محتاره بين المضي في هذا الزواج او طلاق قبل الدخول؟
 

السلام عليكم و رحمة الله و بركاته
انا تملكت من شهر بعد ما سالنا كثير عن اخلاقه و الجميع اثنى على اخلاقه بلا استثناء
المهم بعد الملكه بأسبوع جت عمة الولد عندنا و كانت تبارك و لكن كان التردد واضح على وجهها المهم امي مقربه جدا لها فسالتها عن الي مضيق صدرها و مخليها حتى كلمة مبروك تتردد ما تقولها و قالت لنا انه الولد منطوي و معقد و اكدت على كلمة معقد بالرغم من ان العمه ليست لها اي مصلحه في فشل هذا الزواج فهي تحب امي و ابي جدا و لديها الكثير من المواقف المشرفه معهم و ايضا تحب ولد اخيها و لكن بعد ما ضغطت عليها امي و حلفتها قالت ما قالت.
و انا اكلمه في الاسبوع كانت لديه افكار مشتته و كان يكثر الكلام عن الكتب الثقافيه و عن اي شيء ممكن يكون سبيل للحصول على شخصية متزنة و ناجحة . و لاحظت كثير ما يبحث عن المثالية الغير و اقعيه و يهتم جدا باموار صلاح المجتمع و استغلال الطاقات البشرية حتى نصبح مثل الغرب في النجاح و التطور. و ذكر لي بانه مره جلس يناقش مع زملائه في العمل و انتهى النقا ش بانه قالوا له انت تسعى للمثاليه و هذا مو صحيح و فيك حساسية قد تكون مرضية وهو دايم يكرر انه مره حساس و فعلا يهتم باشياء بسيطه و يركز و يدقق عليها بشكل غريب . و عمته ذكرت انه دايم يرى نفسه صح و غيره خطاء وانه يرمي الكلام بشكل جارح على الناس و لايهتم لمشاعرهم . حاولنا نسال عته من مصادر اخرى غير عمته بس الكل يمدحه و دايم يذكرون انه جدي في كل الاوقات و مايحب المزح من صفاته التي يمدح بها انه ملتزم بالدين وبصلاته و انه هادئ جدا.
انا لست جدا ملتزمه مثله ماشاء الله و في اشياء مثل لبس البنطالين و القصير اشوف مسلسلات و افلام
اهلي ما خبوا اي شيء عنهم و قالوا لهم عني بالكامل و عن كل هذا و مع كذا وافق و قال لها حريتها و تسوي الي تبي و لا تغير شيء وهو قالي انه هو ما كان يبي وحده ملتزمه مره يعني وحده عاديه لانه اهم شيء الايمان.
انا خايفه من كلام عمته وخصوصا انه امي و اجهت امه الله يهديها و قالت لها ان الولد يقولون فيه كذا و كذا
قامت قالتها لا و الله حاسدين و ما يحبون لنا الخير و لاه الولد ما فيه اي شيء و كلمتني و قالت لي يا بنتي اطمئني و الله الولد مافيه شيء و راح تنسعدين معه مره وهو يحبك و هو فعلا انا حاسه بهذا الشيء انه يحبني مررررره بس ما ادري اقول يمكن لانها فترة الملكه و طبيعي يحبني بها الشكل و تعب هو لما سمع هذا الكلام و لما امي كلمتهم و قالت لهم يمكن نطلب يطلق البنت و اتصل علي و طلب مهله 3 اسبايع
هو يكلمني الحين بس مره تغير عن اول يعني الأفكار المشتته راح و الكلام والفلاسفه الي ما كان و اضح راح و احس الحين شخص طبيعي غير عن اول على فكره اول اسبوع كنت كلما اسكر السماعه اصيح لاني من كثر الأفكار الفلسفيه و الحكي بالكتب و الثقافه و الأفكار المشتته الي عندنا ما كنت افهم شيء و لا حتى اشعر باي احساس اتجاهه بالرغم من انه مستوى تعليمي اعلى منه انا حاصلة على شهادة الماجستير مرتين هو فقط عنده الثانوي. هو الحين بجده و احنا بالرياض على اساس انه ماراح نزوج الا لما يجيه نقل للرياض علشان نسكن مع اهله يعني على الزواج باقي حول 6 شهور اذا فعلا تم النقل.

في شيء اخير و دي اذكره انه اذا تطلقت من هذا يعتبر طلاقي الثاني قبل الدخول لاني المره الاولى تملكت و تطلقت في الييوم الثاني بعد الملكه و ذلك لاسباب النسب بالرغم من انه كان يحبني و انا احبه و مشاعري كانت غير اتجاهه مع انه مجرد يوم و احد.
انا استخرت كثير و كلما ابي اقدم على الطلاق اتردد و اقول لا و احتار اكثر
ساعدوني بالرأي و المشورة.

اختي لاتمشي وراء كلام الناس
وصدقيني في اهل كانهم اعداء مو اهل يتكلمون بكلام فقط للتخريب فانتبهي
وانا عندي عمه لا تتمني لي الخير اتصدقين
قال سبحانه وتعالى ((إِن جَاءكُمْ فَاسِقٌ بِنَبَأٍ فَتَبَيَّنُوا)

اي شي يضايقك سالي الولد مباشره
الصراحه مطلوبه وراحه

واختي انتي تعايشتي معه هل رايته منه ما يضايقك
وبما انه ملتزم اتوقع ان اللي شاغلتهم الدنيا يسحبون التمسك بدينه تعصب وعناد وتمسك برايي
اذا انتي مرتاحه منه توكلي على الله

انصحك بالتريث والأتسخاره قبل اي قرار
ولاتلتفي لكلام الناس اعتمدي على الله ثم نفسك ثم المصارحه مع خطيبك وزوجك مستقبلا

الله ييسر أمرج وبكتب لج الخير

اكثري من الاستخارة

انا من راي انك ما تصديقي عمتك ... ما تدري يمكن ما تبغالك الخير
واستخيري كثيييييييير ... وخلي اخوانك او ابوكي يجلسوا معاه يسولفون معاه اكثر من جلسه .. كذا يعرفون اذا معقد او فيه شي ...
والله يوفقك يارب ويكتبلك الي فيه الخير

حبيبتي من راي اذا انتي مرتاحة معاه و قابلته هذا المهم لأنك انت الي راح تعيشي معاه
وصراحة الولد متربي ويصلي وملتزم و خلوق ما شاء الله لا تضييعيه لمجرد كلام في الهواء
ولا تعطي اذنيك لأحد هذه نصيحة خذيها مني لازم تكوني واثقة من نفسك و لا تتاثري بكلام الناس حتى ولو اقربائك.

استخيري الله و ان شاء الله يكتب لك الخير حيثما كان .

بالتوفيق اخية

أختي وأنا أقرا كلامك مالقيت في الولد أي عيب !!

فعلا الشاب ما فيه اي عيب
و اذا كان يحب الفلسفه وين المشكلة ؟!
انا من رايي ما تنفصلين اذا كانت هذه الاسباب !
الله يوفقك و يسهل امرك...

الكمال لله .. وماأشوف فيه عيوب تستدعي الانفصال , والله تعالى أعلم ..
أدعي بجوف الليل , بقص عليك قصة حصلت لي شخصيا ..
تقدم لي رجل منفصل ومامعاه عيال وموظف وتمام التمام .. المهم وافقت ورأيت بالمنام إن وحدة تبارك لي بالزواج وأنا أقول لها ليتني قعدت خمس سنين أو أربع ولاتزوجت هالزواجة (كان لي وقتها ثلاث سنوات منفصلة ) المهم صحيت من النوم مهمومة وضايق صدري , إن رفضت بتحسف وألوم نفسي لأن مافيه عيب ظاهر , وإن وافقت وتم الأمر أخاف الحلم يتحقق وتصير حياتي عذاب وأتمنى فعلا إني صابرة , لجأت لربي سبحانه وبجوف الليل تضرعت له وسألته الأصلح لي , سبحان الله جاء الرفض من الرجل , مع إنه كان متحمس فيما يــبدو , بس فجأة تراجع وقال لأهلي خلاص ماأقدر أكمل ..
والحمد لله لالوم علي بقبول أو رفض .

اتفق معها لايوجد ما يبرر الطلاق
لا تقدمي على الطلاق ثم تندمي
اتسخيري الله وناقشي الولد

نصيح ستذكرينها بعدين

لا تكلمينه في الملكه ابدا ...عشان يتزن تفكيرك ولا تدخلين تحت تأثيره بالكلام
وتظيع مشاعرك بين حب واعجاب وتعلق ..وبعد مده تكتشفين انك لا تحبينه

كذالك تدخلين عليه بشخصيتك انتي...وليس بشخصيه مصطنعه ومخدره

عيشي معه على شخصيته بعد الزواج واعرفي ان تتعاملي معها

ولا تعيشي على وهم شخصيه مصطنعه قبل الزواج ومن ثم تنصدمين وتتعب نفسيتك... وعقلك يحتاج مده حتى يستوعب الصدمه...ويتقبل الشخصيه الجديده لزوجك..وفي النهايه فشل

لا يهمك الأفلام ....كلميه قبل الزواج عشان تفهمينه لأنك لن ...ولن تفهميه

اختي العزيزة بما أنه يتبقى على الزواج ستة أشهر في رأيي أنها مدة كافة لتتعرفي عليه أكثر
حتى وإن كان يسعى للمثالية فلابد أنه سيقتنع في يوم ما أن للحياة متعة وصدقيني المثالية شيء جميل ولكن طبعا بحدود وكثير من الرجال تغيرت أفكارهم وطباعهم بعد الزواج وربما غيروا دينهم ايضا ..............
اقول ذلك لأنني واثقة أنه مع وجود الحب كل من الزوجين سيسعى لإرضاء الآخر حتى وإن كان الثمن أن يتنازل عن بعض مبادئه توكلي على الله واكثري من الدعاء والستخارة ولا تطلبي الطلاق

والف مبروك مقدما لأنني متفائلة بتمام الزواج وأنه سيكون ناجح بإذن الله تعالى

اعتذر اختي عن الأخطا الموجودة في النص لأنني بالغلط أعتمدت المشاركة قبل مراجعة النص أتمنى لك السعادة والتوفيق

كما قيل سابقا الإستخاره هيا الحل ولاتسمعي كلام الناس
الله يوفقك

اذا قال جملة " وهو قالي انه هو ما كان يبي وحده ملتزمه مره يعني وحده عاديه لانه اهم شيء الايمان.
"

حطي الف خط تحت قرار الزواج

* استخيري , وأنصحك واجهيه بالكلام , وقولي كل شيء بخاطرك ... .. أقولك شيء ..

بعض تصرفات زوجك موجودة فيني ... لكن ماأحد قال إني معقد إلا شخص يجهل الي أفكر فيه أو أتكلم فيه .. مع أني احمل بكالريوس بالعلوم الطبية وماجستير في الميكروبولوجيا, لكن ثقافتي جيدة جدا بالتاريخ والسياسة ,والأديان المقارنة,, وكنت كثير أتكلم وأناقش عن هالأمور ..... وكثير اتكلم عن صلاح المجتمع والسلوك البشري لدى الفرد ....

* كثير أشخاص يقولون أنت تتفلسف زيادة ,, وكثير نا قالوا أنت ثقافتك جيدة جدا وعندك إطلاع واسع ..

..والحمدلله متزوج ..وزوجتي _ كما أعتقد وتقول _ مرتاحة معي وأنا مرتاح معها , ....وإذا بغيت أتفلسف عليها أو ندخل في موضوع ... تقول ريح نفسك لأني ماراح أفهم شيء منك .. وكانت تصارحني ولاتجاملني ..وهالشيء كان له أثر إيجابي بداخلي..


** أعتقد أن خطيبك يحتاج لشيء من المصارحة الواضحة, فقد تسمعي منه مايشرح صدرك ويخفف عنك بإذن الله ,,ولاتستعجلي في الحكم... انصحك بالتريث ,, كما أظن انه يملك طمووح كبير بداخلة لم تساعده الظروف لتحقيقة ,, لذللك يحاول أن يقلل الفجوة بين الطموح والواقع بالإطلاع والقراءة والمناقشات الدائمة ( مايسميها البعض بالفلسفة الزائدة ) , كي يشعر انه إنسان مثقف حتى لو لم يحقق طموحة ..

هذا ماأعتقده والله أعلم ..

ونصحيتي لك مجدااا صارحي زوجك بكل ماهو داخلك

اشكر جميع من رد علي و ساعدني ولو بكلمة
انا استخرت كثيرا و في كل مره لا استطيع ان افكر في الأنفصال بل بالعكس اشعر برغبة شديدة بالأستمرار
الا ان شيء في داخلي دائما يذكرني بكلام عمته و ما اقدر انساه دايم اقول لو كان صحيح
بعدين استغفر و اقول اتوكل على الله و ادعي اذا فيه شر يجعل سبب يخلينا ننفصل قبل الزواج و اذا فيه خير يتممه
انا صارحته بكل شيء و قلت له اذا كان الكلام صحيح اكيد ماراح يكون فيه توافق و وضحت له
وقال لا ابدا ماهو صحيح ومن خلال كلامه ما لاحظت أي نوع من العقد غير فلسفة اول اسبوع و لما عرف اني ما احبها ما صار يتكلم عنها


جلس ابوي معاه كثير و اخواني و زوج اختي و حتى جمعه ابوي مع مشايخ علم
و كلهم اثنوا عليه و على ادبه و انه جدا جدا خلوق
حتى ابوي اختبره في مواقف كثيره و مره سوى نفسه عصب عليه علشان يشوف ردة فعله و مع كذا احترم ابوي و لا رد عليه الا بالكلام الطيب و لا قال لي انه ابوي سوى كذا فيه

يالله سبحان الله انا من يومها و انا كل ليله اصلي صلاة استخاره و الله يكتب الي فيه الخير

هو هذا الي يقوله خصوصا انه الحين يسعى للدراسه في الخارج
و اتمنى ذلك و الله كل ما اقرا رد في موضوعي احمد الله اني كتبته لاني كل كلمة قيلت جعلتني استوعب و انتبه الى اموار كثيرة كانت غائبة عني بسبب الخوف

انشاء الله بأذن حتى بكره يمكن ابدا اشتري اشياء بسطية للجهاز استغل التخفيضات :)

ما اخفيك انا كنت اكثر شيء خايفه من عندهانه ما يكون كلام عمته دليل على مرض نفسي
بس هو اكد و حلف انه ما فيه شيء

اشكرك كثيرا يا اخي المهاجر
كان لكلامك و قع كبير و خصوصا لانه من واقع تجربة
فعلا المصارحه كانت افضل حل و اشعر الان بتحسن
الا انه ما زال بعض الخوف و القلق كلما تذكرت كلام عمته

هذي مشكلة عدم التوافق في المستوى الدراسي .. انا حاسه انه يعاني من نقص لان عندك ماجستير وهو بس ثانوي ..

انتي اعطيه فرصه لا تتسرعي .. اجلي الزواج حاليا ولا تحكمي عليه بس بمكالمات التلفون .. احكمي على شخصيته الحقيقية من خلال قعداتكم سوى لان ما يمديه يتصنع عالطبيعة .. وانتي اكيد اذكى من انو شخص يتصنع قدامك



استخيري لا تستعجلي بالطلاق .. بس انتبهي