|
قصه مع زوجتي
السلام عليكم وررحمه الله
احبتي الكرام كنت سوف اكتم ما بقلبلي ولكن عندما قرات مواضيعكم زاد الحماس بداخلي فاحببت ان تشاركوني قصتي وسوف اختصرها لكم احبتي انا تزوجت منذ خمس سنوات من زوجه انا من اختارها وعشت معها خلال هذه الفتره وانا صابر على كسلها ومراوغتها فلم استمتع بما يستمع به الازواج ولم اشعر بالسعاده فكنت اقضي وقتي خارج بيتي من كثره الصباح والمشاكل ولا ادخل الا وقت النوم حاولت التفاهم بجميع الطرق ولكن للاسف خلا فتره زواجي ذهبت الى اهلها ( 5 ) وعلى اتفه الاسباب قبل شهر من وقت كتابه طرحي نويت الزواج لكي ارتاح واحس اني متزوج المهم انه جاني اتصال في اللي وانا نايم الاتصال من واحده والله العظيم ماعرفها ولكن بطبيعه شغلي الخاص فاتلقى اتصالات من جميع الاجناس ذكور واناث بالعربي ( يطلبون عقارات ) وزوجتي تعرف الشي هذا واهلها يعرفون انه اتكلم مع حريم واقابلهم من الرزق لا اقل ولا اكثر المهم ردت بنتي الصغيره وسمعت زوجتي صوتها وانهالت عليها بالكلام وانا نائم ما عندي خبر اتصلت على اهلها وجو البيت واخذو جوالين وراحوا صحتني بنتي الصباح وقالت لي القصه كلت زوجتي وش الحاصل قالت انت تطارد الحريم قلت لها عندك خبر اني اكلم حريم ولكن ما مينع قالت لا انت متزوج مسيار قلت لا انا بتزوج على السنه وليه المسيار .... المهم كلمتها لااجي من الدوام الا والجوالات رجعت جيت من الدوام واهلها في البيت خير ان شاء الله؟؟ قالوا انت تبي تتزوج؟؟؟ قلت ايه. قالو لا بنتنا ما تتزوج عليها وانت وانت وانت الخ المهم سالت زوجتي اذا تبيني والله لا طردهم الان وا احد يقدر ياخذك مني . طبعا ما ردت .. قلت انا خارج فكري وشوفي جيت وهي شالت عفش البيت كله وراحت حتى بناتها رفضتهم اخذت بناتي ونزلتهم عند اهلي في الدور الارضي ويومين قالوا نبي البنات ونبي الف ريال مع كل واحده عشان الشغاله قلت لا امهم تخدمهم والا خلوهم عندي اجيب لكل واحده شغاله ومربيه ومالكم صلاح فيهم والى الان وهي عند اهلها وهم رافضين يرجعونها علما اني مصر على الزواج من الثانيه وهم مصرين على الطلاق والضحيه بنتين والله رغم اني مرتاح من داخلي لكن بناتي ما هانو علي هذه قصتي ودمتم والضحيه بنتين |
يا اخي والله الضحية هما البنتان
والي فهمته ان الحرمة الي كلمتك ماكان لها اي سالفة زواج بس هو الموضوع جه كذا انا رايي انو لخاطر بناتك قلها هذي اخر فرصة لك يا اما تمشي كما يرضي الله يا اما بتزوج وهذ شرع الله |
اعطيها فرصه أخيرة وأفرض عليها شروطك ....
الله يصلح الحال ويكتب لكم مافيه الخير |
والله ياخوي اذا انت شايف الحياة ماتحتمل معاها انفصل
مو اول بنات ينفصلو اهاليهم بنتين ولا اكمال زواج وتصير عائلة كبيرة وضحايا أكثر طبعا الافضل انكم تتفاهمون وترجعون لبعض |
زي ماذكرو الاخوان عطها فرصه واملئ شروطك
وانشا الله تتعدل الامور لاتستعجل بالطلاق .. والله يكتب الي فيه خير.. |
تزوج واتركها عند اهلها هذا رأيي ..تبي ترجع ؛؛رجعها ...ماتبي ترجع ؛؛ ماسويت غلط
|
لاتستعجل الطلاق ليس حل اتركها لفترة عند اهلها
وستعود لك حاول التفاهم معها عن كل ماتحتاجه وكل مايضايقك لاتترك الشيطان يدخل بينكم فأفضل عملا يقوم به الشيطان أن يفرق بين المرء وزوجه. أصلح الله زوجتك لك وأصلحك لها وأصلح مابينكما.. أختك طاغية الملامح |
الله يعينك ويصبرك واتمنى ان اهل الزوجه يتداركون الامر ويردون زوجتك ويحافظون على بنتهم الطلاق صعب جداً هذا هدم بيت اصبر ولك الاجر ان شاء الله
|
كان الله في عونك00
إذا تدخل الاهل بين الزوجين00 بتصرفات غير مسؤوله00 كأخذ الجوالات00 والتهديد00 فالأمر يصعب 000 ويصبح معقد00 يا ترجع زوجتك من اجل بناتك00 وتلبي طلباتهم00 وتصبر00 وإلا الإنفصال00 والله يغني كلاّ من سعته00 فكر في الامر00 واستخير 00 واستشير00 وحاول الإصلاح00 وياليت تكلم زوجتك على إنفراد00 وتفهمها انه لا داعي لإدخال اهلها في مشاكلكم00 فهمت00 كان بها00 ما فهمت00 اعمل اللي فيه الصالح لك ولها ولإبتيك00 الله يصلح ما بينكم00 |
كان الله بعونك اخوي .. في حريم نكديات و للاسف اهلهم بدل ما يصلحونهم وينبهونهم يساندونهم على الغلط .. اذا خمس سنوات و ما انصلح حالها و ما قدرت انت تغير من طبعها و خلقها السئ فمن الصعب انك تصلحها انت متزوج اخوي عشان ترتاح مو عشان تربي زوجتك من اول و جديد .. وثانيا هي بكل هذه السهوله استغنت عن بناتها و انا عارفه انها استخدمت البنات عشان تضغط عليك و نفذ شروطها .. لكن انت تمسك بموقفك .. اذا هي تبي البنات تاخذهم بدون شروط ... او اترك البنات عندك تزوج اخوي لكن حاول كثر ما تقدر انك ما تطلقها من اجل بناتها .. |
نصحيه اخوي حاليا لا تطلق علشان بناتك
بس يجب ان تقف وقفه جديه حيال تصرفات زوجتك وتدخل اهلها من غير وجه حق في حياتكم حاليا خلها عند اهلها وان شاء الله تعرف غلطتها وترجع المياه لمجاريها اسال الله ان يسخركم لبعض اختك بالله جينز |
الله يعينك
حاول تعطيها فرصه |
أسمع الكلام يالغالي
وش ذا الأهل يأخذون جوالتك بأي صفة كلمهم مع بنتهم و ليس معك أنت خل البنات عند أهلك راح يراعونهم اكثر من أمهم واهلهم المريضين ولا تعطيهم أبدا أم ترميهم عليك وتروح تخليهم تزوج مباشرة وعش حياتك وخلها عند أهلها حتى يجون يطلبون ورقتها |
أخي الفاضل بناتك يستحقون منك المحاولة للمرة الاخيرة على الاقل
حاليا اتركها فترة عند اهلها وخليها تعيش بعيدة عنكم وتشوف حالتها كيف بتكون ويمكن تهدأ نفسيتها حاول تكلمها وتتفاهم معها وبحضور احد كبير من عايلتها يكون فاهم ومحترم خيرها بين الحياة معاك ومع البنات بما يرضي الله ان وافقت فتوكل على الله وحاول تبدأ معاها صفحة جديده وتعطيها فرصة لعل ربي يهديها وتتغير والا مالك الا الزواج وربي يكتب لك اللي فيه الخير |
ياخوي هذه ماهبل منها الا اهلها اسمح لي صراحه وش الي يجون البيت وياخذون الجوالات وياخذون بنتهم
طايرين بالعجه اللهم ياكافي الله يعينك على هالبلووووووووه اصبر ان الله مع الصابرين عشان بناتك كل شي يهون |
بناتك لا تخاف عليهم فكر بنفسك لا تكون رهينة للتهديدات إذا تزوجت تطلقني كله كلام فاضي لا تصدق الله عز وجل حلل للرجل الزواج من أربع والتعدد سنة نبينا محمد صلى الله عليه وسلم إذا أمورك المادية تسمح لك بالتعدد فتوكل على الله ولا تنظر للخلف وانظر للأمام وكن متفائلاً والله يوفقك آمين
|
أخي واضح من تصرفات زوجتك أنها متهورة والا كيف تنادي أهلها يأخذون جوالاتك بدون علمك
وترفض بناتها بعد ؟؟؟ لا وتطلب مقابل أخذهم عندها فلوس ليتها تعتبر من قصص الأمهات الي يتمنون يدفعون ارواحهم مقابل عيالهم... أنا ما ابيك تظلم المرأة بالطلاق ولكن عطها فرصة أخيرة للرضوخ لاوامرك والا فالطلاق هو الحل الوحيد يسر الله أمرك |
اقتباس:
عذرا اخي الفاضل هل التعدد سنة يعني الي يتزوج على زوجته ياخذ اجر مثلا؟؟؟ |
أسال الله أن يكتب لك الخير
أول شيء قبل أي خطووووووووة استخر ربي 2- حاولو تبعدون عن بعض فترة بسيطة لعل النفووس تهدأ 3- الله يهديها موكل صغيرة وكبيرة الاهل يتدخلووون 4- اذاهي تبيك وشاريتك رجعها بس بشروطك اهلها مايتدخلون نهائيا والمشاكل ماتطلع وحاول تسافرون تغيرون جووووووووو وربي يصلح اموركم ويهدي سركم ويكتب الخير لكم ياعمري هالبنات الله يهدي امها والناس ماراح ينفعونها حتى أهلها وصدقني بتندم وراح تحن لبيتها ولعيالها إلاإذاكانت ماتحس ابغض الحلال عند الله الطلاق حاول تنس هالحل مؤقتا حاول تطلع انت واياها وتفاهمون وتفتحون صفحة جديدة وربي يسعدكم واصبرررررررررر والله يكون بعونك وترجعون لبعض وتصلح اموركم بالود والتفااااااااااهم والحياة الحلووة والاحترام وعدم تدخل الاهل |
اخواني / اخواتي
الله يسعدكم دنيا واخره والله بناتي وابيهم ولكن اذا لزم الامر فالواقع يقول انهم ليسو اول بنات او اخر بنات وانا على استعداد اخذهم عندي وما تزوج طول عمري واجيب لكل واحده شغاله ومربيه ولكن مستحيل والله اهين نفسي او انزل من قيمتي عشان ترضى هي واهلها انا ما غلطت ابد وكل اللي تبيه اسويه والله اعرف حريم ما لقو اللي لقيته عندي وما امدح نفسي ولكن هذا الحاصل انا حاولت مره واثنين وثلاثه واعرف بناتي عند اهلي بيرتاحون ولكن من باب اني ابغى البنات مع امهم عشان ما احس اني احرمتها منهم حتى لو رضيت اظلم نفسي ما احب اظلم غيري من ناحيه الزواج ان شاء الله بتزوج رجعت والا لا وهذا من حقي وانا ما احب اضيع حقي ونسال الله العلي العظيم ان بصلح الامور انه على ما يشاء قدير |
أسأل الله أن يصلح حالكم
يا أخي حاول تكلمها بصراحة و تقولها اللي انت تبيه اذا رضت كان بها و اذا ما رضت هيتتحمل نتيجة قرارها ::: و انت أسأل الله أن يرزقك بمن تحترمك و تقدرك بس المهم تحط بالك على البنات و اذا بغيت تتزوج دور عن ذات الدين اللي تقدر بناتك و تعدهم بناتها و تحطهم بعيونها ،،، أسأل الله أن يصلح حالكما و أن يحمي بنتيكما |
يوووووووووووه
كتبت رد طويل .. وبسبب خطأ في المنتدى راح الرد إذا قدرت أكتبه مرة ثانية فبها ونعمت .. وإلا ترتاح من كلامي ههههههههه الله يعينك يالغالي |
اطياف
يعطيك الف عافيه والله تعبت من المحاولات ولكن الله يرزقنا باحسن منها ويرزقها باللي احسن مني وعلا مزاجها تبا للعزوبيه الله يسعدك دنيا واخره |
طيب انت ليه بدك تتزوج ؟؟؟!!!!
يعني بدك تبني الك حياه جديده وتخرب حياة تانيه حياة زوجتك وبناتك عشان انت حابب تتزوج وحده تانيه ؟؟!!! ولا في سبب تاني للزواج مره تانيه لانه اي وحده بتعمل الي عملتو مرتك ازا زوجها بدو يتزوج عليها بتطلب الطلاق هي تصرفت خطاء انه اخدت الموبايل .... بس انه تخبر اهلها شي كتير طبيعي ما في زوجه بتتقبل انه زوجها يتزوج عليها الا ازا كان هيه ما بتخلف او مريضه مرض بمنعها انه تمارسو الحياه الزوجيه او انه هي مو زوجه صالحه لكن ازا ما في ولا سبب من هذه الاسباب فانا بفضل انه تراجع حالك وكمان ما تقارن حالك بالرسول لانه هو صحيح قام بالتعدد لكن لسبب وجيه ونحن كلنا بنعرفه انه هو حتى ينشر الدعوه الاسلاميه مو عشان هو حابب يتزوج هيك بدون سبب فياريت ما تخلطو الامور وياريت انه تفكر ببناتك قبل لا تفكر برغيتك بالزواج مجرد للرغبه والله يوفقك |
ينقل لعالم المتزوجين ليلقى التفاعل المنشود
|
أحيانا يكون عيش الأطفال بين والدين منفصلين خير لهم من العيش بين والدين يقضيان يومهم في الخلافات والمنازعات ..
|
ماقلت لنا ولاصفه زينه في زوجتك معقولة مرتك خاليه من الصفات الكويسه
أحساسي وإحساسي نادرآ مايخط أن سبب مشاكلكم أنك حاط في راسك الزوجه الثانيه وش يضمن لك أنها ماتكونى أردى من الأولى أوزن الأمور صح وحط ورقه بمميزاتها وعيوبها وقارن وخلك منطقي سبحان الله أحد الصحابه كان يقول أرى أثر معصيتي في دابتي أوزوجتي أوجاريتي أوالخادم سبحان الله أن الله لايغير مابقوم حتى يغيرو مابأنفسهم حاول تتقرب لربي في هالفتره وتستخير مره وثنتين وثلاث وتدعي وتتصدق بنيه صلاح الي بينك وبين زوجتك صدقني راح تحس بأنشراح وراحة بال ماتخيلتاها وربي بيخترلك ماكان الخير فيه وشف أخوي أنا حرمه وأعرف كيف تفكر زوجتك ترا الزوج اذا جلس على الداخله والطالعه بعرس أعرست بيطلع من خشمي وبكره العيشه معه,,لأني فقدت أهم شي وهو الراحه النفسيه والآمان وبصير أفتعل المشاكل من ضيقت الصدر حط ربي بين عيونك ثم قرر,, ياما ناس كانو كارهين بعض ثم سبحان الله يوم عدل الزوج من طبايعه وأحترمها وهي قدمت تنازلات مشت الحياة وطلع الشيطان من بينهم,, كثير من فقاء السوء ولو هم تعس الناس ستحيل يصلحون بين أصدقاهم وزوجاتهم أول ل يقولونه طقا بالثانيه تعقل خذلك ثانيه تنسيك الأولى واذا تزوج وخلص شهر العسل وعلى قولتهم راحت السكره وجت الفكره أستوعب انه فتح على نفسه باب مهو قده وخاصه اذا كان بينه وبين زوجته حب وأطفال ومشاكل ممكن تنحل بالتفاهم ياناس إن أبغض الحلال عند الله الطلاق.. |
اخي اصلحكم الله
مافعلته زوجتك واهلها خطاء ولكن ماحصل ايضا منك خطاء لابد ان تفصل مابين العمل والمنزل جهاز للمنزل والاهل والاصدقاء وجهاز للعمل مغلق بالمنزل ومن ساعات النهار الاخيره وبعلم زوجتك والحياه تحتاج لصبر ومشاركه وبناتك ومنزلك وزوجتك لهم عليك حق وانت مثاب لصبرك ولاتظن ان الزواج الثاني الفانوس السحري لا ربما كان اسوء من الاول او وجود الاثنين يوتر الوضع اكثر ثم ماذا عن الاطفال بقي شي نحن سمعنا وجهة نظر طرف واحد والثاني غائب |
بصراحة كلام منولة جيد
وايضا كلام همس السنين حاول أن تعدل من وضعك فيما بعد سواء رجعت إليك أو تزوجت عليها رأيي الآن أن تتركها وتهجرها هجراً كاملاً لمدة شهر أو شهرين حتى تحس أن بقاءها عند زوجها خير لها ألف مرة وترسل مصاريف البنات لها |
يا أخى ممكن من فضلك تكتب لنا ميزات زوجتك كما كتبت عيوبها . لو فعلت ستحل مشكلتك بنفسك.
واضح انك انسان عاقل ومتزن وتعلم ما تريد فعلة ولكن ينقصك أن تكون منصف. أرجو ان تتقبل ردى |
والله الاقي السالفة ماسكينها الحريم من اولها لين اخرها.. وابوها واخوها مالهم كلمة..
مشكلة بعض الحريم عقول ماميش.. تتصرف وعلى بالها كذا بتكسر ظهر الرجال.. واخوي انت غلطتك الناس معصبة وانت تتكلم انك تبي تعرس عليها.. مفروض تفهمهم وش السالفة.. افضل شئ كلم رجال عاقل.. من اخوانها او ابوها.. وقله كيت كيت كيت.. السالفة من نايحة اتصال البيت وقلهم انا يوم قلت نعم بتزوج عليها.. ليش قبل ما تسألون ليش تبي تتزوج.. اخذتوا السب والشتم.. ليش ما سألتوا عن السبب.. وقلهم كذا كذا كذا.. الاسباب.. وحاول تتفاهم معها بعقل بعيد عن العواطف.. وقلها عيوبها اللي فيها.. بدون ما يكون مصارخ وتبادل تهم.. وقلهم ايش بتستفيد.. من الطلاق.. هي بنتجلس لوحدها.. وبناتي معي.. وانا عندي جديدة.. وهي تبقى محرومه.. وسالها ليش هي تقصر في حقوقك. انت المفروضه عليها.. وشئ اخوي مهم.. لقيت الكثير ما ينتبهون له.. خل زوجتك تفحص عن الغدة الدرقية.. كثير صادفت يجي انتقاد من اهلهم او قرابتهم.. وبما افيهم قريبة لي.. وطلع عندهم خمول في الغدة الدرقية.. وهذا اللي مسبب النقص والكسل.. ويكون العلاج اعطاءهم كبسولات مدى الحياة صغيره.. |
ما خربوا الزوجات إلا أهلهم . وإلا لو في رجال ينشد بهم ظهر ما كان هناك حريم خارجات عن الطاعة . أصر على رأيك وكن في الموقف شديد والبنات لهم الله وخذ بالك منهم . هذه الزوجة لالبد أن تتزوج عليها كي تتأدب
|
انت بعنادك جالس تهدم بيتك والضحية هم البنات
اذا الزوجة رافضة تجيب عليها ضره هذا حقها واقل من حقها .. الرسول صلى الله علية وسلم ما تزوج على السيدة خديجة .. وامير المؤمنين علي بن ابي طالب ما تزوج على فاطمة اذا هي طالبة الطلاق هذا من حقها والله يعينها هي اخطئت بشكها الغير مبرر وانت غلطان بعنادك .. والضحية البنات الله يعينهم |
| الساعة الآن 10:15 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©