|
صدمتي بزوجي من الغلطان فينا ؟!!
هلا وغلا بالجميع
بخبركم بالموضوع و اعرف عقلياتكم كبيرة ما شاء الله بتقولون لي من الصحيح بالموضوع تراه يخص انسانة غالية عندي وااايد زوجها انسان اناني فعلا يحب نفسه بس تخيلوا لهم سنة متزوجين ما يرضى تزور اهلها ولا اهله هو مقااااااطع الجميع بيتوتي و يرفض الطلعات و السهر تحس انها كبرت 20 سنه على عمرها وتوهم شباب !!! نادرا ما يضحك و يسولف بس ساكت و يبي كل شي تحت امره يعني اهله يتصلون لهم يقول لها لا تردين و اذا اهلها اتصلوا ترد يقول دقيقة اذا ما قفلتي بسكره انا و يغاااااااار موووووووت مرة مرضت و طلع فيها المستشفى رجع بهووووووشة كبيرة زين ما راح السجن ضرب الدكتور الي يعالجها بالصدفة زرتها قبل يومين وخبرتني بحالها لانها تغيرت كانت وردة مفتحه و متفائلة و نشيطة احسها ذبلت !!! وحشوها اهلها هي يتيمة ابوها توفى ما عندها الا امها هي وحيدة امها وابوها و امها عايشة ببيت خال البنت و يتعذر يقول ما ابيج تروحين لهم لان بيت خالج كله شباب طيب هي ما بتجلس معهم منفصلين الرجال لحالهم والحريم لحالهم قالت له طيب انت روح جيبها لي البيت هنا تجلس معي و تروح بعدين يعني مو اقااااااااااامة دائمة زيارة بس و هي مالها احد غير امها ما رضى و قال انا انسان ابي راحتي ببيتي طيب تبي تشوف الناس تبي تسولف تبي تحس انها انسانه لها حقوق طفشت من وضعها صابرة ومتحملة وهو مقصر كثير معها ماديا ما يشتغل !!!!! ابوه الي يعطيهم فلوس و اكل يشتريه ابوه ويجيبه كل شهر انصدمت تقول ما توقعته جذيه و ما تقدر تتطلق منه مالها مكان تروحه اذا تطلقت بس الي مستغربة منه مقاطع الكل !!! ما يبي حتى اهله صارحته مرة يروح لطبيب نفسي ضربها وشتمها و من بعدها ما عاد فتحت معه الموضوع العلاقة الزوجية بينهم شبه منعدمة !!! مرتين بالشهر بالكثير قلت لها انتي زعلتيه او اخذ موقف منك قالت وربي ما سويت شي قالت هو يكلمني عشان يزعل !!! تقول تدلع له و تكشخ باللي موجود بس ماكو فااااااااااايدة معزول عن العالم وعازلها وياه تعبت من الوضع وش الحل عشان تغيره ويعيشون حياتهم كسرت خاطري قلت لها انتي بشهر العبادة رمضان الدعاء الدعاء الدعاء هي انسانة ملتزمة وحافظة للقرآن بس زوجها مو ملتزم تقول احيانا اجيب الماي لين عنده بس عشان يتوضأ ويصلي وما يكون له عذر تعبت وهي تنصحه الله يجزاكم خير ادعوا لها محتاجة دعواتكم ربي يفرج همها أختكم بحرانيه كول |
على فكرة بخبركم
يوم يتقدم لها قالت انهم سألوا عنه الشاب الكل يمدحه و يقولون انسان زين و قالوا لها انه يشتغل مع ابوه بأعمالهم الحرة بس هي تقول ما يطلع ابدااا و لا احد يمرهم غير عمها كل شهر يجيب لهم الأكل ومصروف و كل شي ممنوع و ما تقدر تكلم احد لانه على طول وياها يعني حاولت تكلم ابوه بس ما يطول ينزل الاغراض ويمشي وزوجها موجود كلمته ضربها و شتمها ما تبي يتكرر الموقف تحس نفسها معزولة عن العالم و فعلا احس زوجها مو طبيعي يوم ازورها تخيلوا كل شوووووي يطق الباب يناديها !!! يعني طرده لي يبيني اطلع بسرعه وما كنت عارفة بوضعها جات زيارتي لها صدفة يوم مريت بالمنطقة الي ساكنه فيها يعني لو يعرف اني بزورها يمكن يقفل الباب ولا يبطله هي تخاف يسوي فيها شيء تقول مو طبيعي ساعات بس يصرخ لحاله !!! هي متاكدة في حاله نفسية بس تبي الحل الله يعينها بس و آخر مرة قالت له امك برها و صل رحمك على الاقل قالت له خلنا مني انت واجبك اهلك قال انا لقيط ما عندي اهل !!!! صدمها وقامت تبكي قام يضحك يقول امزح صدقتي !!!!!!! تعبت منه ما تقدر تتحمل الوضع ربي يصبرها بس أختكم بحرانيه كول |
شي غريب
أظن والله أعلم إن الرجل مريض نفسيا .. وبما أنه منعزل عن الناس كيف مدحوه وهم ما يختلطون فيه ؟ كان من المفترض إن السؤال عن الرجل يكون بشكل موسع .. ولا يكتفى بكلام شخص أو شخصين أفضل حل فيما يبدو لي إقناعه بالذهاب لطبيب نفسي والتأكد من عدم وجود مشكلة |
باين انه عنده مشكله نفسيه .. يصرخ لحاله !! ومعزول عن الناس!!! وحابسها معاه!!!
بأي شكل تبتعد عنه وتقنعه من بعيد انه يتعالج ... تبتعد عنه لانه خطير ... الله يريح بالها يارب ... |
هلا فيكم
تسلمون على الردود والله خالها رجل كبير وسال عنه و الناس اغلبهم ما عندهم امانه للأسف ما اعمم ومدري شنو ظروف زوجها قبل تاخذه بس فعلا هو مريض نفسيا البنت يتيمة و جاها نصيب و اهلها يمكن استعجلوا بالموافقة بس سألوا عنه الناس ذكرته بالطيب يمكن الناس تتكلم بسبب مكانه ابوه يعني يقولون على تربية ابوه و التزام اهله لاني اعرفهم ناس اجاويد مشكورين على دعواتكم وحلولكم قلت لها تبتعد عنه بس قالت مالها حد وهي تعزه رغم كل شي وتبي تصبر عليه و هي دوم تدعي له فعلا هو خطر عليها و تراني من زرتها قلقانة عليها ربي يهديه و يصبرها و يحميها من كل شر أختكم بحرانيه كول |
السلام عليكم ...
ممنوع الزيارات لأهلها أو اهله .. لا يوجد بينهم اي حوار.. العلاقة الزوجيه محدودة... لا يعمل ولا يصرف عليها .. يضرب ويشتم .... يصرخ بدون سبب .. سؤال ؟؟؟؟ هي ماذا تفعل معه الى الآن ؟؟؟؟؟؟؟ عليها أن تهرب الى أمها وياليت في بيت ما يدري وينه لأنه لا يمكن التنبأ بتصرفاته اذا تركته ... الله يحفظها ويكفيها شره ... |
خلها تحاول تسأل اهلها و تاخذ تفاصيل دقيقة عن يحاته قبل ان تتزوج
اذا حست انها ما تقدر تستمر ....فالتنفذ بحياتها باي طريقة والله يعينها |
هلا وغلا
مشكورين ما قصرتون على دعواتكم الطيبة لها هي جالسة تنصحه و تحاول فيه يرجع طبيعي ربي يعينها صعب تروح مكان جدااا لانه ما يرضى احد يجيهم ولا يروحون الى احد يعني شبهه مقطوعه من العالم ولو بتشرد مستحيل يمكن لانه معاها بالبيت 24 ساعه ما فيه مفر منه قلت لها حياتكم مستحيلة بالنمط الحالي لازم يتعالج ربي يعينها و يوفقها ويهدي زوجها او يفكها من شره أختكم بحرانيه كول |
حالة صعبة جداً متقفلة من كل ناحية..
الله يعينها وييسر أمرها.. الدعاء الدعاء والاستغفار الاستغفار.. يشرح صدرها ويزيل غمها ويفرج همها.. |
ابتدي بالصلاة على الحبيب محمد
اللهم صل على سيدنا محمد وعلى ال سيدنا محمد حبيبتي بنت بلادي ماصعب حالة اخيتنا "صديقتك" لا املك لها سوى الدعاء والفرج من هذا السجن المخييف الله يفرج لها ويبدل سوء حالها الى افضل حال واما زوجها الله يهديه ويكف اذاه وشره عنها ويسكنه الى خير لازم يدور شغل اهي لو تقنعه بالشغل على الاقل ترتاح منه وقت مايكون مداوم او يعمل الله يهون عليها ماصابها ان شاء الله الله كريم [warning]حكم الدعاء بجاه النبي صلى الله عليه وسلم ( لا يجوز )[/warning] |
لايسعني الا ان اقول الله يهديه ويصلحه ويعينها ويفرج همها يارب ياكريم
|
الله يفرج همها سبحان من صبرها سنة على هذا الإنسان
كيف عايشة كل هذا معاه؟ لازم أحد يتدخل من أهلها أو أهله الله يفرج همها يارب |
إن لم تكن هذه أسرار بيوت ... فلا توجد أسرار في العالم أبدا ... لي عودة _ بإذن الله _ للتعقيب على هذه النقطة التي للأسف لم يتطرق لها احد ... وهي طامة من الطوام ... دمت بحفظ الرحمن .... |
اختي الكريمة : بما أنه هذه المشكلة تخص صديقتك فإن طريقة الطرح لها تحتاج الى رؤية خاصة .. قرأت بين سطورك هذه الصفات للزوج : ( اناني - قاطع رحم - بيتوتي - عابس - غيور - مقصر مادياً - لايعمل - غير ملتزم ) وجميع هذه الصفات لاتظهر عندما يتقدم الخاطب الى مخطوبته ..وبالتالي فإن معرفة اهل الخطيبة للخاطب تكاد تكون محصورة فيما يسمعونه عنه ..ولكن الوم خال صديقتك بشدة لأنه فرط في جانب السؤال الحثيث عن اخلاق الشاب من خلال اقاربه وجيرانه ومن حوله لاسيما وانه غير ملتزم (وهنا قد لايكون لشهادة اهل المسجد دور) وايضاً لايعمل ( اي انه لايوجد لديه زملاء بالعمل ) .. اما صديقتك فهي : ( مرحة - متفائلة - يتيمة - وحيدة اهلها - ملتزمة - حافظة للقرآن ) فأي تناقض اكبر من تختار وترتضي لنفسها رجل اقل مايقال عنه انه غير ملتزم ؟؟ وهناك مشكلة اخرى وهي أن هناك من كان يمدحه ويزكيه لديكم عند السؤال .. فمن هم هؤلاء ؟؟ إنهم بالتأكيد قوم لايظهر لهم الا ماظهر لكم انتم من الشكل الخارجي ..فلن يعرفوا موضوع المرض النفسي هذا ولا قطيعته للرحم ولا انانيته ...الخ مادام انهم لم يعاشروه .. اما صديقتك فقد اكتشفت كل الصفات السيئة بزوجها بعد الزواج ..وهنا اتساءل ..الا يوجد صفات اخرى حسنة فيه تستطيع من خلالها ان توازن بين خيره وشره ؟؟ قرأت موضوعك وردودك على الاخوة فيما سبق وتخيلت سلبية صديقتك امام زوجها الى درجة انهار فيه زواجها .. وتقع سلبيتها في التعاطف المبدئي لقناعاته الخاطئة مما جرأه على التمادي بها .. كل المتزوجون يعلمون بأن الزواج شراكة ولابد ان يكون هناك فعل و(ردة فعل) لكل خلاف زوجي .. فهل من الممكن ان يكون مايقوم به الزوج مجرد ردود افعال ؟؟ كل هذه التساؤلات تجيب عليها صديقتك فقط .. مع دعواتي لها بالتوفيق |
الله يصبرها احسه مستعبدها مومتزوجها
طيب ليه ماتكلم طبيب نفسي وتشرحه حالته يمكن يفيدها بطريقة التعامل معه وترتاح الله يريح بالها |
نسأل الله العظيم لها فى هذه الليلة المباركة أن يفرج الله همها ويهدى زوجها ويشفيه ولكن لا بد لها من مخرج. من كم سنه هم متزوجين وهل لديها اطفال منه وما مستواهم العلمى ؟
|
أسأل الله تعالى أن يفرج همها
|
الله يصلح حال زوجها ان شاء الله
والله قصة محزنة فعلا مسكينة بس مثل ما قلتي اختي بحرانية كول احنا في شهر رمضان وعليها بالدعاء وان شاء االله ربي يوفقها بس بيكون زوجها مريض نفسي وربما حتى اهله عندهم علم لأن مش معقولة فيه اهل ابنهم لا يزورهم ولا يزوروه؟ ويبعثوله مصروفه واكله كل شهر؟ فيه شي مو طبيعي بالموضوع |
هلا والله بالجميع
منكم السموحة على التأخير بالرد تعرفون رمضان و الناس كلها مشغولة الله لا يشغلنا الا بطاعته يا رب مشكورين على دردودكم الي تبين طيبتكم ووقفتكم مع صديقتي والله لي يومين اتصل عليها بس محد يرد و خايفة عليها وااايد الله يسهل امورها و يخفف عنها هالهم و يكفيها شره بصراحة مقصرين اهلها بالسؤال عنه و انخدعوا بالظاهر بس و هي مالها احد تعتمد عليه في السؤال عنه صار كل شي بسرعه وقالوا ليهم انه ملتزم وهذا اصلا كان شرطها الوحيد بس انصدمت تقول منه و عن السؤال والله مدري شلون خالها سأل منو بالضبط بس هي انسانة تخاف الله و تبي تحاول تصلح وضعها مع زوجها ما قالت لي اذا صار خلاف منها او موقف الزوج رده فعله عليه جذيه وهي انسانة مسالمة ما اتوقع فعلت عمل يخليه يوصل الى هالدرجة و الله العالم اهله وش مخبين الصراحة حالتها ما تسر لا صديق ولا عدو و بالنسبة تتصل لطبيب نفسي صعبه هو معها على طووووووول و بالنسبة للشغل ما سألتها اذا فاتحته بالموضوع بحاول اتصل ليها هالفترة و اخذ اخبارها وانقل لها ردودكم ما قصرتون و أخوي هذي ما توصل أسرار اذا طلبت المساعدة هي محتاجة من يعينها و يفكر بتفكير ينفعها ومو عيب اطرح مشكلتها والأعضاء ما قصروا الصراحة من الدعاء و الحلول و بشوف شنو يصير و مشكلة كبيرة هذي ما توقف عند حد كونها سر لا يجب افشائه اصلا الغلط انها طول هالمدة ساكته بس هي مكسورة تحس حالها مالها الا الله ثم والدتها وخالها كبير ... الرحمة زينة ومشكورين كل من رد كلن بأسمه وربي يجزاكم كل خير أختكم بحرانيه كول |
تو انتبهت الى اسئلة جديدة
لهم سنة متزوجين ما عندهم عياال و مستواها هي ثانوية عامة وهو الله العالم ما سألتها أختكم بحرانيه كول |
اختي الحل بالتوجه لله سبحانه
لتدعي الله ان يسخره لها ويهديه ولتشغل قرآن في البيت حتى تهدأ الأمور الظاهر والله اعلم ان زوجها اختي مرت عليه ظروف جعلته يحتاط من الناس انا اعرف قريب لي كان طبيعي وعند زواجه الناس أذته ولكنه لم يخبر زوجته ،ففضل الأنعزاال فلتتوجه لله سبحانه وتقرأ قران وتعامله بحسنى عليها بالصبر والدعاء ولاحول وقة الا بالله وهو خائف على بيته من شي ربما مخبىء او من موضوع سمعه فيه سبب حسبنا الله والنعم الوكيل |
هلا والله اختي
الله يهديه يا رب ويصبرها هي ما تقصر بالدعاء ومشكورة على التوضيح يجوز والله بسألها أكثر عن وضعه اذا ردت هذا اذا قدرت تقول لي شي بالتلفون افكر ازورها مرة ثانية مشكورة على دعواتج اختي ما قصرتين أختكم بحرانيه كول |
اختي الرجل ربما حتى لم يخبر زوجته،لأن كثير للي يتعرضون للمشاكل ينتج عنهم تصرفات لا يفهمها حتى اقرب الناس،هذا زوجها فلتصبر وتلجأ لله سبحانه
|
لاحول ولاقوة إلا بالله هذا مريض نفسيا الله يفرج كربها ويسخره لها مثل الماء إذا انحدر من الجبل عليها بالصبر والدعاء وإذا لم تستطع تخبر اهله حتى وإن كان هو موجود 0
|
هلا بكم جميع
عندي لكم آخر المستجدات اتصلت البيت رد هو قلت السلام عليكم رد السلام علي و قال نعم قلت ابي فلانة لا هنت نادها لي قال مشغولة الحين قلت معليه بنتظرها على السماعه قال لحظه اناديها و جاتني صديقتي و بعد السلام قلت طمنيني شخباار الوضع عندج صديقتي ضحكت وقالت الحمدلله ابشرج ابشرج قلت الحمدلله من ضحكتج فيه تطور اكيد قالت يوم طلعتي جاني وتكلم وياي شنو قلتي لها وش سالتيني و اخذ تحقيق وياي و قررت اواجهه قلت له اني خبرتج بحالتي و شرحت له من شنو اعاني وهو طول الوقت يطالعني كنت مرعوبة قلت اليوم بيذبحني يوم خلصت و بينت له اني ابي اساعده واني عون له و خبرته كلامج اني لازم ادخل الأهل و يتعالج وكل شي نزل راسه وبكي تخيلي كان يبكي مثل الي فاقد عزيز استغربت حالته وندمت اني كلمته بس بعدين حظني و تأسف و لا كأنه زوجي البارد القاسي انسان جديد تقول اعتذر مني و قال لي السبب لحالته تخيلوا يا أعضاااء شنو قال لها وربي عذرته يوم قال السبب امها ما هي امه ( زوجة ابوه ) وابوه الله تزوج عليها و جابت بس زوج صديقتي وماتت الله يرحمها ومن يومها زوجة ابوه تناديه اللقيط و الفاظ ما يستحملها بشر وتعامله معاملة الحيوانات ما يتعاملون بالطريقة هذي وربي وهي تحكي لي بكيييييييت معها و الله حالته صعبه كانت من جذيه تعقد وكره كل الحريم و قاطع الكل لانه بدون شخصية ما كانت تخليه يلعب حتى مع اخوانه عزلته و ابوه ضعيف شخصية همه زوجته ما رحم ولده ويوم كبر ولده يبي يعوضه عن المه اخذ له بيت و يصرف عليه ومتكفل بكل شيء علاقته شبه منعدمة بالعالم من يوم صغير تعلم الى ابتدائي بس وما قدر يواصل من وضعه الصعب جداا اول الفرج الحمدلله الليلة ولأول مرة بيروحون مطعم تخيلوا تعاهد لها يتغير تدريجيا وهي تساعده وتتحمله بس دامه وعدها يعني ان شاء الله خير و كلمته عن الالتزام وقالت له في شهر الخير رمضان اجعله شهر توبة من جميع ذنوبك و قوي ايمانك بالله و بتساعده كل يوم على حفظ ما تيسر من القرآن وبتخليه يشاركها الصلوات و الأدعية و ربي يوفقهم ويتقبل منهم والله وهي تتكلم لي دموعي تجري من الفرحة لها عانت وعانت بس بالاخير بصبرها نالت مرادها قال لها بعد تعزمني وامها على فطور بادرة خير و قلت لها بخلي اخوي يجي معه ويحاول يخلطه بالمجتمع رجال مع بعضهم بيفهمون لبعض واخوي دارس علم نفس يعني ان شاء الله بيقدر يتفاهم مع شخصية زوجه بحذر والله خبرتها عن المنتدى والي قلتوه وفرحت و قالت لي اماااااانه تبلغيهم السلام و الشكر و تقول ما بتنساكم من دعواتها والله فرحااااااااانه الحمدلله الحمدلله الحمدلله الحمدلله الله يهنيها يا ربي و يتمم لها على خير و يهديه يا ربي أشكر كل من رد على الموضوع ما قصرتون وربي جزاكم الله كل خير و حبيت افرحكم بفرحة صديقتي وفرحتي أختكم بحرانيه كول |
ياحبيبتي يابحرانية والل تفاعلت مع مشكلة صديقتك الله يعطيج ثواب واجر فيها
الحمدلله الحمدلله الحمدلله عطاياه جزيلة نعمائة ممتدة ولا يخيب سائله ولا ينفذ نائله سبحانه من رب كريم فررررررررررررررررررررحانة وااااااااااااايد لها الله يهدي سرهم ان شاء الله ويسخره لها ويسخرها له ويهديه ويوفقهم في حياتهم خيو خليها هالفترة تأجل مسألة الانجاب لانه راح تحصل تغييرات كثيرة ومشاء الله عليها باين عليها صبورة خلها تنشغل فيه والله لها ثواب جزيل فيه خطوتها حلوة تبتدي معاه بالقرأن والادعية والصلوات الله يوفقهم ان شاء الله لليلة القدر الشريفة ويعطيها ربي سؤلها وماتمنت وزيادة بعدين بعد العيد خل تحاول فيه يكمل دراسة وتتعهد بانها تساعده وتفتخر فيه وبشهادته خطوة خطوة ان شاء الله ويتغير للافضل وتخليه بعدين يفكر بالعمل المستقل علشان يكون شخصية قوية مستقلة عن ابوه وله سمعة وهيبة خله تحسسه بهالشي وتجعله كبير دايما بنظرها علشان يتشجع ياختي والله مادري وش ابي اكتب واقول فرحاااااااااااانة واااااايد الله يغير حالهم الى افضل حال وييحفظهم بعنايته ذات اليمين وذات الشمال ويرزقهم من خيري الدنيا والاخرة مالا يخطر لهم على بال ووصلي لها سلامي ووالله والله اني ماراح انساها من دعاي القلب داعي لها ولج يالغلا |
الحمد لله رب العالمين
|
هلا وغلا بالغالية دمعات الروح
تسلمين وربي ردج افرحني كثيرا والله يشهد مشكووووورة يالغلا على تواصلج ودعواتج ما قصرتين اي والله الحمدلله الحمدلله ربي ما يسنى عباده و يستجيب لهم موب عارفة شلون أعبر عن شكري لج ولكل من رد بالموضوع والله فرحتج معنا تسوى عندي وااايد وقفتج بالدعاء ما قصرتين الله يسهل امورج ويحقق كل مرادج يا رب و يرزقج من واسع فضله ان شاء الله بخبرها بنصيحتج و هي ان شاء الله ما بتقصر وياه بتوقف وياه واكيد وضعهم بيتصحح كله بأذن الله خطوة خطوة بالأول التزامه و تخليه يطلع و يكون شخصيته من جديد ويخالط الناس و بعدها بأذن الله يشتغل ويدرس و هذا الي بخبرها عليه مشكوووووورة والله ما قصرتي جزاج ربي كل خير ان شاء الله وربي موب عارفة شلون أشكرج بنت بلادي فديتج ما قصرتي ان شاء الله اذا رحت لها يوم العزيمة ببلغها سلامج وتسلمين على دعوااااتج وهي ان شاء الله ما بتنساكم كلكم وتراني معها بدعي لكم الله يوفقج و يسهل امورج يا ربي و عسى الفرحة دووووووم أختج بحرانيه كول |
هلا والله اخوي ابوفراس النمري
مشكور على مرورك الطيب جزاك الله كل خير أختك بحرانيه كول |
ما بكول غيييرررررر غرييييييييييييييييييييييببببببببببببببة بعد معاناة سنة الحين تذكرت تصارحه
|
هلا والله بك يا خوي الفلوجة
هو يعرف وضعه و يعرف المعاناه الي هي فيها وكتبت لكم من قبل هي كلمته عن زيارة اهله وامها و كلمته يروح لطبيب نفسي يتعالج بس هو ضربها و شتمها من جذيه صبرت و ما رجعت تفتح الموضوع وياه بس الحمدلله تمت المصارحه بينهم و فهمته وهو الحمدلله استوعب الأمر وعدها يتغير وهي بتكون عون له بالتغيير فالمصارحة موجودة من قبل بس الحين فيه تقبل لحل الأمر من زوجها مشكور على مرورك و ان شاء الله وضحت لك الصورة الحين دعواتكم لها ربي يتمم لهم على خير و تعيش بسعادة أختكم بحرانيه كول |
الحمد لله الذى بنعمته الصالحات . أختى الغالية استفدت من موضوع صديقتك ثلاث أشياء هامه
أولا لا بد من المصارحة والمكاشفة من قبل الزوجين حتى لا تتفقاقم الأمور ولا بد أن يعى كل طرف ان الطرف الآخر لا يعلم الغيب فلا بد من المصارحة ثانيا يجب على أعضاء منتدانا الغالى التريث وعدم إصدار أحكام متسرعة فمعظم من رد حرضها على الطلاق وهذا لا يجب ثالثا لدى اعتقاد قوى ان دعوات الأعضاء الكرام لها بتفريج همها فى هذه الليالى المباركة كان له أعظم الأثر فى حل المشكلة |
هلا وغلا ومراحب أختي الغالية
مشكوورة على تواجدج بالموضوع فعلا كلامج و الأعضاء بدعواتهم الطيبة ما قصروا جزاهم الله خير أبشركم طلعوا المطعم و صج شي غريب عليه و ما تعوده بس هي ساعدته و حاولت تلهيه بالكلام و عدت الليلة على خير تقول لي انبسطوا و بعد وعدها يكررون الطلعة وهي فرحاااااانه صار يصلي الحمدلله كل صلواته و يتكلم معها بأمور الدين و بدأت معه التحفيظ للقرآن الكريم ربي يوفقهم ويسعدهم والليلة طبخت لنا هذاك الفطور اللذيذ تسلم يدينها رحت لها مع امها العزومة الي دعتنا لها و شفت التغيير الكبير نفسيتها الحمدلله عااال العال ربي لا يغير عليها ان شاء الله فرحااااااااانه كثييييييير بردودكم والله ودعواتكم تراني نسخت الردود وطبعتها و حملت الأوراق معاي لها لانها ما عندها كمبيوتر ونت أخوي بعد ما طلع من عنده عطاني تحليل لشخصيته قال صعبه شخصيته بس يحتاج رعاية خاصة وهو ما بيتركه بأذن الله نتائج الزيارة الحمدلله تطمنت على صديقتي و شافت أمها بعد انقطاع وربي نزلت دموعي يوم لقيتها تحضن امها وتبكي و الام تبكي الله لا يفرق أحباب ولا يبعدهم عن بعض يااااااا ربي و أخوي لزم على زوجها يجي عزومة بالبيت عندنا وافق وهذا دليل انه ارتاح مع اخوي الحمدلله بصيرون ربع يعني الحمدلله بداية تطور بحياة زوجها للأحسن بأذن الله مشكوووووورين كل الشكر جميع اللي رد على الموضوع وسامحوني اذا ما قدرت أرد على الباقي لاني بكون مشغولة هالفترة الله لا يشغلنا الا بطاعته يا ربي ويوفق الجميع ويحقق مرادهم يا رب تشكركم صديقتي واااااااااااااايد على وقفتكم وياها بالدعاء أختكم بحرانيه كول |
زوجها مريض نفسيا
اذا قدرت مره تزور امها تجلس عندها وماترضى تطلع وتخلي خالها يدخل بالموضوع ربي ييسر امرها ويعينها |
اهلين أختي توتة وزوجها
مشكورة على الرد بدعوتج لها ما قصرتين بس زوجها في طور انه يرجع انسان طبيعي الله يهدي سرهم ويسعدهم يا رب اختي هي قررت تظل معه وتساعده في العلاج الله يوفقهم ويسهل أمورهم و يفرحون مع بعض وبالنسبة للزيارات الحمدلله وافق وتو تفطرت و امها عندها أختج بحرانيه كول |
الحمدلله
هذي البدايه ان شاء الله نحو العلاج |
بعدد حبيبتي
انصحيها تلتزم دايما الاستغفار وتدعي الهم يا حي يا قيوم برحمتك استغيث اللهم اصلح لي شاني كله ولا تكلني الى نفسي طرفة عين وبما ان المشكلة عندها بدات تنحل خليها تلتزم بالصبر وتحاول انها تحط في باله ان ينشغل شوي شوي بأي حاجة هو يحس ان ممكن يفيده او يحبه ممكن طلعة للنادي او ياخذ دورة انجليزي او كمبيوتر وممكن دراسة او يبدأ يروح لابوه وينشغل بعمل معاه الله يوفقها ويسعد قلبها يااااااااااااااااااااااااااااارب |
هلا وغلا ومراحب مليااار فيكم
تسلمون خواتي على ردودكم الي تثلج الصدر ان شاء الله ربي يوفقهم ويهديهم و يرتاحون بوصل لها نصائحج أختي مرميس وربي يرزقج الذرية الصالحة يا رب مشكورين على وقفتكم وياها وان شاء الله ببلغها كلامكم الحمدلله بداية خير لزوجها واتمنى يواصل هالطريق وهي بأذن الله ما تقصر بالدعاء و الاستغفار مشكورين وجزاااكم ربي كل خير أختكم بحرانيه كول |
| الساعة الآن 08:16 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©