|
شهامة زوجي و جرأته
السلام عليكم ورحمة الله وبركاته
منتدى كل كلمات المدح قليه فيه واهداف ساميه بمجرد التنقل بين صفحاته يعطي الشخص نظره مختلفه عن الحياة عندي مشكله اتمني تساعدوني فيها انا واثقه انكم ماراح تبخلون علي بارائكم زوجي طيب وحنون ومن صغره في الحلقات والحمد لله ملتزم ويحب الخير ومساعدة الناس وعلاقتنا حلوه ولله الحمد صح تمر مشاكل لكن الحب موجود المشكلة ان زوجي فيه شهامة متعديه الحدود على حساب نفسه انا عارفه ان هذي صفه حلوه لكن ضرته قبل ما تضر غيره وقته كله برا البيت يفضل انه يقضي وقته يخدم الناس على انه يجلس معنا ويشوف احتياجاتنا اللى يضايقني اني بعض الاحيان اسمع عنه كلمة ملقوف وهو ما قصدة لقافه بس يبي يساعد ويقدم وقفاته مع الناس لانه مرررررررررره يبالغ لحد ما ممكن يصير شي مزعج حتى اني اذا بغيت اروح مكان او ابي اغراض اقول اختى تبي او امي يجي على طول اما اذا قلت انا يقول بعدين وكثير مثل كذا واذا ناقشته يقول عادي انتى زوجتي اقدر اقولك لا واذا تحبون احكي مواقف ما عندي مانع وكمان فيه جرائه تجيب له الانتقادات يعني ملتزم ويكلم العاملات !! او يسولف ويعلق مع البنات !! يكلم اختى يسالها عن ولدها ونتيجته او اذا كانت تحتاج شي !! مره اكتشفت بالصدفه انه يكلم وحده من جنسية عربية عشان زوجها متنوم في المستشفى و هو يبي يساعدهم !! غير امهات و زوجات الشباب اللى بين كل فتره اككتشف شي نفرض ان هو نيته حسنه طيب .. ايش راح يفكر الشخص اللى قدامه عاملة المشغل انا سمعتها تقول مطوع كذاب لانه يكلم وحدة من جنسية عربية.. و شغالة اخوي تناظرني وتضحك لانها حست اني تضايقت لما سمعته يكلمها .. بنت اختى لانه هو عودها يسولف معها وتنافز قدامه وهي تحبه ويعني هو مطوع صار عندها عادي تسولف مع الكل .. كمان قبل فتره تنومت في المستشفى لما طلعت معاه اشوف الممرضات يقولون له مع السلامه و زوجتك حلوه و يعلقون عليه يعني ميانه هذا دليل انه اخذ واعطى معهم كل هذا انا امشي بمزاجي ما ودي اسوي مشاكل و وجعة راس مره قد قلت له لاعاد تكلم تلك المرأة جلس يخاصم وزعل و يقول انتى تشكين فيني وانتى اللى قلتي له اكلمها قلت له انا قلت له كلمها وقت الضروره و بحدود وخلاص انتهت الحاجه امسح رقمها وخلاص قام مسح كل ارقام الحريم امي واخواتي وعمتي وزعل مررررره ويقول انتى غيوووره انا احاول ما ابين له لكن يبين علي و يوضح بوجهي غصب هو كان عنده نشاط صيفي وكان مشغول اغلب الوقت ممكن يمر يومين ما اشوفه الحمد لله ان اهلي قريبين واصلا هو ما كان يبينا ننام معاه عشان ولدي ما يزعجه و اصلا هو اول ما يقوم من النوم يروح المركز حتى يفطر هناك وانا لازم اروح لاهلى لان ماعندي اغراض الحمد لله خلص المركز والحين هو مسافر معاهم رحله وعلاقتنا الايام الاخيره كانت حلوه مرررره لكن ودي اغير هالطباع الشينه اللى فيه ...... واتمنى مساعدتكم |
سبحان اللّه ذكرتيني بواحد مطوع من الشباب نفس سالفة زوجك .
بس لا تاخذين ببالك ترآه على نياته , لا تتهمينه . |
أنا أقترح عليك أن تزرعي الثقه بينك وبينه ... وفي نفس الوقت راقبي جواله بين فينه وأخرى لعلى هناك رقم غير مألوف أو رساله غراميه لاسمح الله ... وهذا فقط للإطمئنان وتقر نفسك ...
ولاتضيقي عليه الخناق .. ووضحي له أنك تثقين فيه .. |
كان الله في عونك
في النهاية انتي مرة وأكيد وشي طبيعي ستتملكك الغيرة في بعض الأحيان لكن في حالة زوجك انتي لازم تبينين له إن ممكن يساعد الناس لكن مو على حسابك، اذا كان هو مطوع لازم يعرف هذا الشىء والرسول صلى الله عليه وآله قال"خيركم خيركم لأهله" يعني الواحد لازم يبين حسن أخلاقه في بيته ومن ثم الناس والأقربون أولى بالمعروف اجلسي معاه بهدوء قولي له حبيبي انا ما أزعل اذا تساعد الناس بس مو على حساب حياتنا ، يعني لازم توضحين له تضايقك لكن بأسلوب حلو عشان الإطمئنان. والزوجة تعرف زوجها يعني انتي تحسين اذا يكلم نساء شنو الغرض من هذا ، اذا حسيتي انه يحب أن يتقرب من الجنس الناعم حاولي لا تختلطي معاه في أماكن فيها حري. الله يوفقك انتي وزوجك وجعل محبتك في قلبه |
بسم الله الرحمن الرحيم السلام عليكم و رحمة الله و بركاته أختى الكريمة شعورك و إحساسك طبيعيان حبيبتى تكلمى معه بأسلوب حسن وما يفعله هذا من كلام النساء الغير مبرر... هو مدخل كبير من مداخل الشيطان لإفساد دينه إذا أراد مساعدة أحد فليكونوا رجال فقط لا دخل له بالنساء و لا بالحديث معهن الله سبحانه و تعالى كفيل بتسخير إحدى النساء لمساعدتهم و هو عز و جل أعلم بحالهن و إذا كان الأمر مهم فمن الأفضل أن يدلك أنت عليهن لمساعدتهن و الأجر يكون لك و له بإذن الله وحبه للخير لا يعطيه مبرر للتبسط فى الحديث مع الأجنبيات أبدا... النساء فتنة أختى الحبيبة...... استعينى بالله عز و جل و ادع لزوجك تزينى و تعطرى كعروس فى ليلة عرسها كونى هادئة و تبسطى معه فى القول و العتاب ولكن أصرى على رأيك و موقفك بأنه لابد ألا يهتم بالنساء كثيرا و أن يقطع علاقته بهن فورا قال صلى الله عليه وسلم : { ما تركت بعدي فتنة أضر على الرجال من النساء } الأمر الآخر الذى أحب أن أشير إليه إذا طلب منك زوجك مساعدة إحدى النساء .... فاجعلى كل ما يدور بينك و بينها سرا و لا تتحدثى عنها أبدا أمام زوجك و لا تتحدثى عن مشاكل أى إمرأة أمامه و إن كانت صديقتك أو أختك أو إحدى قريباته لأن هذا الحديث قد يثير رغبته فى التواصل معهن بنفسه بارك الله فيكم و قدر لكم كل ما فيه الخير . |
لا تضيقين صدرك صدق كيف يجتمع دين وسوالف مع غير المحارم على العموم انتي اكثر وحده تعرفين نيه زوجك لا تحاولين تضيقين عليه وشوفي النواحي الايجابيه فيه الله يرجعه لكم بالسلامه
|
اقتباس:
انا عارفه انه على نياته وقصده خير لكن مدخل للشيطان مشكور اخوي عامر اقتباس:
الحمد لله الثقة موجودة ومستحيل توصل كذا وجواله دايم اراقبه واتصل منه عادى حتى كانه جوالي ويعطيك العافيه اقتباس:
اقتباس:
حصل وتناقشت معاه بنفس الكلام و باسلوب حلو وبعد سهره حلوه اعترف بخطاه ودمعت عينه وقال معك حق حتى انه قال ياليتك قلتي لي قبل عشان انتبه لنفسي واعترف ان اغلب المشاكل معاي ومع اهله بسبب حبه لخدمة الناس و وعدني انه يتغير لكن ماشفت شي من اليوم الثاني نفس الاسلوب اقتباس:
زوجي مقصدة اما مساعدة او غرض بسيط او مثلا يقدم نصيحه او توجيه بطريقة لبقة مثلا بنت اختى واختي ليه يعاملهم كذا لان البنت محرومه من ابوها مع العلم انها ثالث ثانوي واختى تحتاج توجيها في تربية ولدها او اغراض وعاملة المشغل مثلا يسأل عني او يوصيها علي او الشغالة يشرح لها ليه بيقفل باب البيت او يوصيها على حجابها ........ وجزاك الله بكل ما تتمنيه واكثر |
اقتباس:
بصراحه ردك اثلج صدري رفع الله مكانت في الفردوس الاعلي فعلا ممكن انا السبب لاني احكي له عن مشاكل اللى اعرفهم وفي بعض الاحيان من زود الحماس يصر الا انه هو يتدخل |
زوجك قلبو طيب اتركيه على راحتو
ما تخافي منه ولكن حاولي تقولي له انو شويه يعطيكي من وقته ثم مساعدته لاهلك من حبه فيكي احب اللي يحب حبيبي |
اقتباس:
|
اقتباس:
و مو بس مع اهلي مع الكل واضيف ان زوجي عصبي يعني لو كان الموضوع بهالبساطه ما كان ترددت في مناقشته لكن صعب صعب صعب جدا لدرجه اني افكر في الكلمه مية مره قبل ما اقولها |
أختي الكريمة أنا كان فيني ها الطبع وزود أني كنت أدفع فلوس وإكتشفت أن فيه ناس نصابين ..طبعاً تغيرت قليلاً حتى قرأت كتاب رائع جداً اسمه (( كيف تقول .. لا .. تخلص من آفة إسعاد الآخرين ))
لمؤلفته كورين سويت وهو مترجم وموجود في مكتبة جرير والعبيكان .. لا أخفيك أختي أن هذا الكتاب غير فيني كثيراً ... لامانع من مساعدة الآخرين ولكن بأصول وقواعد منظمة وليس على حساب حياتي وراحتي وسعادتي بل وكرامتي .. فلن أتقبل ضيفاً ثقيلاً في آخر الليل ولن أرد على جوال في فترة قيلولتي .. وهكذا أنصحك بإقتناء الكتاب وعدم إشعار زوجك أنك إشتريت هذا الكتبا لتعالجي فيه عيباً فهنا سيكون تقبله ضعيفاً ولكن أشتريه وأرميه في أحد أدراج غرفة النوم والتي إعتاد زوجك فتحها بإستمرار .. ودعية يقرأ بنفسه http://dc03.arabsh.com/i/00392/gf5g62u5pr64.jpg |
هلا حبيبتي
ترى زوجك انسان طيب وعلى نياته معقوووله وحده ساعدها وضحك معاها يخااويها!!!لالالالا مااعتقد واساسا زوجك ملتزم والحمدالله لاسمح الله اذا الشيطااان لعب فيه يفكر مئة مره قبل انه يسوي شي يغضب الرحمان اللله يهديه |
اقتباس:
:22: بجد هذا اللى ابيه بعدين من قال زوجي ما يدفع الا نطفر عشان هالسوالف بس انا اشوف اني اعطيه الكتاب كهديه عشان يهتم و يقراه بس اختار الوقت المناسب و ان شاء الله يتقبل |
اقتباس:
امييييييييين لكن ليه نفتح باب للشيطان يعطيك العافيه |
انت امراة غيورة جدا جدا ، و زوجك للاسف ليس لديه الذكاء الكافي للتعامل مع غيرتك تلك .
زوجك يشبهني في عدة امور و لكني اختلف معه في امور اكثر ، انا مطوع (بلحية) مثل زوجك ، و يتكلم معي النساء و ربما اشعر انهن يشعرن بالراحة في ذلك و هذا امر يسعدني جدا ، ليس لان هذا يشعرني برجولتي و لكن لان هذا يعني ان دعوتي وصلت اليهن ، ان الشخص المتدين مريح و يجلب لهن السعادة الروحية ، و هذا الكلام اجعل له ضوابط صارمة ، فانا لا احدث امراة و انا انظر اليها قط ، لا احدثها في مواضيع ثرثرة (دردشة للتسلية) و لكن مواضيع قد تهمها جدا ، اتكلم بادب و حياء و بصوت خفيض ، لا امزح معهن قط و لا اتجاوب للمزاح ، بمجرد ان انهي الموضوع الذي نتكلم فيه انصرف علي الفور ، و كل هذه الاشياء تجعل بيني و بين النساء حواجز كثيرة و هيبة كبيرة و احترام و ربما اجلال ، كما انني اتعمد ان اقلل من خشونتي كرجل و انا اتحدث اليهن حتي لا اثير اعجابهن بي من هذه الناحية ، كان اتكلم بصوت خفيض غير خشن و ان اتكلم بحياء شديد فالنساء لا يحببن هذا من الرجل . و لكن بعد ان يكرمني الله بالزواج ، ساجعل زوجتي دائما بيني و بين جميع النساء فمن تريد منهن اي شيئ مني فالتطلبه من زوجتي و سابلغ زوجتي الرد علي طلبها لتبلغهن اياه . اما عن خدمة الناس ، فانا اشبه زوجك ايضا في هذا الامر و لكني اختلف عنه في ذلك ، فانا لا اخدم احدا الا في الامور التي اقدر عليها و لا تحملني عناءا في ادائها و لا تستهلك مني وقتا كبيرا ، و لكن بعد زواجي فوقتي كله ملكا لزوجتي في ما عدا وقت عملي و وقت صلة اهلي و خدمتهم و وقت صلة والديها و خدمتهم فليس لي ان استاذنها في هذا الوقت لانه واجب حتمي علي ان اقوم به ، اما فيما عدا ذلك فسوف استاذنها فيه ، و ساخاطب فيها كرم اخلاقها في ان تتنازل عن جزء من وقتها و تسمح لي ان ارادت ان اخدم الناس و لن اضغط عليها في ذلك ، و كذلك اموالي ايضا فلن انفقها الا بمشورتها ، لان هذا المال جمعته بجهد زائد و بالتالي بوقت زائد عن الطبيعي و طبعا تحملت زوجتي حرمانها مني لجمع هذا المال ، اذا فانا اعتبرها شريكة لي فيه و لذلك لا انفقه بدون مشورتها . |
اختي 000بصراحه زوجك تجاوز الخطوط الحمراء 0بمحادثته للنساء فكلنا يعرف انه لايجوز حديث المراءه للرجل دراءاللمفسده من الممكن ان تكونين انتي الواسطه بينهم اذا احد طلب خدمته من غير مايسولف معهم كان من الممكن انك تقوليله على كلمة (مطوع كذاب)حتى يعرف انه في ناس تفهم طيبته غلط00الشغاله ممكن ينصحها عن طريقك 0خدمة الناس تكون بالمعقول وليس على حساب زوجته وجيبه لازم الواحد يعز نفسه ولايقطها0معك حق تغارين وتزعلين لانه تجاوز حدوده حتى لو كان على نياته وطيب0الله يصلح حاله0
|
اقتباس:
لكن زوجي تجاوز الخطوط الحمراء بدون ما يحس ومايحب يدخلني اقتباس:
انا ابي اكون الواسطه وابيه يعرف حدوده لكن كيف اما انى اقوله على كلمه مطوع كذاب ما اقدر ابدا لانه بيزعل وبيقلب الدنيا علي وممكن يسوي تصرف غلط |
[/SIZE]
|
هذا طبع في زوجك يحب يساعد الناس و يلقى الراحه في هذا الشئ
مو مجاملة منه ولا يقدر يقول لا ,و الدليل يقولون عنه ملقوف يعني هو اللي يحشر نفسه ما احد طلب منه يعني صعب تغيرين طبعه بس حلوه فكرة الكتاب اللي في رد الغالب و اعطيه الكتاب باسلوب مباشر,قوليله هالناس تعبوك بطلباتهم وانت ما شاء الله عليك تحب تساعد الناس و ما تقدر تقولهم لا,وهذا الكتاب مفيد يساعدك انك ترفض و ترتاح منهم! اما عن كلامه مع بنات انتي غلطانة انك سكتي من البداية! خير ان شاءالله يكلم عاملة مشغل او شغالة اختك ما بقى بنت ما كلمها !!! لازم توقفينه عند حده,و بيني له غيرتك و قولي انا ما ارضى انك تكلم وحده غيري و عادي بكيفه يزعل تراه مستغفلك بسالفة الثقة,قوليله انا اثق فيك بس ما اثق في اللي تكلمها !! الله يهديه.. |
اموركم طيبة ان شاء الله ،، لكن خليه يستخدم البريك والفرامل من خدمته للناس ،، والمفروض تقنين الخدمات المطلوبة منه وتركزين على خدماتك اللي تخصك انتي معه ،، لأنه باين حرررك تبلششش ههههه لكن الحمد لله دامه ملتزم فيعتبر عملة نادرة في هالزمان..
الله يجمع بينكم بخير |
وعليكم السلام ورحمه الله وبركاته، اختي الكريمة همس الغلا، لا تشغلين بالكي، زوجكي ما شاء الله عليه انسان يتصرف على سجيته بدون تصنع، وانتي بعد تقولين انه ما شاء الله انسان ملتزم ومتدين يعني لا تخلين الشك يصور لكي اشياء غير حقيقية... لكن اختي بنصحكي نصيحة اخويه، وتراني يمكن طبعي مثل طبع زوجكي ويمكن اردى، انسان بسيط وطبيعي مرة في التعامل مع الناس لما اجي اكلم احد ما يفرق عندي رجال ولا مرة، لكن والله تعرضت لمواقف سيئه بسبب هالشي وصرت مؤخرا اعمل حسابي واتجنب هالاشياء... ترا بعد كثير من الناس يسيئون الظن، يعني الواحد يتجنب هالاشياء ابرك له، ولا ربي اعلم بالنوايا... ولي صديق مسكين على وجهه يشتغل في احد المستشفيات بغى يفصل من عمله بسبب هالشي، كان في وحدة تشتغل معة في نفس القسم كانت كل يوم تجي تسولف معة وهو يحسب الموضوع عادي، على ما يقولون زميله عمل، وكانت نية البنت الله يهديها سيئه تبي علاقات وخرابيط، ويوم شافت انه مستقيم ولا عنده هالشغلات فضحت به في المستشفى وقالت تراه يتحرش فيني، وقصته ما بقى احد ما عرفها... لدرجه انه طلب ينقولنه لمكان ثاني بسبب هالقصة... فالطبيعيه والله زينه، بس انا نعيش في عالم غريب، فالواحد ازين له ينتبه... |
اخي الكسائي مشكور و رفع الله قدرك
ان شاء الله تصير الامور احسن اقتباس:
فعلا هذا طبع فيه وصعب يتخلص منه حتى اختي الكبيره تقول انسي انه يتغير لكن ان شاء الله بعطيه الكتاب اول مايرجع من السفر انا سكت له وما ابين غيرتي عشان ما يصير يخبي عني لكن بوضح له اني ما اثق في الاخرين اقتباس:
|
اقتباس:
انا ذكرت ان زوجي مقصده خير وابيه ينتبه مو كل الناس نواياهم حسنه وكمان لا يجوز محادثة الرجل لامرأه اجنبية ويجب درء المفاسد |
بالنسبة لحديث النساء لازم تكزنين قوية بهالمجال
إذا جاء يكلم وحدة سواء أختك والا بنتها والا الشغالة .. على طول قولي وبحزم شتبي أقول لها؟؟؟ وترا عصبيته -ماعليش- لاقيها عليك والا ماهي طبيعة عنده بس اسلوب قوة>>نفس زوجي لاتهتمين بعصبيته بهالأمور وراح يبطل يعصب الا بالحق |
| الساعة الآن 10:26 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©