشكر وخالص الدعوات والله يوفقك انتِ وزوجك ويفرج عليكم ويرزقكم من اوسع ابوابه جزاك الله خير |
الله يوسع رزقكم هو مايعتبر بخيل يمكن ماسثك بس عشان اشياء مهمة احمدي ربك انو يفكر في مستقبلكم
|
اقتباس:
والله يدومها من نعمة بس تعرفين بعض الاحيان تمر على الانسان ظروف صعبة ولايقدر يحصل المبلغ الي يبيه بالنسبة لمصروفي احاول مااصرفه الا للضروري وموشرط كله للسوق احيانا اظل فترة طولة مااشتري شي جديد واحاول اجمع منه بس في غمضة عين يجيني ظرف طارئ واصرف كل حوشته والحمد الله ان زوجي طلع حكيم وكريم الله لايزولها من نعمة مشكورة حبيبتي على المرور |
اقتباس:
والله ودي اشتغل واتمنى ذلك وانا والله الحمد عندي شهادة جامعية بس تعرفين مافي وظايف نسائية كثير واذا في يكون ظغط وزحمة عليها قدمت كثير لكن مالله ارآد انهم يقبلوني يمكن في حكمة من ذلك بالنسبة للشغل في البيت احسها صعبه كثير لان زوجي يكون متواجد في البيت كثير دوامه ينتهي مبكر فماينفع ان شاء الله ربي يسهلها من عنده ويفتح علينا من اوسع ابوابه مشكورة على المرور |
اقتباس:
والحمد الله انه يفكر في المستقبل وان شاء الله الله يوفقه ويرزقه من حيث لايحتسب مشكور على المرور |
اقتباس:
الله يرزقك وظيفة تعينك على تسيير شؤون حياتك بنفسك وبدون منّة أحد. أنا قصدت بوظيفة البيت زي هذول اللي يبيعون منتجات عن طريق النت، يطلبون حاجات من برا ويبيعوها في مواقع النت بضعف سعرها، شغلة مربحة بس يبغالها مخ نظيف و حاب الشغلة. تعرفي المرأة إذا كانت بدون شغل يقل مقدارها و نظرة الزوج لها في الغالب، أما اللي تشتغل يناظرونها فوووق و يركضوا وراها، الله يوفقك في شغلة خصوصا اني اتوقع زوجك من النوع اللي راح يفرح انك تدبري حالك وما تكوني عالة عليه. وآسفة لو أزعجتك و تدخلت. |
اقتباس:
والله يسمع منك والله يرزقني بوظيفه ادبر حالي فيها وتتسهل اموري بالنسبة للوظيفه الي كتبتِ عنها ماافتكر اني اعرف لها انا سمعت عنها بس مااعرف من وين يشترون وعلى اي المواقع يبيعون ويعرضون بضايعهم وعلى قولتك هذي الشغلة يبيلها مخ نظيف وحسن تدبير وفهم في التجارة ولسان حلو للييع وانا اتوقع ماتتوفر فيني هالشروط ^_^ ومشكورة على النصيحة |
ماشاء الله تبارك الله تقولين بخيل حرام يااختي لاتضلمي زوجك وخليك زوجه قنوعه وعيشي على مايبغى زوجك يعني مد لحافك على قد رجليك ياحبيبتي
يعطيك خمسميه ريال ولاعندك منها اي شئ غير مصروفك يعني لاتسددي جوال ولا تصرفي على البيت ولا شئ ليش مثلا كل شهر تروحي تشتري ملابس وتهدي الناس وحتى لو اردتي ذلك مايكفيك لو اشتريت قطعتين الشهر هذا والشهر الجاي عطر والي بعده حاجه تانيه وهكذا وودبري امورك وتعلمي كيف تصرفين بالمعقول زوجك ابدا ابدا ابدا ماهو بخيل وماعرفتي البخل اش هو ولا ماكان كتبتي هل هو بخيل او ماسك انا في نظري لاهذا ولا هذا زوجك ماشاء الله معتدل وحكيم وترى الحريم لو اخذوا وجهه مابقوا شئ في السوق ولا في السوبر ماركت وصدقيني لو صبرتي وماعيرتيه وحسستيه بانك محتاجه دايما بل تحسسيه بانك مو مقصر عليا بشئ والله يشوفها جميله لك ويعوضك هي بعدين احمدي الله والله عندي صديقه تطلع روحها عشان يجيب لها زوجها غرض واحد مهم كمعجون الاسنان مثلا في احد يقدر يستغني عنه هو يماطلها فيه ارأيت كيف البخل اعوذ بالله مطاعم هذي انسي انها تروح لها مسكينه لكن ساكته وصابره جوال مافي ليش الصرفيات الزايده شفتي البخيل والماسك مين واش صفاته ياحبيبتي عيني زوجك على غلاء المعيشه وصبريه على الدنيا فخير معين في الدنيا الزوجه الصالحه والله يهنيكم مع بعض يارب |
شاركيه ظروفه الماديه الصعبه ولا تضغطي عليه اكثر ..نصيحه لوجه الله
الحياة الان اصبحت اصعب من الماضي بكثير.. |
أختي الكريمة : :: : أعتذر عن اللهجة السابقة ... لم أقصد التوبيخ ... بل قصدت الإحساس به ... أحسست من ردك ان ردي لم يرق لك ... لذا أحببت أن أعتذر ... وأعلمي أن زوجك نادر ... ولا تحسبي أني أبالغ ... بل والله هذا واقع ... ما اكثر من يطمعون برواتب زوجاتهم ... وإن لم تكن تعمل .... لجعلها تعيش حالها حال الخادمة اللي معها في البيت ... رزقكم الله من خيري الدنيا والآخرة ... وألبسكم لباس التقوى والصحة والعافية .... مني العذر ومنكم السموحة ... دمت بحفظ الرحمن ... |
أنت ذكرت أن الدخل متوسط..
والحياة التي ذكرتيها....مناسبة للدخل.... يعني المعادلة سليمة... هنيئا لك بزوج مخطط.... |
اقتباس:
بس هالاحساس جاني لمن احتاج شي ويقولي مااقدر اعطيك فأحزن مع اني عارفه انه صج مايقدر وانه مايقصر معاي واحس انه يحاول يخطط للمستقبل بس ظروف الحياة صعبة وتجيني اوقات ازهق ولااتحمل وان شاء الله من اليوم ورايح اصير قنوعه اكثررررر واصبر واعين زوجي على الحياة الله المعييين مشكورة على المرور |
اقتباس:
والله يعينا ويصبرنا مشكورة على المرور |
اقتباس:
فرديت عليك كذا بس مازعلت ابدا عادي وعارفه انك تبغيني احس فيه وانا والله حاسه فيه وكاسر خاطري بس شسوي تجيني ايام احزن وامل اتمنى اشياء ولااقدر اجيبها الله يعين ويرزقنا من اوسع ابوابه ومشكور على الدعاء والمرور للتوضيح جزاك الله خير |
اقتباس:
والله يعيني واساعده واعاونه على تخطي الظروف الصعبة مشكورة على المرور |
القناعة كنز لا يفنى اختي الكريمة و اصبري فالصبر مفتاح الفرج , و الله هو الرزاق و يرزقكم من حيث لا تحتسبون
|
الله يفرجها عليكم وعلينا وعلى المسلمين حاولي ان توفري من مصروفك بدون ما يدري واجعليه لوقت الزنقه والهدايا
واحمدي ربك انتي احسن من غيرك واكثري من شكرلله وبالشكر يعم البركة |
احمدي ربك غيرك ما حصل له كل هذا
|
| الساعة الآن 12:20 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©