|
مشكلتي مع زوجة أخي
السلام عليكم..
شوٍأخباركم؟؟ عندي مشكلة وماعندي أحد استشيره غيركم...ياريت تساعدوني السالفة بدأت لما استخدمت كمبيوتر زوجة أخي المحمول..لأن ماكان كمبيوتري معاي ببيت الوالد.. وماكنت عارفة شلون استخدمه لأن مو نفس كمبيوتري..المهم ظليت احوس حتى عرفت اشتغل..وفي حوستي شفت سجل محادثاتها في المسنجر..والفضول دفعني إني أفتحه...وياريت مافتحته.. كل الكلام المكتوب عبارة عن اغتياب لأهلي ولي بالذات...حتى طفلي ذوالعام الواحد لم يسلم من الغيبة!!! بصراحة الكلام جارح جدا..وخصوصا إنها تخبر به أخواتها وجميع صديقاتها..فلايوجدشيء خاص بنا إلا وجميع معارفها يعلمون به...وماجرحني أكثر إنه من ضمن كلامها إنها قالت لأخي كلام وقح جدا عني وأمي وإنه لم يرد عليها... من ضمن الكلام اللي قاهرني وأبي افضفض لكم.. 1. إن أمي تعتبرها خدامتها وعلى طول تأمر عليها...وهوبالعكس هي تجي تتغذى وتتعشى وقت اللي تريد(عندها مطبخ لحالها بشقتها) وتغسل يدها وتقعد بالصالة تشوف التلفزيون وأمي اللي تغسل..أو إذا ساعدت أمي تظل طول الوقت تقول إنها تعبانة ومريضة.. 2. كل الكلام اللي أقوله لها حتى لو كان عادي وما اله اكثر من تفسير ...تفسره على إني أبي أذيتها..والله بالعكس حتى الحركات الرومانسية اطبعها واوديها لأخوي حتى يسويها لها.. 3. كل ما تبي تقول عني شي تنعتني بالحقيرة فلانة..ليش ما اعرف؟ 4. متضايقة من قعدات زوجها مع أهله وأولاد أعمامه وارتباطه الوثيق بهم..وتقول إن المفروض زوجي لي وعلى طول معاي وأهله ال....(كلام ماأقدر أقوله)على النهاية....وهو الكل في الواقع ملاحظ إنه من يوم خطب وهو ما يحترم أحد ومتغير علينا..وكذا مرة أقعد معاه وأكلمه ويتحسن بس بعدين يرد.. 5. أن أنا أغار منها وأقلدها بكل تصرفاتها...والحمدلله أنا وحيدة أهلي ومن صغري كنت مدلعة وزوجي والشكرلله بخير ومومقصر معاي 6. ناشرة عند أهلها كلهم إن عائلتي مو شايفة خير وإن على طول نبي زوجها يعزمنا على مطاعم وووو.. وهو من تقدم لها وتزوجوا..(سنتين ونصف) طلعنا على حسابه مرة واحدة وعلى حساب الوالد وأخوي الثاني وزوجي مرات لا تحصى..حتى أحيانا الوالد والوالدة ياخذونها بس هي وزوجها ويطلعونهم على حساب الوالد.. معلومات عنها.. متزوجة من أقل من سنة... في بدايةالعشرينات ماعندها عيال..ماتبي الحين.. دارسة جامعية.. وأهم شي إنها كانت صديقتي وأنا اللي خاطبتها لأخوي شلون اتصرف معاها ...خبروني.. لأن إذا واجهتها أدري إن بصير أنا الغلطانة لأني فتحتت سجل محادثاتها...وبتنترك المشكلة الرئيسية.. مو قادرة أشوفها وأكلمها مثل قبل بعد ماعرفت إنها منافقة بشكل مو طبيعي.. حتى صورة أخوي انهزت في نظري بعد كل الكلام اللي قريته وشلون إنها تقول عن أهله كلام وسخ وهو يسكت عنها وتقول لأنه يدري إن كلامها صح.. صايدني صداع من يوم اللي قريت كلامها وطول الوقت ابكي وما اقدر انام...بليز قولوا لي شرايكم؟؟بكل صراحة شكرا وسوري طولت |
والله ذي وقاحة ومعدومة أدب ,,
ماأقول إلا الله يخلف عليكم بأخوكِ .. لو منك بكل صراحة كان قمت وأعطيتهـا ب....... (مكرومين) , بس من جد شئ يرفع الضغط .. أنا إلى الآن خاطب بس , لكن أهم ماعلي بعد الزواج إن شاء الله أهلي ثم أهلي ثم أهلي , وهي الشئ بعلمه زوجتي إن شاء الله .. يعني زوجة أخوكِ وصلتهـا سبسة وكذب على أهلها وأصحابهـا .. وأنا أخوكِ إذا تبون الحل إنهـاء المهزلة لكن بقوة يعني ماتجون تلكمونها حبة حبة لأن إذا كان ردعكم قوي من البداية هذا راح يخجلهـا من البداية وراح يخليها تتأسف وتندم.. أما إذا جيتوهـا مع الطيبة تبدأ هي الي تسخن وتكبر سالفة إنكِ أنتي الي ليش تفتشين لاب توبها , وتضيع السالفة .. لكــن الله يعينكم أفضل روحي لأقوى شخصية بعائلتكم وفاتحية بالموضوع وهو يتصرف .. |
حبيبيتي معلش سامحيني على كلامي بس انتي غلطتي وغلطة كبيرة كمان
يعني انتي الي فتشتي وراها ولازم تتحملي الي شفتيه وماتجيبي سيرته أبدا لان بالأخير انتي الي رح تطلعي بسواد الوجه ويقولوا عنك بتتجسسي وتتمنن عليكي فوق ما أعطتك اللاب توب تبعها ومن هالكلام بس أحسن شي خففوا شوي من الإحتكاك معها وحاولوا تنبهوا أخوكي بطريق غير مباشر بس لاتجيبي سيرة الكلام الي قراتيه لأن هذه أسرار خاصة فيها ومايجوز الك انو تتطلعي عليها قال تعالى ( ولا تجسسوا ) فاعتبري حالك ولا كأنه شفتيها لانه عذرك أقبح من ذنبك وهو التجسس بعدين ممكن أسالك سؤال ... هل انتي بعمرك ماتكلمتي عليها بالسوء أمام اهلك من وراها ؟؟؟؟ أكيد مافي أحد معصوم من الخطأ وربنا يصلح الاحوال |
مشكور أخوي أحمد على الرد وما قصرت..
عن جد طول الوقت أفكر...شلون اسكت واعمل روحي مادريت بشي؟؟مااقدر انافق... وما أبي أفتح الموضوع لأن معرفتي به كانت بطريقة خطأ.. عزيزتي بنبونتة..أنا من البداية ماكان قصدي اتجسس..وفتحت سجل المحادثات بالغلط..والانسان بطبعه فضولي..(موقاعدة ابرر لنفسي بس أقول لك)..وإذا كان أسرارها (عبارة عن إخبار العالم بأسرار عائلتي) ومايجوز لي اتطلع عليها..بشنو تبررين لها أسرار عائلتي المنشورة على جميع أهلها وصديقاتها؟؟؟طبعا الخطأ ماينرد بالخطأ..وإنما مجرد تساؤل..وردا على سؤالك...إذا تبين أقسم لك بالله ..أن أعزها مثل لو كانت أختي وما جبت سيرتها أبدا الا بكل خير..ولاتنسي إنها صديقتي قبل تكون زوجة أخوي..وهذا اللي قاهرني أكثر..يعني لو كنت أغتبتها بقول أن أنا كمان أغتابها فهي اغتابتني بدورها...بس ولله الحمد هي بالذات ما اتكلم عنها ولوسمحتين عطيني طريقة انبه بها أخوي..مشكورة |
السلام عليكم
بصراحه اختي طالما وضعتي مشكلتك فبتتحملين ارائنا الغلط راكبك من راسك لرجولك واكثر شي استفزني في موضوعك تجسسك عليها وفي نظري مافيه مبرر يبرر تصرفك ..... بالنسبه لكلام اخت زوجك صح انه غلط وينرفز بس هذي اسمها فضفضه وهي غير مجبوره توضح تصرفها طالما ما قللة ادبها معكم ولا وبينة الكره ولا وصلكم كلام من الناس انها سبتكم يعلم الله يا اختي اني اتكلم من واقع تجربه اني اعرف حريم لما تجلسين معها تقولين هذي دراكولا ولا سندريلا 1- وحده صار لها اقل شي 4 سنين وهي كل ما شافتني زوجي جاب لي وزوجي اهداني وزجي مغرقتني بالرومنسيه وزوجي وزوجي وفي لحظه قامت حرب عالميه بين الزوجين واهلهم وقطيعه بين العائلتين علشان زوجها مقصر معها حتى وانتو بالكرامه الجزمه مايشتريها غير من سنه لسنه؟؟؟؟؟ 2- وحده قريبه من بعيد جلست معها مررررره ماخلت كلمه على زوجها واهل زوجها الى قالتها وانا مذهوله منها وش عرفها اني مارح اتكلم واكتشفت اني قبل ماالقاها كانت متخاصمه مع ام زوجها واخته وهي توقعت ان زوجها بيوقف في صفهم وبعد اسبوع مكلمتني تقول الله يخليك الكلام الي دار بينا لا يطلع كانت لحظه غضب والحين تصالحنا ؟؟؟؟؟؟؟؟؟؟ 3- اختى لما تتزاعل مع زوجها اول شي تمسح رقمه من جهازها او تسميه اسم بايخ واذا اهل زوجها لهم طرف في المشكله لعنت خيرهم ولما تتصالح معه تتمسح عند اهل الزوج وترجع تطلق على زوجها في هالجوال المسكين القاب ماجابها روميو لجوليت؟؟؟؟ اسفه على الاطاله الغير لائقه بس الله لا يحطك في موقفها وتفضفضين في يوم من الايام عند اهلك او صاحباتك ويسمعك زوجك او الشخص الي تكلمتي عليه ولو بكلام عادي بس جرحه لو سمع الزوج \ الزوجه كل كلمة انقالت عليهم في الخفاء سواء كذب او صدق او سوء فهم ماكان احد عاش متهني صدقيني اختى كلامها مردود عليها وتاليتها تدفع الثمن بس لا تكونين انتي السبب بالمشاكل بين اهلك لان ببساطه يمكن زوجها يوقف معها وتخسرونه او يطلقها وقلبه متعلق فيها ويخسرها لمجرد لحظه طيش او شيطان منها ولحظة فضول في غير محله منك |
اختي انت ما كان قصدك تتجسسين انما اخذك الفضول .. والمثل يقول رب ضارة نافعه .. الان زوجة اخوك انكشفت نواياها تجاهكم .. و بانت على حقيقتها .. على العموم ما انصحك انك تتكلمي باللي شفتيه ابدا لاي كان .. اهم شي انك تعيدي حساباتك مع زوجة اخوك و تتعاملي معها بحذر و رسميه و نبهي اهلك بين فتره و اخرى انهم ما يتكلمون امامها باي شي .. بعدين ربك يمهل و لا يهمل .. و دوام الحال من المحال راح يجيها يوم و تتأسف على كل كلمها قاتلها في حقكم .. بالنسبه لاخوك اوعي تبيني له اي شي خليك طبيعيه مع اخوك حتى ما تسببي مشاكل بينهم .. لكن زوجة اخوك حاذري منها .. |
أختي الفاضله ***
أنا ما أبي اقول ليش تجسسين و00و00و *** صار إلي صار *** ولآن لازم نعالج الموضوع بالعقل وبهدوء علشان ما نتندم في المستقبل *** أولاً أخوك خارج الموضوع نهائياً ***المفروض أنك ماتصدقين كلامها عن أخوك*** وان أخوك ما يرد عليها حين تتكلم على أهلك *** لا تصدقين كلامها حتى تسمعين منها شخصياً*** لازم نحسن النيه *** ولا نصدق كل شي يقال لنا أو مثل ما اطلعتي عليه *** ونصحيه من أخ كبير لك يود لكم كل خير أنسي الموضوع نهائياً *** كأنه ماصار *** وكأنك ما قرئتي شي *** صدقيني كل إلي قرئتيه يعتبر فضفضه وليس شرط يكون صحيح *** وللأسف الكثير من الزوجات يفعلون مثل زوجة أخيك *** بسبب نفسي وقلة وازعهم الديني *** وهي تحاول أن ترفع من شأنها أمام اهلها وصديقاتها*** أنسي الموضوع وحاولي أن تكون علاقتك بها مثل أول بدون تغيير *** وماقلتي لنا هل علاقتك بها ممتازه أو سيئه *** إذا كانت علاقتكم بها ممتازه فلا تتغيري عليها *** ولا تبلغي أحد عن ما شاهدتيه في محادثاتها *** كوني طبيعيه معاها *** ولا تكوني سبباً في حدوث مشاكل وفرقه بين زوجين *** بالتوفيق أن شاء الله 0 تحياتي 0 |
انامع اميرات
انتبهي منها بس وعامليها برسمية الله يسعدك وهي الله يسامحها واللي صار صار وان شاءالله بيرزق ربي حسنات ماتوقعتيها هدي بالكك واحمدي ربك ربي كشفها فاحذري منها وشلك بالمشاكل ووجع الراس الله يهديها وهالاشكال ماتمنين شرهم بكرة تقلب عليك وتسبب لك مشاكل أنتي عيشي حياتك وطنشي بس وأهم شيء لاتعلمينها شيء وخليك رسمية معها وانتبهي منها واشتري راحت راسك والكاظمين عن الغيظ والعافين عن الناس ربي يسعدك ويعوضك كل خير وان شاءالله يخلف عليك بصديقة اطيب منهاا بس لاتقولين لاخوك نبهي امك واهلك وبس يعني تلميح من بعيدلبعيد دون الاساءة لها وحتى صديقاتها تتلقينهم ناقدين عليهاا اطلعي انتي وزوجك وبس هم بكيفهم لاتحتكين فيها كثير الله يكفيكم شرهم ويرزقكم حسنات ويسعدكم ويهديهم |
ولا كأنك شفتي شي
عامليهاااا بجفاااف وطنشي وقوليلي لأمك تخف عليها شوووي ولا تعطيها وجهة يعني اعطوووها طناش بالجملة الين تحس انها سوووت شي غلط بس لا تقوليلها ابداااااااا انك فتحتي سجلها ومشي الامووور واعملو حواجز بينكم عشان ترتااحون الميانة الزيااادة مصيبة عشان تتعلم تحترم نفسهااااا قبل ما تحترم اهل زوجهااااا |
السلام عليكم ورحمة الله وبركاته
مثل ما قالو الاخوات السبب الوحيد لفعلتها هو شوفت الحال حابه تعمل لنفسها شي وانها وانها وانها عامليها رسمي تماما واطلبي من امك ايضا كذلك انما من غير ما تحس بتصير باحسن العائلات انما هي لماذا تحتفظ بسجل المحادثات تقدر تحذفهم انسي كل اللي شفتيه اعملي عليه دليت من عقلك ما تخافي كل اللي كتبته مجرد كلام ولا اساس له من الصحى وحتى عن اخوكي انتي تقولي ان اخوكي متغير عليكم انا اعتقد السبب الضغط اللي واضعته عليه زوجته عشان هيك انتي فوتي عليها الفرصه وحطي العذر لاخوكي دايما الله يبعد عنكم الحسد والعين |
اختي الفاضلة
حبيت فقط اني ابين لك وجهة نظري في الموضوع من جانب اخر اولاً قيسي العلاقة التي بينك وبينها ؟ ما طبيعة العلاقة ؟ وهل توجد خلاقات بينكم ؟ اذا كانت الامور سمن على عسل فانا لي رأي في الموضوع هناك فئة من النساء اللاتي اذا تحدثن عن ازواجهن او اهل ازواجهن فأنهن دائما ما يتحدثن بالسوء عنهم وذلك خوفاً من العين ومن الحسد . واذكر مره قالت لي زوجتي بأن والدتها نصحتها بأن لا تخبر احد بسعادتها مع زوجها واهله وذلك خوفاً من الحسد والعين وانا استغربت من تلك النصيحه ولكن اراها ولو من جانب اخر بها نوع من الصحه |
انا رايي بدال ماتجلسي شايله في قلبك عليها ومادام انها صديقتك اشوف انك تواجهيها بالكلام اللي قريتيه وقولي لها بعتاب ليه سويتي كذا وليه تقولي عننا كذا اذا احد ضرك بشي قولي لي واذا احد فينا جرحك والا اهانك ترى هذا مايرضينا اذا في قلبك شي قولي لي لاتنسي اننا صديقات من قبل تكوني زوجة اخوية وانا اوعدك ان اللي صار ماحد يدري عنه بس انا من حبي لك ومعزتي لك مابغاك تخربي على نفسك ولا ابغاك تكسبي ذنوب بالغيبة اللي تقوليها عننا خلينا خوات احنا تقريبا صرنا اهل وان شاء الله بنعيش العمر كله مع بعض ...
خليها تخجل من نفسها ومن تصرفها اللي سوته واعتذروا من بعض وصفوا النفوس ... |
إرتفع ضغطي :( من رايي .. انك تردين عليها بإيجابية مو بسلبية .. مدام هي تقول عنكم كلام لأخوك وانتي عرفتي هالكلام .. سوي عكس اللي قالته .. صيري انتي الزينة عشان اخوك يعرف ان معدنكم اصيل وان زوجته قليلة اصل .. عاملي اخوك باحسن شي وعطيه عيونك .. بس هي حاسبي لما تتعاملين معاها .. جدام اخوك صيري زينة عشانة .. بس من واره صيري رسمية ولا تقعدين معاها بروحكم عشان ما تتكلم عنك وتقول انك سويتي اشياء ما سويتيها .. بس تحملي تبينين انك قريتي شي .. لأن راح يكون بوينت عليك .. وراح تقلب الموضوع عليك .. اتقي شرها .. وخلي الشر حق اهل الشر .. وحاولي انها ما تخسرك اخوك .. الله يكون في عونكم ... |
طنشي كلامها وعامليها برسمية
ورايي ان اخوكي عاقل لأنه في الاخر لو قعد يسمع لواحدة ست مش هيخلص والستات مش بيعجبها العجب فالاحسن انه يطنش وعيشي حياتك.. هي عاوزة دراما في حياتها وعندها فراغ |
يا اختي طنشي كل الكلام اللي شفتيه .. صحيح انه كلامها مغيظ وغير منطقي لكن خلص اللي طلع منها طلع واللي صار صار فلا تتعبي نفسك وتضللي تفكري وحاولي قدر الامكان تتعاملي معها بجديه شويه ولا تفتحي الموضوع مع حد او معها خلص لانه اذا حكيتي لاحد ممكن مايسكت وتصيري بشيء انتي بغنى عنه ... ورحم الله امرء عرف قدر نفسه ما دام انتي عارفه حالك مزبوط انتي واهلك فما في داعي تبرري لاحد .. ابعد عن الشــــــر وغنيله |
ألف ألف شكر لكل من رد على موضوعي...
هرد..مشكورة عزيزتي على المرور..أكيد ماكتبت الموضوع إلا وأنا متحملة كل الردود...ومثل ما وضحت إن ماكان بنيتي أتجسس..واللي حصل حصل ومافي فايدة اللوم...بس مهما كان الإنسان المفروض يأدب لسانه ..والكلام اللي قالته مسجل بالتواريخ..يعني ماكان صاير خلاف بيننا حتى تفضفض.. بالعكس بعض الكلام كان في مناسبات حلوة والكل رايق فيها..ومثل ماقلتي أنا راح اطنش وكلامهامردود لها.. أميرات...مشكورة عزيزتي..وماشاء الله نصيحتك أكثر من رائعة.. زوج عتيق..مشكور أخي..وكلامك واضح إنه نابع عن خبرة في أمور الزواج..ومثل ماقلت كلامها نتيجة لشيء نفسي ونقص وازعها الديني..وبالنسبة لعلافتي بها قبل اعرف الكلام كانت ممتازة جدا..واستفدت بنصيحتك جدا.. دانة سبيع..خلاص خيو...المعاملة الرسمي راح تبدأ من أول لقاء بيننا إن شاء الله..وأنا وضحت للوالدة الأمور..بس بصراحة ما قلت لها الكلام اللي قالته زوجة أخوي عنها لأن أخاف عليها تمرض..وقلت لها بس بعض الأمور حتى تحط للعلاقة حدود.. daimound22..تسلمي على نصيحتك..ومثل ماقلتي خلاص راح اطنشها واعاملها برسميةوجفاف تام..بدون أجرح أخوي.. GREEN222..شكرا على النصح...ومثل ماقلتي أو قلت..ماراح أصدق كل كلامها عن أخوي لأنه يمكن كذب حتى تبين لأهلها إن زوجها خاتم بيدها..ومن ناحية تغير أخوي علينا أكيد من كثر ما تقول له إنه ما تبيه يقعد معانا..وحالة الزوج تكون صعبة إذا تحير بين أهله وزوجته.. "الرجل"..مشكور أخي على المرور..والعلاقة بيننا (ظاهريا من جهتها) سمن على عسل..ولاأحلى..وبالنسبة لخوفها من الحسد هي أبدا ماتؤمن بالحسد ودائما تلمح إن عائلتي تؤمن بالحسد بشكل مو معقول..وهي دائما تتكلم عن علاقتها بأخوي وشلون هو مدللنها وأحيانا تبالغ في هذا الشيء...عن نفسي أؤمن بالحسد لوجوده في القرآن..ولكن في حدود المعقول وليس المبالغة.. جناين ورد2008..مشكورة حبيبتي على النصيحة..بس راح اطبق نصيحة إني أطنشها واتعامل معها رسمي..وبالنسبة لكل كلامها الله يجازيها عليه.. أم كريم...ماشاءالله عليك عجبتني نصيحتك جدا..خصوصا طريقة التعامل مع أخوي حتى هو لحاله يعرف صاحب المعدن الطيب...سلامتك من الضعط helwaya...شكرا على النصيحة..وراح اطنش كل شي...والله يهدي أخوي ويهديها.. سندريلا حبيب...تطمني أختي..بعدت عن الشر وبدأت أغني له...خلاص كل شي بيني وبينها راح يكون رسمي.. مشكورين جميعا...وماقصرتوا.. محتاجة دعائكم.. |
اقتباس:
بس في شئ لفت انتباهي انه لها سنه من اتزوجت وساكنه مع اهل زوجها و انها بتدرس و ما عندها اولاد و زوجك مع اهلك علطول يعني ما عندهم خصوصيه احتمال من وجهه نظركم عندها بس هي ما تعرفين بني ادم يدور على اي شي حتى يعمل منه حكايه و تعمل لحياتها اكشن بكره يجو الاولاد و تكبر و تتغير امور كثيره بس انت ما تاخذي فكره نهائيه عنها ما تعرفي السنين و التجارب تغير الكثير و الكثير من طباع البشر |
هلا أختي الغربة مرة...
الله يعينك عالغربة ويرجعك لوطنك وأهلك بالسلامة.. هي متزوجة من أقل من سنة...وبالنسبة للدراسة خلصت وقاعدة بالبيت..وشقتها لحالها تماما..حتى لما تبي تدخلها بابها لحالها..يعني معزولة تماما وكأنها في بيت لحالها...وزوجها يتغذى مع الاهل كل أسبوع مرة وحدة وهو يوم تجمع العائلة...وهي بعد تتغذى معاه.. أنا خلاص شلتها من بالي..لأن تأكدت من كلامها إن عندها خلل بنفسيتها..وماراح أعمل مشاكل مع أخوي..والله يجازيها على كل شي..ويصلح الأحوال.. |
أساسا ماراح تقدرين تعاملينها كويس وأنتي شايله في خاطرك عليها..
نصيحة مثل ماقالوا لك الاعضاء خلي العلاقة جافة سلام عليك السلام ... لاتجرحينها بكلمة ولا تصرف ... بس خليها تحس أنك متغيره صدقيني راح تعيد حساباتها وتخاف أنه واصلكم كلام.... واحتمال تناقشك بعدين ليه تغيرتي ... الله يهدي الجميع |
تسلمي حرم المعلم...ومشكورة
الله يصلح الحال... والله يشافي ابنك قريب |
عامليها على قد عقلها
و لا تواجهيها و لا تخبري حدا عن غلطك لأنه برأيي غلط كبير يعني انا خواتي اللي بحبهم و بحبوني ممكن يحكوا عني كلمة بغيابي أكرهها وقت اسمعها كلنا -معشر النساء- ممكن نغلط بحق غيرنا في الكلام صحيح انه زوجة أخوك تبالغ لكن مو بعيد انك لما تشوفي محادثاتها تشوفي غيبة و نميممة يعني عادي برأيي ما في زوجة أخ بتحب خوات زوجها حب حقيقي إلا من رحم ربي احذري فقط من أن تقولي لأي أحد عن الكلام اللي قرأتيه و خلي الحب يدوم في العيلة و كأن شيئاً لم يكن لأني اذا كل العيلة عرفوا بكره زوجة أخوكي لهم أو ظنها السيء سيعاملونها معاملة سيئة و تتشتت العيلة و انتم بغنى عن هالشي على الاقل مشان أخوكي و مشان صلة الرحم اللي بينكم الله يهدينا آمين |
| الساعة الآن 11:44 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©