|
اكتشفت سبب بكاء ابني ليلا
بسم الله الرحمن الرحيم السلام عليكم ورحمة الله وبركاته أخيرا اكتشفت سبب صراخ ولدي عمره 8 شهور تقريبا الله يحفظه دائما اصحى من النوم مفزوعة من صراخه وأسمي عليه ويبكي وأشوف دموعه حبيبي وأقول لأبوه الولد يبغاله قراءة حاول ترقيه يقول طيب المهم قبل يوم كنت نايمة وهو نايم مكانه وسمعت صراخه مثل دايما وهديت عليه حتى سكت ورجع نام ورجعت كملت نومي وبعدها صحي كمان يبكي وهديته وسكت ونام بعدين طار النوم من عيني وكنت زي ماأنا على السرير بس صاحية ونايمة يعني بغفي شوي وأسمع صوت الولد يصرخ وفزيت على طول وألاقي ولدي الثاني يجري على غرفته استغربت وسميت بالله وقلت لا ماراح اغمض عيني وزوجي يقولي شفت شي يجري قلت ولدك ماادري اش يبغى وبعدها بشوي شفته دخل الغرفة بهدوء وجا لعند أخوه ومسك ايده وعضه وجري على غرفته ماشاء الله تبارك الله على هالولد وشقاوته انجنيت وانقهرت منه مااعرف ليش يسوي كذا في أخوه والله تعبت معاه مبهدل اخوه وما يخليه في حاله اعطوني حل الله يسعدكم لما خبرت ماما قالت لي شكله غيران ليش اخوه معاكم في الغرفة وينام معاكم طيب مستحيل اخليه ينام مع اخوانه لأنه بيفتري فيه مضبوط هو بيكمل 3 سنوات بعد 3 شهور وانا بحزن عليه لأنه ماكان كذا قبل مااجيب اخوه اتغير مرة وصار صعب علية اتعامل معاه ا بالهدوء ولا بالخصام اللي مروا عليهم اولاد غيورين كذا كيف اتصرفتوا ولا اتحملتوا زي كلام أمي ولما يكبروا يعقلوا ولا كيف اتصرف معاه اعطوني حل ارجوكم الله يهديه ويصلحه ياااااارب تحيــــــــــــــــــــــاتي |
ههههههه ياملحه ولدك
مادري والله صعب تطلعين الصغير لكن حاولي تنفخين الكبير بالكلام انت كبير انت رجال انت اقوى منه تنام بغرفتك و هو ضعيف مايقدر انت بتدرس قبله لانك اقوى واكبر وبكذا اتوقع بيغير فكرته مسكين رحمته |
لا حول ولا قوة إلا بالله
الله يهديه ويصلحه ما عندي خبره الله يعينك |
ههههههههههههه والله ضحكت من قلب وحزنت كمان على ولدك الصغير مسكين
باين الكبير غيران الله يحفظهم ويصلحهم ويعينك على تربيتهم |
اختي الكريمة الماسة ... الله يحفظ اولادك و يخليهم لك يارب
حبيبتي واضح انه الغيرة هي الدافع الاساسي وراء تصرفات ابنك اتجاه اخوه الصغير وفي هذه الحالة من المفروض منك ومن والده ان تشعروه بالاهتمام في هذه الفترة يبدو انه يحس بان اهتمامكم منصب كله على اخوه الصغير مما يؤدي الى ايذاء اخاه ... حاولي ان تجعليه يهتم باخيه معك ... مثلا تطلبي منه ان يحضر الحفاظ لاخيه ... وان تتحدثي معه عن بان تقولي له (( شوف اخوك شو عيوب بيعملها على حاله )) واعملي نفسك قرفانه منه ... ودائما قولي له انك اشطر منه انت نظيف ... انت تفهم افضل منه ... هو لا يفهم علي ... انظر اليه كيف يبكي ... ومن هذا الكلام ... وبنفس الوقت قولي له انه يحبك حاولي ان تشعريه انه عندما يضحك انه يضحك له ويلعب معه ... وان شاء الله يتحسن ... عن جد ضحكت من قلبي عندما كشفت سبب بكاء طفلك ... ان شاء الله اكون قد افدتك ... ربنا يوفقك |
يابعد قلبي عليهم الله يرحمنا برحمتهم من جد ابنك تحفففة عليه حركة :22:
والله ماعندي حل بس كلميه قوليله كشفتك ياحرامي وقفلي الباب عليكي |
طيب ليش ماتجربوا أنه ينام معاكم يوم بعد يوم ، واظهري اهتمامك به اكثر من أخوه الصغير المعضوض
الله يعينكم بس بصراحة اضحكني الموقف وخاصة أنه يركض بسرعة من غير أن تكشفوه . ويمكن هذا اللي خلاه يطيح الطيحة المرضية السابقة بسبب الغيرة . |
شر البلية ما يضحك
بسم الله عليه اشتري له هديه وضعيها بين يدي الطفل الجةية واعطيه اياها قولي له شو شو اشتر ىاخوك لك وهيك كل مره واحملي العصا بالليل انما من غير ضرب وقولي مين اللي يبكي الولد بدي اضربو خليه يخاف من غير ما يعرف انكم كشفتوه هو انما فتحي عيونك منيح الله يعينك |
هههههههههههههههههه
لو تعطوني اياه كم يوم أرجعه واخليه يعض الكبار مو الصغار..ماشاء الله عليه عسل والله ربي يحفظه لكم دام ماشاء الله الولد بهالذكاء وعنده طاقة يقعد من نومه عشان يأثر لنفسه من أخوه....افرغي طاقته كلها خليه يلعب ويلعب ويلعب لين ما يفرغ طاقته بالنهار كله ليه ما تعملون له يوم خاص فيه وبس دام ان الغيرة طافحة فيه....عيشيه ملك هاليوم وكل طلباته مستجابة ولاتقوليه لا اوف ولا اسكت خليه يعمل كل حاجة طبعا بابتسامه ومشاركة منكم لين ما يفرغ كل اللي في نفسه من غيره ..... وان شاء الله تنفع معاه يارب هالفكرة طبقناها عندنا في البيت وفعلا كل واحد حس بمقامه والله يعينا عليهم......... مرة ثانية حطيله صمغ على سرير اخوه عشان يلصق فيه ......ويتأدب |
ما عندك شي عقاب بخاف منه ابنك الكبير ؟؟
ممكن انك تعملي نفس اللي عملتيه ساوي حالك نايمة الليلة الجاية و لما يجي ابنك عالغرفة و يعض أخوه تهدديه بالعقاب اذا كررها و تقوليله هدا أخوك و صغير و اذا عضيته بزعل و بمرض و من هالكلام خلي أبوه يشاركك الأب له رهبة أكتر عند الأطفال ممكن بنظرة منه ينهي الموضوع بس لازم تحطي حد للموضوع و الله ضحكت من قلبي لما قريت القصة ابنك الكبير ذكي ما شاء الله محضر أعماله و مخطط لها مزبوط ههههه |
وعليكم السلام ورحمة الله وبركاته ...
أختي الفاضلة الماسة حفظك الله ... أسأل الله أن يهدي أبنائك ويصلحهم ... أذكر لك تجربة شخصية عشتها وأستفدت منها كثيرا ... الحمدلله رزقني الله أربع أولاد وبنت واحـدة الله يحفظهـم ، وأعمارهم متقاربة جدا وكنت أود أن أكتب موضوع وأسميه (تجربتي وزوجتي في التربية ) ولكن لأكثر من سبب ومن أهمها إنشغالي لم أستطع أن أقوم بذلك ولكن سوف أكتب لكِ الشاهد من التجربة ... ابني البكر كان أول حفيد في عائلتنا من طرف الذكور إضافة إلى أنه اسمه بإسم والدي الله يطول في عمره ويحفظه فوجد إبني الحب والرعاية والدلع من الجميع ... لذلك عندما جاءت بعده أخته والفرق بينهم سنه وأخذت نصيبها من الإهتمام والرعاية لم يتأثر كثيرا لأنه كان يحتفظ بالصدارة كونه البكر بالنسبة لنا ولمكانته الخاصة عند العائلة بصورة عامة ... بعد ذلك طل علينا ولد آخر وأخذ نصيبه أيضا من الدلع والإهتمام والرعاية ولكن لم تتأثر أيضا أخته كثيرا لأنها بنوته وحيدة بين ولدين ومازلت لها مكانتها ... ثم جاء ولدي الثالث والرابع من حيث ترتيب الأبناء وهذا أول شاهدنا من التجربة وحينها غفلنا عن أخوه الذي قبله وحضي هو بالرعاية والإهتمام وبعد فترة تفاجئنا أنا وأم عبدالعزيز أن أخوه الذي قبله تأثر كثيرا وكان يجد نفسه أقل من إخوته فواحد البكر ودلوع العائلة وواحدة بنت وحيدة وآخر هو آخر العنقود وهو ضائع بينهم طبعا نحن لم نكن نهتم بالأخير ونهمل تماما من قبله ولكن كان يحصل معنا شيئا من التقصير وعدم الإهتمام الغير مقصود وخصوصا وأننا لم ننتبه لذلك إلا معه هو والحمدلله حرصنا على مشاعره ، صحيح كان الأمر متأخر جدا ولكن بدء الآن في تحسن كبير جدا ... بعد ذلك وعندما زرقنا الله بآخر العنقود إستفدنا من تجربتنا وأصبحنا نركز إهتمامنا به وبأخوه الذي قبله وغالبا كانت أم عبدالعزيز ترعى آخر العنقود وأنا أرعى الذي قبله وأعوضه عما قد يفتقده والحمدلله لم تكن بينهم غيرة إلا الغيرة الطبيعية بين الأبناء بل أنهم أصبحوا كالتوأم يناموا مع بعض ويستيقضوا مع بعض ويلعبوا مع بعض ... لذلك ومن خلال تجربتي أنصحك بما يلي : 1) تركزي إهتمامك به حتى بوجود أخيه الذي يصغره . 2) أن تعامليه كأخيه الصغير في الأمور التي ليست من ورائها مشكلة أو خطأ (كأن تعرضي عليه أن ينام معكم في بعض الأحيان ولكن توضحي له أن ذلك من الصعب أن يكون كل يوم وكأن تخبريه أو تكلمي اخوه وهو يسمع وتقولي له خلاص لما تكبر شويه راح تنام مع أخوانك ولو كنتم في رحلة أو زيارة أعطي أخوه الصغير لوالده أو أحد إخوانه وأحمليه أنتِ. 3) عندما يتكلم معك أو يكون جالس معك ويحتاجك أبنك الصغير لاتقومي مسرعة أو تتركيه خاصة لو كان الأمر يمكن أن تأخريه قليلا بل وجهي لأخيه الكلام وأنت تقصدي أن يسمعك هو كأن تقولي أنتظر شويه أنا أكلم أخوك فلان أو جالسه مع أخوك خليني أخلص . 4) احتفي به عندما يقبل عليك وأثني عليه. 5) إذا أحضرتم هدايا فلتكن هداياهم متشابهه مالم يختر هو هدية بنفسه . 6) إذا نام إبنك الصغير في غرفة نومك إذهبي ونامي ولو قليلا بجانب أخوه ولو بعض الأيام . هذا ما أحببت أن أشارك به أسأل الله أن يجعل فيه النفع ... وفقكم الله ... |
الله يخليهم لك يارب ..
الحل انك ما تحسسية ان اخوه الصغير ماخذ مكانة .. وفي نفس الوقت حببيه في اخوه الصغير عشان ما يحس انه احسن منه، اقصد عشان الكبير ما يحس ان هو احسن من اخوه الصغير وبعدين يصير اناني .. دايما حسسيه ان اخوه الصغير يحبة وايد وكل يصيح يبيه .. حسسيه انه الأخ الكبير واخوه محتاجة .. سوي مواقف بسيطة لهم مثلاً .. لما يمرض اخوه قولي له بوس اخوك عشان يشفى .. وقولي له انه صغير الحين بس لما بيكبر بيلعب معاه .. |
اقتباس:
عندي لسا طفل واحد و حامل بالثاني و ألاحظ غيرة شديدة من ابني عندما أحمل أي طفل غريب او أعانق زوجي و يعانقني و دائما أقول الله يعيني من غيرته لما تجي اخته -بإذن الله-. جزاك الله خيراً اخي انسان غير يا ريت ما يتكاسل أحد من الأهالي بأن يكتب أي نصيحة للأمهات الجدد ألف شكر |
اقتباس:
الله يسعدك حتى انا ضحكت من قلبي على حركته حاولت معاه بكل الكلام والله حتى دلع دلعته بس ماادري اشفيه الله يحفظه مشكورة ياقلبي على اهتمامك وجزاك الله خير تحيــــــــــــــــــــــاتي |
اقتباس:
اللهم آميـــــــــــــن مشكورة حبيبتي على مرورك ودعائك جزاك الله خير تحيــــــــــــــــــــــــــــاتي |
اقتباس:
الله يسعدك ياقلبي أكيد أنه غيران رغم إني بدلعه في كل شي لكن الحمدلله اللهم آميــــــــــــن جزاك الله كل خير تحيـــــــــــــــــــــــــاتي |
اقتباس:
الله يسعدك حبيبتي والله إني أقول هالكلام دائما وأحاول أبين له إنه الأفضل والأشطر والأعقل لكن راكب راسه إلا بينكد على أخوه بحاول أزيد في الجرعات هاذي والله المستعان إن شاء الله ربي يهديه مشكورة ياقلبي جزاك الله كل خير تحيـــــــــــــــــــــــــاتي |
:
اقتباس:
الله يسعدك حبيبتي أنا قلت له ترى شفتك وإنت تعض أخوك في الليل .....أعطاني ابتسامة خطيرة:d ويقول يا ماما أنا أحب النونو هو مررة طعم اشرايك بالله .........شكله يستمتع لما يعضه لكن ماأقدر أقفل الباب أخاف عليهم لو واحد منهم احتاجني ولا شي لا سمح الله أنا بقفل الباب لما أكون صاحية وجالسين أنا وأبوهم لكن لما بنام بفتح الباب ماأقدر مرة أخاف عليهم مشكورة ياعسل وجزاك الله خير تحيــــــــــــــــــــــاتي |
اقتباس:
والله أنا بخليه ينام معاية بس أبوه الله يهديه يقول لا لازم يتعود ينام على سريره أحسه صغير ومايقصد هالشي لكن زي مقهور ليش ابوه يخاصمه ويقول يلا على سريرك ياولد حاولت إني أنام عندهم على سريره لكن مجرد ماأنام يخرج وينام بغرفتنا وش السر فيها ماأدري ويمكن صح لما تعب آخر مرة الله لا يعيدها كان مرة متمسك فيني ويدلع كثيييير علينا الله يحفظه ويصلحه مشكور على الرد وجزاك الله ربي كل خير تحيــــــــــــــــــــــــاتي |
اقتباس:
والله خلاص قد إني خبرته إني شفتو ويضحك ويقول احب النونو ....النونو طعم مرة هو يحب اخوه كثيير ياقلبي لكن ماادري ليش يتصرف كذا بجرب فكرة الهدية ماسويتها للأسف يمكن يحن أكثر ويحاول ماينكد عليه الله يعينا على تربيتهم مشكورة ياقلبي وربي يسعدك جزاك الله كل خير تحيـــــــــــــــــــــــــــــاتي |
اقتباس:
لا ياختي ربي يسعدك إلا العض مرة يوجع الله يهديه والله ياحرم إني بخرجه معاية دائما حتى السوق إلا مااحب أشيل الأولاد معاية فيه صرت اشيله عشان ابعده شوي عن أخوه وكمان يغير جو وينبسط لكن بمجرد مانرجع البيت يرجع لأذيته ملاهي ودينا ومحلات ألعب واشترينا ماخليت شي طيب اش اسوي فكرة الصمغ حلو فاتتني شكلي بسويها فيه :23: مشكورة ياعسل على أفكارك جزاك الله خير تحيــــــــــــــــــــــاتي |
اقتباس:
والله ياماريا إنه مابيخاف لا مني ولا من أبوه للأسف يعني حتى ابوه يصرخ عليه لو غلط ولا شي مايهمه يبكي شوي ويرجع يكمل اللي عمله هو ماشاء الله مخطط ومتكتك من زمان وأنا ياغافل لك الله عالعموم أنا حاولت اخوفه إنو مايروح مع أبوه لبيت جده لأنه يحبهم مررة ودايما يطلبنا نوديه هناك يمكن تنفع معاه مشكورة حبيبتي وربي يسعدك ويعينك على النونو لما يجي خذي احتياطاتك من الآن :18: جزاك الله خير تحيـــــــــــــــــــــــاتي |
اقتباس:
أخي الكريم ......اسأل الله سبحانه أن يحفظ لك أولادك ويسخرهم لك بالفعل نبهتني على أمور كنت غافلة عنها من ناحية إني أحمله وأكلمه وأبديه هالإهتمام لأني بالفعل لما اخرج بشيل الصغير وأبوه يشيلو لكنه يبغاني أنا ثانيا صدقت لما اتكلم معاه واسمع الصغير يبكي على طول اجري اشوفو واتركه صح والله مااتوقعت إنها ممكن تأثر هالتأثير عليه الله يرضى عليك ويسعدك انت وأم عبدالعزيز ويحفظ لكم أولادكم ويصلحهم جزاك الله كل خير تحيـــــــــــــــــــــــــاتي |
اقتباس:
الله يسعدك ياأم كريم بالفعل أنا بسوي كذا معاه لكن الغيرة عاميته الله يصلحه يبغالي اتصرف واحاول قد مااقدر عسى ربي يهديه مشكورة ياقلبي وربي يسعدك جزاك الله كل خير تحيــــــــــــــــــــــــاتي |
اقتباس:
صادقة والله مو قادر يفهمني نصايحك ماشاء الله ممتازة وبحاول اطبقها وكمان ماذكره الأخ انسان غير اشياء غفلت عنها شوفي اشتريت له دفاتر رسم وتلوين ويجلس مع أخوهم الكبير وهالأيام اقنعت أبوه يشيلو المسجد معاهم بيخرج يشتري مقاضي للبيت وبياخذه معاه بس الله يعيني في الصباح أخوه الكبير يروح المدرسة وانا بتبهذل معاه مايخلي الصغير في حاله لا أقدر أخليه على الأرض ولا في سريره يلاحقه في كل مكان ماما تقولي اصبري عليه لسه صغير اتحملوه وكل كم شهر ويرجع يتعود تقول خليه ينام معاكي بعدين هو بيطفش منكم ويروح لسريره مالنا إلا الصبر بس بنحاول نصلح بعض الأمور عشان مايتطور وياخذ راحته ويسويلنا خطط جديدة ...............الله يستر :) مشكورة ياعسل ربي يسعدك ويوفقك جزاك الله خير تحيــــــــــــــــــــــــاتي |
وعليكم السلام ورحمة الله وبركاته
دمه خفيييييييييييف ولدك ههههههههههه والله يعينك ويصبر قلبك لاتدلعى ولدك الجديد قدامه كثير عشان لاينقهر وحاولى تبينى له انك مهتمه فيه وتحبيه والله يعينك ويعيننى ان شاء الله وازرعى فى راسه انت الكبير خليه يساعدك فيه مثلا يعطيه رضاعته او اى شى الله يعطيك العافيه لك فائق احترامى |
اقتباس:
دمه خفيف مررررررررة :d بس جاب اللي الجنان الله يحفظه والله إني بخليه يساعدني ويجيب رضاعته أخوه ولما بلبسه يساعدني ويمسكه بس مافي الغيرة معاه ومتأصلة فيه لي كم يوم أنومه معاية في الغرفة وأبوهم :( بس قلت له أصبر عليه كم شهر بس :23: جلس يدعي يارب صبرني الله يعيني ويعينك ياقلبي ويقومك بالسلامة ويحفظ لك البيبي ياااارب جزاك الله خير تحيــــــــــــــــــــــاتي |
| الساعة الآن 03:36 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©