ما عندنا بيت و زوجي سيسافر !!!
 

السلام عليكم ..


لا اعلم قد تبدوا مشكلتي بسيطه بالنسبه لاحدكم ... ولكن النوم يجافيني منها


ما ( اقول الا حسبي الله ونعم الوكيل )


في الحقيقه انا متزوجه .. منذ اربع سنوات .. ولدي ولدان ... زوجي ليس بالزوج المثالي ولا السيء..


ولكن الحقيقه انا .. من يتسامح عنه ويتغاضى عنه ... يعني ليس طيب منه لو مرت غالب الايام بسلام


لاني انا من يمرر هفواته ... وللعلم انا سريعا ما اغضب واثور بهدوء ... ولكني سرعان ما اسامح


المشكله :



* منذ 3 شهور ونحن ناقلين من منطقه لاخرى يسكن فيها اهلي ... ومن تلك الفتره وانا في بيت اهلي ..


وهو في بيت اخوه .. مع ان زوجي انسان مقتدر ... ولكن


* زعلت منه منذ اسبوع وكان معي الحق مليون بالميه ... وحاول مراضاتي فطلبت منه .. ليس من باب

انه يجب ان يصالحني بهذا الشي .. ولكن من باب غلاتي عنده اني ابي هالشيء ( سلسال ذهب )

قد لاتتعدى قيمته 300 ريال ... ولكن


للعلم انا واخواتي وربي بدون فشخره ... ما يلبسون الا الالماس والذهب ولكني تنازلت عن هالشيء

بعد وجهه


* انا مجنونه سفر ... يعني الحياه تنتهي عندي بالسفر ... لان ابو الشباب ما بقى ديره الا سافر لها

وعندما تزوجني جاءه التدبير ..وفكره بناء المستقبل ... فقررت انا ان اتوظف ... بمبلغ لا يعد ربع ربع

مرتب زوجي لنسافر ... ولكن


* انا لا احب ان اطلب احدا ريالا واحدا... لانني لم اتعود ... هذا غير اني بدون مبالغه مدللة كنت عند

اهلي وزوجي يقر بهذا الشيء ...وكانت نقطه يفكر بها قبل الزواج بي ... وهي كيف يمكن لي الاندماج

معه وتقبل حياته .. ولكني تقبلت ..ولكنه دائما ما يقول لي ( اطلبي مني فلوس ... لو عندك

اطلبي ..ومن هالكلام اللي ماخوذ خيره ) ... ولكن



اللي صار معاي :


ان اهلي الله يجزاهم الجنه ... متقبليني انا واولادي بكل رحابه صدر ... وبالرغم من حوستنا .. وقلت

حياء زوجي ... ما قالوا غر ياهلا .. عندما زعلت من زوجي منذ اسبوع .. وطلبت منه السلسال ... قال

لي بعدين ان شاء الله ... ( لان الشيء هذا لي بروحي ... ولانه الذهب يتخرع من اسمه) راح سكنني

بفندق روعه .. وعشاء حلو جدا ... بس ليش لان هذا جوه..وهو مشتهي هالشيء ..

وكل ما اقول له السلسال قال لا تربطين الزعل بالسلسال ... يا كذبه اعرفه


المهم رديت لبيت اهلي بعد ما قضى حاجته ... وتفاجأه وانا اسولف مع اخوي ... قال لي زوجك بيسافر

مع اخوانه لـ ( اندونوسيا ) بصراحه دارت فيني الدنيا ... وين يروح واحنا من زود الاقتصاد ما حط لنا بيت

وين يروح وانا اللي متقطعه ع السفر بس ما عندي ... وياكثر غبائي وانا كنت ناويه اجمع عشان اسافر

من راتبي اللي ربع ربع راتبه ... وين بيسافر لهذه الدوله اللي لو تعذر بروحته لجمالها ... ما راح

اصدقه ..بصراحه حقير .. بس ما اقدر اصارحه ... لاني ماودي اطلع اخوي بالشينه وانه هو اللي قالي ..

انا انتظر زوجي يقولي مع العلم انه حاجز خلاص .. بس انتظر يجيني الخبر من غير اخوي عشان انفلت

عليه .. وربي وجهه عريض


المهم ناديته انا ذاك اليوم .. ومن جد كان مبين اني معصبه .. قلت له فلان انت ما تشتاق لنا .. يا اخي

الرجال يبي حرمته ... وانت ليش .. كذا ( مع العلم وانا بعد على نياتي ... احسه انسان يمكن يكون

صالح .. يعني ماله حوسات بس شاللي يضمني هو مو نبي عشان اوثق فيه )


قال لي عادي الرجال ما يشتهي المرأه الا بعد شهر ... الا اذا كانت قريبه منه وهي تبدأ ... قلته مو

معقوله ... قال لي تبين تعلميني بالرياجيل ؟؟.. (والله ما ادري جاوبوني انتم يارياجيل صحيح اللي يقوله ؟)


قلت له ليش ما عندنا بيت ... عيب والله متعزبين اهلي ... والناس يقولون ويقولون ... قال لي ... مثل

ما هالناس تقول براحتها ... انتي سوى اللي براحتك ( ياسلام وكله فوق راس اهلي ... من جد وقاحه)


المهم ساعه كامله نقاش محيوس ... وفي هالنقاش ابديت شكي فيه لانه كيف يصبر عني ... الا اذا

كان له جوّ ... وانه ليش ما عندنا بيت ... يقول ينتظر البيت اللي ببلاش من الشركه .. اللي الله العالم

متى يجي..


المهم قبل لا انزل قلت له عطني فلوس راح مد لي 300 ... نعنبوا داره ..عند اهلي ومعاي طفلين 300

ليش الجعاصه ... قلت له ابي ازود ... مو انت تقول لي اذا بغيتي اطلبي ... لو كان معاك اطلبي ..

هذا انا اطلب عطني ... كان الطوفه ردت هو رد ... وبس شاطر يضيعها بسفر ..لانه كان اليوم حاجز


نزلت وانا ميته ... لاني حتى طاري السفر لاندونوسيا ما جبته .. يعني هو الشيء اللي ثايرني ... مع

اني لمحت له بس تحسون ان ماله نيه ... لكن اخوي صادق وواثق من كلامه

ومن يومها وانا ما اكلمه ... قولوا لي شسوي ...



بس اهلي برى السالفه كلها لانهم ما عمرهم تدخلوا ...

هل اطلت في سرد مشكلتي لذلك لا اجد يد مساعده ...

والله ان النوم جافاني ...

اللي فهمته ان عندك ثلاث مشاكل (صححيني ان كنت مخطأ):

المشكلة الاولى هي ان زوجك عايش عند اهلك
المشكلة الثانية انه مقصر في الانفاق عليكم
المشكلة الثالثة انه رغم ماذكر اعلاه الا انه يسافر للخارج و لوحده

حل المشكلة الاولى هي ان تصارحيه بان ما يفعله لم يفعله احد من قبله و يمس كرامتكم و يهز مظهر زوجك و هيبته امام الناس فمتى كان الزوج يعيش عند اهل زوجته .. اكدي عليه ان الموضوع ليس لاهلك دخل فيه و نابع منكي شخصياً لانك تغارين على سمعته و يهمك ان لا يمس شيء مظهر زوجك و هيبته امام الناس.

اما المشكلة الثانية فاطلبي منه بهدوؤ و لين ان يخصص مصروف شهري لك و لابنك فان رفض فاخبري والده او والدته و اطلبي منهم ان يتوسطوا في الموضوع و ان رفضوا فادخلي اهلك في الموضوع فموضوع النفقة امر لا يسكت عليه و من واجبات الزوج الاساسية

اما المشكلة الثالثة فبادريه بطلب السفر للخارج حتى تضعينه امام الامر الواقع

زوجك المال اللي مجمعو رح يسافر فيه

لانه وجد كلام معسول من اهلك انو خذ راحتك البيت بيتك

والصهر ما صدق وكثر من امثال زوجك


شدي عليه واهلك ايضا خليه يشوف انو متضايقين من وجودكم

حتى ياخذ بيت لك وللاولاد

رح تلاقي الفلوس طارت بالسفر

انتبهي مش وقت تمرري وتسكتي


اصري على البيت وباسرع وقت ممكن


رح زوجك يهنى له انك تعيشي عند اهلك ويوفر المال للسفر والرحلات

مبين من كلامك اختي مافيه اي احترام لزوجك ولشخصية زوجك حتى بأسوء الحالات او أسوء الظروف الي تمرون فيها. حتى وان كان مسافر.

انا ما اقولك اسكتي ، ولا اقول خليه يسوي الي يبي، الغلط غلط سواءاً منك او منه او من اي شخص.

على اي حال تأكدي ان حل اي مشكله هي اولاً با الاحترام وثانياً با المصارحه والشفافيه في النقاش ، والاخلاص بينك وبين نفسك انك تبين حل مو انك تبين تبردين حرتك عليه في شخصياً.

حاولي بها الاسلوب وصدقيني راح تجدين الحل.

هذا على عجل ولي عوده ان شاء الله

الله يوفقنا ويوفقك.

الله يكتب لك الخير


استغفري وادعي ربك بأن يرده لكم ردا جميلا

أنتي تحتاجين تناقشينه بجو هادئ حتى ماينفعل ولاتنفعلين.......

يقدم الأولويات وبعدين تفكروا ترفهوا أنفسكم ........

الله يكتب لكم الخير...

انا لو منك اروح له البيت عند اخوه انتي وعيالك وعفشك وقوليله ترى انا استحيت من اهلي ومااقدر استحمل اكثر من كذا حطيه بالامر الواقع خليه يأجرلك بيت ورجعه عند اهلك لاتروحين قوليله انا قلت لاهلي انك جبتلي بيت
وانتبهي تبيني لزوجك انه معاكي فلوس حتى لومعاكي هو مااعطاكي لانه ضامن انه معاكي
ربي يوفقك ويسعدك
بلغينا عن اخر اخبارك

الله يعينك من جدخذي عفشك وروحي بيت اخوه كم يوم لعله يستح وبرري له ان انا قلت لأهلي ان اهلك يبغوني عندهم يومين نغير جووبالفعل روحي قوليله مافيها شي يومين لعل يستح من اخوه وحرمة اخوهوانما يوفى الصابرون اجرهم بغير حساب

اخوي صقر~
زوجي ساكن عند اخوه مو في بيت اهلي

اخر مستجداتي
قلت له شنو الزواج غير
¤استقرار يعني بيت ~ جنس~ ماده¤
وكل هذي انت مو موفرها
وقلت له الله مغنيننا عن اهلي وأهلك ليش ما ناخذ لنا بيت
واهم شي في الحديث تم طرحه
قلت له وربي اني مبسوطه وانا عند اهلي ~وربي يشهد على صدق قولي~ لولا ان اولادي يحوسون ويخربون وانا استحيت من طيب اهلي
قال لي
يعني قصدك اخذهم فلانه انتي تحسين انك بتكونين مبسوطه مع غيري ~قصده يطلق~
قلت له شوف انا قلت لك للمره المليون
لو بتخيرني بين الطلاق واقعد عندك
بختار الطلاق
لاني بثبت لك اني مايهمني

¤ معاي حق انا باللي اقوله
¤ قال هو بيحط لنا شقه بس من جد كرهه الوقت معاه وماودي بشوفه
لانه يقول لي انتي تزعلين وترضين
ودي هالمرها اصمل ع الزعل
¤موضوع سفره مكدر حيل خاطري بس ماطاع هو يقولي عنه

صادقه اختي قرين 
بس موحلوه في حق اهلي يبدون ضيقهم
وهو قال بيطلعنا ببيت~ما ادري هل هو صادق ولا لا~ بس من جد ماودي اشوفه

اعتقد هو شايف انك مقيمته صفر وبالتالي مو مكلف حاله يقول مهما صار وسويت ماراح تزيد قيمتي عندها ولا بوصل لما وصلوه اهلها...وبالتالي مطنش رضاك
زوجي من نوعية زوجك تقريبا ....كلاحة....انا جربت الحدة معاه ماجابت نتيجة ...والله يوم قلبت قلب ..وصرت اظهر له انه كل شي وانه بيعوضنا وووووا... ومن جد صار يحاول ..على الاقل بدا يحاول
بالنسبة للسفر اطلبي منه تسافرين داخل الدولة الي انتم فيها عشن ميزانيتكم واذا رفض قوليله انا مقدرة وضعك وانك بتعوضنا واملي فيك بعد الله ان بتعوضنا..لا اهلي ولا غيرهم ماراح يسفرونا (يعني هو الكل في الكل )
وسايسيه بالتي هي احسن وبطلي مقارنات لان بيحس انه مادام ماراح يوصل لاهلك ماله داع يحاول

اخوي تركي العالمي انت قلت شيئ اعجبني ~وهو اني قاعده ابرد خاطري فيه بدون ما احل المشكله اللي مأرقتني~

بس حقيقه
انا موقادره احل مشكله السفر لانه ماقالي والخبر جاني من اخوي وصعبه اطلع اخوي بمنظر موحلو

الشي الثاني
لما تقول انه مبين اني مو محترمته
ما تصدق لو قلت لك اني احترم حتى طيفه
وما اعصى اوامره حتى في غيبته

بس في مثل يقول ! سمحنا له~~ دخل بحماره! عزكم الله

وهذا المثل انطبق عليه بالضبط لان التسامح معاه ولد لامبالاه

اختي قلب صافي ماقصرتي
وعلى يجزاك خير ع النصيحه

اختي بيرسون
صعبه حيل اروح بيت اخوه
لاني بصير بمشاكل وانا مو قدها
وبالنسبه للمقارنه انا ما اقارن
بين اهلي وزوجي
وحتى لو قارنت ما اقول له
ربكم يعين

طيب جربي افتحي موضوع الضربة الاستباقية (السفر الداخلي) يعني انك مو عارفة وانك متاملة فيه خير

أختي نصيحة صادقة

أسلوب التحدي لن يأتي بنتيجة أبدا أبد

غيري أسلوبك لعل وعسى توصلين لنتيجة ترضيك أنت

http://www.66n.com/pics/hosted/rceo8...wsdlwui05g.gif

السلام عليكم

اسمحي لي اختي ، ردي الاول كان على عجل ، والان لدي وقت كافي لقراءة الموضوع كامل، والمشاركه.

انتي مشكلتك موب بسيطه ، وبرضوا مش كبيره الي تخليك معصبه ومتحامله على زوجك لها الدرجه، مهماً كان هذا ابو عيالك.

ما ادري ليش انتي متحامله عليه لها االدرجه، هل انتي جالسه ببيت اهلك مغصوبه، او مو راضيه، وتقولين مبسوطه وفرحانه، يعني ليش الزعل ، وبعدين هو مواعدكم ببيت كامل لك ولعيالك، وش تبين اكثر من كذا.

اما على مسأله السفر وللحين ما فتح الموضوع قدامك ، ... لا تقولين انا اثق بأخوي واخوي ما يكذب، اخوك صادق وعلى العين وعلى الراس ، ولكن ممكن الرجل للحين ما صمل ، ممكن هون ، ممكن أجل الموضوع ، وبيقول لك في الوقت المناسب ، الا يعني بيسافر ولا راح يقولك.

وبعدين انا ما ادري ليش ما فاتحتيه با الموضوع الي مخليك معصبه ومتضايقه لها الدرجه الي تقولين لو يخيرك بين الطلاق والاستمرار معه لطلبتي الطلاق ، الي هو السفر، كان ممكن تلمحين له ، او حتى تسألين له ، مو طاريك تسافر اي مكان ها الصيفيه ، او وش رايك نروح نتمشى سوا بأي مكان ، ودي اخفف على اهلي شوي ، يعني من ها القبيل وتفتحين الموضوع وتعرفين كل الي تبين.

ابي اعرف لو ان اخوك ما قالك انه بيسافر ، ممكن اعرف وش بتسوين ، او وش كان موقفك الان تجاه زوجك، ترى السالفه ما تستاهل وانا اخوك.

الحل انك تكلمينه سواءاً با الصراحه او با التلميح وتشوفين ردة فعله او وش عنده.

اما مسأله الفندق وما الفندق، الي ابي اعرف حاجه وحده، واتمنى تجاوبيني بصراحه، انتي تقولين وخذا الي يبي وردني لبيت لأهلي ولا قال لي عن موضوع السفره.

هل انتي مغصوبه، هل انتي ما تبين ها الشيء، هل قالك ماراح نسويها وسواها وانتي ما تدرين او ماكان عندك خبر ان ها الشيء بيصير، جد اختي ترى تحاملك على زوجك غرييب حييل واول مره اشوف وحده متحامله على زوجها كذا وتتكلم فيه كذا.

صدقيني وانا اخوك ، لما تقولين اكيد عنده شيء ثاني يخليه يصبر عن زوجته شهر ، صدقيني وربي اي رجل بحالتكم عنده مورد ثاني سواءاً حلال او حرام صدقيني ما راح يكلم زوجته ويصرفها بكل الطرق عشان ياخذ ويحصل قدر الامكان منه قبل لا ترجع المدام.

على اي حال انا ما ابي اطول اكثر من كذا ، ولكن نصيحتي الاولى والاخيره تقربي لله وخليه سبحانه الملجأ الاول والاخير، ومنها كثري من الاستغفار وطلب الهدايه والستر والصلاح والتوفيق لك ولأهلك ولبيتك وعيالك.

ثانياً: لا تقولين دخل بحماره ومدري ايش ،، ترى هذا زوجك وابو عيالك ، وانا ما اشوفه سوا شي غصب عنك ، انتي راضيه با اللي يصير ، ومالك اي حق با التحامل عليه، با العكس انا اشوفه موب مقصر مع تحفظي شخصياً بوجودك عند اهلك كل ها الفتره وهذا وجهة نظر شخصيه بحته.

ثالثاً:

انصحك بأحترام زوجك بوجوده وغيابه ، ترى عندك ابناء وبنات وصدقيني يتأثرون با اللي يصير من حولهم، وترى الأطفال يحفظون كل صغيره وكبيره ويتأثرون فيها. حتى وان كنتي تحترمينه، حتى انتي شخصياً اذا احترمتيه صدقيني بتحبينه من احترامك له، وجربي وشوفي.

الله يوفقنا ويوفقك

واجهيه بدون ما تدخلي أخوك بالسالفة

ان شاء الله بغير اسلوبي ..

اخوي تركي ارحب بعودتك

صحيح يمكن اكون متحامله على زوجي لاني من 3 سنوات وانا اطلبه نسافر ... ويجي هالمره يحجز ويدفع حق التذاكر بدون ما يقول لي ... وللعلم هو كذا مره وعدني _ وكلمه الرجال وحده _ بس يخلف
باعذار ابلعها غصبا عني...


اما عن جلستي عند اهلي ...

انا ما اعرفكم ولا انتم تعرفوني ... عشان اقول اني مبسوطه وانا اكذب ... انا ما طرحت المشكله هنا الا لاني بقول كل حرف بصدق بدون ما ادعي شيء ...

لكن بقول لك ليش ما ودي ابقى ...
1/ يتعود زوجي على عدم المسؤليه
2/ الحنان اللي يبونه اولاده وينه اذا هو مو موجود
3 / ابوي شايب وماله في ازعاج الاولاد مع انه دوم يهلي ويرحب ...وامي فيها الخبيث براسها الله يشفيها يعني ازعاج وحرام علي وعليه نزعجها..ماتتحمل
4/ اش كلف اخواني فينا وهذي بعد مهمه


بالله كل هالاسباب ما تخليني اطالب في بيت واحتر ان فلوس الاثاث والبيت بتطير بشيء ما لي فيه


نجي عند الفندق ... وهل كان براحتي ولا لا...

اكيد قبل ما ارضى طلبت منه طلبين ... وكل واحد ابسط من الثاني ... قال لي اوكي وبعد ما قضى
قال لا ... ولا يمكن

بالنسبه لاحترامه ... بحطه فوق راسي ... بس من جد هو ما خلاني احترمه ..

لان كل تصرف يسويه يزعجني

اما بالسبه لاخوي ... اخوي مو صغير ... ولا كثير هذره عشان ما اصدقه ... هو صادق ويقول دفع بعد التذاكر..

ولو ما كان اخوي قال لي ... يمكن تغير الوضع شوي مو واجد ... لان من الاساس انا اللي معصب فيني السفر وبعد الدوله اللي هو يبي يروح لها

وشاكره لك

اخاف يوافق ... بصراحه انا ما احب السفر الداخلي

عندي اقعد ببيت اهلي احسن

طيب اش احسن تسافري داخلي ولا هو يسافر خارجي؟؟ لا تقولي لا ده ولا ده..انا قلت داخلي لان لو قلتيله خارجي حيقولك مصاريف ووووووووووووووووو..لكن داخلي ماعنده عذر حتى لو رفض حيصير شكله بايخ يسافر وهو مانعك حتى من الداخلي....يعني يمكن يستح
مو كل شي في الدنيا دي على كيفنا روحوا الحرمين وحتى لو تعملي برنامج طويل للاجازة وماتمشو عليه الا لو يومين ..بس وقتيها بنفس توقيت سفر اصحابه
اقلها يكون معاك واهلك يحسوا انه مازال انسان مسؤول

اذن سأعرض الفكره عليه وبشوف ايش بقول

لكن بالنسبه للتوقيت فهو ذكي
حاطها بتاريخ ثاني يوم من دوامي[ ااه منه]]

وانت صيري اذكى وقولي بقدم اجازة :)
شوفي عاد كيف الترتيب وادع ان الله يرتب لك ..لان احنا البشر وين مانطقها عوجة
ادع الله وقولي اللهم ان ابرأ اليك من حولي وقوني والوذ الى حولك وقوتك

الحمدلله بناخذ بيت اليوم ان شالله
ولكن الى الان مخبي عني موضوع السفر وهذا اللي مجنني
الله يستر من تاليها
وراح ابشركم لو ماسافر

الحمد لله هذا دليل ان انسان صاحي ماحب يسافر الا بعد مايامنك لك وضعك
هيا عاد لاتنقين استوديه الله وادع من قلبك لايسافر بس برضه هو انسان اصيل ان ماسواها الا بعد مالقى لك بيت وحسسيه ان هادي اول الخير وانك تتوقعي ان كل الخير جاي بالطريق (يعني انك واثة فيه وبرجولته)