|
اخت زوجي لم تراعي وجودي في بيتي ( حُلت و الحمدلله )
السلام عليكم ورحمة الله وبركاته اخواني واخواتي ما كنتش اتمني اني اكتب عن مشكلة ليا في يوم من الايام بس بجد انا اتخنقت ومش عارفة هل انا عندي حق ولا انا ببالغ قوي زي ما جوزي بيقولي من غير ما اطول بدخل في الموضوع مباشرة الموضوع وما فيه ان اخت زوجي قاعدة عندي من فترة (حوالي 3 اسابيع) لظروف عندها (هي غير متزوجة ) المهم انها من يوم ما جت وهيا واخدة راحتها في البيت علي الاخر وكأنه بيتها طبعا ده في الاول كان مدايقني لان انا بحب اعيش حياتي بنظام واستقلالية بس قلت مش مشكلة علشان خاطر زوجي وانا بعمل ثواب وهيه كمان طيبة بس ما بتاخدش بالها من حاجات كتير انها المفروض ما تعملهاش لان ده في الاخر بيتي مش بيتها المهم انها خلاص ماشية يوم الجمعة وانا قلت انا هتحملها مع العلم ان والله بعاملها بما يرضي الله وباجي علي نفسي كتير علشان ما ادايقهاش وكل يوم أكل اشكال والوان وحلويات ( جوزي بيقولي انها ضيفة ولازم اعمل اكل كويس مع انها بتتعامل في البيت وكانها صاحبتة مش ضيفة خالص ) المهم انا خلاص قلت لنفسي لازم اكون كويسة لاخر لحظة وبلاش اعمل حاجة تهد كل اللي انا عملتنه الاسابيع اللي فاتت لان طبعا كل اللي حصل واللي هيحصل هيتنقل بيتهم بالحرف الواحد النهاردة بقي حصل موقف خلاص كنت شوية وهنفجر تخيلوا وانا نايمة سمعت الجرس بيضرب وهيه فتحت الباب وسمعت كلام كتييير المهم انا قمت علشان اغسل وشي ولسة بفتح باب اوضة النوم الا والاقي واحدة معدية من قدامي داخلة المطبخ!!!!!!!! طلعت بنت عمها وجاية تزورها !!!!!!!!!!!!!!! كده من غير ميعاد ومن غير انا ما اعرف انها جاية وكمان ايه واخداها وداخلين المطبخ يعملوا فطار انا طبعا اتحرق دمي ودخلت اوضتي تاني جوزي بقي كان موجود ودخل لقاني بغلي بيقولي فيه ايه قلتله انت بتسألني فيه ايه ؟؟؟؟؟؟؟؟؟؟؟؟؟ هوه ايه اللي بيحصل ده انا مش فاهمة ازاي واحدة تيجي كده من غير ما تتصل ولا تقول وعادي كده!!!! قالي هيه اتصلت بفلانه ( اخته) من شوية انا اتنرفزت جدا وقلتله ده مش بيت فلانه ده بيتي انا يعني المفروض اختك لما عرفت تقولي انها جايه او تقولك انت وانت تقولي ولا ايه مش دي برضه الاصول ولا ايه قالي انتي مكبرة الموضوع وهوه مش مستاهل قلتله كل حاجة عندكم عااااااادي والمهم قالي اعمل ايه دلوقتي يعني اطردها علشان ترتاحي وزعل مني تخيلوااااااااااااا طبعا هوه نزل راح شغله وانا اللي قاعدة معاهم (طبعا لازم ابين انا انا مش مدايقة ولا حاجة لحد ما تمشي ) طيب وانا بكتب دلوقتي بنت عمه عادي معدية رايحة المطبخ ولا كأنه بيت ابوها بجد انا مش عارفة اعمل ايه اكلم اخته بعد ما قريبتها تمشي واقولها ان المفروض كانت تقولي ؟؟؟؟ ولا اسكت واستحمل لحد ما تروح بيتهم علشان ما تزعلش من كلامي واهد كل اللي انا عملته الايام اللي فاتت؟؟؟؟ مع العلم ان انا لازم افهمها ان ده ما ينفعش علشان ما يتكررش تاني هل انا عندي حق؟؟؟ ولا انا مكبرة الموضوع زي ما جوزي بيقولي ؟؟؟ عفواً تم تعديل العنوان ليتضح المضمون الإشراف |
طيب بالله عليكم اعمل ايه دلوقتي
تخيلوا بتكلم عمها في التليفون دلوقتي بتقولي خليها قاعدة معايا النهاردة ( علي بنت عمها ) يعني تبات معاها عندنا !!!!!!!!!!!!!! تخيلواااااااا انا مش قادرة اتخيل ان فيه ناس كده |
وعليكم السلام
من ناحيه انك مكبره الموضوع يا نوجا ،،، فانت مكبراه بس هو ده الي يسموه القشه الي قصمت ظهر البعير انت متضايقه من اخت زوجك لانها مش مراعيه صاحه البيت الي هو انت وده من حقك عندي اسئله هيه بتقل ادبها عليكي ،،، بتستهزئ فيكي ،،، مقلله ادبها عليكي من يروح اخوها للشغل بتضايقك بتعليقاتها بتساعد بشغل البيت بما ان الضيف ثلاث ايام وهيه بقالها ثلاث ا سابيع بتطبخ و تنظف مثلا فاتو عملو الفطار ينظفو وراهم من تروح للحمام تنظف مكانها سريرها و الاشياء الي تستعملها تحافظ على منظر و نظافه المكان اهم حاجه تدخل بينكم تحرك اخوها الي هو زوجك عليكي اخيرا حماتك و حماكي ياثر عليهم كلامها لانك قلتي انها بتنقل بلحرف الواحد الي يحصل عندكم |
أنتي فعلا مكبره الموضوع جدا .. هذا بيت أخوها ولها الحق تستقبل زوار فيه طالما هي موجوده .. خذي الأمور ببساطه ياعزيزتي .. أنا لو كنت مكانك ماراح أزعل .. لأنها أخت الغالي ولأجل عين تكرم مدينه .. |
أنا آسفة يا نوغا لأني لما قريت موضوعك ضحكت (شر البلية ما يضحك)
أنا من رأيي انو انتي مش غلطانة وحقك تزعلي وانا لوكنت مكانك كنت رح انفجر بس بما انو الموضوع قرب يخلص طولي بالك شوي راح الكتير وبقي القليل يعني إلك مستحملة تلات أسابيع طولي بالك كام يوم وتعالي على نفسك شوي لانو أي تصرف رح يضيعلك كل تعبك ورح تكوني استحملتي ع الفاضي ورح تبيني انو انتي الشريرة (معلش انا لسا متأثرة بأفلام كرتون من صغري) طولي بالك وقلبي معك |
[
quote=الغربه مره;2091994]وعليكم السلام من ناحيه انك مكبره الموضوع يا نوجا ،،، فانت مكبراه والله انا حاسة دماغي هينفجر بس هو ده الي يسموه القشه الي قصمت ظهر البعير انت متضايقه من اخت زوجك هيه طيبة بس تصرفاتها كتير بتدايقني لانها مش مراعيه صاحه البيت الي هو انت وده من حقك عندي اسئله هيه بتقل ادبها عليكي ،،، بتستهزئ فيكي ،،، مقلله ادبها عليكي لا طبعااااااا الحمد لله فيه حدود للكلام ما تقدرش تتخطاها معايا لان انا بالنسبة لها حاجة كبيرة في كل حاجة مع العلم انها اكبر مني من يروح اخوها للشغل بتضايقك بتعليقاتها لا زي ما قلتلك قبل كده حتي لو قالت حاجة برد عليها من باب الهزار بس كلام موجه ومباشر بحيث انها ما تدخلش تاني في اللي مالهاش فيه بتساعد بشغل البيت بما ان الضيف ثلاث ايام وهيه بقالها ثلاث ا سابيع والله نادرا لما بتعمل حاجة وانا اللي بعمل كل حاجة في البيت وهيه قاعدة عند التليفزيون بتطبخ و تنظف مثلا فاتو عملو الفطار ينظفو وراهم اه بتعمل كده بس لاني من اول يوم حبيت اخليها تاخد بالها ان بحب كل شئ مرتب وفي مكانه وهيه عارفة عني اني نظيفة لدرجة انها بتقول عليا موسوسة مع اني عادية جدا من تروح للحمام تنظف مكانها سريرها و الاشياء الي تستعملها تحافظ على منظر و نظافه المكان اهم حاجه تدخل بينكم تحرك اخوها الي هو زوجك عليكي لا ا لحمد لله زوجي عاقل جدا اخيرا حماتك و حماكي ياثر عليهم كلامها لانك قلتي انها بتنقل بلحرف الواحد الي يحصل عندكم انا اقصد اني لو قلتلها حاجة وهيه اتدايقت هتروح تقلهم وان كده هبان اني وحشة في نظرهم وانا احب دايما تكون صورتي كويسة عندهم[/quote] |
اقتباس:
اختي بيت اخوها ما قلناش حاجة لكن مش من حقها تستقبل اللي هيه عايزاه وقت ما تحب لانها في الاخر ضيفة ومعلش انا في بيت اخويا عمري ما اعمل كده مع ان زوجته صاحبتي واكتر من اختي بس فيه اصول لازم احترمها ولا ايه شكرا يا اختي علي ردك |
طب يا نوغا اتحملي الشويتين الباقيين
هيه كويسه و حابتكم و لاقيه شويه حنيه عندكم و حريه مش لاقياها ببيتهم صعب تقعد وحده ببيت اختها 3 اسابيع من غير ما يصير تصادم اخت زوج تقعد 3 اسابيع و هالاشياء البسيطه الي قلتي عليها تضايقك انت بنعمه يا ستي اكسبيها مبين انها طيوبه و حابتك كثير بس يعني خليكي علعلاقه الرسميه الي انت ماشيه عليها ان شاء الله ييتزوج قريب و تفرحو فيها اهم حاجه دلوقتي اقتباس:
عندها تبقى مشكله و يحق لك تقلقي اما دلوقتي بخلي اعصابك في الفريزر و انبسطي معاهم مادامهم من عمرك طب ياريت حد يجي عندي و نعمل جو و نقضي اوقات حلوه الغربه ،،، مشكلها الوحيده انه مفيش حياه اجتماعيه |
اقتباس:
حبيبتي والله انا عارفة ان ممكن اكون زودتها شوية بس والله فعلا ما قدرتش اتحمل الموقف حسيت ان انا مش في بيتي انا طبعا مش هعمل حاجة تكبر الموضوع بس نفسي اكلمها وافهمها بالراحة ان ده ما يتفعش وعامة انا مفيش قدامي حل غير اني اتحملها اليومين دول وفاااااااات الكتييييييييييير شكرا علي ردك |
اقتباس:
حبيبتي والله انا عاملة كده دلوقتي بس والله الانسان برضة طاقة مش قادرة اكون علي طبيعتي معاهم وانا من جوايا مدايقة كده انا من النوع اللي مش بقدر اخبي زعلي بيبان عليا علي طول حتي لو حاولت اخبي |
اختي نوغا مصرية
انا بشوف انه انتي شوي مكبرة الموضوع حاولت حط نفسي مكانك أنا عندي أخت زوج أيضاً مو متزوجة يعني انا لو اجت لعندي اخت زوجي و ناوية تبقى أكتر من اسبوع لازم تكون بتتصرف و كأنه البيت بيتها لأني لو تصرفت على انها ضيفة رح تتعبني أكتر طبعاً أقصد انها تتعامل كأنه بيتها أي أنها تحاول انها تساعد في اعداد الطعام معي لو احتجت مساعدتها ... تنقل الصحون معي للمطبخ بعد الانتهاء من الطعام انها مثلا تسألني اذا محتاجة مساعدة تلعب مع ابني بحيث يكون عندي وقت أشوف شغل بيتي ما رح اطلب منها تنظف او تجلي الصحون او غيره لكن كمان ما رح افرح لو تصرفت و كأنها ضيفة لو هي قاعدة عندي شهر لدرجة انها تضيف علي عبء خدمتها طوال الوقت و ما بتصور اني اتضايق لو اجت لعندها ضيفة تشوفها يعني اذا هي عندكم حالياً و حبت تشوف قريبتها او تحكي تلفون ليش ازعل ؟؟ طبعاً لازم تحس انه بيتها لأنها لو لم تتكلم بالتلفون او تشوف صديقتها رح يكون كأنه سجن طبعاً الأفضل انها كانت تقلك لكن يمكن بعد 3 أسابيع شعرت انها أصبحت من أهل البيت و انها لو استقبلت ضيفتها ستحاول أنها ما تزعجكم خاصة انكم كنتو نايمين ما بعرف انا هدا اللي شفتو |
أختي صدقيني هذي مداخل الشيطان، تلاقيه فرحان جدا أنك غاضبة ومتنرفزة وزوجك درى بضيقتك تلاقيه يصفق ويزيدك وسوسه هذا بيتي وهيه ضيفه وغيره من الكلام
تريدي تبكيه ؟! روحي اشتري هدية بسيطة لأخت زوجك هذي أختك وقوليلها انك انبسطي كثير بزيارتها والله ليرتفع قدرك عند زوجك وتغيظي الشيطان الرجيم،،، الذي لا يهدى ولا يكل ولا يمل من تخريب البيوت تحياتي لك |
اختي ماريا
انا اللي مدايقني فعلا اني بحط نفسي مكانها وبشوف اني لا يمكن اعمل التصرفات اللي هيه بتعملها دي اختي واضح انا انا اللي مش عارفة اوصلكم الموضوع كويس لان فيه تفاصيل كتير طبعا ما ينفعش اني احكي كل حاجة بس اللي انا عايزة اقوله ان انا اتربيت علي اصول معينة لازم احترمها مش عارفة لما الاقي حد بيتصرف خارج الاصول دي بتجنن مع انه ممكن ما يكونش اصلا عارفها انا مشكلتي اني باخد كل حاجة علي اعصابي عارفة ان ده غلط وان انا مش همشي كل اللي حواليا زي ما انا عايزة بس علي الاقل يكون فيه ادني احترام لصاحبة البيت والله من ناحية تصرفها في البيت فده من اول يوم جت فيه ببتعامل كانها صاحبة البيت مش ضيفة خالص بس طبعا في شغل البيت هيه ضيفة ونص شفتي بقي يا ماريا ربنا يعدي اليومين دول علي خير طيب والله العظيم انا ومع كل اللغيظ اللي انا فيه ده وقاعدة افكر اطبخ ايه النهاردة علشان الضيفة اللي عندنا دي وعاية اعملها اكل كويس جدا يعني انا بفكر فيهم لكن للاسف ما حدش بيفكر فيا |
اقتباس:
اختي جزاك الله كل الخير علي النصيحة الغالية والله انا كنت عادي جدا وقلت يومين ويعدوا بس لما بنت عمه جت كمان وناوية تبات حتي من غير انا ما اعرف غصب عني ما قدرتش استحمل جزاك الله خيرا اعوذ بالله من الشيطان الرجيم اللهم ابعد الشيطان عني |
اختي الجميله نوجا
حبيبتي انا من رأيي انك تتكلمي بينك وبين اخت زوجك بكل هدووء وتقوللها انها ممكن تقولك بعد كده على اللي تستقبله في بيتها علشان بس تحضري نفسك متزعليش نفسك ابدا يا حبيبتي ومتقوليش لزوجك على حاجه ابدا لكن بالنسبه لبنت عمها اللي عايزاها تبات طبعا تصرف مفيهوش اي ذوق انا لما بروح بيت اختي بتكسف حتى اقول لصحبتي تزورني حتى لو اختي نفسها قالت انها تيجي انا شايفه انك تفهمي اخت زوجك بالذوق وبطريقه لطيفه حتى جيبيها من ناحية انك نفسك كنتي ترحبي بيها بطريقه احسن وهي صدقيني هتحس وهتتحرج اما موضوع البيات فده اكيد حقك تزعلي لكن انا لو مكانك بصراحه مش هعرف اتكلم لاني اكييد حتى لو اتكلمت بالراحه هتفهم غلط الا اني اتخانق لكن بلاش الخناق انتي برافو عليكي استحملتيها كملي للاخر ومذكور في القران الكريم ان لابد من الاستئذان عند الدخول الى اي بيت من اهله وانتي اهل البيت يعني لو الموضوع ميستاهلش مكانش ربنا ذكره في القران الكريم وكمان حقك انك توافقي على الزياره اولأ لكن هنعمل ايه ثقافة مجتمعنا هتقولك دي قلة ذوق ازاي تقولي لا ربنا يسعدك حبيبتي |
اختي الحبيبة ربيع الحياة
والله كانت بنت عمها دي بتكلمها من فترة وقالتلها يمكن ابقي اجي ازورك يوم كذا وانا بعد المكالمة سألتها بنت عمك هتيجي قالتلي مش عارفة قلتلها طيب ابقي قوليلي قبلها علشان استعد قالتلي عادي الموجود وخلاص قلتلها لأ برضة علشان استعد يعني شكلا والبيت يكون مهيأ لاستقبالها قالت لي طيب بنت عمها لم تاتي في اليوم ده وجت النهاردة يعني انا سبق ونبهتها بس الحمد لله علي كل شئ جزاك الله خيرا علي ردك اللي ريجني كتيييييير |
نوجا حبيبتي انا حابه اقلك على حاجه
انا متفهمه لمشاعرك جداااا وانا لو مكانك كمان كنت ادايقت بس زي ماقلتي العادات والطباع بتختلف من عائله لعائله ولازم تراعي هادا الشي.. وانا متأكده ان انتي كان ممكن تكون ردة فعلك مختلفه تماما ومايكون عندك مشكله ابدا في اي من المواقف اللي حكيتي عنها بل بالعكس انتي اللي تطلبي منها انها تتصرف بطبيعتها وتعتبر انو البيت بيتها بشــرط انك من البدايه كنتي حسيتي منها بشوية اهتمام ومراعاة لخصوصيات بيتك ومشاعرك واسلوب ملتزم بزوقيات التعامل بس صدقيني في شخصيات بيتصرفو هيك بتلقائيه وتباسط لدرجة تصل لقلة الزووق بس والله بيكون عن غير قصد وبطيبه وعفويه معليش اتحمليها هيا بتعمل كدا من عشمها فيكو هادا بيت اخوها وانتي مراتو يعني زي اختها .. احتسبي اللي بتعمليه لله صلة رحم وارضاء للزوج وعديها وشوية شويه هتاخدي عليها اكتر وهتقدري توصليلها اللي انتي عاوزاه من غير ماتجرحيها وكمان انتي هتفهميها اكتر وتقدري تلتمسيلها الاعذار بس ابدااا لا تزعلي من زوجك هادي في النهايه اختو وهوا متعود عليها كدا فمش هيلاحظ اللي انتي بتتشتكي منو على انو شيء غريب.. وخصوصا انك اتحملتي كتير ولا تخليه يربط لا شعوريا بين زعلك وحبو لاهله لاتخليه يحمل هم وجود اهلو في بيتو وكل ماحس بحبك واحترامك لهم هيزيد حبو واحترامو الك اكتررر بكتير وانتي الكسبانه |
عندي اسئلة اختي هي ليه جالسة عندكم مادام ان اهلها (امها وابوها ) موجودين ؟؟
وبعدين اي كان سبب وجودها لازم تحمليها عشان زوجك حطي نفسك مكان زوجك لو احد من اهلك جا عندك وجلس فترة بسيطة كيف راح يكون موقفك لو حصل تصرف من هذا الشخص ضايق زوجك ؟؟؟ وبعدين انا اللي مستغرباه كيف بنت عم زوجك تجي تبات عندكم هو مو محرم لها ومايجوز يختلط فيها الا اذا فصل بينهم ..!!! |
اختى نوجه انا معاكى ان حقهك تزعلى ..بس اعتبريه سوء تصرف وتسمحيلى ممكن يكون جهل فى الاوصول..واختلاف فى طريقه التعامل فهمانى؟؟بس كلها يومين ويعدو وممكن الشيطان مكبرهالك خالص.اختسبى الاجر وعلشان زوجك.خدى نفس كبير واستعيذى من الشيطان
وعديها مجتش على يومين |
السلام عليكم,,
حبيبتي نوغا انا اقرأ موضوعك وكأن اللي كاتبته انا,,, انا مريت بنفس الحوسه بس اكثر بمراااااااااااااااااااااااااااااااحل,,, جاتني سلفتي (زوجة اخو زوجي) طبعا مع زوجها وجلسو عندي 3 اشهر <----< جاتني جلطه من برودها ههههههههههههههههههههههههههههههه وكانت ماخذه راحتها على الاخير وانا كأني ضيفه في بيتي وكنت احاول مااضايقها حتى بالمزح عشان ماتروح تنقل عني صوره مو حلوه طبعا غير البهارات اللي حتضيفها انا مادخلت عشان اكتب قصتي,, بس عشان احطك في الصوره عموما من رأيي لما تمشي الضيفه فهمي اخت زوجك انه المفروض تقول لك انه في احد حيزوركم عشان مثلا ماتتفاجأي وتطلعي من غرفة النوم بلبس عادي بحكم ان اخت زوجك لها 3 اسابيع فطبيعي ماحتخرجي من غرفتك متكلفه في الصباح وشكلك عندك عزومه او مثلا عشان تعطي خبر لزوجك اللي هو اخوها انه مثلا تعطيه خبر ان عندكم ضيفه عشان مايتفاجأ في بيته او اي شي يعني بطريقه حلوه ومؤدبه توصلي المعلومه لاخته وآسفه على الاطاله حبيبتي |
عديها هالمره
واتمتعو مع بعض بالونس والله كانت تيجي ايام لنا في الغربه نطق نكلم نفسنا والله حتى تعودت اني اتكلم مع نفسي انتي كلميها ودايما ذكريها ما رح اقول بطريقه لبقه لانك ما شاء الله مش عاوزه توصيه انا مره ابني جا ودخل غرفتي النوم قلت له: لازم تطرق الباب ثلاث مرت قبل ان تدخل وكانت والحمد لله الذكره تنفع المؤمنين انتي وعم تضحكي وتتكلمو قولي لها قصه قريبه من الموقف حاسه نفسها بالبيت |
حبيباتي الغاليات اللي نوروا موضوعي وعطروه بكلماتهم الرقيقة لكم مني الف شكر
mooon flower جناين ورد رمانة حمراء الغالية جرين وكل حبيباتي اللي انا رديت عليهم من قبل الحمد لله اخت زوجي مشيت وكله تمام وانا كنت اتكلمت معاها بلطافة وقلتلها كان لازم تقولي علشان اعمل حسابي وفهمتها بهدوء انها ممكن تكون متعودة علي كده في بيتهم لكن انا بحب النظام وبنت عمها دي ضيفة يعني كان لازم استقبلها كويس وكده يعني علشان ما تزعلش من كلامي وزوجي حبيبي صالحني وقالي ان انا مش غلطانة ومن حقي ازعل بس هوه ماكنش في ايده حاجة يعملها وطبعا لما رجع باليل وبنت عمه كانت عندنا اتصدم من وجودها ولما اتصالحنا قالي انا ما كنتش متصور انها ممكن تبات عندنا لان ده غلط وما ينفعش وان شاء الله مش هيتكرر تاني المهم الحمد لله انا بس كنت محتاجه انه يفهمني وهوه الحمد لله تفهم الموقف وعدي علي خير اشكركم جدا جدا لوقفتكم جمبي ولا تنسوني من دعواتكم الطيبة |
اقتباس:
بناء على رد الاخت الكريمة تم حل المشكلة وتنقل نسخة لعالم المشاكل المحلولة |
الحمد لله
تهانينا |
اغلاق
|
| الساعة الآن 01:36 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©