|
حياتي تنهار كليّاً الله يستر من النهاية
بسم الله الرحمن الرحيم السلام عليكم ورحمة الله وبركاته اخواني يعلم الله ما كتبت الموضوع الا لانها ضاقت علي الطرقــ وتعبت من التفكير وامسيت بلا حيله ! بدات قصتي عندماحدثت مشكله بيني وبين امي (خاصه) وبعدها تقدم لخطبتي ابن خالتي رفضته لاني ما ابيه من كنت صغيره ما اطيقه ومش متعلم وما ارتاح له المهم ما وافقت لكن امي وجدتي اقنعوني انه ولد خالتك احسن من الغريب ...الخ وتحت الضغط وافقت ملكت ! وظليت سنه كامله مملكه واهلي ضد المكالمات بين الخطيبين ! انهيت فترت دراستي وتزوجت في البدايه كان مثالي ! لدرجة اني قلت مستحيل يكون هذا الشخص اللي اعرفه !! طبعا ظل ممعي اسبوعين (شهر عسل !) المهم انا رجعت معاه لدمام عشان استلم شهاداتي واقدم اوراقي لتوظيف بس ماقلت له - لاني ابي اتوظف في هذي المنطقه - واساسا من شروط زواجي انه مايتدخل بوظيفتي باي مكان او زمان ) بعد انقضاء اسبوعين رجع للقصيم عشان شغله بقيت عند اهلي وبعد اسبوعين وبالتممام بتاريخ 25 رجع عندي وجلس 5 ايام خلص راتبه اللي كان يقول لي انه 4 الاف وطلع 1200 ريال بعد خصم اقساط القروض ! سكتت وماناقشت بموضوع الراتب رجع لدوام --حصل موقف غريب جدا ً اتصل علي زوجي بنص الليل يسئلني انتي فلانه ولا فلانه ! استغربت وبعد 10 دقايق اكتشفت انه (سكران) اعوذ بالله انصدمت وعطيته جوه وسحبته بالكلام ورحت لامي وحطيت الجوال على السبيكر وسمعت وانصدمت - سكرت جوالي كم يوم وهو يتصل على اخواني مستغرب يقول لايكون تعبانه ولا شي اخر شي رسلت له رساله انه انت قلت كذا وكذا ... الخ المهم انتهى المووضوع على انه كلم امي وقال لها ستري علي ياخالتي شكلي كثرت !! امي تحملت وقاحته وقالت خلاص _اعترف لها يعني انه يسكر __ بعدها نصحته ...الخ بتاريخ 25جاء عندي مره ثانيه وانا عند اهلي الوضع كالتالي (نطلع من بيت اهلي يستاجر شقه مفروشه - يتنقل من شقه لشقه واذا خلصت فلوسه نرجع بيت اهلي ويمشي اليوم الثاني ) ليش صبرت على هالوضع قلت يمكن مؤقت وراح ينقل هنا اذا سمع بتوظيفي ويتعدل وضعه ويتوب واعدل منه في شهر رمضان حصلت على عقد الوظيفه + خبر حملي المهم في كل مره اكتشف في زوجي اشياء غريبه مثل ضنه انه مسحور وانه يقدر يرقي الناس وكثرة كلامه عن العقيق اليماني وانه يقول لي اقرئي ايات معينات في اوقات معينه ولو كلمتك فجئه وقلت اقرئي الايه الفلانه اقرئيها .. اشياء غريبه تخليني اخاف منه.. مع انه محافظ على الصلاه لكنه لايترك الحديث عن العائله ومشاكلها وفلان مسحور وانا يوم كنت جاهل كلمت الساحر الفلاني و...الخ تقريبا كل مره تسؤء احوالنا مع بعض وكل مره اطفش منه كثير تهاوشنا كثير وغاب شهر ورجع وانا في الشهر الرابع كان عادي ومتحمس لطفل.. قلت له اني بروح مع امي لسوق ..(لم تكن صيغة استئذان بقدر ماكان تبليغ له ) قلت المغرب ارجع ونطلع سوا قبل المغرب كلمني اخوي يقول زوجك سافر لاهله بدون سبب طلع بدون مايودعني خفت عليه وقلقت اتصل مايرد بعد يومين تتصل اخته تستهبل تقول اخوي ضاع وكذا وتهاوشت معاها وقلت بلا سخافه تعرفين اني حامل وما تحمل خرابيط وصارت هوشه مع اخته بعدها ما اتصل ولا جاء ولا شي !! واخر شي قرر قال اذا زوججتي تبيني تجي عندي بالقصيم غير كذا مافيه سكت ولا اتصلت عليه ومرت 6 شهور !! كملت فترة حملي وولدت .. تتوقعون رجع وشافني لا !! ولدتت وجبت بنتي ولا حضر للمستشفى طبعا بعمليه قيصريه وكان مستشفى خاص وبعد اسبوع جات امه تشوفني وتسلم علي وتناقشنا بالموضوع قالت اهو يبقى بطاقة العائله حقته !! قلت وش يبي فيها انا احتاجها لتطعيم ماراح اعطيكم وهو وينه مايجي يخلص اوراق بنته ويشوفها... تناقشنا ونتيجه النقاش اانه اذا ماتبينه اطلبي طلاق بالمحكمه وهو يطلقك خلصت الاربعين ولا جاء شاف بنته بعد ماتمت شهرين رحنا للقصيم نحضر زواج خالي وفي بيت جدتي حصل عشا وحضر مع اهله وكل اهلنا وجات خالتي وخذت البنت عنده سلم عليها ورجعها قال بكل بساطه خلو اهلي يستعدون يروحون معاي شقه مفروشه !! طبعا رفضت :) كرامتي ماتسمح لي بعد كل هالهجر بدون سبب وسوؤ االاخلاق ييرجع يدور مصالحه ومتعته الشخصيه فقط لا غير رفضت وبعد ماتكلم ابوي وابوه قال ابوه بس نبغى الكرت تبع العائله !! ابوي من التعصيب قال وينه ماشاف اهله .... وقال كل كلام منطقي وحشششرهم بالكلام تفشلوا قال خلاص ادفع قيمة تكاليف الولاده اللي البنت دفعتها على نفسها وبعدها اعطيك كرتك وخلص اوراق بنتك اللي بدون شهادة ميلاد للحين !! وانتهى الموضوع وصار له شهر الوضع كذا بس ارسل مسج يهددني فيه انه بيحرمني مها مثل ماحرمته فرحتها !! طبعا صارت اخته تمشي مع الناس وتسوي اشاعات تقول البنت ماتصلي والبنت تسكر !! وهو اصلا مايبيها وحسبي الله ونعم الوكيل ملاحظات (اتممت سنه زواج + طفله + ماعمره مد لي مصروف طول الفتره ولا حط بيت زوجيه عشان يقول يلله نسكن بروحنا+ راتبه مايغطي حياة+ انه يبيني اترك وظيفتي اللي قاعده اصرف على نفسي وبنتي منها واروح معاه لمكان مافيه الا الخراب والسكر يبي يصير عند خرابيطه) انا تعبت بالتفكير بهالموضوع وشاب راسي وربي شاب راسي تعبت حسيت نفسيتي تعبانه وشخصيتي مهزوزه وش الحل مع مثل هالفئه من الناس و الله من كثر ما اعيد بالقصه صرت انسى نصها واتخيل كل العالم عارفتها اتمنى تساعدوني وتنصحوني وش اعمل معاه |
نُقل للمكان المناسب .. المتزوجين |
تحية واحترام لو ما بينكم طفلة لكان رأيي أن تصلحوا الخطأ وتنفصلوا لكن بوجود طفلة عليك التفكير ملايين الأفكار قبل أن تقرري أي شيء قصتك مؤثرة لكن أراد الله لك هذه الظروف حافظي على ابنتك ووظيفتك وكوني مع الله في سرائك وضرائك لن يحل بك إلا الخير دعواتي لك ولطفلتك.. |
اتركيه يا أختي فهو لايصلح زوج وهذا لم يكن زواج من البداية لأن الزواج ما هو إلا مودة ورحمة واستقرار
ولم أجد فيما قلتينه أي من هذه الأشياء |
اتركيه افضل لك و لبنتك خاص انه مو متهم من البداية فيك
و اهلك هم في صفك لانك عايشه معاهم و شايفين انه مقصر و ما اعتقد ان راح يهتم في البنت اذا اخذها هو ما اهتم فيها و لا شافها بس ما اقول غير ان الله يفرج همك و يشرح صدرك |
أختي الكريمة وفقك الله /
كان الله في عونك وربط على قلبك بالصبر من رأيي دعي والدك يتصرف مع هذا الزوج ونصيحه لاتتركي وظيفتك مهما كلفك الأمر ولاترجعي إلية إلا بشروط تأمن مستقبلك أنتي وابنتك مع هذا الزوج مثل السكن والنفقة .. أيضا لايستطيع ولايحق له أخذ الطفله لأن أنتي أحق بحضانتها منه فقط يهدد فلا تخافي وتوكلي على الله عزوجل .. أكثري من الدعاء والإستغفار والصدقة .. أسأل الله العلي العظيم أن يزيل همك ويفرج كربك ويجعل لكِ من كل ضيقاً مخرجا .. |
لو تقدرين تتحملين زوجج بعيوبه وتصبرين على تعديلها
اصبـــــــــــــــري لـكـــن اذا شايفه انك ماتقدرين على هذا فالاولى اشتري راحتج والبنت بحضانتك |
, لاحـول ولاقوة الا بالله !! الله يعينك ويلهمك الصـبر .. مثل ماقالت الأخت .. { ورده بين الثـلوج ~ لاتتركي وظيفتك لو مهما كلفك الأمـر ... نصيحه لـوجه الله عزوجل .. وبنتك لو يجيب قبيلته كلها عشـان ياخذها مايقدر ياخذها الا اذا انتي بنفسك اعطيتيه ايـاها .. عشان كذا ماتروح معاه ابـدا .. ثالثا .. يبونك ترفعين بالمحكمه انك تبين تتطلقين ... عشان يردون ماخسروه عليك ... عشـان كذا .. خليه وماطليـه الله لايـرده ومن نـاحية بنتك ... لو ابـوك واخوانك عندهم احد وااااااااااصل بالداخليه او المباحث .. يقدرون يشوفون وش مسوي من مصايب .. اتوقع زوجك عنده مصايب لليل .. واحس انه انمسك او انسجن بسبب السكر او المتـاجره .. فا هالشي راح يكون دليل لك لو كنتِ تبين الطلاق .. وبكذا لو يمووووووووت مايقدر ياخذ ببنتك لأنه غير اهل لتربيتها ... او تسجلين عليه مكالمات وهو سكراااااان الله يعافيه ولا يبتلينا ... يعني احسن لك تكوني ذكيـه بهالمسأله بس عشان مايقهرك وكفايه الي سواه فيك .. بجد انـا مو شايفه اي شي يخلي الواحد يفكر انه لازم ترجعين له لو انه صاحي وعاقل كان اقولك ارجعي واصبري .. عشان بنتك بس سكران ومصايبه وش كثرها .. على ايش ترجعين بنتك عند اب يشرب الخمـــــــــــــــر !! لا ويتعامل مع السحره !! اعوذ بالله منـه ... حصني نفسك وبنتك .. ولاتخلين لأحد من اهله مجال عليك .. انتبهي .. بجد شي يخوووووووف الله يكفيك شـره !! وادعي دااااااااااااااااائم { اللهم اكفنيه بما شئت } وان شـاءالله ربي يرد كيده وكيد كل من يتنوالك بشر بنحرهم ... |
ما أقول إلا الله يسامح أمج وجدتك وهذا هو النصيب
اختي الكريمة خلنا نكون واقعيين شوي من غير مثاليات....عشتي طول هذه الفترة تزوجتي وعشتي حياة زوجية لحالك تتخللها أيام اللي كان يقضيها معاج + حملتي وعشتي أيام حملك وولادة لحالك + عشتي الامومة بكل معانيها لحالك يعني انسان ماله أي ادنى دور في حياتك إلا انه كان سبب حملك فقط لاغير.... يعني حتى لو بقول اصبري....اصبري على ايش على اخلاقه ولا على اسلوبه ولا على دينه ولا على معاملته ولا معاملة أهله والله فكرت كثير قبل لا اقولك انفصلي مهما كان شي ما يرضيني ما راح ارضاه لك لكني وضعت نفسي في مكانك قبل لا ارد عليكي يعني حتى لو فكرتي تحافظين على الزواج وتصلحينه لكن الاصلاح يبيله جو مو رجال فلتان ماله ارض ولا سكن وين تلقينه هذا عشان تصلحينه...هجرج كل هالسنوات وكأنه العيد عنده وين راح تجيبينه عشان تصلحينه... والله ثم والله لو انا في مكانك كان ما قعدت في ذمته دقيقة ....الوحدة فينا كل يوم تفكر انها ترتقي بأفكارها ودينها واخلاقها عشان تنحج في بناء اسره وبيت سعيد ورقيها من رقي اسرتها وصلاحها من صلاح اسرتها لكن هالزواج غصب عنج يخليج توصلين لمستويات أدنى مما تتوقعين ومن غير الاشاعات اللي قامت تطلع ما شاء الله.... خذي بنتج وربيها وراح تتربى مثل ما الله قسم لها وكل انسان انولد ورزقه معاه سواء بأب أو من غير أب.....للأسف فعلا للأسف على رجوله زي زوجك....الرجولة مواقف ياناس مو ورقة زواج الوحدة لما تتزوج ايش يعني تتوقعون حاجتها في الزواج عشان تقول لصحباتها انا متزوحة لا معناها للبنت أكبر بكثير امن وامان وحمايه من الشرور الداخليه والخارجية ستر وغطا هذا ايش سوا الله يهديه فعلا الله يهدي ويهدي الجميع اللي على شاكلته..... استغفر الله العظيم |
فرج الله همك وأعانك يأختي
السكر من أقوى الأسباب التى تؤدي الى الأنفصال وأنتي أستخيري الله قبل أي قرار والله يكتب لك الي فيه الخير |
انا مدري ليش صبرتي عيه كل هذا .:29::29:
احسنلك فارقيه . يعني وش خسرانة بكل الاحوال بعيد ولا يسال عنكم |
للاسف زوجك انسان غير مسؤؤل وواضح ان اهله مخلينه على راحته نسأل الله له الهداية
حبيبتي لا تتركي وظيفتك بأي حال من الاحوال وبنتك ما يقدر يا خذها بس يبي يخوفك ويلوي ذراعك ما تردي عليه واذا تبين تنفصلي مافيه الا انك تتبتي عليه حالة السكر وعدم توفير سكن و عدم النفقة وبعدها تطلبي الطلاق للضرر استشيري خبير بهالامور ليبين لك التصرف القانوني الصحيح لحالتك ولا تستهيني بالدعاء اختي لا يرد القضاء الا الدعاء فرج الله همك وهمي وهم جميع المسلمين |
انا من رايي البعد عنه غنيمه اتركيه احسن لك والبنت له رب كريم فعلا ان لم تستحي افعل ما شأت هذا من قرب المعرفه الله يفرجها عليك
|
حبيبتي ما يحتاج مباحث ووزاره الداخليه
بتحليل دم بسيط بامر من المحكمه يطلع الشراب في دمه وينتهي الموضوع غير كده شهود من اهلك بانه ماجا ولا صرف عليكي ولا عمل اوراق بنته الله يفرج همك يارب |
الله يفرج لنا ولك
ولكني انصحك بعدم ترك وظيفتك لاحتمال يصلح ولا لا وربي يوفقك |
والله ياعزيزتي اذا كلامك الي قلتيه بدون اي عاطفه يعني الحقيقه لأن بعض الموضيع تسمعها وتصدق لكن اذا سمعت الرأي الآخر يختلف الكلام بأختصار انا حكمي بناء على ان كلامك كان بدون عاطفه اقدر اقول بكل جرأه الفكه منه غنيمه لأنه يشرب الخمر ومن يشرب لا نستغرب منه فعل اي شيء وفوق هذا غير متعلم ولايملك بيت وراتبه ضعيف لايكفي لمصروف البيت وغير مهتم فيك وايضا في وقت ولدتك لم يكن معك ولم يسأل عن البنت حتى عمرها شهرين انا الي اعرفه ان بعض الشباب ما يسافرون الا بعد ولادة زوجته وخروجها من المستشفى ولاطمئنان عليها وشراء كل حاجات الطفل بعدها يسافر وتزعل منه زوجته بعد !!!فما بالك بهذا الزوج نصيحه اتركيه و ابي سبب واحد يجلسك معه وبنتك انتي معها وبتراعينها في عيونك وان شاء الله تتزوجين الي يخاف الله ويعاملها مثل بنته صح مثل الاب مافيه بس مالك الا هذا الحل ونصيحه لا تفرطين في الوظيفه ولو جائتك مشاكل خذي اجازه من غير راتب.
|
الله المستعان على مبتلاه..
عزيزتي مشكلتج صعبة ..ما في انسن كامل في الدنيا اكتبي كل سلبياته و كل ايجابياته في روقه و قارني بينها >>>نصيحه من اخصائيه اجتماعيه لمواجهة مشاكل من هذا النوع هذا شي و بعدين لا تنسين البنت بذمتج و ذمته حرام ما تربى بين والدينها ارجعي له و حاولي تصلحينه بشطارتهم و تقنعينه بالشي اللي انتي تبغينه بالكلمه الطيبه وغضي البصر عن ااشياء والمشاكل الفرعيه ونصيحتي الثانيه لج و اللي اتمنى انج تمشين عليها( الصبر ) (وبشر الصابرين اللذين اذا اصابتهم مصيبه قالوا انا لله و انا اليه راجعون ) على الرغم من كل السلبيات لكن صبرا جميلا و اسال الله ان يلهمك صبر ايوب عليه السلام .,. الله يوفقج و يرزقج كل خير |
لاحول ولا قوة الا بالله :(
|
قررت انتظر لبعد رمضان وبعدها ممكن ارفع طلب طلاق لضرر
بسبب عدم توفر شروط عقد الزواج + هجر اكثر من 6 شهور + عدم اهتمام بالطفله هذا غير المصرف والبيت ..الخ هذي اخر فرصـه والله يكتب اللي فيه الخير وجزى الله كل من رد على موضوعي خير وفررج الله همومكم دعواتكم لما فيه الخيره وتسهيله اختكم ام مهآ |
طيب يا أم مها ... أتمنى منك تسألي نفسك الأسئلة هذي وتضعي لها إجوبة عندك دون أن تدخلي العاطفة أو رغبة الانتقام أو عزة النفس ... فما مضى مضى وانتهى ولا يمكن أن يعود ... ولكن اذا كنتي بتأخذيها من هذا الجانب أن ما مضى مضى ولن يعود ... فمن المؤكد أن أفضل الحلول هو الطلاق ... لأن الماضي تعيس بالنسبة لكي ولا تستطيعي اعادة الماضي ... ولكن فلنأخذ الموضوع من الجانب الآخر ... جانب المستقبل ... وهو الأهم فالماضي ولى وانتهى ولكن الأهم هو المستقبل ... هل يمكن اصلاح المستقبل ... وهذا هو الأهم ... إسألي نفسك ... هل تتوقعي أنه من الممكن أن ينصلح حاله عند صلاح أموره ؟ هل جربتي أن تعرضي له بأن ينقل وظيفته لمنطقتك وتتساعدي أنتي وهو لضمان حياة أفضل لكم وابنتكم ؟ هل هو الانسان السيئ الذي لا يوجد به حسنة واحدة ؟ هل تتوقعي لو نقل وظيفته لمنطقتك بأنكي قادرة على انتشالة مما كان فيه من سكر وعربدة ؟ هل جربتي ان تتحدثي معه بكل شفافية ووضوح ومباشرة دون تدخل من أي من أفراد عائلتكما ومناقشته في موضوع حياتكم وشرحتي له بأن الطلاق حالياً في وضعه الحالي هو أفضل الحلول بالنسبة لكي وله ولكن من سيدفع هذه الضريبة اليست الطفلة الصغيرة ؟ والسؤال الأهم هل لديكي الرغبة فيه أم لا ؟ ضعي أجوبة لهذه الاسئلة ولا تجعلي الطلاق يكون اول الحلول ... فربما تكون هناك حلول أفضل وأسلم ... تمنياتي لكي بالتوفيق ... ولهااان ... |
زوجك هذا بايع و مخلص .. واعتقد ان محاولاتك اصلاحه راح تضيع ادراج الرياح .. هذا الانسان لا يصلح لا زوج و لا يصلح اب .. على باله ان بنات الناس لعبه عنده .. لا يهتم بمشاعرك و لا احاسيسك و لا احتياجاتك .. البعد عنه غنيمه .. ارفعي عليه قضيه في المحكمه و طالبي بكل حقوقك .. يكفي ما عانيتي منه .. شوفي لا تفرضي في بطاقة العائله عشان يضر اذا راح يستخرج بدل فاقد يضيف بنتك اعملي بحث يا اختي على قوقل في موقع مبادرة الطلاق السعودي وراح تلاقي سيده اسمها هيفاء خالد عندها خبره في مثل هذه المسائل القانونيه و راح تقدم لك استشاره مجانيه .. وراح تساعدك في كل خطواتك اللي في المحكمه .. بالتوفيق ان شاء الله .. |
خاطري بكل شيء الا وظيفتك ..
قرري ماتشائي ولكن لاتساومي نهائياً ولاتضحي لانه لايستحق التضحية .. واحذري من الافلام والدراما قد يخدعك بانه تغير ومن ثم تكون أمامك مفاجأة .. تصرفاته غير مريحة ولاتدل حتى على انه يتمنى لك الخير اذا قلبه ماحن على بنته من صلبه وش تترجين منه لاحول ولاقوة الا بالله .. الله يعوضك خير .. |
آآآآآآآآآآآه ياناس
كلمته اليوم بعد ما استخرت وتهاوشت معاه مبين من صوته ماعاد يبيني يقول ياتجين القصيم ولا انطقي إلى نهاية عمرك وانتي هناك والاوراق ارسليها حقت البنت اخلصها صرت اكرهه اكره تصرفه الغبي ليتني ماكلمته يقول اذا ماتبيني خلاص قدمي بمحكمة القصيم انك ماتبيني وخلاص وانا قلت لو فيك ذرة كرامه ماخليتني على ذمتك وانت تدري اني صرت ما ابيك حسبي الله عليه ونعم الوكيل حسبي الله عليه ونعم الوكيل حسبي الله عليه ونعم الوكيل |
حسبي الله ونعم الوكيل
عورني قلبي عليك أختي أستخيري كثير اذا انعرف أوله ينـــعــاف تــاليــهـ أحزمي بموضوعك أذا شــاريك بيسعــى لرضــاك واذا لاهي وضايــع ومغّتــر بشـبابه بيضــيعك معــاهــ فوضـــي أمـــركــ لله ومـــاراح يخذلكــ |
| الساعة الآن 08:46 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©