|
كيف أساعد أخي ممن لاتخاف الله؟
السلام عليكم ورحمة الله وبركاته
كيفكم أخواني وأخواتي أ ن شاء الله تصبحوا وتمسوا بطاعة الرحمن ترددت كثيرا بمن أستشير ولأن ظني بكم لا يخيب عزمت على وضع مشكلة أخي بين أيديكم لأني بصراحة مو عارفة كيف أتصرف المشكلة ومافيها أن أخي يشتغل بأحد المعارض المعروفة المهم في بنت بين كل فترة وفترة تأتي الى المعرض وتحاول تعمل أي علاقة مع أخي ألى أن جاءت في يوم وأخذت رقمه من على المكتب وبدأت بالأتصال عليه وأرسال الرسائل ألى جواله وهو أحيانا يتهرب منها وأحيانا يسترسل معاها بكلام المشكلة أخوي يقول أنا عارف أن هذا الوضع غلط وكل مرة يقول أنا مارح أرد على أتصالاتها ورسايلها بس أكتشف من خلال تفتيش جواله أن العلاقة مستمرة وعرفت أيضا من خلال الرسايل أنها مو تاركته بحاله يعني مثل مايقولوا وراه وراه أختي الكبيرة نصحته أمي زعلت منه بس مافي فايدة وهو للعلم عمره 22 والبنت 26 المصيبة أنها متزوجة وعندها ولدين تخيلوا أنها تأتي الى المعرض لكي تشوف أخي مع زوجها في أوقح من كذا وأخت زوجها هي الي تستر عليها وتجعلها تكلم أخي من جوالها معقولة مات الضمير الى هالدرجة والله أن أمي تتحسب عليها وتدعي عليها أحسها تبغى تخرب حياة أخوي أخر مرة أخوي أرسلها رساله طويلة محتواها الي أين تريد الوصول بهذه العلاقة وكيف راضيه على نفسك تخوني زوجك ؟؟ تتوقعوا بماذا أجابت قالت وبكل صراحه يافلان أنا مش هدفي الحب هدفي ----- والعياذ بالله والحمد الله أن أخي رد عليها وقالها أذاكنت ماتخافي الله فأنا الا الزنا لارضاه على نفسي صحيح أنا أرتحت لما شفت رده في الجوال علما أنه لايعلم أني فتشت جواله لكن والله أني خااااااايفة عليه من هذه التي لاتخاف الله وموعارفة أتصرف كيف وأبعدها عنه كيف أنا فكرت أرسلها رساله على جوالها دون علم أخي لكن موعارفة أيش أكتب ؟ ساعدوني فرج الله عنكم ماأهمكم أرجوكم من لايملك حل للمشكلة الدعاء لأخي بظهر الغيب أن يبعد عنه شياطين الأنس |
لاترسلي كلميها وقولي لها انك راح تعلمي زوجها واذا ما اهتمت اعطي رقمها للهيئة وقولي لهم بكل اللي تسويه وهم يتصرفوا ...
الله يكفينا شر بنات الحرام ويهدي اخوك ويكفيها شره ,,, |
انا لله وانا اليه راجعون اقسم بالله اني انصدمت وانا اقراء رسالتك معقول فيه قذاره بالشكل ده اقوللك اني التمست من خلال كلامك عن اخوكي انه يخاف الله نوعن ما يعني ضميره يموت لحظه ويفيق اضربي علي هذا الوتر ولاتدعيها تجره الي المعصيه وفعل الكبائر وكوني دائما مراقبه له وخوفيه بالله اكثر واكثر وان لاحظتي انها لسه العلاقه موجوده اتصلي عليها وعرفيها انك تعرفي الموضوع وانك ممكن تقولي لزوجها ان لم تبتعد عن اخوكي والله يعينك ويهدي اخوكي ويصرف عنه السوء والفحشاءيارب العالمين
|
يالبية الله يصرفهاعنة
اذكر وحدة من صاحباتي اخوهاكذا بس كانت مطلقة هي قام وجمع معلومات عنهاا ووقال ابعدي عن طريقي وقفل جواله فترة وبلغ الهيئة وريح راسة انااخرزمن لاتستغربين شيء ناس ماتخاف ربي حسبي الله ونعم الوكيل الله يصرفهاعنة ادعي لي وعليك بالصدقة ربي يفرج همك مالومك والله |
جناين ورد2008
جزاك الله خير غاليتي على الرد أنا كنت حابة أني أرسل رسالة علشان قلت ممكن لما أكلمها تقفل الخط أو تغلط بالكلام أما أني أعطي رقمها للهيئة أشوفها صعبة لأني خايفة أنها تحاول تنتقم وتورط أخوي لاقدر الله اخميمية جزاك الله أختي كل خير أنا مصدومة أكثر منك مستغربة كيف ربي منعم عليها بزوج وأولاد وتعمل كذا أنا كل خوفي أن أخي الله يهديه ويصلحه يضعف أمامها فلهاوربك يحلها بارك الله فيك أختي بس صراحة أنا أستبعد أن أخي يحل الموضوع بنفسه لأنه كل مرة يقول مارح أرد عليها ويرجع يرد ويكلم أنا متأكدة أنه كلما كلمها ضعف ومايقدر يوقفها عند حدها علشان كذا أنا قلت أتصرف |
شي ثاني أخي أكثر من مرة يتعرض لهذا الموقف بس يقدر يتصرف ومايعطي للأمر أهمية ألا هذى المرة أحس أنه موقادر يسوي شي أو بالأحرى ماوده يسوى شى
|
يا اختى من الذى يخاف الذى على حق ام من هو على باطل انت تكلمى معها وقولى لها اما تبتعدى واما الفضيحة وبأذن الله سيصرفها الله عنكم اختى يجب من الاسراع لان مثل هذه لن تسكت الا اذا اوقعت بأخيك ومسكة عليه ذله لكى لا يتركها |
اعطي رقمها الهيئة والهيئة تعرف تتصرف معاها
|
أفضحيها و خلييييييه يكره الطريق اللي تمشي هي منه
لإنه الشيطان ألحين بيزينها في نظره بشطارتك توصلي لزوجها و أفضحيها عنده عشان تحرم تخرب الشباب |
لا حول ولا قوة إلا بالله
هي جالسه تزن عليه ومصره يمكن المحاولات السابقة من بنات ثانين يردهم خلاص يروحون أما هذه ناشبه له الله يعين عزيزتي لكن هل ممكن يعطي خبر للمدير عشان لو لا قدر الله بغت تتبلى عليه ولا شيء يصير أحد عنده خبر وما يصدقها ولو يقدر يغير رقم جواله عشان يرتاح من اصرارها يكون أفضل |
سخييييييييييييييييييييييييييييييييييييييفة بمعنى الكلمة
متزوجة و عندها ولدين وش تبي أكثر من كدا ..... لكن الغلط مو عليها الغلط على أخوك اللي أعطاها وجه أكثر من اللازم لأنه رجال و الكلمة بيده يقدر يسوي أي شيئ عشان يكنسلها و يبعدها عن طريقه |
abo marym
جزاك الله خيرا أنا صراحة كنت ماأبغى أكلمها وكنت بخلي أختي الكبيرة الي تكلمها لكن الوضع مايستحمل الأنتظار اثير الاحلام موضوع الهيئة صراحة أنا مستبعدته لأن أمي أساسا مارح ترضى بارك الله فيك أختي روح الطير جزاك الله أختي فعلا أنا بكلمها وأهددها أن الموضوع بيوصل لزوجها أذا مابعدت عن طريق أخوي colors جزاك الله خير غاليتي وفعلا هي ناشبة نشبة هو المدير عنده خبر لكن بالنسبة للجوال أعتقد تغيره مامنه فايدة لأنها كل مرة طابة عندهم المعرض والي قاهرني تجي مع زوجها وأولادها |
جداوية و أفتخر
جزاك الله خيرا الي ماتخاف الله ماهمها تخرب شباب المسلمين وأكيد أن أخوي غلطاااااان بس أكيد أن غلطها أكبر الله يصرفها عنه |
تصدقون مرة جت المعرض مع زوجها وقعد أخوي ياخذ معه بالكلام ويعطي أرسلت له تقول ماكان ودي زوجي يحفظ شكلك يعني أيش قصدها وأيش تبغى حسبي الله عليها ونعم الوكيل
|
الغلط على أخوك اللي ينزل من مستواه لمستوى وحدة حقيرة مثلها
و هو كمان غلطان و ما بيصون عرض أخوه المسلم يعني جلس تكلم مع زوجها و مع كذا مستمر في الكلام مع التافهة |
بصراحه اخوك معطيها وجه .. من لم يكن له من نفسه واعظ لم تنفعه المواعظ .. حتى لو استطعتوا ان تتخلصوا من هذه المرأه فسوف يتعلق باخرى .. اخوك ايمانه ضعيف .. لذلك فهو يضعف امام النساء .. اخوك محتاج لرجل كبير حكيم يكلمه و ينصحه مثل ابوك او خالك او عمك بشرط انهم يكونوا عاقلين و ما يفضحوه ادخلي على اخوك من مدخل الدين .. قولي اذا انت تلاعبت باعراض الناس الا تخاف على عرضك .. بكره الله يبليك بزوجتك .. حتى لو كانت عفيفه قد يصاب بمرض الشك في زوجته .. الجزاء يا اختي من جنس العمل .. بكره لا سمح الله قد يتذوق مرارة الخيانه .. اجلسي مع اخوك و انصحيه و خليه يتقرب الي الله اكثر فما يقوم به اخوك شي غير مقبول ابدا . ليش ما تزوجوا اخوك او تخطبوا له عشان يفرغ عاطفته بالحلال .. فسنه مناسب انكم تخطبوا له .. اما هذه المرأه فمحتاجه لفركة اذن قويه .. انا لو مكانك اشتغل عليها تهديد .. اولا احتفظي بكل الرسايل اللي ترسلها لاخوك و ابحثي عن اسم صاحب الشريحه و ارسلي لها رسايل تهديد انك راح تفضحيها عند زوجها .. وربي يهدي اخوك .. |
روح الطير
جزاك الله أختي الغالية على مرورك مرة أخرى أخوي من النوع الي لازم الواحد وراه بالنصح والأرشاد الله يهديه ويصلحه أميرات جزاك الله خيرا ردك حكيم كعادتك وأنا ناوية أروية ردك لأني متأكدة 100% بيأثر فيه لأنه من النوع أذا جاه الواحد بالأسلوب يتأثر جدا أما أن الوالد يجلس معاه بتكون صعبة جدااااا لأن الوالد طبعه عصبي جدا جدا هو أكيد مارح يفضحه لو كلمه لكن خوفي يزعل مننا وتصير ردة فعل عكسي وأنا نصحته من قبل أن الجزاء من جنس العمل أما مسألة الزواج فأمي قالتله خلك ولد صالح محافظ على صلاتك وأترك هالأمور علشان الله يوفقك بالزوجة صالحة |
اسال الله ان يثبت اخيك ..
ويبعد عنه بنات السوء ... اتمنى منك انت تعجلي وتساعدي اخيك .. سواءً برسالة لزوجها .. او بتغير رقم جوال اخيك .. وفقك الله .. |
لا حول ولا قوه الا بالله
الله يبعد عنه كل سؤ |
حسبي الله فيها
الله يبعدها عنوا |
اصغراخواني
جزاك الله خيرا أخي في الله على الدعاء لأخي اللهم أمين دنياالروح جزاك الله خيرا عزيزتي على المرور بنت مكة2008 أمين يارب مشكورة غاليتي |
ياجماعة والله اني محتارة صحيح رح أكلمها وبوقفها عند حدها وأنتم جزاكم الله خيرا ماقصرتم وبارك الله فيكم أنت نعم الأهل والأخوان
بس والله في داخلي هم هل أترك الموضوع كذا وأنا أعلم أنا في أخت لنا في الأسلام تنهج الطريق المنحرف أما واجب علي مناصحتها لعل الله يهديها والله الموضوع شاغلني صحيح لو بعدت عن أخي هناك ألف شاب ممكن تتعرضله ولاأريد فضحها أبدا أبدا أخشى أن أكون ممن رأى منكرا ولم يغيره وأخشى أن أكون شيطان أخرس أرشدوني بالله عليكم |
انا مع الرأي اللي يقول انك تعطي رقمها لللهيئه
لأن انسانه زي كذا ماتخاف ربي وخاينه لزوجها ممكن تتبلى اخوك بأي شي احذري منها.. حسبه الله عليها تحيتي |
نصيحة أرسلي لها رساله من جوال بدون اسم علشان لوقالت لاخوك الرقم مايدري أنه من طرفكم وتبرد..
إذا مابعدتي عن المعاكسات وتركتي العلاقات المحرمة وخصوصاً مع المعرض الفلاني .. الخبر راح يوصل لابو فلان اللي هو زوجها .. أكيد قايله لاخوك اسم ولدها .. صدقيني راح تعيش في دوامة قلق وهددوها بانه في تسجيل لمكالماتها ..بس كله في مسجات والله يهدي أخوك |
حبيبة مجنونها
جزاك الله خيرا أختي على المرور حرم المعلم جزاك الله خيرا أنا كنت برضوا أبغى أرسلها رسالة علشان ماأدخل معها أي نقاش |
أخر ماحدث أمس كلمني أخوي وقال لي أنه قطع علاقته فيها نهائيا وأنها تتصل ولا يرد وأرسل أليها أن تحاول المحافظة على زوجها بدل من خيانته
ولكني قررت أرسال الرسائل لها لمناصحتها لعل الله يهديها ودام أخي قطع علاقته بها فأنا لاأريد فضحها بأي شكل من الأشكال شاكرة لكل من ساندني أو دعا لأخي وكنتم عند حسن ظني بكم فجزاكم الله خيرا وجعل ماتقدموه في موازين حسناتكم |
طلب أخر للأدارة أطلب حذف الموضوع لو تكرمتم
|
اقتباس:
يغلق |
| الساعة الآن 09:40 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©