|
أساعد زوجي ماديا وانا لست موظفة
السلام عليكم ورحمة الله وبركاته
مبروك عليكم الشهر وعساكم من صوامه وقوامه يارب :) حابه استشيركم بشغله وان شاء الله انها مو مشكله تعتبر لكن بعض المواضيع بخصوص هالشي اشغلتني الا وهو انه انا اساعد زوجي مادياً او بالاصح شايله نفسي واحتياجاتي وبعض لوازم البيت .." طبعاً انا مو موظفه" لكن اهلي مايقصرون يرسلون لي مبلغ بسيط شهرياً ويعطوني اذا زرتهم برضو بالبدايه كنت اتضايق وابكي وحاله :( بس يوم شفت اني كل مالي احتاج صرت اخذ بدون لااعارضهم "وماحبيت هالشي " ابد لكن يعين الله .. المهم قريت كثير ان الرجال مايحب المره اللي تساعده او انه يعتبره ضعف ومن هالكلام !! ويعتمد عليها حتى لو قدر يوفر فلوس ويشيل يده من الصرف عليها بعدين حقيق هالشي؟؟ انا متزوجه لي سنه .. وراتب زوجي يالله يروح على اقساط سياره وقرض وايجار شقه وطبعا مرتين يجي ايجار الشقه ومايقدر يوفر المبلغ من مصاريفنا طول السنه فاظطر اخذ من اهلي ثمان الاف او خمسه لجل اكمل الناقص ويقولون هديه وانحرج منهم بس عندي اهون من انه يتسلف من الناس! هل عملي صحيح وهل استمر بالمساعده ؟ او الافضل ماعطيه كل مايعطوني اهلي اقصر على نفسي احيان بس عشان اسدد للسياره او اشتري لوازم المطبخ للأمانه ولأجل ماظلمه هو مايقدر يوفر فلوس الشقه لان الفلوس اللي يجمعها كل شهر للشقه يصرفها علينا مع اللي من اهلي يعني مدلعني والحمد لله وكريييييم بس مابيده شي للأسف استمر بالعطاء ولا لا؟ اعتذر عن الإطاله بس حبيت اوصل الصوره كامله واتمنى ترشدوني .. وتدعولي اكون ام قريب يارب :o |
ان شاء الله تكونين ام 0بالنسبه للرجال موسواء بعضهم يقدر ويستاهل والاخر مايقدر ويصير متكل على غيره حتى لو اتوسع ماديا 0انتبهي وانتي ادرى بطينة زوجك 0موكل مره تعطينه حاولي بكون وقت الزنقه حتى يقدر وقفتك 0ولازم ترتبون امورك قبل المولود00
|
هذي مشكله افتكر اغلب الحريم يعانو منها وانا اولهم
الله يكون بعونك وش تسوي مدام عنده ديون اصبري لين يخلص ديونه بس خذي عهد منو انه مايخش في دون مره ثانيه وانتي اذا خلص ديونه امشي على قد راتبه ولا تعتمدي على اهلك عشان مايتعود زوجك على انك تصرفين الله يوفقك |
8 8 انـا مع كلام رهـومه .. فيه رجال يشيلونها جميله على راسهم ... ويعزون زوجاتهم اكثر وفيه رجال .. مايثمر معاه .. الا بالعكس يقعد يووفر شووي شووي على نفسه ويسحب حاله وتصيرين انتي البنك حق البيت ! عشـان كذا .. اقووووولك .. لا تخلينه يعتمد عليك .. والله اهلك يعطونك بالشهر 8000 ؟!! ريال ولا شوو ؟! ماشاءالله راتب ! اشوف انك ماتكوني طيبه زياده عن اللزوم ! والله مع احترامي للرجال .. بس اذا يبون الفلوس جابوها من تحت الأرض يعني لاتخافين عليه على بالك يعني لو ماجاب الأيجار بتنطردون برا مثلا ! حبيبتي .. انا اشووف انه من الـ 8000 .. تكفي زوجك مبلغ بسيط ومو كل شهر ولا تعوووووووووووودينه ابدا نصيحه من اخت .. وفري هالفلوووس لك انتي ... وفرررررررررررررري قد ماتقدرين .. وبعدين هو وش شغلته يعني ؟ خليهي تعب ويدور الفلووس خليه يحس بالمسؤليه .. صح تساعدينه بس مو حلا هووو ! كل شووي وكل شهر .. لا ومن طيبة القلب تكتين بيده كل الفلوس الي عطوك اياها اهلك .. انتي سووي فيلم عليه وقولي انا منعت اهلي يعطوووني وقعدت ابكي وانه حسيتهم كأنهم يستنقصونك وزعلت منهم وشيلي فلوووسك ببنك كل شهررر خليهم يحطونه بحسابك .. وصدقيني بتذكرين كلامـي هذا بعدين .. والله ياااااااااخوفي مدلعك وموونسك عشان فلووسك ! جربي الحركه وسووي انه اهلك خلاص ماراح يعطوونك واقعدي فترررره وشوفي هل هو تغير بمعاملته او لا ! ماينطمن لهم هالرجال <<< بتتصفق من الي بالمنتدى هههههههههههه الله يووووووووووووفقك يارب وان شـاءالله تصيرين مااااااااما قاااااااااد الدونيـا << على وزن دكتور قد الدنيـا ههههههههه |
دانتيل
هلا ياحبيبتشي < تمون والله لو يعطوني 8 الآف شهرياً كان ماعطيته ريال < بتتصفق ههههههههه لا ياقلبي انا اقصد وقت ايجار الشقه يعطوني 8 الآف ومره 5 الآف اما شهريا لا يعطيني الوالد 3 الآف وكل مازرتهم خميس جمعه يحط لي 500 او 1000 بالمختصر اهلي يخربون الواحد عليهم .. وشكلي صرت مثلهم خربت زوجي علي بس اذا فيه رجال يثمر معهم جد ؟ فالحمد لله اجل زوجي بيكون منهم عن تعامله وكذا لا يالغلا مو عشان الفلوس بالعكس هو اكثر واحد يقول لاتاخذين من اهلك ويزعل بس انا اتطلبه انه ياخذ مني لاني مابيه يتسلللللللللف .. هالمره بس صرفت 500 على نفسي ولاحسيت بتأنيب الضمير وحسيت اني مسويه شي واو اني شريت لروحي شي وعلى فكره احيان اروح السوق يعطيني من الفلوس اللي بيعطيها الوكاله للسياره وانا مابي يتوهق معهم عشان كذا شلت روحي وشلت اشياء ثانيه .. يارب يعدل الحال واشوف وضعنا احسن واحسن وتسلمين على الدعوه فديتك |
وبعد
الله يعينك ويعين الجميع يارب وعن الدخله بديون مره ثانيه .. والله اني خايفه بس بيت العمر بيحتاج ديووووووون وقروووض وحاله :( الظاهر بنظل طول العمر بديووون .. مشكوره يالغلا |
رهومه
الله يبشرك بالخير .. انا متفائله بزوجي حيل وادري ان معدنه اصيل بس الظروف اجبرته يتقبل هالوضع بس وش اقول بالمواضيع اللي اشوفها كل ماشفت وحده قالت صرفت وفعلت وبالاخير تزوج علي او صرفت وفعلت وبالاخير اشترى سياره على حسابي و و و و ومشاكل الحريم اهوجس لكن كلامك طمني يعطيك العافيه |
وعليكم السلام ورحمة الله وبركاته وبارك الله لك هذا الشهر الفضيل سأتكلم معك ياأختي الكريمة بصدق وصراحة ...كونك تأخذين مالأ من أهلك دائما هذا أمر غير صحيح لعدة أسباب سأذكر أهمها: سيجعلك هذا الأمر تتعودين على مستوى معين من المعيشة فإذا أنقطع عنك هذا المال لأي سبب ستجدين صعوبة في التأقلم مع الوضع الحالي . هذه نقطه النقطة الثانية وهي مهمة جدا قد يشعر زوجك بالضيق وأن لم يبين ذلك لك فقد يرى أمام تلهفك لتوفير أشيائك يجعله يسكت ويتغاضى عن الأمر ولكن هذا لا يعني أنه يقبل الموضوع ....فهو رجل ومن المؤكد أنه لن يقبل . النقطة الثالثة: أهلك قد يشعرون بالإحراج لأن حالتك المادية تمر بضيق مما يجعلهم يشعرون بالمسؤليه اتجاهك فيعرضون عليك المال دوما وأن لم يكن يتوفر لديهم فستجدينهم يحرصون على توفيره لك من باب محبتهم لأبنتهم . أختي الكريمة قسط السيارة لن يدوم فسوف يأتي يوم وينتهي . البيت إذا كان كبير أبحثوا عن بيت أقل كلفة لتسكنوه في ظل هذه الظروف الصعبة على زوجك البحث عن عمل إضافي .يساعده . عليك أنت أن تتعلمي الاقتصاد، فليس كل ما اشتهيناه شريناه ... أعذريني للأطاله .....أرجوا أن أكون قد أفدتك . اسأل الله أن يفرج عنكم ويقضي دينكم |
مرحبا فيك اختي ام باذن الله والله يرزقك الذرية الصالحه يا رب
انا اشوف اهلك يقدرون رجالك وشايفينه يحبك وانتي تحبينه ومساعداتهم من باب الحب وهذا شيء جميل ونادر هالأيام ما شاء الله الله لا يغير عليكم لكن يا ليت تنظمين مصروفاتكم بشكل اكبر شوي .. وحاولي تختصرين كثر ما تقدرين حتى لو زوجك كريم ويصرف خلك انتي المدبره وامسكي زمام امور المصروفات الشهرية ادخري .. وخلك ذكية واحسن شي انكم تعيشون بمستوى يناسب دخل رجالك لانه اكيد من داخله يحس بالنقص مهما كان لانه مو قادر يوفي بمصاريفك بالكامل كلمي امك وقوليلها ما تبين زوجك يتحسس . .وخل يخففون من هداياهم .. بدل لا تكون نقدية ممكن تكون بشكل ثاني ما يحرج زوجك أو عيدية مثلا .. يعني تكون بمناسبة مو كل ما رحتي لهم عطوك خمسمية :) الله يوفقك .. ويهنيك |
حديث الوقت
اشكر لك صراحتك عزيزتي وكلامك عين العقل وانا مقتنعه فيه ولكن بما انك وضحتيلي اشياء انا بكون صريحه اكثر وبشرح ظروفنا بشكل اكبر ياعزيزتي الراتب مايبقى منه إلا 200 ريال "سعودي " فهل تتوقعين هالميتين تكفي ؟ لبنزين سيارته او لأغراض المطبخ اللي توصل 500 شهرياً وبرمضان 900 !! او احتياجاتي الخاصه !! او احتياجات زوجي !! او التمشيه !! اكذب على نفسي لو اقولك اني بوفر لدرجة تسمح اني اصرف 200 بشهر كامل حنا نصرف 1000 او 2000 ادري تبذير لكن مهما ضغطنا حالنا مابناصل ل 200 وبظطر اخذ من اهلي عن الاهل فالوالد الله يطول عمره مافيه مجال للنقاش يرسلي رساله جوال "شيكي حسابك ياطفلتي فيه ثمن عشاء بسيط " ومن اقرى هالجمله ادري انه 2000 او 3000 وهو كريم الوالد ومايبي شي ينقصني كثير حسسته انه ابي اعيش حسب مادية زوجي ولكن والله لاحياة لمن تنادي يقول بساعدكم لين تتعدل ظروف زوجك وهو حسبة ولدي الحين و و و و ومن هالكلام .. عن انهم بيظطرون يوفرونه حتى لو مو لديهم لا هالكلام مو صحيح لانه ولله الحمد اهلي حالتهم الماديه ممتازه ويصرف على عوايل غير اهلي والله يكتبها في ميزان حسناته النقطه الثانيه مافهمتها عزيزتي .. يعني هل المفروض مااقول لزوجي اذا اهلي ارسلو لي فلوس او عطوني مباشر؟ طيب كيف؟ خصوصا اني دوم اقوله مثلا ابي اتقضى للبيت فيقول مامعي فلوس فأبادره على طول "انا معي" فمايدري وش يقول لاني ابي اشتري وهو مامعه فأكيد بيوافق يوديني دام معاي .. هالشي غلط ؟ وكيف اتصرف وكل الشكر لمداخلتك الرائعه |
بكر الشايب
فديتك والله لايغير عليك انتي بعد .. عن التنظيم حلوه الفكره يعني اخلي شي بحسابي كل شهر ؟ بس المشكله كل ست شهور لاجا الإيجار ادري برميهم كلهم للإيجار .. لان فكرة انه يتسلف من احد مابيها له أبد أبد طول ماانا قادره اساعده ماودي يحس بنقص لكن والله صعبه 200 ل 30 يوم .. منعت نفسي عن المطاعم وصارت تمشياتنا آخر الليل لاسكرت المجمعات والمطاعم هههههههههه بس برضو الفلوس تطير !!! وعن اكلم امي هي مثل طبع ابوي تصر علي آخذ منها مو مقتنعين اني ماني محتاجه خصوصا اني علمتهم اول شهر باللي يبقى من راتب زوجي وهذي كانت غلطتي بحاول اوفر مبلغ بسيط بس مااقدر اوقف محاصرة اهلي لي سواء على صرافتي او لازرتهم الله يعدل الحال يارب |
حبيبتي اذا انتي مبسوطه من زوجك وتحبيه خليكي على نيتك وربك يفرجها ويعوضكي ان شاء الله اذا خلص ديونه
واذا كان على بيت العمر لازم تصبرين لانه في الاخير بيكون لكي ولعيالك بس حاولي لاتعطيه شي من مصروفك خلي مصرفك لكي ولاحتياجاتك واذا كان على الاكل والشرب مثل ماهو يشتري لنفسه وياكل اكيد بكلكي معه الله يوفقكم |
بإذن الله ....اسأل الله أن يحقق لك حلم الأمومة قريبا النقطة الثانية .أنا لم أقل لك لاتخبريه أو أخبريه هذا شأنك . ماقصدت قوله توضيح لما قد يشعر به زوجك اتجاه مال أهلك فقد يشعر بالإحراج ولأنه (إنسان ذو خلق حسن وكريم في طبعه) لا يريد أن يوضح لك بأنه منزعج من مال أهلك..فيصبح مال أهلك ثقيل عليه .حتى لو قلتي له أنه مالك...فهو لن يعتبره كذلك . أختي هذه المشاعر أنت من يجب أن يكتشفها أنا فقد أردت أن أبين لك نقطة يمكن لم تنتبهي لها . أختي أنا أتكلم معك من واقع تجارب شاهدتها وهي قريبه مني جدا. أجلسي مع زوجك الكريم وقولي له يجب أن نسعى لتحسين وضعنا المالي أما بعمل إضافي أو تجارة بسيطة ، وأقتربي من زوجك أكثر لتلتمسي مشاعره نحو هذا المال ... أرجوا منك أختي الفاضلة أن لا تزعجين من حديثي الصريح ...فوالله أني لا أريد إلا وجهه الله بنصحي لك ,ومساعدتك تقبلي مروري وشكرا |
وبعد
مشكوووره ع مرورك مره ثانيه يالغاليه وان شاء الله اوفر لي مصروف من فلوسي .. حياك **************************** حديث الوقت اللهم آمين .. تسلمين على الدعوه اما بخصوص اعلمه او لا اعرف انه راجع لي بس كنت بستفيد بما اني احسك فاهمه عموماً .. مايحتاج اسئله لاني ادري انه يتضايق اذا انا وانا بنتهم انحرررررررررررررررررج منهم فمابالك بزوجي اللي مايقرب لهم لكن العين بصيره واليد قصيره فاظطر يتقبل .. اما بخصوص تحسين ميزانيتنا فالله كرييييم نتأمل بوظيفه ثانيه له قريب وان شاء الله تتحقق على خير وعن صراحتك بالعكس ماشفت فيها الا كلام اخت تبيلي الخير والله يوفقك ويسعدك احترامي .. |
الرجل مهما كان كريم
لايرضى بمال ليس بماله ولكن نصيحتي لك أن لاتخبريه بأن مالديك هو من أهلك انما منه بإدخار منك الكذب بين الزوجين فيما فيه مصلحة بينهما ليس بحرام |
حديث الوقت
الله يفرج همك مع طليقك .. اعذريني توني اشوف التوقيع ************************************* ماعدت أنا اهلين ياغاليه .. اول شي اسأل الله ان يرضى عنك وان يرد لك زوجك رداً جميلاً اللهم آمين بخصوص الموضوع يظهر عزيزتي انك ماقريتي ردودي .. كلامك حلو لكن يالغاليه انا ماآخذ منه مصروف عشان اقوله هذا بتوفير منك مايظل من الراتب الا 200 فتروح اول يومين 100 قولي شحن جوالاتنا !! والـ 100 الثانيه بين فاتورة ما وكهرب وتلفون "وماتكفي طبعاً" عموماً راح ابطل اقوله اهلي عطوني اهلي حولولي وبحاول اصرف بشوي شوي وكأنه فلوس معاي من الشهر الماضي وهكذا لاحرمني الله ارائكم النيره |
انا لا اوويدك في ما تفعلينة ابداا لان زوجك سيتعود علي هذة العادة السيئة ولن
يساهم في مصاريف البيت انت ويش عليك هو رجال وهو لازم يتحمل مصاريف البيت انت مالك دخل لا تقولي اشوفة اشفق علية او شيء بعدين بتتندمي خلي ابوكي يرسل لك مصروف لك اوكي تمتعي فية من غير ما يعرف او اذا شفتة تزنق مررررررة مررررة وحاول يدبر وما قدر دبري مبلغ بصيط من الي عندك وقولي شايلته او رحت عند اهلي وعطاني الوالد مصروف لي مثلا200 بس ولا تصرحي بالباقي خلية هو الي يتصرف يتسلف ياخد من اهلة اي شيء انت مالك دخل نصيحة ترا زوجي نفس ظروف زوجك تقريبا بس ماخد من احد واخلية هو الي يدبر علي نفسة عشان لا يعتاد مع ان بابا يسوي نفس حركة ابوك بس ما اخبر زوجي لما يعطيني بابااو اقول موفرة هالمبلغ من مصروف او اي شيء اخترعة لا تعودية ان اهلك هم يصرفوا عليكم هم مو ملزومين بة انتي بنتهم اوكي بس و عندة اهل بعد وملزومين فية موو بس انتي |
اقتباس:
صح لسانك بكر الشايب.. |
وقعدت ابكي وانه حسيتهم كأنهم يستنقصونك وزعلت منهم لا يا دانتيل هاذا الكلام خطا بحقد على اهلها بعدين وبتنقلب الكزبة عليها معقول تحكيلو بستنقصوك رح تجرح رجولتو هاي الكلمة وعواقبها كبيرة
|
مدي لحافك على قد رجليك ,,,
لا اؤيدك ابداً في ما تفعليه ... انتي كمن يلبس ثوب واسع عليه و بنفس الوقت ليس ملك له ! ما تفعلينه قد يسبب ضغط كبير على زوجك عندما يرزقكم الله باطفال او عندما لا يستطيع اهلك ان يساعدوك مادياً .. يفضل ان تأقلمي نفسك على وضع زوجك الى ان يفرجها الله |
ارى انكى وزوجك تحبون بعضكم ادام الله عليكم ذلك الحب
لاتستمعى لمن يريدك ان تظنى السوء بمن بنام بجانبك كل يوم فأنتى تعرفين الشخص الذى اخترتيه لتستأمنيه على نفسك وجسدك حاولى ان تساعديه بأن تقتصدوا فى معيشتكم قدر الامكان مع تقليل ماتأخذيه من اهلك لكى تتعودوا ان تعيشوا بقدر اقل من المال وتذكرى ان ماتمرون به مجرد فترة وستنقضى باذن الله وتنتهى الاقساط كلها - وسيتذكر زوجك موقفك بجانبه وعندما يحدث ذلك عيشوا بمرتبكم مهما كان - وتخيلى نفسك مع زوج غنى جدآ ولكن يسئ معاملتك واذكرى زوجك وحبه واياكى وسماع كلام من يريدون ان يفصلوا المشاركة الشعورية بين الزوجين وتحمل الحياة بحلوها ومرها ""هَلْ جَزَاءُ الإِحْسَانِ إِلا الإِحْسَانُ"" واسأل الله ان يسعدك وزوجك سويآ ويقر اعينكم بطفل جميل وأسألك ان تدعو لى بالسعادة مع زوجتى ............ |
زوجك يحتاج وأبوك كريم والحمد لله مافي مشكلي الله يوفقك شيلي أفكار النساء يلي بتفسد البيوت واعملي لوجه الله وليس لزوجك وانتبه على بيتك ولاتفسديه بسبب بعض النصائح يلي بتخرب ا لبيوت |
اختي لاتعوديه ترى الرجال على ماعودتيه انتي مش موظفه وحتى لو كنتي موظفه مش واجبه عليك النفقه
نصيحه خلي اهلك يعطونك ووفري لنفسك واذا احتجتي اشتري لنفسك بس لاتروحين معه السوق قولي شرته لي امي الرجال يقدر يصرف امورة وبعض الرجال اذا تعودو حسوه واجب بكرة بيقول لك خلي اهلك يعطونك وفيد دراسه تقول ان الرجل يحب المراءة الي يصرف عليها ويكرة المراءة الي تصرف عليه والسبب ان هذة فطر الله سبحانه وتعالى قال الرجال قوامون على الناسء بما انفقوا ) يعني هذي فطرة اصبري وفلوس اهلك لك وفريها ماتدرين وخليه يتسلف والايدور شغل ثاني ماعليك منه والله انا زوجي كنت اسوي مثلك بس ماطمر فيه |
الله يوسع رزق زوجك و يعينكما على امور الدنيا
حاولي حبيبتي تقللي من اخذ اموال من اهلك و ان كان فعليك الادخار منها و ليس الانفاق منها على الفاضي و المليان لكي توفري ثمن القسط او الايجار و لا تحتاجي لسؤالهم دوما حاولي الاقتصاد في الصروفات قدر المستطاع و انتما الان بمفردكما و ليس ورائكم متطلبات كثيرة فامسكي على نفسك قليلا حتى يوسع الله عليكما و تذكري ان الرسول كان يربط على بطنه من الجوع و كان يقول "خير الادام الخل" و مهما حدث فلن نصل الى هذه الدرجة و لكن تذكري ان افضل الخلق و أهله كان هذا طعامهم و شرابهم فعلينا ان نتصبر بهم و حاولي الاستغناء عن كل ما هو ليس ضروري و عند ذهابك للسوق حاولي اختيار ما كثر نفعه و قل سعره و اليك النصيحة السحرية التي و الله لن تخيب قول الحبيب محمد صلى الله عليه و سلم " من لزم الاستغفار جعل الله له من كل هم فرج و من ضيق مخرجا و رزقه الله من حيث لا يحتسب" |
غاليتي
انا وزوجي ما تنعدى 400 ريال سعودي في المقاضي واذا جاءشهر اللي بعده يكون باقي بعض الاغراض ونتقضى اللي ناقص يجي حوالي 300 ريال والمطعم مره في الشهر تكفي والفواتير ماتطلع الا في كل شهرين مره يعني تنزنقون شهر وشهر يبسطك انا انصحك انك ماتبيني له ان معاك فلوس واذا حسيتي انه مرره مرره محتاج عطيه القليل وقولي اني مدخرتها عندي وما عندي الا هي والباقي حاول انت من هنا او هنا ... لاتقولين ان اهلي حطو في حسابي او شي من هذا القبيل فلوسك تنفعك بعدين وانا ان شاء الله راح ادلك على اماكن يبيعون فيها المواد الغذائيه بسعر معقول بس اهم شي توزنون الميزانيه صح |
مروه
كلامك مقدر اسويه لأن حبي له فوق اني اشوفه مزنووق واقول بكيفه !! مقدر اسويها ولو اقدر برضو مابسويها لكن بآخذ من كلامك فكرة انه اوفر لنفسي بعض من المصروف اللي يعطووني اهلي واصرف فيها اشياء لي انا يعطيك العافيه صقر الشرقيه واذا لحافنا مايغطي شي !! يعين الله ياخيو |
سوبر ..سوري .. كريمه .. فقيره .. المختار
الف شكر ع مداخلاتكم الرائعه راح آخذ منها اللي اقتنع فيه ماقصرتو مودتي .. |
اقتباس:
أنا مع كلام الأخ سوبرمي و أنت أعرف بزوجك الحياة مثل ماقليتي صعبة و قد لايقدر هذا إلا من مرة بهكذا فترة و أن الراتب لايغطي شي فكيف يوفر مررت أختي بنفس تجربتك تقريبا حيث انه من 6 شهور تقريبا كان راتب زوجي اقل من الآن بنحو 3 آلاف و كنا بشقة ايجارها متوسط و مع ذلك كنا نعاني بتوفير المال يعني أخفف من المصرف , يمر كم شهر لاأشتري شيء من السوق إلا للحاجة فقط مؤونتا ما نبالغ فيها , لكن هناك دين , ايجار , أحيانا تتعطل السيارة و سبحان الله تكلف مبلغ و قدره فيخرب كل طريقة للتوفير كان أهلي ليس بعلم بحالتي, لكن أبي يعطيه طولة العمر متعود يعطينا شهرية و مبالغ بين فترة و فترة حتى لو كنا متزوجات يعني حالي حال خواتي اللي في البيت و كنت أتصرف بالنقود و اساعد زوجي بها , كأن أصرف على نفسي من الملابس مثلا او اعطيه و اقول انها من ادخاري و انت ماتقصر , يعني مو معقولة اشوفة مضغوط و مو عارف يسدد و اجلس اناظره , من باب لايتعود و خليه يدبر المال كيف و هو يعمل بدون مبالغة اكثر من 8 ساعات و حتى يوم الخميس عموما سيعتدل الحال بإذن الله معك اختي راتبه اكيد راح يزيد مع الأيام و الديون راح تخف بما انه يسدد و هكذا مثل ما يحصل معي الآن , بعد تغير راتبه خف العبء كثيرا و لم يعد مضغوط بشدة يبقى القليل و الحمد لله على كل حال إذا لم تساعديه و هو بحاجة لك فمتى تكون مشاركتك له الله يةفقك و يفرجها عني و عنك و عن كل المؤمنين |
حبيبتي انا اشوف اللي تسوينه اكبرغلط المفروض ماتاخذين من اهلك ليش ماتنظمين حياتك وتمشي على حسب ظروف زوجك اوكي وقت الديون معليش يتسلف من اهلك لكن مو كل وقت تاخذين وبعدين انتي الحين بديتي تتعودين علىمستوى معين من فلوس اهلك عشان كذا حياتكم مو منظمه
|
الحل يا أختي الكريمة
ان تعيدوا حساباتكم انتي وزوجك .. مثلا اذا اجار الشقة مرتفع .. ابحثوا عن شقة اخرى .. او اذا كان هناك سكن مهيأ في منزل اهله .. لما لا تنتقلون مؤقتا الى ان تصلح احوالكم واذا لا يوجد اي مانع مثلا من انك تتوظفين .. ابحثي عن وظيفة يعني صعبه ما يبقى من الراتب الا ميتين .. نصيحة : اكثروا من الصدقة .. والله انها لها اثرا في مضاعفة المال وبركته اسأل الله عزوجل ان يغينكم من فضله |
يعطيكم العافيه جميعاً
اخي/ اختي n_stu بالنسبه للسكن مع اهله فهم مو بنفس مدينتنا وعن الوظيفه بحثت وتعبت وماحصلت وعن البحث عن شقه فحنا جالسين نبحث وبإذن الله نحصل شقه مقبوله بسعر مقبول وعن الصدقات ولله الحمد "نحــــــبـــهــا ونفرح فيها " بإذن الله مانقصر وتسلمين ع الدعوه الحلوه مودتي .. |
أسأل الله لكم التوفيق والسداد .. و الفرج قريب بإذن الله :)
|
يا اختي كنت مثلك بالضبط فوالله ما ان تحسنت ظروفنا قليلا الا ويشيل يده من مصروف البيت ياختي لا اااااااااؤيدك ابدا كذا تعوديه والنتيجه ان طليقي تعود على مساعدتي له واتكاله علي ويم جبت طفلي سحب ايده من المسئوليه ويوم شفته كذا صرت اخبي فلوسي وانا مثلك ماكنت موظفه ولكن من اهلي وصار يقول لي انتي مو في وجهي ولكن اهلي في وجهي يعني اخوه المدمن زيه لو طلب ايش يروح يدبر له فلوس واهله كمان واحنا نقعد بالايام مادرى عنا لهذا الشي انصحك لاتعودينه لانني بالاخير يوم شفته خان العشره وسرق فلوسي وفلوس اهلي وبتخطيط من اهله حتى الاثاث اللي مأثثته معه باعه حسبي الله عليه ولابارك الله فيه والله ياختي ان حتى مصروف لودي لم يعطيني ارجعي لقصتي لتري بنفسك وزوجي في البدايه كان يمثل علي انه مايرضى اخذ من اهلي لكن بالنهايه صار يضغط علي لاقللت المصروف ويقول دبري لي ياختي انتبهي الرجال شاطرين في التمثيل على النساء واحنا عاطفيات ونصدق دامه مو قد الزواج ليش يتزوج خليه يتحمل المسؤوليه واذا رحتي لاهلك واحتجتي اي شي روحي انتي واياهم السوق واشتري اللي تبيه دون ماتقولي هلي اعطوني وعوديه على المصروف عليك وعلي البي لو حتى يكون مصروفك عشرة ريال اهم شي يصرف عليك صدقيننننننننني راح تحسي بكلامي هذا وتتتذكريه بعد سنوات
|
اختي يارب يكون زوجك يستاهل هل الوقفه لانه للاسف في ازواج كثير بيعتمدوا على الزوجه واهلها ان شاء الله زوجك مو منهم لكن الحرص واجب
اناحبيت اوضحلك الفكره ماابيك تخافي لازم لازم يعتمد على حاله حتى لو بيستلف من الناس هو الي راح يسدهم فهمتيني خذي من الوالد وحوشي وزوجك يدبر حاله والله في رجال بينكروا كل شي الله يجزا الخير والدك ويخليلكم اياه |
اذاء كان طيب معاك ومدلعك يستاهل والله يوفقكم
|
جزاكم الله خير الجزاء
طارق اسأل الله ان يعوضك عن طليقك يارب .. اما زوجي لا ولله الحمد مو بهالأخلاق انا صحيح خفت من انه يتعود لكن ماتوصل انه يسرقني !! ويستغلني !! و و ان شاء الله ان فيه الخير ومشكوره اموت في اولادي .. ديالا تسلمووون .. ونورتو |
n_stu
امين .. الله كريم |
| الساعة الآن 03:16 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©