|
زميلة دراسة احرجتني مع اهلي
السلام علكيم ورحمة الله وبركاته
اخوتي في الله انا امر بمشكله مع فتاه كانت تدرس معي في المرحلة المتوسطة (كانت طالب منازل) كانت تكبرني بسنه المهم ان هذه الفتاه احبتني بشكل مو طبيعي لدرجة انها كانت تطلب مني ان اقول لها امي مااعرف من ايش تعاني من الامراض النفسيه لانها بجد ازعجتني وسببت لي احراج مع اهلي صار ابوي وامي يسألوني من هذي وايش تبغى المشكله انا مو عارفه ايش تبغى مني في المدرسة صارحتها وقلت لها لاتتصلي على البيت نهائيا وخلاص ابعدي عني المشكله بدايتها ان المعلمات الله يسامحهم كانوا يخلوني افهمها بعض الدروس اللي فاتتها وبكذا تعرفت على وانا اعتبرتها مثل باقي الزميلات لي في الفصل لكن هياماادري كيف مشاعرها تجاهي ؟؟؟!!! كانت متعلقه فيني ايام الدراسه بشكل مو طبيعي بس انا كنت متوقعه انو الموضوع عادي لكن الظاهر انه العكس ..... بعد ماتخرجت من المتوسط دخلت الثانوي وصرت بمدرسة وهيا بمدرسة وارتحت لكن صارت تتتصل على البيت بشكل يومي لدرجة اني قلت لها لاعاد تتصلي علي انا مو فاضية عندي مذاكره( لما اقول لها هالكلام تجلس تبكي )انا احزن عليها بس هيا ايش تبغى مني ياناااااااااااس تعبت تخيلوا اليوم اتصلت بعد 3سنوات انا الان في الجامعه وهيا الى الان تتصل ومانسيت الرقم ولانسيتي بالاإضافه الى ان اتصالتها تزعجني وتحرجني مع اهلي لانها انسانه غربيه ماادري ايش تبغى وانا ومابى اغلط عليها لكن تضايقني اتصالاتها على بسبب وبدون سبب... علاقتي بها كانت سطحيه جدا فقط كنت اجلس اشرحلها الدروس فقط لاغير مااعرف سبب تعلقها بي ولااعرف ايش تبغى بالضبط مني ... ساعدوني في حل المشكله هذي ايش اعمل معاها ... المصيبة انها تتصل علي من كذا رقم واذا رد احد من اهلي وقال لها اني مشغوله تقوم تسولف وتسأل عني الشخص اللي رد عليها وهذي النقطة تسبب لي احراج مع اهلي (يستغربون اسلوبها ) بجد انا مليت من هالقصه ماادري ايش الحل.. |
ذكرتيني بوحدة كانت تتصل على أختي و تقعد تحكي معها ساعاااااااااات و اختي كتير كرهتها و صارت تخلينا نكذب عليها و نقولها انه هية مو موجودة او بالحمام او أي حجة
و صارت لما احكي انا معها تقعد تحكي معي ساعااااات كمان و الحمد لله بعد ما تزوجت اختي الفتاة فقدت الأمل و عرفت انه تغير رقمها و ما حدا مننا أعطاها الرقم الجديد لأختي حتى انتهت القصة ما بعرف اذا بعد سنين رح تجيب الرقم وترجع تتصل و لا شو هدول ناس غريبين لازم الواحد يحط لهم حد حتى لو بالوقاحة الله يعينك خلي حدا من أهلك يخبرها انك تزوجتي او هاجرتي و تغير رقمك و ما تعطوها رقم جديد خليها تفهم انه انتو بتتهربوا منها و ما بدكن ياها تتصل |
والله هيا فاهمه اني ماابغى اكلمها قبل خمس سنوات اتصلت وقفلت بوجهها الخط لانها
قالت لي اول مارديت : سهام تحبيني ؟ انا قلت الو مين من انتي ورجعت كررتها مره ثانيه !! وعلى طول قفلت بوجهها واكثر من مره اقفل بوجهها لاني ماابغى اتجادل معاها هيا مو راضيه تفهم ... واهلي مايكذبون اذا احد طلبني لازم يخلوني اكلمه والله حاااله مشكوره اختي الله يسعدك |
ممكن تخوفوها بطريقة ما
يعني بالشرطة بشي هيئة أخلاقية و ما إلى ذلك خلي أحد من اخوانك او أبوكي المهم رجل يحكي معها و يخوفها و بهالطريقة ممكن تحل عنك و تعرف انها ممكن تحط حالها بخطر لو اتصلت مرة تانية |
الله يعينك انا كانت عندي وحده كذا بس مو للدرجه هذي يعني لما هزاتها فهمت من نفسها الحمد لله
|
خلي اهلك لما يردوا عليه مايخلوكي تكلميها الى ان تمل وتبطل تتصل
|
ماريا13
مشكوره ياقلبي انا فكرة اني اعمل نفس اللي قلتيه بس اخواني يقولون لي اسفليها لاتردين عليها ... طيب القلب مشكوره على المرور المشكله هزأت كثير بس مافي فايده ...الله يعين. زوجة أحمد هلا فيك والله شكلي هذا اللي راح اعمله بأستنجد بأخواني لعل وعسى تستحي على وجهها وتفكني من شرها ... |
ادعي ربك الله يكفيك شرها خير وش تبي
يبدوانك طيبة بزيادة معها الله يسعدك يارب اوانها كانت تعاني من بيتهم الله يهديها ويصرفهاعنك مالك الاتغيري رق تليفونكم وترترتاحون منها الاعاد اذا تعرف اسمك كامل بتجيبة الله يهديها |
احمدي ربك انه على الثابت:)
تخيلي توصل للجوال وتبدأ بالمسجات والوسائط:.:.::24: خلي أمك ترد عليها رد محترم وتنهي هالمهزلة..:30: او اذا شفتوا رقمها لاتردون:25: |
من رائيي ان تخوفيها من الشرطة او انك تخبري اهلها واذا ما فاد انصحك انك تحكي مع احدى من اهلها
|
السلام عليكم ورحمة الله وبركاته اختى العزيزة الله يكون معكى ويكون فى عونك هيه فعلا حاجة صعبة جدا انا مش عارفة بعد ما قفلتى التليفون بوجهها وترجع تتصل انسانة مملة جدا افضل شى تغيروا رقم التليفون ويكون الرقم سرى حتى لا تعرف ان تحصل عليه ويا ترى بتعرف عنوان المنزل كمان
|
خلي أحد كبير يناصحها هذي مسكينه ممكن تكون وحيده
لكن لو كان قصدها قلة أدب ... لا اطرديها |
هي متزوجه ولا لا؟وبعدين ايش تتكلم معاك يعني في مواضيع ممكن حابه تضيع وقت وزهقانه الله يعينك
الغريب انه بينك سنه وبتقول اقوليلي ماما اكيد هادي مجنونه الله يعينك ويفك منها اذا الموضوع مزعجك خلا ص قوليلها انا مابحبك ومابحب اكلمك اكيد اكيد راح تحل عنك |
صحيح انا في وحده قريبتي مجنيناي ومااحب اكلمها لانها عندها كلام كتير بيزعجني ومابتتكلم الا عن مشاكلها وامراضها وامراض زوجها يعني كله نكد وبدها تعرف كل شي عني خليها على الله
المشكله اني انا ماني جرياه عشان اصارحها واقولها الاسباب الي تخلي اهمل تلفوناتها ومااتصل فيها |
زينة الغنادير
ادعي لي ان الله يكفيني شرها مشكوره ياغاليه على المرور والله كانت علاقتي بها سطحيه وكنت جدا جديه معاها ورسميه يعني حتى لما كانت تتصل ايام الدراسه ماكنت اعطيها وجه يادوب كلمتين ورد غطاها بس ماادري ايش فيها على حرم المعلم يوووووووه هوا تلفيون ثابت وازعجتني فكيف لو كان جوال الحمد لله انها ماتعرف رقمي مشكوره ياقلبي بسمةصالح الظاهر اني باكلم اخوي الكبير يتصرف معاها مافي غير هذا الحل لان اهلي رافضين يغيروا الرقم نهائيا مشكروه يعيطك العافيه |
اقتباس:
المشكله اهلي الله يهديهم رافضيرن تغير الرقم والا كان غيرته من زمان ... لا ماتعرف المنزل الحمد لله بجد محيرني تعلقها فيني ؟؟؟؟ مشكوره اختي ربي يسعدك اقتباس:
على حسب معلوماتي اللي اذكرها عنها انها مطلقة وعندها بنت كان عمرها سنتين بوقتها وعايشه مع امها وابوها متوفي ....ماادري كيف حالها ...انا لو اعرف انها متحاجه وقفتي معاها بشيء صدقوني ماراح اقصر معاها بس بصراحه انا ماشفت هالشيء منها اللي شفته منها انها وحده فاضيه وبلا اخلاق وازعجتني بعيشتي وكل مااقول لها لاتتصلي واهزأها ترجع تتصل بعد سنين بالله هذي كيف اتعامل معاها؟؟؟؟ .... اقتباس:
بصراحه مااعمري شفت انسانه مثلها ...والله يااختي ان قلت لها انا مااابيك تتصلي علي نهائيا وقلت لها انا ماارتاح لك وهيا عارفه هالشيء بس ماادري شلون؟؟؟ماتحس ترجع تتصل بعد كم سنه غريب امرها ؟؟؟ اقتباس:
مشكوره اختي ربي يسعدك... |
حرااام هذه وحده يائسه من حياتها وما عندها اسلو تتعامل فيه مع الناس
المهم عشان تتعلمو ما تعطو رقم التلفون لكل من هب ودب التلفون للاستعمال الخاص فقط والله الله يسامحني احيانا اعطي رقم غلط لناس انا طبعي ما اعرف انهي المكالمه يعني اذا حدا اتصل فيي انتظر هو ينهي المكالمه واحيانا تنكسر ايدي من حمل السماعه |
اختي الكريمة
حاولي تفهمين هي محتاجة لإيش بالضبط....يمكن محتاجة فعلا لصديقة انتي ماجاك منها شر غير مكالماتها الكثيرة وهاذي مقدور عليها بالتفاهم كلميها وقوليلها انو في اوقات ما اقدر اكلمك فيها واهلي من النوتع للي مايحبون البننت تتكلم كثير وخلاص اذا ما نفع نعها ممكن انك تتهربين من اتصالاتها عشان تفهم لكن مافي داعي لتضخيم الامور يالغالية وانتي عارفه ان البنت عندها مشكلة نفسية فلا تزيدين الطين بلة مثل مايقولون...... حاولي تفهمينها واذا حيتي انك مو قادرة انهي العلاقة اللي بينكم وخلاص...الامر جدا بسيط.... |
استاذتي الغاليه حرم فلان الفلاني
عودا حميدا واهلا بك اختي الغاليه انا لم اضخم الامر الامر مضخم من الاساس مشكلة البنت هذي الله يهديها ويصلح حالها انها تحبني مو حب طبيعي ابدا انا لو شفت الشيء هذا كنت راح اكون لها الاخت والصديقة وكل شيء لكن اللي يصلحها هيا مقصدها شيء ثاني وفي شيء انا ماذكرته لاني مو قادره اذكره (ماتجرأت اقوله لانه مخزي ) وهو لما كانت تقول لي وقولي لي ماما كانت تطلب انها تظمني ليه انا مو عارفه ليه ؟؟؟؟ اذا هيا محتاجه وقفتي معاها مالها داعي هالحركات طريقة كلامها معي واسلوبها في الكلام هي اللي خلتني استنفر منها وهذا الشيء ماذكرته لاني بجد مو قادره اقول شيء زي كذا عيب والله عيب انا عارفه انها تعاني من مشاكل اسريه ممكن نفسيتها تعبانه ....ولو كنت اشوفها محتاجه وقفتي معاها كأخت وصديقة على عيني وراسي لكن احتياجها لشيء آخر انا مو مستعده اماشيها فيه (اعوذ بالله ) ...فهمتني ياغاليه والله لو مو الموضوع عجزني كنت ماكتبته وطلبت لمساعدة ....وبخصوص اني انهي علاقتي بها والله انهيتها من المتوسط لكن هيا ماتركتني بحالي الى الان تتصل ...وهذا شيء مزعجني اكثر .... وعلى العموم طلبت من اختي الكبيره مكالمتها وطلبت منها انها ماتتصل على وحذرتها وتخيلي ردة فعلها قالت بكل برود (انا كلامي مع حبيبتي ) بالله عليك هذا كلام ينقال؟؟؟؟ استغفر الله العظيم من هذي العقليات ومن كذا ناس .... |
اختي الحبيبة (ابداعالقلوب)
ما شاء الله عليك وعلى اخلاقك.....عزيزتي اذا شفتي منها شي خارج عن الحدود ابتعدي عنها ولا تلتفتي أبدا ناحيتها وخلك قوية موراضية على العلاقة قوليها وبكل قوة انا مو راضية على هالحركات أبدا ابدا.....وبعدها اتركيها خليها لوحدها تفهم.... سبحان الله هذه الظاهرة منتشرة بشكل فظيع اللهم عافنا ويعافيك يالغالية كوني قوية وواجهيها لان اعتقد شافت فيك شيء من الضعف هالنوعية تنفع معها القوة ولا تنسين انك تدعيلها بالهداية لعل الله يسمع دعوتك ويهديها وان قدرتي تنصحينها لا تترددي أبدا في ذلك...لان مهما كان تبقى صديقة أو زميلة بارك الله فيك |
اهلين فيك يالغاليه
انا من ايام المتوسط وانا قايله لها لاتتصلي علي بس هيا وجدت فيني الطيبه الزايده على اللزوم ولكن حذرتها اكثر من مره بس الله يهديها ويصلحها ويكفيني شرها... مشكوره ياغالية... |
ما عندكم كاشف الأرقام تعرفون رقمها ولا تردون
وحتى لوتغير الرقمبس تسمعون صوتها اغلقوا عليها الهاتف صحيح هي الحركة فيها وقاحة لكنها ما فهمت بالأسلوب اللبق مافي إلا كذا وأتوقع صار الجميع يعرف صوتها من كثر ما تتصل الله يهديها ويساعدها على نفسها |
انا اتوقع انها معجبه فيك وزياده على كذا انك سويتي لها معروف وشرحتي لها الدروس
الحلول: اذا كلمت خلي اهلك يسألونها من انتي اذا قالت اسمها خليهم يصرفونها او يقولوا لها انك ماتبغي تكلميها او صارحيها وش تبغى منك وأسأليها عن سبب كثره اتصالها وتعلقها بك. او اذا كلمتك تجاهليها وقولي من انتي ولاأعرفك..واذا حاولت تذكرك ببعض المواقف تجاهليها. |
ماريا13
حلوه تكلمك ساعات ؟؟؟؟؟؟؟ ولاتعرفك |
انتي غيري رقمك
|
السلام عليكم
بسم الله الرحمن الرحيم في البداية حاب اني اشكرج على طرحج لمشكلتج وبالذات لمشكلة مثل هاذي المشكلة إلي تعتبر حساسه من جهة ومن جهة أخرى هي مشكلة مرهقة ومتبعة للذهن ، بالذات للاشخاص اصحاب التربية السليمة والاخلاق الحميدة مثلج انتي وهذا واضح من خلال معرفتج لمبتغى زميلتج منج وأيضاً من خلال رفضج لهذا الامر وترفعج عنه فا لج مني كل الشكر والتقدير. اما بالنسبة لموضوع الاخت هاذي ، إلي اسأل الله سبحانه وتعالى ان يهديها ويرشدها إلى سواء السبيل فالامر متشعب؛ اولاً : شي متعلق في البنت هاذي نفسها. ثانياً : امر متعلقفيج انتي وهو بطريقة تعاملج معاها. بالنسبة للشي المتعلق بزميلتج اولاً اتضح لي من كلامج انها تعاني من مشكلة نفسية عميقة في داخلها وهذا الامر انا استشفيته من الكلام إلي قالته لج او الطلبات إلي كانت تطلبها منج مثل ( كلمة ماما) او ( انها تضمج لها او تحضنج) هذه الامور كلها تدل على ان عندها مشكلة عااطفية يعني عندها خلل في عطفتها بشكل مفرط ، وكذلك في نفس الوقت هي عندها نقص او حرمان من هذا الجانب ، فدائماً الانسان إلي يعاني من الحرمان وبالذات الحرمان العاطفي يلجأ دائماً لتعويض هذا الحرمان في اشخاص آخرين سواء كان عن طريق بالاخذ او العطاء . اما بالنسبة للامر إلي يخصج انتي فانا اتوقع انج انتي كنتي سبب رئيسي في هذا الامر لكن بطريقة غير مباشرة. كيف؟ طبعاً من خلال تعاملها معاج والفترة إلي كنتي منها قريبة في ايام المدرسة هي وجدت فيج الشي إلي هي محرومه منه وهو اكيد الحنان والعطف واللطف وغيرها من الامور والاشياء إلي تفتقد لها و محرومه منها ، طبعاً انتي كنتي تتعاملين معاها بكل حسن نية وبشكل طبيعي وبدون تكلف لكن الامر لها يعتبر مختلف، لانها اكيد حست ان اهتمامج فيها طبعاً مختلف عن اهتمامج بغيرها - طبعاً هذا من وجهة نظرها هي- فاهي تعتبر ان تدريسج لها وغيرها من هاذي الاشياء شعور خاص انتي اتكنينه لها مثل حب او اعجاب فيها او ما شابه فلذالك هي تحاول انها تتمسك بهذا الشي و .، دائماً مثل هذه الشخصيات يكون عندها حس عاطفي مرهف يعني يقدر يعرف ويحلل شخصية الشخص إلي يتعامل معاه وهذا واضح من إصرارها على التحدث معاج رغم تمثيلج للقسوة ومحاولاتج طبعاً إلي فشلت في انج تصدينها عنج والسبب في هذا الفشل هو انتي، لانها مثل ماقلت قبل شوي ان هاذي النوعية من البشر عندهم حس عالي مرهف يخليهم يشفون ويحسون بحقيقة الشخص، فإلي حاصل معاج انج انتي قاعدة تمثلين عليها دور الشدة والغلظة لكن هي متأكدة مليون بالمئة ان هذا كله تمثيل وانج انتي تتعمدين هذا الامر لانها هي ماتشوف صورتج الخارجية لكن هي تشوف حقيقتج من الداخل فلهذا هي تزيد من إصرارها كل ما زدتي انتي في التمثيل وهذا الاصرار من قبلها لانها تظن ان يمكن انه يأدي لنتيجة مع مر الزمان مثل ما يقال في الامثال: ( كثر الدق يفك اللحام) و إلي اهم من هذا كله ان سبب إصراراها هو انها تحس انج انتي تملكين الشي إلي هي تفتقده وإلي ادور عليه من زمان ، فطبعاً في المقابل هي مستعدة اتسوي اي شي مقابل انها تحصل عليه . فالمطلوب منج احين ياختي الكريمة لحل هذه المشكلة انج تستجمعين قواج مره ثانية وتركزين في طريقة إنهاء هذه المشكلة والمهزلة إلي يمكن تأثر عليج وتسبب لج قلق في المستقبل والحل يكمن في قوة المجابهة يعني إذا اتصلت مره ثانية حاولي انج اتكونين جادة في انهاء هذه العلاقة من خلال الموقف القوي إلي بتتخذينه ضدها يعني حاولي انج اتحسسينها انها ماراح تحصل إلي تبغينه منج مهما صار ومهما طال الزمان وانج مش مستعدة للتمادي في هذا الامر بحيث انها تحس انج ممكن تسوين اي شي مقابل انها تنهي علاقتها فيج وطبعاً هذا يحتاج اول شي لإرادة وعزيمة من داخلج وهذه العزيمة ووالقوة إلي نابعة من داخلج بتنعكس حتماً في اسلوبج معاها في الكلام ، وطبعاً اولاً وآخراً ما ننسى ان التوفيق بيد الله تعالى لانه هو الاساس في كل الامور . وفي امر مهم لازم تعرفينه ان مشكلتج محد راح يحلها إلي انتي يعني ماينفع انج ادخلين حد ثاني مثل اختج او غيره لان زميلتج ما بتستسلم لهم لانها تعتقد في قرارة نفسها انج اتحبينها ومن هذا الكلام لن إذا حست وعرفت انج انتي بالفعل كرهتيها وماعندج استعداد انج تكملين علاقتج معاها وحست انج فعلاً قاسية وما عندج الشي إلي محرومه منه صدقيني انها راح تقطع وبشكل نهائي، ان شاء الله تعالى |
عفواً .. يُغلق الموضوع .
|
| الساعة الآن 10:49 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©