|
اخي وجلوسة الدائم في بيتي
السلام عليكم ورحمة الله وبركاته ابغى حل لحياتيانا متزوجه لي سنتين و3شهور طبعا اكيد اي متزوجه بدايه حياتها تلبس احلى الملابس الخاصه قدام زوجها وتعيش حياتها وتاخذ حريتها في لبسها وفي كل شي بعد زواجي ب7شهور جاء اخويه وسكن عندي يدور عمل غثنا جالس بدون شي طبعا صرت البس ملابس ساتره وارواب عشان احتشم صار يقعد معنا انا وزوجي في غرفه النوم يسولف ويتابع التلفزيون بعدين مانقدر نتكلم انا وزوجي كثير لان اخويه ماعنده اصحاب يعني 24في 24 قدام وجهي صار زوجي يتضايق وانا اضايق واهملت نفس وزوجي وصارت حياتنا اخوان انا وزوجي حتى في امورنا الخاصه صرنا نسويها بسرعه عشان مايحس لانه ماينام الاالفجر والحين انا عند اهلي وزوجي عند اهله اجازه طبعا لاتسألون عن اهلي ابويه مايهمه غير ان اخويه يدور عمل سعادتي اخر همه وامي من النوع الصعب ماتقبل اي نقاش في هذا الموضوع طبعا اهل زوجي ناس كبار في السن ومايبغنونا نتمشي ولا نروح ولانجي مانقدر ناخذشقه نعيش حياتنا طبعا اهلي في مدينه وبيتي في مدينه وانا الحين اجازه واخوي في بيتي وان متضايقه خلاص مالي خصوصيه حتى زوجي اذا يبغى يجي عندي لازم يكذب على امه وابوه لانهم ناس متخلفه عندهم الرجال لازم ماينحني راسه لزوجته امي من النوع الصعب تزعل اذا رديت على زوجي في الجوال العام والله ماسويت شي رديت عليه قدامها وقامت تسوي مشاكل بدون سبب بطريقه غير مباشره تقول ليه تشوفين المطبخ ناقص وماتكملين اغراضه طبعا رحت واشتريت لها بعض الاغراض على قد فلوس زوجي قالت هذي الاغراض مو من مستوانا كسرت خاطري وقعدت ابكي طول اليل وبعدين فهمت ان اني ماارد قدامه ابدا ولا اقولها عن حياتي الزوجيه شي لاني مره اتصلت على زوجي وقلت له تعال اهلي يبغون اغراض طبعا هو عشان ينفك من اهله لازم انتظر ساعه قالت امي شفتي مايسمع الكلام اطلبي الطلاق وشرايكم اطلب الطلاق عشان ماجاء في الوقت المحدد من بعدها عرفت غرض امي |
اقتباس:
|
اقتباس:
يعني ليش في الإجازة تتفرقوا و الكلمة اللي تستحي منها بديها قولي لأخوك ما أحبذ انك تدخل غرفتنا ليش ما يسكن في سكن خارجي او يستكفي بغرفته لأن تجواله كذا بينكما ,,,عيب و إذا هو ما عرف اعطيها في وجهه و أمك تخذيها بالحيلة يعني لما قالت لك كذا ارمي الحمل على اخوك او ابوك بطريقة غير مباشرة يعني كأن تقولي::من عيوني راح اشوف اللي ناقصك و اقول لبابا على طووول و لا يهمك حتى لو كان هذا مو أسلوبك ,, غيريه عشان تتجنبي عصبيتها و لو أن سالفة الإجازة أن كل واحد بمكان غريبة فعلا و موضوع الشقة , يعني انت ساكن في بيت أهلك او شقة خارج بيت الأهل |
اذا على اخوك التلفزيون خرجيه من غرفة النوم و قولي له هذي غرفة خاصة بيني و بين زوجي
اكيد هو م يرضي ان اخو زوجته يجلس عندهم في غرفة نومهم اما انك تطلبين الطلاق عشان تاخر ساعه ليه بعدين ارجعي بيتك و اخر رمضان تعالي عند اهلك او في العيد ما ادري هذا اللي اشوفه |
أمك مقدور عليها سمعي من هالاذن وطلعي من الاذن الثانية
صح بتتضايقين وضغط نفسي عليكِ .. بس المهم انك مقدرة زوجك وعارفه وضعه وفي نفس الوقت عارفه طريقة اهلكم في الحياة وانتي انسانة ناضجة واهم شي عندك ان يعمل كل الي يقدر عليه عشان يريحك وانتي راضية عنه ومقدرة ضروفه وهو بعد نفس الشي .. وبكذا اعتبري كل يصير حواليكم من امك وتحريضها أو اهله و تعنتهم هي فوضى مالها معنى وبعد الاجازة راح ترتاحون منها .. لكن مضطرين تستحملونها لأن اصحابها اهلكم .. المشكلة الحين في أخوكِ .. اتوقع المشكلة في التلفزيون .. المكان الي تحطين فيه التلفزيون عرفي انه بيصير صالة أو غرفة جلوس التلفزيون شيلوه من غرفة نومكم وحطوه في مكان ثاني بعيد أخوكِ حاولي يكون مكان نومه ابعد شي وإذا تقدرون حطوا التلفزيون في حجرته الي ينام فيها الشقة إذا كبيرة وفيها ملحق فضوه و خلوه فيه غرفة نومكم دائماً قفلوها و إذا بتدخلون فتحوها وقفلوها وراكم راح يستحي يدق الباب عليكم وإذا دق عليكم الباب لا تقومين انتي تفتحين خلي زوجك يرد عليه ويفتح الباب ربع فتحه ويسأله شنو يبي وإذا ما حبيتوا لا تردون |
الصراحه اللوم مو على اخوك اللوم عليك انتي وزوجك لهدرجه ضعاف
والا وش اسميكم بالله عليك بيتك مافيه الا غرفة نوم يوم هو متربع بينك انتي وزوجك ياختي الحمار وانتي بكرامه يفهم العلاقه بين الزوجين مو عاد انسان شدعوه لهدرجه اسمحي لي بس كان المفروض انتي تبدأين تسوين فرمته لحياتك بما يناسبك انتي وزوجك بكرى زوجك ماراح يصبر ويمكن هو من نفسه يطلقك اذا صعبت عليه هالعيشه |
اقتباس:
مستحيل اطلب الطلاق بس شوفي رأي امي كيف عشان تفهمون انها تبغى مشاكل الله يهديها ومستحيل اسمع كلامها ابدا |
أختي صارحي اخوك وقولي له انت على عيني وراسي لكن ما تدخل بكل مكان انا لي خصوصيتي ببيتي
جيبي له تلفزيون بالغرفه الي ينام فيها او بالمجلس وخليه يقضي وقته فيه ويكون هو مكان جلوسه ومافيه مانع إنه يجلس معكم ساعه أنتي وزوجك وتسولفون سوا لكن طووول الوقت معكم هذا شي غير مقبول وممكن زوجك متحمل لكن لمتى يبي يتحمل خوووفي ينفجر ويطلع كل اللي بقلبه احذر الحليم إذا غضب والله يهدي أمك ويرزقك برها |
اقتباس:
شكرا لك بس الله طلعت التلفزيون بس يتجول وبيتي صغير على قدنا لانا كنا عرسان سابقا وصار عندي اخويه حتى صديقاتي يسألوني كيف اخذ راحتي والله هم الله المستعان بالنسبه لي انا عند اهلي وزوجي عند اهله مافي شقه خارج البيت لازم نتفرق عشان يرضون امه وابوه عندهم عيب ناخذ شقه يعني قلة ادب ومن زمان انا وزوجي ماجالسنا مع بعض الا وعندي اخويه بالنسبه لاأمي انا اخذت قرار مااشتري لها شي الابكيفي عشان انا اغراضي مو من مستواها لاحول ولاقوة الابالله |
امك يا قلبي اذا تعرفي شخصيتها تعاملي معها على هذا الاساس .. داريها و خذيها على قد عقلها بالنسبة لاخوك ما عندك اخوان او اخوات يكلمونه في الموضوع .. واذا ما عندك احد يساعدك فالاخوات ما قصروا ذكروا لك كيف تتعاملي مع الوضع .. واذا على اهل زوجك لازم زوجك يعرف كيف يتعامل مع اهله و يوضح لهم بان لك حقوق و ما يحب احد يتدخل في حياته .. بعض الاهل تفكيرهم صعب .. |
اقتباس:
شكرا لك التلفزيون خرجته بس مافي فايده يجلس معانا على طول ويدق الباب اذا جلسنا في غرفة النوم بالنسبه اني اطلب الطلاق عشان تاخر ساعه مستحيل بس شوفي امي وعقليتها وحبها للمشاكل بالنسبه انا نروح بيتنا حبيبتي رحنا في نصف 8 بيتنا وعشان امه وابوه يزنون تعالوا رجعنا نهاية الشهر عشان نعيش رمضان معاهم قال زوجي ماتفرق لان اخوك جالس معانا |
اقتباس:
والله ماعنده احساس مشكوره على ردك بالنسبه لي طلعت التلفزيون بس لازم من الغثه حتى اني مااكلمة مااطالع في وجهه وهو حاس بس مايبغى يفهم |
يختي خلي زوجك يتفاهم معاه..
او ع الاقل قولي لزوجك عشان خاطره هو ومايحسك مطنشه "الامر لك تصرف معاه باللي يريحك لو توصل للطرد"...!! والله العظيم لو انا مكانك واهلي كذا مو معبرين حياتي وزوجي كويس وساكت على هالوضع ومستحي من اخوي على كل اللي يسويه,,, مايجي اخوي الا واغراضه بالشارع عند الباب واللي فيها فيها ,, وش بتخسرين يعني؟؟ ابوك وامك خير شر شايلين انفسهم منك وزوجك معاك ... يعني هو ساكن عندك عشان يفتك من حنة امك وابوك وماكل شارب بلاش ولا فندق 5 نجوم...!!! . . . إعذروووني ع الاسلوب بس من جد شي ينرفز لسا فيه ناس كذا...؟؟ |
يا سااااااتر ... اخوك هذا مخلوق فريد من نوعه .. ما عنده ذرة حياء و منعدم الاحساس !!
هالاشكال ما يصلح معها الطيبة و السكوت ابد .. اذا دخلتي انتي و زوجك الغرفة قفلوا الباب بالمفتاح .. و اذا حصل و دخل غرفتك اصرخي في وجهه و قولي له اطلع بره .. اياكي ان تكوني طيبة او لينة معه .. من المهم ايضاً ان يعلم زوجك انك غير راضية بالوضع و متذمرة منه .. لكن لا تطلبي من زوجك ان يتحدث الى اخيك و حلي مشكلة اخوك بنفسك و اياكي ان تدخلي زوجك في الموضوع حتى لا تكبر المشكلة |
خلي زوجك يطرد اخوك كل هالمدة يدور وظيفة زودها عاد سنتين وهو جالس معكم كذا
بس حسيت بشيء أن أمك وراء الموضوع تبي اخوك يطفش زوجك علشان تصير مشكلة ويطلقك أحساس حسيت به ما ادري حقيقة ولا وهم |
والله اخوك هذا اما مايفهم او يعاند
غريب جدا تخيلته وقمت اضحك المهم لاتخلين زوجك يطير من يدك خلك قوية وحلي المشكلة باي طريقة قولي له اطلع فلان ابغير ومرة قولي فلان ممكن تطلع شوي ابجرب لبسي ومرة قولي له ابنام معليش اطلع وان مانفع اوقفي على ارسه وقولي ارجوووووووووووووووووووك ابي اخذ راحتي ببيتي |
سنتين قاعد عندكم؟ولسه مش لاقى شغل؟مش مقتنعه صراحه واعتقد انها لعبه عشان يطفش زوجك لغرض فى نفس يعقوب وانتم بجد صبرتوا بشكل خرافى يعنى كله كوم وانه لما يلاقيكم فى غرفتكم قافلين الباب يخبط عشان يدخل يقعد معاكم دى فعلا اللى شككتنى انه متعمد يضايق زوجك والله اعلم
اختى اخوكى اصغر وللا اكبر منك؟ |
أختي الغالية/ إحساسي مرهف أولاً مشكلتك بسيطة جدا ولها عدة حلول لكن يا أختي أنا أستغرب من أمر خطير قلتيه سهولة فكرتي في حل هذة المشكلة (الطلاق) أختي الطلاق ليس حل ناجح في ما عرضتيه لنا من مشكله أختي الطلاق مشكله بحد ذاته ....أرجوك ..لا تفكرين في الطلاق عند مواجهتك لأي مشكله تزعجك . أذهبي وأبحثي عن هموم المطلقات وأنظري كيف يعيشون ومن ماذا يعانون ....ثم اسألي نفسك هل هذا المصير الذي أريد؟ أختي مشكلتك مع أخيك سوف تزول يوماً ولكن الطلاق مصير لا يزول أبداً.. أخيك ليس صغيرا ...صارحيه بأختراقه لخصوصيتك أنت وزوجك .. تحدثي معه بثقة وليس بخوف واحراج ..هذة المسألة واضحة لا تحتمل لف ودوران .. ولا تحملي زوجك ذنباً لأنه لم يرضي أهلك بما قدم !!! عودي لبيتك وزوجك ...وأجلسي مع أخيك وقولي له .........يكفي هذه حياتي |
اخوي حديث الوقت انا ماافكر بالطلاق ولكن هذا قرار امي عشان تهدم حياتي والا انا مستحيل افكر فيه مهما كان بس امي تحاو ل تسوي مشاكل
|
ريوف الخبر صقر الشرقيه الناصر 2007 صامده حتي الفرج وجميع من رد وماذكرت اسمه الف شكر على تعاطفكم الناس باقي فيها خير واهلي اللي هم اهلي مو حاسين فيه |
لان احساسك مرهف
عايشة بهالمشاكل الحياة مع الناس صعبة ويبغالها شوي حنكة المشكلة من ثلاث جهات أهله-اهلك- انت وزوجك اخوك ماسوى ماسوى الا لتماديكم الشاعر سبقنا وقال ان انت اكرمت الئيم تمردا أمك تغاااااااااااااااااار منك وكذلك أهل زوجك الله يصبرك على الحالة في بداية الزاوج تكون أمور من كذا لكن لاااااااااااااااازم انت وزوجك تكونون يد وحدة تثبتون وجودكم كعائلة للكل وتتمسكون ببعض لاخر رمق بالحياة |
عزيزتي انتي احمدي ربك بس يجلس معكم
والله واحد من اقاربنا اخوانه ينامون في السرير على طول وبس احد يتكلم عليهم ياويله أسال الله للجميع الهداية |
ههههههههه هي كشته ولا زواج
اقول خلي اخوك يدور له اي وظيفه ... خلي اخوك يتلحلح ويشوفوا له اي وظيفه دورو له في بقاله في سوبر ماركت ليش يجلس 24 ساعه يعنى الوظيفه بتطق بابكم فهموه ان الوظائف كثير لكن خلوه يروح يدور والله يرزقه |
اللوم على زوجك أولا وآخرا
المفروض يطرد أخوك شر طرده لأنه قليل أدب وبعدين أهلك وأهله على العين والراس بس لكل شي حدود لازم ينضبطون عندها ولا يتعدونها إذا هم متعودين على همجية العلاقات فلازم إنتي وزوجك تكون لكم طريقة واضحة مع الجميع (أهلك وأهله) يمكن تواجهون صعوبات في البداية بس بعدين راح يحترمونكم أشد الاحترام ويعرفون وش معنى خصوصية. |
ام داليا انا احساسي مرهف صحيح بس والله اهلنا واهله ناس صعب التعامل معاهم سديم الورد ازيدك من الشعر بيت كان اذا خرجت ارجع القاه جنب زوجي يقلب التلفزيون حسبي الله ونعم الوكيل الايميل لمن قريت ردك ضحكت ههههههههههههه اي كشته حسبنا الله ونعم الوكيل صالح الخالدي اشكرك على الرد بس زوجي لو طرد اخويه بتكون نهاية حياتنا الزوجيه لان امي مره تدور المشاكل دواره عشان كذا زوجي ساكت عشان مايكبرها |
اختي الكريمة من الواضح ان هناك من يريد ان يهدم حياتك فأحذري . . اقترح عليك ان يطلب زوجك من احد اخواته او بنات اخته اذا كان لديه ان تمكث معكم فترة من الزمن وهنا تطلبي من اخيك الخروج لكي تأخذ البنت راحتها وقبل مايتم الطلب منه حاولي تطفيشه بحيث ان مكانه المجلس فقط وليس عنده تلفزيون او اي شئ مسلي لكي يمل ولا يطيق الجلوس عندكم ودخوله الى اقصى الشقة مستحيل بسبب وجود فتاة . . |
اقتباس:
الف شكر على الرد والله فكره بس مافيه احد قريب في نفس المنطقه اللي احنا فيها والله حاله |
اختي ليش ما تروحي عند اهل زوجك في الاجازة هذي
وخاصة اذا كان عندة غرفة خاصة عند اهلة اسكنة معة في غرفتة في بيت اهلة خذوا راحتكم علي الاقل في الاجازة لا تقولين اهلة روحي وتوكلي علي الله اقنعي اهلك واهلة عشان راحتك وما اعتقد انهم ما بيرحبون فيكي بالعكس |
لمحي له قولي لك سنتين ماخصلت وظيفة مو معقولة لازم تشوف عمرك الوظيفة ماراح تجيك ع رجليها ..
و قفلي الباب عليكم حطي ع غرفتك خط آحمر ممنوع الاقتراب .. بالنسبة للآكل اذا دخل غرفته قولي له تبي غداك فهميه آنكم بتاكلون لوحدكم .. |
من جد شي غريب!!!!!!ويفقع المراره أناصراحه تنرفزت الله يعينك ياصاحبة الموضو ع المشكله الأكبر هي بأهلك ولا هو سهل تصرفكم معاه
والله ماأدري أيش أقول الله يكون بعونك؟؟؟؟؟؟؟؟؟!!!!!!!!! |
احذري من الطلاق لأنه بالسبب هذا كان طلقنا قبل لا نتزوج بعدين اخوك اذا جلس على هالحال بعد 6 شهور فاتحيه بالموضوع وانك مهما صار تبين الخصوصيه في البيت
|
السلام عليكم ورحمة الله وبركاته
اول شي الله يكون بعونك على بلواك والله يهنيك مع زوجك ويديم العشره بينكم, لان الي يصير لكم في حياتكم مو سهل، لو فيه ازواج اخرين كان انفصلو بسبب التدخلات العائليه. ثانيا مثل هذي الامور الحساسه تحتاج الى اتخاذ اجراء يجي فيه عقل وحكمه وبعيد عن العواطف. انتي الان حللتي مشكلتك وعرفتي بالضبط كيف طبيعة اهل زوجك وتعاملهم, وامك وهدفها وابوك واهتماماته, واخيرا اخوك ووضعه معكم . اختي العزيزه بما انك انتي وزوجك متفقين وفاهمين الامور هذي كلها. فانا ارى ان المشكله فيك انتي وزوجك، الي خليتو الناس يتحكمون في حياتكم الخاصه!!! بتقولين لي: ان الوالدين لازم نحترمهم و لا نكسر كلمتهم، سوءاً أمك و ابوك، او أم زوجك و ابوه، و ممكن تقولين: هذا اخوي لازم اوقف معه. فانا بارد عليك و اقول: هنا الحكمة و العقل تلعب دورها. انا ما قلت اعصي اهلك او اهل زوجك. بس بطريقة دبلوماسية اسمعوا لهم، بس لكم حياتكم الخاصة، و عندكم حدود لا احد يتعداها. و الحاجة الثانية, انتي الان في وضع حرج، ما تقدرين تردين على امك و لا على اخوك، لان خوفك انهم يزعلون عليك، في نفس الوقت انتي عارفه انهم يبغون يخربون حياتك (بناءاُ على الي فهمته من كلامك). فانا اشوف ان هذا الامر لازم يتخذ فيه زوجك اجراء يوقف تدخل اهلك و اهله بطريقة مؤدبة. بالنسبة لاهل زوجك، مثل ماقلتي، كبار في السن، و زوجك يمكن يحتاجونه الان، و كذلك العادات و التقاليد الي عندهم. بس ودي انك بطريقة لبقة و مؤدبة توضحون لهم انكم "زوجين" و عائلة لها كيانها و عالمها، و في نفس الوقت، لهم منكم التقدير و الاحترام و من دون مساس لحايتكم. اما بالنسبة لاخوك، فخلي زوجيك يواجهه بالموضوع، و يقول له: البيت بيتك، و انت اعز من يجي، بس مثلك عارف، الواحد له خصوصيات مع زوجته، و ودنا ناخذ راحتنا في البيت...... بهذي الطريقة يكون زوجك حط حد واضح لاخوك، و في نفس الوقت، انتي ما حصل منك خطاء على اخوك، ولا لك مواجهه مباشرة مع اخوك. و طبعا، انتي بيكون رايك من رئي زوجك. و ان لعب اخوك لعبة الغبي، ولا وده يطلع من البيت، او يعدل من حشارته معكم، فلازم يكون كلام زوجك اقوى المرة الثانية، و يوضح له زوجك انه ما يقرب غرفة النوم ابداً، ولا حتى يدق عليكم الباب، لان هذي جراءه زايدة عن حدها، ولازم تنتهي. في النهاية لا تصيرون الضحية، و تكونوا لعبة في الي يبغى يهدم بيتكم. و الله يوفقكم في عشرتكم، و يفرج همكم، و يجعلكم من البارين بالوالدين، و واصلين الرحم. و تقبل الله منا و منكم الصيام و سائر الاعمال.... |
نسيت اقولك،
لا تقولين لامك عن مدى حب وزوجك لك، او حبك له، او اي اطراء و مدح لزوجك، و كذلك لا توضحين اي شي يصير بينكم انتي و زوجك. و السبب معروف: بتحس الوالده ان زوجك اخذك منها، و صرتي تحبينه اكثر منها. و هذي هي الغيرة الي موجودة في كل بيت، و لا يخلى منها اي زوجين. الامر طبيعي و انت بيدك تلعبين على امك بكم كلمه، و تقولين لها: ان زوجك يحترمها و يقدرها و و و و، و من الكلام المعسول، الي يخلي امك تغير نظرتها فيه. و الله يوفقك.... |
اختي لاتستصعبين الامور
جيبو مفتاح غرفة نوم لكم واذا طق الباب لاتعطينه وجه وااذا بغيتي تطردينه من الغرفه ... قولي له ابي اغير ملابسي اطلع شوووب ومرات قولي له ابي انام شوي تعبانه حاولو انتي وزوجك تعرفونه على ناس من برى يعني حتى لو اصدقاء زوجك يعرفه على واحد منهم ولا على اقاربه ويتفق معه انه يخليه يتأخر ولما تصير علاقتهم قويه ... يقول له وش رايك نروح المنطقه الفلانيه (منطقتكم اللي تعيش فيها امك وابوك) عشان ينام عند اهلك .... باي عذر سواء للتمشيه او عشان يدورون وظيفه بحكم انه سمع انه هناك وظيفه لازم تعرفونه على شاب او اي شخص يقرب لكم ويفككم منه ومن لزقته |
أختي أنت هي المخطئة و زوجك أيضا . و أخوك قليل الذوق صراحة. أنا عن نفسي لا أرضى أن اسكن مع أختي ناهيك عن المضايقة الشديدة. الأمر بسيط إجلبي جهاز تلفاز لغرفة أخرى و إنتهى الأمر و لا تتركيه يدخل غرفتك ثانية , هذه الغرفة تسمى فراش الزوجية و عليه أن يعي ذلك.
|
انا مكانك
اتصل على زوجي واقوله تعال خذني اقضي باقي الاجازة معك في بيت اهلك واخوك هذا قليل الذوق قوليله بوجهه انتي مو زوجك انك ما تبغينه وانه ثقلها وايد مو حياة هذي بصراحة خلي اهلك يزعلون كلها فترة بسيطة وتعدي ابوك وينه من الموضوع هذا كله بفهم ! هل يرضى حد يخرب بيت بنته بهالشكل ؟ |
ههههههههههههههه ضحكتني بعض الردود واسلوب اخوك
شوفي زوجك ثم زوجك ثم زوجك بيعهم كلهم وارضيه صبر عشان المشاكل ماتكبر بس انتي حطي حد لهالمشاكل ياختي اقلبي وجهك على اخوك ولاتردين عليه ونفس الشيء زوجك قفلي غرفتك ولا يشوفها ولايدخلها وين خصوصيتك ؟؟؟؟؟؟ اكلوا لوحدكم اعكسوا نومكم ولاتقابلونه هذا يبي له حقران اخوك على راسك من فوق بس ينكد عليك ليه !!! اذا هو جاهل بخصوصية الزوجين نوريه خلي زوجك يكون صريح معه اذا دق يطلع له ويقول وش فيك احنا مشغولين !!!! مافيها شيء هو مااستحى انتم ليه تستحون امك الله يهديها اهل زوجك هههههههه يعني ايش لو تروحون شقه يعني قلة ادب ههههههه بالله وولدهم شلون جاء هههههههه سبحان الله تفكير حجري الله يعينك ويصبرك بس حافظي على بيتك وزوجك وزوجك وزوجك موفقه يارب |
صدق كلكم استنكرتوا هذا الوضع
وكلكم اجمعتوا ان لازم في الحياه الزوجيه خصوصيه لكن اهلي ماهمهم هذا الشي وصدق اجمعتوا ان اهل زوجي ناس من العصر الحجري تصدقون حتى مااقدر اوريهم الاب توب حقي يقولون خسرت ولدي اشياء ماتنفعهم لاحول ولا قوة الابالله ام زوجي مره كان في يدي عطر قيمته 150ريال طبعا قلت لها لا هذا رخيص انجنت وقالت لاخذي راتبه كامل لاتخلين له شي اشكر كل من رد واعطني رأي وكلكم ياعضاء المنتدى ينشد فيكم الظهر وعلى عيني وراسي وانتم اهلي اللي الجأ اليهم |
بما أن العائلتين متحجره أتفقي أنت وزوجك ان تكون لكم خصوصيه ولا تسمعوا لكلام أحد
والله الرجال لو مل راح يدور راحته في الثانيه وأنت عالقه في العادات والتقاليد ,وكل شئ في بدايته صعب خليهم يقولوا قلت أدب ومبذره وقويه ووووو المهم أنك تعملي اللي يناسبك أنت وزوجك وهم راح يتعودوا مع الوقت ,بل والله يحترموكم ويخشون أن يتدخلوا في خصوصياتكم والمهم ان لا تفوتي فرحت وسعادة السنوات الاولى بعادات باليه . أنا أستغرب في ناس زي كذا وحده من صديقاتي ساكنه بجنب بيت أهل زوجها وبينهم باب وياويلهم لو أتقفل الباب والمشكله زوجها أخر العنقود ومالهم شغله غيره . والله زميلتي مثلك ماتاخذ راحتها في بيتها وما تقدر تلبس لان عمها في أي لحظه يدخل بل هو يدخل في غرفة النوم ويطفئ المكيف ويصحيهم من النوم. |
طيب حبيبتي اش قررتي تسوين ؟؟؟..
الله يلهمك الرشاد يارب .. ويسعدك .. قولي آمين .. |
| الساعة الآن 10:22 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©