|
فاتورة جوال خطيبتي طلب النصيحه العاجله
بسم الله الرحمن الرحيم السلام عليكم ورحمة الله وبركاته : اخوكم جايكم في طلب النصيحة العاجلة ورجاءً من له الخبرة والحكمة يسعفني بما عنده ، ادخل في الموضوع الا وهو انا مملك من سنة وستة شهور يعني اقرب ما إلي أني احط طلب في قسم المتزوجين المهم من قبل شهر ونص تقريباً حصل بيني وبين زوجتي مشكلة ودائماً ما تتكرر لكن اتغاظا عنها واحياً ألمح لها عن طلبي على شان ابي احاول انه ما تصير بيني وبينها مشكلة لكن مع ذلك تستمر في الخطاً إلى ان اجتمعت فوق راسي كم من مطلب واكيد انه ضروري ألا وهو الأسراف في مكالمات ما لي نصيب فيها وفي الأخير اكون انا المتضرر بدفع الفاتورة أللي تطلع قبل ما يجي نص الشهر بعض الأحين وتتجاوز 400 ريال وثاني ما اشوف انها تعبر أهلي وأحس فيها شوفت نفس المهم اللي كلمتها قبل شهر ونص وقلت لها الموضح أعلاه وقلت لها ابي شوية احترام لأهلي وسألتها وقلت لها أنت تحبيني قالت لا هذا سؤال إلحين ينقال ثم قلت لها شي واضح لأن اللي يحب يحافظ على مال وروح ومتطلبات حبيبه صح وانتي ما سويتي شي من هذي والفاتورة قبل نص الشهر تطلع ب 400 ريال وانا ما كلمتيني في المدة هذي يمكن ولا مره المهم زعلت وقامت تتكلم وترفع في الصوت وانا بقيت هادي وحاولت انها تقصر صوتها وتوزن كلامها لأنها قالت على نفسها ان ليه اهلي مربيني وانا وانا المهم انا في كل اللي صار ما طريت اهلها ابداً في الأخير انهيت المكالمة وكلنا زعلانين من بعض بعدها بيوم حاولت اني اتصل بها لكن ما ترد وتقفل الجوال وارسل لها رسايل ابيها ترد علي يمكن لمدة ثلاث ايام في الأخير تركتها والحين بعد شهر ونص ارسلت لي رساله تقول فيها : أحب إللي تجاهلني وما خلاني على باله وما فكر يراسلني ورقمي وسط جواله إكنت ناسيني وهالرساله ذكرتك فيني أرجوك إمسح الرسالة وأرجع إنساني وآسف لو اني أخطيت وأقبل إعتذاري (سامحني أذا أخطيت عليك لأني ما اضمن اذا باقي اعيش او لا وإبغى أذا رحلت ما يكون احد زعلان علي) مع تحيات محبتك دوماً وليس يوم وش اسوي الحين انا كنت قبل كم يوم بأتصل بها واقولها قرارات فكرة فيها كثير واهمها : =اني راح احول الجوال اللي معها من فاتورة إلى شحن واشحن جوالها شهرين ب 100 ريال فقط وما هوب مطلوب منها انها تدق علي بعد ما احوله على شان ارتاح من التكاليف من قولة ليش ما تدقين علي . وش تنصحوني عاجل |
:eek: أخي عابر سبيل
صحيح شو بتحكي... كاررررررررررررثة..... الله معاك...... الله معاك...... الله معاك...... |
الله يعينك ياااااارب .. دلع بنات وبسس .. وش هالحركات الي تسويها زوجتـك ؟.! الله يصلحها بس تدري اخوي؟! ريح بالك وحط لها حد ائتماني بـ 300 ريال ؟ واذا انقطع جوالها بسبب تجاوز الحد الأئتماني لاتسدده الا بعد ماتطلع الفاتوره واذا هي تبغى تكلم احد تشحن جوالها من فلوسها او مصروفها لأن العام اذا انقطع عادي تقدر تشحنه ببطاقة سوا وياااااااااادار مادخلك شر .. |
كلام الاخت dant!l سليم .... وهذا اللي انا مسويه .. حط لك حد اائتماني ولا تسدد الا اذا طلعت الفاتورة ... واذا بغت هي تكلمك خلها ترسل لك مسج call me please وانت دق عليها .... هذا اللي انا مسويه
|
فعلا انت حط لها حد ائتماني وريح راسك دام انها لاتتقبل التفاهم...
|
أخي الفاضل عابر سبيل ***
هذا دلع بنات *** أصبر عليها وخليك دبلوماسي في معاملتك معها *** لا تتساهل ولا تشد *** خلك وسط *** ولا تاخذ بعض الأمور بمحمل الجد *** لأنها لس صغيره ولم تدخل معترك الحياة *** وليس لها خبره بالحياة الزوجية *** وبالنسبة للجوال حط له حد أئتماني 300 ريال *** ولا تحوله شحن علشان لا تخلق لك مشاكل خاصة في الوقت الحاضر *** وبالنسبة لأهلك لا تستعجل عليها *** أكل العنب حبه حبه *** إذا تزوجتوا إن شاء الله تقدر تأثر عليها وتزين الأمور *** أهم شي لا تكبر أي موضوع يحصل بينكما *** وإذا زعلت منك لأي موضوع تافه أتركها ولا تتصل عليها ولا حتى ترسل لها رسائل *** علشان تحس بغلطتها *** وصدقني زوجتك صغيره وتحتاج نصح وارشاد لكن بلطف وبدون رفع صوت *** أخي البنات بهذا العمر يحتاجون الكلام الرومانسي أكثر من أي شي غيره *** وتستطيع التأثير عليها بهذا الكلام الرقيق الناعم *** بالتوفيق إن شاء الله 0 |
ليه كمان يحط لها حد 300 والله مرررة كثير.. وبعدين هي فترة الملكة يعني مو ملزوم حتى الجوال يسدده.. يعني مصروف رمزي كل آخر شهر وإنتهينا.. والله إذا مرة زي ما قلت أخوي حولة شحن وأعطيها بطاقة ابو 100 كل شهر ولا شهرين.. إذا هذه بدايتها الله يستر أخوي.. أخوي قبل تتورط في الزواج معليش باين عليها مدلعة شوية.. لذلك يجب في هذه الفترة ترسم الحدود بينكم وأهم شئ الإحترااام أخوي.. وبعد كذا تعرفها بواجباتها وحقوقها.. وقبل كل شئ تفهمها إن أهلك فوق أي شئ ورضاهم من رضاك.. يعني الفترة هذة لازم من الحزم في بعض الأمور وتمسك العصى من النص يعني لا تشد مرررة ولا ترخي مرررة يعني حاول تفهمها وتعلمها بأسلوب حلو.. أسأل الله لك التوفيق أخوي |
ما شاء الاعضاء ما قصروا في النصح .. و هذا انت عرفت علاج زوجتك اذا غلطت عليك .. و هو التطنيش .. فأكثر ما يؤلم المرأه هو التطنيش .. و ربي يسعدك .. |
يا أخي والله كثير عليك..
أنا والله مع خطيبي السابق كنت بشحن من مصروفي... وكنت أخجل و ما أطلب منو يدق علي.. حاجة غريبة والله.. إنتو ما ملاحظين إنو ما بدق عليه, والفاتورة 400 ريال !!!!! :eek: يا أخي شد عليها شوي, إنت داخل على زواج....يعني مصاريف.. الله يهديها و يصلحها...... |
ان كيدهن عظيم اقطع عنها كل شي وانا اختك ولما تجى ببيتك عطها عيونك لانك تفسدها من قبل الزواج
وربي يتمم لك على خير ............ |
حط حد للجوال مبلغ وقدره 200 ريال يعني نص الفاتوره
ومن ثم لاحظت من رسالتها انها مشتاقه لك ارسل لها رساله لطيفه وشاعريه ووسط يعني ما تحس انك زعلان كتير ولا رح تجن على فراقها هيك تتعود على الميزانيه المنزليه من الآن الحياة شراكه وحب الله يهنيكم يا رب |
شريحة سوا و إنتهينا
|
انا بقوولك شي هي الان فاااضية
وماورااها غير الرغي في التلفووون يعني طبع ومستحيل يتغير بين يووم ليلة وبعدين انت الان تحااسبها << علشاان كذااا شي طبيعي تتضايق لأنة :: هي من قبل اهلهاا مايحسبونها على المكاالمااات وكمااان فرااااغ تخلص من فلااانة تكلم علاااانة يعني فترررة وتعدي بس انت اصبر عليهاااا ورااعيها الان ولما تتزوجهاا صدقني مارااح تلااقي ووقت اصلااا راح تنشغل فيك <<<< ورااح تبلشك كمااان :d وتنشغل في بيتهااا وفي نفسهاااا وبعدين شهررر ونص تقطعهااا علشاان فااتورة ؟؟ حراام عليك لاااااازم تتعلم الصبر مووو كذاااا الله يوفقكم ويخليكم لبعض يااارب |
شوف أخوي الي تحب زوجها راح تحرص أول شي على علاقتها بأهل زوجها تكون صحيحه وما يشوبها مشاكل وأنتم في وقت الملكه فعلاقتها باهلك راح تكون سطحيه الين تتزوجون واثقل عليها لا تكلمها المره موتها والتطنيش خصوصا انك ماغلطت
|
الله يكون بعونك,,,,,,,,,,
اصلا في وقت الملكه كنت انا الي اسدده من باقي المهر الي معاي,,,,,,, هو مو ملزوم,,\ وبعد الزواج من مصروفي......... زوجي مفتك من جوالي,,,,,,, |
مشكورين يا اخوان لكن ابي اوضح نقطة للأخت daimound22 انا ما قطعتها وكم مره حاولت اتصل فيها لكن ما فيها جواب حتى على الرسايل كمان وانا بعد هذي المشكلة بكم يوم سددت الفاتورة اللي كانت على الجوال لأن جوالها كان مفصول قلت مثلاً لو هي تبغى تتصل بي او حتى ترسل لي لكن ما فيه شي من هذا والحين بعد ما انفصل عليها الجوال مره ثانية ترجع لي وترسلي من جوال اخوها !!
انا إلى الأن لم ارسل لها شي ولم ارد على رسالتها وش اسوي ؟ |
نقل للمقبلين على الزواج بالتوفيق |
ههههههههه
والله يا عابر أضحك من القهر شي يفقع المراره ورب البيت يا أخي مشكلة بعض البنات ما يفهمون شوف أنا تعرضت لنفس مشكلتك بالتمام بس تدري لما قلت لها هالكلام وش قالت , قالت : يا قلبي هم يحددون الجوال هههههههههههه يعني إذا ما راح تحط له حد إئتماني والا راح تهلكك , وانا ابشرك لما حطيت حد إئتماني ( 300 ريال ) حسيتها ضبطت وصار الجوال يقطع قبل يوم أو يومين من صدور الفاتوره , لكن ما أسدده إلا بعد ما تصدر الفاتوره لو تنقز عينها شوف انت حدد لها 300 يعني اشوف انه كويس ( على حسب وضعك المادي طبعاً ) والحين رد عليها عادي بس برد متوازن يعني مو رد اللي مشتاق مررره بس خله رد ثقيل حبتين , يعني بيتين فيها عتب على شوية شوق , دور والله يعينك |
اقتباس:
لكن هي تلاقيهاا متضاايقة والا تتدلع بزياادة علشاان كذاا ماردت على العموووم خلاااص هي ارسلتلك الان وانت لحد الان مارديت لية؟؟ مو معقوول ما اشتقت لهااا ما تبغى تكلمهاااا رووح ارسلهاا مسج وحااول تتفاهم معااها تحطلهاا حد ائتمااني زي ماقالو الاعضاااء وان شااء الله يمشي الحااال مع اني مستغربة انهاا خطيبتك وانت تدفع فاااتورتهاااا ؟؟ لكن يمكن انت مااعندك مشكلة في كذاا او يمكن مااخذين على بعض الله اعلم الله يوفقكم ويخليكم لبعض |
أصحاب العقول النيرة لم يقصروا معك .. وأنت ما شاء الله عليك كلك فهم
|
ياجماعه .. مع إحترامي الشديد أنا حاسس إنه هذه النوعيه من البنات مصلحيات ,, تفكر في الفلوس والجوال وبس
الله لايبتليني بزوجه زي كدا ,,, أبغى زوجه تحبني لذاتي ولشخصيتي ,, مو تفكر في الفلوس زي اللي مملك عليها الأخ كاتب الموضوع الله يعينه ,, معليش ياخوي أنا أشعر إنها تستغلك وماتفكر إلا في نفسها وأنانيه ,,, وكمان تدفع لها الفاتوره وماتتصلك بك؟؟؟؟؟؟؟؟ هذا شيء جارح بصراحه وشيء يغضب ,,, لاأدري حقيقة ماهو نوعية الحديث بينكم لكن من الفعل وحسبما ماسردته أنت لنا يتضح أنها "مصــــــــــــلحيه" ,,, ولاحد يجي يقلي نسايس وهذه بنت صغيره وووو ,,,, البنت لازم تحتاج إنه حد يعلمها ولو كان هناك قليل من القسوه وإلا سوف تتمادى ,,, تحتاج إلى أن توجهها وبشكل جاد وتوضح لها الصح من الخطأ ,, ويجب أن تهتم فيك وتتصل فيك ,,, على من تصرف كل هذه الإتصالات؟ وأنت مملك عليها و أنت الأحق بأنها تتصل بك وتطمن عليك ,,, |
معلش يمكن تزعل مني بس جد دام ان ماديتاكم قليله ومحدوده ليه تتزوجون؟
انا استغرب انك تخلق مشكله من فاتوره بقدر 400 ريال؟ اجل وش راح تسوي لما تفتح بيت ومسؤوليه ومصاريف؟ انا اعتقد الماده هي اول سبب للسعاده بين الزوجين وبكل اسف. فاتورة الجوال عادة تجي الف ونص او الفين. اعتقد زوجتك ما اذنبت وبالعكس ماتصرف كثير * |
بصراحة
أخوي مئة ريال لشهرين قليلة خلك واقعي :: أقترح عليك مثل ما قالو الأعضاء حطلها حد ائتماني 300 على الأقل و خبرها بهالشي و قل لها مو مسألة بخل بس انت تبي يكون في حياتكم تنظيم يعني جب الموضوع بهداوة ما تسئ لك و لا تقلل من قيمتك أسأل الله لك التوفيق |
يا اخي لاتحوس على نفسك وعلى خطيبتك احلى ايام عمركم
كبر راسك و اعقل اذا الحريم ناقصات عقل خلقه خلك رجال وحنون وبكره لما تتزوج تتحسف على قسوتك عليها يالله لا نشوف رقعة ردك الا وانت راد عليها ومعبرها بس بثقل شوي علشان تعرف قدرك ترى البنيه اشتاقت لك وربي يوفقكم |
اقتباس:
مو منطق انك تقولين ليش تتزوجون ؟ اجل بيرد عليك وبيقول خليك تعنسين اختي الله يهديك يمكن حالتكم ممتازه لكن مو كل الناس مثلكم , لكن هو اكيد متقدم لبنت من نفس حالته يعني المفروض تكون مقدره الوضع , عموما وفقك الله ________________ اخوي انا اقول ارد للمره الثانيه لكن كنت معصب المره اللي راحت لكن يبي لك طولة بال لان بتشوف الهوايل من الحريم لكن بالنسبه لها مثل ما قال الاخ رتب الامور ولكن بثقل , وبعدين الفاتوره دامها 300 ريال في الشهر اشوف انها معقوله , انا بالنسبه لي على شركة موبايلي والفاتوره كل شهر مو كل شهرين مثل شركة stc واشوف انها عاديه , فلذلك انت حاول تهدي الوضع في نفسك وبتصير الامور تمام حبيبي لانه يبيلها صبر وتعود نوعاً ما موفق |
mona moon
ردك كثيييير عجبني |
السلام عليكم ورحمه الله وبركاته
ماشاء الله الاعضاء ابد ماقصرو معاك والنصائح ماشاء الله تجنن وانا مع الي قال لك ان تضع حد ائتماني وخليك معاها لين ترة هوة دلع بنات هاذا لاتقسي عليه بالكلام خليك حنين معاها واذا غلطت طنشها ولا تكلمها وهي راح اتحس بذنبها وان شاء الله التوفيق للجميع |
الأخت :29:mona moon المسألة ما هي بمسألة مادة والحمد لله ما ني من النوع هذا انا ما قد أغليت شي على زوجتي وباني لها بيت بس انتظر تتحسن حالتي بعد البنى شوي واتزوج المسألة وين التقدير ويني من المكالمات اللي راحت حتى اني اسافر بعض الأحيان واجلس باليومين والثلاثة وبعض الأحيان بالأسابيع ما تدري عني لا والمشكلة اني بعد ما كلمتها قبل شهر وشوي وفاتحتها في الموضوع وانقلب الموضوع لمشكلة سددت الفاتورة بعد ما كنت مسددها قبل تقريباً 12يوم وبعدها قلت يمكن بدق علي لكن ما فيه اي شي من هذا والحين يوم انفصل عليها ترسلي من جوال اخوها الرسالة اللي كتبتها في بدايت الموضوع على العموم انا سويت كذا على شان اختبرها وطلع اللي ما كنت ابغاه .
انا ارسلت لها رد اللي هو : ما دام طعت الوقت فيني واقفيت تحمل اللي يجيك لا جيت تايب وش ينفع الأسف وانتي باقي على خطأ مدري عرفتي اصلاً خطأك قبل ما تتأسفين ، وينك من الأيام اللي راحت كنت اتمنى منك بس تهدي ونرجع ونتفاهم وأعطيتك الفرصة لكن نسيتي مدري تناسيتي ، قلبي ما نساك ابد ويتذكرك دايم بالذكرى الجميلة وهي تبقى مع مرور الوقت ، تعرفين وش قد متعلق فيك وتعرفين ما أغلي عليك شي بس ما قدرتي ، حبيبتي اشوف كذا حالنا أحسن وهذا اللي كنتي تبغين إلين يقرب زواجنا لأني ما أظن نفترق بهذي السهولة زوجك محبك إلى الأبد . *توضيح يوم قلت لها ان حالنا كذا بعيدين عن بعض وما ندق على بعض لانها كانت تقولي ان مو لازم اني ادق عليك لأن صديقاتي اللي مطنشه زوجها واللي مدري ايش وانا اشوف اني معك احسن وحده . جزاكم الله خير ،،، |
اقتباس:
حلو حلو اجل اسحب ولا عليك البنت مسيكينه وفي حاجتك وهي بتجي تدور لك , الله يعينك شكل اللي عندك قويه مرره بس انت تقدر تخليها على راحتك بس اثقل وتشوف كيف تجيك , واذا ما نفع فيها شي جعل الدنيا فداك وانا اخوك |
اقتباس:
|
اقتباس:
|
أول مرة أعرف انو الخاطب يدفع ريال لخطيبته عجيييييييييييييب...
وشرعا حسب دروس الثقافة الاسلامية اللي ناخدها انو لا لاتجب النفقة على الزوجة الا اذا تبعته في منزله واذا مكنته من نفسها يعني بالعربي بعد الفرح... الله يعينك اول مرة اسمع بالشي دا وبالنسبة للحد الائتماني دا راجع لحالتك المادية ( ولينفق ذو سعة من سعته) والرجال مو سوا فما في حد معين.. |
اخي رعاك الله ووفق في زواجك
انت مخطيء في فترة الملكة ليش جالس اكثر من سنة وها سبب يجعل المشاكل تكثر الشي الاخر مشكلتك هاذي لابد تعرضها على والدها وتقرر انت وهي فان اصلحت شانها فالحمد لله وان لم تصلح شانها فلابد من تدخل الاهل لحين يصلح شانها معك والعفوا منك لم اسالك عن عمرها ؟ |
سبحان الله
بعض النعم تكون عند بعض الناس ومايحسون |
اقتباس:
اخي امير الشوق انا لو بأيدي كان تزوجتها من ثلاث شهر ملكة لكن قلت بدل ما استأجر شقة ابني لي بيت واستقر فيه والحمد لله انا خلاص خلصت منه وجالس اثث وبعده إن شاء الله الزوج وهذا اللي اجبرني على التأخير وثاني شي اجبرني انها تبغى تكمل دراستها لانها باقي تدرس ثانوي انا عمري داخل 24سنه وهي 18 سنه اخواني واعطيتوني رأيكم في الرسالة هل راح تفهمها ولا اني ارخيت فيها شوي |
بصراحة اللي سويته عين العقل لازم تتأدب وتراجع نفسها وتعرف غلطها مو حلوة انها تكون مستغلة طيبتك لهالدرجة وانت اللي قاعد تحاول بكل جهدك انك توفرلها بيت ملك وقاعد تأثت المفروض انها تساعدك بتوفير المصاريف اللي مالها لزمة بس واضح انها صغيرة ومو فاهمة معنى الزواج ويلزمها شوي قسوة حتى تفيق من اللي هي فيه الله يكون بعونك اخي
|
صغيرة ولا حولها احد يفهمها ..
للأسف ملتمة على شله بنات من نوع " يقولون مالايفعلون " يعني كل واحدة تستعرض بطولاتها مع زوجها وهي كذاااااااااااااااااااااااااااابه ومولعه ايدينها لزوجها عشان يرضى .. انت سويت اللي عليك .. الخطوة الجايه لااااااااااااااااااااااااااااازم تكون منها .. وانت اتقبل اعتذارها برزانه .. وقولها على كل اللي زاعجك منها .. وركز يا اخي على اهم نقطة واللي عليها تقوم الحياة الزوجيه .. اللي هي الاحــــــــــــــــــــــــــــــــــترام .. حتى لو النفوس فيها ما فيها عيب ما ترد على اتصالاتك ورسايلك لان هذا من عدم الاحترام لشخصك .. الله يهدي سركم يارب .. |
نعم اخي شعاع من النور هي ما حولها أحد لأنها الوحيدة البنت من باقي اسرتها
شكراً على ردودكم الطيبه وانا الأن لي ثلاثة ايام من الرد على رسالتها ولا احس انه صار شي ,الله يكتب اللي فيه الخير الله يجزاكم خير ويوفق كل من ارسل ومن حاول يساعدني |
أنا اختك يا اخي الكريم ..
عمووووما مالك غير الانتظار .. لا تبادر بأي خطوة الآن .. لأنها راح تعتقد انها أدبتك بعدم اتصالها .. فقط اصبر عليها تراها صغيرة ودلوعه وشورها مو من راسها .. ان شاء الله اذا دخلت بيتك راح تتضح لك شخصيتها تماااااااااااااااااااااااااما وراح تعرف وشلون تسحرها و تخليها تتمنى رضاك .. الله يصلح حالكم يارب ويجمع بينكم على خير .. |
مشكوره اختي شعاع من النور يعني الحين ما اسوي اي شي اصبر يعني لعل في الصبر خير يارب
الله يجزاك خير ويجازي كل من شارك او كل من حاول يشارك لمساعدتي |
| الساعة الآن 09:37 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©