ماذا تفعلين اذا أم زوجك لاتقدرك كتقديرك لها؟
 

السلام عليكم
بصراحه بطرح عليكم تساؤل يمكن الاخوه الاعضاء من الذكور راح يستهيفونه بس كالعاده احنا النسوان نكبرها ونسويلها سالفه! الموضوع اذا لاحظت واتأكدت انه خالتج مب مسويتلج سالفه ولا اعتبار أعطيكم امثله يعني اذا صارت اجتماعات ولا زيارات فيها أداء واجب وانتي معاها فنفس البيت ولا تعلمج وتسمعين بالصدفه وحتى في الجلسات العائلية نادراً ما تعطيج وجه في السوالف (مب كره بس لاني مب على هواها) واحيانا تكونون قاعدين بس انتي وياها بروحكم بس تطلع منها الكلمات يالله بالقوه تسحبينها سحب منها وفي نفس الوقت انتي تقدرينها وتعزينها (على شان زوجج) وما تقصرين في السؤال عنها وفي العطايا وتحاولين تبنين حوار معاها يعني شاده حيلج عالآخر معاها وهي كما هي بس معاج والعكس هو الصحيح مع سلفتج يعني علاقه قويه حب سوالف وضحك واذا كنت معاهم في الجلسه محد يعطيح وجه
بالله عليكم اش بتسوون لو كنتوا مكاني! يعني لو معاملتها مع الكل بسكت وانطم بس العكس تماما مع سلفتي وجدام عيوني!!
يعني أحقر والله ما اقدر أعامل بالمثل بعد ماقدرت لانه اعتقد مب فارقه معاها بتقولون يمكن لي مواقف والله ما سويت الها غير كل خير ولا سلفتي مثلاً تسويلها زود عن الي اسويلها اياه بس ما أدري ليش بس للأمانه اهي تحب عيالي وانا كذا مره سألت زوجي وش سبب برود امه تجاهي وأحكيله مواقفها الي تنرفزني وتقهرني ويقول والله ما أعرف المسكين يحتار وينحرج ويقول معقوله:25:
أنا ما أبغي احسن علاقتي فيها لأنه مافي أمل يعني عن جد جاملت ونافقت والنتيجه واحد تجاهل ويالله تجاوب خفيف انا أبغي حل يفكني من هالتفكير ويخليني ما افكر فيها وأعتبرها مب موجوده فحياتي يعني مثل ماهيه مب مسويتلي اعتبار انا بعد ليش احرق اعصابي بس ما اقدر كيف؟؟ الكلام وايد سهل بس التطبيق صعب انا حساسه شوي شوروا علي!

المعذره تم تحويل العنوان للفصحى
الاشراف

انا حقولك عن تجربتي تقريبا نفس تجربتك يعني حماتي ما تحكي معي كتير وما تعطيني بوجه متل ما بتحكي مع سلفتي وما وما بس انا ما بكرهها ولا متضايقة اولا لاني يمكن انا ما اعرف افتح مواضيع مع حد جديد على وهي بالرغم من انها مرت عمي الكبير بس عمري ما صار بيني وبينها حديث بحكم اني تربيت برا وما عشت معاهم وسلفتي متزوجة قبلي 8 سنوات والحق يقال حماتي ما تفرق بين عيالنا وتحبهم كلهم انا اتعامل اني المهم ما اكون مقصرة معهم يعني بالهداية ما اقصر زي ما اجيب لامي اجيب لها واني اكون صاحبة واجب اذا زارتنا يعني اعيشها اميرة ومش مهم حكت ولا ما حكت يمكن احسن انها ما تكتر حكي ههههههههههههههههههههه لاني الحين الي سنتين متزوجة وعمرنا زي ما حكيتلك ما تبادلنا اطراف الحديث يمكن احكي مع عمي اكثر منها بس المهم عندي اني ما اكون مقصرة والباقي عادي و عشان عيون زوجي تكرم مرج عيون

الله يعينكم وويوفق حالكم...


أحسن لك إنك ماتفكري فيها زيادة...


وعلى قول القايل خليك بعيد حبك يزيد...

الأخوات الي ردوا مشكورين ما قصرتوا
الأخت hanamusaba بس انتي عرفتي السبب عالأقل انا ما عرف سبب هالجفوه الي خلقتها وانا الي احاول ارممها

الفهدي مشكور على مرورك يمكن تكون حاسه جذيه بس أنا أبداً ما حسستها ولا أحاول أحسسها والله شكلي الحين بشتغل بهالنقطه وبقهرها اذا هالشي يقهرها! تخيل انها تتظاهر للحين انها تنسى اسمي اذا تكلمت عني أو نادتني مع ان اسمي مب أجنبي ولا صعب انها تنساه أو تقول هذي بدون ذكر اسمي كأني شي نكره:(

نصيحة لك عامليها مثل ما تعاملين والدتك واحتسبي الأجر وسوف ترين النتيجة

أكلمك عن تجربتي مع حماتي في البداية كانت رافضة أن ابنها يتزوجني لكن تزوجنا والحمد لله

بدأت أعاملها مثل والدتي أو أكثر تغيرت حماتي وأصبحت تحبني مثل ابنتها وصارت تتكلم عني بالخير

وماتت وهي راضية عني والحمد لله

والله كده اريح

ابعد حبة تزيد محبة

ماله داعي توطيد العلاقة فيها

أهل الزوج بالذات لازم تكون العلاقة بينكم رسمية مهما بلغت المحبة في القلوب

لانك رحتي ولا جيتي بتظلي زوجة ولدهم مستحيل يعاملوك مثل بنتهم

زوجة ولدهم ينتظروا منها اهتمام ببيتها وولدها ... الخ

لكن أهلك بالعكس هم يساعدوك لو قصرتي في بيتك ولا يعيبوا عليك

هذا مثال بسيط

عشان كذه الافضل صدقيني انه علاقتكم تكون رسمية

الدخلة الزايدة في أهل الزوج غلط وأكبر غلط

وأنا أكبر مثال قدامك .. بس الحياة علمتني .. وشوفيني قافلة على نفسي بابي ومريحة بالي

لاتقارني بينك وبين سلفتك .. أهم حاجة زوجك مبسوط منك ولا عليك في أهله ولا غيرهم

موفقة

ألف شكر لكل من رد علي ونصايحكم باخذ فيها بعين الاعتبار وبحاول أطنش بس بقولكم آخر ردة فعل الها انها نادتني باسم الخدامه!! بس ودي بتفسير ليش ليش معقوله في ناس ما ترتاح لناس بس بدون سبب حتى لو الطرف الثاني ذابح نفسه في التقرب وتقوية العلاقات يا جماعة أنا معاها فنفس البيت من أربع سنوات وللحين مب بالعتني كل شي يقول جذيه

هذا هو السبب

طنشيها صدقيني بترتاحي

فيه ناس كده تجري وراها تعافك .. لكن تثقلي عليها يجروا وراك

حافظي على كرامتك .. ولاتذلي نفسك .. ومصيرها تعرف قدرك ومحافظتك على ابنها ورعايتك له

يا قلبي الي يبيعك بيعية لا تركضين وراها وش تبين فيها الله لا يردها

أحسن حل وجدته التطنيش وتمشية الأمور ..

أتمنى أتخذ هذا الموقف ..
فيه ناس يقدرون اللي يعجبهم يسمعوه وإلا ما يعجبهم ما يسمعوه ولا يأثر فيهم ..
ما شا الله تبارك الله أتمنى أني أكتسبها تخلي الوحدة مرتااااااحة ولا يأثر على حياتها مع زوجها ولا بحياتها العامة ..
وألاحظ أنو هالطريقة مع كل من يريد أن ينال منك أو يزعجك أو يستفزك راااائعة وتخليه ما يحاول يعيدها مرة ثانية .. إلى أن ييأس منك ..


أحاول تدريب نفسي على ذلك

عن جد أثلجتوا صدري بردودكم والله خفف عني الشي الكثير:22: أنا بادية في الثقل الي كلكم اتفقتوا عليه وبشيلها من بالي :18:

فعلا اخيه عاملها كذا وبتتغير ان شاء الله للاحسن وفعلا فيه كثير من الامهات يغاروا من زوجات ابنائهم لانهم يحسوا انهم اخذوا اولدهم منهم وبطريقة تعاملك معاه كانك تتعامل مع امك بتكسبيها وتصير اتعدك من بناتها وهذي طريقتي مع ام زوجي والله يوفق بينكم يارب