|
زواج طليقي هل أحضر ؟
السلام عليكم ورحمة الله وبركاته
كيف حال الجميع ؟ عساكم بخير وصحة وسلامة تراه معرف صديقتي و كتبت لكم منه موقفي منطلقة مثل باقي خواتي المنطلقات و عسى الله يوفقنا كلنا يا ربي :) اتمنى ترحبون فيني في عالمنا الخاص للمنطلقات و تدعون لي بالصبر والهداية الموضوع واضح من العنوان طليقي يصير قريب لي جدا من الأهل و أهله اتصلوا بخالتي و قالوا لها تخبر الوالدة عشان يخبروني بالخير يراعون مشاعري على اعتقادهم و خالي ( ابو طليقي ) و عمتي ( ام طليقي ) منحرجين من الموقف ما يبون يقولون لنا فعطوا السالفة خالتي توصلها لنا بطريقتها المهم جاتني امي البارحة وخالتي و يقدمون ويمهدون فديت روحهم للسالفة توقعوا بصيح و بزعل و حالتي بتنعفس بس العكس صار أول ما سمعت الخبر ابتسمت وقلت اوه مبرووووك الله يتمم له على خير صادني تجمد في المشاعر مدري هي مرجلة انكار للموضوع والا شنو !! بعدين قمت اضحك و عادي وقلت لهم تروحون الحفلة و تتجهزون عشان يعرفون انكم من أهل المعرس و الفرحة العائلية لازم تصير و لا نبي أحد يشمت فينا و يقول افترقوا وتخاصموا الأهل والموضوع ما يسوى انسان طلقني و تزوج كل هذا قسمة ونصيب و تراني راضية بحكمة الله تعالي و أكرر و أقول عساه عن صلاح لي هذا الطلاق رغم اني كنت احبه بس الظاهر كان حب من طرف واحد وهو اللي تقدم لي بدون ما اصرح بحبي كنت كاتمته واتمنى يصير من نصيبي و صار و خطبنا ( عقد القران بدون دخول ) و بعدها بفترة تطلقنا و السبب للحين مجهول بالنسبة لي !!! صج اذا يسألوني ليش تطلقتي مدري شقول مع ان القرار طلع من الأهل تخيلو وقت نقاش حاد لانه طليقي ما كان يهتم فيني من كل النواحي العاطفية و المالية و هذا متعارف عليه في ديرتي وقت عقد القران الزوج يتكفل بكل شيء للزوجة بس لقيت عدم مبالاة ويوم كلمته ما شفت نتيجة وحتى حسيت مو مرغوب فيني مع اهله اللي هم أهلي بالدرجة الأولى و صار نقاش مع كبار الأهل و الظاهر احتدم النقاش و خالي قال لولده يا تطلقها يا منت ولدي و رحنا المحكمة و صار الطلاق و الحمدلله على كل حال ما كنت في مرحلة نضج كاملة كان عمري 15 سنة في أولى ثانوي و الحين ما شاء الله صار عمري 20 سنة و ادرس بسنة ثالثة أنجزت جزء من طموحي الدراسي اللي كان ممكن يتوقف لو تزوجت من كذا اشوف الجانب المشرق من الموضوع انه الله عوضني بشي وهو دراستي و الله يوفقني و أكملها على خير يا ربي دعواتكم لي و ليش توقعت يوقف لانه طليقي طالع من المدرسة من صف رابع ابتدائي ما كان فيه توافق فكري بس تفكيري وقتها مراهق بالحب و خرابيط المزيفة لمفهوم الزواج انه طلعات وكلام حلو بس و اسثنيت المسؤولية بس الشاهد الله كنت ما أقصر على اللي افهمه اسويه له ما خليت هدايا و ترتيب و تعدل وتكشخ و حتى طلعاتنا اطلب من اخوي يعطيه السيارة و اخذ فلوس من ابوي عشان نطلع يمكن هني الغلط مني بس شفته ضروفه المادية ما تسمح و ابي اطلع معاه نستانس قلت بحاول ويمكن يقول بعضكم جرحتيه بالتصرف بالعكس حاولت تجيه بطريقة غير مباشرة قلت الى اخوي يروح يودي السيارة له و يقول له خذها الليلة و الفلوس عطيتهم عمتي وقلت لها تقترح عليه منها يعني تجي و يكون باعتقاده انه مالي بالسالفة يد إن كيدهن عظيم بس صج شسوي فيه تعبت حسيت حالي اجدف بسفينه زواجنا بروحي و بنغرق فقررت المواجهه و ما كان قدها ولا يبي يتغير فتطلقنا مو هذا موضوعي خرجت بذكرياتي معليه بس لب الموضوع ليلة الحفلة عندي امتحان نهائي و ما راجعت له شي و ما عندي وقت اراجع لانه لازم الاحد عندي امتحان و الاثنين لازم اسلم بحث كبير و وصلت فيه شوي بس و الثلاثاء الامتحان النهائي وهو خطوبته ليلة الثلاثاء يعني ما بقدر اروح و خوفي من كلام الناس اللي ما يرحم ما ابي احرج الأهل و يقولون ابتدأ الخصام و القطيعة ولا أبي يقولون لانها تحبه للحين زعلانه على زواجها و تراني يعلم الله اتمنى له التوفيق وكل الخير ابي اروح و اقطع كلام الكل و اعرفهم مدى قوتي وثباتي في هالأمور و ان تربية ابوي الله يخليه ما راحت عبث واني واصلة رحمي وما تفرقنا هالأمور اقتراحكم و ارائكم وهل طبيعي احضر لانه صديقات قالوا لي بتروحين خبلة ومدري شنو الكل بيطالعج و بيتهامس عليج و بيشمتون فيج وبتتحملين الوضع و ناس قالت لي روحي وتعدلي و اضحكي و لا عليج من الناس لا تخليهم يشمتون فيج و اعتبري هذي الحفلة نهاية الى ذكرياتي واجهي واقعج و تخلصي من المج ليلتها عشان لا كل يوم تتألمين ؟! وش الحل ؟ أختكم المنطلقة بأذن الله تعالى |
اختي بحرانيه انا برأي انت ما تروحي ممكن ترسلي لهم بوكيه ورد وكارد الف مبروك وبس كفايه ما في داعي انتي مشغوله و عندك امتحانات لا تضيعي وقتك و ان شاء الله يعطيكي الزوج الصالح ويفرحك ويسعدك علي اخلاقك العاليه وزوقك انك بتفكري في صله الرحم والله قليل اللي تفكر كده :)))
|
هلا وغلا ومراحب ملياار اختي دولي 1981
مشكووووووورة على تواجدج الرائع و أسعدني ردج كل مرة افتح المنتدى مغلق للأسف كان للصيانة على حظي ههههههههههه بس الحمدلله فتح و دخلت أشوف الردود على الموضوع و لقيت ردج رفعتي معنوياتي تسلمين ما قصرتي على دعواتج الطيبة الله يسمع منج صلة الرحم واجب و الحياة ما توقف بين اهل واحباب بسبب مشكلة و تربيتي على هالأمر اشكر الأهل على تعويدنا على تأدية هالواجب و الحمدلله ربي أنعم علي بالصبر و الرضى بالقضاء والقدر و الحمدلله على كل حال تراني أكتب الرد الحين و الوالدة و أختي يجهزون شنو بيلبسون و شنو الاكسسوارات يعني الموضوع عادي عند الكل الحمدلله وهو ربي يوفقه و ربي يعوضني خير :) المشكلة اني خايفة من عمتي لا تزعل ليش ما جات و الخوف من تفكير الناس و كلامهم لانها تحبه للحين ما حضرت و تعرفون الناس ما ترحم الحمدلله بالنسبة لي ما اهتم لهم بس الأهل الله يحفظهم ملزمين أروح هالويكند حاولت أخلص أموري و أراجع للنهائي بس للأسف ما أسعفني الوقت عندنا عزومة الليلة للرجال والشغل وااايد و راجعت للبكرة الاختبار و تقريباا البحث خلصته باقي فقرة وحدة بس مو هينه عليها 30 درجة لحالها و كذا نقطة تتضمنها فالشغل عليها يأخذ وقت واااايد يعني بكرة العصر اذا رجعت للبيت يالله يكفي الوقت لتكملة البحث ويبقي لي عصر اللي بعده لمراجعه النهائي كتاب كامل و للتعديل بالصالون اذا بروح الخطوبة ماكو وقت قررت ما أروح و يوم الجمعة لقاء الأهل يكون في بيت جدي راح تجي و العروس الجديدة ببارك لهم وقتها واعتذر بسبب امتحاني لاني ما حضرت واتمنى ما يزعلون الله يسهل الأمور ان شاء الله محتاجة نصائحكم للتأقلم مع الوضع خصوصا كل يوم جمعة راح التقي معها :) ماني انسانة حقودة ولا احب المشاكل ابي اتعامل بكل اريحية معاها و بشكل طبيعي مثل باقي اهلي نصيحة لي عشان اواصل حياتي وانسى هالفصل منها بكل حلوه ومره دعواتكم لي تكفون بظهر الغيب محتاجتها منكم وانتوا ما راح تقصرون منطلقة وبقوة نحو الأمل و التفاؤل بمستقبل مشرق |
الله يوفقج أخي وإن شاء الله تنجحين وتوصلين للي تبيــنه ,,
انتي الحين خلاص طالعي قدامج ولا عليج من كل هالذكريات الي ذكرتيها .. وعن سالفة العرس .. الله يوفقه مع عروسه وإذا انتي فعلاً ظروفج ما تسمح لج .. لا تضغطين على روحج واصلا الحمد لله زين إنها يات من الله وصرتي ما تقدرين تروحين وإذا عن الكلام والشماته الي بتجيج من الناس .. اقترح عليج فكرة .. وانتي على راحتج لأني عن نفسي محتاارة ,, ليش ما تروحين في وقت متأخر شووي قبل تخلص الحفلة بشوويات تسلمين وتباركين على اهلج الي قبل ما يصيرون أهل طليقج وبجذي تكونين رحتين الزواج وبنفس الوقت ما قعدتين ولا احد بطالعج ولا حد بيتكلم من وراج ولا بتجوفين احد يأشر ومادري شنوو ,, |
هلا والله ومرحبا ببنت بلادي منت عاجبني
يعطيج ربي العافية وعساج عالقوة تواجدج افرحني جدا جدا مشكووووووورة على دعواتج لي ما قصرتي و الله يسمعها منج و ربي يرزقج بالبيبي اللي تبينه و تستانسين معاه يااااااربي و يملى دنياج فرحة ان شاء الله تمرين بمرحلة الحمل والولادة شفت توقيعج و دعيت لج من كل قلبي لانه صدقيني دخلت غرفة الولادة لاني طالبة اولد وحدة بالسلمانية و شعور رهيب يوم مسكت البيبي بين ايدي كان خاطري انااااااطط من الفرحة وربي لا يحرمج من هالفرحة يا ربي الله يرزق كل محرومة و يسهل امرج و تسمعين البيبي يبجي و يصحيج من نومج و بعدها بتقولين وش الله حادني على هالازعاج ههههههههههه امزح وياج حبيبتي اقتراحج حلوو ومنطقي وكأنج تحسين فيني بالتأشير اللي اتوقعه يصير 100 % بس للأسف الأهل بيطلعون في باص كبير من منطقتنا الى منطقة العروس ومحد بعدين بكون موجود عشان يوصلني في وقت متأخر الله يبارك لهم و قررت اظل بالبيت اراجع لمستقبلي احسن لاني الحين فكرت يمكن وحدة تقط كلمة تجرحني والا تعور قلبي وينعفس مزاجي و نفسيتي ويوم ثاني امتحان نهائي ما اسوي زين لا سمح الله اكون بالبيت احسن لي و الله يبارك لهم والجمعه ان شاء الله بقوم بالواجب تسلميييين على مرورج ما قصرتي وربي يحقق كل امانيج المنطلقة بسعادة |
لا تروحي
|
هلا والله ومراحب أختي سعادة الزوجية
تسلمين على مرورج الطيب ما قصرتي الله يديم السعادة عليج يا رب دووم و يعمر حياتج بالأفراح والمسرات آمين قررت فعلا ما أروح و راح ابارك لهم يوم الجمعه ببيت جدي ان شاء الله نصائحكم تنير دربي بأذن الله للتعامل مع الوضع والاستمرار لا تبخلون علي فيها و دعواتكم محتاجتها و تسلمووون كلكم ما تقصرون هذا العشم فيكم المنطلقة للمستقبل بكل تفاؤل |
الله يكون في عونك
عاد تصدقي أنا لما أروح لمكان وأشوف البنت اللي كان زوجي خاطبها قبل أحسها حاقده علي ما ادري كذا أحس ..(بالرغم إنها قريبة زوجي ) يعني في كل أجتماع لأهل زوجي لازم تكون موجودة والمشكلة إنها متزوجة ومخلفة لكن سبحان الله شعور متبادل .. هي حاقدة علي وأنا حااااقدة عليها .. نفسي ألاقي تفسير لنظراتها . ! وشوي شوي صرت ما أعيرها أي اهتمام .. وأساسا ماأجلس في نفس المجموعة اللي هي جالسة فيها حي الله السلام عليكم ومع السلامة يعني والله حرام هي ما سوت لي شي أبدا .. ودائما صامته وهادية وفي مكانها .. لكن عيونها علي اللي أقصده حبيبتي خليكي بعيدة عنها أحسن .. يعني كافيه خيرك شرك .. ومابينكم غير السلام وبس ما يحتاج تكوني صحبة أو غيره لأن الناس ما ترحم |
هلا والله ومراحب اختي ام نوف
يعطيج ربي العااااافية وعساج على القووووة تسلمين على طرح تجربتج استفدت واااااايد من كلامج بس تراني انسانة اجتماعية درجة اولى و احب اضحك واتغشمر و احب الجلسة في بيت جدي يوم الجمعه ومناسبات الأهل تكون حميمية يعني بدون احقاد و ما احب حرب النظرااااات ابدا وربي يشهد علي ما اعرف بت الناس بس الله يوفقها ويستر عليها و بالعكس صارت من الأهل يعني منا وفينا واللي يفرحها يفرحنا واللي يحزنها يحزنا مو مشكلة تعاملي وياها لاني واثقة من تصرفاتي اللي أوزنها قبل أسويها و ما في قلبي شي عليها يعني بالنسبة لي ما ابيها تحقد علي و مستحيل احقد عليها و اناظرها بنظرات شينة وعن العلاقة حددتها بمثل علاقتي مع اهلي من زوجات خوالي و زوجات ابنائهم عادية ومحترمة الله يسهل الأمور وكلها كم يوم و نتعرف عليها و ان شاء الله اخذها بالأحضان و ابارك لها بالعكس الفرحة الى اهلي فرحتي بالدرجة الأولى فوق اي اعتبار :) و انتي ربي يوفقج ويسهل امورج ونصيتحج بخليها في بالي و بحدد اذا تنفع معها لو بتتقبلني واتوقع كل ما صار التأقلم أسرع احسن لي ولها لانه راح نشوف بعض واااااايد ما شاء الله حياة اهلي الاجتماعية عامرة بالطلعات والجمعات والوناسة باختصار ليش اكدر الجو علي وعليها واسوي احزاب بالاهل معاي ومعاها تصير اللمة وحدة احلى و بالقلب ان شاء الله ما عندي الا كل الخير ليها ولغيرها تسلمين اختي الغالية على دعوااتج لي ما قصرتين جزاج الله كل خير المنطلقة ببسمة الثغر نحو المستقبل :) |
اختى توجد نوعيه من الناس لا تطاق
وان ذهبتى سوف تصادفك منها وسوف يعكرون صفوك سوف تسمعين كلام مباشر مقارنات بينك وبين عروسه وكلام مواساه لك حبيبتى حتى لو نيتك صافيه الناس بتكون عينها عليكى وبتسمعك تلميحات |
هلا والله ومراحب اختي منى 777
يعطيج ربي العافية وعسااااج عالقوة دوم يا ربي تسلمين على النصيحة و فعلا كلامج فيه من الصحة الكثير بالنسبة للمقارنات والله عادي عندي ما اتأثر كلنا خلقة رب العباد و المهم الأخلاق و الحمدلله اذا على الجمال موجود بشهادة الكثيرين و لا أقولها غرور بطبعي انسانة واثقة بحالي وما يهز ثقتي كلام الناس من هالناحية متطمنة بس فعلا كلام الناس وتعليقاتهم قد تسبب لي بعض الانزعاج مما يأثر على امتحاني لاني انسانة اذا نفسيتي تغيرت يظل المود لها فترة بسيطة و يروح بس بعد فيها مجازفة ووقتها مدري شنو يصير و اي ناس راح أقابلهم خوفي اروح و أهلها لا سمح الله أسبب لهم احراج لو يصير لي موقف معهم ما ادري عن طبيعتهم ونفسياتهم فمن الأفضل اجلس لمراجعة امتحاني و فعلا كلامك منطقي بيتركون العروس وبيناظروني كل الوقت و تعابير وجهي الله يكون بالعون يا ربي وتسلمييييين على نصيحتك أسعدني مرورك الصريح الله يحقق كل امنياتج يا ربي ما قصرتي وياي المنطلقة بعون الله تعالى :) |
لا تروحي .. و ربي يوفقك في دراستك و يرزقك بالزوج الصالح .. |
هلا والله ومرحبا ملياارات أختي الغالية أميرات
يعطيج ربي العافية وعسااااج عالقوة دوم يا رب تسلمين على مرورك الطيب و دعواااااتك الحلوة مشكووووووورة من طيب أصلج و ربي يسمع منج الله يحقق كل امنياتج و يرزقج اللي في بالج دوم آمين قررت ما أروح وزادت قناعتي بردودكم و راح ابارك لهم يوم الجمعه :) المنطلقة بسعادة |
الله يوفقك في دراستك ويعوضك والحمد لله انك قررتي ما تروحي ... خلص انسي الماضي حتى لو كانت نيتك خير بس الناس ما رح يقدرو او يفهمو قصدك .... الله يعوضك ان شاء الله
|
هلا والله ومرحبا مليون أختي مدام ألاء
يعطيج ربي العاااااافية وعسااااج عالقوة يا ربي تسلميييييين على دعواتج ربي يسمعها منج آمين فعلا بدأت أحس قرار سليم أولا راحة لي لا انضغط بالوقت و اراجع براحة و تجنبا لسوء فهم الناس و ان شاء الله ما راح اقصر ببارك لهم يوم الجمعه الحمدلله انسى الماضي والله يسهل اموره و يوفقه في حياته الجديدة و ربي يعوضني ان شاء الله و يسهل أموري بدراستي وحياتي :) الله يحقق كل امنياتج و دعواتج يا ربي مشكوووووورة من طيب أصلج المنطلقة نحو مستقبل مشرق |
اقتباس:
اهليين حبيبتي ,, إن شاء الله الفرح دايم حولج وحواليج ومابينا شكر ,, كلنا خوات :22: والله أنتي الي افرحتيني بدعائج لي ,, إن شاء الله الله يسمع منج والله خليتيني اعيش جو وأنتي تقولين لي عن الحمل والولادة وحمستيني لـ السالفة أكثر :25: مع إني خفت على طاري الولادة :26: الله لا يحرم كل من خاطرها في بيبي .. الحمد لله إنج رسيتي على قرار .. وإن شاء الله يكون القرار الـ :22: اهتمي بالدراسة ما وصيج وديري بالج على البحث واهم الشي النفسية خليها على طوول كوول :22: لأن ما شاء الله لاحضت عليج فرفوشة وحبووبة الله يحيمح والي في خاطرج يعطيج .... |
مع أنه يبدو أنكِ قررتِ...
إلا أنني أحب أن أكتب رأيي ( لعلك تغيرين رأيك )... لو أنا مكانك أروح ... لماذا؟ *لما تتعاملين مع الأمور بوضع (( الناس )) في قاموسك راح تتعبين كثير...لأنك لو رحت بيتكلمون ولو ما رحت بيتكلمون..!!! *(ولد خالك وولد عمتك) من صلة الرحم إنك تروحين وتباركين لهم ...إنت تعاملين الله قبل الناس..!!! *إذا كنت مشغولة ( بدراستك ) ممكن تروحين جزء من الحفلة وتطلعين معتذرة بإنشغالك (بالدراسة )... هذا فسخ ( عقد قران ) كيف لو كان طلاق بعد دخول ؟؟!! أخيرا .. الله يسعدك واستخيري قبل قدومك على أي أمر... |
هلااختي
انالومكانك ماراح اروح انتبهي لدراستك وانسية والله يعوضك بابرك منة وموفقة اختي ربي يسهل عليك اختبارك ويفرج همك ويرزقك بالزوج الصالح التقي النقي وبعدين لاتنتظرحبيباباعك ولكن انتظر ضوء جميل يعيد لايامك البهجة ولقلبك نبضة الجميل ربي يسعدك ويسخر لك ويوفقك وين ماكنتى وان شاءالله نفرح بتخرجك وزواجك يارب وحياك الله بين خواتك المنطلقات اسال الله أن يعوضهن كل خير ويرزقك بالزوج الصالح التقي النقي وبنات الممسلمين |
عذرا ...
عزيزتي ( بحرانية كول)... فكرت انشغال بالدراسة ( فقط) ما ركزت في الموضوع... حقيقة إذا اختبار ( نهائي) ما يسوى تروحين ...مصلحنك أهم .. لكن لو كانت أيام دراسة عادية طبعا تروحين ... والله يوفقك ويرزقك بالي يسعدك .. |
الله يوفقك ويحفظك ويبعث ليك الزوج الصالح
انا اول ما قرأت الموضوع فكرتج سعودية ولكن عندما رأيت النيك نيم عرفت أنج بحرانية يمكن إذا رحتين تنسد نفسج عن المراجعة وتتضايقين وتضيعين وقت المراجعة أحسن منه لو أنتين ما رحتين ماراح يخسر شئ بس لو رحتين راح تضيعين وقت مثل ما قالت الأخت dolly طرشي ليه ورد أو هدية بس ما أعتقد إن في البحرين يطرشون ورد أو هدية في ليلة الزواج بعد الزواج بكم من يوم للعلم أنا من البحرين ((بحراني)) |
بذمه اقولك لاتحضرينه منعا للاحراج عشان لاتحرجين نفسك
انتي صحيح مابنيتك شي وكل واحد راح بطريقه بس الا الناس غير تتكلم باركيلهم بالتلفون وارسلي لهم بوكيه ورد مع علبه شوكلاة وخلاص ربي يعوضك خير يالغاليه |
مرحبا ملايين بالجميع
منكم السموحة لكل اللي ما رديت عليهم رد فردي برجع لكم بالتعليقات ان شاء الله بكرة بعد ما أقدر امتحاني ما رحت الحفلة و للحين أذاكر و باقي وااايد الحمدلله اختياري في محله لانه صج اكتب لكم بالسرعه عشان ألحق اذاكر وانام شوي قبل الفجر الكمية وااااايد ومتعبة و لا تنسوني من دعوووواتكم الحلوة باجر امتحاني الأهل تجهزوا و كشخوا و راحوا من شوي و لحالي اذاكر ههههههههه بيني وبينكم أحسن صار هدوء المكان عندي وقت اذاكر تمام أشكر كل اللي رد على الموضوع وان شاء الله بعلق على ردودكم بكرة اسفة مستعجلة الحين بروح اكمل المراجعة ولا تنسوووني من دعواتكم و الف الف الف شكر لكل من رد على الموضوع وباجر برد عليكم المنطلقة بتوفيق من الله لمستقبل مشرق |
الله يوفقك ويسهل امرك ويسعدك ويفرحنا بشوفتك عروووووووووسة حلوة فديتك ربي يخليك |
هلا والله ومرحباااا بالجميع منورين المتصفح الله لا يحرمني منكم
الحمدلله الحمدلله الحمدلله على كل حال الله كريم و كل شي يصير للأنسان صالح له بأذن الله تعالى الحمدلله لأني ما رحت لانه من دخلوا أهلي جات أخت العروس تخيلوا شنو تقول !!! تقول وينها طليقته لا تدخل الحفلة !!!!!!!!!!!!!! الكل أهلي وقفوا مستغربين وحتى عمتي ام المعرس انحرجت من امي و اختي بس الحمدلله ما صارت مشاكل اهلي الحمدلله ما يعكرون مزاجهم وفرحتهم امي و اختي سكتوا و ابتسموا لها يوم عمتي عرفتهم عليها و قالت هذي امها واختها وقالت لها ما جات لانها تراجع امتحانها و قالت في وجه اهلي اي فكة !! الحمدلله على نعمة الأخلاق و العقل بس له الحمد و الشكر :) و أبشركم سهرت الى الفجر اراجع و استغليت الفجر دعيت لكل الطلبة بالنحاج والحمدلله راضية عن ادائي فيه و تخيلوا طلعت النتائج بنفس اليوم لانه بس قروب واحد ياخذ هالمقرر بعد الاستراحة ( البريك ) رحنا للتيجر الا تقول جهزت بس ما عطتنا اياهم بكرة تقول تعالوا شوفوهم ادعوا لي اجيب فيه مثل طموحي الله يسهل يا ربي علينا كلنا وتقول فيه رسوب صدمتني مع انه سهل بس الله يستر مقررات التمريض تسوين زين فيها و تنصدمين بالدرجة بعدين هههههههههههه هذرت واايد بس ابي اطمنكم و أشكركم على وقفتكم وياي والله ما قصرتون حبيبتي منت عاجبني تسلمين يالغلا على وقفتج وياي و لا تخافين ربي يرزقج و تفرحين بالبيبي اللي يسعدج يااااااااا ربي في القريب العاجل موفقة لكل خير و مشكووووورة على دعواتج لي و اتشرف بأخوتج لي هلا والله ومرااااحب الغالية شيهانة رايج على عيني وراسي تسلمين يالغالية على تواجدك بالموضوع ودعواتج لي ونصيحتج وفعلا كلام الناس ما يأخر ولا يقدم و تسلميييييين ما قصرتين ربي يحقق كل امنياتج ويرزقج اللي في بالج ان شاء الله الغالية زينة الغنادير تسلمين يالغالية على وقفتج وياي و كتابتج دخلتي الأمل بقلبي مشكووووورة على مرورج المتواصل و متابعة الموضوع وياي دعواتج لي اسعدتني وربي يرزقج على قد نيتج و يحقق كل اللي في بالج موفقة يا ربي لكل خير والله يسهل أمورج دوووووم أسعدتني طلتج على الموضوع هلا والله خوي اللاعب يعطيك الله العافية ومشكوووور على تواجدك و رأيك لا بحرانية :) و النعم في الجميع و النعم بك يا ولد بلادي حيااك ربي بالموضوع ببارك لهم يوم الجمعة ان شاء الله ومشكوووور على تواصلك ما قصرت الله يوفقك ويحقق لك كل اللي في بااااالك ان شاء الله الغالية غموض السنين تسلميييين على رايج الطيب ما قصرتي مشكوووووووورة على تواجدج و دعواتج الطيبة ربي يحقق لج كل اللي في باااالج و يسعدج يا ربي تسلمووووووون كل اللي شاركوني و نصحوني ودعواتكم لي اسعدتني و اتمنى ما تبخلون فيها لاني محتاجتها بدراستي بكرة نتيجة تعبت مقرر كله الله يسهل يا ربي و احقق طموحي في درجته ان شااااااء الله ادعوا لي و منكم السمووووووحة لاني بنشغل بالدراسة مقرر آخر على الأبواب من بكرة و هذا معرف صديقتي تحملتني فديتها سرقته منها هالفترة ههههههههههههه ان شاء الله بسجل وياكم بمعرف خاص فيني بالقريب العاجل بأذن الله و أكرر شكري الجزيل لكل من شااااااااااااااااارك و نصحني و دعائكم لي ما قصرتون المنطلقة و أختكم المحبة لكم |
شوفي آختي اذا تدرين رضا الناس انتي غلطانة رضا الناس غاية لاتدرك لو بتروحين بيقولون هذي طليقته وجت وماتآثرت واكيد الغلط منها لانها ماانجرحت واذا مارحتي بيتكلمون ..
الالزم عليك رضاك وراحتك بعد رضا الله .. صدقيني لو بتروحين يمكن تحز بخاطرك .. وماراح الناس يقولون قاطعه عشان بس هاليوم .. شوفي يالغلا بيوم زواجه اطلعي مع صديقاتك واستانسي وعيشي حياتك واتركيه يولي تلبين دعوته وهو مطلقك اعذريني لو قسيت بس عشانك .. |
قهرتيني يوم كتبتي كلام اخت العروس .. الحمد لله على نعمة الاخلاق مثل ماقلتي ... معقوله هان عليها تقول هالكلام؟ ماخافت تدور عليها الدواير وتصير هي او اختها العروس في نفس الموقف؟ وينهانون بنفس الكلام اللي وجهوه لاهلك..
لكن والله كفو عليج ياحبيبتي ... وربي يوفقج بدراستج ويرزقك بذاك المعرس اللي يسد عينهم ويسعدج ... تقبلي مروري اختج حلمي قريب |
عسى الله يفرج همك
دعاء فك الكرب لا اله الا الله الحليم الكريم لا اله الا الله العلى العظيم لا اله الا الله رب السماوات السبع ورب العرش العظيم |
فديتج أختي بحرانية كوووووووووووول
وإن شاء الله على طول كول.. بما انج عندج امتحانات وإرتباطات مستقبلية.. فأنا عندي إقتراح.. إشرايج تروحين العرس شوي.. وكأنج تسجلين حضور.. وتتعذرين بأنج بتمشين بسرعة بسبب الإمتحانات والارتباطات الأخرى.. على الأقل سجلتي وجودج.. عشان تبعدين الحساسية..!! |
روحي وتعدلي و اضحكي و لا عليج من الناس لا تخليهم
يشمتون فيج و اعتبري هذي الحفلة نهاية الى ذكرياتي واجهي واقعج و تخلصي من المج ليلتها عشان لا كل يوم تتألمين كان هدا وجهة نظري لكن اكتشفت ان الموضوع انتهى مشاءالله عليك نفسيتك مرة حلوة الله يوفقك مع واحد افضل منة |
هلا والله و مرحباا بكل اللي ردو على الموضوع ما قصرتون
منكم السموحة ما رديت بس تو وصلت بيت صديقتي عشان ارد عليكم كنت مشغوووولة بالدراسة الأيام اللي طافت الله يسهل الأمور يا ربي الحمدلله الحمدلله راحتي النفسية لأني قررت ما أروح حلووووووة و عمتي و بناتها سلمت عليهم يوم الجمعة اللي هو أمس بكل محبة بالعكس حضنتهم وباركت لهم و ابتسامتي ما فارقتني من قلب العروس ما جات يقولون الأسبوع الجاي راح تجي حيااها الله معنوياتي الحمدلله في أرتفاااع و ما عاد يأثر هالموضوع فيني نسيته بالكامل الله يبارك لهم ويسعدهم ان شاء الله :) هناوي الغالية تسلمين على مرورج وبالعكس ما زعلت وجهه نظر و احترمها وهذا اللي صار ما رحت لاني راجعت امتحان نهائي و قدمته الحمدلله تسلمين على مرورج من طيبج والله يحقق كل احلااااامج يا ربي حلمي القريب الغالية مشكووووورة على تواجدج العسل ما قصرتين ما علي من كلامها ناس تفكيرها كذا ما هموني الله يسامحها بس :) و تسلمين على دعواااااتج الحلوة ربي يحقق كل اللي في بالج فراغ العاطفة مشكوووورة على دعوتج الحلوة ربي كريم الدعاء جميل ما قصرتي وربي يكتبه في ميزات حسناتج الله يحقق كل امنياتج اسعدني مرورج غزالة البوادي هلا والله بالغالية تسلمين على مرورج الروعة ان شاء الله على طول كووول ههههههههههه ما رحت يالغالية امتحاني النهائي و باركت لهم بالجمعة ما صارت حساسيات بالعكس أهل واحباب نبقى ما يفرقنا شي دنيوي ان شاء الله دلوعة السعودية تسلمين يالغااااالية على مرورج ما قصرتي و الحمدلله النفسية حلوة لانه كافي ضغط الدراسة ههههههههههه بعد ازيدها ضغط نفسي من مشاكل ثانية الله كريم يالغلا أشكر من الأعمااااق كل من شاااااركني بالموضوع ومنكم السموحة برجع الأسم الى صديقتي و بكون هذا آخر رد لي بالموضوع أكتفيت بتواجدكم وياي و دعمكم لي ما قصرتون تسلمون كلكم و لدراستي و مشاغلها ما راح اقدر اتواجد صعبة اجي بيت صديقتي كل فترة و بالنهاية اشكركم و منكم السمووووحة على التقصير بالرد أتمنى يتم غلق الموضوع و الله يخليكم ما قصرتون وياي مشكوووورين كلمة أخيرة الى صديقتي الغالية ما قصرت وياي بالنصائح والدعم و بالأخص سماحها لي الكتابة بأسمها فديتج والله لا يحرمني منج أستودعكم الله التي لا تضيع ودائعه لنا لقاء آخر بمعرفي الجديد بأذن الله المنطلقة ببسمة الثغر نحو حياة مستقبلة واعدة :) |
اقتباس:
اسأل الله لك التوفيق .. يغلق الموضوع ... |
| الساعة الآن 07:59 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©