|
يا متزوجات كيف رح تتصرفوا في هالموقف .. ؟
السلام عليكم
شخباركم خواتي :d بشرحلكم موقف وياريت كل وحده تقولي كيف رح تتصرف لو انحطت في هالموقف بكل أمانه وصراحه انتي وحده متزوجة من كم شهر .. وساكنه انتي وزوجك ببيت لحالكم في يوم .. يتصل .. اخو زوجك على زوجك .. ويقوله .. انه هو وزوجته بيروحون السوق وبناتهم ناموا بالسيارة أول ما طلعوا من البيت .. يقوله بنزلهم عندك .. وانا وزوجتي نروح السوق الزوج قاله والله انا بطلع مشوار وبعدين أرجع البيت ناوي أطلع انا وزوجتي (وهذي الحقيقه) مع العلم البنتين صغار وحده عمرها سنتين ونص والثانيه مو مكمله سنة وصعب التعامل معاهم جدا وما يتقبلون حد .. الكبيرة متعلقه بأبوها بشكل مو طبيعي وكله تصارخ وتبكي لو ما شفته والصغيرة اذا شافت حد غريب على طول صياح وصراخ هالموقف صارلي أمس بصراحه تفاجأت جدا .. يعني زوجة حمي حتى ما اتصلت فيني تستأذني و لا شي !! وغير كذا البنات عندهم خدامة خاصه فيهم .. وهم ساكنين ببيت أهل زوجي .. ماشاءالله بيت عايلة كبير وما يخلى ... كان خلوهم بالبيت .. ليش يطلعونهم اذا البنات بينامون .. خصوصا الوقت كان متأخر .. وانا من عايلة ثانيه ,, وماعمري مسكت بناتهم .. انا أحب بناتهم وايد وأحب الأطفال بشكل عام بس بصراحه بناتهم صعبات وايد ما يبون أي احد .. حتى عماتهم تعبانين منهم ... كل ما نروح عندهم أشوف الكبيرة تصارخ وتصيح ولما أسأل ليش تصيح يقولوا لأنه أبوها طلع .. حتى لو رايح الغرفه بس .. حاولت أتقرب من البنتين بكل الطرق بما اني أحب الأطفال .. بس بدون فايده .. وصارحت زوجي من استغرابي من هالموقف .. قلتله كيف يعني يبوني أمسك البنات وهم رايحين السوق؟؟ والسوق بعيد أصلا .. يعني الله يعلم متى بيرجعون ما صارت بصراحه .. وحتى لو نايمين مصيرهم بيصحوا .. لأنهم أصلا ما ينامون الا وقت متأخر جدا من اللليل ويبيدون يصارخون ويبكون ... أخاف أتحمل مسؤوليتهم ... بعدين اذا صار شي لا سمح الله يطلع مني غير كذا أمهم مو قريبة مني .. يعني لما نطلع رحلات أو نتلاقى .. كلامها قليل جدا و لا تفتح حوارات اذا كلمتها ردت .. واذا ما كلمتها عادي ما تسولف ... يمكن هذي طبيعتها كذا .. بس ما حسيتها قريبة مني .. أعزها واحترمها من بعيد لبعيد .. لأنها هي مسوية حواجز واللي خلاني أستغرب انها ما اتصلت فيني تستأذني !! وبصراحه تضايقت شوي .. وزوجي يقول انه ما في مبرر لزعلي .. وانه عادي هو رد عليهم بس متفاجأة من الموقف ... ما تحسونه غريب !!! ما عمري حد من أهل زوجي قاللي بنجيب عيالنا عندكم واحنا رايحين السوق بهالطريقة ايش رايكم انتو ؟؟؟؟ :_( |
ياحبيبتي عادي ولاتاخذين في بالك وكويس ان زوجك تصرف وتجي منه احسن ماتجي منك ....
انا اشوف بصراحه عيب لان المفروض انها هي اللي تكلمك وتعرض عليكي الموضوع .... والظروف اللي قلتيها لبيت الاهل جدا مناسبه عشان يخلونهم في البيت ومايطلعونهم .... يعني لومخلينهم مع الشغاله لحالهم كنت بقولك حرام لازم تاخذينهم بس طبعا مع شغالاتهم لانها اكيد متعوده عليهم وعارفتلهم .... لكن ماشاء الله البيت مليان فغريب موقفهم والله ... وفي النهايه اقولك حصل خير ولاتكبري الموضوع ولاشي ... وفي هالزمن الواحد يالله يتحمل عياله ومسؤليتهم وشلون بعيال غيره ؟؟؟؟ الله يريح بالك وقلبك ان شاء الله ... |
خلاص يا قلبي زوجك تصرف
اقول لك على موقف حصل معي كنت في النفاس مالي 20يوم وكانت الولاده خطر وقتها كتير وكان في عرس بالعيله اعتذرت وقتها لاني والده واين اضع اولادي وارسلت زوجي ويا ليتني رحت كان احسن والله الكل ومن غير اتصال ما لاقي الا الباب يندق ويدخلو العيال وقسما بالله منهم ولا رمى حتى السلام يومها فوق التعب تعب واتصل واقول لهم قدر المستطاع ابقو زوجي هناك لانه لوشاهد الاولاد لكان جن جنونه ثم انتي حبيبتي تقولي اعمارهم صغار يعني يحطوهم بالعربايه ويجروهم مافي لزوم يحطوهم عند حد انا ضد الفكره تماما ووقت تنحرجي قولي اسال زوجي وخليه هو يتصرف ومره على مره يتعودو انا قاعدتي الاساسيه هي كل راع مسؤول عن رعيته وعلى اشكال سلفتك كثر |
أشكرك apple-green لردك اللي ريحني
كنت بديت أقول يمكن أكون انانيه .. بس انا ما أتخيل أروح أخلي عيالي بالمستقبل بيت احد وانا طالعه أتسوق لأني عارفه ان الناس يا دوب يتحملوا عيالهم .. فما أتخيل أني أخلي عيالي بيت أي احد وقلت لزوجي انها المفروض كانت على الأقل تتصل تستأذني وتشوف ظروفي ... قاللي انا وانتي واحد ومن هالكلام بس انا مو مقتنعه .. أقوله ايه احنا واحد بس الطبيعي انها هي تكلمني ,, حتى لو أخوك كلمك .. وأذكر مرة هي سوت نفس الموقف لأختي الكبيرة (أختي ماخذها عم زوجي) .. اتصلت قالتلها بجيب بناتي عندكم .. وأختي كانت تبي تطلع هي وعيالها .. فقالتلها أختي خلاص ناخذهم معانا أكيد خدامتهم معاهم ...؟؟؟ قالتلها لا مو ناوية أجيب الخدامه ؟؟؟ تخيلوا !!!!! بس انحرجت وجابتهم هم والخدامه .. بصراحه مسؤوليه اذا صارلهم شي لا سمح الله انا خلاص مو متضايقة بس حبيت أخذ أرائكم لأنها تهمني .. وأشوف اذا انا كنت غلطانه أو لأ مشكورة عزيزتي |
فلفوله يا عمري
ما اشوف داعي للزعل ابدا مثل ما قال زوجك دام هو تصرف خلاص لا عاد تفتحين الموضوع اكيد هالشي حساس بالنسبه له خاصة انه اخوه اللي طلب عادي يا غالية عاادي مافي قصص كبيرة إلا اللي بنكبرها |
خالتو Green
تسعدني دايما ردودك ^_^ موقف صعب جدا اللي صارلك .. أستغرب انه في ناس كذا .. ما عندهم احساس و لا ذوق يعني أقل شي اتصال واستأذان .. وفي كل الأحوال انا نفس الشي لو زوجي وافق ما كنت رح أكون مرتاحه ويمكن لو امهم كلمتني .. كان موقفي اختلف شوي ... بس بشكل عام .. أحسه تصرف غلط انه الواحد يرمي مسؤوليه عياله لأي احد .. هم جابوهم .. هم يتحملوا مسؤوليتهم ... والله يا خالتو أمهم ما في بيني وبينها غير السلام عليكم وعليكم السلام .. حتى في مرة زوجها جابها وخلاها عندي حاولت أخذ وأعطي معاها ... بس ما في الا ترد على أسألتي وتسكت .. طول الجلسه هي تسولف بالتلفون وانا ماسكة البنت الصغيرة .. وما تتخيلي صراخ البنت ودموعها تبي امها .. والأم سوالف بالتلفون .... يمكن لو علاقتي فيها حلوة كنت رح أرحب بالفكرة :( |
اقتباس:
صحيح بكورة زوجي تصرف .. بس بعدين قعد يقولي يمكن أخوي بيظن اني مابي بناته أو ما بيه يجي عندي وعلى قولك القصة صغيرة .. مو مستاهله :) مشكورة بكوره بس كنت حابه أعرف كيف رح يكون موقفكم انتو يا بنات لو انحطيتوا بهالوضع ؟؟؟؟؟؟ محد رد علي |
انا بصراحة
عادي عندي والله ما عندي اي مشكله وما اخذ بهالامور ولا أتحسس بس هذا طبعي انا !! ما احب المشاكل وما اسيء لاظن بالناس ! دائما احط عذر للي قدامي على تصرفاته واحط نفسي مكانهم يمكن سلفتك انحرجت منك يمكن ناموا البنات وهم اقرب الى بيتك من بيت اهل زوجها يمكن حابة تتعشى مع زوجها لحالهم وما تبي ام زوجك تدري ! يمكن كثير اشياء :) |
وعليكم السلام ورحمة الله وبركاته أنا سأجيب على سؤالك لو وضعت في هذا الموقف ..شوفي يا أختي أنا دائما والحمد لله أسابق لفعل الخير ،وبنوتات صغار :15::15:ماراح يضايقوني أنا وزوجي ، وخاصة أنهم سيكملون نومهم في بيتي ولن يستيقضوا إلا بوجود والديهم . أما أذا صحيوا من نومهم وملئوا البيت صراخ،، راح تكون تجربة لي أنا وزوجي مليئة بالمغامرة والأكشن وراح نتنافس مين ينجح في أسكاتهم بصورة لطيفة :17:وتبقى هذه المغامره اللي أبطالها أطفال .ذكرى جميلة عالقة في ذهن زوجي وفي ذهني نسترجعها مع مرور الزمن كل ما شفنا الطفلتين :15::15:.:d ومن جانب أخر سأرى زوجي كيف يتصرف لو عندنا طفلتين وسأكتشف نفسي أنا أيضا هكذا ستكون ردة فعلي لهذا الموقف الحلو |
اقتباس:
سلفتها اصلا كلامها قليل سؤال و جواب لو كانت هناك مودة قوية كان ممكن ايصير او ممكن ايصير لو كان غرض الطلعة مش سوق مرض لا سمح الله يعنى مستشفى و من هدا الكلام انصحك فهمى زوجك ان كل واحد مسؤول عن حاله العيال عيالهم و لو كان زوجك يبى يهتم فيهم فترة غياب امهم هو حر لان الصغار صغيرين جدا و صعب التعامل مهم |
مرحبا اختي مواقف كثيرة تصير في كل عائلة لا تتصرفي ولا تحسسي لشئ عديها طنشي خلي المركب يسير في امان لا تكبري الموضوع ولا شئ لا عين شافت ولا اذن سمعت
خلي بالك من زوجك ومن بيتك دا هو الاهم |
اختي الموضوع عادي جدا ً
بس انتي شكلك حساسة بزيادة نصيحة من اخو لاخته لا تفكري بهذه الطريقة وإلا راح تصير مشاكل بينك وبين زوجت اخو زوجك في المستقبل الزواج يبغاله شوية صبر وتطنيش مو على كل شي يصير تدققي يمكن زوجت اخو زوجك كان عندها شي ظرف ما خلاها تتصل سبحان الله كل شي جايز ,,, حطي عشرة اعذار لها ولا تظني فيها الا كل خير اتمنى لك التوفيق اختي الله يسعدك دنيا واخره اعتقد ان الموضوع في المكان غير الصحيح يجب وضعه في قسم المتزوجين |
أشكر كل من رد على الموضوع
وجزاكم الله كل خير صدقوني انا مو زعلانه مثل ما انتم متصورين .. يعني استغربت الموقف .. لأني عمري ما مريت فيه قبل وبغيت أعرف تجاربكم وتصرفكم في مثل هالمواقف وحبيت أخذ أرائكم وعلاقتي في زوجة حمي عاديه ما رح تصير اي مشاكل و لا شي اللي قصدته انه ذوقيا كان المفروض هي تتصل ويمكن كان موقفي اختلف .. وبعدين انا مو مكبرة الموضوع أبدا .. كل السالفه بغيتكم تشاركوني .. بالنسبة لي الموضوع منتهي ومافي اي مشكلة ولما أشوفها كأنه ما صار شي أبدا .. لأنه هذا طبعي بعد .. أنسى على طول .. وما أحط بقلبي .. وهي في كل الأحوال انسانه طيبة اخي ابن المكلا شاكره لك رد .. انا اشوف الموضوع هذا مكانه الأنسب لأنه الموضوع يخص العلاقات الإجتماعيه ومثل ما قلتلكم يا جماعه انا حبيت أعرف ايش ردة فعلكم في مثل هالموقف لا أكثر لأن السالفه مو كبيرة ولا مسوية مشكله الحمدلله وشاكره لكم ^_^ |
الله يصلحك
اختي العزيزه الله يصلحك موضوع عادي جدا وما يستاهل انك تشاورين فيه احد يعني احسني النيه وحاولي تستشيرين بمواضيع احسن من كذا هذا من وجهة نظري كرجل اما من وجهة نظر الاخوات فهم وانتي ابخص بس احسني النية دائما يعني لا تحملين الموضوع اكثر ما اللازم وش رأي الاخوات في كلامي ودمتم بخير:26:
|
مرحبا فلافل..
بصراحة لو كنت مكانك راح أنزعج مثلك, يعني هي لا استأذنت منك ولا هي قريبة منك وفوق هاي عندها خدامة.. وبعدين أنا ما أفكر إني لما راح أجيب عيال راح أخليهم عند أي حد غير عند الماما كيف أروح أوديهم عند زوجة أخو زوجي؟! في ناس ما يراعون الخصوصية بين الزوجين ولا يراعون ظروف الناس.. ولك كل الحق في الإستغراب لكن ما دام زوجك رد على أخوه فخلاص انسي السالفة :) تحياتي يا عسل.. |
النسبة لي على حسب أعمار الأطفال حتى لو كانت علاقتي بها غير قوية , فعادي تخلي اطفالها عندي إذا ما كان عندي موعد هذا لو كان أعمارهم 3 او أكبر لكن سنة و نص و سنتين !!! ترى صعب جدا العناية بهم خصوصا انك ما تعرفي لطبائعهم و طلباتهم و يمكن يكونوا مرعوبين من شخص مو متعوديين عليه هنا راح أدور اي عذر لأتجنبهم صراحة و كل واحد أدرى بطاقته الحمد لله زوجك تصرف بما ناسبك لكن لو صار و أخذتيهم يمكن يكون بداية علاقة حلوة مع مرت حماك من يدري تحياتي ام فاطمة |
اقتباس:
أخي الله يهديك أولا الموضوع موجه للنســــــاء .. معليش اسمحلي .. :d اتطمن نيتي حسنة .. ومو معنى استغرابي من الموقف .. يعني نيتي سيئة اتجاه الحرمه بدليل اني قلت المره طيبة .. بس مافي بيني وبينها تواصل كبير .. يوصل لأنها تجيب بناتها عندي وتروح تتسوق !! والموضوع بالنسبة لي يحق الإستشارة عشان أعرف كيف أتصرف بالمستقبل بما اني زوجه جديدة لذلك أقولك الموضوع يخص النساء والدليل ردود العضوات الله يجزاهم كل خير .. يعني هالمواقف تصير لحريم وايد .. أشكر مرورك موفق |
اقتباس:
شفتي يا دلوعه يعني يحقلي أنزل هالستشارة :22: بيني وبين نفسي أقول يمكن زوجها اللي قرر مو هي .. ويمكن هي استحت وما كنت تبي الله أعلم بس مثل ما قلتي انا نسيت الموضوع والحمدلله كأن ما صار شي و الإنسان يتعلم من تجاربه ^_^ |
اقتباس:
جزاك الله كل خير اختي ام فاطمة رد زوجي كان عفوي جدا لأنه بالفعل كنا ناوين نطلع .. وبالنسبة للبنات .. احنا كل ويك اند نروح بيت عائلة زوجي .. وباستمرار أحب الاعبهم وأسولف وياهم وماشاءالله البنات عسولات بس مزاجيات جدا ومتعلقين في امهم وأبوهم .. يعني فجأة صياح وصراخ بدون مبرر .. بدليل أهل البيت هناك تعبانين منهم :29: وبالنسبة لزوجة حمي .. هي كذا طبعها .. ما أشوفها ببيت العايلة تسولف مع اي حد الا نادر :25: بعدين من وجهة نظري .. اذا الوحده وافقت انها تتحمل مسؤولية عيال مو عيالهما خلاص بتصير كل مرة .. يعني رح تعودهم انهم يجيبوا عيالهم عندها بمناسبة وبدون مناسبة مادري انا أشوف كذا أشكر كل من شارك برأي واستشاره في موضوعي جزاكم الله كل خير |
عفوا .. تم نقله الى قسمه المناسب ..المتزوجين |
معليش يا قلبي ما مداني أقرأ الردود كلها..
بس ممكن يكون أخو زوجك هو اللي قرر من حاله!!! والحرمة مالها دخل بالموضوع.. لأن أتصور أخو زوجي ممكن يسوي أي شي بدون ما يعلم زوجته.. أهم شي عنده راحته أولا بعدين زوجته ثانيا.. فلا تحطين في بالك.. بعدين أنا لو مكانك ممكن أستغرب.. وعادي ممكن أعديها خاصه أنها بتجيب الشغاله مع البنات.. يعني أنا مجرد أشرف عليهم.. والشغاله هي المسؤولة.. لكن إذا زودوها بيكون موقفي ثاااااني.. |
راح استقبلهم لو ما اعتذر زوجي لهم معني باليالله اتقبل عيالي اش عاد عيال الناس بس اقوله لا تتكرر وانبهه ان ليش هي مادقت علي
بس لو كنت انا مكان المرأه كان سويت مثلها يعنى لا ادق ولاشي يا اردهم بيت اهله عند عماتهم ولا اخلي اخوه يكلم زوجك وتصير الدقه براسه وبعدين يمكن هذا تحدي بينه وبين زوجته والله ما ينقال |
| الساعة الآن 11:35 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©