|
زوجي هاجرني
مرحبا اخواني اخواتي المشكله باختصار شديد انا من ولدة ولدي لي سبعه شهور وزوجي ينام بالمجلس وعذره الولد مايخليني انام يبكي صح لما كان عمره ثلاثه شهور كان مزعج شوي بس الحين ماشاء الله صار ينام الى الظهر وحتى لما اغير له او ارضعه يكون نايم زوجي نومه خفيف بالمره بس انا وش ذنبي ؟!!!واذا قلت له الولد صار ينام يقول انتي تولعين المبه وانا احب الظلام قلت اوكي نشغل الابجوره عند الولد ونقصر عليها قال انتي تقصرين على المكيف قلت خلاص نطول عليه والبس الولد واغطيه قال مافيه الين يطلع في غرفه لحاله !!!!!!!!! متى مستحيل اطلع ولدي قبل سنتين احسه تعود على الوحده ومايبي ينام معي انا ما ابي منه شي بس ينام على سريره لو انام انا على الارض بس يكون معي بنفس الغرفه احس بالدف يدور الاعذار وبس ياعالم والله ما افكر بشي غير قربه وبس هو اذا بغى ينام يناديني اجلس عنده لين ينام وارجع لولدي والله ما ابي منه شي ابيه بس ينام معنا ابي احسه بجنبي ابي احس بدفاه الى متى !!!!!!!!! تعبت وانا اتكلم واذا تكلمت في هالموضوع مره ثانيه يعصب يقول مفروغ منه !!!! فيه ايه في القران بس ما اتذكره اذا الرجل بيعاقب زوجته يهجرها في الفراش بس انا وش ذنبي علشان يعاقبني علشاني جبت له طفل!!!! عطوني طرق ترجعه لغرفته
|
الله يهديه ويسخره لك يارب ..
طيب أختي ماأدري يمكن تغيرتِ عليه بعد الولادة ـ خاصة إذا كانت طبيعي ـ .. أقترح عليك تروحين لطبيبة شاطرة تشاورينها بهالخصوص وتشوفين وش تقولك ،، لأن كثير حريم يتغيرون بعد الولاة بسبب إن الخياطة بعدها ماكانت مضبوطة فينفر منها زوجها ويلجأ لوسائل ثانية !! أقول يمكن يكون هذا السبب فأنتِ تأكدي والله ييسر لك أمرك .. |
لاما تغيرت وانا والده قيصري وزوجي يرغب فيني بس في المجلس وارجع انام مع ولدي المشكله مو هنا المشكله رفضه النوم في غرفتنا مايبغى ينام معنا يبي لحاله!!!!
|
اقولك خليه بالمجلس ويوميا شيلي عفشك وروحي نامي عنده
او انقلي الولد لغرفه تانيه احسن وانتي طول اليل شيكي عليه بتتعبي بس ولا زوجك يتعود ينام برا الغرفه وبعدين شوي شوي الطفل بينام طول الليل وما بيصحى \ بالتوفيق اختي |
الظاهر انه زوجك تعود على النوم المنفرد اثناء وجودك بفترة النفاس وانبسط ولكن اقطعي حجته بعذر المولود وانقلي طفلك بغرفه اخرى وركبي جهاز انتركم بينك وبين الطفل حتى تعرفي عنه اذا صحى اي وقت وبذلك لايكون هناك عذر لزوجك سوى الطفل او النور او التبريد وغيره وبخصوص ايه الهجر هذه تنطبق على من اراد زوجها ان يعاقبها ( واهجروهن بالمضاجع ) وهي لاتنطبق على وضعك مع زوجك واخيرا" مبروك المولود .:15:
|
أسأل الله أن يحنن قلب زوجك عليك
|
خلاص نيمي ولدك بغرفه بروحه جمبك
وحطي جهاز مراقبه للطفل وجذي يسكت وماعنده عذر انا زوجي لما ولدت كان يلمحلي انه يبي بروحه ينام بس ما رضيت وبعدين اكتشفت انه كان يبي بروحه عشان يكلم عشيقته بالموبايل ولما ما رضيت صار يتخانق معاي بس عشان ما اكلمه وروح يقعد بالصاله يسهر معاها ويدخل الفراش ترى الرياييل شياطين بس مو اكثر منا احنا الحريم صكي عليه صكه |
السلام عليكم
اختي العزيزة المسأله واضحة وما فيه مشاكل خلي الولد في غرفة مجاورة وخلي زوجك يرجع غرفته وخليكي على نفس الوضع ما راح يتغير عليك شيء كنتي تتقلي من المجلس الى غرفتك خليها من غرفتك الى غرفة الطفل |
حبيبتي انت قلت انك ما تنقلين ولدك لغرفة ثانية الا بعد سنتين
بتعرفي انه هذا مش صحي؟؟؟؟ لازم علميا ينفصل الولد عن اهله في عمر تقريبا 6 شهور يعني تحطيه في عرفة ثانية قريبة على غرفتك انصحك تبتدين تعالجين الموضوع اليوم قبل بكرا لان يمكن زوجك يتعود على النومة في الصالة ولما يكبر الولد وتفصليه يقولك انا تعودت انام لوحدي و ما يعود يرجع للغرفة موفقة عزيزتي |
صعبه مولود تخلينه بروحه
الحل عند زوجج لازم يقتنع انه يرجع الغرفه0 جربي تبكين اكسري خاطره شوي )حيله يعني( لين يحس فعلا ان الغرفه صارت هاديه أو خربي مكيف المجلس)هذا آخر الحلول( _ !!!! |
أنا مشكلتي عكسية فأنا التي أنام لوحدي و زوجي ينام مع ابنتي في نفس الغرفة ههههه
المسألة مسألة تعود, أحب آخد راحتي في السرير لوحدي و اذا استيقظت ابنتي في نصف الليل لا أستطيع النوم بعدها أما زوجي فما شاء الله عليه ينام بعدها بثانية و لا يتأثر اذا ما نمت كويس ما بقدرش أعمل أي حاجة بالنهار و بكون تعبانة جدا ربنا ينولك اللي في بالك |
حبيبتي أهم ماعليك زوجك من قالك ان الطفل لازم يجلس لين سنتين عندك الحمدلله اذا رضع ونام حطيه بسريره ونامي بغرفتك
وبكره اذا خلص سنتين حملتي بثاني وعلى هالحاله شوفي وش يريح زوجك وسويه لكم 7شهور وانتي بغرفه وهو بغرفه مافي أحلى من الخصوصيه في غرفتك بلا حوسة اطفال أنتي كل ماقام طفلك روحيله في الغرفه الثانيه واجلسي معه لين ينوم ياختي حرام عليك زوجك نومه خفيف يعني اي ازعاج هو الي بيتنكد وأنت متعلقه بذا الطفل,, الحمدلله ماعليه الا العافيه الحقي على زوجك ورتبي غرفتك وحطي فواحه وشموع وقوليله سويت الي تبغاه اهم شي رضاك,, أنا أم لطفلين وهاذي سياستي ينامون بغرفتهم حتى أثر هالشي في شخصيته الحمدلله مستقلين وواثقين من نفسهم والطفل لو صحى بالليل وشاف شي بينك وبين زوجك يمكن يتعقد لاتقولي صغير اقرأي كتب تربيه الأطفال وأنتي تعرفي,, الحل بيدك |
ياأختي الذي نومه خفيف مايتحمل ويتعب إذا مانام زين من تجربه
خصوصا عنده دوام ارحميه وفكري في راحته والله يعينك ترى الحياة ماتكمل لأحد |
مشكورين اخواتي واخوني بس مالقيت حل يرضيني ويرضيه انا طفلي ما جبته الا بعد اربع سنوت حرمان ومتعلقه فيه وهو بسم الله عليه اذا صحى وفتح عيونه وما شافني جنبه يصرخ واذا شافني ابتسم ورجع ينام !! صعبه اخليه لحاله على الاقل سنه خلاص مو سنتين وزوجي لازم يقدر زي ماهو ولدي ولده واذا على الدوام بتنازل واخليه ايام الدوام ينام بروحه بس ايام العطل !! وش عنده ؟!! كل قريباتي بعد الاربعين ازواجهم ينام بروحه فتره شهر شهرين بالكثير بعدين خلاص يتعودون الازوجي !!!حتى اخوه ينام مع طفله مع انه بكاي بس يتحمل !! ليه زوجي ما يتحمل والله تعبت منه والمشكله رافض اي نقاش في الموضوع افكر اقوله خلنا في بيت اهلي مدام كل واحد ينام لحاله كننا اخوان !! لعله يحس فيني شوي وش رايكم بينفع معه الضغط ؟!! حتى امي تقول مدام ماينام معكم ليه تروحين له !!
|
تروحين بيت اهلك ... تضغطين عليه !!!!!!!!
قصدك تخربين بيتك ممكن لكن تضغطين عليه ما اظنها ... لان كلامك ما يدل على ضغط يدل على انفجار مشكلة ما تنتهي ... يا اختي الله يهديك ... اولا وقه الاهل هذي تعتبر ورقه قويه جدا جدا للزوجة فلا تستخدمينها وتهددي فيها بمشكلة ممكن يكون لها حل ... لان بكره راح تخسري هالورقه ... ولنفترض انك رحتي بيت اهلك ... هل تتوقعي انه لو نام معاك بنفس الغرفه بعدها بيكون بتقبل .... اهم ما في الموضوع انه يتقبل النوم معاك برغبه بغرفه وحده ... وابنك توه صغير واذا ما يسكت إلا اذا شافك سواء كان بغرفتك او بغرفه ثانيه انتي ما بتتركيه يصيح ولا تروحين اكيد بتروحين وبيسكت ... اختي قوليله تعال جرب معاي النومه كم يوم وشوف ... اذا ما نسابك الوضع نام لوحدك ... كخطوة أولى ... بعدها لو فكر يرجع تدلعي قولي ما اقدر ابيك جنبي ... خذي الامور بهدوء وحكمه ... اعرف الوضع عليك صعب ... لكن بيت اهلك الموضوع اصعب واصعب دمتي بود |
هلا اختي
لاتروحين لاي مكان انتي قولي له مره ثانيه ولدنا ماعاد مزعج وانا ابيك ترجع للوضع الطبيعي لاي متزوجين ابي حقي الطبيعي ماراح يوافق لانه ماخسر شي بعدها لاعاد تروحين للمجلس ولاتجينه لما يطلبك هو بيشتاق وبيضطر يجي مو تحدي اوعناد لا تشيكي وحاولي تستدرجينه للغرفه وخليها اخر شياكه وبعدها ارفضي خروجه واذا مانفع لاعاد تروحين للمجلس ولاتنومينه خليه يدور عليك قولي له انا بمكاني الطبيعي وموفقه اختي بس نصيحه لا تسكتين عشان مايتعود اكثر |
السلام عليكم ....
لا يا عزيزتي .. الطفل من يصير عمره بين الست شهور الى التسعة شهور ...طلعيه لغرفة قريبة منك ... غلط تخلينه معكم ... والحمدلله ان زوجك طلع ما قالك اطلعي انتي وياه ... وهذا حال كثير من الأمهات .. فرأيي ان تهيئي الجو لزوجك ليعود واخرجي طفلك لغرفة قريبة ...فزوجك احق بغرفته من طفلك .. اما مسألة علقك بابنك وتعلقه بك فهو ليس عذرا ... كلنا متعلقين باطفالنا وتعورت قلوبنا لما طلعناهم بس نتحمل لأننا نسوي الشي الصح ؟؟؟ فيا حبيبتي الآن اخرجي طفلك ونامي عنده على الأرض الى ان ينام ثم اذهبي الى غرفتك... واذا صحى وما لقاك وبكى ...عادي ...مرة على مرة الى ان يتعود .... تذكري انك مسؤولة ومن مهامك تربية أبنائك وليس العكس ...ليسوا هم من يربوننا ... وحكاية حرمان ا؟لأربع سنسن ليس عذرا لهمال دورك كمربية والسماح لطفلك بالقيام ما يريد .... ستقولين ان كلامي كبير على 7 شهور ....وبقولك التربية تبدأ من اول يوم ....واذا استمريتي على هذا الأسلوب فابشري بطفلك وعمره 6 -7 -8 -9 -10 الى ما شاء الله وليس لك أي احترام عنده ولا تقدير ولا كلمة مسموعة ... وقد نرى لك مشاكل مكتوبة في منتدى الحوار الأسري تطلبين فيها المساعدة على طفلك الذي لا يحترمك ولا يسمع كلامك .... اربطي على قلبك ....وسارعي باخراج الطفل من الغرفة دمت في حفظ الرحمن ,,, |
تروحي بيت اهلك؟!!!!!!!!!!!!!!!!!!!!!!!!!!!
ايش صارلك حرام عليك والله مقدرين فترة الحرمات لكن الحمد لله عدت والحين جاء وقت تكوني فيه ام حكيمة وتربي ابنك من اللحظة الاولى وتربيه على كل اللي يناسب ظروفك الاسرية لانه اذا كانت كذيه البداية راح تفقدي السيطرة بسرعة الاغلبية يفصلو اولادهم في غرف منفصله وخليك من يفتح عيونه ويتبسم لي واذا ما شافني يصرخ !!!!! ( كلهم يصرخو ) وما عليهم غير العافية( العجايز يقولن خلي يصرخ يتنسم راسه احسن ) حافظي على استقرارك الاسري واعذريني ( اختك ام حمزة ) |
إما إنك تنامين مع زوجك أينما ذهب ..
أو إنك تحطين ولدك بغرفة جنبك وتحطين عنده جهاز بحيث لو صاح تسمعينه , ولو نومك ثقيل زوجك نومه خفيف وراح يسمعه ويقومك , أعرف وحدة نفس حالتك ومطلعة بنتها من يوم عمرها شهر ونص تقريبا وزوجها نومه خفيف ويقومها وتروح للبنت , واليوم البنت ماشاء الله تدرس بالمدرسة . |
والله مااتوقع عذره الولد انا زيك كذا ينام في غرفة المكتب ومايجي الا وقت الحاجه ويرجع ينام في غرفته اقوله ليش ماتنام عندي والله كاني في بيت اهلي انام لوحدي وعيالي ينامون في غرفهم وكانت بنتي تبكي في نص الليل واصحى عندها رايحه جايه عذره المكيف ومرة يقول احب اقراقبل النوم اعذار بس وطنشته وبالعكس صرت اخذ راحتي اتقلب على كيفي ههه واستخدم كريماتي واكلم خواتي اخراللليل بس خليه الواحد مايحس بزوجته الا اذافقدها اذا رحت عند اهلي قال مشتاقلك قلتله وانا عندك نايم لوحدك ماتفرق معي قال لا ان شاء الله انام في غرفتنا موال دايم يكرره واللي يضحك اني مو انا الوحيد ه طلعن خواتي زيي الي تقول تنام مع عيالها والثانيه ينام في المقلط ماعليك مو انتي الوحيدة
|
عذرا على السوال لكن رجل كيف يطيق ان لا يجماع زوجته كل هاي الفتره؟
|
ياعزيزتي لاتفكرين ان ولدك بعد سنتين بيطلع بسهوله من غرفتك ؟؟؟
انا بنتي الكبيرة اربع سنوات كنت معودتها تنام معي على السرير لاني كنت ارضعها طبيعي وفي عمر السنه ونص خلاص فطمتها وفكرت احطها في سريرها لكن جننتني الين صار عمرها 3 سنوات وقلت خلاص لازم تطلع من الغرفه وزوجي عكس زوجك يقول خليها حرام ...المهم طلعتها في غرفتها واللع الى يومك هذا لازم انام عندها حوالي ساعه على سريرها وفي حضنها لين تقتنع وتنام ... واذا صحيت نص الليل لازم تجي غرفتي وتنام جنبي .... لكن الولد من الولاده كان سريره منفصل وماتم سبع شهور الا وانا مطلعته وحاطه الجهاز عند راسي عشان اسمعه .... وبس كنت اخاف انه يطيح من فراشه فحطيت له فراش في الارض مؤقتا ... ياعزيزتي كلام زوجك صح انا اعرف رجال يستحون حتى يضمون زوجاتهم قدام عيالهم الرضع ...وانتي لازم تضحين عشانه وعشان ابنك يتربى صح ... والله يكون بعونك ويقوي قلبك . |
والله كلامكم مقنع وكثير يقولون نفس كلامكم الطفل لازم يطلع من غرفة اهله على سته شهور وكنت اضحك احس الموضوع مزحه بس شكل الموضوع جد بصراحه حاولت اليومين الي راحت انومه في غرفتنا وانا انام في الصاله وابو الشباب في المجلس بس يمكن ساعه جالسه اتقلب واوجعني قلبي ورجعت بس رح احاول اذا قدرت جهزت غرفه لولدي وطلعته والله يقوي قلبي قولو آمين مشكوين اخواتي على مشاركاتكم واقراحاتكم وان شاء الله ابشركم برجوع زوجي لغرفته قريب يااااااارب
|
| الساعة الآن 04:03 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©