|
إلزام المرأة باستخراج بطاقة أحوال شخصية نهاية العام
قرأت هذا الخبر ولم أصدقه صراحة ولكن يبدولي أنه صحيح . ..
أود أن أسأل عن رأيكم .. وماهي سلبيات وإيجابيات البطاقة ؟؟ والسؤال الأهم .... لو ماكنت موافقة على استخراج البطاقة كيف ممكن أمشي أموري ... أقصد في الجامعة والكلية .. لأنو ممنوع أدخل الإختبار بدون البطاقة ؟؟ الخبر موجود اليوم في الصحف وكان فيه ضابط للورة هو التالي : حددت ضوابط التصوير بتغطية الشعر والرقبة والكتف، وظهور الوجه، على ألاّ يتم قبول أي صورة بالماكياج أو كحل العين . |
ايه لازم بطاقه للاحوال بالذات في البنوك انا اعمل ببنك واغلب امورك لن تفعل بدون بطاقة احوال او جواز سفر ساري المفعول اتمنى من كل الصبايا ان يستخرجوا بطاقات احوال لانها راح تحتاجها كثثير وترى الان ممكن بنت تطلع لبنت مولازم موافقة ولي الامر بنت عمتي طلعت لأختها بطاقه بموجب بطاقتها هي00فهمتي؟ يعني ممكن انا لاني املك بطاقة احوال اطلعلك بطاقه بس طبعا لازم حضوري وتوقيعي انا طلعتها من سنه تقريبا مع فهودي الله يخليه ويومها خاصمهم لانه مالقى له منزلق بس ماقصر واحد من الموظفين ساعده وشكرا على طرح الموضوع لانه برأيي مفيد واتمنى من ادارات الاحوال بكافة مناطق المملكه الاهتمام بوضع مرافق لخدمة ذوي الاحتياجات الخاصه تقبلي مروري |
المفروض ان تكون الزاميه
|
أشكركم على المرور
بنت غامد طيب طيب أنا بروح أطلع بطاقة سمعت إنو لازم يكون معاي شهود .. صح ؟؟ راح أروح مع زوجي يكفي حضورة ولا لا .؟ ايش اخذ أوراق رسمية معاي .. وهل صحيح إنه لازم أتصور عندهم يعني ماينفع أجيب صورة من برا معاي ؟؟ كم تاخذ الأجراءات ؟؟ يعني كم يوم ؟ معليش استحمليني |
هلا
ام نوف الاوراق صوره من كرت العائله فقط ويروح زوجك معك لانك لازم تعبي استماره وهو يوقعها فقط وطبعا التصوير عندهم بس انتي خذي معك اربع صور شمسيه لك علشان يحطوها هم بملف انا خذيت اربع بس نسيت هل اخذوها كلها ولا لا؟ على فكره اذا زوجك راضي ومابيزعل شوفيلك اي وحده قريبتك عندها بطاقة احوال تروح معك عااااااااااااااادي لان في كذا خانه وحده لولي الامر ووحده اذا حرمه تحمل بطاقة احوال يعني اذا ولي امرك رفض يروح خذي اي وحده عندها بطاقة احوال فهمتي؟ بس من المهم حضور الشخص اللي بيعرفك سواء ولي امرك او قريبه لك |
والله يا اختي البطاقه شي جميل فيه ناس يقولون وجيه اهلناا...............
يا اختي عادي انا طلعت لهلي كلهم بس قالي حق الاحوال بدال ماتوزيهاا حط لزقه على صورة الوجه وبالفعل حطيتها وبعدها طلبوها ولا قالو اي شي......... لا البطاقه لها فائده للحرمه......................بشكل ماتتصوروه........... مع العلم انو اهلي ملتزمين ومحافضين مره بس طلعوها عادي.......... |
أنا طلعتها من دون اذن..ولاتنسي ضروري جواز السفر لو عندك حياخذو صوره منه ويطابقوه واذا ماعندك بطاقه العائله ممكن تفي بالغرض..أتمنى لك كل ماهو أجمل بالوجود..في رعايه الله
|
لا ادري لماذا تم تكرار هذه الكلمة .. بدون اذن.. لا يلزم موافقة ولي الامر مع العلم ان اساس الموضوع استفسار ؟؟ ليس لدي اعتراض على النظام الموجود ولكن اتعجب من فرح وسعادة المرأة عند عدم الزامها بالرجوع لولي امرها حتى وان كان هو بنفسه موافق |
لا فرح ولا هم يحزنزن
وبعدين مولازم موافقة ولي الامر يا اخي وشفيها يعني؟ وانت بعد تارك كل السالفه وجيت دققت بحكاية ولي الامر؟!! |
اقتباس:
أنا أراه نظام دوله أكثر من اذن ولي أمر..ثم الله هو المسؤول عنا ونحن أمامه مسؤولين عن تصرفاتنا.. والشرع لم يحرم مافيه صلاح الأمه..اذن لماذا أنت مستشيط غضبا وأعطيت المسأله أكبر من حجمها..أتمنى لك كل ماهو أجمل بالوجود..في رعايه الله |
اقتباس:
انا لم اتكلم عن موضوع ولي الأمر ولم اتطرق اليه ابدا انا اتكلم عن ردودكم المضحكة قليلا.كان الموضوع الزام المرأة بأستخراج بطاقة احوال ..اوكي فهمنا الموضوع هذا ما اضحكني في ردودكم 1-أنا طلعتها من دون اذن 2- ممكن بنت تطلع لبنت مولازم موافقة ولي الامر في الاساس ايش دخل ولي الامر في الموضوع هذا وفي الاخير.. الموضوع سهل وواضح ومايحتاج نلف من بعيد |
وليش نلف ؟
انا ذكرت ان البنت ممكن تطلع لبنت يعني مولازم حضور ولي الامر لان موافقته من عدمها ما تلزمها وهذا مو من عندي بل قانون موضوع من الدوله فأنا حبيت اوضح للأخت مدى سهولة استخراج البطاقه مايحتاج انت تلف مو انا؟!!!!!!!!!! |
يا جماعه كل واحد يصلح سيارته......ايش فيكم قلبتوها اهواش!!!!!!!!
عندي تعليق بسيط وهوا ان اللي عندهم تحفظ من ان صورة المرأه موجوده على البطاقة >>>>تحط عليها لصقه متينه او ورق ابيض لاصق ولا تنزع الا وقت الحاجه وتطلب ان اللي تتأكد من صورتها مرأه |
ياليت تكون الزامية
الحمدالله طلعتها قبل ماتزوج ولا كان زوجي ماسمح لي اطلعها والمشكلة الاكبر دايم زوجي يزعل اذا استخدمتها !! مادري شالحل |
آيجابياتها آكثر من سلبياتها وربما يكون مالها سلبيات ريحتني بـ آمور كثييييييييييييييييييييرة ..
|
انا طلعتها من فترة وهي فعلا ماتحتاج وقت بس معرف عنك وصورة شمسيه لك وحدة فقط وصورة من دفتر العائله
|
اقتباس:
واللي يقول ألزق ورقة على الصورة عشان مايشوفها أحد أقوله أسمع قصة مايقوله قريبي عن هذا الأمر وقد سمعت الكلام هذا منه شخصياً قبل يومين تقريباً . يقول أنه واضع ورقة على صورة زوجته في جواز سفرها ، وسافر إلى دولة مجاورة لنا وعند الحدود يوجد مكان لمطابقة صورة المرأة (بمعنى أن هذا المكان هو الوحيد الذي يحتاجون فيه التأكد من الصورة) ويقول أنه كل موظف احتاج للجواز من أجل المعلومات أو لتسجيل الأرقام يقوم برفع الورقة ويناظر إلى صورة زوجته مع انه لايحتاج إلى الصورة وإنما يحتاج إلى رقم أو اسم ، ويقول قريبي تعبت من مهاوشتهم كل واحد يمسك الجواز يفتح الورقة ويشاهد أمرأتي وطبعاً هذا الكلام ينطبق عندما يدخل حدود دولتنا الموقرة . انتهى. طيب ايش تتوقعوا راح يكون تصرف قريبي المسكين بعد فترة !!! ألا تتوقعوا انه راح يقول وش فايدة اني مغطي زوجتي وكذا رجال شافها ، يللا أكشفي يازوجتي وجهك ولكن تمسكي بتغطية شعر رأسك ولسان حاله يقول :((سيجدوا في المستقبل عذر آخر لكشف شعرك بأي حجة واهية ) .انتهى. ولعلمكم انا سوف أستخرج بطاقة لزوجتي ، ولكن هذا لايمنع من أدلوا برأيي في الموضوع وسوف أعود لكم بطلباتهم من هناك . وسلامتكم. |
يعني صرفوا نظر عن البصمه،؟؟؟
ياهادي ،دمتم بخير |
انا ما اشوفها سالفه كبيره
عادي بطاقة احوال للمرأه |
اقتباس:
|
سبحان الله انا مستغربة جدا الى الان مازلتم تتناقشون في امور البطاقة والصورة لاحول ولا قوة الا بالله
ربنا ان شاء الله يهديكم شنو المشكلة اذا فيها صورة والوحدة محجبة ومش حاطة اي مكياج وبعدين هي مارح تمشي في الشارع وتعلقها حتى كل الناس تشوفها والاسلام عمره ماحرم شي فيه مصلحة الانسان ربنا يهدي |
طلباتهم مثل ماوعدتكم
أولاً : المرأة تحتاج إلى تعريف ويكفي واحد من ثلاثة : 1- عن طريق إمرأة عندها بطاقة أحوال . 2- عن جواز السفر . (وهذا الأسرع والله أعلم) . 3- عن طريق ( الزوج - الأخ - الأب) . في الحالة الأولى والثانية تراجع المراة بنفسها القسم النسائي في الأحوال . أما في الحالة الثالثة فيراجع واحد منهم (الأأب أو الأخ أو الزوج) (في حالة الأخ يحتاجون صورة من بطاقة أحواله ، أما الأب والزوج فتكفي صورة دفتر العائلة ) القسم الرجالي ويعبي النموذج ويرفق صورة الدفتر وياخذ رقم وينتظر دوره وبعدها يعطوه موعد لكي تحضر فيه صاحبة الطلب لكي تتصور في القسم النسائي . وسلامتكم طبعاً هذا الكلام فيه اختصار ، لأنه بعض الحالات يحتاجون يرجعون للأرشيف كي يتأكدو من المعلومات (مثل ماحدث معي وقالوا تعال بعد 3 أيام ) . وبالتوفيق أختي . |
انا طلعتها من زمان واستفدت منها كثير خصوصا بالبنك مو كل شوي اخذ بطاقة العائله موقف صار لي مره ابحاسب بايكيا وطلعتها احسبها بطاقة البنك وماكنت حاطه ستكر على الصوره المحاسب مباشره رجعها بعدها صرت مااشيل الستيكر منها نهائي |
غاليتي البطاقه اصبحت شي ضروري للمرأه
انا بعد الطلاق على طول طلعتها لان الورقه تاخرت شوي وكنت محتاجة اثبات والحمد لله اجرائتها سريعه انتي توكلي على الله ولاتستخميها الا في اماكن نسائية |
انا طلعتها من فتره وبالفعل مره مهمه وسهل استخراجها
وبالتوفيق للجميع |
اقتباس:
أخوي قول لقريبك يـــــــــــــــــــــــــــــــــرفــــــــــــــ ــــض وبقوة ان رجل يفتح صورة زوجته ومن حقه ان يطلب امرأة هي اللي تشوف الصورة والحق معه ولا يقدر احد يسويله شي ولو جابوا اكبر راس هذا نظام وعرف ودين ليش الدنيا لعبه وانا مسؤله عن الكلام اللي قلته اخوي ضابط وتهاوش مع واحد في المحكمه عشان بيفتح صورة امي وطلب حرمه وقاله نظام وضع على راسي لكن من حق المواطن يلزم الجهات المعنيه بتوفير نساء لتأكد او جيب اي حرمتين مراجعات مارات بشارع اي شي يشفون ويشهدون وانا موافق وفعلا مافتحها الواحد مايصير مخفه كل من قال بفتح اتأكد سكت وسلمله البطاقه!!! |
اقتباس:
نعم يا أختي نعم كنا ومازلنا وسنظل هذا ديــــــــــــــــــــــــــــن وكشف الوجه محرم بزينه او بدون والادله كثيره فانحن لا يهمنا المعارضين والذين يرونه عدم تطور ورجعيه نحن نثبت تطورنا في مجال التطور وليس بالتكشف ونقول تطور وضروريات الحياة نعم ضرورة ولكن ما اخلي كل من هب ودب يشوف صورتي يكون موظف اخذ بينات ويشوف الصورة لييييييش !! والله لا انا بايعه ديني ولا زوجي ديوث |
اقتباس:
هلا اختي الفاضله بس يالغاليه الاحوال المدنيه نساء مو رجال يعني كل الاجرائات والصور نساء الي يسوها مو رجال والاستخدام تستخدميها في الاماكن النسائيه وبطاقة العائله في الاماكن الي فيها رجال وبعد فتره باذن الله يمكن يتطبق نظام البصمة اريح ولا فيه صوره بس صدقيني كلنا ولله الحمد نخاف الله واهالينا مو ديثوثين بالعكس الحمد لله انهم ناس يخافوون الله وفاهمين زين احنا لاحنا بايعين ديننا ولاناس منحرفين ولله الحمد بس الواحد لايحكم على الشي الا بعد مايجربة |
ام السوسه انا كلامي على جواز السفر خصوصاً وخاص بعد كلام الاخ في الله والاخت نهرين ردت بعد رد الاخ في لله يعني تعليقها على جواز السفر اتمنى تكوني فهمتي وكلام الاخت جدا مستفز اتمنى تقرأيه ..تحياتي
اقتباس:
|
اقتباس:
يا حبي لها.. لها فتره تقولي يالله وللحين ما سويناها...ان شااء الله عالاسبووع الجااي.. الله ييسرها لك ولناا :22:...لا تنسين تبشرينا لا طلعتيهااا :22: على فكره هنااك فيه وحده تبيع (جيب الحشمه ) :d...هذا الله يسلمك مثل الجراب الشفاف او الغلااف ..بالضبط ما ادري وش اسمه...بس هي تمشي تبيعه بينكم وتسميه((جيب الحشمه:d))...لانه كله شفاف عدا مكان الصووره مغطيه بعلامه السيفين والنخله :22: فـ مو مبينه الصووره تقدرين تطلعينها في اي مكاان ..لانها محفووظه :22: |
أنا طلعتها والصراحه مرره مريحه .. خصوصا في البنك دايما يعقدوني ويقولون لازم معرف طيب أنا معرفي رجال كبير بالسن عيييب اتعبه معي كل ما رحت للبنك ومن ناحية صورتي أنا احجبها عند التصوير يعني اضع استكر على الصوره فقط ... الحرص زين |
اقتباس:
والاختلاف في الراي لايفسد للود قضية وجواز السفر شي ضروري برضوه يعني بالله وشلون بتسافرين ؟؟؟ واذا صديق الاخ اخي في الله صارله هالموقف خلاص يعني الواحد اذا بيسافر يكنسل علشان ناس حقيره انا مره وانا جايه من السفر واخذوا الجواز حطوا جواز فوق صورتي وكتب الرقم ولا طالع فيها ابداااا ولكن هذا واحد من خمسه ان شاء الله يكونوا على هالنسبة الي حددتها هذا يعتمد على ذمة الانسان وهذا بالنسبه للجواز الي بيسافر غصب عنه بيخرجه اما ردك للاخت نهرين فهذي وجه نظرها ويمكن هي من النساء الي تكشف وفيه نماذج كثيييييره اعرفهم وبعضهم صديقاتي يكشفةا ولو تتناقشي في موضوع الجواز ماراح تتطلعي معاهم بنتيجه علشان كذا انا احترم وجه نظرهم مع اني اوصي عليهم من فتره لفتره ((قال تعالى ((وكل انسان الزمنه طائره في عنقه )) |
بارك الله فيك ام السوسة على الرد فعلا لقد اجبتي عني وبارك الله فيك على التوضيح والحمد لله على وجود امثالك في منتدانا العزيز
|
اقتباس:
|
الله يعطيكم العافية جميعا فردا فردا
احترم وجهة نظر الكل ... وماشاء الله الرجال لهم وجهة والحريم لهم وجهة نظر مختلفة لكن عندي تعليق بسيط سواءا وفق الزوج أو ولي الأمر أو لم يوافق هذا شي راج له لأن هذا نظام دولة يعني بالله كيف بنمشي أمورنا .. بطاقة العائلة لغوها وماصارو يقبلوناها .. يعني كيف أثبت نفسي ياناس والله زعلت على بعض صديقاتي لما سحبو من الوظائف بسبب تعصب أهاليهم على بطاقة الأحوال .. . . أشكرك بنت غامد أم السوسة سابنا غارق في الأحلام سلة أوجاعي النهرين عابرة سبيل أخي في الله هنون 33 وأشكر الباقييين أما عني رحت أطلع البطاقة الحمد لله ولكن ملفي كان ناقص بعض الأوراق فأعطوني موعد ووالله خايفة يأخروني لأني محتاجتها بعد اسبوع ضروري ما راح أرتاح إلييييين أشوفها بعيوني راح أرجع أطمنكم بحول الله الأسبوع الجاوي وأقول لكم إيش صار معاي |
اقتباس:
ياليت من الاخت الكريمه او اي احد يعرف؟؟؟؟ مالمقصود بالمعرف.....؟؟؟؟؟؟؟ |
اقتباس:
هلا فيك عابره واسعدني ردك ولكن انا ماحمكت عليها هي تكشف او لا قلت يمكن تكون ؟ وججه نظرك احترمنها جميعا لاكن سبب ردي عندما قلتي انك مانتي بايعه دينك ولا زوجك ديوث يعني هل يعقل ان نكون كلنا بايعين ديننا هذا اكثر شي خلاني ارد واسفه على ازعاجك وان شاء الله تكوني متقبله وجه نظري مثل ماانا مستانسه وانا انتاقش مع اخت مثلك الله يسعدك ويسر امورك يارب |
اقتباس:
هلا حبيبتي اختي الاخت نهرين علقة بعد ردك ولم تنفي كشف وجهها وعلقة بأنها توافقك الرأي اما قولي لاني بايعه ديني ولا زوجي ديوث فايا اختي انا قلت عن نفسي وزوجي ولم اتعرض لأحد ولم اقل من يفعل هذا الفعل ديوث وتكون بايعه دينها انا لم اتعرض لاحد ومراعيه حدود الحوار انا وصفت ديني ووصفت نفسي انا لو تنطبق السماء على الارض ما عمري حخلي احد في الحدود يشوف صورتي امامي وانا مستسلمه حرفض وان كلفني ألغاء السفر وان زوجي وافق و وقف مستسلم والرجل كشف الصورة وهو عارف ان من حقه يرفض فيصبح بنظري ديوث (وللي انا واثقه ان مستحيل زوجي يرضاها رفع الله قدره) انا قلت وجهت نظري وقلت لا انا بايعه ديني ولا زوجي ديوث اقصد حتى نرضاها على انفسنا ونتراجع خوفن من كلام الناس وحتى ما ينقال عنا رجعين,,وتقبلي تحياتي (سبحانك اللهم وبحمدك اشهد ان لاإله الا انت استغفرك واتوب اليك.. |
كلام غير صحيح مجرد إشاعة أنا سمعت المفتي يقول أنه لن يسمح بالبطاقة الشخصية للنساء وإذا كان ولا بد فليكتفى بالبصمة
الخبر عار من الصحة جملة وتفصيلا وغنما هو من ترويج الصحف لكي ترى ردة الفعل من الجهور فعليكم الحذر من هذا الخبر الكاذب وولاة أمورنا لن يرضوا بهذا البتة فعليكم بالانكار بالوعظة والحمة والله يحفظ علينا أعراضنا ونسائنا وكنت أتمي أختي أن لاتنقلي هذا الخبر لأنه لافائدة من كتابته هنا 0 |
اقتباس:
|
| الساعة الآن 12:05 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©