|
زوجي يحادث بنت في الماسنجر
السلام عليكم ورحمه الله
مبارك عليكم الشهر اخواني اخواتي اول مشاركه لي وان شاء الله القى ظالتي عندكم انا متزوجه لي سنتين وربي رزقني بولد الله يخليه ومن بدايه زواجنا واحنا ظروفنا مره صعبه وانا وعدت زوجي انا وانت على الحلوه والمره ولا عمري طلبته فوق طاقته ابد ونفسي باشياء ولا اطلب مقدره ظروفه وقبل يومين تقريبا بالصدفه لقيت محادثه له مع وحده سوالف واحبك واشتقتلك ومعلمها انه متزوج وعنده ولد وقالها اشياء كثير انا سويت لها اضافه وسولفت معها وعرفت اني زوجه الي سولفت معه وقالت كل شي وانا طلبت من زوجي يفتح ايميله يعطيني الرقم يعني لانه كان في الدوام طبعا رفض وبقوه بس اصريت عليه وعطاني وما لقيت وحده بس فيه وحده ثانيه ولما سالته عنها قالي هو واحد بس يستهبل بتوبيك بنت سويت لها اضافه وطلعت بنت وقالت يقول اني انا ما صبرت عليه واطلبه فوق طاقته وما ابيه يروح من عندي ولا يجلس على النت ولا يشوف تلفزيون ولا يطلع يسهر برى رغم كل الي قلته يسويه ولا رديته بشي ودائما لوحدي في البيت ما فيه وقت لي ابد يطلع من العشاء ولا يرجع الا بعد الفجر واذا جلس في البيت على النت حتى اسولف معه ولا كاني اتكلم ما يرد علي وربي عالم ما قصرت عليه بحقوقه ابد اعطيه كامله وانتو عارفين وش اقصد بكامله بس ما ادري اش المشكله احيانا اقول ما فكر في الي خلقه كيف يفكر فيني يتكلم في الدين كثير بس ما يطبق شي حتى الحين رمضان ما يفطر الا بعد ما يصلون المغرب لانه نايم وطبعا طول اليوم نايم صوم بدون صلاه ابي نصيحتكم لي وش اسوي تعبت والله تعبت نفسيتي زفت بعد كل هذا الصبر هاذي مكافئته لي الله يسعدكم في الدنيا والاخره ولا يفقدكم غالي امين..اعذروني طولت عليكم |
وعليكم السلام ورحمة الله وبركاته
هو يتكلم عليكي عشان يستعطفهم ويحبوه وانو هو مظلوم عادي والله ما اعرف ما هو الحل الله يهدينا جميعا ادعي له بالهدايه تنشوف رأي الاخوات حبيت ادعو لك بالفرج |
وعليكم السلام ورحمة الله وبركاته
اختي الغالية اولا مبارك عليك الشهر ولو أنها متأخرة .. شوفي حبيبة قلبي زوجك يحتاج الى وقفة مع نفسه تجاه ربـه أولا فبانعدام الوازع الديني لن يحده شيء .. ومحادثة الاجنبيات والسهر وهذا كله يجي بعدين حاولي بهذا الشهر الفضيل أن تنصحيه مرة واثنين وثلاث واربع وخمس لا تخليه نايم يا اختي.. اكسبي أجر من الله سبحانه وتعالى وقومي بتنبيهه الى موعد الصلوات .. ليش هو ما عنده شغل نايم كل اليوم ؟ شوفي انا بقولك .. نصحيتي لك .. لا تجيبي له سيرة هذه الانسانه.. لانها بالتأكيد ستقول له وسيجد غيرها ألف.. ولن ينوبك سوى القهر والغم والهم ! اذا هو ما تغير من الداخل .. لن تستطيعي فعل شيء! الآن نأتي للخطوة الثانية بعد أن يلتزم بصلاته وصومه وطاعاته (هذا الاهم الآن) عليك بتغيير روتين حياتكم بشكل جذري من تغيير ديكورات البيت ، الى تغيير نفسك وتعزيز ثقتك بنفسك (صبغة شعر / ريجيم / اشتراك بنادي / اشتراك بدورات / انشغال باشياء مفيدة) وستجدينه هو الذي يتقرب منك يريد معرفة سبب التغيير (الرجال عندهم هوس معرفة سر غموض المرأة) وكلما كنتي متفرغة له وله وحده سيتصرف وكأنه "ضامنك" كوني ذكيـة واكسبيه واعيديه الى عشك لكن اشدد على نصحه بالصلاة واتقاء ربه كوني قدوة حسنه.. امنعي عن نفسك وعن بيتك المحرمات .. وسيصلح الله قلبه باذن الله ربي يسخره لك ويسدد خطاه |
كلام بكرالشايب عين العقل
الله يكثر من امثالك يابكر صاحبة الموضوع الله يهدي زوجك يارب |
محادثة الايميلات صارت عادي
زوجك مايصلي ولا مهتم بالدين المصيبه ان فيه اللي دقنه لصدره ويكلم بنات ويتغزل فيهم لكن التغيير من الداخل والله يسخره لك ويصبرك يارب |
أسأل الله أن يفرج همك ويهدي زوجك
أختي إذا كان زوجك ما يصلي وشلون تبغينه يخاف ربه ولا يتكلم مع بنات وخصوصا عيون الرجال زايغه ذكريه بالله وانصحيه أهديه شريط يتكلم عن الصلاة ومراقبة الله لاتيأسين بنصيحته يقولون كثر الدق يفك اللحام وياما سمعنا قصص زوجات غيروا أزواجهم أول شي خليه يحافظ على صلاته بعدين الامور الثانيه تجي بعدين ( إن الصلاة تنهى عن الفحشاء والمنكر ) بعدين يا أختي الواحد ما يروح يدور شي برا البيت إلا لما يفقده بالبيت يعني حاولي تغيرين من نفسك وبيتك للأحسن طبعا واعلمي إن الزوج طفل بيد زوجته يبغاها تعطيه حنان وعاطفه تهتم فيه تشاركه همومه وأفراحه باختصار شوفي وش ناقص فيك تجاهه وكمليه وما فيه مانع إذا شفتيه يتمادى بزلته تصارحينه وتذكرينه بالله وإن اللي يسويه اليوم ببنات الناس بكره يسونه ببناته أو خواته الله يهدي زوجك ويحببك فيه |
اقتباس:
الله يسعدك يارب والله حتى انا ما ادري وش اقول بس خليها على رب العالمين |
اقتباس:
عليه..تجيه فتره ما يخلي ولا صلاه تفوته في المسجد اسبوع بس بعدها يجلس شهر يوم يصلي ويوم لا ويصلي فرض ويخلي فرض وقبل الفطور بوقت اصحيه من النوم بس لا حياه لمن تنادي وعنده عمل بس يجي وقت الظهر ونوم لما بعد المغرب المشكله علمته بكل شي صار بيني وبينها عشان يعترف ومصر انه ما غلط واني انا اصدق ببسرعه وكل شي واضح قدامي وبالنسبه اني اغير من البيت وشكلي وكل الي قلتيه والله العظيم يا اختي حتى رمضان ما شريت له ولا شي ظروفه مره صعبه انا حتى كان ودي اصبغ شعري في العطله قال ما معي فلوس ولا حتى ملابس وش اقولك بس صابره عليه وشوفي نتيجه صبري الله يكون في عون الجميع وربي يسعدك يا قلبي والله بحاول اسوي الي قلتيه وربي ييسر |
اقتباس:
|
اقتباس:
انا ما ابي منه شي غير يحترم وجودي معه كل شي ناقصني بس مو مهم اهم شي الراحه وانا ابي ارتاااااااااااح والصلا ه اهم شي في الحياة حتى خايفه على ولدي صراحه يصير مثله تعرفين الاب قدره بس بحاول اعلمه من صغره ان احنا اصلا ما خلقنا الا عشان العباده والله يعيني على تربيته التربيه الصالحه وربي يوفقك دنيا واخره ومشكوره ياعسل |
اقتباس:
وان نقصت عليه شي ربي شاهد علي والله اني اعطيته روحي وكل وقتي وهو ما هو مفكر فيني وربي الي خلقني ما ناقصني شي ابد المشكله ابي اتفاهم معه ماهو راضي مصر انه هو الصح وانا ما اصدقه بشي الله لا يحرمك غالي يا اختي ويسعدك يارب |
لكل الي رد على الله يحرم وجيهكم من النار ويسعدكم ويبعد عنكم كل ما يضركم
وربي يرضا عنكم يارب والي يقرا موضوعي وعنده نصيحه لا يبخل على فيها وربي يحفظ الجميع |
الله يهدي زوجك يااختي انصيحه بالصلاه وذكريه بالايه الكريمه
ومن اعرض عن ذكري فان له معيشه ضنكا |
الله يهديه ويسخره لك
وانا مااقصد انه عادي اتركيه بس صار اغلب العالم تشتكي والمشكله مو في الزوجه بس يمكن هو اصلا متعود على هالحركات مابيدك شيء الا الدعاااااااااء ثم الدعاء وخلي اسلوبك وتعاملك معاه للافضل ولاتكلمينه بهالموضوع خلاص قفليه اذا هو يراوغ ويكذب مابتوصلين لنتيجه مرده لك حاولي تشغلينه فيك وبأولاده بس مو لدرجة التطفيش لا بأسلوب ذكي قربيه منك وأغريه فيك خليك نادرا مااتتكلمين عشان ينتظر سواليفك ويشتاق لها طلباتك خليها بشكل حلو برسايل جوال برسايل ورقيه بأسلوب دلع والله هالبنات ماطيح هالشباب عندهم الا الدلع والمياعه الا انهم هم بالحرام وانتي حلالك وتؤجرين عليها جددي بشكلك قصي البسي اشياء جديده غيري بالبيت اطبخي شيء جديد التغييييييييييير هو اللي يقدمكم لقدام انشغلي عنه اعزمي جاراتك وصاحباتك اطلعي خليك سرحانه قدامه وخليه يبحث سر هالتغير ولا يحصل شيء !!!! خليه بحيره وشغله الشاغل يفكر فيك الله يرزقك من اوسع ابواب رزقه ويسخره لك وواصلي على دربك |
بس لفته
الرجال لا تحنينه قولي له ابي وابي والله لو يبي بيطلع من تحت الارض |
لا حول ولا قوة إلا بالله ...
كثرت مثل تلك المواضيع من الطرفين الرجل والمرأة .. اللهم احفظ نساء ورجال المسلمين من الفساد.. ماشاء الله جابت لك الزبدة الأختين (بكر و ورد )... على كل يا عزيزتي الله يفرج همك ويصلحه ويسخره لك يارب... وما دامك يا عزيزتي عطيته (كل روحك وقتك) كان ذلك إحدى أسباب النتيجة الي إنت فيها.. اقتباس:
ياقلبي مو كل الرجال يصلح معهم العطاء بلا حد !! بل أغلبهم لا يصلح معهم ذلك إلا من كان مثاليا وهذا نادر.. أكثري من الدعاء والإستغفار.. والآن لا تحملين منه لين تشوفين وش تاليته ... وهو إذا صلحت صلاته بإذن الله إلي بعده مقدور عليه .. والله معك .. |
اقتباس:
بارك الله فيك اختي بكر دائما تعجبني ردورد الصائبه رحم الله والديك .. |
اقتباس:
ولا كأنه يسمع المساجد ابد |
اقتباس:
رمش الزهر كلامك كله عسل يا عسل انتي بس والله لو بيدي اغير غيرت لاكن يا حبيبتي ما عندي امكانيه ابد لدرجه ابوي يرسلي فلوس عشان امشي حالي مع الناس والله الي اقدر عليه سويته من التغيير حتى لو باشياء بسيطه في البيت بقولك شي انا بستشيرك بشي وكل الاخوات الي ردو علي انا ابي اروح لاهلي وش تقولون |
اقتباس:
والله كلامك صح لو يبغى شي بيطلع من تحت الارض بس ما تدرين انتي وش يقولي لما اقوله ابي وابي تسلمين يا قلبي مشكوره |
اقتباس:
والله كلامك صح انا عطيت كل شي وهذي هي النتيجه وانا والله اقولها دائما من كثر ماني مقدره وعلى نياتي صار فيني كذا الله يعين بس والله على الظالم يسلم ردك حبيبتي واكيد اكيد ما راح احمل بس والله يقطع قلبي ولدي ودي اخاويله بس كل شي بيد رب العالمين واحنا مسيرين مو مخيرين |
اسمعيني حياتي \ أنا تقريبا من شهر بس مريت بتجربة تشبه قصتك وراح أقولك إيش سويت صدقيني راح تستفيدي أنا رحت عند أهلي طبعا على إني تعبانة وجلست عندهم كم يوم في هذي الفترة سويت إيميل باسم بنت وعملت دعوة لزوجي وطبعا سوا قبول وبدأت أكلمه وأسأله عن زوجته ورسلتله صورة ع إنها صورتي وخليته ألين رسلي صورته المهم جننته مع مراعاة إنك تخليه يعترف بخيانته وإنه مستغل غياب زوجته وإنه يبغى وحد تعوضه .... ومن هذا الكلام وانتبهي انت في هذي الفترة زيدي من حبك وحنانك واتصالاتك عيه وطيحيعليه رسايل حب وشوق عشان من جد يحس بغلطته وما يتهممك بعدين إنك انت اللي قصرتي معاه المهم بعد كم يوم حفظت كل المحادثات اللي بيننا وسويت إضافة لإيميل زوجته اللي هي أنا وسويت نفسي بريئة قلت لزوجي جاتني إضافة من هذا الإيميل طبعا هو ارتبك وقالي لا تقبلي وأنا أصريت قلت هذا إيميل بين يمكن وحدة من صاحباتي وبدأت أكلمه من ايميل البنت وأهدده إني راح أفضحه عندزوجته وأهلها ورسلت كل المحادثات وصورته ع إيميل زوجته وكتبت لها ريالة كأني فاعلة خير.. وهنا طبعا يجي دورك تصارحيه وتوريه رسايل البنت اللي هي انت طبعا وتقوليله الله يهنيك وأنا ما توقعت انك تسوي في كذا وتذكريه بكل الأيام الحلوة اللي بينكم والله عدها راح يعتذر ويبوس راسك أطلبي منه وقتها وعد إنه ما يخونك وإنه إذا كررها راح تشتكي لأهلك وتوريهم المحادثات المهم انه راح يتوب بإذن الله وسامحيه ولا ترجعي تذكريه بغلطته .. وبالتوفيق .. |
اقتباس:
رااااااائع صنيعك يا أم حسان :22: بالنسبة لك يا أختي ، تقربي من زوجك أكثر وأدعي الله له بالصلاح والهداية لأنه واضح من اسلوبك أنك إنسانة مسالمة جداً ولا تريدين المشاكل ، وأعتقد أن بعض الأزواج يتمادى في بعض تصرفاته في ظل وجود زوجة مطيعة ومسالمة .. أسأل الله أن يوفقك ويهدي زوجك إنه سميعٌ مجيب .. |
ام حســــــــان
ماشاء الله عليك فعلتي الصواب اختي.... اتمنى اختنا صاحبة الموضوع تعمل مثلك..... |
اقتباس:
سبحان الله جات في بالي الفكره والحين تشجعت بعد ما قريت ردك حبيبتي المشكله اهلي بعيد عني مسافه 1000 كيلو.. و انا بروح لهم على اني زعلانه وخايفه والله ومدري الي بسويه صح او خطاء بعدين انا اصلا سويت اضافه للبنت وتكلمت وقالت كل شي وعلمته المحادثه وانكرها على انه كلامه بس زوجي غريب الاطوار بس بعدها جاني وباس عيوني وراسي عرف انه غلطان بس ما يبغى يبين لي |
اقتباس:
والله يااختي اني على طول معه وقريبه منه بس هو حتى وانا جنبه جالسه وعيونه على هالنت تسلمين يا قلبي مشكوره |
اقتباس:
انه يدري بس خايف يعترف |
حبيبتي
انا كنت بسويها بس لما كان زوجي يغازل غيري ..بالجوال قلت باخذ حقي لانه يحط اللوم علي اني اتجسس ويقلب الطاوله وبعدها مليت وتركته لله كنت باخذ شريحة بدون اسم واقلد عليه بنت ...ببرنامج عشان مايعرف صوتي واتغزل فيه واجره معي ..واسجل محادثتنا ولما يرفع صوته ويشترط علي اسمعه المحادثه ...... بس مليت وتركتها طمنينا اذا جربتي هالخطه مالها دخل انك تروحين للبنت انت سوي ايميل جديد وكلمي زوجك منه بس لاتسألينه عن زوجته مباشره خليها بعد ثاني محادثه او 3 محادثه عشان مايشك بالبدايه تتعرفين عليه وتحطين ان عمرك اكبر منك بكم سنه او اصغر وانك متزوجه بس زوجك منقص عليك من نواحي عديده .......!!!! بس انتبهي تقولين عيوبه هو ...يعني عالنت ومدري ايش لا قولي بعض عيوبه والباقي الفي من عندك عشان مايشك شوي شوي ثاني يوم كلميه عن زوجته .... اذا هو فتح لك السالفه قولي له اللي بخاطرك بحييث انها تكون غلط عليه..... ومع المحادثات سجليهم واحفظيهم بعيد عنه ولما تواجهينه لاتعترفين له مهما صارت علاققتكم حلوووووه |
اقتباس:
لأ يأ اختي أبدااااااااااا ما أنصحك تتركي بيتك بحجة انك زعلانة أنا صحيح معاكِ ان هذا الموضوع يزعل ويحز في الخاطر لكن حلك لهذا الموضوع بالذات بهذي الطريقة انت كذا بالعكس توفري له جو يآخذ راحته ويتمادى يسوي أشياء اكثر في غيابك ممكن توصل انه يدخلها بيتك ويسوي آشياء ماتخطر على بالك بالعكس انت فكري انك تكوني انت الاساس وهي اللي تخرج من حياتكم مو انتِ تخرجي وتفضي الجو لزوجك يسوي البلاوي لا أخفيك يا اختي اغلب البيوت تشتكي من اللي تشتكي انت منه لكن بالهدوء والصبر والذكاء تقدري تحلي المشكلة أتمنى ان ربي يفرج همك وهمي وهم كل مهموم يارب العالمين |
اسمعي يا عزيزتي أنا ما تركت بيتي أبدا بحجة إني زعلانة لأنه هذا الشي ضدي أكيييد بل بالعكس خليت الوضع إني ماأبغى أتركه لوحده وإني ما أقدر أتحمل الأيام من غيره .. وترى وضعي مو بعيد عن وضعك انا كمان أهلي بعيدين عني بس اللي ساعدني إني حامل وخايفة على جنيني و الدكتورة قالت لازم لك راحة فهذا اللي خلاه يوديني بيت أهلي مسافة 700 كيلو تقريبا .. عاد انتي فكري لك في خطة !! وصدقيني في بعض الرجال بس كذا من باب الفضاوة مو إنك مقصرة معاه .. أو إنه طفشان منك .. يعني أنا مثلا زوجي يموت في وقال هذا الكلام في المحادثة لما سويت نفسي بنت قال إنه متزوج ويحب زوجته وإن مسحيل تكون احلى من زوجته حتى لما أرسلت له صورة وحدة من ملكات الجمال طبعا هو ما يعرفها قال إن زوجته أحلى بكل صراحة .. يعني مو شرط يكون زوجك كارهك أو حاس بتقصيرك لا .. ترى الرجال زيالطفل حتى بعد ما تجلسي معاه وتصارحيه خليه على صدرك وأمسي راسه بكل حنان وقوليله ان اللي صدمك إنك متأكذه إنه يحبك بسما تدري ليش سوى كذا .. وبعدها أسمعيه خليه يقول كل اللي عنده ولا تقاطعيه وفي الأخير طلعي القهر اللي في نفسك وخليه يشوف دموووعك والله راح يتحول رجال ثاني وراح تدعيلي .. صدقيني راح يوعدك بدون ما تطلبي منه أهم شي إنك تقوليله أنا مسامحتك لأني متأكدة من حبك لي وإنك ما راح تقدر تعيش من غيري لأني ما أقدرأعيش من غيرك .. أسأل الله أن يهدئ قلبك ويهدي زوجــك ويسخره لك وكل نساء المسلمين ياااااااااااارب .. |
[COLOR="DarkOrchid"]ما شااااااااااااااااء الله عليك يا أم حسااااااااااان من جد انك
حرمه ذكية وعااااااااااااقلة الله يتمم عليك بعقلك تصرف ما يجي على بال اي وحدة الا اذا كانت من جد تحب زوجها و بيتها مثلك [/ COLOR] |
اقتباس:
لالا ما توصل اروح عندهاالله يبعدني عنها ويستر عليها يسلم ردك يا قلبي |
اقتباس:
والله صادقه بس احس اذا ما اخذله قرصه ما راح يتوب بيقول عادي هذا انا سويت كذا ولا زعلت وانا اساسا من قبل اكشفه كنت ناويه اروح لان موبس هاذي المشكله فيه غيرهابس والله تهون عند كل المشاكل ولا يخوني وان شاء الله بسوي الي على وربك كريم الله يسعدك يارب ومشكوره على رايك يا قلبي |
اقتباس:
قالتها البنت لما سولفت معها زوجك يحبك بس وقت الفضى يدخل النت يتسلى قلت لها بس مو على حسابي وزوجك يحب يتعرف والله مدري احنا باي زمن والله لو لقا لي محادثه مع واحد وقلت له نفس الكلام الي كتبه للبنت وش بيسوي عاد انتم تعرفون بس احنا مساكين الله لنا بس ان شا ءالله يا قلبي اسويها الله يكون بعوني واقدر |
انا اشوف انه صعبه تروحين لبيت اهلك
اولا اهلك بيستغربون وهنا بيتدخلون وتكبر المشكله ثانيا :زوجك وش بتكون ردة فعله يعني انتي كذا فضيتي لهم الجو بالعكس خليك ببيتك وجهة نظر ... |
حاولي تصبري وتتصرفي بحكمة انا متزوج من 15 سنه كنت مثل زوجك واكثر علاقات مع غير زوجتي وكنت احاول اداري لكن زوجتي بعض المرات تصيدني بس الله يجزاها خير تتصرف بحكمة وكنت الوم نفسي واقول ليه اسبب لها كل ذا الالم لانها كانت تقول لي الله يهديك ليه كذا وانا احبك ومن ذا الكلام وكان ياثر فيني واعتقد لو سبت وشتمت وهددت كان يمكن انفصلنا من زمان اصبري عليه واقولها بالبنط العريض لكل زوجه الرجل طبعه كذا بس الاختلاف ان بعضهم يرده دينه وبعضهم ما يعرف يكون علاقة مع غير زوجته بطبعه خواف من الاناث وردة فعلهم او انه يخاف من الاهانه
|
لاحول ولاقوة الابالله كلام معقوول بكرالله يسخرلك زوجك ويهديه
وجاولي تشبعيين زوجك عاطفيا وووووووووو؟كل يوم اعملي مفاجئه وانسي الماسنجر ؟؟ وهو بيرجع لوحده لاتنسين الدعاء ولاستغفار ورمضان كريم |
اخوي مشاعر رجل ياليت تتكلم اكثر عن مشكلتك مع زوجتك
نبي نعرف كيف كانت تتصرف معك بحكمه ووش الكلام اللي كان يأثر فيك ويخليك تندم؟؟ |
اقتباس:
بس لو رحت لاهلي اكيد بيحس يعني من بيقوم بدوري في البيت الي يسولف معهم في النت اكيد لا بس والله اني افكر وللحين ماادري بس الله يقدم الي فيه الخير |
اقتباس:
انا الي صابره على كل شي وعلى الحلوه المره وش يبي في غيري وش مستفيد اصلا اذا بيضيع وقت يسولف معي طيب انا احب اسولف وهو للاسف ساااااااااكت دائما وبصراحه للحين ما عرفت وش الي براسه دائما اقوله وش فيك وش مضايقك يقول ولا شي واخرها الاقيه مشتكي للبنات يشتكيلي انا طيب وللحين يا اخوي والله ما قلتله شي غير قولي ليش سويت كذا ولا جاوبني اقوله وش انا مقصره فيه يقول ولا شي ما قصرتي بشي وهو لوانه مو خايف كان قالي بس خوفه راده يتكلم بس الله يعين اصلا مستغرب مني ليش سويت كذا ما كان يتوقع اني راح اسولف مع البنت واكشفه بس الله له حكمه كشفه لي وانت عطيتني بردك راحه شوي الله يسعدك ويخليك لزوجتك ويخليك لها يارب |
| الساعة الآن 09:04 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©