|
مواصفات العريس ليست كما احلم به
السلام عليكم ورحمة الله وبركاته
والله اني جالسه اكتب وانا ابكي بس تكفون قولو لي أنا وش فيني .. قبل فتره خطبني واحد كبير بالسن يمكن 36 وشكله أكبر من كذا وطرحت مشكلته بالمنتدى أخر والكل أيدني اني مااوافق لني بعد شفته الشوفه الشرعيه كرهته من كل قلبي وكانت نفسيتي زفت ذيك الايام المهم كرهت شي اسمه زواج صرت أخاف اذ أحد خطبني بعد السالفه بفتره زوجة أخوي كلمتني عن اخوها بالرضاعه وقالت أنه يقول وده يتزوجك لكن هو مسكين ماتوظف لين الحين وحالته حاله المهم أنا بصراحه كان أخوها يعجبني مره والله أحس أني كنت أدعي الليل والنهار بس ابي اتزوجه والحين فجاه دق واحد على ابوي قبل يومين وقال أحنا سمعنا عنكم ونبي نجي نخطب انا تازمت نفسيتي لني الكبيره واكيد جاين يخطبوني المهم انا قلت لزوجة اخوي زي الي المح لها وين اخوك قالت والله العظيم يافلانه أنه ماتوظف لين الحين ونفسيته زي الزفت وابوه رافض يبيه يتزوج بنات عمه وهذا الشي قسمه ونصيب يعني كانها تقول لاتعلقين نفسك فيه انا سويت نفسي عادي بس قلبي زي النار من كثر القهر المهم أمس جو ذولي الي يبون يخطبون وانا اتسمع عليهم من وراء الباب وسمعت كل كلامهم مع ابوي ماشاء الله مره محترمين بصراحه انا كنت واقفه وراء الباب لني كنت ابي اشوفه عشان ماادخل بمشاكل مع ابوي وشفت الولد هو مو حلو ولاشين عادي لكن عكس كل المواصفات الي انا تمنياتها بزوجي واحس هالمشكله مسببه لي ارق والله احيان أسال نفسي ليه انا مو زي البنات يفرحون أذ احد خطبهم وانا اذ انخطبت كاني بموت والله لااكل ولانوم زي الناس حتى خواتي وامي متضايقين من حالتي يقولون ليه كل هالبكي والصياح انا ماقلت لااهلي اخاف يقولون انتي تتشرطين والله العظيم أنا احس شكل الرجال يلعب بمشاعري دور كبير واخاف أذ تزوجته مااقدر احبه لن شكله مو عاجبني والله غصب عني هالشعور أنا كان نفسي على الاقل انه طويل ونحيف وجاني العكس قصير مو مره ومليان تتوقعون أني بقدر احبه لني رومنسيه وبقوه ودائم أتخيل واتخيل اشياء رومنسيه مع شخصيه بخيالي وماحد جاء نفس الي ببالي الا اخو زوجة اخوي احس اني لوتزوجته كيف اعيش معه جوء رومنسي وانا مو عاجبني شكله احس احيان اني مراهقه لسا مع ان عمري 23 لكن والله انا ماكتب لكم لني ادلع لاوالله اني جالسه ابكي واحس خلاص كل شي من حياتي بينتهي اذ تزوجت احس انه بيحرمني من النت والاشياء الي احبها واحس اني ماراح اقدر اضمه واحس بالحنان مدري ليه كل الاحساسيس هل هي طبيعيه ولا أنا فيني شي ..؟؟ ارجوكم لاتبخلون علي ساعدوني |
إذا جاكم من ترضون دينه وخلقه فزوجوه-حديث شريف -
الطول والقصر ليست من المهمات بل من الكماليات الاهم هو الدين والخلق وياما تزوجت أمرأة رجل وسيم وغني وتحولت حياتها الى جحيم وياما تزوجت امرأة رجل فقير وغير وسيم وتحولت حياتها الى سعادة وجنة التوفيق هو الاساس الرومانسية وقتيه سنوات وتجيك أيام العقل والرزانة وبعدين تندمين على الرومانسية المؤقتة وعليك إذا جائك الخاطب أن تقرأي سورة البقرة كل يوم لأنه ربما وضع لك سحر من خادمة أو أحد من الناس أنصحك بالزواج بعد الاستخارة وفكري بعقلك قبل عاطفتك على الرجل الذي سيتقدم عليك وركزي على الدين والخلق الطيب وعليك بالاستخارة والاستشارة وربي يوفقك ويسعدك |
أنا لا أستطيع الرد
أحس أن هذا الموضوع يجب أن يرد عليه النساء وليس الرجال فأنا رجل فلا أستطيع أن أفيد بشئ |
يا أختي العوض ولاالحريمه
صدقيني عزيزتي انتي بنفسك تقولي الرجل ما فيه شي بالعقل اختي معقوله النت اهم من الزواج والستر والأمومه النت ما راح يجلس مع وحدتك اختي اذا الكان الخاطب جيد لا تفوتيه اليوم عمرك 23 وفي خاطب بكره راح تكبري وميكن ما يجي خاطب مناسب الرجل كلهم تشابهين ،يعني كلهم يريدون زوجات تتفرغ لهم وفي رجال عادي عندهم الزوجه تدخل النت للأهميه النت ما راح يغنيك عن متعة الزواج ولا الأمومه الصديقات بيتزوجن ولا راح يسالن فيكي ربما تزعلي من كلامي لكن انتي محتاجه لمن يكلمك صراحه كبري عقلك يا أختي صلي استخاره اجلسي مع الخاطب اطلبي التناقش معه وشوفي ايش افكاره اذا احببتي اقرئي سورة البقره ويس والمعوذات هاذا الشيطان جالس اشين الزواج والخاطب واكثري من الإستغفار والدعاء بان يشرح صدرك ويسر لله امرك خوذي المصحف وافتحي سورة البقره الله يفرج كربتكونسمع خبر خطوبتك ان شاء الله |
والله عارفه ان كلامكم صح
لكن انا نفسي مدري وشفيني خايفه لذي الدرجه وكل مافتحت التلفزيون وشفت شاب حلو وزي الي يعجبوني انقهرت ورحت للغرفه |
هههههههههههههههههههههههههههههههههههه
ضحكتيني احلام وذكرتيني باللذي مضى كنت مثل احلامك وتزوجت العكس نصيحتي ياأختي صلي صلاة استخاره اللين الله يكتب لك نصيب يا أيه يا لا واوصيك اهم شيء الصلاااااااااااااااااااااااااااح الحياة الزوجيه ماهي دلع وحب وغرام اهم شيء الاحترام بين الزوجين ومخافة الله والأمان الله يوفقك ويوفق بنات المسلمين اجمعين لما يحب ويرضى |
إذا انتهت (( الأحلام الخيالية))....
ستتضح لك الرؤية لك !!!! |
الله يكتب لك الخير ..
لكن عندي سؤال بسيط ..لكن الإجابة عليه مهمة .. ما هو مدى تقبلك للشخصيات التي للتو عرفتيها أو قابلتيها ؟؟ بمعنى .. هل أنت ترحبين بالأشخاص الجدد في حياتك وتدخلين معهم في صداقة سريعة ؟؟ أم أنك تحتاجين لوقت حتى تتدخلين مع صداقة مع الشخصيات الجديدة ؟؟ كــان الله في عونك .. |
أمي زوجتني بدري ..
وتقول البنت كل ما كبرت تشرطت لكن وهي صغيرة تتزوج وتكبر على زوجها وتراهق معاه الحمد لله على نعمة الستر والعفاف والزواج |
عزيزتي
ارجو ان تكوني صريحه حتى نساعدك ما هو الذي مش عاجبك بالخاطب هل الشكل فقط بالنسبه عن اللي تشوفيهم بالتلفزيون اولا طبعا تعرفي ان غض البصر واجب ثاينا أخيه ، هؤلاء ديااييث ، أتعلمين الديوث لا خير فيه أبدا هؤلاء اشباه الرجال مصبغين رأسهم وحافين حواجبهم وحاطين كريم اساس اغلبهم كذا جمال غير طبيعي وع الفاضي في بعض الوسيمين صدقيني غالتي مغرورين ومنحرفين لكن يجي شاب عادي وخلوق مثقف ويعتمد عليه أختي استخيري الله اقرئي سورة البقره من الآن اختي هل تريدي ان تصلي لسننا ولا تجدي رجل محترما ارجو ذكر كل ما لا يعجبك فيه صراحه حتى نساعدك عزيزتي ولاتدعي الشيطان يتغلب عليكي وعذرا لكن اللي بالتفاز ما راح يخطبوكي الحل في التخلص من اخ زوجة خالك بان تتعوذي من السيطان وتذكري الله هذا الشيطان حاط في مخط انو هو فقط تقدري تتزوجيه راح تنعسي احذرك من هالأفكار لأن كل ما يجي خاطب راح تعملي مقارنه اطلبي بصلاتك ان يزين الخاطب ويبعد الوساوس عنكي كوني واقعيه وفكري بالعقل واتنبهي ان الزاوج ليس رومانسياااات |
اقتباس:
|
سبحان الله
اتمنى بالواقع يعرفو قيمتي كما تعرفونها هنا اخواني وأخواتي جزاك الله أخي الكريم الظروف والوحده تعلم الكثير الحمد لله على كل حال ارجو الدعاء لي بالرجل الصالح |
السلام عليكم اختي الغاليه ..
انا ضد البنت اللي تحط شخصيه معينه في بالها وتتمنى انو يجيها نفس الشي .. ولكن من ناحية الراحه النفسيه لازم تتزوجين شخص تكونين مرتاحه له نفسيا .. انا كان خاطبني واحد فيه كل الصفات الجيده وملتزم واخلاقه عاليه .. لكن لما شفته ماحسيت باي راحه ونفسيتي تعبت الين انتهى الموضوع .. اذا كان العذر عدم الارتياح لهذا الشخص فانصحك انك ماتوافقين .. اما انتظار شخص معين او شكل معين فانك بتتعبين اختي تعب شديد .. اتمنى لك الستر والتوفيق |
عزيزتي الناس ما بأشكالها الناس بي اخلاقهااااااااااااااااا
الشكل ده خلقه ربنا ماحد ليه دخل فيه لا ترفضيه او تحاسبيه علي ذلك هو ايش ذنبو ان كان طويل ولا قصير اتمني ان تكوني فهمتي ما اقصده |
أشكركم من أعماق قلبي
لكل اخت واخ ردو علي والله العظيم أني عارفه أن كلامك صحيح والله حتى أمي من الصبح افتح الصفحه واوريها كلامكم وهي مبسوطه لكن انا مدري يمكن خوف يمكن أحلام كنت معيشه نفسي فيها اني ابي واحد وسيم وطويل وجسمه حلو وماتقبلت غير كذا ويمكن لني كنت معجبه بااخو زوجة اخوي أعجاب شديد وكنت دائما أتخيل اني بتزوجه لنه وسيم جدا وطيب امانه عليكم تتدعون لي بالخير انا كلمت وحده من صديقاتي وهدتني شوي والاخت الي سالتني أنا أنسانه أجتماعيه جدا وبشكل ماتتصورينه وبسرعه أدخل مع الناس واحس فيهم لكن مشكلتي أني حساسه جداً وافكاري الرومنسيه هي الي معذبتني ودي أذ تزوجت أعيش قصة الحب يعني قبل مانتزوج يقولون لنا عيب وحرام تكلمين ولاتحبين غير حلالك يعني معقوله حتى أذ تزوجنا ننحرم من الحب أنا اخاف من الي يقولون لي الزواج مو حب الزواج احترام فقط يعني ليه أرجوكم مافي احد يتزوج ويحب والله احس اني اخاف يعني قبل الزواج لاتحبون وبعد الزواج مانحب اجل متى نحب ونعبر عن مشاعرنا |
اختي انتي الحين تتشرطين وتبغيين كذا وكذاا اخااف يروح منك العريس وتروح الفرص من بين ايديينك وتبدأ معاك التنازلات
الحين ممكن تتنازلي عشره بالميه من مواصفاتك في زوج المستقبل وبعد كم سنه النسبه بتزيد الين يجيك وقت بس تتمنى زوج تخلفي منه وتصيري ام انا ما ابغى احطمك لكن قصدي تنتبهي لنفسك وتتركي هالخيالات اللي مالها اساس ولا بتصيير واقع مافيه وحده لقيت بزوجها كل اللي تتمنى من شكل وملامح واخلاق وتعامل بس احنا نطالع للجانب الكويس في الزوج يعني الرجال ملتزم بدينه واخلاقه تمام موظف ويقدر يصرف عليك ويقدر يفتح بيت وبيكون تعامله معاك تمام هذا عز الطلب والرومانسيه اللي تدوريها موجوده في كل رجال بس الشاطره اللي تخرجها من داخله وتتهنى فيها معاه ويمكن يطلع رومانسي اكثر منك.. انتي ماتدري الخير فيين فأستخيري واكثري من الدعاء وربنا يكتب لك اللي فيه الخير الله يوفقك ويهديك للصواب تحياتي لك |
:d:d:d:d:d:d
حبيبتي ذكرتيني بنفسي قبل كم سنه من زمان :25::25: يوم كنت احسب ان الخطاطيب راح يكسرون بابنا :d:d ماتوقعت اني حتى واحد مثل خلق الله مايطق بابنا الحمدلله على كل حال :d تدرين بقولك شي حبيبتي بس لاتزعلين مني :dشكلك من متابعين الافلام الهنديه ياعمري الحياة مو بس رومنسيه وحب ووسامه الحياة تفاهم وعشرة ومودة ورحمه يعني بالله اذا جاك زوج مثل مواصفاتك طويل واسمر ومادري ايش ونفسيته واخلاقه تجاريه ولاسمح الله يمشي بالطريق الغلط قوليلي وش يفيدك فيه جماله ووسامته حبيبتي من جاكم ترضون خلقه ودينه فزوجه اذا الرجال يصلح ويخاف الله فيك توكلي على الله واكثري من الاستخارة والدعاء بان ربي يسهل امرك للخير اسمعيها نصيحه من اخت اكبر منك العمر يمشي وانتي مو حاسه اليوم ماشاء الله فيه خطاب يطقون بابكم بصلحون وفيهم دين يكرة لاكبرتي وانتي للان تحلمين بااحلامك الورديه تلاقين مايتقدمون لك الا المعدد والكبير بالعمر ربي يسر امرك وبشرينا عنك وان شاء الله الموضوع الجاي نلاقيه بقسم التبريكات تبشرينا بخبر خطوبتك بس ممكن سؤال يقرقع بقلبي رقع :d:d الحين انتي تقولين انك جالسه انتي وامك وتقرينها ردودنا :d امك عارفه انك تحبين اخو زوجه اخووووووك :d:d:d:d |
حبيبتي أنا زماااااااااااااااااااان كنت دائما بفكر زيك وبقول اما وسيم وإلا فلن أتزوج
والحمد لله ربنا رزقني بزوج ماشاء الله لاقوة الا بالله قمه في الوسامه لدرجه كل اللي بيشوفه ماشاء الله بيعلق عليه من شده وسامته وجاذبيته بس لا تفتكري ان هذه ميزه انا في يوم تمنيت انه ما يكون بهذه الشكل الجميل لانه في كل مكان بيروحه لاتتصوري كيه البنات اللي بيرموا نفسهم عليه في الجامعه كلهم بيسعوا عشان يتكموا معه في الشغل نساء كثيييرات بيحاولوا التقرب منه هوا طبعا ماشاء الله لا يلتفت لهم بس تخيلي العذاب اللي بشعر به وهوا في شغله لاني متخيله كيف بيحاولوا يتقربوا له حتى احيانا كان بيخليني انا أرد عليهم لما يتصلوا عشان يبطلوا صدقيني الجمال ليس كل شئ على الاقل لو حدث قبول بينك وبين الخاطب ستحبيه وتعيشي معاه اجمل رومانسيه وممكن تتزوجي واحد وسيم ويطلع غير رومنسي بالمررررررررررررره الله يوفقك يارب |
علي أمل اللقاء
مشكوره حبيبتي كلامك أثر فيني غموض السنين والله أنك ضحكتيني وانا وربي طفشانه انا مو أحبه انا معجبه فيه فقط وأمي تتدري لن زوجة أخوي كانت تقول لنا أنه يبيك لكن مو متوظف وهذي المشكله فلما جاء هذا وخطبني قالت امي لاتستني واحد ماتتدرين هو يجي ولامايجي ومن ناحية الافلام الهنديه ههههه لامااحبها ابدا بس مدري ليه شكل الرجال يلعب بقلبي دور كبير الله يعين بس زوجتة أحمد والله حسدتك بس حسد جميد بس والله جد حسيت فيك وبالغيره الي تحسين فيها الله يكتب لي الي فيه الخير ويشرح لي خاطري وجميع بنات وشباب المنتدى والله اني عارفه أن جركات ماتصلح لكن مادري ليه هلاحسايس براسي بحاول اقراء قران واسمع كلام الباقين وشكراً من أعماق قلبي لكل من ساعدني ولو بكلمه واتمنى من الجميع مايبخلون علي بتجاربهم وخصوصا المتزوجات تكفون قولو لي هل الحياه الزوجيه ممكن يكون فيها حب .؟ |
اخاف تكوني تحسستي من كلامي واخذتي في خاطرك وانا والله قلبي عليك وعلى كل بناتنا لما يضيعوو هالفرص
لانه الفرص ماتتكرر وانا رديت عليك لاني مريت بنفس وضعك الحين وضعييت فرص ماتنعد الين مرت السنوات وماحسيت الا وانا فوق الثلاثين وبالاخير تزوجت واحد متزووج بس الحمدلله مبسووطه معاه وعندي بنووته بس لسى احسس بغصه نفسي يكون لي لوحدي مثل بنات عمي واخواتي وكل المحيط اللي انا ساكنه فييه اعتبري باختي من هالقصص ولاتضيعي الفرص منك بس اختاري الرجال العدل مو تتسرعي بأي واحد ومادام مافيه شئ استخيري وتوكلي على الله وربنا يوفقك ويسعدك وتفرحي امك وتشووفك عروس ووصلي سلامي لها الله يخليها لكم تحياتي لك ولهاا موفقه بأذن الله |
اختي بارك الله فيك ورزقك من حيث لا تحتسبين ..
الحين الحب مب مهم في الحياة الزوجية ؟؟ عيل اشلون مع واحد ما احبه .. واعطيه كل اللي يبيه من طيب خاطر وحتى بدون ما يطلبه!!! طبعا الحب موجود في الحياة الزوجية .. ومب شرط يكون الرجال حلو عشان تحبينه ... صدقيني اصلا لو تحبين الرجال بتشوفينه احلى رجال في العالم .. تعرفين زوجي قبل لا يخطبني "زوجي ولد جيرانا " :d فكنت اعرف شكله .. وماكان يعجبني وااايد .. يعني ماقط علقت على شكله حلو او مب حلو .. بس يعني كنت اقول هو بشيه اخته وهم عاديين ... بس والله الحين ما ابالغ غليج من كثر ما احبه .. والله اشوفه احلى ريااال في العالم ولو ييبون لي ملك جما العالم والله لقول مايسوى ظفر زوجي الغالي .. صدقيني الحب ينوجد بعد الزواج ومع العشره .. مع اني حبيت زوجي من اول يوم في الملكه لانه شخصيته ماشاء الله روعه .. عشان جي مثل ماقالت لج اختي نايت بارك الله فيها ورزقها من حيث لا تحتسب .. قعدي مع الخاطب وشوفي شخصيته وان شاء الله تعجبج وتتيسر امورج اسمحي لي ع الاطاله وبارك الله فيك . اختك .. ام فطومه :) |
اختي الغاليه
انا بقولها لك وبالفم المليان لما زوجة اخوك تقولك اخوي مايشتغل اولا تانيا ابوه يريد يزوجه من اهله يعني مافي امل ولو صار تخاافي من المشاكل بتنتظريه لمتى يشتغل ويكون نفسه صعبه لكن استخيري على الخاطب الجديد واذا ارتحتي توكلي على الله وياشيخه عمره ماكان الجمال مقياس صح نطمح نتزوج واحد جميل لكن ايش فايدة الجميل الشكل بدون اخلاق وصدقيني لو اتزوجتي واحد مو بذاك الشكل لكن حبيته حتشوفيه احلى واحد بالكووووووون |
يا حبيبتي الله يسعدك احنا كلنا متلك نحلم ونحلم لح ما صحينا م الحلم فزعانييييييييييين
كنت بحلم بشاب مواصفات غير ووضع غير بس اسمعي المهم جاني قرابة الي وطلبني والله يا عمري عمري ما فكرت فيه ولا ممكن افكر فيه لانه بنظري مش من مستواي التعليمي ولا حتى الثقافة وكل شي عكس الناس.... صليت الاستخارة كتير وكان الموضوع يمشي اسرع من تفكيري ما لحقت افكر فيه ولا شي كل شي صار بسرعة بقدرة ربنا ...لانه نصيبي معه بعد العشرات قبله شفته وكان عادي موحلو عمره 35 وشعره كله ابيض واللي بشوفه بحط فيه عمر 50 بس والله عمري ما فرحت ولا حسيت بسعادة متل ما هي معه.... شب عن جد بفتخر اني معه او حتى بمشي معه مدللني على الاخر والحمد لله يا عمري بنصحك صلي الاستخارة واطلعي م الاجواء الرومانسية وعيشي الحياة بالواقع ... بس تتزوجي كوني رومانسية زي ما بدك .... الله يوفقك وييسرلك ابن الحلال اللي يبسطك وتسعدي معاه |
أختي أحلام خيالية وفعلا أحلامك خيالية
أيعقل أخيتي أن تفكري بهذا التفكير وأنت بسن 23 مافائدة الجمال والوسامة عند الدين والاخلاق وكرم النفس غاليتي : خوذي مني هذه القاعدة إذا أحببتي شخص من كل قلبك تجدينه بعينيك اجمل رجال العالم من المفترض عزيزتي أن تفكري وتقرأي عن الحياة الزوجية بهذه الفترة تتعلمين وتعززيزين المفاهيم الإيجابية في الزواج وتصححي المفاهيم السلبية من وجهة نظري من سبب المشاكل الزوجية وسامة الرجل :) لان الوسامة تشعل نار الغيرة اما مسألة الرومانسية كأنك تقولين أن كل رجل وسيم رومانسي لا حبيبتي هذا من غزاة الدين من أفلام ومسلسلات يجعلون بطولة الحب في رجل وسيم حتى يفسدوا على بنات المسلمين ويحركوا الخيال عندهن أخيتي أرى فيك العقل والحكمه أتمنى منك أن تجعلي عقلك فقط هو من يقوم بالتفكير وأتركي عواطفك جانبا الحب يأتي مع الزواج نعم لابد من وجود الاحترام بين الزوجين لكن هذا لايمنع من وجود الحب فإذا لم نحب أزواجنا حلالنا من نحب إذا !! غدا وأذكرك بإذن الله مبدأ الرومانسية سيصبح عندك أمر جدا عادي أنت تفكرين به لانك لم تجربي الحياة الزوجية بعد بعد الزواج تكثر عليك المسؤليات طبخ غسيل تنظيف ومن ثم أطفال أين تجدين الوقت الكافي لتفكري مجرد تفكير بموضوع الرومانسية الرومانسية ليست من أساسيات الحياة الزوجية لا تدعي احلامك خيالية إلمهم تقدير الزوج لي وإهتمامه بأمور دينه كلامي كثير لكني متعبه قليلا سأعود إن حصل لي ذلك بارك الله فيك ووفقك الى مايحبه ويرضى |
أختي الغاليه
على أمل لاوالله ياحبيبتي ليه أتحسس بالعكس احس أني أطمن أكثر واكثر كل ماافتح الصفحه واشوف ردودكم الله يحزاك خير يكفي أنك قلتي لي تجبرتك عشان أفكر بدل المره الف وأشكر كل الاخوات والاخوان واحده واحده وكل من أبداء رايه الله يوفقكم دنياء واخره |
أهم شي الصلاح
ولو السالفة عالزين كان البنات عفنوا في بيوتهم00 هذي كلها خيالات00بعد الزواج بتنتهي00 نصيحة وافقي عالرجال وتوكلي على ربك00 واذا عليه هو ان رفضتيه بيلقى ملايين بالبيوت00 بس انتي كل مارديتي واحد بيقولون هذي تتشرط وماعاد احد بيدق بابك هذي نصيحة اخت لك00 وبالتوفيق يالغلا |
| الساعة الآن 05:40 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©