|
سؤال عن يوم الملكة
الحمدلله تسهلت المور بعد تعقدها الف وميتين عقده والملكه خلال ايام.
لكن بما اني ماعندي اخوات وامي الله يخليها لي ماافادتني فهالموضوع وقريباتي نفسهم خايسه بصراحه وكل ماسألتهم عن شي قالولي وش هالاسئله البايخه وهزؤوني وانا بصراحه ما اتحمل. فانا باسالكم... انا من سكان ديره القيض والغبره "الرياض" الحبيبه الله يفكنا من زحماتها وحفرياتها اللي ماتنتهي -ذكرت المدينه لان يمكن العادات تختلف في مناطق ثانيه- ابي اعرف ليلة الملكه بعد مايتم كل شي على خير إن شاء الله هل المفروض اني انا اجلس ولا اصرّف نفسي؟ يعني اخاف مثلا اذا طلعوا جماعتي اطلع وراهم ويقولون عني ان هذا مضيع ولا ومستخف ماسلم على خطيبته وجلس معها, واخاف اجلس اتميلح بعد مايمشون العالم يقولون هذا وش عنده ناشب لنا ليش مايروح ويخلينا نرقد. فتكفون ياجماعه افيدوني. |
مريت بس عشان اهون عليك
وترى مناطق المملكة تختلف عاداتهم عن بعض يعني لاتاخذ الا بشور اهل الرياض |
موفاهمه .. الملكه عندكم غير يوم الشبكه !! اذا ملكه بس ورجـال .. فقط لاغيـر .. مادري بس احنـا عندنا اذا ملكة رجـال وعقد قران .. يتوكل على الله ويشوفها اذا صارت الشبكه (( الحفله الكبيره )) او اليوم الثاني .. بس انت عشان تتأكد تقدر تسـأل ابوها او اخـوها .. قول اقـدر اشـوف فلانـه واسلـم عليها واقعد معاها شـوي ! مـافيها شي ان شـاءالله .. بس عـاد ماتدخل عليها اول مره ويـدك فاضيه !!! هذي هي الفشـله ... اشتريلك شي يـواجهه وادخل فيـه ! والله يتمم عليـك يـارب .. |
جزاك الله خير يا مس سوسه وبالنسبه لدانتل, مدري اذا الاسم صح ولالا
حنا الملكه عندنا اني اروح انا والوالد وبعض جماعتي لبيت اهل البنت ونقابل ابوها وبعض جماعتهم بعد ويجي الشيخ ونكتب الكتاب واقدم المهر ويعشونا اهل البنت.... والا هنا هذا حد علمي بعد كذا مدري وش يصير وهذا هو سؤالي. اما بالنسبه للشبكه فهي عادة تجي بعد الملكه يعني اسابيع ويمكن شهور على حسب الحال. للأسف مقدر اسأل ابوها او اخوها لاني حياوي بزياده "استحي" اخاف يكرشني ولا يقولي: اقول اقضب الباب ورى ابوك بس! :eek: اما بالنسبه لليد الفاضيه فهذي مشكله. اول مره اعرف ان الواحد لازم يجيب شي معاه فالملكه! مايكفي المهر؟ طيب اذا لازم اجيب شي زياده على المهر وش اجيب يعني؟ ورد؟ جوال؟ عطر؟ ساعه؟...؟ ماتكفيها دخلتي عليها وشوفت وجهي؟ :d |
شف وانا اخوك شكل طبايعكم مثلنا ،
بعد العشاء امسك الباب مع ابوك وجماعتك ولاتجيب لاهدية ولا شي ، وبعد كم يوم اتصل على اخو خطيبتك وقله ابي اكلم زوجتي واذا امورك مشت معه تمام ممكن تقدر تجي وتجلس معه في بيت اهله وذاك الوقت تجي ومعك هدية ، ارجو تكون الامور وضحت ، الله يوفقكم ويجمعكم على خير |
يارجال سو سواتي
يوم الملكة كانو الحريم في بيت والرجال في بيت خلك ذيب وخل الاغراض معاك في السياره وجب هدية جهاز جوال وحط الشريحه فيه وغلفه بكرتونه علشان مايدرون وش فيه الحريم ثاني شي وقت ادخل وصور وفلها ووسع صدرك لانك ماراح تقدر تدخل الا بعد العشاء والعشاء متى بيخلص على الساعة 11 والبنت تلاقيها متى جت من الكوفيرا وانت خابر سواليف الحريم اذا دخلت وقت ساعتين اجلس ثم امسك الباب اذا رحت اكيد هي بتفتح الهدية وتشوف الجوال عاد انت خلك ذيب خزن رقم جوالك في الجهاز علشان اذا اتصلت ترد عليك <<<< حركها سواها يوم الملكه هههه والحين الحمد لله عندي بنيه زي القمر |
نسيت اقول لك انا ملكتي وشبكتي في نفس اليوم
واذا كانت بس بتملك بس ملك من هنا واقضب الباب من هنا هههه ووقت الشبكه سو اللي قلت لك لاتستعجل وانا اخوك خل كل شي في وقته حلو |
جزاكم الله خير ياجماعه, خلاص اجل مادام الشبكه بعدين اجل باقضب الباب :d
و الله يخليلك بنتك القمر يا اابب55 |
هههههههههههه :d احس انك في ساحـة حـرب وإلا في جزيرة الكنز حتى تـوصـل للبنت وتكلمها وإلا اقضب الباااااب = Game Over متاريس - حقول الغام - مصائد - آكلي لحوم بشر :d ما انسى ادعي لك اخوي الحبيب الله يعـينك ويهدي بالك ويتمم لك ملكتك و زواجـك على خـير ويرزقكما الذرية الصالـحـة الكـريـمـة عزوبي:21: بس:d رجل:30: |
اذا هم بيسوون ملكه وعشاء اقترح تجيب الشبكه معك الا اذا ما كنت مستعد فقدم المهر بطريقه حلوه يعني حطه بشنطه فيها بخور وعطورات ... واقترح تسأل اخوها عن نظامهم هل يسوون شبكه لحال؟ والا الملكه والشبكه بنفس اليوم عشان ما تجي دون شبكه وتتفشل؟
|
عزوبي ههههههههه لاحظت انت؟ اما جيم اوفر هذي ترى عجبتني (تراني مدمن بلايستيشن الله يعينها زوجة المستقبل لازم تتعلم تلعب وتخليني افوز بعد علشان اطلع رجال قدامها :D) جزاك الله خير ياخوي وعقبالك ان شاء الله
قروهونلي... والله مدري اسمك صعب عجزت اعرف انت مذكر ولا مؤنث, جزاك الله خير على الاقتراح بس مدري وش رايك في حركة واحد من الشباب جاب المهر وصفط الفلوس على شكل ورد وعطاهم اياه... انا مدري احس انها قلق شوي البنيه الله يعينها بتقعد طول الليل تفكفك فهالفلوس وتصير الفلوس عبيطه ماتترتب وحاله. اما بالنسبه لسؤالك فمثل ماقلت انا ماعندي استعداد للشبكه الان ووضحتلهم هالامر والحمدلله كانوا سمحين وقالو مو مشكله نأجلها. ماقصرتوا ياجماعه والله يعافيكم ويبيض وجيهكم كفيتوا ووفيتوا. |
انا ماعرف عوايدكم والا كان رديت
بس حبيت ابارك لك بارك الله لكما وبارك عليكما وجمع بينكما فى خير |
أظن أبو البنت له دور أو على الأقل هذا اللي صار معاي
إحنا ملكنا والشبكة متفقين بعدها بيوم على طول زوجي المصون متعودين أنه يمشي لأن الملكة الرجال والشيخ وكذا تفاجأ الأخ بعد ماراح الشيخ إن أبوي الله يحفظه يقول ادخل سلم على زوجتك وعلى محارمك الجدد يقصد أمي وجدتي ودخل مع أبوي وسلم علينا عاد بعدها بفترة يقول لي انه انحرج في ذاك اليوم لأنه أبدا ما كان متوقع وما عرف ايش يسوي ثاني يوم مع الشبكة كان جايب لي جوال هديه وطبعا راز رقمه ورقم امه وخواته فيه عموما انت خليك مستعد لكل الظروف وبالتوفيق إن شاء الله |
اقتباس:
أخي الكريم وفقك الله/ فكرة عمل المهر على شكل ورود جميلة ولكنها متعبة بالنسبة للفتاة وفي ترتيبها يوجد فكرة أجمل من هذه الطريقة وهي أن تعمل ببعض من المهر على شكل عقد مثل عقد الفُل وتقلده عروستك .. في هذه الحاله يكون سهل ترتيبه وأيضا جميل منظره .. أسأل الله العلي القدير أن يتمم لكم على خير وييسر لكم اموركم ويوفقكم لمافيه الخير والصلاح .. |
| الساعة الآن 11:03 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©