قصة صديقتي المطلقة مرتين بعد ماوافقت على الخاطب
 

السلام عليكم ورحمة الله وبركاته

تذكرون قصة صديقتي التي خطبها واحد اصغر منها وهي مطلقة مرتين اتكلت على الله ووافقت وحدد يوم الشوفه الشرعية وبعد ماخرج اتصل عليها وقال لها ماشاء عليك جسمك ممتاز وهذا اللي ابي لكن عندي راي قالت وشو قال استاجر لك بيت عند اهلك واجيك خميس وجمعة وهو متفق معها على انه يوم وليلة مع العلم انه له زوجتين يعني يمر عليه في الاسبوع يومين فقط قالت له ليش قال ماابي اتردد وهويسكن في مدينه تبعد عنها ربع ساعة فقط قالت له وين كلامك الاول انك تبي تسكني عندك في بيتك الجديد قال البيت بعته قالت طيب اتاجر لي عندك قال الاجار عندنا غالي قالت الاجار غالي في كل مكان قالت طيب ادفع معك الاجار قال لا ابيك عند اهلك واجيك خميس وجمعة وغير ها الحل ماعندي قال يعني مسيار قال لا ويمكن اجيك وسط الاسبوع اذا احتجت لك قالت له ليش غيرت رايك اول تبيني عندك وهالحين تقول لا قال؟؟؟؟؟؟؟؟؟؟؟( كنت احسبك بييييييييضضضضاء ) وهي والله ياناس بيضاء وجميله لكن سبحان الله كأن لسان حاله يقول ( كثيره عليك يوم وليله وانت كذا )ياليته ماقالها حسبي الله عليه جرحها صريح الاخ قلنا لها معليش اقبلي بشرطه وتزوجيه مسيار احسن من ها الوضع قالت انا ما اعترضت على المسيار انا اللي حز فيني انه ماكان هذا الاتفاق من اول بس يوم شافني ولا كنت اللي يبي قال ياله مسيار نرتاح من مسؤليتها وسط الاسبوع يبغاها مثل الاستراحة الاخ حسبي الله عليه كسر خاطرها يقول ابغاكي للفراش والسفر معي لاني رجل عندي طاقة ( عساه يطق ان شاءالله ) وزوجاته وحده مريضة والثانيه مشغوله بعيالها المسكينه حاسه بالاهانه تقول وش اسوي عمري 45 ومطلقة مرتين واخاف يمر علي الوقت وانا ماخذت شئ وبعدين لوكا قال من اول كنت يمكن تقبلت الامر لكن يقول انا ما قررت إلا بعد ماشفتك تقول والله كأنها سكين غرزها في صدري ( بعد ماشفتك ) واخاف ارفضه يعاقبني ربي لانه رزق وجاني ورفضته حسبي الله عليه ونعم الوكيل حيرها وهي ماهي مقتنعه بهالوضع ياهل الري والحكمة شيرو عليها وانا اقول ( يايها الزوج والاب هل ترضى مثل ذلك لبنتك او اخته ) اين الرحمة اين المعروف اين من ستر على مسلم ستر الله عليه في الدنيا والاخرة 0 ادعوا لها ان الله يجبر بخاطره ويعوضعا لدرجة انها تقول يمكن الزواج ماكتب لي بس انا اطلب شئ ماهو لي اصيبت بليأس والاحباط ونفسيتها منهاره مره >رجاء يااخواني وياخواتي تدعون لها في ظهر الغيب ان الله يرزقها اللي يجبر خاطرها ويعوضها قد يكون فيكم من له دعوه مستجابه في هذا الشهر الكريم والسلام

بارك الله فيك اختي فرح فرحك برؤية وجهه الكريم في الفردوس الاعلى ووالدي

هذا يلف ويدور من البدايه.. ربي يعوضها باللي أحسن منه ان شاء الله .. خليها تكثر من الاستغفار والاستخارة... ويجيها اللي يستاهلها ان شاء الله الزواج مو جنس وبس هي تبي تستقر بعد...

الله يعوضها باخير منه انا اشوف انها تتركه هذا من قبل ما يدخل واسلوبه وقح شلون اذا اخذ اربه منها....

اخوك تعبت اعطي

ترفضة احسن لها ويبدو هو وده يجي منها الرفض ومن البداية واضح انه مايراعي مشاعرها

اختي اللي هذا أوله ينعاف تاليه...

شخصيا لا أرضى بهذا الوضع لا لنفسي ولا لأخت ولا لصديقة..

والله المستعان..

الرزاق موجود يا حبيبتي..هو اللي يرزق ..خلصوا الرجال ..تتزوج واحد من البداية يلف و يدور..ترفضه و بشدة ( الله لا يرده) ..و ربنا يرزقها ..ولو لها نصيب تتزوج راح تتزوج مهما كانت الصعاب..وما في شيء على رب العباد مستحيل...

واخاف ارفضه يعاقبني ربي لانه رزق وجاني ورفضته

ما هذا الكلام ..


وهل اي ذكر يعد نعمة لا يجب رفسها ...؟؟؟؟ عجيب والله

هذا ليس برجل ...والوحدة تدور لها رجل يسندها ويكون نصفها الثاني ... وليس اهانات من قبل اولها حتى ...

من هانت على نفسه كرامته ....كانت على الناس أهون ...



دمتي ودامت في حفظ الرحمن ,,,,

ترفضه وبشده هذا الشخص يبغها للفراش
ويبغها مسيار الله يعوضها بااحسن منه والرازق
الله وهوبيده كل شي وخليها تستخير وان شاء الله
راح ربي ييسر امرها

لا حول ولا قوة الا بالله

زواج مسيار=عدم استقرار

انصحها بالاستخاره

عسى الله يكتب لها الخيره في امرها

يا اختي الكريمه

الرسول صلى الله عليه وسلم قال اذا اتاكم من ترضون دينه وخلقه .......
انا ماراح اقول دينه .. ولا راح افتي لك من عندي
لكن بالله عليك هذا خلق ؟؟ احد يرضى بهالخلق ؟؟

اكرر انا ما افتي .. لكن عن نفسي ما ارضى بواحد مثل خلق هذا لاختي او بنتي بالمستقبل

بعدين اذا تردد من اولها كذا وغير رايه
ممكن بكره يمل من جسمها " على حسب كلامه " ويغير رأيه فيها كلها
فالافضل تبقى على بر الامان من بدري قبل تمر بتجربه قاسيه اخرى


احب انوه ان هذا رأي شخصي

الله يختار لها اللي فيه الخير وييسر امرها وين ماراحت

مع رأي الأخت شوق وألم

:)

للتوضيح فقط .. اخ وليس اخت :) << ادري المعرف يلخبط شوي :)

شوووفي أختي الزواج مو يوم وليلة بس الزواج حياة جديدة وحلوةواستقرار أهم شي حسن الاختيااااااااااار وربي يسعدهاا ويعوضها خير أنا مطلقة مرتين ولوجاني مثل هالاشكال أكيدة بردة وشحادني على واحد كذا أخلاقة

الله يعووضها ابرك ولاتياس من رحمة الله صدقيني الفرج قاااااااااااادم انصحهاااونفسي بالاستغفاااااااااار وربي يفرج همها وهمي وكل مسلمة ياااااااااااارب

ليش يعاقبها الله..

الرجال يبغى منه خلق ودين..

وهذا منل كلامه لادين ولا خلق...


لو فيه ذرة دين كان صدق من اول كلمة ما راح يتفحص جسمها يشوف هي تناسب متعته او لا... وكان يجيبها يمه..

ولو فيه خلق.. كان احترمها وراعى مشاعرها.. وكان فكر فيها.. وانه يأمن لها بيت وتجيب عيال..


هو بس يبي يلعب شهرين ويطلق.. فلوسه واجد...


لا ترضى على نفسها تكون لعبه ومكان للتفريغ.. فقط..


والله موجود وهو الرازق...

إدا تبين شوري

أنا رجل وأعرف نوعيات الرجال ,

هدا الرجل من النوع الدي يتزوج المرأه ويجربها فإن صلحت أبقاها وإن كانت لاتصل إلى مستوى الزوجتين الأوليين طلقها وتخلص منها ,,

لو كنت مكانها حطيت الرجل بعيوني حتى يحس أني وجه سعد وخير وبركه عليه

السلام عليكم انا من رايي انها ترفضه والارزاق بيد رب العالمين لانه من البدايه يلف ويدور وانسان غير صادق وانصحها بكثرة الاستغفار واللجوء الى رب العالمين في طلب الرزق والمغفره والله يوفقك ويرزقك

يا الله استفزني الموضوع ..

الله يعوضها بأحسن منه ..

السلام عليكم اخواني واخواتي فعلا المؤمن ضعيف في نفسة قوي بإخوانه
اقدم شكري وامتناني ودعواتي لكم بان يجعل الله ذلك في ميزان حسناتكم صديقتي اسخارت كثير ولله الحمد وتقول كنت قبل الاستخارة حاسة في هم وحمل كبير ماادري اقبل ام ارفض وكنت ادعي ربي إن الله يبرد علي إذا مااراده سبحان الله بعد الاستخارة رفضته وتقول والله العظيم انه اصبح مايعني لي شئ 0 بالنسبة لللاخت مدام الاء الحكم الشرعي للزواج المسيار جائز إذا توفرت فيه الشروط من عقد ومهر وولي إلا ان الزوجه تتنازل عن حق المبيت او السكن او النفقة برضاها والله اعلم

مادام أن عمرها 45 عاما ولم يأتيها أطفالا كان من المفترض أن تقبل به لعل الله يرزقها أطفالا صالحين تهنأ بتربيتهم ويكونون قرة عين لها ، المرأة التي في سنها تعيش مع ربع رجل خير من أن تجلس كذا بلا رجل وكما يقول الأخوة المصرييين ظل رجل ولا ظل حيطة

ظل رجل ولا ظل حيطة ؟؟؟


لا يا اخي الحيطة أفضل ... وماذا أريد بأولاد أبوهم ليس كفؤ لرعايتهم وتربيتهم التربية الحقة ...


هم واحد خير من همين ...

مهما نصحتك ومهما قلت لن أكون كمن عايش الوضع
مثل مايقولون اللي يده في الماء مو مثل اللي يده في النار

لكن ما أقول الا..
الله يبعدها عن النار في الدنيا والآخره وجميع المسلمين والمسلمات
الله يكون في عونها ويفرج همها

اشكر جميع اخواني واخواتي الذين تفضلوا في الرد
واسأل الله العلي العظيم ان يقبل منهم صيامهم أمييييييين